news.am: ԱՄՆ-ն եւ Հարավային Կորեան հայտարարել են համատեղ զորավարժությունները տեղափոխելու մասին: ԱՄՆ պաշտպանության նախարար Մարկ Էսփերը հայտարարել է, որ այս քայլը Հյուսիսային Կորեայի նկատմամբ «բարի քայլի ակտ» է, փոխանցում է «Ամերիկայի ձայնը»:

«Ես դրա մեջ տեսնում եմ խաղաղության համար պայմաններ ստեղծելու, քաղաքական համաձայնությունների կնքմանը նպաստելու ուղղությամբ Միացյալ Նահանգների եւ Հարավային Կորեայի բարեխիղճ ջանքերը, որոնք կբերեն Կորեական թերակղզու ապամիջուկայնացմանը»,- ասել է նա:

Համատեղ հայտարարությունը կատարվել է Բագկոկում Ասիայի երկրների պաշտպանության նախարարների համաժողովում: Այս հայտարարությունից կարճ ժամանակ անց Ճապոնիայի պաշտպանության նախարարը հանդես է եկել խիստ առարկություններով: «Հյուսիսային Կորեայի հանդեպ ոչ ոք չի կարող լավատեսություն դրասեւորել.,- հայտարարել է Տարո Կոնոն: - Հյուսիսային Կորեան այս տարի մի քանի արձակում է կատարել՝ թողարկելով ավելի քան 20 հրթիռ, ներառյալ բալիստիկ հրթիռների նոր տեսակները, որոնք արձակվում են սուզանավից»:

Հյուսիսային Կորեայի հատուկ հանձնարարությունների դեսպան Կվոն Չոն Գինը այս ամիս ավելի վաղ համատեղ զորավարժությունները որակել էր «սադրիչ եւ վտանգավոր արարք»: Նա հավելել էր, որ ԱՄՆ-ն «չկշռադատված խելահեղությամբ թաց ծածկոց է նետում Հյուսիսային Կորեայի եւ ԱՄՆ-ի միջեւ երկխոսության կայծի վրա, որը անհետացման եզրին է»: