ՆԱՏՕ

Հյուսիսատլանտյան դաշինքի կազմակերպությունը Հյուսիսատլանտյան պայմանագիրը ստորագրած անդամ-երկրների ստեղծած ռազմաքաղաքական կազմակերպությունն է, որը նպատակ է հետապնդում հավաքական անվտանգության և պաշտպանություն պարտականությունների իրականացումը։ Հիմնադրվել է 1949 թ․ ապրիլի 4-ին։ Հաճախ անվանում են ՆԱՏՕ՝ անգլերեն բառերի հապավումից։

ՆԱՏՕ-ին անդամակցում են 29 երկիր, որոնցից 27-ը եվրոպական են, երկուսը՝ հյուսիս-ամերիկյան: Հյուսիսատլանտյան դաշինքի որոշում կայացնող գլխավոր մարմինը Հյուսիսատլանտյան դաշինքի խորհուրդն է, իսկ միջազգային բարձրագույն պաշտոնյան՝ ՆԱՏՕ-ի գլխավոր քարտուղարը։

ՆԱՏՕ-ի գլխավոր քարտուղար Յենս Ստոլտենբերգը կայցելի Ադրբեջան |armenpress.am|

armenpress.am: ՆԱՏՕ-ի գլխավոր քարտուղար Յենս Ստոլտենբերգը մարտի 17-ին կայցելի Ադրբեջան: Այս մասին հայտնում են ադրբեջանական լրատվամիջոցները։ Այցի շրջանակներում ՆԱՏՕ-ի գլխավոր քարտուղարը մի շարք հանդիպումներ կունենա երկրի պաշտոնատար անձանց հետ, որոնց ընթացքում կքննարկի Ադրբեջանի և Հյուսիսատլանտյան դաշինքի միջև համագործակցության հարցերը: Ավելի վաղ՝ ՆԱՏՕ-ի գլխավոր քարտուղար Յենս Ստոլտենբերգը հայտնել էր, որ առաջիկայում նախատեսում է այցելել Վրաստան:

18:30 - 15 մարտի, 2024

ՆԱՏՕ-ն հավատարիմ է Մոլդովայի, Ադրբեջանի, Հայաստանի, Վրաստանի հետ գործընկերությանը. Ստոլտենբերգ |azatutyun.am|

azatutyun.am: ՆԱՏՕ-ի գլխավոր քարտուղար Յենս Ստոլտենբերգը վերահաստատել է հավատարմությունը Մոլդովայի, Ադրբեջանի, Հայաստանի և Վրաստանի հետ գործընկերային հարաբերություններին։ Անցյալ տարվա աշխատանքին նվիրված ամփոփիչ փաստաթղթում կա Հարավային Կովկասի երեք երկրների՝ Ադրբեջանի, Հայաստանի և Վրաստանի հետ կապերի ամրապնդման մասին հատուկ բաժին: «ՆԱՏՕ-ն աջակցություն է հայտնել այս երեք գործընկերներից յուրաքանչյուրի տարածքային ամբողջականությանը, քաղաքական անկախությանը և ինքնիշխանությանը: ՆԱՏՕ-ն խրախուսել է Հայաստանին և Ադրբեջանին կառուցողականորեն ներգրավվել տարբեր ձևաչափերով և ընդգծել հումանիտար խնդիրների լուծման կարևորությունը», - ասված է գլխավոր քարտուղարի զեկույցում։

20:55 - 14 մարտի, 2024

ՆԱՏՕ-ն չի պլանավորում միջուկային զենքեր տեղակայել նոր անդամ երկրներում․ Ստոլտենբերգ |armenpress.am|

armenpress.am: ՆԱՏՕ-ն չի նախատեսում Շվեդիայի հաշվին ընդլայնել դաշինքի այն անդամների թիվը, որտեղ միջուկային զենք է տեղակայված: Այդ մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը Շվեդիայի վարչապետի հետ համատեղ մամուլի ասուլիսում։ «Մենք միջուկային զենք ունեցող ՆԱՏՕ-ի երկրների թիվն ընդլայնելու պլաններ չունենք: Մենք նաև մշտապես գնահատում ենք մեր ուժերի կարողությունը, և ներկայում պլաններ չունենք Շվեդիայում նոր մարտական խմբերի առնչությամբ», - ասել է նա: Ըստ Ստոլտենբերգի, եթե մի օր նման անհրաժեշտություն առաջանա, ապա Շվեդիան ինքը պետք է որոշում կայացնի։ «Շվեդիան անկախ երկիր է, որն ինքն է որոշումներ կայացնում։ ՆԱՏՕ-ին անդամակցությունը ոչ մի կերպ չի փոխի Շվեդիայի իրավունքը և ունակությունը՝ ասելու «ոչ» միջուկային զենքի տեղակայմանը», - ասել է ՆԱՏՕ-ի ղեկավարը։ Շվեդիան մարտի 7-ին պաշտոնապես դարձավ ՆԱՏՕ-ի 32-րդ անդամը։ Շվեդիայի դրոշի բարձրացման արարողությունը ՆԱՏՕ-ի կենտրոնակայանում տեղի է ունեցել մարտի 11-ին։

16:47 - 11 մարտի, 2024

ՆԱՏՕ-ի կենտրոնակայանում տեղի է ունեցել Շվեդիայի դրոշի բարձրացման արարողությունը |armenpress.am|

armenpress.am: Բրյուսելում ՆԱՏՕ-ի կենտրոնակայանում տեղի է ունեցել Շվեդիայի դրոշի բարձրացման արարողությունը։ Արարողության տեսանյութը X սոցիալական հարթակի իր էջում տեղադրել է ՆԱՏՕ-ի գլխավոր քարտուղար Յենս Ստոլտենբերգը։ Շվեդիան դարձել է Հյուսիսատլանտյան դաշինքի 32-րդ անդամը։ Ստոլտենբերգը ողջունել է Ստոկհոլմի անդամակցությունը դաշինքին, իսկ Շվեդիայի վարչապետ Ուլֆ Քրիստերսոնը շնորհակալություն է հայտնել իր երկիրը ՆԱՏՕ-ի կազմ ընդունելու համար։

16:25 - 11 մարտի, 2024

«ՆԱՏՕ-ի ուժերի ներկայությունն Ուկրաինայում այնքան էլ անհավանական չէ». Լեհաստանի ԱԳ նախարար |azatutyun.am|

azatutyun.am: «ՆԱՏՕ-ի ուժերի ներկայությունն Ուկրաինայում այնքան էլ անհավանական չէ»,- հայտարարել է Լեհաստանի արտգործնախարար Ռադոսլավ Սիկորսկին երկրի խորհրդարանում՝ Սեյմում, քննարկումների ընթացքում՝ ժամեր անց իր այս հայտարարությունը տարածելով նաև սոցցանցերում գրառման տեսքով։ Լեհաստանի արտաքին քաղաքական գերատեսչության ղեկավարը նաև նշել է, թե «գնահատում է Ֆրանսիայի նախագահ Էմանյուել Մակրոնի պահվածքը, որն առաջինն էր, որ չէր բացառել Դաշինքի ուժերի հնարավոր տեղակայումը Ուկրաինայի տարածքում»։ Հիշեցնենք, որ Ֆրանսիայի նախագահ Էմանուել Մակրոնը չէր բացառել ԵՄ երկրների զորքերի տեղակայումը Ուկրաինայում: Լեհաստանի պաշտպանության փոխնախարար Սեզարի Տոմչիկն էլ հայտարարել էր, որ Լեհաստանը չի նախատեսում զորքեր ուղարկել Ուկրաինա:

16:27 - 09 մարտի, 2024

Շվեդիան պաշտոնապես միացավ ՆԱՏՕ–ին |armeniasputnik.am|

armeniasputnik.am: Շվեդիայի Թագավորությունը պաշտոնապես միացել է ՆԱՏՕ–ին։ Տեղեկությունը, ՌԻԱ Նովոստիի փոխանցմամբ, հայտնում է ԱՄՆ Պետդեպարտամենտը։ «Արձանագրությունն ուժի մեջ է մտել 2024 թվականի մարտի 7-ին»,– ասվում է հաղորդագրությունում։ Այդպիսով, սկանդինավյան երկիրը դարձավ Հյուսիսատլանտյան դաշինքի 32-րդ անդամը։ Հունգարիայի ԱԳ նախարար Պետեր Սիարտոն հայտարարել է, որ պաշտոնական ընթացակարգը կավարտվի այսօր երեկոյան, իսկ Բրյուսելում ՆԱՏՕ–ի կենտրոնակայանի մոտ շվեդական դրոշը կբարձրացնեն հաջորդ շաբաթվա սկզբին։ Շվեդիան և Ֆինլանդիան դաշինքին անդամակցելու հայտ էին ներկայացրել Ուկրաինայում ռուսական հատուկ գործողության մեկնարկից հետո։ Ֆինլանդիան 2023 թվականի ապրիլի 4-ին պաշտոնապես դարձավ դաշինքի 31-րդ անդամը։

21:10 - 07 մարտի, 2024

Շվեդիան այսօր պաշտոնապես կդառնա ՆԱՏՕ-ի անդամ. Սպիտակ տուն |1lurer.am|

1lurer.am: Շվեդիան այսօր պաշտոնապես կդառնա ՆԱՏՕ-ի անդամ՝ նշված է Սպիտակ տան հայտարարության մեջ: Այսպիսով՝ թագավորությունը կդառնա դաշինքի 32-րդ անդամը: ԱՄՆ նախագահի վարչակազմում նշել են, որ Շվեդիան ամուր ժողովրդավարություն է՝ մարտունակ բանակով, որը կիսում է ՆԱՏՕ-ի արժեքներն ու խաղաղության տեսլականը: Ընդգծվում է, որ ՆԱՏՕ-ում Շվեդիայի ներկայությունը Միացյալ Նահանգներին և դաշնակիցներին է՛լ ավելի անվտանգ կդարձնի: Հունգարիայի նախագահ Թամաշ Շույոկն ավելի վաղ՝ մարտի 5-ին, ստորագրել է ՆԱՏՕ-ին Շվեդիայի անդամակցության մասին համաձայնագրի վավերագիրը: Մարտի 11-ին նախատեսվում է Շվեդիայի դրոշի բարձրացման արարողությունը Բրյուսելում ՆԱՏՕ-ի կենտրոնակայանի առջև:

17:58 - 07 մարտի, 2024

Եթե Ուկրաինան պարտվի, ես իսկապես կարծում եմ՝ ՆԱՏՕ-ն կպայքարի Ռուսաստանի դեմ․ ԱՄՆ պաշտպանության նախարար |tert.am|

tert.am: Ուկրաինայի պարտությունը կարող է սպառնալ ուղղակի ռազմական բախում Ռուսաստանի և ՆԱՏՕ-ի միջև։ Նման գնահատական է տվել ԱՄՆ պաշտպանության նախարար Լլոյդ Օսթինը։ Փոխանցում է ՏԱՍՍ-ը։ Օսթինի խոսքով՝ եթե Ուկրաինան պարտություն կրի, Ռուսաստանի ղեկավարությունը «դադար չի տա»։ «Անկեղծ ասած, եթե Ուկրաինան ընկնի, ես իսկապես կարծում եմ, որ ՆԱՏՕ-ն կպայքարի Ռուսաստանի դեմ»,- ասել է ԱՄՆ պաշտպանության նախարարը։

21:53 - 29 փետրվարի, 2024

Հունգարիայի խորհրդարանը վավերացրել է ՆԱՏՕ-ին անդամակցելու Շվեդիայի հայտը |tert.am|

tert.am: Հունգարիայի խորհրդարանը գարնանային նստաշրջանի առաջին նիստում վավերացրել է ՆԱՏՕ-ին անդամակցելու Շվեդիայի հայտը, հեռարձակումը հեռարձակվել է նախարարների կաբինետի կայքում։ Վերջնական քվեարկության ժամանակ կողմ է եղել 188 պատգամավոր, դեմ՝ վեցը, չի քվեարկել չորս պատգամավոր։ Այս մասին փոխանցում է ՌԻԱ Նովոստին։ Այն բանից հետո, երբ Թուրքիան հունվարին վավերացրեց դաշինքին Շվեդիայի անդամակցությունը, Հունգարիան վերջին դաշնակից երկիրն էր, որը դա չարեց: Վավերացվելուց հետո այն պաշտոնապես կդառնա ՆԱՏՕ-ի 32-րդ անդամը:

20:50 - 26 փետրվարի, 2024

Հունգարիայի խորհրդարանը քննարկում է Շվեդիայի` ՆԱՏՕ-ին անդամակցության հարցը |azatutyun.am|

azatutyun.am: Հունգարական խորհրդարանը այս րոպեներին քննարկում է Շվեդիայի՝ ՆԱՏՕ-ին անդամակցության մասին արձանագրության վավերացման հարցը։ Հունգարիան Հյուսիսատլանտյան դաշինքի վերջին պետությունն է, որ դեռ չի վավերացրել Շվեդիայի անդամակցության հայտը։ Քննարկումների մեկնարկից առաջ խորհրդարանականների առջև ելույթ է ունեցել Հունգարիայի վարչապետ Վիկտոր Օրբանը՝ կոչ անելով նրանց կողմ քվեարկել Շվեդիայի անդամակցությանը ՆԱՏՕ-ին։ «Այդ երկրի մուտքը դաշինք կամրապնդի նաև Հունգարիայի անվտանգությունը», - հայտարարել է Օրբանը։

