Ազգային ժողով

ՀՀ Սահմանադրության համաձայն Ազգային ժողովը ժողովրդի ներկայացուցչական մարմինն է: Այն իրականացնում է օրենսդիր իշխանությունը: Ազգային ժողովը վերահսկողություն է իրականացնում գործադիր իշխանության նկատմամբ, ընդունում է պետական բյուջեն եւ իրականացնում է Սահմանադրությամբ սահմանված այլ գործառույթներ: Ազգային ժողովի լիազորությունները սահմանվում են Սահմանադրությամբ եւ այն գործում է իր կանոնակարգին համապատասխան: Խորհրդարանն ընտրվում է 5 տարի ժամկետով, կազմված է առնվազն 101 անդամից։

Այժմ գործում է 8-րդ գումարման ազգային ժողովը, որը բաղկացած է 106 պատգամավորից, որոնցից 71-ը՝ «Քաղաքացիական պայմանագիր» խմբակցությունից, 28-ը՝ «Հայաստան» խմբակցությունից, 7-ը՝ «Պատիվ ունեմ» խմբակցությունից։ ԱԺ գործող նախագահը Ալեն Սիմոնյանն է։

Ատելությունը սնդիկի նման թունավոր է, որը թափվելուց հետո շատ դժվար է հավաքել. Սոնա Ղազարյանի ելույթը ԵԽԽՎ-ում

Ատելությունը սնդիկի նման թունավոր է, որը թափվելուց հետո շատ դժվար է հավաքել. Սոնա Ղազարյանի ելույթը ԵԽԽՎ-ում

ԵԽԽՎ լիագումար նստաշրջանում ելույթ է ունեցել ԵԽԽՎ-ում ՀՀ ԱԺ պատվիրակության անդամ Սոնա Ղազարյանը: Այս մասին տեղեկացնում է ՀՀ ԱԺ-ն։ Ելույթը՝ ստորև․  «Ես բարձր եմ գնահատում այս զեկույցը՝ լավ գրված եւ ճիշտ ժամանակին: Քաղաքական կուսակցությունները, ի թիվս այլ գործող սուբյեկտների, պատասխանատվություն են կրում ատելության, ռասիզմի եւ քսենոֆոբիայի դեմ պայքարում: Սակայն այսօր մենք հաճախ ենք տեսնում, որ քաղաքական կուսակցությունները դրա փոխարեն կառուցում են իրենց նախընտրական արշավները, հռետորաբանությունը, երբեմն էլ՝ գործողություններն ատելության, ռասիզմի եւ այլատյացության վրա: Դա տեղի է ունենում Եվրոպայում եւ Եվրոպայի սահմաններից դուրս: Երբեմն նման քաղաքական կուսակցություններն ու նրանց առաջնորդները հայտնվում են սեփական ծուղակում: Նրանք ատելությունն այնքան են տարածում եւ ամրապնդում, որ հետո չգիտեն, թե ինչպես պետք է վերահսկել եւ հաղթահարել այն ատելությունը, որը նրանք ստեղծել են եւ սերմանել: Հատկապես վտանգավոր է, երբ անմիջական հարեւանությամբ ապրող հասարակության նկատմամբ է տարածվում ու քարոզվում նման ահռելի ատելություն: Եւ ավելի վտանգավոր է, երբ գոյություն ունի չլուծված հակամարտություն, որը, միեւնույն ժամանակ, խաղաղ կարգավորման կարիք ունի՝ նկատի ունեմ Լեռնային Ղարաբաղի հակամարտության եւ Ադրբեջանում համակարգային հայատյացության համատեքստում: Դուք շատ լավ գիտեք Բաքվի Ռազմավարի պուրակի դեպքը, որը փառաբանում է պատերազմը, պատկերում գերության մեջ գտնվող հայ զինվորներին, որտեղ նվաստացնում են մարդկային արժանապատվությունը եւ անմարդկային դարձնում հայերին: Նույնիսկ դպրոցականներին են տարել այդ այգի: Սա պետության կողմից հովանավորվող ատելության եւ ռասիզմի դեպք էր: Հայ զինվորների մանեկենները հանվել են միայն ժամանակ, երբ Հայաստանը դիմում է ներկայացրել Արդարադատության միջազգային դատարան՝ Ռասայական խտրականության բոլոր ձեւերի վերացման մասին կոնվենցիայի հիման վրա: Արդարադատության միջազգային դատարանն արդեն ներկայացրել է միջանկյալ որոշում՝ կոչ անելով Ադրբեջանին «ձեռնարկել բոլոր անհրաժեշտ միջոցները՝ կանխելու ռասայական ատելության եւ խտրականության հրահրումն ու խթանումը, այդ թվում՝ իր պաշտոնյաների եւ հասարակական հաստատությունների կողմից, որոնք ուղղված են հայազգի կամ էթնիկական ծագման անձանց նկատմամբ»: Ցանկանում եմ ձեր ուշադրությունը հրավիրել այն փաստի վրա, որ Արդարադատության միջազգային դատարանը հայտարարել է, որ հենց Ադրբեջանում պաշտոնյաներն ու հասարակական կառույցներն են հրահրում եւ քարոզում ատելություն հայերի նկատմամբ: Ես կարծում եմ, որ Եվրոպայի խորհուրդը եւ իր խորհրդարանական վեհաժողովը նույնպես պետք է բարձրաձայնեն եւ պետական մակարդակով ատելության խոսքը, ռասիզմը եւ այլատյացությունն ուղղակիորեն կոչեն իրենց անուններով, եւ մենք պետք է միասին պայքարենք դրա դեմ, քանի որ ատելությունը սնդիկի նման թունավոր է, որը թափվելուց հետո շատ դժվար է հավաքել»,- իր ելույթում ասել է Սոնա Ղազարյանը:
12:52 - 22 հունիսի, 2022
Պետական նախկին, ներկա և ապագա պաշտոնյաներն այլևս չեն կարող հարստանալ հանրության ու պետության զարգացման հաշվին. Հակոբ Արշակյան

Պետական նախկին, ներկա և ապագա պաշտոնյաներն այլևս չեն կարող հարստանալ հանրության ու պետության զարգացման հաշվին. Հակոբ Արշակյան

ՀՀ ԱԺ փոխնախագահ Հակոբ Արշակյանը ֆեյսբուքյան էջում գրառում է արել` արձագանքելով մամուլում շրջանառվող, իր անվան հետ կապված որոշ լուրերի: «Վերջին երկու օրում մամուլում իմ անվան հետ կապված, միանգամից երկու նյութեր հայտնվեցին. մեկն այն մասին էր, թե որտեղից մինչև իմ` 2018 պետական պաշտոնի` Տրանսպորտի, կապի և ՏՏ նախարարի առաջին տեղակալ նշանակվելը, իմ կողմից հայտարարագրած դրամական միջոցները։ Այս կապակցությամբ ցանկանում եմ տեղեկացնել, սկսած 2010 թվականից` աշխատել եմ բարձր տեխնոլոգիաների ոլորտում համաշխարհային առաջատար ընկերություններից մեկում, իսկ 2014 թվականից ղեկավարել եմ նույն ընկերության տարածաշրջանային գործընկերների ծրագիրը, որն ընդգրկում էր Հնդկաստան, ԱՊՀ, Արաբական երկրներ, Աֆրիկա տարածաշրջանը, և ստացել եմ համապատասխան վարձատրություն, որը շատ ավելին էր, քան իմ այժմյան աշխատավարձն է։ Ահա թե որտեղից իմ հայտարարագրած դրամական միջոցները։ Ինքնին հասկանալի է, որ նյութը գրողների մոտ տարակուսանք է առաջացել, թե ինչպես են մարդիկ առանց պետական պաշտոն զբաղեցնելու կարողանում գումար աշխատել, չէ որ նախկինում միջոցները անշարժ գույքը հայտնվում էին պաշտոնին զուգընթաց։ Այս մասով արդեն իսկ գործարկված է «Ապօրինի գույքի բռնագանձման մասին» ՀՀ օրենքը, և պետական նախկին, ներկա և ապագա պաշտոնյաներն այլևս չեն կարող հարստանալ հանրության ու պետության զարգացման հաշվին։ Երկրորդ նյութն այն մասին էր, թե իբրև ինձ սպասարկող մեքենան «ճռիկներ» է անում Ազատության հրապարակում։ Այս մասով ցանկանում եմ հանրությանը տեղեկացնել, որ երեկ մասնակցել եմ Երևանի պետական համալսարանի շրջանավարտների հանդիսավոր արարողությանը, և Ազատության հրապարակի` տեսանյութում երևացող հատվածը տվյալ ժամանակահատվածում նախատեսված է եղել մեքենաների կայանման համար, որտեղ և կայանվել է նաև ինձ սպասարկող մեքենան։ Բոլորիդ լավ տրամադրություն և հրաշալի աշխատանքային օր եմ մաղթում»,- գրել է նա։   Հետևե՛ք մեզ նաև Telegram-ում
10:19 - 16 հունիսի, 2022
Խորհրդարանը հաստատեց 2021 թ․-ի բյուջեի կատարման տարեկան հաշվետվությունը

Խորհրդարանը հաստատեց 2021 թ․-ի բյուջեի կատարման տարեկան հաշվետվությունը

Խորհրդարանը այսօր հաստատեց 2021 թ․-ի բյուջեի կատարման տարեկան հաշվետվությունը․ այն հաստատվեց 68 կողմ, 0 դեմ ձայներով։ Հաշվետվության քննարկման ընթացքում Ֆինանսների նախարար Տիգրան Խաչատրյանը հայտարարել էր, որ 2021 թ. պետական բյուջեն հաստատվել եւ իրականացվել է Կառավարության գործունեության ծրագրի նպատակներին համապատասխան: «Այդ սահմաններում իրականացված հարկաբյուջետային քաղաքականությունն ուղղված է եղել մակրոտնտեսական կայունության երաշխավորմանը, աճի եւ զարգացման ներուժի ավելացմանը, սոցիալական եւ տնտեսական տարբեր ծրագրերի միջոցով առաջնահերթ խնդիրների կարգավորմանը»։ Նշենք, որ այսօր ընթացան ՀՀ  8-րդ գումարման Ազգային ժողովի երրորդ նստաշրջանի վերջին նիստերը․ ՀՀ օրհներգի հնչյունների ներքո նստաշրջանն ավարտվեց։ Խորհրդարանի չորրոդ նստաշրջանը կմեկնարկի սեպտեմբերին։
17:18 - 15 հունիսի, 2022
Թե՛ Ռոբերտ Քոչարյանը, թե՛ Սերժ Սարգսյանը չեն առաջնորդվել «Արցախը երբեք չի լինելու Ադրբեջանի կազմում» սկզբունքով․ Փաշինյան

Թե՛ Ռոբերտ Քոչարյանը, թե՛ Սերժ Սարգսյանը չեն առաջնորդվել «Արցախը երբեք չի լինելու Ադրբեջանի կազմում» սկզբունքով․ Փաշինյան

