Շիրակի պետական համալսարանի Ուսանողական խորհուրդը հայտարարություն է տարածել, որում ասվում է․

«Խոչընդոտվել է ՇՊՀ նոր ՈւԽ նախաձեռնող խմբի թվով 40 ուսանողների տեղաշարժը և իրազեկման ակցիան Շիրակի պետական համալսարանի առաջին կուրսեցիների շրջանում։

ՇՊՀ նոր Ուսանողական խորհրդի /Խորհրդարան/ նախաձեռնող խմբի ՇՊՀ քառասուն ուսանողներ այսօր Շիրակի պետական համալսարանում իրականացրեցին իրազեկող ակցիա ձևավորվող ՇՊՀ նոր ՈւԽ-ի մասին, որի կանոնադրությունը արդեն իսկ ընդունվել է ՇՊՀ ուսանողական նոր Ընդհանուր ժողովի կողմից և ուղարկվել ԿԳՄՍ նախարարություն՝ հաստատման։

ՇՊՀ ապօրինի և խարդախությամբ «ընտրված» ՈՒԽ նախագահի ժ/պ Ժորա Նիկողոսյանը խոչընդոտեց և սադրեց այդ պրոցեսը ՇՊՀ Հումանիտար գիտությունների և արվեստի ֆակուլտետի դեկան Թամարա Մելիքյանի և Գործավարության և վարչարարության ամբիոնի վարիչ Արթուր Մկրտչյանի հետ միասին՝ ուսանողների ներկայությամբ։

Վերընշյալ անձանց կողմից փորձ արվեց թույլ չտալ ակցիան շարունակել Հումանիտար գիտությունների ֆակուլտետում և առհասարակ բուհում, ինչը, իհարկե ձախողվեց․ իրազեկման ակցիան շարնունակվեց ամբողջ բուհով․ թռուցիկներ բաժանվեցին ուսանողներին և հայտարարություններ փակցվեցին բուհում, որոնք բուհում խարդախ և անօրինական գործունեություն իրականացնող Ժորա Նիկողոսյանի կողմից պատառոտվում էին փակցնելուց վայրկյաններ անց, ինչը իհարկե ևս մեկ անգամ ապացուցում է այն, որ նման մարդիկ չեն կարող լինել ուսանողների ներկայացուցիչներ կամ հանդես գալ որպես Ուսանողական խորհուրդ․․․

Հետո այս պրոցեսը՝ իր հաստիքին չհամապատասխանող և ապօրինի ՈՒԽ-ն վերահսկող վարչական աշխատող Արթուր Չարչօղլյանի կուլիսային ուղղորդմամբ փորձ արվեց տեղափոխել անձնական, տղայական դաշտ․

Մենք ցանկանում ենք ընդգծել և զգուշացնել, որ ՇՊՀ-Ի նոր Ուսանողական խորհրդի ձևավորման պրոցեսը բացառապես իրավական դաշտում է, և ցանկացած փորձ այն տեղափոխել անձնական, տղայական, թաղային բարքերի դաշտ, ընդունելի չէ, և անհրաժեշտության դեպքում նման խնդիրների լուծումները ևս կհանգրվանեն իրավական դաշտում։

Սա և՛ կոչ է, և՛ հորդոր ուղղված ՇՊՀ-ում որոշումներ կայացնողներին, լինեն դրանք լեգիտիմ, թե ոչ լեգիտիմ որոշում կայացնողներ։ Մենք աշխատում ենք՝ հիմք ընդունելով ՀՀ Սահմանադրությունը և դրանից բխող օրենսդրական կարգավորումներն ու ենթաօրենսդրական ակտերը, դրանցից բխող համալսարանի աշխատանքն ու գործունեությունը կարգավորող կանոնադրությունը և այս ամենին հակասելու հիմք չունեցող ՇՊՀ նոր ՈւԽ կանոնադրության կետերին համաձայն։

Ցանկացած քայլ կամ արարք, որը կհակասի վերոնշյալներին, ստանալու է իրավական խստագույն պատասխան՝ հասկանալի բոլորին։

ԿԳՄՍ նախարարությանը կոչ ենք անում տեր կանգնել այս իրավիճակին, հեղափոխության արժեքներին և արդարության ու ճշմարտության համար պայքարող ուսանողներին մենակ չթողնել վարչական լծակներ ունեցող հանցագործների հետ դեմ առ դեմ, ովքեր բուհը քայքայել են այս տարիների ընթացքում և սերունդներ են փչացրել։

ՇՊՀ-ում վերականգնվելու է արդարությունը! Բոլոր հանցագործները պատասխան են տալու իրենց հանցանքների համար։

Հեղափոխությունը նոր է սկսվում։

Սպասում ենք պատկան մարմինների գնահատականին այս ամենի վերաբերյալ․

Հավելենք որ, մեր հեռանալուց հետո ապօրինի ՈՒԽ-ն Ժորա Նիկողոսյանի, Արթուր Չարչօղլյանի և այլ վարչական աշխատողների աջակցությամբ, ճնշումներ գործադրելով ուսանողներին հավաքել են բուհի մեծ դահլիճում։ Այս իրադարձությանը ևս հրավիրում ենք պատկան մարմինների ուշադրությանը»։