19:37 - 26 փետրվարի, 2024

ՆԱՏՕ-ն աջակցում է Հայաստանի և Ադրբեջանի միջև հարաբերությունների կարգավորմանն ուղղված ջանքերին. Կոլոմինա |news.am|

news.am: ՆԱՏՕ-ն աջակցում է Հայաստանի և Ադրբեջանի միջև հարաբերությունների կարգավորմանն ուղղված ջանքերին. Այս մասին X-ի իր միկրոբլոգում գրել է Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան։ «Շատ կարևոր է տեսնել, որ Հայաստանն ու Ադրբեջանը կրկին հանդիպեցին բարձր մակարդակով և պայմանավորվեցին երկարաժամկետ խաղաղության պայմանագրի շուրջ բանակցությունները շարունակելու անհրաժեշտության մասին։ ՆԱՏՕ-ն վճռականորեն աջակցում է Հայաստանի և Ադրբեջանի միջև հարաբերությունների կարգավորմանը»,- նշել է նա։

15:01 - 18 փետրվարի, 2024

ՆԱՏՕ-ի գլխավոր քարտուղարը դեմ է արտահայտվել համաեվրոպական միջուկային զենքի գաղափարին |tert.am|

tert.am: ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Եվրոպայի համար միջուկային կարողությունների ստեղծումը, երբ ՆԱՏՕ-ում արդեն իսկ կա միջուկային զսպման համակարգ, ոչ մի օգուտ չի բերի։ Այդ մասին հայտնում է ՌԻԱ Նովոստի-ն։ «ՆԱՏՕ-ի որոշ անդամների միջև միջուկային զսպման զուգահեռ համակարգերի ստեղծման գաղափարը, առանց ԱՄՆ-ի կամ Մեծ Բրիտանիայի ներառման, օգտակար չի լինի և միայն կխաթարի ընդհանուր միջուկային զսպումը, որը երկար տարիներ լավ է աշխատել շատերի համար»,- ասել է Ստոլտենբերգը Մյունխենի անվտանգության համաժողովում: Նա նաև նշել է, որ ցանկացած քննարկում, որը կասկածի տակ է դնում ներկայիս միջուկային զսպման համակարգը, միայն կխարխլի դաշինքը։

16:32 - 17 փետրվարի, 2024

Բրյուսելում մեկնարկում է ՆԱՏՕ-ի պաշտպանության նախարարների հանդիպումը |azatutyun.am|

azatutyun.am: v class="col-title col-xs-12 col-md-10 pull-right"> ՆԱՏՕ-ի գլխավոր քարտուղար Յենս Ստոլտենբերգը Բրյուսելում ՆԱՏՕ-Ուկրաինա խորհրդի պաշտպանության նախարարների մակարդակով հանդիպման մեկնարկին ողջունել է Ուկրաինայի պաշտպանության նախարար Ռուստեմ Ումերովին, ով նաև երկուշաբթի օրը առանձին խորհրդակցությանը միանալու է տեսակապի միջոցով։ «Ուկրաինան մնում է անկախ և ինքնիշխան երկիր։ Այսօր նախարար Ումերովը մեզ կտեղեկացնի Ուկրաինայում տիրող իրավիճակի մասին, և մենք կքննարկենք ինչպես տրամադրել հետագա աջակցությունը և Ուկրաինային ՆԱՏՕ-ի անդամակցությանը էլ ավելի մոտեցնելու հարցերը», - ասել է Ստոլտենբերգը:

18:55 - 15 փետրվարի, 2024

Արարատ Միրզոյանը և Խավիեր Կոլոմինան քննարկել են տարածաշրջանում իրավիճակի ապակայունացմանն ուղղված փորձերը

Բրյուսել այցի շրջանակներում ՀՀ ԱԳ նախարար Արարատ Միրզոյանը հանիդպել է նաև ՆԱՏՕ-ի գլխավոր քարտուղարի՝ Կովկասում և Կենտրոնական Ասիայում հատուկ ներկայացուցիչ Խավիեր Կոլոմինա Պիրիսի հետ: Ինչպես հայտնում են ՀՀ ԱԳՆ-ից, հանդիպման ընթացքում կողմերը քննարկել են տարածաշրջանային վերջին զարգացումները և իրավիճակի ապակայունացմանն ուղղված փորձերը: Արարատ Միրզոյանը վերահաստատել է առկա մարտահրավերների հաղթահարման հարցում Հայաստանի տեսլականն ու մոտեցումները՝ հիմնված հանրահայտ սկզբունքների վրա: Անդրադարձ է կատարվել նաև Հայաստան-ՆԱՏՕ գործընկերության հետագա ամրապնդմանն ուղղված ջանքերին:

14:47 - 14 փետրվարի, 2024

Ուկրաինայի համար լավագույն տարբերակը Ռուսաստանի և Արևմուտքի միջև բուֆերային գոտի դառնալն է. Օրբան |tert.am|

tert.am: Հունգարիայի վարչապետ Վիկտոր Օրբանը կարծում է, որ Ուկրաինան չպետք է անդամակցի ԵՄ-ին կամ ՆԱՏՕ-ին, և ավելի լավ է այն թողնել որպես «բուֆերային գոտի» Ռուսաստանի և մնացած Եվրոպայի միջև՝ ապահովելով անվտանգության որոշակի երաշխիքներ։ Ինչպես հաղորդում է eurointegration.com.ua-ը, այս մասին նա հայտարարել է Ավստրիայի նախկին կանցլեր Վոլֆգանգ Շյուսելի հետ զրույցում։ Օրբանը կարծում է, որ Ուկրաինան պետք է «բուֆերային գոտի» դարձնել Ռուսաստանի և Արևմուտքի միջև, քանի որ Մոսկվան երբեք չի ընդունի երկրի անդամակցությունը ԵՄ-ին և ՆԱՏՕ-ին։ «Ուզեք դա, թե չուզեք, ուկրաինացիներին դուր գա, թե ոչ, Ուկրաինան քարտեզի վրա է այնտեղ, որտեղ գտնվում է: Լավագույն հեռանկարն այն է, որ նա լինի բուֆերային գոտի Ռուսաստանի և Արևմուտքի միջև, իհարկե, անվտանգության երաշխիքներով: Եթե դա չօգնի, Ուկրաինան տարածքներ կկորցնի, Ռուսաստանը նորից, նորից ու նորից կկործանի Ուկրաինան: Ռուսաստանը երբեք չի ընդունի այն փաստը, որ իր սահմաններին լինի ԵՄ և ՆԱՏՕ անդամ Ուկրաինա»,- ասել է Օրբանը: Միևնույն ժամանակ, Հունգարիայի վարչապետը կարծում է, որ 2008 թվականին իսկապես հնարավոր էր Ուկրաինային և Վրաստանին ընդունել ԵՄ և ՆԱՏՕ, սակայն այդ հնարավորությունը բաց թողնվեց, և դրա հետ մեկտեղ՝ «Ուկրաինայի ապագա անդամակցությունը ԵՄ-ին և ՆԱՏՕ-ին»:

12:44 - 12 փետրվարի, 2024

Հունգարացի պատգամավորները բոյկոտել են ՆԱՏՕ-ին Շվեդիայի անդամակցության հարցով քվեարկությունը |1lurer.am|

1lurer.am: Հունգարիայի խորհրդարանը չի կարողացել վավերացնել ՆԱՏՕ-ին անդամակցելու Շվեդիայի հայտը՝ քվորումի բացակայության պատճառով: Իշխող կուսակցությունները, ունենալով 199-ից 133 մանդատ, ինչպես խոստացել էին, ներկա չեն եղել հանդիպմանը։ Ընդհանուր առմամբ նիստերի դահլիճում եղել է 51 պատգամավոր, բացակայել են 148-ը։ Ուրբաթ հայտնի է դարձել, որ իշխող Ֆիդես-Քրիստոնեադեմոկրատական ժողովրդական կուսակցությունը փետրվարի 5-ին չի մասնակցի ՆԱՏՕ-ին Շվեդիայի դիմումի վավերացման քվեարկության համար հրավիրված արտահերթ նիստին և կսպասի Հունգարիայի ու Շվեդիայի վարչապետների հանդիպմանը։ Ֆիդեսի խմբակցության ղեկավար Մատե Կոչիսը հայտարարել է, որ վավերացումը կարող է տեղի ունենալ գարնանային նստաշրջանի հենց սկզբում, որը մեկնարկում է փետրվարի վերջին։ Փետրվարի 5-ին արտահերթ նիստ էր նշանակվել, երբ ընդդիմադիր կուսակցությունների մի խումբ պատգամավորներ Հունգարիայի խորհրդարանի նախագահ Լասլո Կյովերին կոչ են արել արտահերթ նիստ հրավիրել՝ վավերացնելու Շվեդիայի դիմումը։ Կանոնակարգի համաձայն՝ նիստ է նշանակվում, եթե դա պահանջում է պատգամավորների առնվազն 20%-ը։

19:35 - 05 փետրվարի, 2024