Հայաստանում սահմանվեց «Անտառագետի եւ ջրաբանի օր»։ ՀՀ կառավարությունն այսօր ընդունեց ՀՀ շրջակա միջավայրի նախարարության ներկայացրած նախագիծը, որով առաջարկվում էր սահմանել «Անտառագետի եւ ջրաբանի օր»։

«ՀՀ կառավարության 2004թ․ հունիսի 3-ի N 936-Ն որոշման մեջ լրացումներ կատարելու մասին» որոշման այս նախագծի ընդունման անհրաժեշտությունը, ըստ նախարարության, պայմանավորված է նրանով, որ նույն որոշման 2-րդ կետով մարտի 23-ին (Օդերևութաբանության համաշխարհային օրվա կապակցությամբ) նշվում է օդերևութաբանի օր։ Հաշվի առնելով այն հանգամանքը, որ մարտի 21-ը անտառների միջազգային օրն է, իսկ մարտի 22-ը ջրի համաշխարհային օրը, հետևաբար ՀՀ-ում անտառագետի և ջրաբանի օրը նշելու վերաբերյալ  նախագիծն անհրաժեշտ է ընդունել Հայաստանի Հանրապետությունում ոչ միայն օդերևութաբանի, այլև  անտառագետ և ջրաբան մասնագետների առանձնահատուկ դերն ընդգծելու նպատակով: 

«Կարևորելով անտառագետների և ջրաբանների դերը պետության անվտանգության, տնտեսության զարգացման և ժողովրդի բարեկեցության ապահովման մեջ` կարծում ենք, որ արժանին պետք է մատուցել  անտառագետ և ջրաբան մասնագետներին՝ գնահատելով նրանց աշխատանքը և տարվա մեջ մեկ օր նվիրել նրանց:  Միաժամանակ, Հայաստանի Հանրապետությունում «անտառագետի և ջրաբանի» միջազգային օրը նշելու վերաբերյալ առաջարկ ներկայացվել է միջազգային գործընկերների կողմից, հանդիպումների և քննարկումների ընթացքում»,- ասված է որոշման հիմնավորման մեջ: