armenpress.am: Հայաստանում կադաստրային քարտեզը կվարվի առցանց, քաղաքացիների համար հասցեների տրամադրման կարգը կհեշտացվի: Այս մասին հրավիրված ասուլիսում ասաց Կադաստրի կոմիտեի ղեկավար Սուրեն Թովմասյանը՝ նշելով, որ կոմիտեում իրականացվում են բարեփոխումներ: Կոմիտեի կազմում գործում էր «Գեոդեզիայի և քարտեզագրություն» ՊՈԱԿ-ը, որը լուծարվեց:

Դրա փոխարեն ստեղծվեց Գեոմատիկայի կենտրոն: Այն մասնագիտացված ստորաբաժանում է, որը պատասխանատու է լինելու ինտեգրված կադաստրի ներդրման, համապատասխան քարտեզագրական նյութերի տվյալների բազայի ստեղծման համար: Ներկայում տվյալ կենտրոնում լայն աշխատանքներ են տարվում Հայաստանի հասցեները միատար դարձնելու ուղղությամբ:

«Հասցեների հետ կապված հետևյալ խնդիրն ունենք: Օրինակ Խաչատուր Աբովյանի փողոցը, մի դեպքում հենց այդպես կարող է նշված լինի, մյուս դեպքում՝ Խ. Աբովյանի փողոց: Սա նշանակում է, որ հասցեների բազան միատարր չէ: Ներկա դրությամբ մենք այդ ֆիլտրացման աշխատանքներն ենք կատարում և բազան դարձնում միատարր: Մյուս կողմից հասցեները կապակցում  ենք քարտեզների հետ»,-ասաց Սուրեն Թովմասյանը: 

Կոմիտեի ղեկավարը նշեց, որ կար մշակված քարտեզագրման հարթակ, որի զարգացման ուղղությամբ ակտիվ փոփոխություններ են իրականացվել: Արդյունքում՝ ներկա պահին մոտ 100 համայնքի կադաստրային քարտեզ արդեն վարվում է առցանց:

«Սա ևս շատ կարևոր փոփոխություն է: Մինչ այդ, թարմացումները տեսնելու համար անընդհատ ստիպված էինք լինում համապատասխան աշխատակցից ուզել նոր քարտեզ: Հիմա 100 համայնքի տվյալները վերջին 4 ամիսների ընթացքում ներբեռնվել են առցանց վարվող հարթակ:

Երբ գեոպորտալը ամբողջական հասանելի կլինի, արդեն հնարավոր կդառնա տեսնել այդ պահին կադաստրային քարտեզում գործող իրավիճակը: Այսինք, երբ նոր հող կիսվի և նոր իրավունք գրանցվի, ապա դա անմիջապես կարտացոլվի կադաստրային քարտեզում»,-ասաց Սուրեն Թովմասյանը,՝ ավելացնելով, որ գեոպորտալը և տարածական տվյալների ենթակառուցվածքն իրենց թիրախային ռազմավարական ուղղություններից են, որոնք պետք է զարգացնել:

Դրանից բացի, կոմիտեն քաղաքացիների համար հեշտացնում է հասցեների տրամադրման կարգը: Ներկայում, երբ ցանկանում նոր հասցե է ցանկանում ձեռք բերել, դիմում է համայնք, որը տալիս է հասցեի որոշում և տվյալ քաղաքացին այդ որոշումը բերում ներկայացնում է կադաստրի կոմիտե:

Հիմա ներդրվում է էլեկտրոնային հարթակ: Արդյունքում՝ քաղաքացին հասցե ստանալու համար դիմում կգրի համայնքին, իսկ համայնքի ղեկավարը, օգտվելով հարթակի հնարավորություններից, որոշումը կադաստր կուղարկի առցանց՝ առանց սեփականատիրոջ դիմումի: Կոմիտեի ղեկավարը հույս հայտնեց, որ եկող տարվա մինչև էլեկտրոնային հարթակը ներդրված կլինի: