Էնթոնի Բլինքեն

Բլինքենն ու Էրդողանը քննարկել են Գազայի հակամարտությունը |azatutyun.am|

azatutyun.am: Միացյալ Նահանգների պետքարտուղար Էնթոնի Բլինքենը Ստամբուլում հանդիպել է Թուրքիայի նախագահ Ռեջեփ Թայիփ Էրդողանի հետ։ Նրանք խոսել են Գազայի հակամարտության մասին, հաղորդում է Պետդեպարտամենտը։ Բլինքենն ընդգծել է հակամարտությունների տարածումը կանխելու, պատանդների ազատ արձակման, մարդասիրական օգնության ընդլայնման և քաղաքացիական զոհերի թվի նվազման անհրաժեշտությունը, ինչպես նաև աշխատելու դեպի ավելի լայն, կայուն տարածաշրջանային խաղաղություն, որը կապահովի Իսրայելի անվտանգությունը և կնպաստի պաղեստինյան պետության ստեղծմանը։ Պետքարտուղար Բլինքենը և նախագահ Էրդողանը նաև քննարկել են եվրոպական անվտանգության առաջնահերթությունները, ներառյալ Ուկրաինայի ինքնիշխանության և տարածքային ամբողջականության պաշտպանությունը, ՆԱՏՕ-ին Շվեդիայի անդամակցության ավարտը և Միացյալ Նահանգների և Թուրքիայի միջև առևտրի և ներդրումների ամրապնդումը:

10:09 - 07 հունվարի, 2024

Թուրքիայի արտգործնախարարը Բլինքենի հետ քննարկել է Գազայում տիրող իրավիճակը |armenpress.am|

armenpress.am: Թուրքիայի արտգործնախարար Հաքան Ֆիդանը Ստամբուլում ԱՄՆ պետքարտուղար Էնթոնի Բլինքենի հետ հանդիպման ժամանակ քննարկել է իրավիճակը Գազայում, Շվեդիայի անդամակցությունը ՆԱՏՕ-ին և տարածաշրջանային հարցեր։ Այդ մասին հայտնել է Թուրքիայի արտաքին գործերի նախարարությունը։ «Նախարար Հաքան Ֆիդանը Ստամբուլի Վահդեթթին առանձնատանը հանդիպել է ԱՄՆ-ի պետքարտուղար Էնթոնի Բլինքենի հետ: Հանդիպման ընթացքում քննարկվել են Գազայի պատերազմը, հումանիտար ճգնաժամը, Շվեդիայի՝ ՆԱՏՕ-ին անդամակցելու գործընթացը, երկկողմ և տարածաշրջանային հարցեր», ասված է հաղորդագրության մեջ։

16:36 - 06 հունվարի, 2024

Էնթոնի Բլինքենը ժամանել է Թուրքիա

ԱՄՆ պետքարտուղար Էնթոնի Բլինքենը ժամանել է Թուրքիա։ Սպասվում են հանդիպումներ Ռեջեփ Թայիփ Էրդողանի և Հաքան Ֆիդանի հետ:

21:30 - 05 հունվարի, 2024

Ադրբեջանը կրոնական ազատության լուրջ խախտումների վերաբերյալ ԱՄՆ պետքարտուղարության հատուկ դիտարկման երկրների ցուցակում է |tert.am|

tert.am: ԱՄՆ պետքարտուղար Էնթոնի Բլինքենը հրապարակել է հաղորդագրություն, որում ասվում է. «Կրոնի կամ հավատի ազատության խթանումը եղել է ԱՄՆ արտաքին քաղաքականության հիմնական նպատակը այն պահից սկսած, երբ Կոնգրեսը 1998 թ. ընդունել և կիրառել է Կրոնական ազատության մասին միջազգային օրենքը: Այս շարունակական հանձնառության շրջանակում, ես Բիրման, Չինաստանի Ժողովրդական Հանրապետությունը, Կուբան, ԿԺԴՀ-ն, Էրիթրեան, Իրանը, Նիկարագուան, Պակիստանը, Ռուսաստանը, Սաուդյան Արաբիան, Տաջիկստանը և Թուրքմենստանը ներառել եմ հատուկ մտահոգություն առաջացնող երկրների ցուցակում, որտեղ թույլ են տրվում կրոնի ազատության լուրջ խախտումներ: Բացի այդ, ես Ալժիրը, Ադրբեջանը, Կենտրոնական Աֆրիկայի Հանրապետությունը, Կոմորյան կղզիները և Վիետնամը ներառել եմ հատուկ դիտարկման երկրների ցանկում՝ կրոնական ազատության լուրջ խախտումների կամ անհանդուրժողականություն ցուցաբերելու համար: Կառավարությունները պետք է վերջ դնեն այնպիսի չարաշահումներին, ինչպիսիք են հարձակումները կրոնական փոքրամասնությունների համայնքների անդամների և նրանց պաշտամունքի վայրերի վրա, համայնքային բռնությունները և երկարատև բանտարկությունը խաղաղ արտահայտման համար, անդրազգային բռնաճնշումները և կրոնական համայնքների նկատմամբ բռնության կոչերը: Շնորհիվ այն մարդկանց կայուն հանձնառության, որոնք չեն ցանկանում ընդունել ատելությունը, անհանդուրժողականությունը և հետապնդումը որպես ստատուս քվո, մի օր մենք կտեսնենք մի աշխարհ, որտեղ բոլոր մարդիկ կապրեն արժանապատվորեն և հավասար»:

13:15 - 05 հունվարի, 2024

Բլինքենը հունվարի 6-ին կայցելի Թուրքիա |azatutyun.am|

azatutyun.am: ԱՄՆ պետքարտուղար Էնթոնի Բլինքենը հունվարի 6-ին կայցելի Թուրքիա։ Այս մասին հայտնել է Թուրքիայի արտգործնախարար Հաքան Ֆիդանը։ TRT Haber հեռուստաալիքի փոխանցմամբ՝ ամերիկյան դիվանագիտության ղեկավարի բանակցությունների օրակարգում են Գազայի կարգավորումը, տարածաշրջանային խնդիրները, ՆԱՏՕ-ի ընդլայնումը և երկկողմ հարաբերությունները՝ մասնավորապես Թուրքիային F-16 կործանիչների վաճառքը։

18:38 - 03 հունվարի, 2024

Սպասում ենք ՀՀ-ԱՄՆ ավելի ամուր համագործակցություն․ Մակունցը մասնակցել է պետքարտուղար Բլինքենի կազմակերպած ընդունելությանը |aysor.am|

aysor.am: ԱՄՆ-ում ՀՀ դեսպան Լիլիթ Մակունցը X-ի իր միկրոբլոգում գրառում է կատարել և ԱՄՆ պետքարտուղար Էնթոնի Բլինքենի հետ առաքելությունների ղեկավարների տոնական ընդունելությունից լուսանկար հրապարակել։ «Հրաշալի էր ներկա գտնվել պետքարտուղար Բլինքենի և տիկին Ռայանի կողմից կազմակերպված առաքելությունների ղեկավարների տոնական ջերմ ընդունելությանը: 2024 թվականին սպասում ենք Հայաստան-ԱՄՆ ավելի ամուր համագործակցություն»,- գրել է դեսպան Մակունցը։

10:43 - 29 դեկտեմբերի, 2023

Բլինքենն ու Ֆիդանը հեռախոսազրույց են ունեցել |azatutyun.am|

azatutyun.am: ԱՄՆ պետքարտուղար Էնթոնի Բլինկենը երեկ հեռախոսազրույց է ունեցել Թուրքիայի արտգործնախարար Հաքան Ֆիդանի հետ։ Ըստ ԱՄՆ պետդեպարտամենտի խոսնակ Մեթյու Միլլերի՝ Բլինկենն ու Ֆիդանը քննարկել են Իսրայելի և Համասի պատերազմը՝ կարևորելով մասնավորապես, Գազայի հատված մարդասիրական օգնության ավելացումը։ ԱՄՆ պետքարտուղարն ու Թուրքիայի արտաքին գործերի նախարարը նաև շեշտել են հնարավորինս շուտ Շվեդիայի՝ ՆԱՏՕ-ին անդամակցելու հարցի կարևորությունը։

09:17 - 18 դեկտեմբերի, 2023

Բլինքենն անհամբեր սպասում է շուտով Վաշինգտոնում հյուրընկալելու Արարատ Միրզոյանին և Ջեյհուն Բայրամովին. Օ'Բրայեն |news.am|

news.am: Եվրոպայի և Եվրասիայի հարցերով ԱՄՆ-ի պետքարտուղարի օգնական Ջեյմս Օ՛Բրայանը X-ի իր միկրոբլոգում անդրադարձել է Բաքու կատարած այցին։ «Բաքվում դրական և կառուցողական հանդիպումներ ունեցա։ Ինչպես նախագահ Ալիևին ասացի, ԱՄՆ-ը ողջունում է Կենտրոնական բանկի կառավարչի և էներգետիկայի նախարարի այցերը, և պետքարտուղար Բլինքենն անհամբեր սպասում է շուտով Վաշինգտոնում հյուրընկալելու արտգործնախարարներ Արարատ Միրզոյանին և Ջեյհուն Բայրամովին՝ խաղաղ բանակցությունների համար»,- գրել է Օ՛Բրայանը։

11:15 - 07 դեկտեմբերի, 2023

Ադրբեջանի հանձնառության դեպքում հնարավոր կլինի խաղաղության պայմանագրի նախագծի համաձայնեցման ուղղությամբ գրանցել էական առաջընթաց. Միրզոյանը՝ Բլինքենին

Նոյեմբերի 29-ին ՀՀ ԱԳ նախարար Արարատ Միրզոյանը հանդիպում է ունեցել ԱՄՆ պետքարտուղար Էնթոնի Բլինքենի հետ։ Հանդիպումը կայացել է ք. Սկոպյեում՝ ԵԱՀԿ նախարարական համաժողովի շրջանակներում։ Այս մասին հայտնում են ՀՀ ԱԳՆ-ից։ Քննարկվել են Հարավային Կովկասում անվտանգությանն ու կայունությանն առնչվող հարցեր։ Անդրադարձ է կատարվել Հայաստանի և Ադրբեջանի միջև հարաբերությունների կարգավորման գործընթացի վերջին զարգացումներին։ Արարատ Միրզոյանն ընդգծել է, որ չնայած Ադրբեջանի կողմից ցուցաբերած ոչ կառուցողական կեցվածքին, Լեռնային Ղարաբաղում իրականացված էթնիկ զտմանն ու առկա հումանիտար խնդիրներին՝ ՀՀ-ն Ադրբեջանին է փոխանցել խաղաղության պայմանագրի նախագծի վերաբերյալ առաջարկները՝ հայտնի սկզբունքներին համապատասխան, և վերջիններիս Ադրբեջանի հստակ հանձնառության պարագայում հնարավոր կլինի նախագծի համաձայնեցման ուղղությամբ գրանցել էական առաջընթաց։ Անդրադարձ է կատարվել տարածաշրջանային ծրագրերի, որոնց համատեքստում Նախարար Միրզոյանը վկայակոչել է Հայաստանի կառավարության կողմից մշակված «Խաղաղության խաչմերուկ» նախագիծը՝ ընդգծելով նաև տարածաշրջանի կայունության համար դրա իրականացման արդյունքում ակնկալվող առավելությունները։ Հանդիպման ընթացքում զրուցակիցներն անդրադարձել են հայ-ամերիկյան երկկողմ օրակարգին։ Մտքեր են փոխանակվել երկկողմ և բազմակողմ հարթակներում առկա համագործակցության ու դրա ընդլայնման հեռանկարների շուրջ։

09:24 - 30 նոյեմբերի, 2023

Բլինքենն Ալիևի հետ զրույցում խոսել է Հայաստանի ու Ադրբեջանի միջև խաղաղության գործընթացի կարևորության մասին |1lurer.am|

1lurer.am: ԱՄՆ պետքարտուղար Էնթոնի Բլինքենը Ադրբեջանի նախագահ Իլհամ Ալիևի հետ զրույցում ողջունել է վերջինիս ձգտումը` կնքել ամուր և արժանապատիվ խաղաղության պայմանագիր Հայաստանի ու Ադրբեջանի միջև: Այդ մասին հայտնում է Պետդեպի պաշտոնական ներկայացուցիչ Մեթյու Միլլերը: «Պետքարտուղարն ընդունել է տառապանքները, որոնք այս երկարատև հակամարտությունը պատճառել է ինչպես ադրբեջանցիներին, այնպես էլ հայերին: Նա ընդգծել է այն առավելությունները, որոնք տարածաշրջանում կհայտնվեն խաղաղության հաստատումից հետո: Պետքարտուղարը քննարկել է ԱՄՆ ամուր հարաբերություններն Ադրբեջանի հետ, նշել հարաբերություններում անհանգստություն առաջացնող վերջին դրվագները, ինչպես նաև խոսել համագործակցության ամրապնդման հնարավորությունների մասին, հատկապես` խաղաղության գործընթացի շուրջ, նաև անդրադարձել բարձր մակարդակի փոխգործակցության կարևորությանը»,- նշել է Միլլերը: Նշենք, որ պետքարտուղարը զրույց է ունեցել նաև ՀՀ վարչապետ Նիկոլ Փաշինյանի հետ։

09:55 - 28 նոյեմբերի, 2023

Բլինքենը Փաշինյանի հետ զրույցում վերահաստատել է ԱՄՆ աջակցությունը ՀՀ ինքնիշխանությանն ու տարածքային ամբողջականությանը |1lurer.am|

1lurer.am: ԱՄՆ պետքարտուղար Էնթոնի Բլինքենը հեռախոսազրույցներ է ունեցել ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ: Այդ մասին հայտնում է Պետդեպի պաշտոնական ներկայացուցիչ Մեթյու Միլլերը: «Բլինքենն ու Փաշինյանը քննարկել են ԱՄՆ աջակցությունը Հայաստանի ու Ադրբեջանի միջև ամուր և արժանապատիվ խաղաղության համաձայնագրի հասնելու ջանքերին: Պետքարտուղարը վերահաստատել է ԱՄՆ շարունակական աջակցությունը Հայաստանի ինքնիշխանությանն ու տարածքային ամբողջականությանը և ընդգծել ՀՀ հետ երկկողմ համագործակցության ընդլայնմանն ուղղված ջանքերը, քանի որ մենք աշխատում ենք աջակցել բարգավաճող և ժողովրդավար ապագա կառուցելու նրա տեսլականին»,- ասել է նա:

09:52 - 28 նոյեմբերի, 2023

ԱՄՆ-ն պատրաստ չէ հետևել իսլամական երկրների կոչին՝ դադարեցնելու զենքի մատակարարումներն Իսրայելին |tert.am|

tert.am: Միացյալ Նահանգները պատրաստ չէ հետևել իսլամական երկրների կոչին՝ դադարեցնելու զենքի մատակարարումներն Իսրայելին։ Այս մասին ճեպազրույցում հայտարարել է ԱՄՆ պետքարտուղարության մամուլի խոսնակ Մեթյու Միլլերը։ «Ոչ: Դա քայլ է, որին մենք պատրաստ չենք: Ավելին՝ ներկայումս Կոնգրեսի քննարկմանն է հանձնվել դիմումը, որը, հուսով ենք, արագ ընթացք կստանա և որը ենթադրում է լրացուցիչ օգնության տրամադրում Իսրայելին, ինչպես նաև Ուկրաինային», - նշել է Միլլերը՝ պատասխանելով հարցին՝ պատրաստ է արդյոք ԱՄՆ-ն դադարեցնել զենքի մատակարարումը Սաուդյան Արաբիայի գահաժառանգ արքայազն Մուհամեդ բեն Սալման Ալ Սաուդի կոչից հետո։ Պատասխանելով հարցին՝ նախատեսում է արդյոք ԱՄՆ պետքարտուղար Էնթոնի Բլինկենը հանդիպել վերջերս Չինաստան այցելած մահմեդական երկրների պատվիրակության անդամների հետ՝ Պետդեպի խոսնակը հայտարարել է, որ կոնկրետ ժամանակացույց չկա, սակայն կողմերի փոխգործակցությունը շարունակվում է։ «Չինաստան մեկնած նախարարներն այն մարդիկ են, որոնց հետ նա (Բլինկենը - խմբ․) բազմաթիվ առիթներով հանդիպել է վերջին մի քանի շաբաթվա ընթացքում և բազմիցս հեռախոսազրույցներ է ունեցել: Մենք կշարունակենք համագործակցել նրանց հետ և՛ այստեղ, և՛ տարածաշրջանում։ Կարելի է ակնկալել, որ պետքարտուղարի այցերը տարածաշրջան դեռ ավարտված չեն»,- նշել է պաշտոնյան

09:36 - 22 նոյեմբերի, 2023

Բլինքենը հանդիպել է Երմակին, վերահաստատել ԱՄՆ հավատարմությունը Ուկրաինային |azatutyun.am|

azatutyun.am: ԱՄՆ Պետքարտուղար Էնթոնի Բլինքենը Վաշինգտոնում հանդիպել է Ուկրաինայի նախագահի աշխատակազմի ղեկավար Անդրեյ Երմակի հետ: Ըստ ԱՄՆ պետքարտուղարության խոսնակ Մեթյու Միլլերի՝ զրուցակիցները քննարկել են ռազմադաշտում վերջին զարգացումները և ձմռանն ընդառաջ նախապատրաստական աշխատանքները, ներառյալ հակաօդային պաշտպանության լրացուցիչ պարագաների շարունակական ապահովումը Ուկրաինա։ Պետքարտուղարը վերահաստատել է Միացյալ Նահանգների հավատարմությունը Ուկրաինային և նրա ժողովրդին։ Նա ընդգծել է, որ ԱՄՆ-ը շարունակում է աշխատել ավելի քան 50 դաշնակիցների և գործընկերների հետ՝ Ուկրաինային տրամադրելու այն աջակցությունը, որն անհրաժեշտ է՝ Ռուսաստանի ագրեսիայից իր ժողովրդին, ինքնիշխանությունը և անկախությունը պաշտպանելու համար։

09:43 - 14 նոյեմբերի, 2023

Բլինքեն․ «Ոչ «Համասը» և ոչ էլ Իսրայելը չեն կարող կառավարել Գազան» |azatutyun.am|

azatutyun.am: «Իսրայելը չի կարող կառավարել Գազան, սակայն չի բացառվում, որ այժմ ընթացող հակամարտության ավարտին այստեղ անցումային շրջան սահմանվի», - Ճապոնիա կատարած այցի ընթացքում այսօր հայտարարել է Միացյալ Նահանգների պետքարտուղար Էնթոնի Բլինքենը։ «Համաս»-ը չի կարող շարունակել Գազայի կառավարումը, քանի որ դա կհանգեցնի հոկտեմբերի 7-ի իրադարձությունների կրկնությանը։ Հստակ է նաև, որ Իսրայելը չի կարող կրկին օկուպացնել Գազան։ Այն, ինչ մեզ ասում են Իսրայելի ղեկավարները, վկայում է, որ նրանք նման մտադրություն չունեն», - նշել է ամերիկյան դիվանագիտության ղեկավարը։

15:05 - 08 նոյեմբերի, 2023

Բլինքենը պաշտոնական այցով ժամանել է Թուրքիա |tert.am|

tert.am: ԱՄՆ պետքարտուղար Էնթոնի Բլինքենը ժամանել է Անկարա՝ հանդիպելու Թուրքիայի արտաքին գործերի նախարար Հաքան Ֆիդանի հետ։ Ինչպես հաղորդում է թուրքական Անադոլուգործակալությունը, Բլինկենի ինքնաթիռը վայրէջք է կատարել «Էսենբոգա» միջազգային օդանավակայանում նոյեմբերի 5-ին՝ ժամը 23։58-ին։ Այսօր՝ նոյեմբերի 6-ին նախատեսվում են պաշտոնական բանակցություններ Բլինքենի ու Ֆիդանի միջև, որոնց ընթացքում քննարկվելու են Գազայի հատվածում տիրող իրավիճակը, տարածաշրջանային մի շարք խնդիրներ ու երկկողմ հարաբերություններին վերաբերող հարցեր։

09:26 - 06 նոյեմբերի, 2023

Մահմուդ Աբասը Էնթոնի Բլինքենին հայտնել է Գազայի հատվածում զինադադար հաստատելու անհրաժեշտության մասին |1lurer.am|

1lurer.am: Պաղեստինի նախագահ Մահմուդ Աբասը ԱՄՆ պետքարտուղար Էնթոնի Բլինքենի հետ հանդիպմանը, որը տեղի է ունեցել Պաղեստինի վարչական կենտրոն Ռամալլա քաղաքում, հայտնել է Գազայի հատվածում անհապաղ զինադադարի անհրաժեշտության մասին, տեղեկացմում է ՏԱՍՍ գործակալությունը՝ հղում կատարելով Պաղեստինի առաջնորդի մամուլի քարտուղար Նաբիլ Աբու Ռուդեյնային։ «Աբասը Բլինքենին ասել է անհապաղ հրադադարի և Գազայի հատված մարդասիրական օգնության մուտքի անհրաժեշտության մասին», - Աբու Ռուդեյնայի խոսքերն է մեջբերել Al Hadath հեռուստաալիքը: ԱՄՆ պետքարտուղարն իր հերթին «հաստատել է իր հանձնառությունը Գազայի հատվածում մարդասիրական օգնություն տրամադրելու և կենսապահովման ծառայությունների վերսկսմանը»։ Նա նաև ընդգծել է, որ «Վաշինգտոնը մերժում է պաղեստինցիների բռնի տեղահանումը» և «հանձնառու է սեփական պետության համար պաղեստինցիների ձգտումներին հասնելու ջանքերին»։

17:30 - 05 նոյեմբերի, 2023