Տվյալներ են ձեռք բերվել Վայոց ձորի մարզում կատարված ապօրինությունների վերաբերյալ։Վայոց ձորի մարզպետարանի վարչության պետերից մեկը, համակարգելով մարզպետարանի և մարզային ենթակայության կազմակերպությունների կարիքների համար աշխատանքների, ծառայությունների ապրանքների գնման գործընթացները, իր մերձավորի անվամբ հիմնադրված, բայց փաստացի իր կողմից կառավարվող կազմակերպությանը առավելություններ տրամադրելու նպատակով՝ 2017-2018 թվականների ընթացքում կազմակերպել է այդ կազմակերպության ու 11 հանրակրթական դպրոցների, ինչպես և Մալիշկա համայնքի միջև շուկայականից ավելի բարձր գներով՝ ընդհանուր 16 միլիոն դրամի գնման ու ծառայությունների մատուցման պայմանագրերի կնքում։[ՀՀ ոստիկանություն]
Իրանի հետ ՀՀ սահմանին փետրվարի 25-ի կեսօրից սկսած շարժը կտրուկ նվազել է։ Ժամը 17:30-ի դրությամբ՝ 45 բեռնատար է հատել Իրան-Հայաստան սահմանը, ու բոլորի վարորդներն ուժեղացված հսկողություն են անցել։ԱԱՏՄ Մեղրիի բժշկասանիտարական հսկիչ կետով նաեւ ՀՀ 10 քաղաքացի է մուտք գործել երկիր՝ անցնելով ջերմաչափում, վարակիչ հիվանդություններին բնորոշ ախտանշանների զննում։ Որեւէ անձի մոտ կասկածելի նշաններ չեն արձանագրվել։ Նախորդ օրերին՝ մինչ Իրանի հետ հաղորդակցությունը ժամանակավորապես սահմանափակելը, Մեղրիի հսկիչ կետով երկիր է եկել ու բուժզննում անցել օրական 800-1100 մարդ։[ԱԱՏՄ]
ՀՀ վերաքննիչ քրեական դատարանի 17.02.2020թ. որոշմամբ բեկանվել է մեղադրյալ Կարեն Խաչատրյանի նկատմամբ կիրառված կալանավորումը 20 միլիոն ՀՀ դրամի չափով գրավով փոխարինելու մասին Երևան քաղաքի ընդհանուր իրավասության 1-ին ատյանի դատարանի 22.01.2020թ. որոշումը, նրան կալանքից գրավով ազատելը ճանաչվել է անթույլատրելի: Կարեն Խաչատրյանը ներկայումս արգելանքի տակ է և գտնվում է քրեակատարողական հիմնարկում: |armenpress.am|
Դատավորները, որոնք մեղք են գործել սեփական երկրի, օրենքի և միջազգային հանրության առջև, պետք է պատասխանատվության ենթարկվեն։ Գոնե նրանց համակարգից հեռացնելու հնարավորությունը պետք է որպես շանս օգտագործվի:Ես ԱԺ նախագահին ներկայացրել եմ դատավորների ցուցակ, որոնք մեղք են գործել արդարադատության առջև, որոնք կայացրել են ապօրինի ակտեր՝ որոշելով մարդկանց ճակատարգրեր, վարկաբեկոլով ՀՀ բարի համբավը։ [ Դատական օրենսգրքում փոփոխություների թեմայով ԱԺ լսումների ժամանակ ասաց ՀԱԿ անդամ Արամ Մանուկյան] |aysor.am|
Երեւանի ընդհանուր իրավասության դատարանի Ավան եւ Նոր Նորք նստավայրում այսօր սկսված դատական նիստին Սերժ Սարգսյանի պաշտպանները հայտարարեցին, որ բացարկի միջնորդություն ունեն գործով մեղադրանքը պաշտպանող դատախազ Արսեն Մարտիրոսյանին: |armtimes.com|
Դատավարությունների համար պետք է սահմանել ողջամիտ ժամկետներ։ Օրենքով պետք է սահմանել ողջամիտ ժամկետներ։Մենք գործ ունենք մարդկային ճակատագրերի հետ։ Եթե, օրինակ, դատարանը մի քիչ ավելի շուտ նիստ գումարեր՝ իմանալով դատապարտյալ Կարեն Ծաղիկյանի ծայրահեղ ծանր առողջական վիճակը, գուցե նա հունվարի 8-ին չմահանար։Մենք պետք է ունենանք մասնագիտական դատարաններ, ինչպես, օրինակ, Գերմանիան, որտեղ 40 մասնագիտացված դատարան կա։ [Դատական օրենսգրքում փոփոխություների թեմայով ԱԺ լսումների ժամանակ ասաց Նաիրա Զոհրաբյանը] |aysor.am|
Ռուսաստանի արտգործնախարար Սերգեյ Լավրովը երեքշաբթի Ժնևում հանդիպել է իր հայ գործընկեր Զոհրաբ Մնացականյանի հետ:Հայաստանի արտգործնախարարը շնորհակալություն է հայտնել հանդիպելու և որոշ «հիմնական հարցեր» քննարկելու հնարավորության համար: |aysor.am|
Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, հեռացավ խորհրդակցական սենյակ՝ քննարկելու Ռոբերտ Քոչարյանի և մյուսների նկատմամբ քրեական հետապնդումը դադարեցնելու և գործի վարույթը կարճելու մասին միջնորդությունները: Դատարանը որոշումը կհրապարակի մարտի 3-ին՝ ժամը 13:00-ին: |armenpress.am|
ՀՀ արդարադատության նախարար Ռուստամ Բադասյանն առերևույթ խնդիր է տեսնում այն հարցում, որ ապրիլի 5-ի Սահմանադրության փոփոխությունների հանրաքվեի արդյունքները կարող է բողոքարկվել այն Սահմանադրական դատարանում, որի անդամներին պաշտոնավարման առնչությամբ է հանրաքվեն:ՍԴ կարող են դիմել ԱԺ խմբակցությունները, եթե եղել են այնպիսի խախտումներ, որոնք կարող էին ազդել հանրաքվեի արդյունքների վրա։ |armenpress.am|
Հայաստանի տնտեսական ակտիվության ցուցանիշը (ՏԱՑ) 2020 թվականի հունվարին 2019-ի հունվարի համեմատ աճել է 8.9 տոկոսով:2020-ի հունվարի ցուցանիշներով շինարարության ոլորտում աճը կազմել է 7.7 տոկոս: Էլեկտրաէներգիայի արտադրության ցուցանիշն աճել է 18.7 տոկոսով: Ծառայությունների ծավալն (առանց առեւտրի) աճել է 13.2 տոկոսով: [Վիճակագրական կոմիտե] |armtimes.com|
Դատաիրավական բարեփոխումներն անվերջ գործընթաց են, այդ համակարգն անընդհատ պետք է կատարելագործվի:Դատական համակարգում ունենք համակարգային խնդիրներ։ Դատավորների աշխատանքը տաժանակիր է, սակայն պետք է ասել, որ դատական համակարգում անբասիր դատավորները մեծ մաս են կազմում:Պետք է հասնել այն մակարդակին, որպեսզի որևէ քաղաքացի չկասկածի դատավորների պրոֆեսիոնալ և բարոյական որակների վրա։ [Դատական օրենսգրքում փոփոխություների թեմայով ԱԺ լսումների ժամանակ այսօր ասաց պատգամավոր Վլադիմիր Վարդանյանը]
Թուրքիայի նախագահ Ռեջեփ Թայիփ Էրդողանը պաշտոնական այցով մեկնում է Ադրբեջան` մասնակցելու Թուրքիա-Ադրբեջան ռազմավարական համագործակցության բարձրագույն խորհրդի 8-րդ նիստին: |ermenihaber.am|
«Ոչ»-ի շտաբին աջակցելու որևէ կարիք չկա, որովհետև «ոչ» քարոզչություն երկրում գոյություն չունի։ ԼՀԿ-ն ասել է՝ դեմ չէ, որ իր միջոցով լիցենզիա ստացած մարդիկ գնան ու այդ օրն աշխատեն պետության համար: Դա ապաքաղաքական գործ է, նրանք քարոզիչ չեն, որ այդ օրը քարոզեն, հետևելու են արդարությանը: Տպավորություն է մոտս, որ մարդիկ վախում են, որ հանձնաժողովներում գրագետ, կիրթ մարդիկ են ներգրավվում, կարո՞ղ ա ուզում եք կեղծեք հանրաքվեն՝ վախենում եք։ [Այս մասին ֆեյսբուքյան ուղիղ եթերի ժամանակ ասել էր Էդմոն Մարուքյանը] |aysor.am|
2020թ. ապրիլի 5-ին կայանալիք ՀՀ Սահմանադրության փոփոխությունների հանրաքվեի նախապատրաստման և անցկացման ընթացքում հնարավոր ընտրական իրավախախտումների վերաբերյալ ԶԼՄ հրապարակումները, քաղաքացիների հաղորդումները և ՀՀ գլխավոր դատախազություն ստացված ահազանգերը գրանցելու, ուսումնասիրելու, դրանց քննարկման նկատմամբ դատախազական հսկողության արդյունավետությունը բարձրացնելու և այդ ոլորտում ՀՀ դատախազության գործունեությունը համակարգելու նպատակով ՀՀ գլխավոր դատախազի փետրվարի 24-ի հրամանով ստեղծվել է աշխատանքային խումբ:
Իտալիայում նոր տիպի կորոնավիրուսով/COVID-19/ վարակվածների թվի կտրուկ աճով պայմանավորված՝ ներկայումս Իտալիայում գտնվող և այցով Իտալիա մեկնել ցանկացող ՀՀ քաղաքացիներին կոչ ենք անում կապ հաստատել Իտալիայում ՀՀ դեսպանության հետ՝ փոխանցելով Իտալիայում գտնվելու ժամանակահատվածը և կոնտակտային տվյալները:Խորհուրդ ենք տալիս հետեւել ՀՀ առողջապահության նախարարության և Իտալիայի համապատասխան իշխանությունների ցուցումներին: [Իտալիայում ՀՀ դեսպանատուն]
«Լուսավոր Հայաստան» խմբակցության ղեկավար Էդմոն Մարուքյանի հասցեին սպառնալիքներ հնչեցելու փաստով հարուցվել է քրեական գործ ՀՀ քրեական օրենսգրքի 137-րդ հոդվածի 1-ին մասի հատկանիշներով, այն է՝ սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքը, եթե այդ սպառնալիքն իրականացնելու վտանգ է եղել։ Այս մասին հայտնեց ՀՀ գլխավոր դատախազության հանրային կապերի բաժնի պետ Արևիկ Խաչատրյանը։ Փետրվարի 11-ին խորհրդարանում հրավիրված ասուլիսին Էդմոն Մարուքյանը հայտարարել էր իր հասցեին սպառնալիքներ հնչեցնելու մասին։ |pastinfo.am|
Միջուկային անվտանգության կարգավորողների եվրոպական խումբը հրապարակել է ՀԱԷԿ-ի վերաբերյալ զեկույցը, համաձայն որի «Գործընկերային վերանայման» թիմը պարզել է, որ ՀՀ Գործողությունների ազգային պլանի կառուցվածքը և բովանդակությունը համարժեք է և լիովին համապատասխանում է ԵՄ «սթրես-թեստերի» պահանջներին: Թիմը գնահատել և ողջունել է 2016թ. ի վեր կատարված ողջ աշխատանքը և արտաքին վտանգավոր ազդեցությունից կայանների պաշտպանության ուղղությամբ ձեռք բերված առաջընթացը: Այդուհանդերձ, Մեծամորի ԱԷԿ-ում սթրես-թեստի կիրառման գործընթացից բխող գործողությունների իրականացումն ապահովող անհրաժեշտ ֆիզիկական վիճակի բարելավման համար դեռևս զգալի աշխատանք պետք է ամփոփվի, մասնավորապես կապված՝ սեյսմակայունության բարելավման, կայանի գործարկման դադարեցման իրավիճակի ընդհանուր հայեցակարգի և տեխնիկական լուծումների մշակման, ինչպես նաև ախտանիշահեն «Արտակարգ իրավիճակում գործառնական ընթացակարգերի» և «Ծանր վթարների կառավարման ուղեցույցների» իրականացման ավարտի հետ։ |armenpress.am|
ՀՀ Սահմանադրական դատարանի նախագահ Հրայր Թովմասյանը դատական հայց է ներկայացրել ընդդեմ վարչապետ Նիկոլ Փաշինյանի: Հրայր Թովմասյանը պահանջում է ներողություն խնդրել վիրավորանք հանդիսացող արտահայտությունների համար եւ հերքել զրպարտություն հանդիսացող տեղեկությունները: |armtimes.com|
ՀՀ նախկին վարչապետեր Վազգեն Մանուկյանը, Խոսրով Հարությունյանը, Կարեն Կարապետյանը, ինչպես նաեւ Արցախի Հանրապետության նախկին վարչապետ Անուշավան Դանիելյանը պատրաստվում են Ռոբերտ Քոչարյանի խափանման միջոց կալանքն իրենց անձնական երաշխավորությամբ փոխարինելու առաջարկ ներկայացնել դատարանին։
[Ռոբերտ Քոչարյանի փաստաբանական թիմը]
ՀՀ առողջապահության նախարարությունը որոշակի քանակի դիմակներ ունի։ Եթե չեմ սխալվում, մոտ 160 հազար հատ նորից ձեռք է բերվել և հիմա գործընթաց է տարվում դիմակների լրացուցիչ քանակ ձեռք բերելու համար։ դեղատներում դիմակների պակասը ոչ միայն Հայստանում է, այլև մի շարք երկրներում։ [ՀՀ ԱՆ հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյան] |aysor.am|
Գեներալ-մայոր Ջալալ Հարությունյանը նշանակվել է Արցախի Հանրապետության պաշտպանության նախարար–պաշտպանության բանակի հրամանատար՝ ազատվելով Արցախի Հանրապետության պաշտպանության բանակի հրամանատարի առաջին տեղակալ-շտաբի պետի պաշտոնից։
Ույծի միջնակարգ դպրոցի տնօրենը, որն այդ պաշտոնը զբաղեցնում է 1999 թվականից, աշխատանքի է ընդունել համայնքի երկու բնակիչների, որոնք չեն կատարել իրենց պարտականությունները, իսկ ստացած աշխատավարձը յուրաքանչյուր ամիս ամբողջությամբ տվել են դպրոցի տնօրենին: Տնօրենին մեղադրանք է առաջադրվել։ Նրա նկատմամբ որպես խափանման միջոց է ընտրվել ստորագրություն՝ չհեռանալու մասին: Տնօրենի կողմից ՀՀ ՔԿ դեպոզիտ հաշվին է փոխանցվել պետությանը պատճառված ամբողջ վնասը՝ ընդհանուր 1.331.664 ՀՀ դրամ գումարը: [ՔԿ]
Ադրբեջանի կողմից հայտարարված «Դիվերսիան» ուղղակի լավ հեքիաթ է ադրբեջանական հանրության համար։ Դա լիովին ապատեղեկատվություն է։ ՀՀ ԶՈւ-երը ընդամենը պատասխանել են ադրբեջանական սադրանքներին, որի արդյունքները ինքներդ եք տեսնում։ Դեռ ավելին. hայկական կողմը այս ամենով զսպվածություն է դրսևորում։ [Արծրուն Հովհաննիսյան]
Կրթության որակը հավաստող մուտքային շեմն ապահովելու նպատակով անկախ բուհերի կազմակերպաիրավական ձևից և կարգավիճակից բակալավրի որակավորման աստիճանի ցանկացած կրթական ծրագրով ՀՀ քաղաքացիների բուհ ընդունվելու համար սահմանվում է «Հայոց լեզու» առարկայի պարտադիր քննությունը։ [Արայիկ Հարությունյան] |armenpress.am|
ՀՀ արտաքին գործերի նախարար Զոհրաբ Մնացականյանը «չափազանց մտահոգիչ» է համարում Արդբեջանի երեկվա գործողությունները։ Նա ընդգծել է՝ պետք է թույլ չտալ էսկալացիայի որևէ ռիսկ, որովհետև, ԱԳ նախարարի խոսքով, վտանգի ու վտանգի սպառնալիքի մեթոդները չեն աշխատելու ու դրանք խստորեն մերժվելու են հայկական կողմից, ղարաբաղյան կողմից։ |aysor.am|
Հենց նոր ավարտվեց կորոնավիրուսի կանխարգելման հանձնաժողովի նիստը, որի արդյունքներով որոշվեց.
1. Երկու շաբաթով դադարեցնել ցամաքային հաղորդակցությունը Իրանի Իսլամական Հանրապետության հետ:
2. Օդային հաղորդակցության նկատմամբ կիրառել ոչ ամբողջական սահմանափակումներ:
3. Իրանի Իսլամական Հանրապետության հետ բեռնափոխադրումները իրականացնել առանց սահմանափակումների, կիրառելով վարորդների նկատմամբ հատուկ հսկողության ռեժիմ:
4. Որեւէ սահմանափակում չկիրառել Հայաստանի Հանրապետության եւ Իրանի Իսլամական Հանրապետության քաղաքացիների՝ հայրենիք վերադառնալու համար:
5. Երկու շաբաթվա ընթացքում բարեկամ Իրանի Իսլամական Հանրապետության կառավարության հետ լինել սերտ հաղորդակցության մեջ, ամբողջացնել տեղեկությունները ԻԻՀ-ում կորոնավիրուսի տարածման ծավալների վերաբերյալ՝ հետագա անելիքները ճշգրտելու համար:
6. Կառավարությունը քիչ անց հեռակա նիստով կկայացնի համապատասխան որոշում, որը ուժի մեջ կմտնի հրապարակման պահից:
Հարկ եմ համարում արձանագրել, որ Հայաստանում կորոնավիրուսով վարակվածության ոչ մի դեպք չունենք եւ հույս ունեմ՝ չենք ունենա: Հայաստանը ունի բոլոր անհրաժեշտ տեխնիկական եւ մասնագիտական ռեսուրսները կորոնավիրուսի ճշգրիտ ախտորոշման համար: [Նիկոլ Փաշինյան]
Իրանում կորոնավիրուսով վարակի 43 դեպք է գրանցվել, որոնցից ութը՝ մահվան ելքով։ Երկրում 10 նահանգներում հայտարարվել են կրթական հաստատությունների փակման մասին, չեղյալ են հայտարարվել նաև մշակութային միջոցառումներ, իսկ մի շարք մարզական միջոցառումներ կանցկացվեն առանց հանդիսականների:
|aysor.am|
Երեկ ադրբեջանական ԶՈւ-ի ստորաբաժանումները կրակ են բացել ՀՀ ԶՈւ-ի ստորաբաժանումների մարտական դիրքերի ուղղությամբ: Կրակից վիրավորվել է հայ զինծառայող, վիրավորումը թեթև է, նրա կյանքին վտանգ չի սպառնում: Հայկական ԶՈւ-ի ստորաբաժանումների պատասխան կրակից հետո ադրբեջանական կրակը դադարել է։ [Արծրուն Հովհաննիսյան]
Չինաստանում նոր կորոնավիրուսի համաճարակի օջախը համարվող Հուբեյ նահանգից դուրս անցած մեկ օրում գրանցվել է վարակի ընդամենը 11 նոր դեպք, ընդ որում՝ 24 տարածաշրջաններում առհասարակ այդպիսին չի գրանցվել։ Չինաստանից դուրս գրանցվել է կորոնավիրուսի վարակի 1769 դեպք՝ 28 երկրներում, մահացել է 17 մարդ, ասված է Առողջապահության համաշխարհային կազմակերպության զեկույցում։
|azatutyun.am|
Համացանցում տարածված կեղծ լուրերը՝ իբր Կապանի ԲԿ֊ում կորոնավիրուսով հիվանդներ են մեկուսացրել, չի համապատասխանում իրականությանը։ Պաշտոնապես հայտնում ենք ,որ առ այսօր ոչ մի նման կասկածելի հիվանդ մեզ չի դիմել, չի հոսպիտալացվել և առավել ևս չի մեկուսացվել։Խնդրում ենք խուճապի չմատնվել և հետևել միայն պաշտոնական լրահոսին։ [Կապանի ԲԿ]
Սումգայիթի ջարդերի 32-րդ տարելիցի և Բաքվի ջարդերի 30-րդ տարելիցի կապակցությամբ փետրվարի 22-ին Վիեննայում տեղի է ունեցել քայլերթ և ցույց Ավստրիայի հայ համայնքի ներկայացուցիչների մասնակցությամբ, որը կազմակերպել էր Ավստրիայի Հայ դատի հանձնախումբը: Բազմաքանակ անցորդներին, զբոսաշրջիկներին բաժանվել են թռուցիկներ, գրքեր և տեսաերիզներ՝ Սումգայիթում և Բաքվում հայերի դեմ իրականացված վայրագությունների, պետական մակարդակով հանցագործությունների քողարկման և Ադրբեջանի շարունակվող հայատյաց ու ռազմատենչ քաղաքականության մասին: |armenpress.am|
Ի պատասխան քաղաքացիների կողմից արված մի շարք հարցադրումների՝ կապված դեսպանության աշխատանքի հետ, հայտնում ենք, որ ԻԻՀ-ում ՀՀ դեսպանությունը ողջ անձնակազմով շարունակում է իր բնականոն գործունեությունն իր գործառույթների ողջ ծավալով, այդ թվում՝ շուրջօրյա ծառայություն մատուցելով ՀՀ քաղաքացիներին և ձեռնարկելով բոլոր հնարավոր քայլերը մեր քաղաքացիների առջև ծառացած խնդիրների լուծման ուղղությամբ: Դեսպանությունում գործում է թեժ գիծ, պահպանվում է մշտական կապ Իրանում գտնվող մեր հայրենակիցների հետ: Վերոնշյալ գործառույթների արդյունավետ իրականացման համար որոշում է կայացվել ժամանակավորապես դադարեցնել հյուպատոսական հերթագրումը և ընդունելությունը, որոնք տեխնիկական, կազմակերպական անհրաժեշտ միջոցառումների իրականացումից հետո լիարժեքորեն կվերականգնվեն: [Իրանում ՀՀ դեսպանություն]
Իրանում կորոնավիրուսից մահվան ութերորդ դեպքն է գրանցվել. Առողջապահության նախարարությունն այսօր հաղորդել է մահացած ևս երկու հիվանդների մասին` առանց մանրամասնելու` երբ և որտեղ են դրանք գրանցվել: Ընդհանուր առմամբ, այս պահին իրանական հիվանդանոցներում բուժում է ստանում կորոնավիրուսով հիվանդ 43 մարդ, 785-ն էլ կարանտինի մեջ են:
Վերջին օրերին FB-ում ակտիվ քննարկում է ծավալվում Իրանում հայտնաբերված կորոնավիրուսով ախտահարման և մահվան դեպքերի շուրջ։ Տեղեկացնեմ, որ այսօր խոսել եմ ՀՀ փոխվարչապետ Տիգրան Ավինյանի հետ և քննարկել ենք կորոնավիրուսի շուրջ ստեղծված իրավիճակը։ Ամենօրյա ռեժիմով ստացվում է տեղեկատվություն, ինչը վերլուծության է ենթարկվում, ամենայն մանրամասնությամբ գնահատվում են հնարավոր ռիսկերը և բոլոր հնարավոր զարգացումները։Օրակարգում են վիրուսի ներթափանցման կանխման բոլոր տարբերակները՝ ընդհուպ մինչև Մեղրիի սահմանային անցակետի ժամանակավոր փակման հարցը։ [ԱԺ Առողջապահության և սոցիալական հարցերի հանձնաժողովի նախագահ Նարեկ Զեյնալյան]
Թուրքիայում 7 մարդ է զոհվել թուրք-իրանական սահմանին տեղի ունեցած երկրաշարժի հետևանքով։ Ավելի վաղ փետրվարի 23-ին 5,7 մագնիտուդով երկրաշարժ է գրանցվել Իրանի հյուսիս-արևմուտքում՝ Թուրքիայի հետ սահմանին։ Երկրաշարժի օջախը գտնվել է 5կմ խորության վրա, էպիկենտրոնը գտնվել է Թավրիզ քաղաքից արևմուտք։ Երկրաշարժը զգացվել է Երևանում՝ 3-4 բալ, Արարատի և Սյունիքի մարզերում՝ 3 բալ ուժգնությամբ։ |armenpress.am|
Մարդկանց տեղաշարժի սահմանափակումները նման հիվանդությունների դեպքում այդքան էլ աշխատող գործիքներից չեն։Առողջապահության համաշխարհային կազմակերպությունը խորհուրդ է տալիս ոչ թե մուտքի, այլ ելքի սահմանափակում կիրառել նման դեպքերում։Հնարավոր չէ փակել ամբողջ աշխարհի ուղևորաշրջանառությունը, և իմաստ էլ չկա, բայց այսօր և վաղը քննարկելու ենք նման հնարավորությունը, ինչպես արեցինք Չինաստանի դեպքում` հանելով ազատ վիզային ռեժիմը, և փաստացի մենք այսօր Չինաստանի քաղաքացի գրեթե չունենք Հայաստան մտնող։[Արսեն Թորոսյանը՝ կորոնավիրուսի տարածման պատճառով Իրանի հետ սահմանը փակելու վերաբերյալ տարբեր կոչերի մասին] |azatutyun.am|
Իրանի Իսլամական Հանրապետությունում Հայաստանի Հանրապետության դեսպանությունը տեղեկացնում է, որ սկսած 2020 թ. փետրվարի 23-ից ժամանակավորապես դադարեցվում է հյուպատոսական բաժնի աշխատանքը՝ քաղաքացիների հերթագրումը և ընդունելությունը: Դեսպանությունը հայցում է քաղաքացիների ներողամտությունը պատճառված անհարմարությունների համար:Հյուպատոսական բաժնի աշխատանքի վերսկսման վերաբերյալ ՀՀ դեսպանությունը լրացուցիչ կտեղեկացնի: [Իրանում ՀՀ դեսպանություն]
Հայաստանն ուշիուշով հետևում է նոր տիպի կորոնավիրուսի բռնկումների դեպքերին և տարածվածությանն ամբողջ աշխարհում: Մեր տարածաշրջանում իրադրության համալիր գնահատման առումով սերտորեն համագործակցում ենք Իրանի և Վրաստանի մեր գործընկերների հետ՝ տեղեկատվության փոխանակման, ինչպես նաև անհրաժեշտ քայլերի և հնարավոր սցենարների դիտարկման ուղղությամբ: Ձեռնարկվող քայլերի մասին կտեղեկացնենք հավելյալ: Հորդորում ենք ՀՀ քաղաքացիներին առանց հրատապ անհրաժեշտության զերծ մնալ Իրան այցելելուց, իսկ ներկայումս Իրանում գտնվող մեր քաղաքացիներին՝ կապ հաստատել ԻԻՀ-ում ՀՀ դեսպանության հետ։ [ՀՀ ԱԳՆ]
Մեր բարեկամ Իրանից անհանգստացնող և մտահոգիչ տեղեկություններ են հասնում։ Ստեղծված պայմաններում կարծում ենք, որ անհրաժեշտ է ժամանակավորապես փակել Հայ-Իրանական ցամաքային սահմանը, ներառյալ՝ հետաձգել չվերթները, մինչև Իրանում կորոնավիրուսի տարերային տարածումը կչեզոքացվի։ Սա մեր ազգային անվտանգության շահերից բխող անհրաժեշտություն է, քանի որ համապատասխան միջոցների չկիրառումը կարող է անդառնալի հետևանքների հանգեցնել։
Այս ամենից անդին մեր մտահոգությունն ու կարեկցանքն ենք փոխանցում բարեկամ ժողովրդին՝ հույս հայտնելով, որ նրանք կկարողանան չեզոքացնել այդ վերահաս աղետը։[Էդմոն Մարուքյան]
Առողջապահության նախարարությունը, արտաքին գործերի նախարարությունը մշտական կապի մեջ են իրենց գործընկերների հետ՝ բռնկումների դեմ պայքարի գործողությունների միջազգային սինխրոնացման համար, որովհետև իզոլացված գործողությունները չեն կարող արդյունավետ լինել։ Վարակիչ հիվանդությունների դեմ պայքարի միջազգային մեխանիզմները ժամանակակից աշխարհում հենց այդպիսի սինխրոն գործողություններ են ենթադրում։ Մինչ այդ ուզում եմ ձեր ուշադրությունը հրավիրել իրավիճակի անհարկի և արհեստական լարմանը և դրանից տարբեր դիվիդենտներ քաղելուն, ինչը համարում եմ անընդունելի։ Մեր նախարարության ենթակայության Հիվանդությունների վերահսկման և կանխարգելման Ազգային Կենտրոնը, ՀՀ առողջապահական և աշխատանքի տեսչական մարմինը ունեն բավարար մասնագիտական և տեխնիկական ներուժ վարակիչ հիվանդություններին համարժեք արձագանք տալու համար։ Խնդրում եմ հետևել պաշտոնական լրահոսին և չտրվել սադրանքներին։[Արսեն Թորոսյան]
ԱԱՏՄ ղեկավար Հակոբ Ավագյանի հանձնարարությամբ աշխատանքային խումբ է գործուղվել Մեղրիի բժշկասանիտարական հսկիչ կետ` հետևելու սահմանին ուժեղացված ռեժիմով վերահսկողական աշխատանքների ընթացքին։ Այս ընթացքում Մեղրիի հսկիչ կետում որևէ մեկի մոտ բարձր ջերմություն և վարակիչ հիվանդությանը բնորոշ կլինիկական ախտանշաններ չեն արձանագրվել։[ԱԱՏՄ]
Իրանում կորոնավիրուսի 10 նոր դեպք է գրանցվել, վարակվածներից ևս մեկը մահացել է: Կորոնավիրուսով վարակվածների ընդհանուր թիվն Իրանում 28-ի է հասել, գրանցվել է մահվան 5 դեպք:
Հայտնի են Իրանի խորհրդարանական ընտրությունների արդյունքները։ Հյուսիսային հատվածում մեկ տեղի համար պայքարում էր 4 հայ թեկնածու, որոնցից Արա Շահվերդյանը ստացել է շուրջ 66 % քվե: Դա նշանակում է, որ այս ընտրատեղամասում երկրորդ փուլ չի անցկացվելու, քանի որ կա թեկնածու, ով հավաքել է 50 %-ից ավելի ձայն: Այնպես որ նոր ձևավորվող խորհրդարանում իր տեղն ունի Արա Շահվերդյանը։ Իրանի հարավային հատվածում բարձր տոկոսով հաղթանակ է տոնել Ռոբերտ Բեգլարյանը: Հարավային հատվածում մեկ տեղի համար պայքարում էին Ռոբերտ Բեգլարյանն ու Էմին Հովսեփը: |armenpress.am|
Ոստիկանությունը միշտ բարեփոխումների անվան տակ փորձել է լուծել իրեն այդ պահին վերապահված ուժային խնդիրները։ Բարեփոխումները պետք է իրականցվեն հանրության հետ քննարկումների արդյունքում, որովհետև սրա արդյունքում պետք է ունենանք այնպիսի իրավապահ համակարգ, որի ծառայության թե օրինականության, թե՛ նրա կատարած քայլերի հետ կապված թե՛ ոստիկանությունը, թե՛ հանրությունը որևէ կասկած չունենա։ [ԱԺ պաշտպանության եւ ազգային անվտանգության հարցերի մշտական հանձնաժողովի նախագահ Անդրանիկ Քոչարյան] |pastinfo.am|
Բարեփոխումների փաթեթը պետք է բաժանել երկու խոշոր հատվածների: Առաջինը վարչական վերափոխումներն են. այն, ինչը թույլ է տալիս ՆԳՆ-ի ստեղծում, ոստիկանության տարբեր մարմինների առանձնացում, մեկ մարմնի շուրջ միավորում: Երկրորդ ամենակարևոր կոմպոնենտը, որին պետք է ուշադրություն դարձնել փոփոխությունների այս գործընթացում, կրթական կոմպոնենտն է: Կրթությունն առաջնային պետք է լինի ոստիկանական համակարգում: Այս փոփոխությունները պետք է նախատեսված լինեն ոչ թե առաջիկա մի քանի տարվա համար, այլ առաջիկա տասնամյակում՝ ապահովելու ոստիկանության նոր ձևը։ [ԼՀԿ-ական պատգամավոր Կարեն Սիմոնյան] |tert.am|
Արցախի և Հայաստանի իշխանությունների պատկերացումներն Արցախի հարցի կարգավորման վերաբերյալ նույնական են: Սա ամենևին չի նշանակում, թե Արցախի հարցի կարգավորման ամբողջ համատեքստի բոլոր դետալների հետ կապված կան միևնույն պատկերացումները, սա նշանակում է, որ ռազմավարության, վեկտորի ուղղությամբ մենք ունենք նույնական պատկերացում, և այդ նույնական պատկերացումներն ունեն մի քանի անհրաժեշտ հենասյուներ: Այդ հենասյուներից կարևորագույնը ես համարում եմ արձանագրումն այն բանի, որ ԱՀ-ն բանակցային գործընթացի լիարժեք մասնակից է, և առանց ԱՀ-ի հետ բանակցությունների` հնարավոր չէ Ղարաբաղի հարցի կարգավորում: [Նիկոլ Փաշինյանի ելույթը՝ Հայաստանի և Արցախի Անվտանգության խորհուրդների համատեղ նիստին]
«Ոչ»-ի շտաբի լիազոր ներկայացուցիչ, իրավապաշտպան Ռուբեն Մելիքյանը խնդրանքով դիմել է 4 քաղաքականն ուժերի՝ ՀՅԴ-ին, ԲՀԿ-ին, ԼՀԿ-ին և ՀՀԿ-ին՝ տեղամասային հանձնաժողովի անդամի նշանակման ենթակա անձանց մասով իրենց շտաբին օգնելու համար։ Խնդրանքին դեռևս արձագանքել են ՀՅԴ-ն ու ԼՀԿ-ն և համաձայնել օգնել։ Մելիքյանը դիմել է հենց այս ուժերին, քանի որ նրանք են հանդես եկել «այո»-ն բացառող հայտարարություններով։ |pastinfo.am|
Ոչ թե Ոստիկանությունը դառնում է Ներքին գործերի նախարարություն, այլ ստեղծվում է ՆԳՆ, որի կազմում կլինի Ոստիկանությունը։ Սա զինված ուժերի մոդելին է նման: Այս մոդելում կլինի ոստիկանապետ, Ոստիկանության հրամանատար, Ոստիկանությունը կմնա ուղղահայաց համակարգ, և կլինի նաև ներքին գործերի նախարար: Ոստիկանապետը նշանակվելու է վարչապետի կողմից, ոչ թե նախարարի, բայց գոնե այս պահին նախատեսվող մոդելով նախարարի առաջարկությամբ: Սա այն է, ինչ քաղաքացիական հասարակությունը պահանջում էր վաղուց։ [Դանիել Իոաննիսյանy` «Ոստիկանության բարեփոխումների 2020-2022 թթ. ռազմավարության թույլ և ուժեղ կողմերը» թեմայով քննարկմանը] |tert.am|
Եղվարդի «Նաիրի» ԲԿ-ի ծննդօգնության բաժանմունքում մի քանի օրից կմեկնարկեն շինարարական աշխատանքները։ Հիմնովին կվերանորոգվի ծննդօգնության բաժանմունքը, այդ թվում՝ բաժանմունքի առանձին մուտքը, կանանց կոնսուլտացիոն հատվածը, ծննդօգնության հարկաբաժինները, որից հետո բաժանմունքը կհամալրվի լիովին նոր գույքով և կվերազինվի նորագույն բժշկական սարքավորումներով։ Այս տարվա պետպատվերի գումարը դարձյալ փոխանցվել է ծննդատանը, և այն բնականոն աշխատում է: ԲԿ-ում տեղի է ունեցել նաև տնօրենի ժամանակավոր պաշտոնակատարի փոփոխություն: [Կոտայքի մարզպետ Ռոմանոս Պետրոսյան] |tert.am|
Բակո Սահակյանն այսօր Նիկոլ Փաշինյանի հետ Ստեփանակերտում մասնակցել է երկու հայկական հանրապետությունների Անվտանգության խորհուրդների համատեղ նիստին: Սահակյանը խոսել է արտաքին քաղաքական վերջին զարգացումների, բանակաշինության, հանրապետության հարավային շրջաններում ռազմավարական բնույթի սոցիալ-տնտեսական նախագծերի իրականացման մասին։ Նա նշել է, որ հետևողականորեն իրականացնելու դեպքում այդ նախագծերը կյանքի կկոչվեն:
