Ռուսաստանում առաջին անգամ կիրառել են տուգանք «ֆեյք նորությունների» համար |news.am|

news.am: Մոսկվայի Խորոշեւյան շրջանի դատարանը 200 հազար ռուբլի վարչական տուգանք է նշանակել «Ճշմարտության պահ» հրատարակչական տուն» ցանցային պարբերականին, տեղեկացնում է ՏԱՍՍ-ը։

Գլխավոր խմբագիր Եվգենի Գնեուշեւին տուգանել են 60 հազար ռուբլով։

Դատարանը որոշել է, որ պարբերականը խախտել է Վարչական իրավախախտումների օրենսգրքի 13.15 հոդվածի 9-րդ մասը (զանգվածային լրատվության ազատության չարաշահում)։ Հոդվածը նախատեսում է պատասխանատվություն ֆեյք նորությունների տարածման համար։

«Սա իսկապես ԶԼՄ-ների առաջին տուգանքն է «ֆեյք նյուսի» համար»,- ՌԲԿ-ին հաստատել են Խորոշեւյան դատարանի մամուլի ծառայությունում։ Այնտեղ նշել են, որ նյութերը ստացվել են Ռոսկոմնադզորից։

Դատարանի որոշումն առայժմ ուժի մեջ չի մտել, այն կարելի է բողոքարկել 10 օրվա ընթացքում։

Վլադիմիր Պուտինը այս տարվա մարտի կեսին ստորագրել է օրենք ֆեյք նորությունների տարածման համար պատժի մասին։ Ֆեյքի առաջին տարածման համար քաղաքացիներին սպառնում է մինչեւ 100 հազար ռուբլի տուգանք, իսկ իրավաբանական անձանց՝ 500 հազար ռուբլի։ Կրկնակի խախտման համար՝ 300 հազար ռուբլուց մինչեւ 1 մլն՝ համապատասխանաբար։ Եթե ֆեյք նորությունները հանգեցրել են մարդու մահվան, առողջության վնասման կամ հանրային կարգի խախտման՝ 400 հազարից մինչեւ 1,5 մլն ռուբլի։

Միաժամանակ ընդունվել է նաեւ օրենք ինտերնետում իշխանության մարմիններին վիրավորելու համար պատժի մասին։ Երկու նախաձեռնություններն էլ քննադատություն են առաջացրել։ Մասնավորապես, նշել է Մարդու իրավունքների խորհրդի ղեկավար Միխայիլ Ֆեդոտովը, դրանք խախտում են խոսքի ազատությունը։

x