«Ձայն» Լիբերթար Պահպանողական կուսակցությունը հայտարարություն է տարածել, որը ներկայացնում են ստորեւ․

«Վերահաստատելով մեր քաղաքական կամքի հենասյունը՝ Հայաստանի Հանրապետության ինքնիշխանության անքննելիությունը, Հայաստանի Հանրապետության համար այս ճակատագրական պահին, երբ գործող քաղաքական ընտրանին ցուցաբերում է բացահայտ անկարողություն ազգի հուսալքման, քայքայման և վերջնական պառակտման աղետալի ընթացքը կասեցնելու համար, երբ նորից Հայոց պատմության դրամատիկ ընթացքը խտանում է օրվա կորուստների իրականության մեջ և ժողովրդի մեջ բարձրանում է անզորություն արձանագրող ճակատագրապաշտությունը, քաղաքական և մշակութային անկմանն ընդդիմանալով, անհրաժեշտ ենք համարում մեր պատմության ակունքներից հիշեցնել Պետականության հարատևման երեք հիմնասյուն՝

• մեր լեզուն՝ որպես ինքնության և մշակույթի պահպանման ազգային սկզբունքը,
• մեր դավանանքը՝ որպես Հայաստանի ընտրած քաղաքակրթական ուղին,
  քրիստոնեական արժեքները,
• մեր դիմադրելու իրավունքը՝ որպես վասալացմանն ու ոչնչացմանը մեր
  գոյատևման երաշխիքը։

Այս երեք հիմնասյուններն ուղերձում են՝ ինքնորոշում, Պետության պահպանում, և ոչ թե
ինքնության կորուստ, հոգեզրկում և ստրկացում։ Սա մատչելի է Հայաստանի Հանրապետության յուրաքանչյուր քաղաքացու համար՝ անկախ իր սոցիալական, քաղաքական կամ նեղանձնական կարգավիճակից, և սրանց շուրջ միավորումը խորհրդանշում է մեր ընդհանուր հայրենիքի՝ Հայաստանի Հանրապետության հանդեպ հավատարմության մեջ քաղաքական, հասարակական և մշակութային հակասությունները հաղթահարելու մեր կարողությունը։

Կարևորելով և բարձր գնահատելով վկայակոչվածը՝ հայտարարում ենք, որ կանգնելու ենք, և պայքարելու ենք Հայաստանի Հանրապետության համար, նրա պետական լեզվի՝ հայերենի, նրա եկեղեցու՝ Հայ Առաքելական Եկեղեցու և նրա ինքնիշխանության համար, առանց երբևէ ընտրելու որևէ օտար երկրի կողմից մեղմ կամ կոշտ ուժով պարտադրվող որևէ ստրկացնող միություն, քանզի պատմությունն առօրյա տրամադրություններից տարբերվում է նրանով, որ այն քայլում է դարերի գծով։

Կոչ ենք անում բոլոր սուվերեն անհատներին և ուժերին, Հայաստանի Հանրապետությանը ծառայողներին՝ միավորվելու, ճակատագրական այս հերթական խաչմերուկին մի կողմ դնելով քաղաքական և անձնական բոլոր տարաձայնությունները, քանզի ստեղծված իրավիճակում Հայաստանի Հանրապետության քաղաքացու պայքարն այլևս պետութենական ինքնիշխանության պահպանման պայքարն է, իսկ Հայաստանի Հանրապետության շահին ծառայող քաղաքական ուժերի միավորումը՝ Հայաստանի Հանրապետության պահպանման հրամայական։