Էկոնոմիկայի նախարարություն

ՀՀ էկոնոմիկայի նախարարությունը գործադիր իշխանության հանրապետական մարմին է, որը ՀՀ օրենսդրությամբ իրեն վերապահված ոլորտներում մշակում է տնտեսական քաղաքականությունը, ապահովում դրա իրականացնումը եւ արդյունքների գնահատումը։

Էկոնոմիկայի նախարարն է Վահան Քերոբյանը, տեղակալներն են Ավագ Ավանեսյանը, Տիգրան Գաբրիելյանը, Նաիրա Մարգարյանը, Վարոս Սիմոնյանը, Արման Խոջոյանը։

Խնդրում ու պահանջում ենք փոխել ընտրված խափանման միջոցը. «Սիներջիի» հայտարարությունը՝ ընկերության աշխատակիցների կալանավորման մասին

ՀՀ «Սիներջի Ինթրնեշնըլ Սիսթըմզ» ԲԸ մասնաճյուղը հայտարարություն է տարածել, որը ներկայացնում ենք ստորեւ. «Հարգելի հայրենակիցներ, Սիներջի ընկերության հիմնադիր Աշոտ Հովհաննիսյանի, ընկերության աշխատակցուհի Լիլի Մկրյանի և նախկին աշխատակցուհի Անի Գևորգյանի խափանման միջոցը որպես կալանավորում ընտրելը ցնցել է ամբողջ բիզնես, այդ թվում նաև ՏՏ ոլորտը։ Մեր հարգարժան գործընկերների հետ պատահածը որակում ենք որպես անհամաչափ խիստ խափանման միջոցի կիրառում և հավաստիացնում, որ մեր գործընկերներն անմեղ են։ Այսօր նրանք մեղադրվում են տեղի չունեցած, չշահած և իրավական ուժ չստացած մրցույթի շրջանակում խախտումներ կատարելու մեջ։ Հարկ է նշել, որ չկնքված պայմանագրով որևէ ֆինանսավորում կամ առավել ևս վճարում չի կատարվել, հետևաբար պետությանը չէր էլ կարող որևէ վնաս հասցվել։ Ավելին՝ հասկանալի չէ, թե որքանով է չափելի կամ ինչ սկզբունքով է հաշվարկվել պետությանը «հասցված» վնասի չափը։ Մինչդեռ իրական վնաս՝ և՛ բարոյական, և՛ առողջական, և՛ հոգեբանական կրում են մեր գործընկերները։ Այս ամենը լրջորեն արատավորում է նաև մեր գործարար համբավը։ Մեր սահմանած նշաձողը մշտապես եղել է բարձր որակը, առողջ մրցակցությունը, միջազգային բարձր չափորոշիչներին համապատասխանությունը։ Եվ այս համատեքստում ևս գործել ենք նույն սկզբունքով։ Հիշեցման կարգով նշենք, որ Աշոտ Հովհաննիսյանը ՏՏ ոլորտում հսկայական ներդրում ունի ոչ միայն իր հայրենիքում, այլև դրա սահմաններից դուրս։ Նրա ստեղծած ընկերությունն ավելի քան 25 տարի ՏՏ լուծումներ է տրամադրում և գովասանքի արժանանում աշխարհի 85-ից ավելի երկներում, համագործակցում համաշխարհային հեղինակավոր կազմակերպությունների հետ։ Անվիճելի է, որ ընկերությունը զգալի ավանդ է ունեցել և շարունակում է ունենալ նաև ՀՀ-ում ՏՏ ոլորտի կայացման և հետագա զարգացման գործում՝ հարյուրավոր նոր աշխատատեղեր ու մասնագիտացումների հնարավորություններ ստեղծելով։ Կրկին շեշտում ենք մեր գործընկերների անհասկանալի և անհիմն կալանավորման հանգամանքը։ Արդյոք այդքան լուրջ վտանգ էին ներկայացնում հասարակության կամ գործի քննության համար այդ բարեխիղճ ու արդարամիտ մարդիկ, որ ավելի մեղմ խափանման միջոց չի կիրառվել, երբ բազմաթիվ ծանր հանցանքների դեպքեր կան, որոնցում տնային կալանքն է կիրառվում որպես խափանման միջոց։ Մենք միշտ մեծ հպարտությամբ ու պատվով ենք ներկայացրել Հայաստանը համաշխարհային տարատեսակ հարթակներում, հպարտացել մեր տեխնոլոգիական լուծումներով և բարձր գնահատականի արժանացել մեր հաճախորդների կողմից։ Սիներջի ընկերությունն այսուհետ կրկնակի եռանդով է շարունակելու բարձր պահել մեր պետության շահերը, հզորացնել ու զարգացնել այն, գործել ազնիվ ու արդար և աշխարհի առջև բացել ՏՏ ներուժի նոր հեռանկարներ։ Մենք լիովին կողմնակից ենք արդարադատության կայացմանը և մեր պատրաստակամությունն ենք հայտնում աջակցելու իրականացվող քննությանը բոլոր փուլերում, բայց նաև խնդրում ու պահանջում ենք փոխել ընտրված խափանման միջոցը՝ կիրառելով օրենքով սահմանված ավելի մեղմ տեսակ»։ Հիշեցնենք՝ քննչական կոմիտեն հայտնել էր, որ փաստական տվյալներ են ստացվել, որ էկոնոմիկայի նախարարության պաշտոնատար անձինք նախնական համաձայնությամբ, մի խումբ անձանց դրդմամբ և օժանդակությամբ, չարաշահել են իրենց ծառայողական լիազորությունները: Մասնավորապես՝ «Հանրային ներդրումային ծրագրերի բանկի ստեղծման» ծառայության ձեռքբերման մրցույթի ընթացքում մասնակից բաժնետիրական ընկերություններից մեկի հաղթանակն ապահովելու համար, խախտելով «Գնումների մասին» օրենքի և Կառավարության որոշման պահանջները, մրցույթի մյուս մասնակցին համարել են պայմաններին չհամապատասխանող և փաստացի հեռացրել մրցույթից: Այս գործի շրջանակներում կալանավորվել են «Սիներջի» ընկերության տնօրեն Աշոտ Հովհաննիսյանը, ընկերության աշխատակցուհի Լիլի Մկրյանը և Ալեն Սիմոնյանի եղբոր կինը Անի Գևորգյանը, որը «Սիներջի» ընկերությունում բիզնեսի զարգացման տնօրեն է եղել։ Նշենք նաև, որ մոտ մեկուկես տարի առաջ «Սիներջին» մասնակցել է Էկոնոմիկայի նախարարության հայտարարած տենդերներից մեկին։

13:48 - 05 փետրվարի, 2024

Անի Իսպիրյանն անբասիր անձնավորություն է․ նա հիմա տանն է․կասկածում եմ, որ իրավապահներն ունեն այդ ապացույցները. Քերոբյան |news.am|

news.am: Վերջին իրավիճակը մեծապես խեղաթյուրել է փաստերը և արժեզրկել է Էկոնոմիկայի նախարարության թիմի աշխատանքը, որը վերջին տարիներին հսկայական ռեսուրսներ է դնում տնտեսության ֆենոմենալ աճի համար: Այս մասին նախօրեին Հանրային հեռուստաընկերության եթերում Պետրոս Ղազարյանի հետ հարցազրույցի ժամանակ ասաց Էկոնոմիկայի նախարար Վահան Քերոբյանը՝ անդրադառնալով Էկոնոմիկայի նախարարությունում վերջին սկանդալային զարգացումներին: «Ես առավելապես խոսում եմ էկոնոմիկայի փոխնախարար Անի Իսպիրյանի հետ փոխկապակցված գործի մասին: Անի Իսպիրյանը հիմա տանն է: Նա Ռուսաստանից վերադարձել է Հայաստան «Ի գործ» ծրագրով 2020 թվականին 44-օրյա պատերազմի ժամանակ։ Դա իմ կարծիքով շատ հայանվեր քայլ է, և ես կարող եմ ասել, որ վերջին 3 տարվա իմ համատեղ աշխատանքը իր հետ միայն ամրապնդել է իմ վերաբերմունքը իր նկատմամբ։ Ես ավելի քան վստահ եմ, որ ինքը՝ որպես անձնավորություն, անբասիր անձնավորություն է։ Նախ ասեմ, որ կոռուպցիայի դեմ պայքարը մեր ամենօրյա աշխատանքն է։ Եվ ես ունեմ աննկուն հավատարմություն այդ գործընթացի նկատմամբ։ Կոռուպցիան քաղցկեղ է, որը քայքայում է մեր հասարակությունը, մեր տնտեսական աճը, և մեր պարտքն է այն արմատախիլ անել։ Ես հասկանում եմ, որ Անի Իսպիրյանի դեմ մեղադրանքները կարող են կասկածներ առաջացնել հանրության մեջ, բայց պետք չի շտապ եզրակացություններ անել։ 2021 թվականին Էկոնոմիկայի նախարարությունից նույնկերպ ձերբակալեցին այն ժամանակ Լիցենզավորման վարչության պետին։ Արդեն 3 տարի է անցել, բայց մենք դեռևս չունենք մեղադրական ակտ։ Եկեք սպասենք, թե ուր են տանում իրադարձությունները»,- ասաց Քերոբյանը: Անդրադառնալով Անի Իսպիրյանի հետ փոխկապակցված գործին՝ նախարարը նշեց, որ քանի որ դա կառավարության միջոցառումների ծրագրի մեջ ընդգրկված ծրագիր է եղել, ինքը պարբերաբար տեղեկացված է եղել, թե ինչ ընթացք ունի, ինչքան արագ են կարողանում կատարել կառավարության միջոցառումների ծրագրով նախատեսված պարտավորությունները․ «Ես առավել քան վստահ եմ, որ այն պրոցեսները, որոնք ընթացել են, ամբողջությամբ համապատասխանում են Գնումների մասին օրենքին: Ես դետալները չգիտեմ, թե գնումների հանձնաժողովն ինչպիսի գործողություններ է արել, ուղղակի ցանկացած զեկուցման ժամանակ ես վստահեցվել եմ, որ գնումների մասին և ընդհանրապես ՀՀ օրենսդրությունը պաշտպանվել է»։ Նրա խոսքով, ըստ այդ միջոցառման, Էկոնոմիկայի նախարարությունը պետք է ձեռք բերեր «Հանրային ներդրումային ծրագրերի բանկ» կոչվող ծրագրային ապահովումը, որպեսզի այն տասնյակ, հարյուրավոր կապիտալ ներդրումային ծրագրերը, որոնք արվում են պետության կողմից, պատշաճ կերպով վերահսկվեին: Դա IT ծրագիր է: «Դա մրցութային պրոցես է եղել, որին մասնակցել է երկու ընկերություն, և այն մեղադրանքները, որոնք մենք ունենք, որ ինչ-որ մի ընկերության շահերը ոտնահարվել են, իրականում այսօր էկոնոմիկայի նախարարության պայմանագիրը հենց այդ ընկերության հետ է: Այն պնդումը, որ պետությանը էական վնասներ են հասցվել, բացարձակապես չի համապատասխանում իրականությանը: Մյուս կազմակերպությունը ինչ-որ փուլում ճանաչվել է հաղթող, սակայն բողոքարկումների ընթացքում վերանայվել է այդ որոշումը և հաղթող է ճանաչվել մյուս ընկերությունը, որի շահերն իբր թե ոտնահարվել են»,- ասաց Վահան Քերոբյանը: Նա օրինակ բերեց, որ նույն էկոնոմիկայի նախարարությունում մարդիկ չեն ցանկանում աշխատել ռիսկային բաժիններում, որտեղ մեծ գումարների հետ կապված գործառույթներ են իրականացվում. «Դա պարալիզացնում է մեր աշխատանքը, մարդիկ ասում են՝ որտե՞ղ է երաշխիքը, որ մեր ցանկացած որոշում չի համարվի պաշտոնի չարաշահում: Իսկ դատարան գնալ;ը համբավի ոտնահարում է, ժամանակի կորուստ է, ընտանիքի հետ կապված բազմաթիվ հարցեր են: Ոչ ոք չի ուզում հասնել այդ փուլին»: Դիտրակմանը, որ ըստ գործի նյութերի Անի Իսպիրյանը մեղադրվում է, որ հօգուտ այդ կազմակերպության ինչ-որ գործողություններ է արել, նախարարն ասաց. «Մեր ցանկացած գործողություն հօգուտ ինչ-որ կազմակերպության է: Պետք է ապացուցվի, որ այդտեղ եղել է կոռուպցիոն շահ: ՔԿ-ի բոլոր հայտարարություններում կոռուպցիոն շահը չի նկարագրվում, չի ասվում՝ էս մարդը որոշում է կայացրել, որովհետև ուներ այս շահը: Թող ապացուցեն, նոր կալանավորեն: Ես կասկածում եմ, որ իրավապահներն ունեն այդ ապացույցները: Երկու դեպքում էլ չեն ասում, որ այս մարդիկ կաշառք են վերցրել, որովհետև այդ մարդիկ իրենց բարեկամն են կամ կա կոռուպցիոն փաստ»,- հայտարարեց Վահան Քերոբյանը: Հիշեցնենք, որ երեկ ՀՀ քննչական կոմիտեն հայտարարել էր, որ ձերբակալվել է Էկոնոմիկայի նախարարի տեղակալ Անի Իսպիրյանը։ Նախաքննությամբ, մասնավորապես, պարզվել է, որ ՀՀ էկոնոմիկայի նախարարության պաշտոնատար անձինք «Հանրային ներդրումային ծրագրերի բանկի ստեղծման» ծառայության ձեռքբերման մրցույթի ընթացքում մրցույթի մասնակից N բաժնետիրական ընկերության տնօրենի և աշխատակիցների դրդմամբ և օժանդակությամբ, մրցույթին այդ ընկերության հաղթանակն ապահովելու համար, խախտելով «Գնումների մասին» ՀՀ օրենքի և ՀՀ կառավարության 2017 թվականի մայիսի 4-ի թիվ N 526-Ն որոշման պահանջները, մրցույթի մյուս մասնակից հիմնադրամի համար ստեղծել են մրցույթին վերջինիս մասնակցությունն իբր անհնար դարձնող պայմաններ, նրան ապօրինաբար դիտել որպես մրցույթի պայմաններին չհամապատասխանող ու փաստացի հեռացրել մրցույթից: Դրա արդյունքում մրցույթում հաղթող է ճանաչվել մրցակցից շուրջ երեք անգամ ավել՝ ավելի քան 392մլն. ՀՀ դրամ գնային առաջարկ ներկայացրած ընկերությունը: Նշված գործողությունների արդյունքում խախտվել են մրցույթի մասնակից հիմնադրամի իրավունքներն ու օրինական շահերը, Էական վնաս է պատճառվել պետությանը:

09:26 - 02 փետրվարի, 2024