tert.am: ԱՄՆ սենատոր Բոբ Մենենդեսը, որը Հայոց ցեղասպանության մասին բանաձևի համահեղինակներից է, Սպիտակ տան ազգային անվտանգության հարցերով խորհրդական Ռոբերտ Օ'Բրայենին կոչ է արել հրապարակել ԱՄՆ նախագահ Դոնալդ Թրամփի և թուրք առաջնորդ Ռեջեփ Թայիփ Էրդողանի «սերտ կապերին» առնչվող փաստաթղթերը: Այս մասին հայտնում է Ամերիկայի «Հայ դատի» հանձնախումբը՝ ներկայացնելով սենատորի նամակը:
«Հարգելի պարոն Օբրայեն,
Գրում եմ նախագահ Թրամփի՝ Թուրքիայի նախագահ Ռեջեփ Թայիփ Էրդողանի հետ փոխգործակցության վերաբերյալ: Ես բազմիցս բարձրաձայնել եմ նախագահ Թրամփի և Էրդողանի հարաբերությունների մասին մտահոգություններս, այդ թվում՝ ԱՄՆ ազգային անվտանգության վրա այդ հարաբերությունների ազդեցության վերաբերյալ:
Այդ հարաբերությունները լավ ազդեցություն չեն ունեցել Միացյալ Նահանգների ազգային անվտանգության վրա: Կցանկանայի երեք օրինակ ընդգծել:
Նախ, նախագահ Թրամփի կառավարման օրոք Թուրքիան S400 ՀՕՊ համակարգեր է ձեռք բերել Ռուսաստանից՝ խախտելով ԱՄՆ պատժամիջոցները:
Երկրորդ, այս տարի ավելի վաղ Էրդողանը հրահանգել է Սուրբ Սոֆիայի տաճարը մզկիթի վերածել: Այդ կառույցը պատմական և սրբազան վայր է, որը կարևոր կրոնական և պատմական նշանակություն ունի քրիստոնյա աշխարհի համար ողջ աշխարհում: Խորապես հիասթափված եմ, որ նախագահ Թրամփի ազդեցությունն Էրդողանի վրա այնքան հզոր չի եղել՝ կանխելու դա:
Երրորդ, անցյալ դեկտեմբերին հպարտությամբ առաջնորդեցի Սենատում Հայոց ցեղասպանության ճանաչման բանաձևի ընդունումը: ԱՄՆ-ն չափազանց երկար է անտեսել ճշմարտությունը, ինչը խարխլել է մեր հեղինակությունը աշխարհով մեկ տեղի ունեցող նման երևույթները բացահայտելու հարցում: Բանաձևն ընդունվեց միաձայն, սակայն բախվեց Սպիտակ տան և նախագահ Էրդողանի կոշտ դիմադրությանը: Նախագահ Թրամփի լռությունը պայմանավորված է Էրդողանի հետ իր հարաբերություններով կամ Թուրքիայի հետ կապված իր անձնական շահերով»,- մասնավորապես ասվում է նամակում:
comment.count (0)