ՀՀ վարչապետ Նիկոլ Փաշինյանը ԱԺ-ում պետական բյուջեի կատարման տարեկան հաշվետվության ժամանակ ասաց, որ պետական բյուջեի քննարկումներում առանձնակի տեղ է զբաղեցրել Արցախը և 2021 թ․-ից ՀՀ կառավարության կողմից Արցախին հատկացված աջակցությունը։ Այս համատեքստում պիտի նորից ընդգծեմ, որ 2021 թ․-ի ողջ ընթացքում ծայրահեղ ընդդիմությունը երկու հիմնական թեզ էր զարգացնում․ առաջինը , որ կառավարությունը միայնակ է թողել Արցախին, և երկրորդը նրանք պահանջում էին որդգրել Արցախը երբեք չի լինելու Արդբեջանի կազմում բանաձևը, փորձելով հիմնավորել, որ հենց սա է եղել իրենց իշխանավարման տարիներին իրենց կողմից իրականացվող քաղաքականությունը և եթե այսօրվա իշխանությունը սա չի որդեգրում, ուրեմն դավաճանություն է գործում Արցախի հարցում։ Այսօր ծայրահեղ ընդդիմության դիրքում գտնվում են մարդիկ, ովքեր 1998-ից միչնչև 2018 թվականը եղել են իշխանության ղեկին և նրանք են զարգացնում վերոնշյալ թեզերը։ Փաշինյանն անդրադարձավ վերոնշյալ երկու թեզերին․ «Առաջին թեզը հերքվում է հենց միայն բյուջետային ցուցանիշներով։ 2021-2022 թ․-ի Արցախի բյուջեն հասել է աննախադեպ մեծության և ՀՀ կառավարության բյուջետային աջակցությունը Արցախին հասել է աննախադեպ մեծության։ 2019 թվականին Արցախի բյուջեն կազմել է 117.9 միլիարդ դրամ, որն ամենաբարձրն է եղել մինչպատերազմական ողջ շրջանում,  այսինքն՝ 90-ականներից սկսած։ այս գումարից 57.8 միլիարդը Հայաստանի կառավարությունն է վճարել։ 2021 –ին Արցախի բյուջեն եկամտային մասը եղել է 174 միլիարդ դրամ, որից 128 միլիարդ դրամը ՀՀ վճարած գումարն է։ Այսինքն հետպատերազմական շրջանում Արցախի բյուջեն պատմական ամենաբարձրն է եղել, Արցախը երբեք ավելի մեծ բյուջե չի ունեցել և ՀՀ-ն երբեք ավելի մեծ ծավալով Արցախին աջակցություն չի տրամադրել»։ Նրա խոսքով՝ ՀՀ-ի աջակցությունը Արցախին 2021 թ,-ին աճել է 122 %-ով 2019 թ․-ի համեմատ իսկ Արցախի բյուջեն ընդհանուր առմամբ աճել է 48%-ով կամ 45 միլարդ դրամով։ 2021 թ․-ի Արցախի բյուջեի 73%-ը վճարել է ՀՀ կառավարությունը և 2021 թ․-ին կառավարության աջակցությունը Արցախի բյուջեին ավելին է եղել, քան 2019 թ․-ի Արցախի ամբողջ բյուջեն։  Վարչապետն ընդգծեց՝ Հայաստանի կառավարությունը եղել է, կա ու  կլինի Արցախի կողքին, ինչքան էլ որոշ շրջանակներ չնկատեն դա կամ փորձեն Հայաստանի և Արցախի միջև հակասություններ սերմանել։ «Արցախ-Հայաստան հակասություններ սերմանելու համար արմատական ընդդիմությունը, որն ինչպես ասացի 1998 թ․-ից 2018 թ․-ը եղել է իշխանության ղեկին և Լեռնային Ղարաբաղի հակամարտության բանակցային գործընթացի պատասխանատուն է հանդիսացել, փորձում է ներկայացնել, թե իրենց իշխանության տարիներին առաջնորդվել են «Արցախը երբեք չի լինելու Ադրբեջանի կազմում» կարգախոսով ու ռազմավարությամբ և քանի որ այս իմաստով մեր արմատական ընդդիմադիրները հատել են բոլոր հնարավոր սահմանները, ստիպված եմ հիասթափեցնող լուր հայտնել, այդ պնդումները կատարյալ սուտ են, որովհետև բանակցային գործընթացի ողջ ընթացքում թե Ռոբերտ Քոչարյանը, թե Սերժ Սարգսյանը և թե նրանց քաղաքական արբանյակ Դաշնակցությունը Արցախը ճանաչել են որպես Ադրբեջանի մաս և կամ չեն առաջնորդվել Արցախը երբեք չի լինելու Ադրբեջանի կազմում սկզբունքով»։  Փաշինյանը ասաց, որ նման պատասխանատու հայտարարություն անելու համար պետք է հիմնավորում ունենա․ «Նման պատասխանատու հայտարարությունը պետք է հիմնավորված լինի։ 1998 թ․-ի նոյեմբերի 25-ին Հայաստանի այն ժամանակվա իշխանությունը Ռոբերտ Քոչարյանի գլխավորությամբ համաձայնվել է որպես բանակցությունների հիմք ընդունել համանախագահների կողմից ներկայացված այսպես կոչված ընդհանուր պետություն առաջարկը, որում ասվում է․ «ԼՂ-ն հանրապետական ձևի պետական տարածքային կազմավորում է, և Ադրբեջանի հետ մասին կազմավորում է ընդհանուր պետություն նրա միջազգայնորեն ճանաչված սահմաններում»։ Մյուս մեջբերումը․ «ԼՂ քաղաքացիները որպես անձը հաստատող վկայական կունենան Արդբեջանի անձնագիր՝ ԼՂ հատուկ նշումով»։  Նա նշեց՝ այս մասին իմացել են թե Ռոբերտ Քոչարյանը և թե Սերժ Սարգսյանը և թե Դաշնակցությունը։ «Տարօրինակ է, թե ինչու համանախագահության այս առաջարկին նրանք չեն արձագանքել, թե «Արցախը երբեք չի լինելու Արդբեջանի կազմում»։ Ընդհակառակը, վերը հիշատակված տարբերակը հիմք ընդունելով՝ նրանք չեն բացառել, որ Արցախը կարող է լինել Ադրբեջանի կազմում, այլև համաձայնել են բանակցային փաթեթի առանցքային տրամաբանությանը, որ Արցախը պիտի լինի Ադրբեջանի կազմում՝ Ադրբեջանի տարածքային ա,մբողջականության շրջանակում։ Նրանք այս քայլով արհամարհել են 1991 թ,-ի սեպտեմբերի 2-ի Արցախի ընդունած անկախության հռչակագիրը և դեկտեմբերի 2-ի անկախության հանրաքվեն»։ Ըստ նրա՝ ընդհանուր պետության փաթեթին հաջորդել է տարածքների փոխանակման փաթեթը․ «Ուզում եմ ընդգծել,որ այդ բանակցային փաթեթով ՀՀ այն ժամանակվա կառավարիչները Արցախը ճանաչել են որպես Ադրբեջանի մաս, որովհետև նշված փաթեթի իմաստն այն է, որ ՀՀ-ն Ադրբեջանին է հանձնում Մեղրիի շրջանը և փոխարենը ստանում է ԼՂ-ն»։  Ըստ վարչապետի՝ այս իրողությունները ավելի են ամրապնդվել Մադրիդյան սկզբունքների քննարկման ընթացքում։» Մադրիդյան սկզբունքները հիմք ընդունելով ՀՀ ղեկավարները Արցախը ընդունել են Ադրբեջանի մաս և բացառել Արցախի՝ Ադրբեջանի կազմից դուրս լինելու որևէ գործնական հնարավորություն»։
15:25 - 15 հունիսի, 2022
Վրանները հավաքել են՝ լավ են արել, ինչի՞ են փախել ԱԺ-ից, ինչի չեն վերադառնում. Անդրանիկ Քոչարյանը՝ ընդդիմությանը
 |news.am|

Վրանները հավաքել են՝ լավ են արել, ինչի՞ են փախել ԱԺ-ից, ինչի չեն վերադառնում. Անդրանիկ Քոչարյանը՝ ընդդիմությանը |news.am|

news.am: Վրանները հավաքելը շատ կարևոր որոշում էր: Այս մասին ԱԺ-ում լրագրողների հետ ճեպազրույցի ժամանակ ասաց ԱԺ «Քաղաքացիական պայմանագիր» խմբակցության պատգամավոր, Պաշտպանության և անվտանգության հանձնաժողովի նախագահ Անդրանիկ Քոչարյանը։ Վերջինս նշեց, որ ընդդիմությունը ճիշտ գնահատեց ստեղծված իրավիճակը և բացեց ճանապարհը։ Հարցին՝ ընդդիմությունը ասում է, որ իրենց պայքարը արդարացված է եղել, քանի որ իշխանությունը փաստաթուղթ պետք է ստորագրեր, և ընդդիմությանը հաջողվել է Արցախի ժողովրդին համախմբել և ոտքի հանել: Անդրանիկ Քոչարյանն ասաց. «Լու՞րջ եք ասում: Ինչի մինչև էդ Արցախի ժողովուրդը համախմված չէր, իրենք պետք է համախմբեին: Իրենց էին սպասում: Թե մի քանի հոգու, որ Արցախից բերել են գործուղման, շարժմանը մասնակից դարձնելու՝  ըստ էության որևէ արդյունք չարձանագրելով: Իրենք իրենց երեկվա որոշումը պետք է արձանագրեին որպես հաղթանակ: Հաղթանակի մեջ պետքա տեսնեն այն, որ իրենք չլինեին Հայաստանի Հանրապետությունը պետք է ոչնչացված լիներ:Բայց դա այդպես չի: Մենք ասում ենք՝ Հայաստանին համերաշխություն է պետք, իսկ համերաշխության հարթակը ԱԺ է: Ինչի՞ են փախել ԱԺ-ից, ինչի՞ չեն վերադառնում»,- ասաց նա: Անդրանիկ Քոչարյանի կարծիքով՝ եթե ընդդիմությունը ցանկանում է ապագայում իշխանություն դառնալ, ապա պետք է շարժվի սահմանադրության պահանջներով: Անդրադառնալով հարցին, որ իշխանության բախտը բերել է, որ մնացել է դեռևս իշխանության այն բանի համար, որ իրենց հրաժարականը պահանջողները Ռոբերտ Քոչարյանն ու Սերժ Սարգսյանն է, Անդրանիկ Քոչարյանն ասաց, որ այդ ամենը թող «Դաշնակցությունն» ու «Պատիվ ունեմ»-ը հասկանան, իրենք հասկանալու խնդիր չունեն: «Մենք շարժվում ենք ժողովրդի տված մանդատների պահանջով»,- ասաց նա:   Հետևե՛ք մեզ նաև Telegram -ում
13:41 - 15 հունիսի, 2022
Լրացուցիչ կետ կտեղադրվի այսօր գործող մաքսակետից քիչ հեռավորության վրա․ Սանոսյանն անդրադարձավ Վերին Լարսի իրավիճակին

Լրացուցիչ կետ կտեղադրվի այսօր գործող մաքսակետից քիչ հեռավորության վրա․ Սանոսյանն անդրադարձավ Վերին Լարսի իրավիճակին

Ազգային ժողովում՝ 2021 թ․-ի պետական բյուջեի կատարման տարեկան հաշվետվության ընթացքում «Քաղաքացիական պայմանագիր» խմբակցության պատգամավոր Խաչատուր Սուքիասյանը, դիմելով Տարածքային կառավարման և ենթակառուցվածքների նախաիրար Գնել Սանոսյանին, ասաց՝ մամուլում լուրեր են շրջանառվում, որ Վերին Լարսի մաքսակետում հազարավոր հայկական մեքենաներ են կուտակված։ Պատգամավորը նախարարից խնդրեց մեկնաբանել այս լուրերը և տեղեկացնել, թե որքան կտևի իրավիճակը։ Գնել Սանոսյանն էլ ասաց՝ բոլորովին վերջերս էկոնոմիկայի նախարարը, ՏԿԵ նախարարի տեղակալը և ՊԵԿ-ի ներկայացուցիչները հանդիպել են ռուսական և վրացական կողմի գործընկերների հետ և քննարկումներ են ունեցել իրավիճակը բարելավելու ուղղությամբ․ «Կարծես հետևյալ պայմանավորվածությունն ունեն։ Մոտ ժամանակներս ՌԴ կառավարության համապատասխան որոշմամբ լրացուցիչ կետ կտեղադրվի այսօր գործող մաքսակետից քիչ հեռավորության վրա, որը օրվա ընթացքում 170-200 մեքենա կարող է սպասարկել, նաև որոշակի արտոնություն կլինի ԵԱՏՄ երկրների համար։ Ընդ որում, արտոնությունը շատ ավելի մեծ է ԵԱՏՄ երկրների համար, մասնավորապես մեզ համար, բայց այնտեղ մեկ հերթի որոշակի խնդիր կա։ Մեքենաների քանակը հիմա բավական մեղմվել է։ Մենք խնդիր ունենք ժամանակի, նաև Ռուսաստանից դեպի Վրաստան անցնելու ուղղությամբ, որտեղ գրեթե խնդիր չկա։ Լավագույն դեպքում մեկ օր են մեքենաները այնտեղ մնում, իսկ այս ուղղությամբ մեքենաների քանակը 400-500-ի սահմաններում է, այսինքն՝ այնքան մեծ չի։ Կարծում եմ՝ նշված հազարավոր  մեքենաները ամբողջ Վրաստանում բոլոր երկրների մեքենաների մասին է, ոչ թե մեր»,-ասաց Սանոսյանը։
12:57 - 15 հունիսի, 2022
Գործադիրը փոփոխություն է առաջարկում Դատական օրենսգրքում

Գործադիրը փոփոխություն է առաջարկում Դատական օրենսգրքում

Ներպետական ատյանների վեճի սպառումից ու ներպետական դատական ակտի կայացումից մինչև Մարդու իրավունքների եվրոպական դատարանի վերջնական ակտի կայացում անցնում է տևական ժամանակ: Այս հանգամանքով է պայմանավորված ՄԻԵԴ-ի վճռի ուսումնասիրության արդյունքում կարգապահական խախտման հատկանիշներ հայտնաբերելու դեպքում մինչև 15 տարվա վաղեմության ՄԻԵԴ վճռի պայմանի նախատեսումը: Այս մասին հայտնում է ԱԺ-ն։ «Հայաստանի Կառավարությունը փոփոխություններ ու լրացում է նախատեսում Դատական օրենսգրքում: ՀՀ արդարադատության նախարարի տեղակալ Գրիգոր Մինասյանը տեղեկացրել է, որ օրինագծի նախնական տարբերակով առաջարկվում էր ՀՀ մասնակցությամբ միջազգային դատարանի ակտով բացահայտված խախտումը դիտարկել որպես դատավորի պաշտոնի անհամատեղելության հիմք` հնարավորություն ընձեռելով այդ հիմքով դադարեցնել դատավորի լիազորությունները: Սակայն Վենետիկի հանձնաժողով ներկայացված նախագիծը վերջինիս կարծիքի հիման վրա լրամշակվել է` սահմանելով այլ կառուցակարգ: Այն դեպքում, երբ դատավորի կողմից արդարադատություն իրականացնելիս թույլ տված խախտումը հայտնաբերվել է ՄԻԵԴ-ի վճռի ուսումնասիրության արդյունքում, կարգապահական վարույթ չի կարող հարուցվել, եթե ՄԻԵԴ-ի վճռի ուժի մեջ մտնելուց հետո անցել է 15 տարի: Գրիգոր Մինասյանի խոսքով` 2008 թ. մինչև 2018 թ. ընկած ժամանակահատվածում մի շարք գործեր են հարուցվել ՄԻԵԴ-ում, որոնցից մի քանիսը դեռևս քննվում են, և արձանագրվել են Մարդու իրավունքների եվրոպական կոնվենցիայի խախտումներ: Պատգամավոր Արուսյակ Ջուլհակյանի հարցին ի պատասխան` փոխնախարարը պարզաբանել է, որ բոլոր վարույթ հարուցող մարմիններն իրավասություն ունեն ՄԻԵԴ-ի արձանագրած` մարդու իրավունքների խախտման դեպքում վարույթ հարուցել: Դա վերաբերում է ՄԻԵԴ-ի կայացրած այն վճիռներին, որտեղ կոնկրետ կարձանագրվի, որ մարդու իրավունքների խախտումը դատավորի դիտավորության կամ կոպիտ անփութության հետևանքով է տեղի ունեցել: Այսինքն` լիազոր մարմինը պետք է ուսումնասիրի ՄԻԵԴ-ի որոշումը և արձանագրի` արդյոք ՄԻԵԴ-ն ամրագրե՞լ է, որ կոնկրետ դատական շղթայում տեղի ունեցած գործընթացում խախտվել է մարդու իրավունքը, և արդյո՞ք դա եղել է դատավորի պատճառով` միտումնավոր կամ կոպիտ անփութության հետևանքով»,-տեղեկացնում են խորհրդարանից։ 
18:47 - 14 հունիսի, 2022
Պատգամավոր Լիլիթ Մինասյանը ԱՊՀ երիտասարդական միջխորհրդարանական ֆորումում բարձրաձայնել է Սբ Ղազանչեցոցի կրկնակի ռմբակոծության փաստը

Պատգամավոր Լիլիթ Մինասյանը ԱՊՀ երիտասարդական միջխորհրդարանական ֆորումում բարձրաձայնել է Սբ Ղազանչեցոցի կրկնակի ռմբակոծության փաստը

2020 թ. հոկտեմբերի 8-ին Ադրբեջանի կողմից Սուրբ Ամենափրկիչ Ղազանչեցոց եկեղեցու կրկնակի ռմբակոծության, դրա հետեւանքով եկեղեցու սրբապատկերների, ինչպես նաեւ եկեղեցու տարածքում գտնվող արձանների ու խաչքարերի ավերման փաստը Սանկտ Պետերբուրգում անցկացված ԱՊՀ անդամ պետությունների երիտասարդական միջխորհրդարանական ֆորումի ընթացքում բարձրաձայնել է ՀՀ պատվիրակության անդամ, ֆորումի զեկուցող, պատգամավոր Լիլիթ Մինասյանը՝ հրավիրելով ԱՊՀ գործընկերների ուշադրությունը: Այս մասին հայտնում է ԱԺ-ն։ «Պատգամավորը շեշտել է, որ ծայրահեղ մտահոգիչ է Ադրբեջանի կողմից եկեղեցու ճարտարապետական տեսքի փոփոխումը, որի միակ նպատակը հուշարձանի հայկական լինելու փաստի կոծկումն է: Լիլիթ Մինասյանն անդրադարձ է կատարել ադրբեջանցիների կողմից Շուշի քաղաքի Սուրբ Հովհաննես Մկրտիչ եկեղեցու (Կանաչ ժամ) զանգակատունն ու գմբեթը հանցավոր դիտավորությամբ պայթեցնելուն, ինչպես նաեւ Հայրենական մեծ պատերազմի ժամանակ զոհված հայերի պատվին կանգնեցված հուշարձանները ոչնչացնելուն: Նա շեշտել է, որ երկխոսության միջոցով փոխադարձ ատելության, ագրեսիայի, անհանդուրժողականության մթնոլորտի բացառումը պետք է դառնա այսօրվա երիտասարդության եւ ապագա սերունդների գլխավոր առաքելությունը: Նշենք, որ հունիսի 9-10-ը Սանկտ Պետերբուրգում անցկացվում էր ԱՊՀ անդամ պետությունների երիտասարդական միջխորհրդարանական ֆորումը: Միջոցառումը կրում էր «Երիտասարդ խորհրդարանականներ՝ հայացք դեպի Համագործակցության ապագանե խորագիրը: Ֆորումին, որը նվիրված էր Անկախ պետությունների համագործակցության 30-ամյակին եւ ԱՊՀ երիտասարդական միջխորհրդարանական վեհաժողովի 10-ամյակին, Հայաստանի պատվիրակության կազմում մասնակցել են պատգամավորներ Լիլիթ Մինասյանը, Արեն Մկրտչյանը, Էմմա Պալյանը եւ Ազգային ժողովի աշխատակազմի երիտասարդ ներկայացուցիչներ: Պատվիրակությունը մասնակցել է հետեւյալ թեմաներով կլոր-սեղան քննարկումներին. «Օրենսդրական գործունեության փաստացի ուղղություններն ու երիտասարդների իրավունքների ու շահերի ապահովումը», «Երիտասարդական հանրային դիվանագիտություն. միջտարածաշրջանային համագործակցություն եւ ԱՊՀ երկրների ընդհանուր շահեր», «Երիտասարդությունը եւ ռուսաց լեզուն. ԱՊՀ-ում ազգամիջյան հաղորդակցության լեզվի պահպանման եւ զարգացման մեթոդներ»: Խորհրդարանականները Տավրիդյան պալատում մասնակցել են ԱՊՀ երիտասարդական միջխորհրդարանական վեհաժողովի հերթական նիստին: Նիստի օրակարգում գլխավոր թեման ԱՊՀ երկրներում երիտասարդության դերն էր մշակութային ժառանգության պահպանման եւ ժողովրդական արվեստի զարգացման գործում»։
18:14 - 14 հունիսի, 2022
Լաոյի փնտրտուքները շարունակելու դեպքում մեծացնելու են հետագայում պատերազմի վերսկսման հավանականությունը․ Անդրանիկ Քոչարյան |1lurer.am|

Լաոյի փնտրտուքները շարունակելու դեպքում մեծացնելու են հետագայում պատերազմի վերսկսման հավանականությունը․ Անդրանիկ Քոչարյան |1lurer.am|

1lurer.am: ՀՀ ԱԺ «Քաղաքացիական պայմանագիր» խմբակցության պատգամավոր Անդրանիկ Քոչարյանը խորհրդարանի ամբիոնից անդրադարձավ ընդդիմության ակցիաներին ու դրանց հետևանքներին: «Արդեն գրեթե 2 ամիս է՝ Ֆրանսիայի հրապարակում շարունակվում են ընդդիմության սակավամարդ հանրահավաքները, որոնք չունեն որևէ բովանդակային օրակարգ և որոնք միայն նպատակ ունեն խաթարելու մեր պետության ներքին կայունությունը: Հանրահավաքներին շատ է հնչում «Զարթնի՛ր, լաո» ժողովրդական երգը, որը որևէ աղերս չունի ո՛չ ցույցերի, ո՛չ դրանց հետապնդած նպատակների հետ: «Զարթնի՛ր, լաոն» ի սկզբանե կոչ էր՝ ուղղված արտաքին թշնամու դեմ միասնական պայքար ու դիմադրություն կազմակերպելուն, իսկ այժմ ընդդիմադիրների ձեռքով այն դարձել է անհասկանալի փողոցային պայքարի, ներքին թշնամանք հրահրելու գործիք, որը, այդուհանդերձ, ընդդիմության համար ցանկալի արդյունք չի ապահովում: Պատճառը մեկն է՝ պայքարի արհեստածին նպատակներն ու կեղծ օրակարգը, խաղաղ ցույցերի փոխարեն մայրաքաղաքի փողոցներում ականատես ենք լինում կազմակերպված զանգվածային անկարգությունների և քաղաքային անդորրը խարխլող գործողությունների: Իրական լաոն միշտ է արթուն: Դա տեսանելի էր դեռևս 2020 թվականին, երբ պատերազմի ընթացքում մեր փառքով ընկած հերոսներն ու նրանց ողջ մնացած ծառայակիցները պայքարում էին մեր պետության միակ՝ արտաքին թշնամու դեմ՝ երաշխավորելով մեր երկրի անվտանգ ապագայի հեռանկարները: Իսկ ընդդիմության լաոյի փնտրտուքները մեր պետության համար ոչ միայն որևէ դրական արդյունքի չեն հանգեցնելու, այլև շարունակվելու դեպքում մեծացնելու են հետագայում պատերազմի վերսկսման հավանականությունը»,- ասաց Քոչարյանը:  
17:21 - 14 հունիսի, 2022
ՌԴ ռազմական նշանակության գործող տիեզերական սարքերի ռետրանսլյատորների թողունակության ռեսուրսը համաձայնագրով տրամադրվում է կողմերին. քննարկում ԱԺ-ում
 |1lurer.am|

ՌԴ ռազմական նշանակության գործող տիեզերական սարքերի ռետրանսլյատորների թողունակության ռեսուրսը համաձայնագրով տրամադրվում է կողմերին. քննարկում ԱԺ-ում |1lurer.am|

1lurer.am: ««Ռազմական նշանակության արբանյակային կապի համակարգերի օգտագործման և դրանց հետագա կատարելագործման մասին» համաձայնագիրը վավերացնելու մասին» օրենքի նախագիծը քննարկվել է հունիսի 14-ի ԱԺ հերթական նիստում: ՀՀ պաշտպանության նախարարի տեղակալ Արման Սարգսյանի խոսքով՝ համաձայնագրի նպատակն է՝ դրա մասնակից պետությունների զինված ուժերի կառավարման հուսալիության ամրապնդումը և ԶՈՒ-երի միջև փոխգործակցության կապերի կազմակերպումը, որն իրականացվում է այդ թվում ԱՊՀ մասնակից պետությունների ռազմական նշանակության կապի արբանյակային ինտեգրված համակարգի ստեղծման միջոցով՝ դրա ազգային սեգմենտների ծավալմամբ՝ նկատի ունենալով համաձայնեցված տեխնիկական պահանջները: Ռուսաստանի Դաշնության ռազմական նշանակության գործող տիեզերական սարքերի ռետրանսլյատորների թողունակության ռեսուրսը համաձայնագրով տրամադրվում է կողմերին՝ ելնելով համաձայնագրի մասնակից պետությունների ԶՈՒ կառավարման և նրանց ԶՈՒ ռազմական կառավարման մարմինների փոխգործակցության կապերի կազմակերպման շահերից: Ռեսուրսի օգտագործումն ապահովվում է համաձայնագրի մասնակից պետությունների ԶՈՒ-ի կողմից ՌԴ զինված ուժերում կիրառման համար թույլատրված ռազմական նշանակության արբանյակային կապի երկրային կայանների շահագործման հիմքով: Ռեսուրսի օգտագործման ոլորտում համաձայնությունները, այդ թվում՝ ռազմատեխնիկական աջակցության գծով դրա անհատույց տրամադրման հնարավորությունը կայացվում են երկկողմ համաձայնագրերով, որոնք կնքվում են Ռուսաստանի Դաշնության պաշտպանության նախարարության և համաձայնագրի մասնակից պետությունների պաշտպանական գերատեսչությունների միջև: Փոխնախարարն ընդգծել է, որ Հայաստանի Հանրապետությունը միանում է համաձայնագրին՝ պայմանով, որ Հայաստանի Հանրապետությունն առանձին որոշում կկայացնի «Ռազմական նշանակության արբանյակային կապի համակարգերի օգտագործման և դրանց հետագա կատարելագործման մասին» համաձայնագրի դրույթների տարածման վերաբերյալ այն պետությունների նկատմամբ, որոնք կմիանան սույն համաձայնագրին:
15:14 - 14 հունիսի, 2022
Նախագիծ․ սահմանված ժամկետում ԱՊՊԱ կնքելու դեպքում վարորդը կազատվի իրավախախտման համար տուգանքի 75 տոկոսը վճարելուց

Նախագիծ․ սահմանված ժամկետում ԱՊՊԱ կնքելու դեպքում վարորդը կազատվի իրավախախտման համար տուգանքի 75 տոկոսը վճարելուց

Ազգային ժողովն այսօր՝ հերթական քառօրյայի ընթացքում առաջին ընթերցմամբ քննարկեց Վարչական իրավախախտումների վերաբերյալ  օրենսգրքում փոփոխություն եւ լրացում կատարելու մասին հարցը, որը հեղինակել են «Քաղաքացիական պայմանագիր» խմբակցության պատգամավորներ Արմեն Խաչատրյանը, Քրիստինե Պողոսյանը և Լիլիթ Կիրակոսյանը։ Նախագծի հիմնական զեկուցող Արմեն Խաչատրյանն ասաց՝ Վարչական իրավախախտումների վերաբերյալ օրենսգրքի գործող կարգավորումներով պատասխանատվություն է նախատեսվում այն տրանսպորտային միջոցների սեփականատերերի նկատմամբ, որոնք չունեն ԱՊՊԱ պայմանագիր․ «Եթե տրանսպորտային միջոցի սեփականատերը չունի ԱՊՊԱ պայմանագիր, ապա յուրաքանչյուր տաս օրվա համար պետք է տուգանվի 5000 դրամի չափով, բայց ոչ ավել, քան տարվա մեջ 100.000 դրամը։ Այսինքն՝ ոստիկանությունը պարտավոր է յուրաքանչյուր տաս օրը մեկ, այն տրանսպորտային միջոցների սեփականատերերի նկատմամաբ, ովքեր չունեն ԱՊՊԱ պայմանագիր, կայացնել վարչական տույժ նշանակելու մասին որոշում՝ 5000 դրամի չափով և ուղարկել հասցեատիրոջը»։Իսկ 100.000 դրամ տուգանք է սահմանվում այն վարորդների նկատմամբ, ովքեր վարում են տրանսպորտային միջոցը առանց ԱՊՊԱ պայմանագրի։Պատգամավորն ընդգծեց՝ վերլուծելով կառավարության քաղաքականությունը այս ոլորտում, համարում են, որ նշանակված 100.000 դրամները խիստ անհամաչափ են արարքի վտանգավորության բնույթին և աստիճանին․ «100.000 դրամը այսօր բավականին ծանր սոցիալական բեռ է, և եթե հաշվի առնենք այն հանգամանքը, որ այս իրավախախտմանը նպաստող հիմնական պատճառը հենց անձի ֆինանսական դրությունն է, ապա պետք է փաստենք, որ տույժը խիստ անհամաչափ է սահմանված իրավախախտման բնույթին և աստիճանին»։ Նախագծով պատգամավորներն առաջարկում են, որ ԱՊՊԱ չկնքած տրանսպորտային միջոցի սեփականատերերի նկատմամբ վարչական արձանագրություններով նշանակված տույժերի չափը տարեկան չգերազանցի 50.000 դրամը այսօրվա 100.000 դրամի փոխարեն։ Իսկ 100.000 դրամ տուգանք սահմանվելու դեպքում անձը ազատվում է այդ տուգանքի 75% վճարման պարտականությունից, եթե 24 ժամվա ընթացքում վերացնում է իրավախախտման հատկանիշները․ «Այսինքն՝ եթե արձանագրությունը կազմելուց հետո 24 ժամվա ընթացքում ներկայացնում է ԱՊՊԱ պայմանագիր, ապա վճարում է սահմանված 100.000 դրամի 25%-ը»։
12:48 - 14 հունիսի, 2022
Քրեակատարողական հիմնարկներում ըստ անվտանգային գոտիների կլինեն բժշկական ստորաբաժանումներ

 |armenpress.am|

Քրեակատարողական հիմնարկներում ըստ անվտանգային գոտիների կլինեն բժշկական ստորաբաժանումներ |armenpress.am|

armenpress.am: ՀՀ ազգային ժողովը երկրորդ ընթերցմամբ քննարկեց Քրեակատարողական նոր օրենսգիրքը, որով, ի թիվս այլ փոփոխությունների, նախատեսվում է, որ քրեակատարողական հիմնարկներում լինելու են 3 անվտանգային գոտիներ, չեն լինելու բուժական ուղղիչ հիմնարկներ, դրա փոխարեն քրեակատարողական հիմնարկներում կլինեն բժշկական ստորաբաժանումներ: Հայաստանի Հանրապետության քրեակատարողական օրենսգիրք և կից ներկայացված օրենքների նախագծերի փաթեթն ԱԺ նիստում ներկայացրեց ՀՀ արդարադատության փոխնախարար Արփինե Սարգսյանը: ՀՀ քրեակատարողական նոր օրենսգրքի նախագծով ի թիվս այլ փոփոխությունների, սահմանվում է, որ քրեակատարողական հիմնարկներում չեն լինի բաց, կիսաբաց, կիսափակ, փակ և բուժական ուղղիչ հիմնարկներ, կլինեն երեք հիմնական գոտիներ՝ ցածր անվտանգության գոտի, միջին անվտանգության գոտի և բարձր ռիսկայնության անվտանգության գոտի: Փոխնախարարը ներկայացրեց առաջինից երկրորդ ընթերցմամբ քննարկման ընթացքում կատարված փոփոխությունները: «Գոտիների մասով արվել են անցումային ժամանակահատվածի համար համապատասխան փոփոխություններ, որոնք թույլ կտան շատ ավելի հստակ ձևով կատարել կիսաբաց, կիսափակ, փակ, բաց ուղղիչ հիմնարկներից տեղափոխումը  ցածր, միջին և բարձր անվտանգային գոտիներ: Բժշկական օգնության և սպասարկմանը վերաբերող հարցերը ևս ավելի հստակեցվել են: Այլևս բուժական ուղղիչ հիմնարկ չենք ունենա, կարգավորումն այնպիսին է, որ այսուհետ քրեակատարողական հիմնարկներում պետք է ըստ անվտանգային գոտիների բժշկական ստորաբաժանումներ լինեն»,-ասաց Սարգսյանը: Քանի որ վերջին փոփոխությունը առնչվում է ենթակառուցվածքների փոփոխությանը, դրույթն ուժի մեջ կմտնի օրենսգիրքն ուժի մեջ մտնելուց հետո ոչ ուշ, քան մինչև 2024  թվականի հուլիսի 1-ը: Գործող կարգավորումներով կալանավորված անձինք կարող են ստանալ մինչև 70 կգ հանձնուկ, իսկ դատապարտյալների համար սահմանափակում նախատեսված չէ: Նախագծով նախատեսվել է, որ շաբաթական մինչև 20 կգ հանձնուկ կարող է ստանալ թե կալանավորված անձը, թե դատպարտյալը, սա ներառում է նաև հեղուկները:
11:54 - 14 հունիսի, 2022
«Դիվանագիտական ծառայության մասին» օրենքում փոփոխություններ են նախատեսվում

«Դիվանագիտական ծառայության մասին» օրենքում փոփոխություններ են նախատեսվում

Ազգային ժողովը այսօր՝ հերթական քառօրյայի ընթացքում քննարկեց «Դիվանագիտական ծառայության մասին» օրենքում փոփոխություններ եւ լրացումներ կատարելու մասին օրենքի նախագիծը, որը հեղինակել են «Քաղաքացիական պայմանագիր» խմբակցության պատգամավորներ Վլադիմիր Վարդանյանը ու Հռիփսիմե Գրիգորյանը։ Նախագծի հիմնական զեկուցող Վլադիմիր Վարդանյանը ներկայացրեց նախագծով առաջարկվող փոփոխությունները․ «Դիվանագիտական ծառայության համակարգում ներդրվել է նաև քաղաքացիական ծառայության համակարգ, մինչդեռ, օրինակ, բոլոր պաշտոնները, այդ թվում՝ գլխավոր քարտուղարի պաշտոնը շարունակում է մնալ դիվանագիտական ծառայության պաշտոն։ Ընդ որում, գլխավոր քարտուղարի պաշտոնը ԱԳՆ համակարգում մշտապես տարբեր երկրներում դիտարկվում է որպես բարձրագույն դիվանագիտական պաշտոն և այստեղ փոփոխություններ չի նախատեսվում։ Բայց, այդուհանդերձ, հաշվի առնելով այն հանգամանքը, որ որոշ ստորաբաժանումներ ԱԳՆ-ում անցնում են քաղաքացիական ծառայության համակարգում, առնվազն անհրաժեշտ է նախատեսել գլխավոր քարտուղարի տեղակալ, որը կունենա քաղաքացիական ծառայողի կարգավիճակ»։ Նրա խոսքով՝ մյուս փոփոխությունը վերաբերում է դիվանագիտական աստիճանների կանոնակարգմանը և որոշակի արհեստական բարիերների վերացմանը․ «Մասնավորապես, դիվանագիտական աստիճանների հարցում մենք ընտրել ենք առավել արդյունավետ կարգավորումը, որը հնարավորություն կտա  արդյունավետ, ոչ շատ արագ և ոչ շատ դանդաղ առաջ ընթանալ դիվանագիտական պաշտոնների առաջխաղացման հարցում։ Հաջորդ փոփոխությունը վերաբերում է դիվանագիտական անձնագրերի տրամադրման, դիվանագիտական անձնագրերի վերադարձման, պահպանման կարգին։ Այստեղ որոշակի համահունչություն է մտցվում «ՀՀ քաղաքացու անձնագրի մասին» օրենքի հետ, որպեսզի չստեղծվի այնպիսի իրավիճակներ, որ դիվանագիտական անձնագրեր հայտնվեն այնպիսի մարդկանց մոտ, որոնք նույնիսկ քաղաքացիական անձնագիր ստանալու իրավունք չունեն կամ քաղաքացիական անձնագրի ժամկետը լրանում է»։
11:21 - 14 հունիսի, 2022