Գեղարքունիքի մարզ

Գեղարքունիքը մարզի կարգավիճակ ունեցող վարչատարածքային միավոր է Հայաստանի արեւելքում։

Սահմանակից է հյուսիսում՝ Տավուշի, արեւմուտքում՝ Կոտայքի եւ Արարատի, հարավում՝ Վայոց ձորի մարզերին, արեւելքում՝ Ադրբեջանի Հանրապետության Գետաբեկի, Դաշքեսանի եւ Թովուզի շրջաններին, հարավ-արեւելքում՝ Արցախի Հանրապետության Շահումյանի շրջանին:

Մասշտաբով երկրի ամենամեծ մարզն է, որի մարզկենտրոնն է հանդիսանում Գավառ քաղաքը: Մարզում է գտնվում Հայկական լեռնաշխարհի երեք խոշորագույն լճերից մեկը՝ Սեւանա լիճը:

Ոստիկանությունը հայտնում է COVID-ի դեմ պատվաստման կեղծ հավաստագրեր տալու դեպք բացահայտելու մասին

Ոստիկանությունը հայտնում է COVID-ի դեմ պատվաստման կեղծ հավաստագրեր տալու դեպք բացահայտելու մասին

Գեղարքունիքի մարզի Մարտունի քաղաքի ոստիկանությունը բերման է ենթարկել Երանոս գյուղի բուժամբուլատորիայի բուժքրոջը, ով քաղաքացիներին կորոնավիրուսի դեմ պատվաստված լինելու կեղծ հավաստագրեր է տվել: Այս մասին հաղորդագրություն է տարածել ՀՀ ոստիկանությունը: «Ոստիկանության Մարտունու բաժնի քրեական հետախուզության բաժանմունքի ծառայողները ծավալուն օպերատիվ-հետախուզական միջոցառումների շնորհիվ պաշտոնեական լիազորությունների չարաշահման վերաբերյալ տեղեկություններ ստացան, որոնք իրացրեցին Գեղարքունիքի մարզային վարչության գործընկերների հետ։ Ձեռք բերված տվյալների համաձայն` Երանոս գյուղի բուժամբուլատորիայի բուժքույրներից մեկը գյուղի բնակիչներից մի քանիսին տվել է «COVID-19» համավարակի դեմ պատվաստվելու կեղծ հավաստագրեր, այն պարագայում, երբ այդ անձինք չեն պատվաստվել։ Բուժքույրը բերման է ենթարկվել ոստիկանության Մարտունու բաժին ու խոստովանական բացատրություն տվել։ Օպերատիվ-հետախուզական ու քրեադատավարական միջոցառումները շարունակվում են։ Այս համատեքստում ոստիկանության պայքարը հետևողականորեն շարունակվելու է»,- ասված է հաղորդագրության մեջ։  Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
13:58 - 12 հոկտեմբերի, 2021
Կապահովվի Տավուշի, Շիրակի և Գեղարքունիքի մարզերում կառուցված ջրամատակարարման, ոռոգման համակարգերի շահագործումը

Կապահովվի Տավուշի, Շիրակի և Գեղարքունիքի մարզերում կառուցված ջրամատակարարման, ոռոգման համակարգերի շահագործումը

ՀՀ կառավարությունն այսօրվա նիստում չզեկուցվող հարցերի փաթեթով ընդունեց նախագիծ, որով կիրականացվի Տավուշի, Շիրակի  և Գեղարքունիքի մարզերում  առաջնային լուծում պահանջող հիմնախնդիրների լուծման նպատակով կառուցված ջրամատակարարման, ոռոգման համակարգերի գույքային իրավունքների գրանցումը և շահագործման հանձնումը: Ըստ կառավարության՝ նախագծի ընդունման անհրաժեշտությունը պայմանավորած է ՀՀ-ի և Միջազգային զարգացման ՕՊԵԿ հիմնադրամի փոխառության համաձայնագրերով իրականացված «Ենթակառուցվածքների և գյուղական ֆինանսավորման աջակցություն» ծրագրի շրջանակներում կառուցված ոռոգման համակարգերի, ջրամատակարարման համակարգերի շահագործումն ապահովելու անհրաժեշտությամբ: Որոշման կիրարկումը կապահովի  Տավուշի, Շիրակի  և Գեղարքունիքի մարզերում կառուցված, ջրամատակարարման, ոռոգման համակարգերի շահագործումը և այդ համակարգերով սպառողներին անխափան ջրամատակարարման իրականացումը:
11:10 - 07 հոկտեմբերի, 2021
Գեղարքունիքի մարզպետը  «Մարտական ծառայություն» պետական պարգեւներ հանձնեց Արցախյան վերջին պատերազմի մասնակիցներին

Գեղարքունիքի մարզպետը «Մարտական ծառայություն» պետական պարգեւներ հանձնեց Արցախյան վերջին պատերազմի մասնակիցներին

Գեղարքունիքի մարզպետ Կարեն Սարգսյանն այցելեց Ծովինար համայնք, որտեղ ԱՀ նախագահի հրամանագրով «Մարտական ծառայություն» մեդալներ հանձնեց 2020 թվականի սեպտեմբերի 27-ին հակառակորդի սանձազերծած լայնածավալ գործողությունների ընթացքում Արցախի Հանրապետության պետական սահմանը պաշտպանելիս ցուցաբերած արիության եւ խիզախության համար պարգեւատրված Սիմոն Ավետիսի Մելքոնյանին եւ Արգիշտի Ալֆենդրի Օհանյանին: Կարեն Սարգսյանը շնորհակալություն հայտնեց նախկին զինծառայողներին՝ 44-օրյա պատերազմի ընթացքում ցուցաբերած արիության եւ խիզախության համար: Մարզպետն իր երախտագիտությունը հայտնեց նաեւ պարգեւի արժանացած զինծառայողների ծնողներին՝ նման հայրենասեր զավակներ դաստիարակելու համար: Նույն համայնքում Գեղարքունիքի մարզպետն այցելեց եւ Ռոբերտ Սարգսի Աբրահամյանին հետմահու շնորհված «Մարտական ծառայություն» մեդալը հանձնեց նրա ծնողներին: Կարեն Սարգսյանը հիշատակի եւ երախտագիտության խոսքեր հնչեցրեց հերոսացած Ռոբերտ Աբրահամյանի հասցեին, խոսեց նրա մարտական գործողությունների, ցուցաբերած արիության մասին՝ նշելով, որ նման տղաների անձնուրացության շնորհիվ է, որ այսօր մենք ունենք 30-ամյա անկախ Հայաստանի Հանրապետություն: Գեղարքունիքի մարզպետը միաժամանակ պատրաստակամություն հայտնեց անհրաժեշտության դեպքում իր լիազորությունների շրջանակում աջակցել անմահացած զինծառայողների ընտանիքներին:
16:28 - 23 սեպտեմբերի, 2021
Նախարար Գնել Սանոսյանն ինձ ասել է՝ ձեր համայնքը ցրելու եմ, դու էլ դատվելու ես․ Գեղամասարի համայնքապետ Հակոբ Ավետյան |tert.am|

Նախարար Գնել Սանոսյանն ինձ ասել է՝ ձեր համայնքը ցրելու եմ, դու էլ դատվելու ես․ Գեղամասարի համայնքապետ Հակոբ Ավետյան |tert.am|

tert.am: Գեղարքունիքի մարզի մի շարք համայնքների բնակիչները փակել էին Սոթք-Վարդենիս ավտոճանապարհը՝ պահանջելով չեղարկել համայնքների խոշորացման որոշումը: Գեղամասարի համայնքապետ Հակոբ Ավետյանը նշեց՝ 18 գյուղերի 8000 բնակչի մասին է խոսքը, և իշխանությունների կողմից անտեսվում է բնակիչների կարծիքը: «Եթե ժողովուրդը պահանջ ունի, Կառավարությունը չի ուզում արձագանքել, ուզում է ուժ կիրառել, դա Կառավարության կողմից ուղիղ ճնշում է ժողովրդի վրա, այն ժողովրդի, որը սահմանին է ապրում»,-ասաց նա: Ըստ Գեղամասարի համայնքապետի՝ իր հանդեպ կատարվողը քաղաքական ենթատեքստ ունի: «Տարածքային կառավարման և ենթակառուցվածքների նախարար Գնել Սանոսյանն ինձ ասել է՝ ձեր համայնքը ցրելու եմ, դու էլ դատվելու ես: Ով իրենց հետ չէ, իրենց թշնամին են համարում: Եթե Հայաստանի խնդիրը ես եմ, որ ինձ դատեն, բոլոր հարցերը կլուծվեն, ես կամավոր կգնամ, «կնստեմ»: Այս կերպ իշխանությունները փորձում են ինձնից վրեժ լուծել, որովհետև ԱԺ ընտրություններին սատարել եմ Ռոբերտ Քոչարյանին»,-ասաց Ավետյանը: Բնակիչները որոշեցին այսօր բացել ավտոճանապարհը՝ պայմանով, որ եթե 1 օրվա ընթացքում Կառավարությունից պատշաճ արձագանք չստանան, կրկին կփակեն այն: Ավելին՝ tert.am-ում
11:51 - 16 սեպտեմբերի, 2021
Պատերազմի հետևանքները․ սահմանամերձ դարձած գյուղերում ապրելը կրկնակի բարդացել է

Պատերազմի հետևանքները․ սահմանամերձ դարձած գյուղերում ապրելը կրկնակի բարդացել է

Գորիս-Կապան ավտոճանապարհի երկու հատվածներ ադրբեջանական զինուժի կողմից փակելու եւ մի քանի օր Հայաստանից Սյունիքը կտրելու հերթական սթափեցնող հարվածը կրկին հանրությանը հիշեցրեց, որ պատերազմի հետեւանքները շարունակվում են, եւ սողացող պատերազմը ոչ միայն խարխլել է անվտանգային ողջ համակարգը, այլ նաեւ բացառել գյուղական համայնքներում զարգացման հնարավորություններն ու կենսական անհրաժեշտության ծրագրերը։ Սահմանամերձ համայնքներում այս տարի խոտի սակավության հարցը սրվել է հատկապես արոտավայրերի տարածքների կրճատման պատճառով։ Սակայն, խնդիրը կրկնապատկվում է նաեւ ոռոգման ցանցերի բացակայության հետեւանքով։ Արոտավայրերի կրճատման և սակավ խոտի պատճառով սպասվում է անասնագլխաքանակի կրճատում, ինչը հանգեցնելու է կաթնամթերքի, մսի ծավալի կրճատման, մթերքների գնաճի եւ դրանից բխող սոցիալական բազմաթիվ խնդիրների։ Պատերազմի հետևանքով սահմանամերձ դարձած համայնքների խնդիրներն առավել մանրամասն ներկայացված են ստորև(սեղմել նկարին)։
18:45 - 08 սեպտեմբերի, 2021
Ադրբեջանցիներն այրվող անիվներ են նետում Սոթք, Կութ, Ազատ, Նորաբակ համայնքների ուղղությամբ․ Թագուհի Թովմասյան

Ադրբեջանցիներն այրվող անիվներ են նետում Սոթք, Կութ, Ազատ, Նորաբակ համայնքների ուղղությամբ․ Թագուհի Թովմասյան

ԱԺ մարդու իրավունքների և հանրային հարցերի հանձնաժողովի նախագահ Թագուհի Թովմասյանը գրել է․ «Ահազանգ.  Քիչ առաջ կապ եմ հաստատել ՀՀ Գեղարքունիքի մարզի Գեղամասար խոշորացված համայնքի ղեկավար Հակոբ Ավետյանի հետ, որը հաստատեց, որ ադրբեջանցիները այրում են ՀՀ Գեղարքունիքի մարզի Սոթք, Կութ, Ազատ, Նորաբակ համայնքներին մոտ գտնվող տարածքների խոտածածկույթը: Իրավիճակն էլ ավելի է վատթարացել քամու պատճառով, որի արդյունքում հրդեհների մարման լրջագույն խնդիրներ են առաջացել: Ականատեսներ ենք ունեցել, որ ադրբեջանցիները այրվող անիվներ են նետում համայնքների ուղղությամբ՝ ստեղծելով էլ ավելի բարդ իրավիճակ համայնքների բնակիչների համար: Ակնկալում եմ, որ իրավասու օղակները արագ կարձագանքեն և քայլեր կիրականացնեն Ադրբեջանի սանձարձակ վարքագծին համարժեք արձագանք տալու առումով: Հիշեք, թշնամին հեռու է խաղաղասիրական թեզերից»:
15:34 - 01 սեպտեմբերի, 2021
Գեղարքունիքում ադրբեջանցի զինծառայողների առաջացրած հրդեհներն այրում են ոչ միայն արոտավայրերն ու խոտհարքները, այլ նաև խոտը, որ մարդիկ չարչարանքով հնձել, պաշարել են ձմեռվա համար․ ՄԻՊ

Գեղարքունիքում ադրբեջանցի զինծառայողների առաջացրած հրդեհներն այրում են ոչ միայն արոտավայրերն ու խոտհարքները, այլ նաև խոտը, որ մարդիկ չարչարանքով հնձել, պաշարել են ձմեռվա համար․ ՄԻՊ

ՄԻՊ Արման Թաթոյանը գրել է․ «Գեղարքունիքում ադրբեջանցի զինծառայողների գցած հրդեհներն այրում են ոչ միայն արոտավայրերն ու խոտհարքները, այլ նաև խոտը, որ մարդիկ չարչարանքով հնձել, պաշարել են ձմեռվա համար։ Օրինակ՝ Կութ գյուղի բնակիչներից մեկն այսօր՝ ժամը 17-ի սահմաններում ահազանգել է, որ ունի 4-5 հեկտար խոտհարք և հավաքել է մոտավորապես 500 հակ խոտ։ Հրդեհը ժամը 17-ի սահմաններում իր խոտի հակերից հեռու է եղել ընդամենը 4-5 մետր: Ահազանգերը նաև այն մասին են նաև, որ հրդեհների օջախները մարելուց հետո ադրբեջանական զինծառայողները նորից են դիտավորյալ հրդեհներ գցում։ Այսօր Գեղարքունիքի մարզի Կութ և Սոթք գյուղերից տարբեր ժամերի ահազանգեր ենք ստացել, որ այդ գյուղերի ուղղությամբ դեռևս օգոստոսի 29-ին ադրբեջանական զինծառայողների գցած հրդեհներն ավելի են ընդարձակվել և արդեն տարածվում են դեպի գյուղերը: Կան շատ վայրեր, որոնց մոտենալ հնարավոր չէ, քանի որ ադրբեջանական նշանառության ներքո են, իսկ մոտենալու դեպքում նրանք արձակում են կրակոցներ: Հրդեհների մարման աշխատանքներ են իրականացնում փրկարար ծառայողները, նրանց աջակցում են բնակիչները: Բայց համապատասխան տեխնիկա հնարավոր չէ օգտագործել բոլոր տեղերում, քանի որ հրդեհը տարածված է տեխնիկայի համար դժվար հասանելի բարձրադիր վայրերում։ Իսկ եղանակային պայմանների պատճառով հրդեհներն ավելի են տարածվում: Ուսումնասիրությունները ցույց են տվել, որ օրվա ընթացքում հաջողվել է մարել միայն Սոթքի ուղղությամբ հրդեհը: Ադրբեջանական զինծառայողների այս արարքների հետևանքով ոչնչացվում են քաղաքացիական բնակիչների պատկանող արոտավայրերն ու խոտհարքները, մարդիկ զրկվում են ապրուստի աղբյուրից, ինչն իր հերթին նպաստելու է մարդկանց սոցիալական խնդիրների ավելացմանը: Հաշվի առնելով նաև, որ ադրբեջանական զինված ուժերը ներխուժել ու տեղակայված են գյուղերի անմիջական հարևանությամբ՝ ՀՀ ինքնիշխան տարածքում, ապա հրդեհներն իրական վտանգ են ներկայացնում նաև գյուղերի քաղաքացիական բնակչության կյանքի, նրանց ողջ սեփականության համար: ՀՀ մարդու իրավունքների պաշտպանի աշխատակազմի կողմից ադրբեջանական զինված ուժերի արարքների փաստերը, ստուգումները, վկայում են, որ դրանք դառնում են ավելի ու ավելի վտանգավոր քաղաքացիական բնակիչների համար, ունեն մարդկանց վնաս պատճառելու ուղղակի դիտավորություն, դարձել են թիրախային, իսկ իրավունքների խախտումներն կրում են զանգվածային բնույթ»:
09:48 - 01 սեպտեմբերի, 2021
Երեկ հակառակորդը կրակել է Կութ գյուղի վրա․ վնասվել են տների տանիքները |armenpress.am|

Երեկ հակառակորդը կրակել է Կութ գյուղի վրա․ վնասվել են տների տանիքները |armenpress.am|

armenpress.am: Երեկ երեկոյան՝ օգոստոսի 27-ին, ադրբեջանական զինուժը կրակ է բացել Գեղարքունիքի մարզի Կութ սահմանամերձ գյուղի ուղղությամբ՝ թիրախավորելով քաղաքացիական բնակչությանը: Տեղեկությունը հաստատեց Կութ համայնքի ղեկավար Սիմա Չիտչյանը՝ նշելով, որ հակառակորդը կրակել է մարդկանց տների վրա՝ վնասելով տանիքները: «Մի քանի տանիք է ծակվել, մի քանի տան պատերն են քերծվել: Փառք Աստծո, ուրիշ վնաս չի եղել»,- ասաց Կութի համայնքապետը՝ հավելելով, որ իր տպավորությամբ՝ թշնամին դիտավորյալ հենց գյուղի ուղղությամբ էր կրակում: Չիտչյանի խոսքով՝ կրակոցները եղել են 22:00-ից 23:00-ն ընկած ժամանակահատվածում: Բարեբախտաբար, այդ ժամին դրսում ոչ ոք չի եղել և բնակիչներից որևէ մեկը չի տուժել: Կրակել են հրաձգային տարբեր զինատեսակներից՝ ինքնաձիգ, գնդացիր: Դրանից հետո կրակոցներ կամ այլ միջադեպեր չեն եղել: Այս պահին ընդհանուր վիճակը գյուղում, Սիմա Չիտչյանի խոսքով, հանգիստ է:
17:51 - 28 օգոստոսի, 2021