news.am: Նախ պետք է արագորեն վերակառուցել մեր բանակը, ապահովել մեր անվտանգությունը. Մեր անվտանգությունը պետք է ապահովեն ոչ թե ռուսական, այլ հայկական զորքերը: Այս մասին, այսօր՝ փետրվարի 20-ին, Ազատության հրապարակում ընթացող հանրահավաքի ժամանակ հայտարարեց «Հայրենիքի փրկության շարժման» վարչապետի թեկնածու Վազգեն Մանուկյանը:

«Բանակում պետք է լինեն կառուցվածքային խոշոր փոփոխություններ: Այստեղ եւ աշխտավարձի հարցն է, եւ զինակոչիկների հարցն է: Ես խնդրել եմ, որ Սեյրան Օհանյանը կներկայացնի այն տեսլականը, որ ունենք բանակի նկատմամբ:

Մեզ արագորեն պետք է վերականգնել մեր հարաբերությունները մեր դաշնակիցների հետ: Դա ոչ միայն ՌԴ-ն է, այլեւ Իրանը, Չինաստանը եւ ցանկացած ուժ, որը պայքարում է Թուրքիայի ագրեսիայի դեմ: Ուշ թե շուտ, մենք հաղթելուց հետո, նորմալ պետություն կառուցելուց հետո հարաբերություններ կունենանք բոլոր հարևանների հետ, բայց ոչ այսօրվա ստրկական պայմաններով, այլ մեր թելադրած պայմաններով: Դրա համար, հիմա այն պետությունները, որոնք պայքարում են Թուրքիայի ագրեսիայի դեմ, իրենք մեր բնական դաշնակիցներն են»,-ասաց Վազգեն Մանուկյանը:

«Իրենք մեզ փորձելու են ստրկացնել: Այն 750 մլն-ը որ պարտքով տվել են Հայաստանին, դրա մեջ էլ կա ստրկացում: Նախատեսված էր 2,5 մլրդ: Պարտքեր տալով մեզ դնելու են ստրկական վիճակում: Անելիք շատ կա, բոլոր անելիքները հնարավոր են, միայն հավատացեք ձեր ուժերին: Մի մտածեք, որ ուրիշներն են որոշում մեր ճակատագիրը: Մենք ենք որոշում՝ հաշվի նստելով ուրիշների հետ»,-հայտարարեց նա: