«Պադավատիզմի» մշակույթը հետզհետե չեզոքացնելու փոխարեն պաշտոնատար անձանց այդ արտոնությամբ օժտելը համարում եմ հեղափոխության հռչակած արժեքներից հեռացում․ Էդգար Առաքելյան

ԱԺ «Իմ Քայլը» խմբակության պատգամավոր Էդգար Առաքելյանն անդրադարձել է  Կառավարության որոշմանը, որտեղ առաջարկվում է կատարել փոփոխություններ և տեսչական մարմիններին ծառայողական մեքենաներ տրամադրել։ Նա իր ֆեյսբուքյան էջում մասնավորապես գրել է․ 

«Հրաժարվում եմ հասկանալ որևէ տրմաբանություն, որ կարող է դրված լինել թվով 6 տեսչական մարմինների ղեկավարներին ծառայողական ավտոմեքենա տրամադրելու կառավարության որոշման նախագծի հիմքում:

«Պադավատիզմի» մշակույթը հետզհետե չեզոքացնելու, եղածները կրճատելու փոխարեն նորանոր պաշտոնատար անձանց այդ արտոնությամբ հարկատուների հաշվին օժտելը համարում եմ հեղափոխության հռչակած արժեքներից հեռացում, որի հետ իմ կողմից հաշտվելը կամ դրա մասին լռելը կրկնակի դավաճանություն կլիներ այդ նույն արժեքների նկատմամբ:

Եվ չնայած պաշտոնատար անձանց ծառայողական ավտոմեքենաների քանակը այս փոփոխությունների արդյունքում աճելու է ընդամենը 2-ով, սակայն ի հաշիվ այդ մարմիններին սպասարկելու համար հատկացվող նոր մեքենաների` ծառայողական ավտոմեքենաների ընդհանուր քանակը Հայաստանի Հանրապետությունում աճելու է 73-ով` հասնելով 1774-ի:

Ընդգծեմ, որ ամենևին դեմ չեմ, որ տեսչական մարմինների արդյունավետությունը և օպերատիվությունը բարձրացնելու նպատակով այդ կառույցներին սպասարկելու համար հատկացվեն ընդհանուր օգտագործման ծառայողական մեքենաներ: Սակայն նախ համարում եմ, որ դա հնարավոր էր և պետք էր անել ի հաշիվ այլ գերատեսչունթյունների տարատեսակ պաշտոնյաներին սպասարկող տասնյակ «պադավատների», և երկրորդ, ոչ մի պարագայում չէր կարելի «պադավատ» տրամադրել այդ մարմինների ղեկավարներին, որոնք մինչ այս զրկված էին նման ճոխությունից»:

x