18:17 - 15 հոկտեմբերի, 2020
Միչիգանի Ներկայացուցիչների պալատը բանաձևով դատապարտել է Ադրբեջանի կողմից ԼՂ-ի դեմ հարձակումը
ԱՄՆ Միչիգան նահանգի Ներկայացուցիչների պալատը հոկտեմբերի 7-ին բանաձև է ընդունել, որով դատապարտում է Ադրբեջանի կողմից Լեռնային Ղարաբաղի դեմ համակարգված հարձակումը, հակամարտության մեջ Թուրքիայի միջամտությունը և ԱՄՆ պետքարտուղարությանը կոչ անում աշխատելու ԵԱՀԿ ՄԽ համանախագահների, Հայաստանի, Ադրբեջանի և Արցախի Հանրապետության կառավարությունների հետ՝ հասնելու հակամարտության երկարատև ու խաղաղ կարգավորմանը։ Այս մասին հայտնում է Արցախի ԱԳՆ-ը։
Բանաձևում նշվում է, որ Ադրբեջանի կողմից 2020 թվականի սեպտեմբերի 27-ին Արցախի Հանրապետության դեմ ռազմական հարձակման, այդ թվում՝ մայրաքաղաք Ստեփանակերտի հրետակոծման մասին, անհանգստություն արտահայտվում Թուրքիայի կողմից Ադրբեջանում տեղակայված սիրիացի վարձկանների կապակցությամբ։ Փաստաթղթում անդրադարձ է կատարվում նաև Արցախի Հանրապետության հռչակման իրավական հիմքերին, մասնավորապես, այն իրողությանը, որ Խորհրդային միության կազմալուծման համատեքստում Արցախի ժողովուրդը 1991 թվականի դեկտեմբերի 10-ին քվեարկել է անկախության օգտին։
Միչիգանի Ներկայացուցիչների պալատի կողմից ընդունված բանաձևի հեղինակը հայազգի օրենսդիր Մարի Մանուկյանն է։
Հիշեցնենք նաև, որ Միչիգան նահանգը 2017 թվականին Արցախի Հանրապետության ճանաչումն աջակցող բանաձև էր ընդունել։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)