ՀՀ կառավարությունն ու Էյր Արաբիան 10-ական մլն դոլար են ներդնում՝ ավիաընկերություն հիմնելու համար
13:18 - 14 հոկտեմբերի, 2021

ՀՀ կառավարությունն ու Էյր Արաբիան 10-ական մլն դոլար են ներդնում՝ ավիաընկերություն հիմնելու համար

ՀՀ կառավարությունն ու Էյր Արաբիան 10-ական մլն դոլար են ներդնում՝ ավիաընկերություն հիմնադրելու համար

ՀՀ կառավարությունն այսօրվա նիստում ընդունեց մի նախագիծ, որը, «Հայաստանի պետական հետաքրքրությունների ֆոնդի» ղեկավար Դավիթ Փափազյանի խոսքով, կյանքի է կոչում ազգային ավիափոխադրող ստեղծելու մասին ՀՀ կառավարության տված խոստումը։

«Կարեւորում ենք այն հանգամանքը, որ գործարքն իրականացրել ենք հաշվարկի, պրոֆեսիոնալ գնահատման արդյունքում, եւ որպես ծրագիր՝ ստացել ենք առավելագւոյն կենսունակ մոդել։ Մենք պարզապես ավիաընկերություն չենք գրանցում, որը կարող էր տեսականորեն դառնալ վերջին 20-25 տարիների ընթացքում նման փորձերից մեկը։ Այս ծրագրով մենք ստեղծում ենք ազգային մրցունակ ավիափոխադրող, որն արդեն ի սկզբանե ունի մրցակցային առավելություն, որն է Air Arabia ընկերության մոդելի մոտ քսան տարվա դրական փորձը»,- ասաց Փափազյանը՝ հավելելով, որ սա առաջին անգամ հնարավորություն է տալիս երկարաժամկետ մրցունակ եւ կենսունակ ռազմավարության վրա հիմնված ազգային ավիափոխադրող։ 

Հիշեցնենք, որ այս տարվա հուլիսի 14-ին «Հայաստանի պետական հետաքրքրությունների ֆոնդ» փակ բաժնետիրական ընկերության և Էյր Արաբիա (Air Arabia) ընկերությանն ամբողջությամբ պատկանող ընկերության միջև կնքվել է պայմանագիր, որով կողմերը պարտավորվել են Հայաստանի Հանրապետությունում ստեղծել ազգային ավիաընկերություն: 

Նախագծից տեղեկանում ենք, որ այս ընկերությունում բաժնեմասնակցության համար «Հայաստանի պետական հետաքրքրությունների ֆոնդ» ՓԲԸ պարտավորվել է բաժնետոմսերի դիմաց վճարել 4,733,720,000 (չորս միլիարդ յոթ հարյուր երեսուներեք միլիոն յոթ հարյուր քսան հազար) ՀՀ դրամ, իսկ Էյր Արաբիա ընկերությանը պատկանող ընկերությունը նույնպես ներդրումն իրականացնելու է իր բաժնեմասնակցության համապատասխան դրամական միջոցներով: 

Ավիաընկերության կառավարումն իրականացնելու է Էյր Արաբիան, որը, ինչպես նշված է նախագծում, հանդիսանում է Մերձավոր Արևելքի ու Հյուսիսային Աֆրիկայի առաջին և ամենամեծ բյուջետային ավիափոխադրող: 

Նախագծի հիմնավորման մեջ ասված է, որ նոր ազգային ավիաընկերության ստեղծումը մեծապես կնպաստի երկրում արագ աճ գրանցող զբոսաշրջության և հարակից ոլորտների ներուժի օգտագործմանը, ինչպես նաև կնպաստի տնտեսական ակտիվությանը՝ ՀՀ քաղաքացիներին ապահովելով հուսալի, որակյալ և մատչելի օդային ճանապարհորդության հնարավորությամբ․ «Նման գործարքի միջոցով տնտեսական ակտիվության խթանումը ՀՀ կառավարության կողմից հատկապես կարևորվում է COVID-19-ով պայմանավորված զբոսաշրջության և հարակից ոլորտում ծագած խնդիրների հաղթահարման համատեքստում: Էյր Արաբիայի հետ սերտ գործընկերությունը օգտակար կարող է լինել Հայաստանի Հանրապետության քաղաքացիական ավիացիայի ոլորտի զարգացման համար, իսկ նման ընկերության հարուստ փորձի տեղայնացումը կլինի նախկինում ծագած խնդիրների կարգավորման ուղղություններից մեկը»: 

ՀՀ կառավարության սույն որոշման նախագծի ընդունման կապակցությամբ պետական բյուջեում նախատեսվում է 4,733,720,000 (չորս միլիարդ յոթ հարյուր երեսուներեք միլիոն յոթ հարյուր քսան հազար) ՀՀ դրամ ելքերի ավելացում:

ՀՀ վարչապետ Նիկոլ Փաշինյանի, ի հավելումն Փափազյանի խոսքի, նշեց, որ 2018—ին արձանագրել են, որ կարեւորում են Հայաստանում հայկական ավիաընկերությունների ստեղծման եւ զարգացման նպատակը․ «Այդ առումով կառավարությունը որոշակի դերակատարում պիտի ունենա։ Այս որոշումն արտահայտում է ՀՀ կառավարության՝ հայկական ավիաընկերություն ունենալու քաղաքական կամքը, ինչը չի նշանակում, թե ՀՀ-ում հայկական այլ ավիաընկերություններ չպետք է լինեն եւ չեն կարող լինել։ Տվյալ դեպքում ՀՀ կառավարությունը, պայմանավորվածություն ունենալով Էյր Արաբիա ընկերության հետ, հետեւյալ գործողությունն են անում․ կառավարությունն ու Էյր Արաբիայի դուստր ընկերությունը ներդնում են գումար՝ յուրաքանչյուրը 10 մլն դոլար։ Էյր Արաբիան ունի ավիաընկերություն ստեղծելու եւ զարգացնելու փորձառություն, եւ այս փորձառության բերումով է, որ մենք այսպիսի գործընկերությունը կարեւոր ենք համարում։ Այս համատեղ ներդրմամբ Էյր Արաբիային  հրավիրում ենք համատեղ հիմնադրել եւ կառավարել ավիաընկերություն, որը կկոչվի «Արնա» ավիաընկերություն»։

Փաշինյանն անդրադարձավ նաեւ ազգային փոխադրող հասկացության վերաբերյալ հարցին՝ ասելով, որ Հայաստանի օրենսդրությամբ այդ հասկացությունը կարող է օգտագործել յուրաքանչյուր ընկերություն, որը գրանցված է ՀՀ-ում՝ որպես հայկական ընկերություն․ «Այս իրավիճակը մենք շարունակելու ենք պահպանել։ Ստեղծվող ավիաընկերությունը ոչ մի արտոնություն չի ունենալու եւ գործելու է հավասար մրցակցային դաշտում։ Միակ տարբերությունն այն է, որ կառավարությունը ներդրում է անում այստեղ։ Ես գիտեմ, որ կան որոշակի կասկածներ, մտավախություններ, տարընթերցումներ՝ մանավանդ հաշվի առնելով, որ այս ոլորտում մեղմ ասած տհաճ հիշողություններ ունենք, բայց կարծում եմ, որ մենք պետք է այս ճանապարհով գնանք՝ գիտակցելով նաեւ, որ ունենք որոշակի ռիսկեր, ինչպես ցանկացած ներդրման պարագայում։ Բայց կարծում ենք, որ ստեղծել ենք բավարար պայմաններ, որպեսզի այդ ռիսկերը լինեն կառավարելի»։


Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter

Կարդալ նաև


comment.count (0)

Մեկնաբանել