civilnet.am: Հայաստանի կառավարությունը պատրաստվում է սահմանադրական փոփոխություններ իրականացնել։ Վարչապետի որոշմամբ՝ մեկնարկել է սահմանադրական բարեփոխումների մասնագիտական հանձնաժողովի ստեղծման գործընթացը։ Հանձնաժողովի կազմում լինելու է վեց իրավաբան-գիտնական և հասարակական կազմակերպությունների երկու ներկայացուցիչ։

Արդարադատության նախարար Ռուստամ Բադասյանը ներկայացրել է, թե ինչ փոփոխություններ են նախատեսում իրականացնել։

«Դատաիրավական ոլորտի ռազմավարությունում առանձնացրել ենք հետևյալ կետերը՝ բարձր դատական ատյանների նկատմամբ վտահությունը վերականգնելու քայլերի հաջորդականությունը, այսինքն՝ ինչ մոդելներ ենք մտածում ու ինչպես պետք է դատական հին համակարգից տեղափոխվենք նոր դատական համակարգ»,- ասել է նախարարը։

Բադասյանը նշել է, որ խորհրդարանական կառավարումից նախագահական կամ կիսանախագահական կառավարման անցում իրենց ռազմավարության մեջ նշված չէ։

«Չեմ կարծում, որ նման կոնցեպտուալ ու խորքային փոփոխություններ կարելի է հաճախ անել՝ սթրեսի ենթարկելով ամբողջ պետական կառավարման համակարգը,- ասել է նախարարը և մանրամասնել։- Բայց կան տարրեր, որոնք միանշանակ փոփոխման ենթակա են։ Օրինակ, կայուն մեծամասնական համակարգի ձևավորումը, որը թույլ է տալիս մեկ ուժի բացարձակ մեծամասնություն ձևավորել ԱԺ-ում։ Իհարկե, կայունությունը շատ կարևոր է, բայց դրան կարելի է հասնել կոալիցիաների միջոցով։ Երբ քաղաքական որևէ ուժ չի հավաքել բավարար քանակի ձայն, պետք է կարողանա բանակցել կոալիցիայի շուրջ, այլ ոչ թե պարզապես առավելագույն ձայն ստացած ուժին տրվեն լրացուցիչ քվոտաներ։ Կարծում եմ՝ սա ժողովրդարավարության նահանջ է եղել ու վերանայման կարիք ունի»։

Նախարարը նշել է, որ քննարկվելու են պատգամավորների քանակի, պետական մարմինների ֆունկցիաների տարանջատման հարցեր։

Շարունակությունը՝ civilnet.am-ում