14:51 - 31 հունվարի, 2020
Հայաստանի և Մոլդովայի վարչապետը քննարկել են տնտեսական հարաբերություններին առնչվող հարցեր
Ալմաթիում անցկացվող Եվրասիական միջկառավարական խորհրդի նիստի շրջանակում վարչապետ Նիկոլ Փաշինյանը հանդիպում է ունեցել Մոլդովայի վարչապետ Իոն Կիկուի հետ, հայտնում են վարչապետի աշխատակազմից:
Իր խոսքում վարչապետ Փաշինյանը նշել է, որ երկու երկրները չեն կարող պարծենալ առևտրատնտեսական հարաբերությունների մակարդակով, և դրա համար կան և՛ օբյեկտիվ, և՛ սուբյեկտիվ պատճառներ. - «Բայց կարծում եմ, որ մենք պետք է, և հատկապես 21-րդ դարում դա հաստատ լուծվող հարց է, բարձրացնենք մեր տնտեսական հարաբերությունների, ապրանքաշրջանառության մակարդակը, և իհարկե, ես պատրաստ եմ աշխատել այդ ուղղությամբ: Ինչո՞ւ եմ ես հատկապես ընդգծում առևտրատնտեսական կապերի հարցը, քանի որ վստահ եմ՝ մյուս ուղղություններով մենք որևէ խնդիր չունենք և չենք ունենա»:
Մոլդովայի վարչապետն իր խոսքում նշել է, որ մեծ ներուժ կա տնտեսական կապերը զարգացնելու համար. - «Մենք կարող ենք տարբեր ուղղություններով խթանել մեր փոխգործակցությունը և նոր ազդակ հաղորդել»:
Հայաստանի և Մոլդովայի վարչապետերը քննարկել են երկկողմ տնտեսական հարաբերությունների զարգացմանը վերաբերող հարցերի լայն շրջանակ:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)