hetq.am: Վերաքննիչ քրեական դատարանը՝ նախագահությամբ դատավոր Արմեն Բեկթաշյանի, այսօր հեռացել է խորհրդակցական սենյակ՝ Պաշտպանության նախարարությունից առանձնապես խոշոր չափի գումար հափշտակելու գործով մեղադրյալ Դավիթ Գալստյանի խափանման միջոցի հարցով որոշում կայացնելու։ Այս մասին ասաց Գալստյանի պաշտպաններից Արմեն Հարությունյանը։ Որոշումը կհրապարակվի փետրվարի 24-ին։

Հիշեցնենք, որ Ազգային անվտանգության ծառայությունը փետրվարի 1-ին հաղորդագրություն է տարածել այն մասին, որ արտերկրում գրանցված ընկերության խորհրդի նախագահ Դ. Գ.-ն, նախնական համաձայնության գալով նույն ընկերության տնօրեն Ա. Բ.-ի հետ, ի սկզբանե առանձնապես խոշոր չափերի գումար հափշտակելու դիտավորությամբ,  ընկերության անունից Պաշտպանության նախարարության հետ կնքել է պայմանագիր, որի համաձայն՝ ընկերությունը պարտավորություն է ստանձնել 2018 թվականի ընթացքում, ԶՈՒ ԳՇ կարիքների համար մատակարարել 1983-1986թթ. արտադրության հրանոթի համապատասխան տրամաչափի կրակոցներ, սակայն պայմանագրով նախատեսված հրանոթի համապատասխան տրամաչափի կրակոցների փոխարեն, խաբեության եղանակով՝ թաքցնելով մատակարարված գույքի տակտիկատեխնիկական բնութագրին չհամապատասխանելու փաստը, մեկ միասնական դիտավորությամբ, ՊՆ-ին են մատակարարել ընդհանուր՝ 523.089.000 ՀՀ դրամին համարժեք, 1.083.000 ԱՄՆ դոլար արժեքով ավելի հին՝ 1977 թվականի Չեխական արտադրության մեկ այլ տեսակի հրանոթի կրակոցներ, որոնք իրենց մարտավարական և տեխնիկական հատկանիշներով, ըստ ԱԱԾ-ի տարածած հաղորդագրության,  էապես զիջել են այն հրանոթի կրակոցներին, որոնց համար դրանք մատակարարվել են։ Հաղորդագրության մեջ նշված Ա․Բ․-ն Արմեն Բաղդասարյանն է։ Վերջինս և Դավիթ Գալստյանը կալանավորվել են փետտրվարի 2-ին, և նրանց պաշտպանները բողոքարկել են կալանավորման որոշումները։ Արմեն Բաղդասարյանի կալանավորման դեմ բողոքը մակագրվել է դատավոր Մնացական Հարությունյանին։ Արմեն Հարությունյանը մեզ հետ զրույցում ասաց, որ Բաղդասարյանի խափանման միջոցի գործով դեռևս որոշում չի կայացվել։