Ուկրաինա

Ուկրաինան գտնվում է Արևելյան Եվրոպայում։ Այն հյուսիսից և հյուսիս-արևելքից սահմանակից է Ռուսաստանին, հյուսիս արևմուտքից՝ Բելառուսին, արևմուտքից՝ Լեհաստանին, Սլովակիային և Հունգարիային, հարավ արևմուտքից՝ Մոլդովային, հարավից և հարավ-արևելքից համապատասխանաբար Սև ծովին և Ազովի ծովին։

Այն 603,628 կմ² ցուցանիշով Եվրոպային հարակից երկրների մեջ Ռուսաստանի Դաշնությունից հետո երկրորդն է իր տարածքով։ Գործող նախագահը Վլադիմիր Զելենսկին է։

31 հազար ուկրաինացի զինվոր. Զելենսկին առաջին անգամ ներկայացրել է իր կորուստների թիվը |azatutyun.am|

azatutyun.am: Ուկրաինայի նախագահ Վլադիմիր Զելենսկին առաջին անգամ բացահայտել է ուկրաինական բանակի կորուստները Ռուսաստանի դեմ պատերազմում։ Նրա խոսքով՝ ագրեսիան ետ մղելիս մահացել է 31 հազար ուկրաինացի զինվոր։ Զելենսկին, սակայն, չի նշել վիրավորների ու անհետ կորածների թիվը։ Այդ թիվը, ըստ էության, ուկրաինական բանակի զոհերի թվի առաջին պաշտոնական հրապարակումն է: Վերջին անգամ Կիևը 2022-ի վերջին է ներկայացրել իր մարտական կորուստների քանակը. այն ժամանակ նախագահի օգնական Միխայիլ Պոդոլյակը հաղորդել էր 10-ից 13 հազար զինվորի զոհվելու մասին։ Փետրվարի 25-ին կայացած մամուլի ասուլիսին Ուկրաինայի նախագահն ասել է նաև, որ պատերազմում ռուսական կողմի զոհերի թիվը 180 հազար է, վիրավորներինը՝ կես միլիոն: Ռուսաստանը չի հրապարակում իր պատերազմական կորուստները։ Նոյեմբերին ՆԱՏՕ-ի գլխավոր քարտուղար Յենս Ստոլտենբերգը Ռուսաստանի կորուստները գնահատել էր 300 հազար:

21:21 - 25 փետրվարի, 2024

G7-ը կոչ է արել Ռուսաստանին դադարեցնել պատերազմը և դուրս բերել զորքերը Ուկրաինայի տարածքից |azatutyun.am|

azatutyun.am: Ուկրաինա Ռուսաստանի ներխուժման երկրորդ տարելիցի կապակցությամբ «Մեծ յոթնյակի» (G7) ղեկավարները հայտարարություն են տարածել՝ կոչ անելով Ռուսաստանին անհապաղ դադարեցնել պատերազմը: «Մենք կոչ ենք անում բոլոր երկրներին հարգել միջազգային իրավունքը և ոչ մի կերպ չհաստատել կամ արդարացնել Ռուսաստանի կողմից տարածքները ուժով զավթելու փորձերը: Մենք երբեք չենք ճանաչի Ուկրաինայի տարածքում Ռուսաստանի անցկացրած այսպես կոչված «ընտրությունները», ինչպես նաև դրանց արդյունքները»,- ասվում է հայտարարության մեջ։ G7-ը դատապարտել է Ռուսաստանի հարձակումները խաղաղ բնակչության և քաղաքացիական ենթակառուցվածքների վրա, ինչպես նաև Ուկրաինայում ռուսական զորքերի իրականացրած ռազմական հանցագործությունները: Երկրները նաև հայտարարել են, որ կշարունակեն միջոցներ ձեռնարկել Մոսկվայի եկամուտները նվազեցնելու համար։

12:21 - 25 փետրվարի, 2024

ՀՀ ԱԳՆ-ն արձագանքել է Ուկրաինայի նախագահի Հայաստան այցի մասին տարածվող լուրին |armenpress.am|

armenpress.am: Հայաստանի Հանրապետության արտաքին գործերի նախարարությունն արձագանքել է տարածվող լուրին, թե նախատեսվում է Ուկրաինայի նախագահ Վլադիմիր Զելենսկիի այցը Հայաստան։ «Կարող եմ ասել, որ բարձրաստիճան այցերի մասին պատշաճ ժամկետներում պաշտոնապես իրազեկվում է»,- «Արմենպրես»-ի հարցին ի պատասխան՝ ասաց ԱԳՆ մամուլի խոսնակ Անի Բադալյանը: Ավելի վաղ լրատվամիջոցները տեղեկություն էին տարածել, որ Ուկրաինայի նախագահ Վլադիմիր Զելենսկին մարտին կայցելի Երևան ու Բաքու։ Նշվում է, որ Հայաստան այցը, հավանաբար, տեղի կունենա մարտի 4-ին։

12:17 - 24 փետրվարի, 2024

Շվեդիան հայտարարել է Ուկրաինային զենքի մատակարարման ռեկորդային փաթեթի մասին |factor.am|

factor.am: Շվեդիայի իշխանությունները ներկայացրել են Ուկրաինային ռազմական օգնության 15-րդ փաթեթը, որի արժեքը դարձել է ամենամեծը՝ 7,1 մլրդ շվեդական կրոն (ավելի քան 680 մլն դոլար)։ Այս մասին հայտնել է SVT հեռուստաընկերությունը։ «Ի վերջո, խոսքը մարդասիրության և պարկեշտության մասին է: Խոսքը նաև արժեքների և շահերի պաշտպանության մասին է, որոնք կարևոր են Շվեդիայի և նրա շահերի համար»,- ասել է պաշտպանության նախարար Փոլ Ջոնսոնը մամուլի ասուլիսում: Աջակցության փաթեթը ներառում է 10 գրոհային Stridsbåt 90 նավակ, 20 դեսանտային նավակ, ստորջրյա զենքեր՝ ականներ և տորպեդներ, Robot 70 ՀՕՊ համակարգեր, TOW հակատանկային համակարգեր, նռնականետեր՝ զինամթերքով, հրետանային արկեր, ձեռքի նռնակներ, «Կարլ Գուստավ» նռնականետեր, բժշկական սարքավորումներ, շտապօգնության մեքենաներ։ Բացի այդ, 1 միլիարդ կրոն կուղղվի տարբեր միջոցներով ռազմական տեխնիկա գնելու, ևս 1 միլիարդ՝ Ուկրաինային նոր «Ստրիդսֆորդոն 90» զրահամեքենա պատվիրելու համար։ Եվս 400 միլիոն շվեդական կրոն կհատկացվի ուկրաինացիների կրթական տարբեր նախաձեռնություններին։ Փոլ Ջոնսոնի խոսքով՝ աջակցության նոր փաթեթը հատուկ մշակված է Ուկրաինայի կարիքները բավարարելու համար։

16:11 - 20 փետրվարի, 2024

Ուկրաինայի հարցով Հայաստանը Ռուսաստանի դաշնակիցը չէ, և սա մեր անկեղծ դիրքորոշումն է. վարչապետ |1lurer.am|

1lurer.am: Մեր արտաքին քաղաքական վեկտորի նպատակը պետք է լինի մեր երկրի շահերը: Մեր արտաքին քաղաքականության նպատակը մեր անկախությունը, ինքնիշխանությունը և տարածքային ամբողջականությունը պաշտպանելն է: ԵՄ-ի և արևմտյան մեր գործընկերների հետ հարաբերություններում կարևորում եմ ոչ միայն նյութական, այլև արժեբանական հարաբերությունները: Այս մասին Մյունխենի և հարակից շրջանների հայ համայնքի ներկայացուցիչների հետ հանդիպմանը նշել է ՀՀ վարչապետը՝ պատասխանելով Հայաստանի արտաքին քաղաքական վեկտորին վերաբերող հարցին: Նրա խոսքով՝ ԵՄ-ի հետ մեր հարաբերությունները զարգանում են նախ և առաջ ժողովրդավարության պատճառով: «ԵՄ-ի հետ մեր հարաբերություններն առաջին հերթին արժեբանական են»,- իր խոսքում ընդգծել է վարչապետը: Ինչ վերաբերում է Ուկրաինայի շուրջ զարգացումներին, վարչապետը նշել է, որ ստեղծվել է բարդ իրավիճակ: «Մեր դիրքորոշումն էլ է բարդ: Այն, որ մենք Ալմա Աթայի հռչակագիրը ընդունում ենք որպես մե՛զ համար, բայց այն միայն մեզ համար չէ: Ալմա Աթայի հռչակագիրը ընդունել են Խորհրդային Միության 13 հանրապետություն, այդ թվում՝ Ռուսաստանը և Ուկրաինան: Ուկրաինայի հարցում մեր ընկալումն այն է, որ Ալմա Աթայի հռչակագիրն է մեր անկախությունները ճանաչելու, տարածքային ամբողջականությունները ճանաչելու հիմքը: Մեր տրամաբանությամբ նույնը պետք է գործի նաև Ուկրաինայի պարագայում, որովհետև այդ թուղթը վերաբերում է բոլորիս: Եվ եթե դա քանդում ենք, ուրեմն քանդում ենք ամեն ինչ: Վաղուց եմ ասել՝ Ուկրաինայի հարցով Հայաստանը Ռուսաստանի դաշնակիցը չէ, և սա մեր անկեղծ դիրքորոշումն է: Առաջին անգամ այս մասին ասել եմ երկու տարի առաջ և շատ ցավում ենք, որ չենք կարող որևէ ազդեցություն ունենալ այդ իրադրության վրա։ Ուկրաինայի ժողովուրդը մեր բարեկամ ժողովուրդն է»,- եզրափակել է խոսքը Նիկոլ Փաշինյանը։

09:45 - 19 փետրվարի, 2024

Պուտինն Ուկրաինայի հետ կապված իրավիճակը Ռուսաստանի համար «կյանքի ու մահվան հարց» է անվանել |azatutyun.am|

azatutyun.am: Ուկրաինայի շուրջ ստեղծված իրավիճակը Արևմուտքի համար միայն մարտավարական դիրքորոշման հարց է, իսկ Ռուսաստանի համար՝ կյանքի ու մահվան հարց, ասել է ՌԴ նախագահ Վլադիմիր Պուտինը։ Նման կերպ նա մեկնաբանել է ամերիկացի լրագրող Թաքեր Կարլսոնի հետ իր հարցազրույցի «պատմական մասի» վերաբերյալ հատվածը։ Նա նշել է, որ և՛ ռուս, և՛ օտարերկրյա ունկնդիրների համար կարևոր է հասկանալ, թե «որքան զգայուն և կարևոր է» Ռուսաստանի համար «այն ամենն, ինչ տեղի է ունենում ուկրաինական ուղղությամբ»։ Հարցազրույցը բավականին քննադատվել էր, նշվել, որ լրագրողը քարոզչական հարթակ տրամադրեց Ռուսաստանի ղեկավարին՝ հնարավորություն տալով երկու ժամվա ընթացքում ևս մեկ անգամ շարադրել իր տեսակետները։ Ուկրաինա ներխուժելու սկզբից ի վեր, գրեթե երկու տարիների ընթացքում սա Պուտինի առաջին հարցազրույցն էր ամերիկյան մամուլին։

13:31 - 18 փետրվարի, 2024

Շոյգուն Պուտինին զեկուցել է «Ավդեևկայի ռուսական կողմի վերահսկողությանն անցնելու մասին» |azatutyun.am|

azatutyun.am: Ռուսաստանի պաշտպանության նախարար Սերգեյ Շոյգուն շաբաթ օրը նախագահ Վլադիմիր Պուտինին զեկուցել է «Ավդեևկա քաղաքի ռուսական բանակի լիակատար վերահսկողությանն անցնելու մասին», հայտնում է ռազմական գերատեսչությունը։ ՌԴ պաշտպանության նախարարության տվյալներով՝ 31,75 քառակուսի կիլոմետր տարածք է անցել ռուսական զորքերի վերահսկողության տակ։ Ուկրաինայի զինված ուժերի գլխավոր հրամանատար Ալեքսանդր Սիրսկին նախօրեին հայտարարել էր՝ ուկրաինական ստորաբաժանումները դուրս են բերվում Ավդեևկա քաղաքից:

12:09 - 18 փետրվարի, 2024

Ջո Բայդենը հեռախոսազրույց է ունեցել Ուկրաինայի առաջնորդ Վլադիմիր Զելենսկիի հետ |news.am|

news.am: ԱՄՆ նախագահ Ջո Բայդենը հեռախոսազրույց է ունեցել Ուկրաինայի առաջնորդ Վլադիմիր Զելենսկիի հետ։ Սպիտակ տան կոմյունիկեում նշվում է Ավդիիվկայից ուկրաինական բանակի նահանջի մասին և ասվում է, որ նախագահը «ընդգծել է Միացյալ Նահանգների հանձնառությունը՝ աջակցելու Ուկրաինային Ռուսաստանի դաժան ներխուժման երկու տարվա նախօրեին», հաղորդում է BBC-ն: Բայդենը նաև հույս է հայտնել, որ Կոնգրեսը կհաստատի համապատասխան ֆինանսավորումը՝ չնայած Հանրապետական կուսակցությունում Դոնալդ Թրամփի շատ կողմնակիցների հակազդեցությանը։

11:56 - 18 փետրվարի, 2024

Մակրոնը հայտարարել է, որ մինչև մարտի կես կայցելի Ուկրաինա |hetq.am|

hetq.am: Ֆրանսիայի նախագահ Էմանուել Մակրոնը նախատեսում է Ուկրաինա այցելել մինչև մարտի կեսերը: Այդ մասին նա հայտարարել է Ուկրաինայի նախագահ Վլադիմիր Զելենսկիի հետ կայացած մամուլի ասուլիսի ժամանակ։ «Ես նախատեսում եմ ձեր նախագահի հետ միասին ձեր երկիր այցելել մարտի կեսերին։ Դա տեղի կունենա առաջիկա շաբաթների ընթացքում»,- ուկրաինացի լրագրողի հարցին պատասխանել է Մակրոնը։ Շարունակությունը՝ սկզբնաղբյուր կայքում

16:05 - 17 փետրվարի, 2024

Հանդիպում է տեղի ունեցել Զելենսկու եւ Ալիեւի միջեւ

Մյունխենում ուկրաինական կողմի նախաձեռնությամբ հանդիպում է տեղի ունեցել Ուկրաինայի նախագահ Վլադիմիր Զելենսկու եւ Ադրբեջանի նախագահ Իլհամ Ալիեւի միջեւ։ Այս մասին հաղորդում են ադրբեջանական լրատվամիջոցները։

15:46 - 17 փետրվարի, 2024

Շոլցը ԵՄ առաջնորդներին կոչ է արել երաշխիքային համաձայնագիր ստորագրել Ուկրաինայի հետ |armenpress.am|

armenpress.am: ԵՄ բոլոր երկրները պետք է անվտանգության ոլորտում համագործակցության համաձայնագրեր կնքեն Ուկրաինայի հետ։ ՌԻԱ-ի փոխանցմամբ՝ այդ մասին հայտարարել է Գերմանիայի կանցլեր Օլաֆ Շոլցը՝ ելույթ ունենալով Մյունխենի անվտանգության համաժողովում։ «Ես շատ եմ ցանկանում և եվրոպացի գործընկերների հետ միասին հորդորում եմ, որ նմանատիպ որոշումներ ընդունվեն բոլոր եվրոպական մայրաքաղաքներում», - ասել է Շոլցը։ Վլադիմիր Զելենսկին ժամանել է Բեռլին և անվտանգության ոլորտում համագործակցության մասին համաձայնագիր է ստորագրել Գերմանիայի կանցլեր Օլաֆ Շոլցի հետ։

14:18 - 17 փետրվարի, 2024

Սիրսկին հայտարարել է՝ ուկրաինական ստորաբաժանումները դուրս են բերվում Ավդեևկայից |azatutyun.am|

azatutyun.am: Ուկրաինայի զինված ուժերի նորանշանակ գլխավոր հրամանատար Ալեքսանդր Սիրսկին հայտարարել է՝ ուկրաինական ստորաբաժանումները դուրս են բերվում Ավդեևկա քաղաքից: «Ելնելով Ավդեևկայի շուրջ ստեղծված իրավիճակից՝ շրջափակումից խուսափելու և զինծառայողների կյանքն ու առողջությունը պահպանելու համար ես որոշեցի դուրս բերել մեր ստորաբաժանումները քաղաքից և ավելի բարենպաստ գծերով անցնել պաշտպանության»,- գրել է Սիրսկին Ֆեյսբուքում։ Նա նշել է, որ միջոցներ են ձեռնարկում իրավիճակը կայունացնելու և դիրքերը պահպանելու համար։

12:02 - 17 փետրվարի, 2024

Գերմանիան և Ուկրաինան անվտանգության երկկողմ համաձայնագիր են ստորագրել |armenpress.am|

armenpress.am: Գերմանիան և Ուկրաինան անվտանգության երկկողմ համաձայնագիր են կնքել։ Այդ մասին գրում է Deutsche Welle-ի ռուսական ծառայությունը: Գերմանիայի կանցլեր Օլաֆ Շոլցը և Ուկրաինայի նախագահ Վլադիմիր Զելենսկին համաձայնագիրն ստորագրել են փետրվարի 16-ին, Բեռլինում։ Գերմանիայի դաշնային կառավարության ներկայացուցչի խոսքով՝ դա «համաձայնագիր է Ուկրաինային ցուցաբերվող երկարաժամկետ աջակցության և անվտանգության երաշխիքների վերաբերյալ»։ Ավելի վաղ՝ հունվարի 12-ին, Ուկրաինայի նախագահ Վլադիմիր Զելենսկին և Մեծ Բրիտանիայի վարչապետ Ռիշի Սունակն էին ստորագրել համաձայնագիր անվտանգության երաշխիքների շուրջ, որոնք կգործեն մինչև Ուկրաինայի անդամակցությունը ՆԱՏՕ-ին։ Մեծ Բրիտանիան առաջին երկիրն է դարձել, որը պայմանագիր է ստորագրել Կիևի հետ, ինչը նախատեսում է արագ և շարունակական աջակցություն Ուկրաինայի վրա նոր հարձակման դեպքում: Reuters-ի փոխանցմամբ՝ Ֆրանսիան կդառնա երրորդ երկիրը, որը երկկողմ անվտանգության համաձայնագիր կստորագրի Ուկրաինայի հետ։ Դա նախատեսված է Ելիսեյան պալատում փետրվարի 16-ի երեկոյան։ Եվրոպական երկրները մեծացնում են օգնությունը Կիևին ԱՄՆ-ում ներքաղաքական ճգնաժամի պայմաններում. Կոնգրեսի հանրապետականները շարունակում են արգելափակել լրացուցիչ ֆինանսավորման օրինագիծը, որը նաև նախատեսում է միջոցների հատկացում Ուկրաինային:

16:52 - 16 փետրվարի, 2024

Ուկրաինան հարվածել է Բելգորոդին. կա 5 զոհ,18 վիրավոր |tert.am|

tert.am: Փետրվարի 15-ի ցերեկն Ուկրաինայի զինված ուժերը հարվածել են ՌԴ Բելգորոդի քաղաքացիական օբյեկտներին։ Ռուսական հակաօդային պաշտպանության համակարգերին հաջողվել է որսալ և ոչնչացնել 14 արկ, գրում է ՏԱՍՍ-ը։ Ուկրաինայի զինված ուժերի հարձակման հետևանքով, ըստ նախնական տվյալների, զոհվել է հինգ մարդ, ևս 18-ը վիրավորվել են։ ՌԴ պաշտպանության նախարարության տվյալներով՝ ռուսական հակաօդային պաշտպանության համակարգերը Ուկրաինայի զինված ուժերի հրթիռակոծության ժամանակ Բելգորոդի շրջանի տարածքում ոչնչացրել են 14 RM-70 Vampire MLRS հրթիռ։ Բելգորոդում վնասվել է յոթ մասնավոր տնային տնտեսություն, հինգ բազմաբնակարան շենք, հինգ ավտոմեքենա, մեկ խանութ:

15:43 - 15 փետրվարի, 2024

Պուտինն «ափսոսում է, որ Ռուսաստանն ավելի վաղ չի սկսել ակտիվ գործողությունները Ուկրաինայում» |azatutyun.am|

azatutyun.am: Ռուսաստանի նախագահ Վլադիմիր Պուտինն ափսոսում է, որ Ռուսաստանն ավելի վաղ չի սկսել ակտիվ գործողությունները Ուկրաինայում։ Այդ մասին Պուտինն ասել է լրագրող Պավել Զարուբինին տված հարցազրույցում, հարցազրույցը հրապարակվել է Կրեմլի տելեգրամյան էջում։ «Միակ բանը, ինչի համար կարող ենք ափսոսալ, այն է, որ մենք ավելի վաղ չսկսեցինք մեր ակտիվ գործողությունները։ Մենք հավատում էինք, որ գործ ունենք պարկեշտ մարդկանց հետ», - ասել է Պուտինը՝ նկարագրելով իրավիճակը Ուկրաինայում։ Ռուսաստանի նախագահը նշել է, թե առաջին փուլում Մոսկվան փորձել է լուծել հակամարտությունը Դոնբասում «խաղաղ ճանապարհով՝ Մինսկի համաձայնագրերով»։ Այստեղ Պուտինը, մեղադրել է Գերմանիային և Ֆրանսիային պայմանավորվածությունները չկատարելու համար։ «Նրանք պարզապես ժամանակ էին շահում ուկրաինական ռեժիմին լրացուցիչ զենքով ապահովելու համար», - ասել է Ռուսաստանի նախագահը։

09:24 - 15 փետրվարի, 2024

ԵՄ Խորհուրդը որոշել է Ռուսաստանի սառեցված ակտիվներից ստացված շահույթը ուղղել Ուկրաինայի վերականգնմանը |1lurer.am|

1lurer.am: Եվրոպական միության Խորհուրդը հաստատել է Ռուսաստանի սառեցված ակտիվներից ստացված շահույթի պահպանման մասին որոշումը՝ Ուկրաինայի շահերից ելնելով դրանց հետագա օգտագործման համար: Այս մասին նշված է Եվրամիության պաշտոնական հաղորդագրության մեջ: Նշվում է, որ այս որոշման հիման վրա Խորհուրդը կարող է սահմանել ԵՄ բյուջե ֆինանսական ներդրումների ռեժիմ՝ Ուկրաինային հետագա վերականգնման հարցում աջակցելու համար: Ֆինանսական ներդրումը կարող է ԵՄ բյուջեի միջոցով ուղղվել Ուկրաինայի օգնության հիմնադրամին: ԵՄ Խորհրդի որոշմանն արձագանքել է ՌԴ ԱԳՆ պաշտոնական ներկայացուցիչը: Նրա խոսքով՝ Մոսկվան չափազանց կոշտ պատասխան կտա ակտիվների առգրավմանը: «Դա գողություն է։ Դա յուրացում է նրա, ինչը քեզ չի պատկանում»,- ասել է Զախարովան:

12:52 - 13 փետրվարի, 2024