armenpress.am: Եվրամիությունը ողջունում է անկախ, արդյունավետ և հաշվետու դատական համակարգ ստեղծելու հանձնառությունը: ՀՀ վարչապետ Նիկոլ Փաշինյանի հետ հանդիպումից հետո լրագրողների հետ ճեպազրույցում այս մասին նշեց Եվրոպական խորհրդի նախագահ Դոնալդ Տուսկը:
«Կուռ դատական համակարգը էական բաղադրիչ է Հայաստանի ժողովրդավարության, ինչպես նաև տնտեսական, սոցիալական զարգացման համար: Եվրամիությունը նաև այստեղ շարունակելու է փորձագիտական օժանդակությամբ օգտակար լինել»,- ասաց Դոնալդ Տուսկը:
Եվրոպական խորհրդի նախագահ Դոնալդ Տուսկը նշեց, որ քննարկել են մասնագիտացված հակակոռուպցիոն հանձնաժողովի ստեղծումը: Նա նշեց, որ ճանաչելով կառավարության բարեփոխումների ուղղությամբ ջանքերը՝ ԵՄ-ը համարյա կրկնապատկել է իր օժանդակությունը Հայաստանին 2019 թվականի համար:
«Այս միջոցները կօգնեն գերակա ծրագրեր իրականացնել՝ ներառյալ ենթակառուցվածքային և բնապահպանական: ԵՄ-ը սատարելու է ջրային ռեսուրսների կառավարման հարցում: Պատրաստվում եմ այցելել Սևան, կլինեմ Սևանա վանքում, մի հուշարձան, որը ապացույց է Հայաստանի հազարամյա ազդեցությանը եվրոպական մշակույթի վրա»,-ասաց Դոնալդ Տուսկը:
comment.count (0)