Արթուր Խաչատրյան

8-րդ գումարման Ազգային ժողովի պատգամավոր՝ «Հայաստան» խմբակցությունից։

Ծնվել է 1972թ. հուլիսի 17-ին Երևանում:

1994թ. ավարտել է ԵՊՀ ֆիզիկայի ֆակուլտետը: Ֆիզիկոս:

1996թ.՝ Հայաստանի ամերիկյան համալսարանը: Գործարար վարչարարության մագիստրոս: 1997թ.՝ ՀՀ ԳԱԱ ռադիոֆիզիկայի և էլեկտրոնիկայի ինստիտուտի ասպիրանտուրան: 2001թ.՝ Լոնդոնի Կայսերական քոլեջը: Գործարար վարչարարության մագիստրոս: Ֆիզիկամաթեմատիկական գիտությունների թեկնածու: Պահեստազորի ավագ լեյտենանտ:

1994-2005թթ. եղել է ԵՊՀ ֆիզիկայի ֆակուլտետի գիտաշխատող: 1997-2000թթ.՝ ԱՄՆ միջազգային զարգացման գործակալության (USAID) տնտեսության վերակառուցման և էներգետիկայի տնօրենի ֆինանսական գծով օգնական, ֆինանսական ծրագրերի կառավարող: 2002-2003թթ.՝ ԱՄՆ ՄԶԳ-ի «Հայաստան. օրենսդրի հզորացման ծրագիր»՝ բյուջետային գործընթացի մասնագետ: 2003-2005թթ.՝ Եվրոպայում անվտանգության և համագործակցության կազմակերպության ծրագրերի համակարգող: 2005-2007թթ.՝ Երևանում Կալիֆոռնիայի միջազգային առևտրի և ներդրումների գրասենյակի տնօրեն: 2008-2010թթ.՝ «Մենեջմենթ Միքս» ՍՊԸ խորհրդատվական ուղղության ղեկավար: 2011-2013թթ.՝ «Հայաստանում ֆրանսիական համալսարան» հիմնադրամի ֆինանսների և հաշվապահության ամբիոնի վարիչ, կառավարման ֆակուլտետի մանկավարժական համակարգող (դեկան), 2011թ.՝ նույն հիմնադրամի ֆինանսների և հաշվապահության ամբիոնի դասախոս: 2011-2013թթ. և 2015-2016թթ.՝ «Վիվատ Քոնսալթինգ» ՍՊԸ տնօրեն:

2013-2014թթ.՝ «Արդշինբանկ» ՓԲԸ գործառնական տնօրենի տեղակալ, անձնակազմի կառավարման վարչության պետ: 2016-2017թթ.՝ ՀՀ տարածքային կառավարման և զարգացման նախարարի տեղակալ: 2017-2018թթ.՝ ՀՀ Շիրակի մարզպետ: 2018թ.՝ ՀՀ գյուղատնտեսության նախարար, 2019թ.՝ «Բիզնես Արմենիա» հիմնադրամի հոգաբարձուների խորհրդի նախագահ: 2020թ.՝ ՀՀ պետական կառավարման ակադեմիայի գործարար վարչարարության և մարդկային ռեսուրսների կառավարման ֆակուլտետների դասախոս:

1991 թվականից ՀՅԴ անդամ է:

2021թ. հունիսի 20-ին ԱԺ պատգամավոր է ընտրվել «Հայաստան» կուսակցությունների դաշինքի համապետական ընտրական ցուցակով:

Բրյուսելում խայտառակ հանդիպում էր, ձախողում. Արթուր Խաչատրյան |panorama.am|

panorama.am: «Հանդիպումը, որը տեղի ունեցավ Բրյուսելում, կարծում եմ, որ այն խայտառակ հանդիպում ու ձախողում էր»,- խորհրդարանական ճեպազրույցների ժամանակ հայտնեց «Հայաստան» խմբակցության պատգամավոր Արթուր Խարատրյանը։Նրա խոսքով կառավարության ղեկավարը և 4 բարձրաստիճան պաշտոնյա Եվրոպայում չեն հանդիպում և քննարկում ԱՄՆ-ից տարեկան 15 մլն դոլարի և Եվրոպայից 70 մլն դոլարի աջակցությունը, այն դեպքում, երբ երկու տարի առաջ առաջարկվել էր 2.6 մլրդ եվրո աջակցություն։Հիշեցնելով, որ իշխանությունները հայտարարել են, որ Հայաստանը պատրաստ է Եվրոպային լինել այնքան մոտ, ինչքան վերջինս կկամենա՝ ընդդիմադիր պատգամավորը ասաց, որ Եվրոպան առաջարկել է նախկինում գործող ՀՀ-ԵՄ համապարփակ և ընդլայնված համագործակցության համաձայնագիրը։ Պատգամավորն անդրադարձավ նաև խորհրդարանում Նիկոլ Փաշինյանի ելույթին և ասաց. «Արցախի հարցը, Փաշինյանի խոսքերով, եթե ուղղակի պովոդոկ էր, որպեսզի Հայաստանին անկախությունից զրկեն, ապա Փաշինյանն էլ ամեն ինչ արեց, որպեսզի այդ պովոդոկից զրկվի, այսինքն՝ իր քաղաքականությունը, իր խոսքերով, հենց ուղղված էր Արցախը զոհելու, որպեսզի փրկի Հայաստանը, բայց տեսնում ենք, թե Արցախը զոհելուց հետո մենք էլ ավելի վատ վիճակում ենք հայտնվել»։ «Հայաստան» խմբակցության պատգամավոր Աննա Գրիգորյանն էլ անդրադարձավ սահմանազատման խնդրին և այդ նպատակով ստեղծված հանձնաժողովների՝ որպես լիազոր մարմին, աշխատանքին։ «Լիազոր մարմինը որոշում չունի Տավուշի գյուղերից տարածքներ հանձնելու մասին, այսինքն՝ այս որոշումը կայացվել է ոչ թե լիազոր մարմնի կողմից, որի հիմքում կան սկզբունքներ, քարտեզներ, այլ կայացել է այլ օղակում»,- հայտնեց Գրիգորյանը և, նշելով, որ նոյեմբերի 9-ի հայտարարության մեջ այդ հատվածի վերաբերյալ դրույթ է եղել, որը հետագայում հանվել է, իսկ Ոսկեպարում հայտնվել է ռուսական բազա, հավելեց. «Այսինքը՝ կարող ենք պնդել, որ նոյեմբերի 9-ին եղել են տեքստից այդ դրույթն հանելու համաձայնություններ և պայմանավորվածություն, բայց՝ հետագայում այն իրականացնելու համար»։ Ընդդիմադիր պատգամավորն անդրադարձավ նաև «Ֆրիդմ Հաուս»-ի վերջին զեկուցին՝ նկատելով, որ դրանով Հայաստանը ճանաչվել է մասսամբ ազատ, ինչը հետընթաց է, ակնարկ ավտորիտար տարեր պաունակելու, իրավապահ համակարգի, դատական համակարգի խնդիրների մասին։

16:00 - 15 ապրիլի, 2024

Ընդդիմությունն առաջարկում է Հայաստանի և Ադրբեջանի միջև հատվածական սահմանազատման փոխարեն համապարփակ գործընթաց սկսել |armenpress.am|

armenpress.am: Ազգային ժողովի ընդդիմադիր «Հայաստան» խմբակցությունը դեմ է Հայաստանի և Ադրբեջանի միջև հատվածական սահմանազատման գործընթաց սկսելուն, փոխարենն առաջարկում է համապարփակ գործընթացի սկիզբ դնել՝ ունենալով հիմքեր, հստակեցված քարտեզներ: Խմբակցության պատգամավորներն այս մասին ասացին խորհրդարանական ճեպազրույցում: Աննա Գրիգորյանն իշխանությանը մեղադրեց միակողմանի զիջման գնալու մտադրության մեջ: «Պետք է լինի ընդհանուր գործընթաց, ոչ թե պարզապես միակողմանի զիջում՝ ինչ-որ ակնկալիքներով»,-նշեց նա: Նա իշխանությանը մեղադրեց զիջումների մեջ՝ նշելով, որ չկա որևէ հիմք, չկա պայմանավորվածություն քարտեզների մասով: «Մեր առաջարկը հետևյալն է՝ պետք է համապարփակ գործընթաց լինի: Պետք է հիմքերը, քարտեզները հստակեցվեն, նոր խոսենք բանակցությունների, քննարկումների մասին: Առանց հստակեցումների տարածքների զիջումը Հայաստանի համար բերելու է նոր անվտանգային ռիսկերի: Մեր առաջարկը համապարփակ գործընթացի սկիզբ դնելն է՝ սկզբունքների և քարտեզների մասով հստակեցումներով»,–ասաց Գրիգորյանը: Արթուր Խաչատրյանն էլ հավելեց. «Ինչո՞ւ է դա տեղի ունենում հատվածական, այլ ոչ թե համապարփակ: Այսինքն՝ ամբողջ սահմանի երկայնքով պետք է լինի սահմանազատում, հետո նոր սահմանագծում, հետո՝ զինված ուժերի վերատեղակայում նոր սահմանների երկայնքով: Այս մարդիկ գնում են հատվածական եղանակով»,-ասաց նա՝ իշխանությանը մեղադրելով զիջումների մեջ: Ավելի վաղ Հայաստանի վարչապետ Նիկոլ Փաշինյանըհայտնել էր, որ Հայաստանը դեմ չէ Ադրբեջանի հետսահմանազատման գործընթացը սկսել ՀայաստանիՏավուշի մարզի և Ադրբեջանի Ղազախի շրջանիհատվածից։

13:14 - 15 ապրիլի, 2024

Սա կառավարության անկեղծ զեկույցը պետք է լիներ, այլ ոչ թե թիթեռնիկների և ոսկե զարդերի նկարներ. Արթուր Խաչատրյան |panorama.am|

panorama.am: «Տնտեսական աճի տեմպերը 1/3-ով դանդաղել են, արդյո՞ք 2023 թվականի զեկույցի մեջ այդ հարցին չպետք է անդրադարձ լիներ»,-ԱԺ տնտեսական հարցերի մշտական հանձնաժողովի փոխնախագահ, ՔՊ-ական Բաբկեն Թունյանին դիմեց «Հայաստան» խմբակցության պատգամավոր Արթուր Խաչատրյանը։ Նա հայտնեց, որ ֆիզիկական անձանց անունով դեպի Հայաստան դրամային զուտ ներհոսքը 2022 թվականի համեմատ ընկել է և նախկին 50 %-ի փոխարեն նախորդ տարի կազմել է՝ 30%, ընթացիկ տարում՝ 20%։Ընդդիմադիր պատգամավորը նաև հարցրեց, թե արդյո՞ք զեկույցում չպետք է ներառվեր այն փաստը, որ 2023 թվականին մեկ ամսում ոսկերչական իրերի արտադրությունը Հայաստանում աճեց 14 անգամ։ ՔՊ-ական պատգամավոր Բաբկեն Թունյանն ասաց, որ տնտեսության ակտիվության անկումը պետք է դիտարկել բազիսային տվյալների վրա և կարելի է, ոչ թե 2022 թվականի բարձր ցուցանիշների հետ համեմատել,այլ՝ 2021 թվականի, իսկ կառավարությունը իր առաջ դրել է 7 % տնտեսական աճի թիրախը, որն էլ իրագործում է։ Թունյանի խոսքով, եթե Խաչատրյանի բոլոր հարցերը 2023 թվականի կառավարության կատարողականի զեկույցում ներառվեր, ապա այն ծավալուն կլիներ և ոչ մեկը չէր կարդա։ Արթուր Խաչատրյանն ասաց, որ տնտեսության մեջ կան լուրջ խնդիրներ և դրանք պետք է ներառվեին հաշվետվության մեջ։ «Դրամի զուտ ներհոսքը նավեզել է, փողը ժամանակին գալիս մնում էր Հայստանում, հիմա գալիս է՝ բարևում ու գնում է»,-ասաց Խաչատրյանը և, նշելով, որ կատավարությունը պետք է այդ խնդիրներին անդրադարձ կատարեր, ինչը չի արել՝ հավելեց, «Սա կառավարության անկեղծ զեկույցը պետք է լիներ, այլ ոչ թե թիթեռնիկների և ոսկե զարդերի նկարներ»։

12:35 - 11 ապրիլի, 2024

Ռազմական հանցագործությունների համար հայց կներկայացվի՞ Ալիևի դեմ․ ՀՀ կառավարության արձագանքը |hetq.am|

hetq.am: Ազգային ժողով-Կառավարություն հարցուպատասխանի ժամանակ «Հայաստան» խմբակցության պատգամավոր Արթուր Խաչատտրյանը հարց ուղղեց ՀՀ կառավարությանը, թե ռազմական հանցագործությունների կատարման համար Հայաստանը Ադրբեջանի նախագահ Իլհամ Ալիևի դեմ հայց կներկայացնի՞ Միջազգային քրեական դատարան, թե՞ ոչ։ Հիշեցնենք՝ Հռոմի ստատուտը վավերացնելուց հետո այս տարվա փետրվարի 1-ից՝ Հայաստանը դարձավ Միջազգային քրեական դատարանի անդամ։ Արթուր Խաչատրյանի հարցին արձագանքած արդարադատության նախարար Գրիգոր Մինասյանն այդպես էլ հստակ պատասխան չտվեց։ «Միջազգային նման պայմանագրերի վավերացումը և ներգործումը պետական համակարգ ստիպում է թե՛ մեր Կառավարությանը, թե՛ հետագա բոլոր կառավարություններին գործել միջազգային սկզբունքներին համապատասխան։ Ի՞նչ է դա նշանակում․ եթե տեսնում ես հանցագործություն, նախ հնարավորություն ունես մտցնել քո քրեադատաիրավական մեխանիզմներ այլ երկրի փորձագետների, և եթե ֆիքսվում է մեղքի առկայությունը, բնականաբար, լինելու է պատասխանատվություն հենց կոնվենցիայի շրջանակներում»,- նշեց արդարադատության նախարար Գրիգոր Մինասյանը։

17:39 - 07 փետրվարի, 2024

«Այս կապիտուլյանտ, թուրքերին Հայաստանում հանդուրժող քաղաքական ուժը հակադրում է ազգը եւ պետականությունը»․ Արթուր Խաչատրյան |aravot.am|

aravot.am: «Անկախության, ինքնիշխանության եւ հարատեւության մասին խոսում է մի քաղաքական ուժ, որի օրոք թուրքերը բուն են դրել Հայաստանի Հանրապետության տարածքում»,- Ազգային ժողովի նստաշրջանում ասաց «Հայաստան» խմբակցության պատգամավոր Արթուր Խաչատրյանը՝ դիմելով ՔՊ խմբակցությանը։ «150-200 քառակուսի կիլոմետր՝ թուրքերը բուն են դրել Հայաստանի Հանրապետության տարածքում, եւ Հայաստանի իշխանությունները ոչ մի բան չեն անում՝ թուրքերին այստեղից քշելու համար։ Թուրքերը պահանջում են, որ Հայաստանի Հանրապետության Սահմանադրությունը փոխենք, թուրքերն են պահանջում, որովհետեւ սահմանադրական բարեփոխումների այն հայեցակարգում, որը դուք մշակում եք, Հայաստանի Անկախության հռչակագրի մասին խոսք չի եղել․ թուրքերի պահանջով եք դուք դա անում։ Այդպիսի բան անում են խամաճիկային պետությունները»,- ասաց Արթուր Խաչատրյանը։ Ըստ նրա՝ Հայաստանի իշխանությունները համառորեն չեն ընդունում, որ կապիտուլյացիա են ստորագրել։ «Բա կապիտուլյացիոն պահանջը որտեղի՞ց եկավ։ Եվ կապիտուլյանտ քաղաքական ուժն այսօր խոսում է անկախությունից ու ինքնիշխանությունից։ Եվ այս կապիտուլյանտ, թուրքերին Հայաստանում հանդուրժող քաղաքական ուժը հակադրում է ազգը եւ պետականությունը։ Արհեսատական հակադրություն է մտցնում, հիմա մի նոր հակադրություն առաջացավ՝ ազգ, պետություն եւ նաեւ ժողովուրդ։ Բա հետո՞։ Հասանք մի նոր բարձունքի՝ Արարատը հակադրել Արագածի հետ, հիմա արդեն ժողովուրդը հակադրում եք պետության հետ, ազգը հակադրում եք պետության հետ։ Չեք հասկանո՞ւմ, որ այս հակադրումների անվերջ շղթան բերեց այս վիճակին։ Բերեց այն վիճակին, որ ինչ-որ մասնագետներ փորձում են հայ ժողովրդի պատմությունը փոխել։ Այդ մասնագետներից մի քանի հոգու անունը տվեք»,- ասաց Արթուր Խաչատրյանը։ Նա նշեց, որ սա քաղաքական խնդիր է։ «Իսկ քաղաքական խնդիրը ձեր այս շարունակությունն է՝ Արարատը հակադրել Արագածին, ժողովուրդը հակադրել պետությանը։ «Հայաստանն իմ օջախ է» ասող մարդը փողոցում գրքույկներ էր բաժանում, որի վրա Հայաստանն ու Արցախի Հանրապետությունն իրար կպած էին։ Բայց այդպես մի բան ասելով այլ բան անելով՝ բերեցիք նրան, որ թուրքը հիմա վխտում է Հայաստանի սահմաններում ու Արցախում»,- ասաց Արթուր Խաչատրյանը։

13:32 - 06 փետրվարի, 2024

Անկախության գոյության ողջ ընթացքում մենք ՀՀ ինքնիշխանությունը և տարածքային ամբողջականությունը չենք ֆիքսել և լղոզել ենք. Փաշինյան |1lurer.am|

1lurer.am: «Հայաստան» խմբակցության անդամ Արթուր Խաչատրյանը նշեց, որ եղել են խաղաղության օրակարգի մասին հայտարարություններ դեռ 2019 թվականից, բայց Ադրբեջանի նախագահի հայտարարություններից հետո ստեղծվել է նոր իրավիճակ, և ՀՀ վարչապետ Նիկոլ Փաշինյանից հետաքրքրվեց, թե այդ իրավիճակում ի՛նչ լուծում է առաջարկում: «Նախ ուզում եմ որոշ նրբություններ ավելի հասկանալի դառնան և՛ հանրությանը, և՛ ընդհանրապես: Այն գործողությունները և հայտարարությունները, որոնց մասին խոսում եք, դրանց նպատակը կապված է եղել միայն ՀՀ ինքնիշխանության և տարածքային ամբողջականության հետ, որովհետև մենք մի բան չենք նկատել, որ անկախության գոյության ողջ ընթացքում մենք ՀՀ ինքնիշխանությունը և տարածքային ամբողջականությունը չենք ֆիքսել և լղոզել ենք, ինչը ֆունդամենտալ պրոբլեմ է: Ես էլի եմ ասում. հարցին պետք է ճիշտ դիտանկյունից նայել. այսինքն՝ այն, ինչ դուք ասում եք, բոլոր գործողություններն ուղղված են և շարունակում են ուղղված լինել ՀՀ ինքնիշխանության և տարածքային ամբողջականության հաստատմանը և պաշտպանությանը, որովհետև ես կարող եմ նաև ձեզ ասել, որ այս անվտանգային ընդհանուր մարտահրավերների մեջ մեր ռազմավարական ընկալումը հետևյալն է, որ մեր բոլոր դիրքորոշումներն ու ձևակերպումները պետք է հենվեն լեգիտիմության վրա, այսինքն՝ լինեն բացառիկ լեգիտիմ»,- ասաց Փաշինյանը: Ինչ վերաբերում է Բաքվից հնչող հայտարարություններին, ապա վարչապետը նշեց հետևյալը. «Ես հրապարակային արձագանքել եմ, բայց չեմ զլանա նաև ձեր հարցին ի պատասխան կոնկրետ ասել, և, իմիջիայլոց, արդեն պատասխանել եմ, և «Խաղաղության խաչմերուկ» նախագիծը, ըստ էության, ներառում է ձեր հարցի պատասխանը: Մեր հարցադրումներին ի պատասխան Ադրբեջանը երկու հակադարձում է անում. առաջին՝ եթե ՀՀ-ն պատրաստ չէ ճանապարհները բացել, ուրեմն Ադրբեջանը կօգտվի Իրանի տարածքով անցումից, և երկրորդ հարցադրումն այն է՝ ինչո՞ւ պետք է Ադրբեջանի հիմնական մասից դեպի Նախիջևան անցման ժամանակ, որը 47 կմ է, նկատի է առնվում ՀՀ-ի հարավը, եթե երթուղին այդպիսով անցնի, տեղի ունենան ինչ-որ ստուգման գործընթացներ և այդպես շարունակ: Մենք այս երկու հարցերին պատասխանում ենք նույն կերպ: Ինչ պայմաններում ԻԻՀ-ն տալիս է այդ անցումը, նույն պայմաններով ՀՀ-ն նույնպես պատրաստ է տալ, և եթե ՀՀ-ի տարածքով անցումը Ադրբեջանի հիմնական մասից դեպի Նախիջևան 47 կմ է, Իրանի տարածքով էլ 49 կմ է, եթե հսկողական գործառույթներն ընդունելի են 49 կմ-ի համար, բնականաբար, չեն կարող անընդունելի լինել 47 կմ-ի համար»: Վարչապետը նաև անդրադարձավ Խաչատրյանի այն դիտարկմանը, թե բանակցային գործընթացում «ԼՂ կարգավիճակը կարող է լինել առանց սահմանափակումների», ասաց, որ «առանց սահմանափակումների» նշանակում է նաև «զրո կարգավիճակ», այդ թվում՝ Ադրբեջանի կազմում: «Ուզում եմ ձեր ուշադրությունը հրավիրել այն փաստի վրա, որ այս «զրո կարգավիճակին» Ադրբեջանի կազմում հասնելու համար 2018 թվականի օգոստոսի դրությամբ բանակցային գործընթացում ամբողջ բովանդակությունը դասավորված էր նախապատրաստի իրավիճակում, և հրապարակային ասել եմ, էլի ասում եմ և կասեմ և կարող եմ սա ապացուցել: Մեծ հաշվով՝ ապացուցելու բան էլ չկա, որովհետև ինչքան հասկանում եմ, իմ հրապարակային հայտարարություններին որևէ առարկայական հակադարձում չի եղել: Այս թեզը կասկածի տակ չի դրվել, որովհետև կասկածի տակ դնելու բան չկա»,- նշեց Նիկոլ Փաշինյանը:

17:59 - 17 հունվարի, 2024

Ըստ ընդդիմադիր պատգամավորի՝ տրամաբանական չէ ենթադրել, որ Ադրբեջանը կհամաձայնի սպառազինությունների վերահսկման Փաշինյանի առաջարկին |azatutyun.am|

azatutyun.am: Հայաստանի վարչապետի՝ սպառազինությունների վերահսկման վերաբերյալ առաջարկին արդեն չորրորդ օրն է՝ Ադրբեջանից հրապարակավ չեն արձագանքել:Նիկոլ Փաշինյանն իր այս նոր գաղափարի մասին բարձրաձայնեց հունվարի 13-ին կուսակիցների հետ հանդիպմանը, երբ արձանագրեց, որ Բաքվից ամենաբարձր մակարդակով հնչած հայտարարությունները «լրջորեն հարվածում են խաղաղության գործընթացին»: Վարչապետը մտահոգված էր՝ խաղաղության բանակցություններում Ալիևը հայկական առաջարկները մերժում է, դեմ է զորքերի հայելային հետքաշմանը, չի ընդունում սահմանային շրջանները ապառազմականացնելու գաղափարը:«Ես կարող եմ ուրիշ առաջարկ անել՝ եկեք սպառազինությունների վերահսկման վերաբերյալ պայմանագիր կնքենք, որՀայաստանն ու Ադրբեջանը սպառազինությունների հետ կապված կոնկրետ պայմանավորվածություններ ձեռք բերեն, և մեկը մյուսի՝ այդ պայմանավորվածությունների կատարման վերահսկելու հնարավորություն ունենան», - ասել էր նա։ Վարչապետի առաջարկին նախորդել էին Ադրբեջանի նախագահի հայտարարությունները: Ալիևը մոտ մեկ շաբաթ առաջ տված հարցազրույցում կրկին պահանջում էր «Զանգեզուրի միջանցք», խոսում ոչ միայն անկլավների վերադարձից, այլև պնդում, թե 44-օրյայից հետո օկուպացված հողերից հետ չեն գնա, մերժում միջազգային երաշխավորի հայկական առաջարկը: Համաձայն չեն նաև սահմանազատումը 1975 թվականի քարտեզներով իրականացնելուն: Այս պայմաններում սպառազինությունների վերահսկման պայմանագիր ստորագրելու վարչապետի առաջարկը որքանո՞վ է իրատեսական, և հնարավո՞ր է հայկական կողմն այն դարձնի բանակցություններում քննարկման հարց: Իշխանական պատգամավորներն այսօր հրաժարվում էին այս հարցին պատասխանել: Փոխարենը ընդդիմադիր «Հայաստան» խմբակցությունից պատգամավոր Արթուր Խաչատրյանը պնդեց, թե այդ նոր առաջարկով Նիկոլ Փաշինյանը փորձում է ներքին լսարանին համոզել, թե խաղաղության գործընթացը ձախողված չէ: «Ադրբեջանը Փաշինյանի որևէ առաջարկություն երբեք չի ընդունել, հիմք ունենալ ենթադրել, որ ինքը թղթի վրա կհամաձայնի և գործնականում կսահմանափակի սպառազինությունները, անտրամաբանական է։ Մի քանի ամիս առաջ ինքը 1.2 միլիարդի նոր զենք գնելու պայմանագիր է կնքել Իսրայելի հետ, հիմա ի՞նչ Ալիևը պիտի ասի՝ պարտված Փաշինյա՛ն, դու ինձ ասես՝ ես քանի տանկ, քանի անօդաչու թռչող սարք, քանի ինքնաթիռ և ինքնաձիգ պետք է ունենամ։ Կատակ է՞ անում, ո՞ւմ է Փաշինյանը ծաղրում», - ասաց պատգամավորը։

16:52 - 17 հունվարի, 2024

Խաղաղության պայմանագիրը խաղաղություն չի բերելու. Արթուր Խաչատրյան |armeniasputnik.am|

armeniasputnik.am: Խաղաղության պայմանագիրը խաղաղություն չի բերելու։ ՀՀ Ազգային ժողովի ճեպազրույցների ժամանակ ասաց «Հայաստան» խմբակցության պատգամավոր Արթուր Խաչատրյանը։ Նա նշեց, որ որպես պատգամավոր` գաղտնիության հասանելիություն ունի, բայցխաղաղության փաստաթուղթը չի տեսել, սակայն համադրելով Հայաստանի և Ադրբեջանի իշխանությունների հայտարարությունները` կարող է դատողություն անել, թե ինչ է գրված այդ փաստաթղթի մեջ։ «Այն փաստաթուղթը, որ պարտադրվել է ՀՀ-ին, շատ անորոշ ձևակերպումներ է ունենալու, որը Ադրբեջանին հնարավորություն կտա սեփական մեկնաբանություններով նոր պատերազմի առիթ ստեղծել»,- նշեց Արթուր Խաչատրյանը։ Ըստ նրա` դեռ չի հասունացել այն պահը, որ պայմանագիրը ստորագրվի։ Պատգամավորի համոզմամբ` գոնե տարեվերջյան այս 17 օրվա ընթացքում որևէ փաստաթուղթ չի ստորագրվի։ Հիշեցնենք` 2021 թվականին Ադրբեջանի նախագահ Իլհամ Ալիևը հայտարարեց Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին փոխանցեց հարաբերությունների կարգավորման վերաբերյալ 5 կետից բաղկացած իր առաջարկը: Հայկական կողմը շտկումներ ավելացրեց և ուղարկեց իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։ ՀՀ արտաքին գործերի նախարար Արարատ Միրզոյանը ՀՀ արտաքին գործերի նախարար Արարատ Միրզոյանը հոկտեմբերի 3-ին հայտնեց, որ Երևանի և Բաքվի միջև ընթանում է առաջարկների փոխանակման 6-րդ փուլը։ Հաջորդ օրը ՀՀ վարչապետ Նիկոլ Փաշինյանը հայտարարեց,որ երեք սկզբունք կա, որոնց շուրջ համաձայնության գալու դեպքում խաղաղության պայմանագիրը կստորագրվի։

12:44 - 13 դեկտեմբերի, 2023

«Հայաստանը ճեպընթաց գնացքով «խաղաղության խաչմերուկից» գնում է դեպի «խաղաղության դարաշրջան», բայց ունեցանք զոհ»․ Արթուր Խաչատրյան

Այսօր ԱԺ նիստում 2024 թվականի պետական բյուջեի մասին օրենքի նախագծի քննարկման ժամանակ «Հայաստան» խմբակցության պատգամավոր Արթուր Խաչատրյանը նշեց, որ քննարկումների ժամանակ իրենց կարծիքն արդեն հայտնել են բյուջեի մասին, բայց վերջին 20 օրերին զարգացումներ են տեղի ունեցել։ Օրինակ՝ սննդամթերքը թանկացել է, տնտեսական ակտիվության ցուցանիշը վերջին մեկ ամսվա ընթացքում նվազել է։ «Բողոքներ ունեցանք տարբեր տնտեսվարողներից՝ ձկնարտադրողներ, մեքենա ներմուծողներ, արտահանողներ։ Դա ցույց է տալիս, որ ինչքան էլ կառավարությունը խոսի, որ ամեն ինչ լավ է, ունենք բավականաչափ խնդիրներ։ Պարտքն աճեց, կապիտալ ծախսերի կատարողականի թվերը դեռ չկան, բայց չկան լուրեր, որոնք ցույց կտան, որ ինչ-որ դրական բան ենք ունեցել»,- ասաց Արթուր Խաչատրյանը։ Նա նշեց, որ իրենք մշտապես ասել են՝ կառավարության տնտեսական քաղաքականությունն ուղղված չէ տնտեսական կառուցվածքի փոփոխությանը, ինովացիաների խթանմանը։ «Ներդրումների բացարձակ մեծամասնությունը հանրային ծառայություններ մատուցող ոլորտներում են: Փողի մասին ենք խոսում, բայց ի՞նչ արժեք կարող ենք դրանով ստանալ, ի՞նչ նպատակ ենք հետապնդում։ Իհարկե, կարելի է գումարը տալ պատկերասրահի հաճախելիությունը մեծացնելու համար եւ կարելի է գումարը տալ Սնուփ Դոգին։ Այդ Սնուփ Դոգին տրված փողը բյուջեի մեջ է։ Այսինքն՝ ի՞նչ է տեղի ունեցել, այն բանվորը, որն ամառվա շոգին ասֆալտ է թափում փողոցում, այդ մարդուց եկամտահարկ ենք գանձում, որ տանք Սնուփ Դոգին։ Այնպես որ, եթե խոսում ենք, որ գումարն աճեց, միգուցե ուղղությունների մասին էլ խոսեինք։ Իսկ ի՞նչ ենք անում, որ երեխաները գան ու մշակութային արժեքներին ծանոթանան, ոչ մի բան։ Բայց Սնուփ Դոգին միլիարդներ են տալիս, սա է կառավարության արժեքային համակարգը»,- ասաց Արթուր Խաչատրյանը։ Անդրադառնալով պաշտպանության ոլորտի խնդիրներին՝ նա ասաց, որ Հայաստանը ճեպընթաց գնացքով «խաղաղության խաչմերուկից» գնում է դեպի «խաղաղության դարաշրջան», բայց դեկտեմբերի 4-ին ունեցանք զոհ։ «Խաղաղության դարաշրջան եւ զոհ, պաշտպանության ծախսերը ՀՆԱ-ի համեմատ նվազում են։ Հավանաբար այդ զոհը խաղաղության դարաշրջանի ցուցիչ չէ, հա՞։ Պարզ չէ՞, որ մենք կխուսափենք զոհերից, եթե մեր պաշտպանական կարողությունն ավելի մեծացնենք։ Բայց կառավարությունը դա չի անում, փոխարենը ոստիկանության բյուջեն է ավելացնում։ Այս ամենի ինչի լույսի ներքո եւս մեկ անգամ տեղեկացնեմ, որ «Հայաստան» դաշինքը դեմ է քվեարկելու ներկայացված բյուջեի նախագծին»,- նշեց Արթուր Խաչատրյանը։

13:17 - 06 դեկտեմբերի, 2023

Որպես ԱԺ նախագահ չե՞ք գտնում, որ Ձեր կուսակիցների պահվածքը հայկական պառլամենտարիզմը ոչնչացնելուն ուղղված քայլ էր․ Արթուր Խաչատրյանն՝ Ալեն Սիմոնյանին |tert.am|

tert.am: Իշխող քաղաքական մեծամասնությունը հերթական անգամ թույլ չտվեց ընդդիմության կողմից նախաձեռնված հարցը մտնի նստաշրջանի նիստի օրակարգ և քննարկվի նիստում։ Այս մասին հարց ուղղելով ԱԺ նախագահ Ալեն Սիմոնյանին՝ ասաց «Հայաստան» խմբակցության պատգամավոր Արթուր Խաչատրյանը։ «Հերթական նախաձեռնությունը սպանվեց հանձնաժողովի մակարդակում։ Որպես ԱԺ նախագահ չե՞ք գտնում, որ Ձեր կուսակիցների պահվածքը հայկական պառլամենտարիզմը ոչնչացնելուն ուղղված քայլ է»,- ասաց նա։ Պատասխանեով հարցին՝ ԱԺ նախագահն ասաց․ «Որպես ԱԺ նախագահ գտնում եմ, որ պառլամենտարիզմը ոչնչացնում է նիստերին չգալը, ընդդիմությանը տրամադրված հանձնաժողովների նախագահ մարմինները չձևավորելը, խորհրդի նիստերին չմասնակցելը և նմանատիպ այլ գործունեությունը։ Իսկ ես ինչ եմ գտնում որպես ԱԺ նախագահ, կարծում եմ օրենքից վեր չի կարող լինել։ Հարցը տալուց նաև դա նկատի ունեցեք, որ օրենքով նախաձեռնված շատ հնարավորություններից դուք հրաժարվում եք, հետո գալիս եք այստեղ, երկմտում, զարմանում, թե ինչու մի հարցը չի մտել նիստի օրակարգ»։ Արթուր Խաչատրյանը Ալեն Սիմոնյանը խոսքերը շանտաժ որակեց։ «Կարո՞ղ եմ հասկանալ, որ Ձեր ասածը պարզ շանտաժ էր, քանի որ մասնակցությունը ցածր է, վարչական պաշտոններից հրաժարվել ենք ու քանի որ մեր պահվածքը այսպես է, շարունակելու եք ընդդիմության բոլոր օրենսդրական նախաձեռնությունները, սպանել հանձնաժողովների մակարդակում»,- ասաց պատգամավորը։ Ալեն Սիմոնյանն իր հերթին չհամաձայնեց Արթուր Խաչատյանի հարցադրման հետ՝ նշելով, որ կան շատ օրինակներ, երբ ընդդիմության նախաձեռնությունները օրենք են դարձել։

10:45 - 05 դեկտեմբերի, 2023

«Ադրբեջանցի պատվիրակները հղում էին անում Նիկոլ Փաշինյանին, ասում էին՝ Փաշինյանն Արցախը ճանաչել է Ադրբեջանի կազմում»․ Արթուր Խաչատրյան |aravot.am|

aravot.am: ԱԺ ճեպազրույցների ժամանակ «Հայաստան» խմբակցության պատգամավոր Արթուր Խաչատրյանն անդրադարձավ Եվրանեսթի խորհրդարանական վերաժողովի քաղաքական կոմիտեի նիստին։ Ըստ պատգամավորի՝ այստեղ ադրբեջանցի պատվիրակներն իրենց ելույթներում հղում են արել Նիկոլ Փաշինյանին՝ ասելով, որ Փաշինյանն Արցախը ճանաչել է Ադրբեջանի կազմում։ «Մեր քաղաքական կոմիտեում ներկայացված էր փաստաթուղթ՝ համազեկուցողների ներկայացրած նախագիծն էր, որը հիմնականում անդրադառնում էր ռուս-ուկրաինական պատերազմին, բայց երկու անգամ նշում կար նաեւ Արցախի Հանրապետության, Լեռնային Ղարաբաղի հակամարտության չկարգավորված լինելու մասին։ Եվ երբ դրա մասին խոսում էինք մենք՝ ՀՀ ԱԺ պատվիրակները, բնականաբար, ընդդիմադիր պատգամավորները, երբ դրա մասին խոսում էին Եվրախորհրդարանի պատվիրակները, որ Լեռնային Ղարաբաղի հակամարտության կարգավորումը դեռ իրականացված չէ, եւ կայուն խաղաղություն հաստատված չէ, ադրբեջանցի պատվիրակները հակադարձում էին Նիկոլ Փաշինյանի խոսքերով»,- ասաց Արթուր Խաչատրյանը։ Նրա խոսքով, մասնավորապես, Եվրախորհրդարանի պատվիրակներից մեկն ասել է, որ 1919 թվականին Արցախի ժողովուրդը քվեարկել է ՀՀ-ին միանալու օգտին, եւ 1920 թվականին բոլշեւիկներն են Ղարաբաղը հանձնել Ադրբեջանին։ «Եվ այստեղ Ադրբեջանի պատվիրակն ասաց՝ դուք չգիտե՞ք, Փաշինյանն ասել է, որ Ղարաբաղը ճանաչում է Ադրբեջանի կազմում։ Նմանապես մենք ասում էինք՝ Արցախի ժողովրդի իրավունքները ոտնահարվում են, նրանք ունենք քաղաքական իրավունքներ՝ վճռելու իրենց ճակատագիրը։ Լուծում էինք առաջարկում, էլի նույն պատասխանն էր՝ Նիկոլ Փաշինյանն առաջին անգամ Ղարաբաղը ճանաչել է Ադրբեջանի կազմում»,- հավելեց Արթուր Խաչատրյանը։

13:23 - 17 նոյեմբերի, 2023

«Հայաստան» խմբակցությունը դեմ է քվեարկելու 2024 թվականի պետական բյուջեի նախագծին

ԱԺ խմբակցություններն այսօր՝ նոյեմբերի 16-ին, իրենց դիրքորոշումներն են հայտնել Հայաստանի 2024 թվականի պետական բյուջեի նախագծի վերաբերյալ։ Ստորեւ՝ ԱԺ հաղորդագրությունը այդ մասին։ «Հայաստան» խմբակցության տեսակետը ներկայացրել է Արթուր Խաչատրյանը: Անդրադառնալով «Խաղաղության խաչմերուկ» ծրագրին՝ նա նշել է, որ տնտեսական նպատակահարմարության որեւէ հաշվարկ ծրագրի հետեւում չկա։ Արթուր Խաչատրյանի հավաստմամբ, «Հայաստան» դաշինքը մանրակրկիտ ուսումնասիրել է Կառավարության կողմից ներկայացված 2024 թվականի նախագիծը: «Առաջարկվող բյուջեն Հայաստանի Հանրապետության առջեւ ծառացած խնդիրների լուծման համարժեք քայլեր եւ միջոցներ չի նախատեսում: Առաջին հերթին դա վերաբերում է անվտանգային մարտահրավերներին: Լեռնային Ղարաբաղի բռնակցման, բնակչության էթնիկ զտման, ՀՀ ինքնիշխան տարածքի շուրջ 250 քառ. կմ տարածքի բռնազավթման պայմաններում, պաշտպանության բյուջեի ընդամենը 7 տոկոս աճը բավարար չէ, մանավանդ հաշվի առնելով 44-օրյա պատերազմի հետեւանքով մեր ռազմական միջոցների նվազումը, թշնամու շարունակական զինումը, զորավարժությունների անցկացումը եւ ագրեսիվ հռետորաբանությունը»,- նշել է պատգամավորը: Նրա խոսքով, անընդունելի է նաեւ «Ռազմարդյունաբերական համալիրի զարգացում» ծրագրի ֆինանսավորման 2023 թվականի համեմատ 1 միլիարդ դրամից ավելի նվազեցումը: Անդրադարձ է եղել նաեւ Կառավարության բարեփոխումների ծրագրին: Ըստ Արթուր Խաչատրյանի՝ որեւէ էական բարեփոխում չի առաջարկվում: Պատգամավորը տեղեկացրել է, որ «Հայաստան» խմբակցությունը դեմ է քվեարկելու 2024 թվականի պետական բյուջեի նախագծին: ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանն իր ելույթում որոշ քաղաքական հանգամանքների է անդրադարձել, խոսել ընդդիմության որոշ դիտարկումների վերաբերյալ: Խմբակցության ղեկավարի գնահատմամբ, Հայաստանի Հանրապետության եւ հայ ժողովրդի երկարաժամկետ բարեկեցության գրավականն ազատության եւ խաղաղության միաժամանակյա գոյությունն է: Պատմությունը վկայակոչելով՝ նա փաստել է, որ այս տարածքում, այս հողակտորի վրա Հայաստանը, հայ ժողովուրդը երբեք միաժամանակ չեն ունեցել ազատություն եւ խաղաղություն: «Մենք ստացել ենք ազատություն եւ գնում ենք խաղաղության ճանապարհով: Հենց այդ երկուսն ունենանք, այդ ժամանակ փլվելու է այն հայեցակարգը, այն նարատիվը, որի վրա, ցավոք, կառուցված է նաեւ մեր ընդդիմության գաղափարաբանությունը»,- նման կարծիք է հայտնել Հայկ Կոնջորյանը ու խոսել «Խաղաղության խաչմերուկ» նախագծի վերաբերյալ ընդդիմության քննադատությունների մասին։ «Ի՞նչ է ստացվել. տասնամյակներ շարունակ քաղաքական ուժերը զոհաբերել են ազատությունը, որ ստանան անվտանգություն եւ արդյունքում զրկվել են ե՛ւ ազատությունից, ե՛ւ անվտանգությունից: Ազատություն եւ խաղաղություն. երբ կարողանանք այս երկուսը համադրել, այդ ժամանակ գոհ կլինենք, կհամարենք, որ մենք ինքնիշխան պետություն ենք, եւ մենք ենք մեր ճակատագրի, մեր տարածաշրջանի, մեր աշխարհագրական դիրքի նկատմամբ բովանդակություն ձեւավորողն ու մեր աշխարհագրության գերին չենք: Երկար ժամանակ դա է եղել նարատիվը, որ մենք չունենք ծով, ունենք լեռներ, ունենք անբարենպաստ հարեւաններ, դրա համար մենք դատապարտված ենք փրկվելու, իսկ փրկիչներ միշտ պատրաստակամ են եղել հայտնվելու»,- ընդգծել է խմբակցության ղեկավարը: Ըստ նրա՝ այդ հայեցակարգն ու փրկչի նարատիվը փլվում է: Հայկ Կոնջորյանի գնահատմամբ չկա տնտեսական զարգացում առանց տնտեսական ազատությունների եւ չկան տնտեսական ազատություններ առանց քաղաքական ազատությունների: Սա հիմնաքարային աքսիոմա է: Նա տեղեկացրել է, որ բյուջեի նախագիծն արտահայտում է իրենց քաղաքական առաջնահերթությունները, ուստի «Քաղաքացիական պայմանագիր» խմբակցությունը կողմ է փաստաթղթին:

16:21 - 16 նոյեմբերի, 2023

Ընդդիմությունը պաշտպանության բյուջեի 7 տոկոսանոց աճը բավարար չի համարում |azatutyun.am|

azatutyun.am: Դաշնակցական Արթուր Խաչատրյանը, ելույթ ունենալով ընդդիմադիր «Հայաստան» խմբակցության անունից, նշեց, որ 2024 -ի բյուջեն Հայաստանի առջև ծառացած խնդիրների լուծման համարժեք քայլեր և միջոցներ չի նախատեսում։ Դա, ըստ Խաչատրյանի, առաջին հերթին վերաբերում է անվտանգային մարտահրավերներին։ «Արցախի բռնակցմանը, Արցախի բնակչության էթնիկ զտման, Հայաստանի ինքնիշխան տարածքի շուրջ 250 քառակուսի կիլոմետրի բռնազավթման պայմաններում պաշտպանության բյուջեի ընդամենը 7 տոկոսանոց աճը բավարար չէ, հատկապես հաշվի առնելով 44-օրյա պատերազմի հետևանքով մեր ռազմական միջոցների նվազումը, թշնամու շարունակական զինումը, և ագրեսիվ հռետորաբանությունը», - հայտարարեց ընդդիմադիր պատգամավորը։ Շեշտելով, որ փոխարենը 18 տոկոսով ավելացնում են Ներքին գործերի նախարարության բյուջեն՝ Խաչատրյանն ընդգծեց․ - «Փաստորեն Հայաստանի կառավարության համար սպառնալիք են ոչ թե Ադրբեջանը և նրա հովանավոր Թուրքիան, այլ Հայաստանի քաղաքացիները»։

13:42 - 16 նոյեմբերի, 2023

Փաշինյանը «Խաղաղության խաչմերուկ» կոչվածով ակնարկում է, որ ճանապարհ է տալու․ Արթուր Խաչատրյան |tert.am|

tert.am: Նիկոլ Փաշինյանը հայտարարում է, որ պատրաստ է կատարել Ադրբեջանի մյուս պահանջները։ Այս մասին նշեց ԱԺ «Հայաստան» խմբակցության պատգամավոր Արթուր Խաչատրյանը: «Փաշինյանն իր այդ «Խաղաղության խաչմերուկ» կոչվածով ակնարկում է, որ ճանապարհ է տալու՝ չպահանջելով այլ ճանապարհների վերաբացում»,- հավելեց նա։ Մանրամասները՝ տեսանյութում։

15:33 - 31 հոկտեմբերի, 2023

«3+3» ձևաչափով հանդիպման արդյունքներով համատեղ հայտարարությունից հետո Ադրբեջանը պետք է իր զորքերը հանի Հայաստանի ինքնիշխան տարածքից․ պատգամավոր |armenpress.am|

armenpress.am: Ազգային ժողովի Հայաստան խմբակցության պատգամավոր Արթուր Խաչատրյանը կարծում է, որ «3+3» ձևաչափով հանդիպման արդյունքներով ընդունված համատեղ հայտարարությունից հետո Ադրբեջանը պետք է իր օկուպացիոն զորքերը հանի Հայաստանի ինքնիշխան տարածքներից։ ԱԺ-ում լրագրողների հետ զրույցում նման դիրքորոշում հայտնեց ընդդիմադիր «Հայաստան» խմբակցության պատգամավոր Արթուր Խաչատրյանը: «Տարածքային ամբողջականության սահմանումը, ըստ Հելսինկիի եզրափակիչ ակտի, նշանակում է տարածքային վեճերը խաղաղությամբ լուծել: Այո, բոլոր երկրները, մանավանդ դրկից երկրները պետք է հարաբերությունները լուծեն առանց ուժի կիրառման: Հետևաբար, Ադրբեջանը, որը երեկ այդ հայտարարությունն ընդունել է, այսօր պետք է արդեն իր օկուպացիոն զորքերը հաներ Վայոց ձորի, Սյունիքի, Գեղարքունիքի մարզերից: Բայց Ադրբեջանը, մի կողմից ընդունելով նման հայտարարություն, մյուս կողմից Հայաստանում պահելով իր օկուպացիոն զորքերը, հստակ ուղերձ է հղում, որ ինքը որևէ դեպքում «խաղաղության» գնալու ցանկություն չունի, եթե այդ խաղաղության համաձայնագիրը չլինի Հայաստանի կապիտուլյացիայի հայտարարություն»,-ասաց Խաչատրյանը: Պատգամավորը շեշտեց՝ Ադրբեջանն իր բոլոր գործողություններով ցույց է տալիս, որ խաղաղությունն իր համար ընդունելի չէ, իր համար խաղաղությունը Հայաստանի կապիտուլյացիան է: Ըստ նրա՝ դրա դեմ Հայաստանը պետք է բոլոր միջոցները ձեռնարկի՝ ապահովելու իր տարածքային ամբողջականությունը, Լեռնային Ղարաբաղի ժողովրդի քաղաքական իրավունքները, այդ թվում՝ ինքնորոշման իրավունքը:

13:29 - 24 հոկտեմբերի, 2023

Ալիևի դեմարշը ցույց տվեց, որ Ադրբերջանը լրացուցիչ պայման է ներկայացրել Հայաստանին. Արթուր Խաչատրյան |panorama.am|

panorama.am: «Հայաստանի իշխանությունը հավանաբար հույս ուներ, որ Ադրբեջանն իր արյան ծարավը կլրացնի միայն Արցախով։ Բայց Ալիևի երեկվա դեմարշը ցույց տվեց, որ նրանք միայն Արցախով չեն բավարարվելու ու լրացուցիչ պահանջ են ներկայացրել Հայաստանին, ինչի մասին մենք տարիներ ի վեր զգուշացնում ենք»,-խորհրդարանական ճեպազրույցների ժամանակ հայտարարեց ԱԺ «Հայաստան» խմբակցության անդամ, դաշնակացական գործիչ Արթուր Խաչատրյանը։ Խաչատրյանի խոսքով, ամենայն հավանականույթամբ առաջնային պահանջը եղել է այսպես կոչված անկլավների վերաբերյալ։«Դրա «լեգիտիմությունն» Ադրբեջանին տվել է կամ նրա բերանը լեզու է դրել Փաշինյանը, նրա խմբակցության անդամները։ Իհարկե, եղել է նաև միջանցքի խնդիրը, որքան էլ Իրանը չհերքի, որ համաձայնվել է, որ երկաթգծի մի ճյուղ անցնի իր տարածքով»,-ասաց ընդդիմադիր պատգամավորը։Խաչատրյանն ամփոփեց՝ եթե Փաշինյանը կարծում էր, որ կտա Արցախն ու կփրկի Հայաստանը, ապա հիմա տեսնում է, որ այդպես չէ, Ալիևի դեմարշը դրա հետևանքն է։ Հիշեցնենք, որ այսօր՝ հոկտեմբերի 5-ին, Իսպանիայի Գրանադա քաղաքում պետք է կայանար Հայաստանի, Ադրբեջանի, Ֆրանսիայի, Գերմանիայի, ԵՄ-ի առաջնորդների հնգակողմ հանդիպումը։ Սակայն հոկտեմբերի 4-ին հայտնի դարձավ, որ ադրբեջանական կողմը իր մասնակցությունը չեղարկել է։ Ըստ ադրբեջանական լրատվամիջոցների՝ պատճառն այն էր, որ ադրբեջանական կողմը պնդել է նաև Թուրքիայի մասնակցությունը, սակայն Ֆրանսիան և Գերմանիան առարկել են։

12:28 - 05 հոկտեմբերի, 2023