Պարտվողական եւ ազգային նվաստացման քաղաքականությունն ապագա չունի. ՀՀ դիվանագետների հայտարարությունը
13:30 - 04 դեկտեմբերի, 2020

Պարտվողական եւ ազգային նվաստացման քաղաքականությունն ապագա չունի. ՀՀ դիվանագետների հայտարարությունը

Հայկական դիվանագիտությանը սպասվում է ծանրագույն աշխատանք առաջիկա բանակցային գործընթացը պատշաճ մակարդակով իրականացնելու համար։ Այս մասին հայտարարություն են տարածել ՀՀ դիվանագետները։

Հայտարարության մեջ, մասնավորապես, ասվում է.

«Սիրելի հայրենակիցներ,

Հայաստանի Հանրապետության գործող իշխանության հախուռն եւ անհեռատես արտաքին քաղաքականությունը լրջագույն մարտահրավերների առջեւ կանգնեցրեց մեր երկիրը։ Հավուր պատշաճի չկարեւորվեցին տասնամյակներով ձեւավորված ռազմավարական բարձր մակարդակի հարաբերությունները Ռուսաստանի Դաշնության, գործընկերային սերտ հարաբերությունները Իրանի, Չինաստանի, Վրաստանի, բազմաշերտ հարաբերությունները Ամերիկայի Միացյալ Նահանգների, Եվրոպական Միության երկրների հետ եւ այլ արտաքին քաղաքական ուղղություններ։ Այս ամենի ուղղակի հետեւանքն էր սույն թվականի նոյեմբերի 9-ին ստորագրված աննախադեպ պարտվողական հայտարարությունը: Այդ փաստաթղթում առկա են բազմաթիվ անորոշություններ, որոնք վերաբերում են Արցախի Հանրապետության իրավական կարգավիճակին, տարածքային խնդիրներին, հաղորդակցության ուղիների ապաշրջափակման հարցերին, ռազմագերիների, պատանդների, պահվող այլ անձանց եւ մահացածների մարմինների փոխանակմանը, ինչպես նաեւ տեղահանված անձանց եւ փախստականների վերադարձին:

Հայկական դիվանագիտությանը սպասվում է ծանրագույն աշխատանք առաջիկա բանակցային գործընթացը պատշաճ մակարդակով իրականացնելու համար։ Մեզ տրված է պատմական հնարավորություն հետեւողական աշխատանքով ապացուցելու, որ հայ դիվանագետն արժանի է պատերազմի դաշտում հերոսության բացառիկ օրինակներ ցուցաբերած մեր զինվորներին եւ սպաներին։

Սակայն այս ամենը հնարավոր է միայն ձախողված վարչապետի եւ նրա կառավարության հրաժարականի դեպքում: Անհրաժեշտ է ձեւավորել ժողովրդի վստահությունը վայելող լեգիտիմ քաղաքական իշխանություն, որը կառաջնորդվի ազգային-պետական շահերի խորը գիտակցման վրա հիմնված արտաքին քաղաքականությամբ: Պետք է ժամ առաջ համազգային կարողականությամբ ու հետեւողական քայլերով Հայաստանը Հանրապետությունը եւ Արցախը դուրս բերել այս ծանր վիճակից: Պարտվողական եւ ազգային նվաստացման քաղաքականությունն ապագա չունի։

Հրայր Կարապետյան

ՀՀ արտակարգ դեսպանորդ եւ լիազոր նախարար

Արա Հակոբյան

ՀՀ արտակարգ դեսպանորդ եւ լիազոր նախարար

Ռուբիկ Հակոբյան

ՀՀ արտակարգ դեսպանորդ եւ լիազոր նախարար

Վարդան Հակոբյան

ՀՀ արտակարգ դեսպանորդ եւ լիազոր նախարար

Էդգար Ղազարյան

ՀՀ արտակարգ դեսպանորդ եւ լիազոր նախարար

Հովհաննես Մանուկյան

ՀՀ արտակարգ եւ լիազոր դեսպան

Արման Նավասարդյան

ՀՀ արտակարգ եւ լիազոր դեսպան

Արա Սահակյան

ՀՀ արտակարգ եւ լիազոր դեսպան

Օլեգ Եսայան

ՀՀ արտակարգ եւ լիազոր դեսպան

Աշոտ Գալոյան

ՀՀ արտակարգ եւ լիազոր դեսպան


Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter

Կարդալ նաև


comment.count (0)

Մեկնաբանել