hetq.am: Չնայած Ռոբերտ Քոչարյանի փաստաբանները հետ են վերցրել Սահմանադրական դատարանում (ՍԴ) քննվող գործի դիմումը, սակայն «Լուսավոր Հայաստան» խմբակցությունը Սահմանադրության փոփոխության սահմանադրականության քննության հարցով ՍԴ դեռ չի դիմելու:
Ընդդիմադիր խմբակցությունը Սահմանադրության փոփոխությունների նախագծի սահմանադրականությունը վիճարկելու համար, ինչպես իրենք են հայտարարել, կդիմեն այն ժամանակ, երբ Ռոբերտ Քոչարյանի գործի քննությունն ավարտված լինի:
Խմբակցության ղեկավար Էդմոն Մարուքյանի համոզմամբ` այդ կերպ իրենք չեն առնչվի քաղաքական պրոցեսին` թույլ տալով Սահմանադրության փոփոխության սահմանադրականության որոշման հարցն իրականացնել միայն իրավական գործընթացում:
Խմբակցության պատգամավոր Տարոն Սիմոնյանը լրագրողների հետ զրույցում ասաց, որ Քոչարյանի փաստաբանական թիմի հայտարարություններին ծանոթացել է:
«Իմ լավ բարեկամ փաստաբանները նշեցին, որ հետ են վերցնում դիմումը, բայց չպատասխանեցին էն հարցին, թե ինչ կապ ունի դիմումը հետ վերցնելը ՍԴ-ում քննող գործի քննության հետ, գործը քննվելու է»,- ասաց Սիմոնյանը:
Սիմոնյանի խոսքով` իրենց հայտարարությունը պայմանավորված էր նրանով, որ Ռոբերտ Քոչարյանի գործը ՍԴ-ում քննվելու է հուլիսի 7-ին, և որպեսզի իրավական գործընթացի վրա քաղաքական ներազդեցություն չլինի, չստվերվի իրավական գործընթացը, ԱԺ ընդդիմադիր խմբակցությունները իրավական գործընթաց կսկսեն այն ժամանակ, երբ Քոչարյանի գործի քննությունը կայացած լինի:
«Անկախ նրանից, որ դիմումը հետ են վերցնում, գործը քննվելու է, եթե ՍԴ-ն ասի, որ գործը չի քննելու, մեր պայմանը ուժի մեջ է։ ՍԴ-ն է որոշում` քննի, թե չէ: Մենք ասել ենք, եթե ՍԴ-ն որոշում է կայացնելու, դրանից հետո համապատասխան իրավական գործընթաց կկազմակերպենք»,- ասաց Սիմոնյանը:
Պատգամավորի խոսքով` այդ գործի քննությունից հետո պատրաստ են «Բարգավաճ Հայաստան» խմբակցության պատգամավորների հետ դիմել ՍԴ` Սահմանադրության փոփոխության նախագծի սահմանադրականության քննության հարցով:
Ըստ նրա` Քոչարյանի փաստաբանական թիմը, դիմումը հետ վերցնելով, քաղաքականացնում է գործընթացը:
comment.count (0)