Գրադարանների արդիականացումը չպետք է արվի ի վնաս գրադարանի գործունեության.Վահե Բուդումյան
14:27 - 03 մարտի, 2020

Գրադարանների արդիականացումը չպետք է արվի ի վնաս գրադարանի գործունեության.Վահե Բուդումյան

Մշակույթի նախկին փոխնախարար Վահե Բուդումյանը ֆեյսբուքյան իր էջում գրում է․

«Քննարկվում է Լոռու մարզային գրադարանում Լոֆթ կենտրոն տեղակայելու նախագիծը։ Առաջին հայացքից սա ոգևորիչ է թվում, սակայն իրականում պատկերը մտահոգիչ է։

2017-ից այս նախագիծը քննարկվում էր, բայց դեռ 2018-ին այն մերժեցինք, քանի որ նախագիծը էապես կխոչնդոտեր գրադարանի գործունեությանը, գումարած դրան, գործարքի պայմանները հավասարակշռված չէին: Եվ դա այն պարագայում, երբ այն ժամանակվա նախագծով Լոֆթը կապիտալ ներդրումներ էլ պետք է աներ:

Լոռու մարզային գրադարանը ամենախոշոր և ամենակտիվ պետական գրադարաններից է և բազմաթիվ երիտասարդ ու տարեց այցելուներ ունի։ Լոֆթին տարածք տրամադրելը առնվազն կիսով չափ կրճատում է գրադարանի տարածքը․գրադարանը զրկվում է ներկա ընթերցասրահից ու դահլիճից: Բնականաբար, դրվածքի փոփոխությունը բացասաբար կազդի առաջին հերթին տարեց ընթերցողների վրա։

Գրադարանների արդիականացումը և հատկապես մարզային գրադարանների ակտիվացումը շատ կարևոր են, բայց դա չպետք է արվի ի վնաս գրադարանի գործունեության:

Ժամանակին նախագիծը երկար քննարկվել է նաև տնօրինության և աշխատակիցների հետ, որոնք ևս կարծում են, որ նախագիծը, որքան էլ որ այն հետաքրքիր է թվում, կխոչնդոտի բուն գադարանի աշխատանքներին: Էլ չասած, որ պետք է հասկանալ նաև, թե ֆինանսապես արդարացվա՞ծ է արդյոք պետական հաստատության տարածքի մոտ 250 քմ առանց մրցույթի հատկացնելը շահույթ հետապնդող կազմակերպությանը։ Հուսով եմ, որ նախարարությունը նախքան կնքումը կհրապարակի գործարքի բոլոր պայմանները»։

Հոդվածի հղումը։


Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter

comment.count (0)

Մեկնաբանել