Վահագն Խաչատուրյան

Հայաստանի Հանրապետության 5-րդ նախագահ։

Վահագն Գառնիկի Խաչատուրյան (ապրիլի 22, 1959, Սիսիան, Հայկական ԽՍՀ, ԽՍՀՄ), հայ տնտեսագետ, քաղաքական և պետական գործիչ, Հայաստանի Հանրապետության բարձր տեխնոլոգիական արդյունաբերության նախկին նախարար։

1982-1992 թթ.- գիտամանկավարժական գործունեություն Երևանի Ժողվրդական տնտեսության ինստիտուտում։ 1982-1990 թթ. աշխատել է «Հրազդանմեքենա» արտադրական միավորումում՝ որպես տնտեսագետ, տնտեսական հետազոտությունների լաբորատորիայի վարիչ։ 1990-1992 թթ. եղել է «Մարս» արտադրական միավորման բաժնի վարիչ, գլխավոր տնօրենի տեղակալ։

1990-1995 թթ. - Երևանի քաղաքային խորհրդի պատգամավոր։

1992 թ. դեկտեմբերի 22-1996 թ. փետրվարի 22 - Երևանի քաղաքային խորհրդի գործադիր կոմիտեի նախագահ՝ Երևանի քաղաքապետ[2]։

1995-1999 թթ. - ՀՀ Ազգային ժողովի պատգամավոր։

1996-1998 թթ. - ՀՀ նախագահի խորհրդական։

2000 թ. - «Արմատ» ժողովրդավարության և քաղաքացիական հասարակության զարգացման կենտրոնի հիմնադիր անդամ։

2006 թ. - «Այլընտրանք» հասարակական-քաղաքական նախաձեռնության հիմնադիր անդամ։

2008-2013 թթ. - Հայ ազգային կոնգրեսի՝ Մալաթիայի տարածքային կառույցի ղեկավար, Կոնգրեսի տնտեսական հանձնախմբի անդամ։

Համոզված եմ, որ ձեր այցը նոր շունչ կհաղորդի մեր հարաբերություններին. Վահագն Խաչատուրյանը՝ Լիտվայի նախագահին

Համոզված եմ, որ ձեր այցը նոր շունչ կհաղորդի մեր հարաբերություններին. Վահագն Խաչատուրյանը՝ Լիտվայի նախագահին

Հանրապետության նախագահի նստավայրում այսօր տեղի է ունեցել պաշտոնական այցով Հայաստան ժամանած Լիտվայի Հանրապետության նախագահ Գիտանաս Նաուսեդայի դիմավորման պաշտոնական արարողությունը: Հայաստանի նախագահ Վահագն Խաչատուրյանը և տիկին Անահիտ Մինասյանը դիմավորել և ողջունել են Լիտվայի նախագահ Գիտանաս Նաուսեդային և տիկին Դիանա Նաուսեդիենեին: Զինվորական նվագախմբի կատարմամբ հնչել են Հայաստանի և Լիտվայի պետական օրհներգերը։ Նախագահները միմյանց են ներկայացրել երկու երկրների պաշտոնական պատվիրակություններին: Այնուհետև տեղի է ունեցել Հայաստանի և Լիտվայի նախագահների առանձնազրույցը, որին հաջորդել է երկու երկրների պատվիրակությունների հանդիպումն ընդլայնված կազմով: Հայաստանի նախագահը ողջունելով հյուրերին նշել է. «Ինձ համար մեծ պատիվ է Ձեզ ընդունել նախագահական նստավայրում: Ձեր պաշտոնական այցը իսկապես կարևոր է մեր պետության համար: Սա նաև լավ հնարավորություն է, որ մենք միմյանց անձամբ ճանաչենք և, որ ամենակարևորն է՝ մեր երկրները ներկայացնենք և ուղիներ գտնենք եղած ներուժն օգտագործել՝ մեր բարեկամական դարավոր կապերն ամրապնդելու և զարգացնելու համար: Համոզված եղեք, որ Լիտվան մեր երկրի, մեր քաղաքացիների շրջանում համարվում է իսկապես բարեկամական երկիր: Մենք ձեր անցած ճանապարհը, ձեր պատմությունը շատ լավ գիտենք, և այդ պատմության մեջ մենք շատ նմանություններ ունենք: Լինելով փոքր երկրներ, մենք միշտ պայքարել ենք մեր անկախության, ազատության համար: Դա մեր ժողովուրդների գլխավոր նպատակն է եղել, և մենք հասել ենք մեր նպատակներին, և այսօր հնարավորություն ունենք՝ որպես անկախ պետություններ կերտել մեր ապագան: Մենք պետք է նայենք դեպի ապագա: Համոզված եմ, որ ձեր այցը նոր շունչ կհաղորդի մեր հարաբերություններին»: Լիտվայի նախագահ Գիտանաս Նաուսեդան շնորհակալություն է հայտնել ջերմ ընդունելության համար և նշել. «Սա իմ առաջին այցն է Ձեր գեղեցիկ երկիր, և շատ լավ հնարավորություն է Ձեզ հրավիրել Վիլնյուս այս տարի: Ինչպես նշեցիք, տարիների ընթացքում Հայաստանը մի շարք ձեռքբերումներ է ունեցել և կցանկանայի նաև ներկայացնել իմ երկրի ձեռքբերումները: Իմ գլխավորած պատվիրակության այցի նպատակն է ամրապնդել մեր հարաբերությունները, փորձել միմյանց ավելի լավ հասկանալ»: Լիտվայի նախագահը նշել է նաև, որ տարածաշրջանում խաղաղության և կայունության համար շատ կարևոր է երկխոսությունը ու փոխըմբռնման մթնոլորտի ձևավորումը: «Ինչպես գիտեք նախքան այստեղ գալս եղել եմ նաև Ադրբեջանում: Այնտեղ փորձել ենք հասկանալ իրենց դիրքորոշումը, այստեղ արդեն փորձում ենք հասկանալ ձեր մոտեցումներն ու դիրքորոշումը: Երկխոսությունն ու փոխըմբռնումը շատ կարևոր է, քանի որ առաջ շարժվելու այլ ճանապարհ չկա»: Հանդիպմանն անդրադարձ է եղել հայ-լիտվական տնտեսական կապերի խթանմանը վերաբերող հարցերի: Նշվել է, որ հեռանկարային կարող է լինել համագործակցությունը հատկապես գյուղատնտեսության, սննդի արդյունաբերության, բարձր տեխնոլոգիաների, էներգետիկ, տրանսպորտային ոլորտներում: Գոհունակությամբ արձանագրվել է Վիլյնուս-Երևան ուղիղ թռիչքների առկայության փաստը, որը նպաստում է երկու երկրների ժողովուրդների շփումների ակտիվացմանը և գործարար կապերի հաստատմանը:  
Այսօր 14:38
Լիտվան աջակցում է Հայաստանի և Ադրբեջանի միջև համաձայնություն ձեռք բերելուն. Գիտանաս Նաուսեդա

 |armenpress.am|

Լիտվան աջակցում է Հայաստանի և Ադրբեջանի միջև համաձայնություն ձեռք բերելուն. Գիտանաս Նաուսեդա |armenpress.am|

armenpress.am: Լիտվան աջակցում է Հայաստանի և Ադրբեջանի միջև համաձայնություն ձեռք բերելուն: Այս մասին հայտարարեց Լիտվայի Հանրապետության նախագահ Գիտանաս Նաուսեդան Երևանում ՀՀ նախագահ Վահագն Խաչատուրյանի հետ հանդիպումից հետո լրատվամիջոցների համար համատեղ հայտարարության ժամանակ: Սա Լիտվայի նախագահի առաջին այցելությունն է Հայաստան: Նա նշեց՝ տպավորված է հյուրընկալությամբ: Նաուսեդան  հիշեցրեց՝ 1991 թվականին Լիտվան առաջին երկիրն էր, որ ճանաչեց Հայաստանի անկախությունը: «Այդ ժամանակից առ այսօր մենք օժանդակել ենք ձեր ջանքերին, ինչպես նաև ժողովրդավարական արժեքներին ձեր անցումին: Լիտվան օժանդակում է Արևելյան գործընկերության ծրագրերին: Լիտվան օժանդակում է Հայաստանի ինտեգրմանը եվրոպական ընտանիքին»,- ասաց Նաուսեդան՝ հավելելով, որ իրենք ՀՀ-ԵՄ հարաբերություններում լայն շրջանակ են ներկայացնում: Լիտվայի նախագահը ողջունեց Հայաստանի կառավարության ջանքերը հատկապես արդարադատության համակարգում: «Մենք ցանկանում ենք, որ դուք շարունակեք ժողովրդավարության այս ճանապարհը, որ կհանգեցնի ձեր սոցիալ-տնտեսական զարգացմանը»,- ասաց նա: Նաուսեդան անդրադարձավ նաև Հայաստանի և Ադրբեջանի հարաբերությունների հարցին: «Լիտվան օժանդակում է Հայաստանի և Ադրբեջանի միջև համաձայնություն ձեռք բերելուն»,-ասաց Լիտվայի նախագահը՝ ընդգծելով, որ ԵՄ խորհրդի նախագահ Շառլ Միշելի ջանքերը նույնպես  ուղղված են դրան: Նա նշեց, որ առավոտյան հնարավորություն է ունեցել ծաղիկներ դնել Հայոց ցեղասպանության զոհերի հուշահամալիրին: «Սա մի բան է, որը երբևիցե ոչ մի ձևով այս երկրագնդի վրա չպետք է կրկնվի»,- նշեց Նաուսեդան: Նա անդրադարձավ նաև Ուկրաինայի իրավիճակին: Նա ընդգծեց, որ ազատությունը ողջ ժողովրդավարական աշխարհի համար չափազանց կարևոր է՝ հավելելով, որ ամեն ձևով պետք է օժանդակել ուկրաինացիներին: Լիտվայի նախագահը վստահություն հայտնեց, որ իր այցելությունը կօժանդակի Հայաստանի և Լիտվայի, երկու երկրների ժողովուրդների միջև հարաբերությունների խորացմանը: Նա այս առումով մեծ ներուժ է տեսնում: Նաուսեդան հավատում է, որ երկկողմ հարաբերությունների տարբեր ոլորտներում՝ բիզնեսի, մշակույթի, կրթության և բազմաթիվ այլ ոլորտներում կարելի է երկու կողմից էլ օգուտ ստանալ:
Այսօր 14:01
Նաուսեդան կաջակցի Ադրբեջանի վերահսկողության տակ անցած հայկական մշակութային ժառանգության պահպանմանը

 |armenpress.am|

Նաուսեդան կաջակցի Ադրբեջանի վերահսկողության տակ անցած հայկական մշակութային ժառանգության պահպանմանը |armenpress.am|

armenpress.am: Լիտվայի Հանրապետության նախագահ Գիտանաս Նաուսեդան ՀՀ նախագահ Վահագն Խաչատուրյանի հետ զրույցում խոստացել է ամեն կերպ աջակցել՝ Ադրբեջանի վերահսկողության տակ անցած՝ Արցախի հայկական մշակութային ժառանգության պահպանմանը:   Երևանում հանդիպումից հետո նախագահները լրատվամիջոցների համար հանդես եկան հայտարարությամբ՝ ամփոփելով իրենց քննարկման արդյունքները: Վահագն Խաչատուրյանն ընդգծեց, որ երկրների միջև բարձրաստիճան այցերը վկայում են դարերի խորքից եկող ամուր կապերի և նույնական արժեհամակարգի վրա խարսխված հարաբերությունների շարունակականության, ինչպես նաև երկկողմ համագործակցությունն առավել ընդհանուր ընդլայնելու վճռականության մասին: Նախագահները հանդիպմանը հանգամանալից քննարկել են հայ-լիտվական հարաբերությունների ներկա վիճակն ու հեռանկարները, ինչպես նաև երկկողմ բարեկամական հարաբերություններին առնչվող օրակարգային հարցերի լայն շրջանակ: «Վերահաստատվեց միջպետական հարաբերությունները խորացնելու երկուստեք պատրաստակամությունը: Հատուկ անդրադարձ կատարվեց երկկողմ տնտեսական համագործակցության խորացման և առևտրաշրջանառության ծավալների ավելացման հնարավորություններին: Այդ համատեքստում քննարկվեցին արդյունաբերության, ՏՏ-ի, վերականգնողական էներգիայի, գյուղատնտեսության և այլ ոլորտներում փոխգործակցության հեռանկարները»,- ասաց Խաչատուրյանը: Նախագահները քննարկել են նաև տարածաշրջանում հարատև խաղաղության հաստատմանն ուղղված Հայաստանի ջանքերը: «Լիտվայի և Հայաստանի ջանքերն այս հարցում նույնական են: Հատուկ ընդգծվեց Արցախում և Ադրբեջանի վերահսկողության տակ գտնվող  հայկական մշակութային կոթողների պահպանման անհրաժեշտությունը: Նախագահ Նաուսեդան խոստացավ ամեն կերպ աջակցել հայկական քրիստոնեական մշակութային ժառանգության պահպանմանը»,-ասաց ՀՀ նախագահը: Այս համատեքստում կարևորվել է ՅՈՒՆԵՍԿՕ-ի փորձագիտական առաքելության այցը Արցախի՝ Ադրբեջանի վերահսկողության տակ անցած տարածքներում: Նախագահները քննարկմանն անդրադարձ են կատարել նաև ՀՀ-ԵՄ գործընկերության օրակարգին և դրա շրջանակներում իրականացվող ծրագրերին:
Այսօր 13:47
Նախագահ Վահագն Խաչատուրյանն ընդունել է Իտալիայի խորհրդարանական պատվիրակությանը

Նախագահ Վահագն Խաչատուրյանն ընդունել է Իտալիայի խորհրդարանական պատվիրակությանը

Հանրապետության նախագահ Վահագն Խաչատուրյանն այսօր ընդունել է Իտալիայի Պատգամավորների պալատի անդամ, Միջխորհրդարանական Միությունում Իտալիա-Հայաստան հարաբերությունների բաժնի ղեկավար Ջուլիո Չենտեմերոյի գլխավորած պատվիրակությանը:Հանրապետության նախագահը ողջունել է հյուրերին և նշել, որ Հայաստանի և Իտալիայի բարեկամական հարաբերությունների զարգացման գործում մեծ ներդրում ունեն նաև խորհրդարաններում գործող բարեկամության խմբերը։ Ջուլիո Չենտեմերոն նշել է, որ Հայաստանը մեծ ջանքեր է գործադրել և գնում է ժողովրդավարության ճանապարհով, չնայած երբեմն լինում են բարդ իրավիճակներ, սակայն ժողովրդավարությունը դժվարին և պատասխանատու ճանապարհ է, որով պետք է առաջ ընթանալ: Երկուստեք կարևորվել է երկկողմ հարաբերությունների օրակարգը հարստացնելու և առկա ներուժն ամբողջությամբ իրացնելու անհրաժեշտությունը։ Այս համատեքստում ընդգծվել է, որ Հայաստանի և Իտալիայի միջև դիվանագիտական հարաբերությունների 30-ամյակը նոր էջ բացելու հնարավորություն է ընձեռում՝ ամբողջովին այլ որակ հաղորդելու երկկողմ համագործակցությանը տարբեր ոլորտներում, այդ թվում՝ առևտուրի, զբոսաշրջության, կրթության և մշակույթի։ Հանդիպմանն անդրադարձ է եղել նաև տարածաշրջանային և անվտանգային խնդիրներին, Արցախի հիմնախնդրին, ինչպես նաև միջազգային արդի մարտահրավերներին:  
21:08 - 19 մայիսի, 2022
Նախագահ Խաչատուրյանը պետական պարգև է հանձնել ՀՀ-ում Սուրբ Աթոռի առաքելական նվիրակ Ժոզե Ավելինու Բետանկուրին

Նախագահ Խաչատուրյանը պետական պարգև է հանձնել ՀՀ-ում Սուրբ Աթոռի առաքելական նվիրակ Ժոզե Ավելինու Բետանկուրին

Հանրապետության նախագահի հրամանագրով, Հայաստանի Հանրապետության հետ բարեկամական հարաբերությունների հաստատման, ամրապնդման և զարգացման, համամարդկային արժեքների պաշտպանության գործում ներդրած նշանակալի ավանդի համար Հայաստանում Սուրբ Աթոռի առաքելական նվիրակ արքեպիսկոպոս Ժոզե Ավելինու Բետանկուրը պարգևատրվել էր Երախտագիտության մեդալով:Այս մասին հայտնում են Հայաստանի Հանրապետության նախագահի աշխատակազմից։ Մայիսի 17-ին նախագահ Վահագն Խաչատուրյանը պետական այդ պարգևը հանձնել է Ժոզե Ավելինու Բետանկուրին: Վահագն Խաչատուրյանը նշել է, որ մեծ ուրախությամբ է հանձնում Հայաստանի Հանրապետության պետական պարգևը, որը լավագույնս է արտահայտում Հայաստանի և Սուրբ Աթոռի միջև բարեկամական հարաբերությունների ամրապնդման և զարգացման գործում Ժոզե Ավելինու Բետանկուրի ունեցած նշանակալի ավանդը։ «Համոզված եմ, որ Սուրբ Աթոռի և Հայաստանի հարաբերությունների հետագա զարգացման համար որևէ խոչընդոտ չի առաջանա, քանի որ դա երաշխավորվում է ամենաբարձր մակարդակով և այնպիսի մարդկանց մասնակցությամբ ինչպիսին Դուք եք»,- ասել է նախագահ Խաչատուրյանը՝ շնորհավորելով և հաջողություններ մաղթելով Հայաստանում Սուրբ Աթոռի առաքելական նվիրակին: Ժոզե Ավելինու Բետանկուրը շնորհակալություն է հայտնել բարձր գնահատանքի համար և նշել, որ իր համար մեծ պատիվ է աշխարհում առաջին քրիստոնյա երկրի նախագահի կողմից նման պարգևի արժանանալ:
19:28 - 17 մայիսի, 2022
ՀՀ նախագահն ու Ֆուկուսիմա Մասանորին մտքեր են փոխանակել հայ-ճապոնական երկկողմ օրակարգի և փոխգործակցության խորացման շուրջ

ՀՀ նախագահն ու Ֆուկուսիմա Մասանորին մտքեր են փոխանակել հայ-ճապոնական երկկողմ օրակարգի և փոխգործակցության խորացման շուրջ

Հանրապետության նախագահ Վահագն Խաչատուրյանը մայիսի 17-ին ընդունել է Հայաստանում Ճապոնիայի արտակարգ և լիազոր դեսպան Ֆուկուսիմա Մասանորիին: Այս մասին  հայտնում են նախագահի աշխատակազմից։ Դեսպան Ֆուկուսիմա Մասանորին շնորհավորել է Վահագն Խաչատուրյանին Հանրապետության նախագահի պաշտոնը ստանձնելու կապակցությամբ և մաղթել արդյունավետ աշխատանք: Դեսպան Մասանորին նշել է, որ այս տարի լրանում է Ճապոնիայի և Հայաստանի միջև դիվանագիտական հարաբերությունների հաստատման հոբելյանական 30-ամյակը: Այս համատեքստում զրուցակիցներն անդրադարձել են դիվանագիտական հարաբերությունների հաստատումից ի վեր ձևավորված միջպետական ամուր հարաբերություններին ու դրանց զարգացման հեռանկարներին, մտքեր փոխանակել հայ-ճապոնական երկկողմ օրակարգի և փոխգործակցության խորացման շուրջ:    
15:06 - 17 մայիսի, 2022
Վահագն Խաչատուրյանն ընդունել է Ռուսաստանի սպորտի նախարար Օլեգ Մատիցինին

Վահագն Խաչատուրյանն ընդունել է Ռուսաստանի սպորտի նախարար Օլեգ Մատիցինին

Հանրապետության նախագահ Վահագն Խաչատուրյանը մայիսի 14-ին ընդունել է Ռուսաստանի Դաշնության սպորտի նախարար Օլեգ Մատիցինին: Հանդիպմանը ներկա էր նաև Ռուսաստանի թենիսի ֆեդերացիայի նախագահ Շամիլ Տարպիշչևը: Ինչպես հայտնում են նախագահի աշխատակազմից, կարևորելով Ռուսաստանի հետ սպորտի ոլորտում համագործակցության ընդլայնումն ու համատեղ ծրագրերի իրականացումը՝ նախագահ Վահագն Խաչատուրյանը ներկայացրել է համատեղ սպորտային մարզումներ իրականացնելու, տարբեր մարզաձևերում փոխգործակցությունն ընդլայնելու Հայաստանի հնարավորությունները։ Նա նշել է, որ Ռուսաստանի սպորտի նախարար Օլեգ Մատիցինի այցը Հայաստան կարևոր է և լրացուցիչ խթան կհաղորդի համատեղ ծրագրերի ընդլայնմանը և նոր հնարավորությունների ստեղծմանը: Նախագահ Վահագն Խաչատուրյանն ընդգծել է, որ Հայաստանը մեծ կարևորություն է տալիս սպորտի զարգացմանը և հետևողական ջանքեր է գործադրում հատկապես մարզական մասսայական ծրագրերի իրականացման ուղղությամբ: Օլեգ Մատիցինը շնորհակալություն է հայտնել ընդունելության համար և նշել՝ շատ ուրախ են տեսնել, որ Հայաստանը մեծ ջանքեր է ներդնում սպորտի զարգացման գործում և շարունակում է մի շարք նշանակալի ձեռքբերումներ գրանցել տարբեր միջազգային մրցաշարերում: Ռուս նախարարը նշել է, որ պատրաստ են անել ամեն հնարավորը՝ ընդլայնելու ու խորացնելու եղբայրական երկրների միջև հարաբերությունները, որոնք հազարամյակների հիմքեր ունեն: Հանդիպմանը քննարկվել է սպորտի տարբեր բնագավառներում համատեղ ծրագրերի, ուսումնամարզական հավաքների կազմակերպմանը, սպորտային ենթակառուցվածքների զարգացմանը վերաբերող մի շարք հարցեր:
14:10 - 14 մայիսի, 2022
Նախագահ Խաչատուրյանն ու վարչապետ Փաշինյանը ցավակցական հեռագիր են հղել ԱՄԷ նախագահ շեյխ Խալիֆա բին Զայեդ ալ Նահյանի մահվան կապակցությամբ

Նախագահ Խաչատուրյանն ու վարչապետ Փաշինյանը ցավակցական հեռագիր են հղել ԱՄԷ նախագահ շեյխ Խալիֆա բին Զայեդ ալ Նահյանի մահվան կապակցությամբ

Հանրապետության նախագահ Վահագն Խաչատուրյանն ու վարչապետ Նիկոլ Փաշինյանը ցավակցական հեռագիր են հղել Աբու Դաբի Էմիրության թագաժառանգ, ԱՄԷ զինված ուժերի գերագույն հրամանատարի տեղակալ շեյխ Մուհամմադ Բին Զայեդ Ալ Նահյանին՝ Արաբական Միացյալ Էմիրությունների նախագահ շեյխ Խալիֆա բին Զայեդ ալ Նահյանի մահվան կապակցությամբ:  «Շեյխ Խալիֆա բին Զայեդ ալ Նահյանն իր հայրենասիրությամբ և իմաստուն առաջնորդությամբ հետևողական քայլեր է ձեռնարկել երկրի բարգավաճման, կայուն զարգացման և հզորացման համար: Այս դժվարին պահին կիսում եմ Ձերդ Վսեմության և Արաբական Միացյալ Էմիրությունների բարեկամ ժողովրդի վիշտը, մաղթում համբերություն և ոգու արիություն»,-  նշված է նախագահ Խաչատուրյանի ցավակցական հեռագրում։ «Խոր ցավով ստացա Արաբական Միացյալ Էմիրությունների նախագահ շեյխ Խալիֆա բին Զայեդ Ալ Նահյանի մահվան լուրը: Շեյխ Խալիֆա բին Զայեդ Ալ Նահյանն իր հմուտ և հեռատես առաջնորդությամբ հիրավի անգնահատելի ներդրում է ունեցել երկրի զարգացման և զորացման գործում:     Կիսելով այս մեծ կորստի վիշտը՝ Հայաստանի Հանրապետության ժողովրդի և անձամբ իմ անունից խորին ցավակցություններ եմ հղում Ձերդ վսեմությանը, հանգուցյալի հարազատներին և Արաբական Միացյալ Էմիրությունների բարեկամ ժողովրդին՝ այս դժվարին պահին մաղթելով տոկունություն և ոգու ամրություն»,- ասված է վարչապետ Նիկոլ Փաշինյանի ցավակցական հեռագրում։ 
19:20 - 13 մայիսի, 2022
Տեղի է ունեցել ՀՀ փոխվարչապետի և մի քանի նախարարների երդման արարողությունը

Տեղի է ունեցել ՀՀ փոխվարչապետի և մի քանի նախարարների երդման արարողությունը

Նախագահական նստավայրում ՀՀ նախագահ Վահագն Խաչատուրյանի և վարչապետ Նիկոլ Փաշինյանի ներկայությամբ տեղի է ունեցել փոխվարչապետ Համբարձում Մաթևոսյանի, Արտակարգ իրավիճակների նախարար Արմեն Փամբուխչյանի, Շրջակա միջավայրի նախարար Հակոբ Սիմիդյանի և Բարձր տեխնոլոգիական արդյունաբերության նախարար Ռոբերտ Խաչատրյանի երդման արարողությունը: Ինչպես հայտնում են վարչապետի աշխատակազմից, վերջիններս ընթերցելով երդման տեքստը՝ նշել են.  «Հանուն համազգային նպատակների իրականացման և հայրենիքի հզորացման՝ երդվում եմ բարեխղճորեն կատարել ժողովրդի առջև ունեցած պարտավորություններս, պահպանել Հայաստանի Հանրապետության Սահմանադրությունը և օրենքները, նպաստել Հայաստանի Հանրապետության ինքնիշխանության և շահերի պահպանմանը, հավատարիմ մնալ Կառավարության անդամի բարձր կոչմանը»: Երդման արարողության ավարտին Նիկոլ Փաշինյանը և Վահագն Խաչատուրյանը շնորհավորել են փոխվարչապետին ու նախարարներին՝ մաղթելով բեղմնավոր ու արգասաբեր աշխատանք՝ ի շահ հայրենիքի և ժողովրդի:
15:40 - 13 մայիսի, 2022