15:37 - 07 փետրվարի, 2020
ՏՄՊՊՀ նախագահը ՎԶԵԲ-ի փոխնախագահի հետ քննարկել է տեխնիկական աջակցության ծրագրին վերաբերող հարցեր
ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը փետրվարի 7-ին հյուրընկալել է Վերակառուցման և զարգացման եվրոպական բանկի քաղաքականության և գործընկերության գծով փոխնախագահ Պիեր Հեյլբրոնի գլխավորած պատվիրակությանը:
Կողմերը, մասնավորապես, քննարկել են ԵՄ ֆինանսավորմամբ «Հայաստանի հետ տեխնիկական համագործակցության գործիք» ֆինանսավորման համաձայնագրի շրջանակում ՎԶԵԲ-ի հետ տնտեսական մրցակցության ոլորտում իրականացվելիք տեխնիկական աջակցության ծրագրին վերաբերող հարցեր, անդրադարձ կատարել հետագա համագործակցությունը խորացնելու և ընդյալնելու հնարավորություններին և ուղղություններին:
Պիեր Հեյլբրոնը համառոտ ներկայացրել է Հայաստան կատարած այցի նպատակները, բանկի առաքելությունն ու առաջնահերթությունները՝ շեշտելով մրցակցության դերի կարևորությունը տարբեր ապրանքային շուկաների արդյունավետ գործունեության ապահովման և առհասարակ տնտեսության համար:
ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը, ողջունելով հյուրերին, բարձր է գնահատել ՎԶԵԲ-ի հետ համագործակցությունը և այս տարիների ընթացքում ներդրած ջանքերը Հայաստանի տնտեսության զարգացման ուղղությամբ՝ միաժամանակ որպես կարևոր և ուրախալի փաստ շեշտադրելով հաջորդ տարի ՎԶԵԲ-ի տարեկան ժողովը Հայաստանում անցկացնելու վերաբերյալ Կառավարիչների խորհրդի որոշումը:
Հանդիպման ընթացքում կողմերը մտքեր են փոխանակել նաև ՀՀ ՏՄՊՊՀ-ի գործունեության ընթացիկ հարցերի, կատարված ուսումնասիրությունների, բարեխիղճ և արդար մրցակցության ապահովմանն ուղղված քայլերի, մասնավորապես` միջազգային լավագույն փորձին համահունչ օրենսդրական փոփոխությունների իրականացման անհրաժեշտության և երկուստեք հետաքրքրություն ներկայացնող մի շարք այլ հարցերի շուրջ:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)