Արծվիկ Մինասյան

Արծվիկ Մինասյանն ութերորդ գումարման խորհրդարանի «Հայաստան» խմբակցության պատգամավոր է։

1995թ. ավարտել է ԵՊՀ տնտեսագիտության ֆակուլտետը․ 1998թ.՝ ԵՊՀ ասպիրանտուրան: 2001թ.՝ ԵՊՀ իրավաբանական ֆակուլտետը։

1996-1999թթ. աշխատել է ՀՀ ֆինանսների եւ էկոնոմիկայի նախարարությունում: 1998 թվականից դասավանդում է ԵՊՀ տնտեսագիտության ֆակուլտետում:

2005-2007թթ. եղել է ՀՀ աշխատանքի եւ սցիալական հարցերի նախարարի տեղակալը: 2016թ. փետրվար-հոկտեմբեր ամիսների՝ ՀՀ էկոնոմիկայի նախարար, 2016-2018թթ.՝ ՀՀ բնապահպանության նախարար, 2018թ. մայիս-հոկտեմբեր ամիսներին՝ ՀՀ տնտեսական զարգացման եւ ներդրումների նախարար:

2019 թվականից ՀՅԴ Գերագույն մարմնի անդամ է:

2007-2012թթ. և 2012-2016թթ. եղել է ԱԺ պատգամավոր։

2021թ. հունիսի 20-ին ԱԺ պատգամավոր է ընտրվել «Հայաստան» կուսակցությունների դաշինքի համապետական ընտրական ցուցակով:

Խորհրդարանը շարունակել է ՀՀ հանրային ծառայությունները կարգավորող հանձնաժողովի նախագահի ընտրության հարցի քննարկումը

Խորհրդարանը շարունակել է ՀՀ հանրային ծառայությունները կարգավորող հանձնաժողովի նախագահի ընտրության հարցի քննարկումը

Ազգային ժողովը փետրվարի 29-ի նիստում շարունակել է քննարկել Հայաստանի Հանրապետության հանրային ծառայությունները կարգավորող հանձնաժողովի նախագահի ընտրության հարցը: Կառավարությունն այդ պաշտոնում առաջադրել է Գարեգին Բաղրամյանի թեկնածությունը: ՀՀ ԱԺ «Հայաստան» խմբակցության անունից ելույթ է ունեցել Արծվիկ Մինասյանը: Խմբակցության քարտուղարն անդրադարձել է Սահմանադրական դատարանի դատավորի ընտրության հարցին, որը տեղի է ունեցել երեկ: Հիշեցնենք, որ ՀՀ դատավորների ընդհանուր ժողովը Սահմանադրական դատարանի դատավորի թափուր տեղում ընտրելու համար առաջարկել էր Դավիթ Բալայանի թեկնածությունը: Արծվիկ Մինասյանը քննադատել է իշխող խմբակցությանը, որը չէր մասնակցել գաղտնի քվեարկությանը, ինչի արդյունքում Դավիթ Բալայանը չէր ընտրվել։ ՀՀ ԱԺ «Քաղաքացիական պայմանագիր» խմբակցության անունից ելույթ է ունեցել Բաբկեն Թունյանը: Արձագանքելով Արծվիկ Մինասյանի ելույթին՝ Բաբկեն Թունյանը նշել է, թե երեկ հավանաբար առաջին նախադեպն էր, որ ընդդիմությունն ամբողջ կազմով մասնակցել է ընտրության: Պատգամավորը հստակեցրել է՝ խմբակցությունն օգտվել է իրեն վերապահված իրավունքից, քանի որ համապատասխան օրենքի համաձայն պատգամավորը կարող է ընտրել, չընտրել կամ չմասնակցել ընտրության: «Շատ կարեւոր կառույցի նախագահի ընտրության հարցն է»,- վերադառնալով քննարկվող հարցին՝ ասել է Բաբկեն Թունյանը՝ նշելով, որ սա այն կառույցն է, որի հետ կապված խնդիրներն ու հարցերը բազմաթիվ են, քանի որ առնչվում են բոլոր քաղաքացիներին ամենօրյա գործունեության մեջ: Պատգամավորը տեղեկացրել է, որ ԱԺ տնտեսական հարցերի մշտական հանձնաժողովն արդյունավետ աշխատել է կառույցի հետ, ունեցել բազմաթիվ քննարկումներ: Եզրափակիչ ելույթում Գարեգին Բաղրամյանն անդրադարձել է պատգամավորների հարցադրումներին, տվել պարզաբանումներ:
12:46 - 29 փետրվարի, 2024
Եկեք խմբակցությունների փակ նիստ անենք առաջիկա օրերին. Հայկ Կոնջորյանի առաջարկը ընդդիմադիրներին
 |1lurer.am|

Եկեք խմբակցությունների փակ նիստ անենք առաջիկա օրերին. Հայկ Կոնջորյանի առաջարկը ընդդիմադիրներին |1lurer.am|

1lurer.am: Պարոն Մինասյանը («Հայաստան» խմբակցության քարտուղար Արծվիկ Մինասյան-խմբ.) իր ելույթում մի բան ասաց, որ պատրաստ են ամեն ինչով օժանդակել, որ սխալները չկրկնվեն... Ես ուզում եմ հավատալ, որ պատրաստ են օժանդակել մեր պետության առջև ծառացած մարտահրավերների լուծմանը: Այս մասին խորհրդարանում հայտարարեց «Քաղաքացիական պայմանագիր» խմբակցության ղեկավար Հայկ Կոնջորյանը: «Ես միանգամից առաջարկ եմ անում. պարոն Մինասյան, պարոն Օհանյան և հարգելի գործընկերներ, եկեք խմբակցությունների համատեղ փակ նիստ անենք առաջիկա օրերին այստեղ, առանց տեսախցիկների, հասկանանք՝ դուք ինչ պնդումներ, պահանջներ ունեք, ինչ մտահոգություններ: Տեսախցիկները կանջատենք, որ ավելի անկաշկանդ խոսեք: Ուզում եմ հավատալ, որ ցանկանում եք օգտակար լինել»,- հայտարարեց Հայկ Կոնջորյանը՝ նշելով, որ կսպասի Սեյրան Օհանյանի կողմից արձագանքին: Հիշեցնենք՝ Մինասյանն իր ելույթի ժամանակ հայտարարել էր՝ կարևորում է մեր պետականության առջև ծառացած մարտահրավերների մասին խոսելը և առաջարկներ ներկայացնելը, որոնք չափազանց կարևոր են ներկա ժամանակահատվածում:
14:43 - 08 փետրվարի, 2024
Նազարյանն առաջարկեց հստակ նշել, որ զուգընկերն արական և իգական սեռի ներկայացուցիչներն են․ ԱԺ-ում քննարիկվում է ընտանեկան բռնությանը վերաբերող նախագծերի փաթեթը |aravot.am|

Նազարյանն առաջարկեց հստակ նշել, որ զուգընկերն արական և իգական սեռի ներկայացուցիչներն են․ ԱԺ-ում քննարիկվում է ընտանեկան բռնությանը վերաբերող նախագծերի փաթեթը |aravot.am|

aravot.am: ԱԺ նիստում ՔՊ խմբակցության պատգամավորներ Զարուհի Բաթոյանի, Սոնա Ղազարյանի եւ Ծովինար Վարդանյանի հեղինակած «Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին» օրենքում փոփոխություններ եւ լրացումներ կատարելու մասին եւ կից ներկայացված օրենքների նախագծերի փաթեթի  քննարկման ժամանակ ընդդիմադիր պատգամավորները հիմնական հարցադրումները հնչեցրին նախագծում ներառված «զուգընկեր» ձեւակերպման վերաբերյալ։ «Հայաստան» խմբակցության պատգամավոր Արմենուհի Կյուրեղյանը հարցրեց հիմնական զեկուցող Զարուհի Բաթոյանին․ «Ինձ թվում է՝ ամենակարեւոր բաղադրիչներից մեկը զուգընկեր բառի ներմուծումն է օրենսդրության մեջ։ Մեջբերում եմ՝ «զուգընկերը դա անձ է, որի հետ առկա են հարաբերություններ, որոնց հատուկ է սիրային կապը՝ անկախ համատեղ բնակության կամ միմյանց հետ սեռական հարաբերություններ ունենալու հանգամանքից»։ Կարո՞ղ եք ինձ բացատրել, ի՞նչ է նշանակում՝ «առկա է սիրային կապ՝ անկախ սեռական հարաբերությունից»»։ Բաթոյանն ասաց, որ խոսքն այն մասին է, որ պետք է օրենքով սահմանվի բռնություն կիրառողների կամ ենթադրյալ բռնության ենթարկվողների շրջանակը։ «Եվ այդ շրջանակից դուրս էին մնում այն անձինք, որոնք նշանված են կամ ընկերներ են, զուգընկերային հարաբերություններ ունեն, բայց նրանց միությունը զագսով ամրագրված չէ»,- հավելեց Բաթոյանը։«Հայաստան» խմբակցության պատգամավոր Արծվիկ Մինասյանը հարցրեց․ «Այնուամենայնիվ, այս օրենքի ընդունման հիմնավորումը, հրամայականը, վիճակագրությունը պատշաճ ներկայացված չէ։ Ի՞նչ տարբերություն՝ նշանվածների մեջ է տեղի ունենում բռնությունը, թե՞ ծանոթների մեջ։ Եթե քրեորեն պատժելի արարք է, ուրեմն քրեորեն պատժելի արարք է։ Միջանձնային հարաբերությունները գործի քննության ընթացքում, նախաքննության ընթացքում լիարժեք բացահայտվում են, ներկայացվում են։ Դուք բերել եք արհեստականորեն ներմուծում եք ինչ-որ բաներ, որոնք նաեւ հանրության մոտ լրացուցիչ կասկածների տեղիք են տալիս։ Եթե այլ պաշտպանական մեխանիզմների մասին է խոսք գնում՝ աջակցության սխեմաների, աջակցության մասին խոսեք։ Հասկացություն սահմանելով կամ գնահատական տալով՝ դուք ի՞նչ ընտանեկան արժեքներ եք պաշտպանում»։ Բաթոյանն ի պատասխան ասաց, որ այս օրենքն ու նախագիծն ընդհանրապես ընտանեկան արժեքների մասին չեն։ «Հայաստան» խմբակցության պատգամավոր Գեղամ Նազարյանը ասաց․ «Ինչո՞ւ սահմանված չէ, թե ով է զուգընկերը։ Ցավոք սրտի, մենք ապրում ենք մի ժամանակներում, երբ կան հայտնի այլ զուգընկերներ։ Ես առաջարկում եմ, որ հստակ նշվի, որ զուգընկերն արական եւ իգական սեռի ներկայացուցիչներն են։ Դա անպայման պետք է նշվի, որովհետեւ սա արդեն քայլ է գնում դեպի մյուս փուլ։ Առաջարկում եմ, որ այս մասը վերաձեւակերպեք եւ հստակ լինի, որ խոսքը կնոջ եւ տղամարդու մասին է»։ Բաթոյանը նշեց․ «Մենք սահմանել եքն զուգընկերը, եւ այս օրենքով կանխարգելման ու բռնության արգելքի մասին է խոսքը։ Մենք իրավասու չենք սահմանելու, թե մարդիկ ում են ընտրում իրենց զուգընկեր։ Ում էլ ընտրեն, ով էլ լինի այդ զուգընկերը, արգելվում է բռնությունը»։ Գեղամ Նազարյանն արձագանքեց․ «Ես էլ պնդում եմ, հայտարարում եմ, որ եթե անձն ազատ է իրեն զուգընկեր ընտրելու նույն սեռի ինչ-որ մեկին, իրենք այլեւս մեր պաշտպանության ներքո չեն գտնվելու այս օրենքի շրջանակներում, որովհետեւ դա արդեն զուգընկերություն չէ, դա արդեն ուրիշ բան է, ուղղակի բառը չասեմ, թե ինչ է։ Մենք պետք է պաշտպանենք ավանդական ընտանիքը, ավանդական ընտանիքի թե տղամարդուն, թե կնոջը, թե հարսին, թե սկեսուրին։ Ես կողմ եմ, որ ընտանիքում բռնություն չլինի, հարսը սկեսուրին չծեծի կամ հակառակը, բայց երբ այս օրենքով մենք փորձ ենք անում պաշտպանել մեկ այլ խմբի, որը խաթարում է պետության, ընտանիքի հիմքերը, նվազեցնում է ծնելիությունը, նպաստում թմրամոլության աճին, այդ խմբին ես ու մենք պետք է միասնական լինենք ու չպաշտպանենք։ Ես առաջարկում եմ, որ դուք փոխեք ձեր մոտեցումը, որովհետեւ այդ քայլով մենք քայլ ենք անելու դեպի ընտանիքի, պետության հիմքերի վերջնական խաթարմանը։ Հայաստանը ոչ Կալիֆորնիա է, ոչ էլ Ամստերդամ»։ Բաթոյանն ասաց, որ այս պահին Հայաստանի Սահմանադրությունն ու գործող օրենսգիրքը որեւէ մեկին չի արգելում ազատորեն ընտրել իր զուգընկերոջը։ Շարունակությունը՝ սկզբնաղբյուր կայքում
11:53 - 07 փետրվարի, 2024
«Նիկոլ Փաշինյանը եւս մեկ անգամ ցույց տվեց, որ բացարձակ չի տիրապետում բանակցությունների տարրական կանոններին»․ Արծվիկ Մինասյան
 |aravot.am|

«Նիկոլ Փաշինյանը եւս մեկ անգամ ցույց տվեց, որ բացարձակ չի տիրապետում բանակցությունների տարրական կանոններին»․ Արծվիկ Մինասյան |aravot.am|

aravot.am: ԱԺ ճեպազրույցների ժամանակ «Հայաստան» խմբակցության պատգամավոր Արծվիկ Մինասյանն անդրադարձավ Նիկոլ Փաշինյանի հայտարարությանը, որ հույս ունի, որ Բաքվից հնչող հայտարարությունները խաղաղության գործընթացը դիտավորյալ փակուղի մտցնելու նպատակ չունեն։ «Երեկ Նիկոլ Փաշինյանը հարցուպատասխանում իր արտահայտած մտքերով եւս մեկ անգամ ցույց տվեց, որ ինքը բացարձակ չի տիրապետում ոչ միայն դիվանագիտական նրբություններին, չի տիրապետում անգամ բանակցությունների տարրական կանոններին։ Չի էլ հասկանում, որ նմանատիպ հարցերի վերաբերյալ գոյություն ունի միջազգային իրավունք եւ նաեւ կանոններ։ Երեկ Նիկոլ Փաշինյանը ոչ մի բանակցային սկզբունքների մասին չխոսեց։ Ինքը խոսում է այնպիսի տեխնիկական հարցերի մասին, որոնք Ալիեւը հեշտությամբ կոտրում է եւ հեշտությամբ հակադարձում է։ Իսկ հայկական կողմից չկա սկզբունքների շուրջ հստակ մոտեցում»,- ասաց Մինասյանը։ Ըստ նրա՝ միջազգային իրավունքի տեսակետից սկզբունքներից կարևորներից մեկը հետեւյալն է, թե ի՞նչ մոտեցումով ես դու մտնում բանակցությունների մեջ։ Ալիեւը հայտարարում է՝ «այն, ինչ իմ տիրապետության տակ է, իմն է»։ Եվ դրանով է հիմնավորում, որ բռնազավթած տարածքներից զորքերը չի ուզում դուրս բերել։ «Նիկոլ Փաշինյանի կամ հայկական կողմի պատասխանը ո՞րն է դրան, ոչ մի բան, զրո։ Մինչդեռ, նույն միջազգային իրավունքի տեսակետից, եթե դու այդ մոտեցումն ես որդեգրում, առաջինը՝ առնվազն դու ընդհանրապես չպետք է խոսես որեւէ անկլավի մասին։ Երկրորդ, եթե անգամ դա հիմք է ընդունվում, եւ Նիկոլ Փաշինյանի թեթեւ ձեռամբ անգամ եթե բանակցային փաթեթ է մտել Ալմա-Աթայի հայտնի հռչակագիրը եւ արձանագրությունը, ապա Ադրբեջանը պաշտոնապես միացել է, եւ իր համար այդ նորմը գործողության մեջ է մտել 1993 թվականի սեպտեմբերի 24-ին։ Այսինքն՝ եթե դու խոսում ես տիրապետման տակ գտնվող տարածքի եւ սահմանագծի, սահմանազատման մասին, այդ պահի դրությամբ պետք է խոսես։ Իսկ այդ պահի դրությամբ սահմանագիծը շփման գիծն էր, որտեղ հայկական իշխանության ներքո գտնվող տարածքները Հայաստանի իրավազորության ներքո են»,- հավելեց նա։ Ըստ Արծվիկ Մինասյանի՝ տրանսպորտային ենթակառուցվածքների ապաշրջափակման մասին նույն միջազգային իրավունքի կանոնների համաձայն՝ օպտիմալ է այնպիսի հաղորդակցությունների բացումը եւ այնպիսի միավորների ձեւավորումը, որոնք երկու կողմերին էլ հնարավորություն չեն տալու ապագայում այնպիսի որոշումներ կայացնել, որպեսզի միակողմանի շահ ստանան։ Շարունակությունը՝ սկզբնաղբյուր կայքում
12:36 - 18 հունվարի, 2024
Գյումրու մաքսակետում կայանման թանկացումը հիմնավորված չէ. պատգամավորները դժգոհ են |armeniasputnik.am|

Գյումրու մաքսակետում կայանման թանկացումը հիմնավորված չէ. պատգամավորները դժգոհ են |armeniasputnik.am|

armeniasputnik.am: ՀՀ ԱԺ պատգամավորները մաքսային մարմին կողմից տրանսպորտային միջոցների կայանման համար դրույքաչափերը միջինում 3 անգամ թանկացնելը հիմնավորված չեն համարում։ Ավելի վաղ հայտնել էինք, որ նախագծով առաջարկվում է ավտոտրասնպորտային միջոցների համար դրույքաչափերը վերանայել՝ մարդատար ավտոմեքենայի համար գանձել 5000 դրամ գործող 1600 դրամի փոխարեն։ Նշվում է, որ նախատեսվում է սահմանել ավելի բարձր դրույքաչափ, որպեսզի ավտոներկրողները տարածքները որպես ուղղակի կայանման վայր չօգտագործեն։ «Հայաստան» խմբակցության պատգամավոր Արծվիկ Մինասյանը «Ավտոմոբիլային տրանսպորտի մասին» օրենքում փոփոխություններ և լրացումներ կատարելու մասին օրինագծի քննարկման ժամանակ նշեց, որ հակասություններ կան նախագծում։ «Դուք ասում եք, թե օրական 500 մեքենա հնարավոր է սպասարկել, մաքսային ծառայությունն էլ իր աշխատանքը պատշաճ կատարում է, այդ դեպքում մեքենաների պահպանման տուրքն ինչո՞ւ է բարձրացվում։ Դրա պատճառով շատանալու են այն անձինք, որոնք կցանկանան արագ մաքսազերծում անել։ Ինքներդ ձեզ հակասում եք, եթե ձեր նպատակը ֆիսկալ չէ։ Ավտոներկրողների համար ֆինանսական բեռն ավելացնում եք, բայց պատճառը չհիմնավորված է։ Գյումրու մաքսակետից 1,5 մլրդ ավելի փող եք ուզում ստանալ, «ստայանկի» գնի թանկացումը հիմնավորված չէ»,– նշեց Մինասյանը։ ՀՀ պետական եկամուտների կոմիտեի նախագահի տեղակալ Արթուր Մանուկյանն ի պատասխան շեշտեց, որ այսօր մինչև 160 մեքենա է գալիս Հայաստան, բայց 130-ն է ներկայացվում մաքսազերծման, ինչից էլ կուտակումներ են առաջանում։ Փոխնախարարի խոսքով՝ հնարավորություն կա 500 մեքենա սպասարկելու, բայց դիմողները չեն գալիս, հետևաբար իր ասածն ու նախագիծը միմյանց չեն հակասում։ Մանուկյանը նաև նշեց, որ այժմ Գյումրու մաքսատանը, որը նախատեսված է 2300 մեքենայի համար, մոտ 1300 մեքենա կա։ «Հայաստան» խմբակցության պատգամավոր Թադևոս Ավետիսյանն էլ հետաքրքրվեց՝ եթե Գյումրու մաքսայինում հերթ չկա, ապա մեքենաների կայանման գինն ինչու են 1600 դրամից նախատեսում դարձնել 5000 դրամ։ «Ձեզ մոտ հերթեր են գոյանում, որովհետև դուք չեք կարողանում ժամանակին սպասարկել։ Ձեր գործը լավ չեք անում, ավտոներկրողներն էլ ստիպված օրական 5000 դրամ պետք է վճարեն»,– ասաց Ավետիսյանը։ Քննադատությանն արձագանքելով՝ Մանուկյանը նշեց, որ այսօր Գյումրու մաքսատանը հերթեր չկան, սպասարկումն իրականացվում է պատշաճ կերպով՝ չնայած հոսքի ավելացմանը։ «Քաղաքացիական պայմանագիր» խմբակցության պատգամավոր Հովիկ Աղազարյանն էլ ընդգծեց, որ շատ վատ և ժամանակավրեպ օրենք է։ «Այսօր մոտ 50%–ով է ծանրաբեռնված այդ կայանատեղին, հետևաբար խնդիր չկա։ Թաքուն կարելի է մտածել, քանի որ կիսով չափ է ծանրաբեռնված, ուզում եք 1600 դրամը դարձնել 5000 դրամ, որպեսզի լիքը եղած ժամանակվա գումարը լրացնեք։ Կոչ եմ անում հնարավորինս լավարկել այս օրինագիծը»,– ասաց Աղազարյանը։ ՔՊ–ական պատգամավոր Բաբկեն Թունյանն էլ ընդգծեց, որ մեքենա ներկրող, սակայն չմաքսազերծող քաղաքացիները դրանք սեփական օգտագործման համար չեն բերում, այլ վերավաճառելու։ Հնարավոր է նաև, որ ներկրողը մեքենան սեփական օգտագործման համար է բերել, բայց այդ պահին մաքսազերծելու համար գումար չունի։ Նա առաջարկեց ավելի մեղմացուցիչ դրույթներ սահմանել՝ ավելի երկար ժամանակով թույլ տալ, որ մեքենաները կայանեն անվճար կամ վերանայեն տուրքի չափը։ Նախագծում նշվում է, որ առաջարկվող փոփոխությունների շնորհիվ տարածքների առումով խնդիրները կպակասեն, մաքսային մարմինների կողմից վարչարարության արդյունավետությունն էլ կբարձրանա։ Մաքսակետում կայանելու սակագներն այժմ ավելի ցածր են, քան մոտակա կայանատեղիներում, այդ պատճառով էլ մարդիկ չեն շտապում դուրս բերել մեքենաները:
12:22 - 11 դեկտեմբերի, 2023
ՄՊՀ անդամի ընդդիմության միասնական թեկնածուն Մանվել Բադալյանն է
 |1lurer.am|

ՄՊՀ անդամի ընդդիմության միասնական թեկնածուն Մանվել Բադալյանն է |1lurer.am|

1lurer.am: Ընդդիմությունը Մրցակցության պաշտպանության հանձնաժողովի անդամի թեկնածու է առաջադրել Մանվել Բադալյանի թեկնածությունը: Նրան ԱԺ ընդդիմադիր խմբակցությունների, այդ թվում՝ «Պատիվ ունեմ»-ի անունից ԱԺ-ում ներկայացրեց «Հայաստան» խմբակցության քարտուղար Արծվիկ Մինասյանը: Հանձնաժողովի անդամն իր գործունեությունը սկսել է 1982 թվականից՝ որպես տնտեսագետ: 1998-1999 թվականներին ՀՀ նախագահին առընթեր քաղաքական խորհրդի անդամ է եղել, 2005-2012 թվականներին՝ Հայաստան պետական ագրարային համալսարանի խորհրդի նախագահը, 1999-2002 թթ.՝ ԱԺ պատգամավոր, 2002-2018 թթ.՝ Քաղաքացիական ծառայության խորհրդի նախագահ: 2019-ից «Հանրային ծառայության արժանիքային համակարգի պաշտպանության կենտրոն» ՀԿ նախագահն է: Նա իրականացնում է նաև մանկավարժական գործունեություն, դասավանդել է ԵՊՀ-ում, Ազգային ագրարային համալսարանում, Պետական կառավարման ակադեմիայում, Հայ-ռուսական համալսարանում: Մանվել Բադալյանը կրթությամբ տնտեսագետ է, տնտեսագիտության թեկնածու, դոցենտ:
16:13 - 08 դեկտեմբերի, 2023
«Հայաքվե» քաղաքացիական օրենսդրական նախաձեռնության հարցի քննարկումը հետաձգվել է քվեարկության փուլում լրամշակման նպատակով

«Հայաքվե» քաղաքացիական օրենսդրական նախաձեռնության հարցի քննարկումը հետաձգվել է քվեարկության փուլում լրամշակման նպատակով

Ազգային ժողովի հայտարարության նախագիծը, որը մշակել եւ շրջանառության մեջ է դրել ՀՀ ԱԺ «Հայաստան» խմբակցությունը` համաձայնեցված ՀՀ ԱԺ «Պատիվ ունեմ» խմբակցության հետ, վերաբերում է «Հայաքվե» քաղաքացիական օրենսդրական նախաձեռնության առաջադրած օրակարգային հարցին: Առաջին անգամ հաջողված նախադեպ ունենք, երբ քաղաքացիական նախաձեռնության կարգով ներկայացվում է անհրաժեշտ 50.000 ստորագրություն: 58.000 քաղաքացիներ միացել են նախաձեռնությանը: Այս նախաձեռնության արժեւորումը նրանում է, որ ազգային կարեւորագույն հարցերին է վերաբերում. այս մասին ԱԺ պետական-իրավական հարցերի մշտական հանձնաժողովի` դեկտեմբերի 4-ի արտահերթ նիստի ընթացքում ասել է ԱԺ «Հայաստան» խմբակցության քարտուղար Արծվիկ Մինասյանը: Նա նշել է, որ «Հայաքվե» քաղաքացիական նախաձեռնության առաջադրած օրակարգային հարցը քննարկվել է «Հայաստան» խմբակցության` նոյեմբերի 24-ին հրավիրած խորհրդարանական լսումների ժամանակ: Արդյունքում նախատեսվել է ՀՀ քրեական օրենսգրքում լրացումների նախագիծ, որի համաձայն` հատուկ նորմով քրեորեն պատժելի արարքներ են որակվում ՀՀ անունից Լեռնային Ղարաբաղը որեւէ այլ պետության կազմում ճանաչելն ու Հայոց ցեղասպանության ճանաչումից հրաժարվելը կամ դրա վտանգավորությունը նսեմացնելը: ԱԺ մամուլի ծառայությունից հայտնում են, որ Արծվիկ Մինասյանը մեջբերումներ է կատարել խորհրդարանական երեք քաղաքական ուժերի` ԼՂ հիմնախնդրի լուծմանը վերաբերող նախընտրական ծրագրերից` ընդգծելով, որ դրանցում կարմիր թելով անցնում է ԼՂ ժողովրդի ինքնորոշման իրավունքի պաշտպանության հարցը: Պատգամավորները հարցեր են ուղղել զեկուցողին, որոնք վերաբերել են ԼՂ հիմնախնդրի լուծման տրամաբանությանը, ընդհանուր պետության փաթեթին, Մադրիդյան սկզբունքների վերաբերյալ ԱԺ «Հայաստան» խմբակցության քարտուղարի վերաբերմունքին, «Հայաքվե» նախաձեռնության հիմնավորման տեքստին, ԵԱՀԿ ՄԽ առաջարկած կարգավորումներին, ԼՂ-ում 2023 թվականին տեղի ունեցած իշխանափոխությանը, ԼՂ լուծարման մասին հրամանագրին: Պետական-իրավական հարցերի մշտական հանձնաժողովի նախագահ Վլադիմիր Վարդանյանը հետաքրքրվել է Արծվիկ Մինասյանից, թե ինչու հայտարարությունը չի ձեւակերպվել որպես օրենքի նախագիծ եւ ներկայացվել հանձնաժողովին: «Մի սուբյեկտն ուժ կիրառեց, պատասխան չստացավ, հաջորդ սուբյեկտն ասաց` անվտանգության համար պատասխանատու եմ, ուժ կիրառվեց, էլի անպատասխան մնաց: Ինչո՞ւ փաստաթղթում չկա դրա արձանագրումը»,- հետաքրքրվել է Վլադիմիր Վարդանյանը: Պատգամավորի հարցին ի պատասխան` Արծվիկ Մինասյանը նշել է, որ հայտարարության մեջ պատրաստ են իրացնել առաջարկները: Խոսելով հայտարարությունը նախագծով փոխարինելու առաջարկի մասին` Արծվիկ Մինասյանը հայտնել է, որ տպավորություն է, թե սահմանադրական կարեւորագույն սուբյեկտին` քաղաքացիներին, ուզում են փոխարինել մեկ պատգամավորով: Խորհրդարանականը նշել  է, որ դեմ է նման մոտեցմանն ու տեղեկացրել, որ յուրաքանչյուր կողմ իրացնում է իր իրավունքը: Հայտարարության նախագծի հարակից զեկույցը ներկայացրել է հանձնաժողովի նախագահ Վլադիմիր Վարդանյանը, ով ողջունել է սահմանադրական ինստիտուտի գործարկումը: Պատգամավորն այն որպես ժողովրդավարական նվաճում է որակել: «Նախագիծն ինքնուրույն բովանդակություն չունի, այն որեւէ եղանակով առարկայական հարց չի ծածկում, որն ընդգրկված է ԱԺ գալիք նիստերի օրակարգում, այն առաջ է քաշվել, որպեսզի հնարավոր լինի լսումներ անցկացնել: Բովանդակային մասով այն արտացոլում է քաղաքացիական օրենսդրական նախաձեռնությունը եւ պարունակում է որոշակի առաջարկներ, որոնք օրենսդրական առանձին քննարկման առարկա կարող են դառնալ»,- ասել է Վլադիմիր Վարդանյանն ու առաջարկել արձանագրել, որ հայտարարությունն արդեն իսկ կատարել է իր առաքելությունը, այն է` լսումները տեղի են ունեցել: Վլադիմիր Վարդանյանը կոչ է արել հանձնաժողովականներին դեմ քվեարկել հայտարարության նախագծին: Ելույթների ընթացքում պատգամավորներն անդրադարձել են ԼՂ հակամետությանը, այն լուծելու մասով վարված բանակցություններին: Հնչել են քաղաքական գնահատականներ: Հայտարարության նախագծի հեղինակ Արծվիկ Մինասյանն առաջարկել է հարցի քննարկումը հետաձգել քվեարկության փուլում` այն լրամշակելու նպատակով:
16:07 - 04 դեկտեմբերի, 2023
«Քաղաքացիական պայմանագիրը» պետք է առաջարկի նախընտրական եւ կառավարության ծրագրերի իրականացման այլ ճանապարհային քարտեզ»․ Արծվիկ Մինասյան
 |aravot.am|

«Քաղաքացիական պայմանագիրը» պետք է առաջարկի նախընտրական եւ կառավարության ծրագրերի իրականացման այլ ճանապարհային քարտեզ»․ Արծվիկ Մինասյան |aravot.am|

aravot.am: Ազգային ժողովի պետաիրավական հարցերի մշտական հանձնաժողովի նիստում «Հայաստան» խմբակցության պատգամավոր Արծվիկ Մինասյանը ներկայացրեց «Հայաքվե» նախաձեռնության վերաբերյալ ԱԺ հայտարարության նախագիծը։ Հիշեցնենք, որ «Հայաքվեն» Ազգային ժողով է ներկայացրել Քրեական օրենսգրքում լրացումներ կատարելու նախագիծ, համաձայն որի՝ ՀՀ անունից Արցախը որեւէ այլ պետության կազմում ճանաչելը, Հայոց ցեղասպանության ճանաչումից հրաժարվելը կամ դրա վտանգավորությունը նսեմացնելը պատժվում է ազատազրկմամբ՝ 10-15 տարի ժամկետով։ Նշված արարքները սահմանադրական կարգի դեմ ուղղված հանցագործություններ են։ Նախագծի վերաբերյալ ԱԺ հայտարարության նախագիծը շրջանառության մեջ է դրել «Հայաստան» խմբակցությունը։ «Հայտարարության նախագծի անհրաժեշտությունը բխում է երկու կարեւոր հանգամանքից։ Առաջինն այն, որ առաջին անգամ մենք հաջողված նախադեպ ունենք, երբ քաղաքացիական նախաձեռնության կարգով ներկայացվում է անհրաժեշտ 50 հազար ստորագրություն, ինչը նախատեսված է օրենսդրությամբ։ 58 հազար քաղաքացիներ միացել են այս նախաձեռնությանը, եւ ինքը համարվելով որպես իրավական, ժողովրդավարական պետության կարեւոր ինստիտուտ, երբ քաղաքացիներն իրենք են մասնակցում օրինաստեղծ աշխատանքին, սա առաջին հաջողված դեպքն է։ Երկրորդ հանգամանքը վերաբերում է նրան, որ հատկապես այս նախաձեռնության արժեւորումը նրանում է, որ ազգային կարեւորագույն հարցերին է վերաբերում։ Այն է՝ Արցախի ինքնորոշման իրավունքի անվերապահ ճանաչում եւ դրա դեմ ուղղված որեւէ գործողություն դատապարտելի ու քրեորեն պատժելի համարելը եւ Հայոց ցեղասպանության դեմ իրականացվող գործողությունները քրեականացնել»,- ասաց Արծվիկ Մինասյանը։ Նա նշեց, որ բոլոր քաղաքական ուժերի նախընտրական ծրագրում, նաեւ գործող կառավարության գործող ծրագրում Արցախի ժողովրդի ինքնորոշման պաշտպանությունն անվերապահորեն ստանձնած պարտավորություն է։ «Հետեւաբար, այս նախաձեռնության նպատակներից է նաեւ հետեւողական լինել նախընտրական խոստումներին։ «ԱԺ կողմից նման հայտարարության ընդունումը չափազանց կարեւորվում է նաեւ միջազգային հարթակում Արցախյան հարցի հետեւողականության ցուցաբերման առումով։ Եթե քաղաքական ուժերն իրենց նախընտրական ծրագրում, հայտարարելով այս ամենի մասին, իրականում չեն իրականացնում դա, ստացվում է, որ ուղղակի խաբել են հանրությանը։ Միջազգային ասպարեզում էլ ընկալվում է, որ քաղաքական ուժերը ժողովրդի առաջ խոստանում են մի բան, ստանում են մանդատ, իրականացնում են հակառակը։ Քանի որ «Քաղաքացիական պայմանագիրն» իր որոշմամբ է հնարավորություն տալու այս հայտարարությունն ընդունել կամ մերժել, պետք է առաջարկի նախընտրական ծրագրի եւ կառավարության ծրագրով ստանձնած պարտավորությունների իրականացման այլ ճանապարհային քարտեզ։ Եթե դա էլ չի անում, վերջին լուծումը մնում է հրաժարական եւ հեռացում»,- ասաց Մինասյանը։
11:49 - 04 դեկտեմբերի, 2023
Տեր-Պետրոսյանը նման առաջարկ չի ստացել. 1-ին նախագահի գրասենյակը պատասխանել է Մինասյանին

Տեր-Պետրոսյանը նման առաջարկ չի ստացել. 1-ին նախագահի գրասենյակը պատասխանել է Մինասյանին

ՀՀ առաջին նախագահ Լևոն Տեր-Պետրոսյանի գրասենյակը ՀՀ մարդու իրավունքների նախկին պաշտպան Արման Թաթոյանի գլխավորությամբ ժամանակավոր կառավարության կազմ ձևավորելու առաջարկ չի ստացել: Այս մասին հայտարարել է ՀՀ առաջին նախագահի մամուլի խոսնակ Արման Մուսինյանը։ Ավելի վաղ ԱԺ «Հայաստան« խմբակցության քարտուղար Արծվիկ Մինասյանը Sputnik Արմենիայի հետ զրույցում, խոսելով «Ազգային կոմիտեի» ձախողման իրական պատճառների մասին, ասել էր, որ իրենց կողմից ներկայացվել է ժամանակավոր կառավարության կազմ` Արման Թաթոյանի գլխավորությամբ։ «Սակայն այդ ամենին զուգահեռ կար մեկ պայման․ բոլոր նախկին նախագահները և կաթողիկոսները (Գարեգին 2-րդ, Արամ 1-ին․ խմբ.) պետք է նաև հրապարակային աջակցություն հայտնեին այդ գաղափարին, ծրագրին։ Ցավոք, առաջին նախագահի (Լևոն Տեր–Պետրոսյան) գրասենյակի բացասական արձագանքը բերեց նրան, որ այս գաղափարը չիրացվեց»,- ասել էր Մինասյանը։ Թաթոյանը ևս հերքել է այս հայտարարությունները։ «Տեղեկացնում եմ, որ Արծվիկ Մինասյանի հայտարարությունը կեղծիք է, այսինքն՝ չի համապատասխանում իրականությանը: Առաջին նախագահի գրասենյակը նման առաջարկ չի ստացել», - գրել է Մուսինյանը ֆեյսբուքյան էջում։    
10:27 - 05 նոյեմբերի, 2023
Ինքս որևէ կապ չունեմ և չեմ ունեցել ԱԺ պատգամավորի նշած քաղաքական գործընթացների և Ազգային կոմիտեի հետ. Արման Թաթոյան

Ինքս որևէ կապ չունեմ և չեմ ունեցել ԱԺ պատգամավորի նշած քաղաքական գործընթացների և Ազգային կոմիտեի հետ. Արման Թաթոյան

Այդ գործընթացների ձախողման պատճառներն իմ անվան հետ կապված համատեքստում քննարկելը տարօրինակ է ու անհասկանալի։ Այս մասին իր  ֆեյսբուքյան էջում գրել է ՀՀ նախկին ՄԻՊ Արման Թաթոյանը՝ անդրադառնալով Արծվիկ Մինասյանի այն հայտարարությանը, թե «իրենց կողմից ներկայացվել է ժամանակավոր կառավարության կազմ` Արման Թաթոյանի գլխավորությամբ»: «Ստիպված եմ անդրադառնալ Սպուտնիկ Արմենիայի «Աբովյան Time» հաղորդման եթերում երեկ Ազգային ժողովի պատգամավոր Արծվիկ Մինասյանի հայտարարությանը, ով ««Ազգային կոմիտեի» ձախողման իրական պատճառների մասին» խոսելով, նշել է, թե «իրենց կողմից ներկայացվել է ժամանակավոր կառավարության կազմ` Արման Թաթոյանի գլխավորությամբ (…)։ Պայմանն էլ եղել է մեկը, որ կաթողիկոսներն ու նախկին բոլոր նախագահները պետք է հրապարակային աջակցություն հայտնեին այդ գաղափարին, սակայն առաջին նախագահ Լևոն Տեր–Պետրոսյանից բացասական արձագանք են ստացել, ուստի գաղափարը չի իրացվել»։ Նախ, ինքս որևէ կապ չունեմ և չեմ ունեցել ԱԺ պատգամավորի նշած քաղաքական գործընթացների և Ազգային կոմիտեի, դրա քննարկումների հետ։ Ինձ հետ որևէ անգամ չի քննարկվել «ժամանակավոր կառավարություն» ձեւավորելու կամ այն գլխավորելու հարցեր։ Այդ գործընթացների ձախողման պատճառներն իմ անվան հետ կապված համատեքստում քննարկելը տարօրինակ է ու անհասկանալի։ Հայաստանի անվտանգության ահագնացող հիմնախնդիրները, Արցախի հայերի բռնի տեղահանումը, հայկական ինքնությանը սպառնացող վտանգները, Հայաստանում հասարակության ներքին պառակտումն ու թշնամանքը, Սփյուռքի հետ համակարգային խզված կապերը պահանջում են հրատապ լուծումներ: Այս հարցերը խորապես մտահոգում են ինչպես մեր յուրաքանչյուր հայրենակցի, այնպես էլ ինձ: Ես ինքս երբևէ չեմ խուսափել պատասխանատվություն ստանձնելուց, և իմ գործունեությունը մշտապես մեր հանրության աչքի առաջ է։ Նորից եմ կրկնում այն, ինչ արդեն 1 անգամ հրապարակայնորեն ասել եմ 1 տարի առաջ՝ ակտիվ հանրային գործունեությամբ զբաղվում եմ, բայց որևէ քաղաքական ուժի չեմ հարում և չունեմ որևէ այլ առնչություն քաղաքական որևէ ուժի հետ: Երբ անհրաժեշտ համարեմ ներգրավվել որևէ քաղաքական գործընթացի մեջ, ապա կգործեմ ինքնուրույնաբար ու դրա մասին կհայտարարեմ հստակ: Ընդ որում, կառաջնորդվեմ պետության անվտանգության, իրավունքի գերակայության ու մարդու իրավունքների երաշխավորման, ազգային արժեքների պաշտպանության, հանրային համերաշխության վերականգնման օրակարգով»,- գրել է նա:
13:17 - 04 նոյեմբերի, 2023
«Օրենքը պահանջում է, որ մեր նահատակների անունները հավերժացվեն, հստակ ծրագիր նախատեսեք»․ Արծվիկ Մինասյանի առաջարկը՝ վարչապետի աշխատակազմին

 |aravot.am|

«Օրենքը պահանջում է, որ մեր նահատակների անունները հավերժացվեն, հստակ ծրագիր նախատեսեք»․ Արծվիկ Մինասյանի առաջարկը՝ վարչապետի աշխատակազմին |aravot.am|

aravot.am: «Մենք ունենք հայրենիքի պաշտպանության համար զոհված անձանց հիշատակի հավերժացման մասին օրենք, որտեղ բավական լուրջ պահանջներ կան սահմանված բոլոր գերատեսչությունների, առաջին հերթին կառավարության համար։ Եվ այստեղ նախատեսված է, որ հավերժացման հիշատակները բազմաթիվ ուղղություններով պետք է իրականացվեն»,- այսօր Ազգային ժողովի մշտական հանձնաժողովների նիստում 2024 թվականի բյուջեի նախագծի քննարկման ժամանակ ասաց «Հայաստան» խմբակցության պատգամավոր Արծվիկ Մինասյանը։ Նա նշեց, որ ՀՀ դեմ Ադրբեջանի ագրեսիայի ու պատերազմական գործողությունների հետեւանքով, ցավոք, ունենք զոհեր, որոնց վերաբերյալ առ այսօր դեռեւս չկա տեղեկատվություն։ «Բայց այս օրենքը պահանջում է նաեւ, որպեսզի մեր նահատակների անունները հավերժացվեն։ Նույնը վերաբերում է նաեւ Արցախի Հանրապետության դեմ հատկապես վերջին պատերազմի հետեւանքով զոհված մեր հայրենակիցներին։ Ես առաջարկում եմ, որ մինչեւ բյուջեի ամբողջական ներկայացումը, այս հարցը պարտադիր քննարկման առարկա դարձնեք եւ հստակ ծրագիր նախատեսեք այս ուղղությամբ»,- ասաց Արծվիկ Մինասյանը։ Վարչապետի աշխատակազմի ղեկավարի տեղակալ Խաչատուր Պողոսյանը նշեց, որ հստակ չի կարող պատասխանել այս հարցին։ «Բայց քննարկումը կսկսենք»,- հավելեց նա։
11:43 - 01 նոյեմբերի, 2023
Ձեր Արայիկ Հարությունյանը Նիկոլ Փաշինյանի հետ համագործակցաբար քանի՞ անգամ է փորձել փախնել. Մինասյան
 |aysor.am|

Ձեր Արայիկ Հարությունյանը Նիկոլ Փաշինյանի հետ համագործակցաբար քանի՞ անգամ է փորձել փախնել. Մինասյան |aysor.am|

aysor.am: ԱԺ «Հայաստան» խմբակցության պատգամավոր Արծվիկ Մինասյանը նիստի  ժամանակ հայտարարեց, որ քաղաքական մեծամասնությունը ցույց տվեց իր իրական դեմքը՝ կարգելով նոր մեղվորների։ «Պատմական տգիտությունն ի ցույց դնելով, փորձում են խեղաթյուրել իրականությունը։ Իսկ իրականությունն այն է, որ Արցախի հերոսկան, արժանապատիվ ժողովրդին դուք ինքներդ հանձնեցիք Ադրբեջանի գերիշխանությանը։ Ինքներդ մղեցիք մեր քաղաքացիներին, որպեսզի սովամահ վիճակում դիմագրավեն ադրբեջանական հրոսակախմբերին, ինքներդ՝ ձեր կառավարության ղեկավարի գլխավորությամբ, հրաժարվեցիք օգնություն ցուցաբերել և մղեցիք կործանման։ Այս ամենը փորձում եք ներկայացնել, թե Արցախում իշխանազավթում է տեղի ունեցել։ Ձեր Արայիկ Հարությունյանը Նիկոլ Փաշինյանի հետ համագործակցաբար քանի՞ անգամ է փորձել փախնել, թողնել իշխանությունը և հեռանալ։ Եվ հեռացել է և այն փրկությունը, որ փորձում էին անել, էլի ձեր իսկ ղեկավարության դավադիր գործողություններով հայաթափեցիք ողջ Արցախը։ Հազարավոր տարիներ Արցախը հայկական լինելով, այսօր դադարել է լինել այդպիսին։ Դուք եկել եք այստեղ և ուզում եք ձեր մեղքը  բարդել Արցախի հերոսական ժողովրդի վրա, դուք տեղեկություն ունե՞ք, որ այդ մեկ օրվա պատերազմում Արցախի բանակը հազարավոր կորուստներ է պատճառել թշնամուն։ Դուք տեղեկություն ունե՞ք, թե ինչպես է պատանդառված հայ գեներալը և ի՞նչ եք արել այդ ուղղությամբ»։
11:04 - 03 հոկտեմբերի, 2023
Իշխանությունը շարունակում է իր ազգակnրծան քաղաքականությունը, որի հետևանքները մենք տեսնում ենք. Արծվիկ Մինասյան
 |tert.am|

Իշխանությունը շարունակում է իր ազգակnրծան քաղաքականությունը, որի հետևանքները մենք տեսնում ենք. Արծվիկ Մինասյան |tert.am|

tert.am: ԱԺ այս նիստը գումարվում է Ադրբեջանի կողմից շարունակաբար հրեշավոր հանցագործությունների, այն է՝ շուրջ 9 ամիս Արցախը շրջափակելու, սովամատության մատնելու մեր ժողովրդին, պատերազմի միջոցով բռնի տեղահանություն կազմակերպելու և Արցախը հայաթափելու ակտից հետո: Այս մասին այսօր ԱԺ նիստում ասել է «Հայաստան» խմբակցության քարտուղար Արծվիկ Մինասյանը։ «Տրամաբանական կլիներ, որ այսօր օրակարգում պետք է առաջին հարցերից մեկը լիներ իրավիճակի վերլուծության գնահատման և մեր անելիքների մասին այսպես կոչված ժողովրդի բարձրագույն ներկայացուցչական մարմնի դիրքորոշումը, բայց մենք տեսնում են, որ չկա այդպիսի բան: Գուցե սրա պատճառը նա է, որ քաղաքական մեծամասնությունը և գործող իշխանությունը փորձում է քողարկել իր մեղսակցությունը այս ազգային ողբերգությանը կամ, որ ամենավատն է՝ փորձում է մեղքը բարդել այլոց վրա: Սա ոչ միայն սխալ է, սա վտանգավոր ու կործանարար է: Մեր իշխանությունը շարունակում է իր ազգակործան քաղաքականությունը, որի հետևանքները մենք տեսնում ենք:  Անգամ հարկ չհամարվեց նիստի սկզբից հարգել մեր զոհերի հիշատակը: Գումարենք նաև այն, որ երեկ էլ ունեցել ենք 1 զոհ»,-ասել է նա: Նա նաև ասաց, որ օրակարգում ընդգրկված է մի հարց, որը հակասահմանադրական է։ «Ազգային ժողովն իրավասու չէ Հռոմի ստատուտի հարցը քննարկման առարկա դարձնել՝ առանց սահմանադրական փոփոխությունների, իր բազմաթիվ  ռիսկերով հանդերձ»,-ասաց պատգամավորը։  Մինասյանի խոսքով դրա համար խորը, կշռադատված քննարկումների կարիք կար։
10:31 - 03 հոկտեմբերի, 2023
Վստահ եմ՝ Ադրբեջանը չի վավերացնի այս արձանագրությունը, բայց մենք պետք է քայլեր ձեռնարկենք․ Արծվիկ Մինասյան  |tert.am|

Վստահ եմ՝ Ադրբեջանը չի վավերացնի այս արձանագրությունը, բայց մենք պետք է քայլեր ձեռնարկենք․ Արծվիկ Մինասյան |tert.am|

tert.am: Այս արձանագրության վավերացման շրջանակներում շատ կարևոր է ի լուր աշխարհի ևս մեկ անգամ արձանագրել և հայտարարել է, թե ինչպես է ադրբեջանական ռեժիմը մարդկանց գնդակահարում Հադրութի հրապարակում, ինչպես են գնդակահարում գերիներին։ Այս մասին ԱԺ-ում «Մարդու իրավունքների և հիմնարար ազատությունների պաշտպանության մասին» կոնվենցիային կից՝ «Բոլոր դեպքերում մահապատժի վերացման մասին» թիվ 13 արձանագրությունը վավերացնելու մասին օրենքի նախագիծի քննարկման ժամանակ ասաց «Հայաստան» խմբակցության քարտուղար Արծվիկ Մինասյանը։ «Ադրբեջանի կատարած վայրագրությունների արձանագրումը և՛ մեզ համար, և՛ միջազգային հանրության համար պետք է հետագայում դառնա Ալիևի և նրա վարչակազմին պատժի ենթարկելու իրական հնարավորություն։ Ես վստահ եմ, որ Ադրբեջանը չի վավերացնի այս արձանագրությունը, բայց մենք պետք է քայլեր ձեռնարկենք, գործողություններ իրականացնենք, որպեսզի ի լուր աշխարհի արձանագրենք, որ մենք գործ ունենք մարդատյաց և մարդակեր ռեժիմի հետ»,- ասաց նա։
11:43 - 11 սեպտեմբերի, 2023
«ԱԱԾ-ն կարծում է, որ գործուն զղջալու հիմքով ծանր հանցանքների դեպքում պատժից ազատումը հանգեցնելու է կոռուպցիոն դրսեւորումների»․ Արծվիկ Մինասյան
 |aravot.am|

«ԱԱԾ-ն կարծում է, որ գործուն զղջալու հիմքով ծանր հանցանքների դեպքում պատժից ազատումը հանգեցնելու է կոռուպցիոն դրսեւորումների»․ Արծվիկ Մինասյան |aravot.am|

aravot.am: «Շարունակում եմ պնդել, որ այս նախաձեռնությունը հակասում է սահմանադրական կարգավորումներին, քրեական արդարադատության միջազգային հիմնարար սկզբունքներին»,- ԱԺ արտահերթ նստաշրջանում Քրեական օրենսգրքում լրացումներ կատարելու մասին նախագծի երկրորդ ընթերցմամբ քննարկման ժամանակ ասաց «Հայաստան» խմբակցության պատգամավոր Արծվիկ Մինասյանը։ Նշենք, որ այս նախագծով առաջարկվում է գործուն զղջալու հիմքով քրեական պատասխանատվությունից ազատելու իրավակարգավորումը բացառիկ դեպքերում կիրառել նաեւ ծանր կամ առանձնապես ծանր հանցանքների դեպքում։ Արդարադատության նախարար Գրիգոր Մինասյանն ասել էր, որ սրա անհրաժեշտությունը բխում է նախաքննական մարմինների եւ դատարանների ծանրաբեռնվածությունը նվազեցնելու նպատակից։ Արծվիկ Մինասյանը նշեց, որ այդ հակասություններն այնքան ակնառու են, որ անգամ պետական մարմինները, որոնք իրավասու են այս ոլորտում առաջարկություններ ներկայացնելու, իրենք են այդ մասին բարձրաձայնել։ «Մասնավորապես, Ազգային անվտանգության ծառայությունն արձանագրում է, որ անընդունելի է այս կարգավորումը, նպատակահարմար չէ, այն հանգեցնելու է կոռուպցիոն դրսեւորումների՝ իրավակիրառողին տալով լայն հնարավորություններ՝ անձին քրեական պատասխանատվությունից ազատելու համար։ Պատժի անխուսափելիության սկզբունքին է հակասում։ Բարձրագույն դատական խորհուրդն արձանագրում է, որ այն կիրառելի չէ եւ բերելու է քրեական պատասխանատվությունից առհասարակ ազատմանը՝ խախտելով պատժի համաչափության եւ անխուսափելիության սկզբունքը։ Այն չի համապատասխանում նաեւ արդարության եւ հանրայնության սկզբունքներին։ Նույնը վերաբերում է նաեւ Ներքին գործերի նախարարության տված կարծիքին, նույնը վերաբերում է վարչապետի աշխատակազմի երկու ստորաբաժանումների կողմից տրված կարծիքին։ Նման վտանգավորության արարք կատարած անձին պատասխանատվությունից ազատելը սկզբունքորեն ընդունելի չէ՝ ծանրաբեռնվածության նվազեցման վկայակոչմամբ։ Այսինքն՝ այն հիմնավորումները, որոնք այս նախագծով ներկայացվում են, նույնիսկ պետական մարմիններն են կոշտ արձագանքել»,- ասաց Արծվիկ Մինասյանը։ Նա նշեց, որ այս հարցն անպայման սահմանադրական բողոքարկման ինստիտուտ է անցնելու։ Ըստ նրա՝ եթե ծանրաբեռնվածության թեթեւացման խնդիր կա, քրեական դատավարությունում բազմաթիվ ինստիտուտներ կան՝ սկսած համաներումից։ «Բայց ոչ նման ձեւով ավերելով քրեական արդարադատությունը»,- հավելեց Մինասյանը։Նա նշեց, որ «Հայաստան» խմբակցությունը դեմ է քվեարկելու այս նախագծին։ Խորհրդարանը երկրորդ ընթերցմամբ եւ ամբողջությամբ ընդունեց նախագիծը։ Կողմ քվեարկեց 65, դեմ՝ 23 պատգամավոր։
12:51 - 12 հուլիսի, 2023
Բա հպարտորեն հայտարարում էիք՝ այսուհետ Սևանից հավելյալ ջրի բաց թողումը բացառելու եք․ Արծվիկ Մինասյան
 |tert.am|

Բա հպարտորեն հայտարարում էիք՝ այսուհետ Սևանից հավելյալ ջրի բաց թողումը բացառելու եք․ Արծվիկ Մինասյան |tert.am|

tert.am: Կառավարությունն ակնհայտ օրենքին ոչ համապատասխան առաջարկ է ներկայացնում Սևանա լճից լրացուցիչ  ջրառ կատարելու վերաբերյալ։ Այս մասին ԱԺ արտահերթ նիստում հայտարարեց «Հայաստան» խմբակցության քարտուղար Արծվիկ Մինասյանը։ Բնապահպանության նախկին նախարարը նախագծի հեղինակներին հիշեցրեց, որ 2019 թվականին օրենքի կարգավորումներով հնարավորություն կար ջրի բացասական հաշվեկշիռ լինելու դեպքում լրացուցիչ ջուր բաց թողնել, սակայն, իշխանությունն այդ կարգավորումը փոխել է։ «Բա հպարտորեն հայտարարություններ էինք անում և ասում՝ այսուհետ Սևանա լճից հավելյալ  ջրի բաց թողելը բացառվելու է բացասական բալանքի դեպքում։ Հիմա ինքներդ խախտում եք ձեր իսկ կողմից ընդունված  կանոնը և հայտարարում եք այլ բան։ Այս դեպքում օրենքն արգելում է դա անել»,- նշեց ընդդիմադիր պատգամավորը։ Մինասյանը նկատեց՝ Սևանա լճից հավելյալ ջուր վերցնելու համար նաև չի հայտարարվել, որ երաշտային տարի է, հանրապետությունում ջրի դեֆիցիտ կա։ Նշենք, որ ԱԺ արտահերթ նիստում քննարկվում է «Սևանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին օրենքի նախագիծը, որով կառավարությունն առաջարկվում է Սևանա լճից ջրառի 170 մլն խմ չափաքանակն ավելացնել մինչև 240 մլն խմ՝ պայմանավորված տարվա եղանակային պայմաններով, մեր ջրամբարների լցվածությամբ և գետերի ջրատվության հիմնական ցուցանիշներով։
12:37 - 11 հուլիսի, 2023