#armVote

2021 թվականի հունիսի 20-ին Հայաստանում կանխատեսվում են խորհրդարանական արտահերթ ընտրություններ: 

2021 թվականի մարտի 18-ին ՀՀ վարչապետ Նիկոլ Փաշինյանը հայտարարեց, որ այս որոշումը կայացվել է ՀՀ նախագահի, «Իմ քայլը» խմբակցության, «Լուսավոր Հայաստան» խմբակցության ղեկավար Էդմոն Մարուքյանի ու «Բարգավաճ Հայաստան» խմբակցության ղեկավար Գագիկ Ծառուկյանի հետ քննարկումներից հետո։

ՀՀ Սահմանադրությունը սահմանում է, որ խորհրդարանական արտահերթ ընտրություններ անցկացնելու համար Ազգային ժողովը պետք է արձակվի, դրա համար վարչապետը պետք է հրաժարական ներկայացնի, որից հետո 2 շաբաթում 2 անգամ անընդմեջ չընտրվի նոր վարչապետ, այնուհետեւ ոչ շուտ, քան 30 եւ ոչ ուշ, քան 45 օր հետո նշանակվեն նոր ընտրություններ։

Այս գործընթացի համար վարչապետը հրաժարական է ներկայացրել 2021 թվականի ապրիլի 25-ին, եւ արդեն մեկ անգամ չի ընտրվել։ Վարչապետի ընտրության հարցով հաջորդ նիստը կգումարվի մայիսի 10-ին։

Քաղաքական մի շարք ուժեր կարեւորում են նախքան ընտրությունները Ընտրական օրենսգրքի փոփոխությունների ընդունումը։ Խորհրդարանական մեծամասնությունը հայտարարել էր, որ Օրենսգրքում փոփոխություններ անելու որոշում ունեն, դրանցից որոշներն արդեն ընդունվել են, մասնավորապես, ռեյտինգային ընտրակարգը վերացվել է։ ԸՕ փոփոխությունների մեծ փաթեթը դեռեւս ընդունված չէ։

Կարող եք կատարել նվիրատվություն հետևյալ հղումով՝

Նվիրաբերել
Հրազդանում, ինչպես ամբողջ հանրապետության մարզային համայնքներում, հիմնական խնդիրը մարդկանց աշխատատեղերով ապահովելն է․ Արշավիր Խաչատրյան

Հրազդանում, ինչպես ամբողջ հանրապետության մարզային համայնքներում, հիմնական խնդիրը մարդկանց աշխատատեղերով ապահովելն է․ Արշավիր Խաչատրյան

Այս տարվա դեկտեմբերի 5-ին Կոտայքի մարզի Հրազդան համայնքում կանցկացվեն ՏԻՄ ընտրություններ՝ համամասնական ընտրակարգով։ «Լուսավոր Հայաստան» կուսակցության նախընտրական ցուցակը գլխավորում է «Աննար» ՍՊԸ-ի տնօրեն Արշավիր Խաչատրյանը։ Նա Infocom-ի հետ զրույցում ասաց, որ «լայն» քարոզարշավ չեն անցկացնում․ «Նպատակահարմար չենք գտնում տուն-տուն, թաղ-թաղ գնալու։ Ուղղակի մեր մտերիմների շրջապատում ճանաչում են, գիտեն, իրենց հետ հանդիպումներով, ֆեյսբուքով, լրատվությամբ փորձում ենք մեր հիմնական ընտրողներին մեզ հետ բերել»։ Խաչատրյանի խոսքով՝ Հրազդանի բնակիչները դրական են արձագանքում իրենց թիմին, որովհետև, ըստ նրա, ներկայացված քաղաքական ուժերի մեջ ամենապրոֆեսիոնալն իրենց թիմն է․ «Ցանկացած պարագայում, ով էլ մտւմ է պայքարի մեջ, ակնկալում է, որ հաղթելու է, մասնակցում ենք հաղթելու ակնկալիքով։ Թե արդյունքները ինչպիսին կլինեն, ընտրություններից հետո կերևա»։ Անդրադառնալով Հրազդանի խնդիրներին՝ Խաչատրյանը նշեց՝ ինչպես ամբողջ հանրապետությունում, այդպես էլ Հրազդանում կարևոր է աշխատատեղերի խնդիրը, որը, նրա պատկերացմամբ, օրենսդրական փոփոխությունների արդյունքում կարող է լուծվել․ «Հրազդան քաղաքում, ինչպես ամբողջ հանրապետության մարզային համայնքներում հիմնական խնդիրը մարդկանց աշխատատեղերով ապահովելն է, որպեսզի մարդիկ դրսում աշխատանք չփնտրեն, մնան տեղում, և շենացնեն այս քաղաքը, մեր երկիրը։ Մենք պետք է կարողանանք այնպիսի օրենսդրական դաշտ բարելավել, որպեսզի կարողանանք ներդրումներ բերել համայնք, աշխատատեղեր ստեղծենք, իսկ դրա հնարավորությունը համայնքն ունի»։ Համայնքապետի թեկնածուն հիշեցրեց՝ ժամանակին Հրազդանը խոշոր արդյունաբերական քաղաք է եղել․ «Այսօր հիմնականում բացառությամբ Հրազդան ՋԷԿ-ից և Ցեմենտի գործարանից, բոլոր գործարանները կանգնած վիճակում են, մենք փորձելու ենք ներդրումներ բերենք համայնք և լրացուցիչ աշխատատեղեր ստեղծենք, որը նաև համայնքի  բյուջեին լրացուցիչ եկամուտներ կբերի, որն էլ կկարողանանք օգտագործել և՛ ենթակառուցվածքների վերանորոգման, կապիտալ վերակառուցման, և՛ մշակութային ու սպորտային օբյեկտների վերականգնման, վերանորոգման ուղղությամբ»։ Արշավիր Խաչատրյանը նշեց՝ քանի որ Հրազդանը խոշորացված համայնք է, որին ևս 4 գյուղեր են միացել, համայնքում կան նաև գյուղատնտեսական խնդիրներ․ «Հողերի մեծ մասը չի մշակվում, իսկ այդ ուղղությամբ իրոք անելիքներ շատ կան։ Բնակիչը պետք է վստահ լինի, որ այնպիսի կուլտուրա պետք է ցանի, որից եկամուտ կստանա, և ինքը դրանով կարողանա ընտանիք պահել, իսկ եթե նա այնպիսի կուլտուրաներ է մշակում, որոնցից եկամուտ չունի, պարզ է, որ նա ուրիշ աշխատանք է փնտրելու, և հողի մշակումը դառնալու է երկրորդային։ Կարելի է ասել, որ այսօր Հրազդանի և գյուղական շրջանի մեծ մասի հողերը չեն մշակվում, լուրջ անելիքներ ունենք այդ ուղղությամբ, և հողերի մշակման ուղղությամբ, աշխատանքների համախմբման ուղղությամբ, կուլտուրաների մշակման ուղղությամբ, թե կոնկրետ որ տարածաշրջաններում ինչպիսի կուլտուրաներ պետք է մշակվեն, եկամտաբեր բիզնես կարողանան դնել, վերամշակող արդյունաբերություն, գյուղատնտեսություն կարելի է իրականացնել, և նմանատիպ շատ ուրիշ ծրագրեր»։ Իսկ քաղաքային համայնքներում, Խաչատրյանի խոսքով, անհրաժեշտ է ջերմոցային տնտեսությունների քանակի մեծացում․ «Այսօր մենք Հրազդանում ունենք նմանատիպ փորձ, այդ ուղղությամբ կարելի է աշխատանք իրականացնել։ Դա մեր ծրագրերում կա, եթե կարողանանք համայնքում ղեկավար դիրք ունենալ, այդ ամեն ինչը կկազմակերպենք, ունենք լավ մասնագետների թիմ, որոնք այս ամենը կկարողանան կազմակերպել։ Ինչ մնում է ենթակառուցվածքներին, չեմ կարող չասել, որ վերջին մի քանի տարիների ընթացքում ասֆալտապատման ուղղությամբ աշխատանք արվել է համայնքում։ Կարելի է ավելին անել և՛ ջրամատակարարման ուղղությամբ, և՛ ոռոգման համակարգերի ուղղությամբ։ Իհարկե, այդ ամեն ինչի համար բյուջեում լրացուցիչ միջոցներ են պետք,  պետք է մուտքեր ավելացնել։ Այդ թաքնված եկամուտների տեղը մենք շատ լավ գիտենք։ Կարելի է վարչական աշխատանքի արդյունքում բյուջեն 20-30%-ով ավելացնել, իսկ դա արդեն ահագին մեծ գումար է, որ կարող է դրվել համայնքում»։ Համայնքապետի թեկնածուն նշեց նաև, որ կողմ է խոշորացման գործընթացին՝ հավելելով, որ լավ թիմ ունենալու դեպքում խոշորացումը դրական ազդեցություններ կարող է ունենալ։ Համայնքում զբոսաշրջության զարգացումը թեկնածուն նույնպես իրատեսական է համարում․ «Պետք է հաշվի առնենք, որ խոշորացված համայնքին կից այսօր գործում է և Ծաղկաձոր քաղաքը՝ իր տուրիզմի օբյեկտներով, և՛ Հանքավանի համայնքները։ Քանի որ Հրազդանը կենտրոն է, կարող ենք որոշակի չափով տուրիզմը զարգացնել, նաև հյուրանոցային համալիր ստեղծել, սպասարկման համար վերամշակվող արդյունաբերություն, գյուղատնտեսություն օգտագործել։ Վերջիվերջո այդ երկու պանսիոնատներին մատակարարում է պետք իրականացնել, իսկ դա քաղաքը իր ռեսուրսներով կարող է իրականացնել»։ Նա նաև վստահեցրեց՝ իրենց թիմը կարող է առավելագույնը անել համայնքի զարգացման համար․ «Եթե վերցնենք բոլոր թեկնածուները և թիմերը, դնենք, անալիզ անենք, և մի քիչ ոչ թե զգացմունքներով շարժվենք կամ անձնական խնամի-ծանոթ-բարեկամ թիմ հասկացություններով, նկատեմ, որ բոլոր ներկայացված կուսակցություններից, ցուցակների միջից ամենապրոֆեսիոնալը մեր թիմն է։ Ե՛վ մեր անցած ճանապարհով, և՛ փորձով, և՛ գիտելիքներով մենք կարող ենք առավելագույնը անել։ Ես, իհարկե, չեմ ուզում ասել, թե մյուս թիմերում վատ մասնագետներ կան, վատ մարդիկ են, բայց եթե տեղական ինքնակառավարման մասին է խոսքը, լավ բժիշկը կամ լավ իրավաբանը այդքան էլ չի տիրապետում համայնքային ղեկավարմանը, քան այն մարդը, որը երկար տարիներ աշխատել է համայնքում, պետական կառույցներում և շատ լավ գիտի համայնքի խնդիրները ու գիտի ինչպես կազմակերպել ազգաբնակչության հետ աշխատանքը։ Հրազդան համայնքի ՏԻՄ ընտրություններին առաջադրվել է 4 քաղաքական ուժ․ «Ապրելու երկիր» կուսակցության համայնքապետի թեկնածուն Մոնթե Մաթևոսյանն է, որը աշխատում է ԿԳՄՍՆ պատմության և մշակույթի հուշարձանների պահպանության վարչությունում՝ որպես ավագ մասնագետ։ «Լուսավոր Հայաստան» կուսակցության նախընտրական ցուցակը գլխավորում է Արշավիր Խաչատրյանը, ով «Աննար» ՍՊԸ-ի տնօրենն է։ «Քաղաքացիական պայմանագիր» կուսակցության համայնքապետի թեկնածուն Հրազդան համայնքի ներկայիս ղեկավար Սևակ Միքայելյանն է, իսկ «Հայ Յեղափոխական դաշնակցության» ցուցակը գլխավորում է Վարդան Գրիգորյանը, որը աշխատում է «Գազպրոմ Արմենիա» ՓԲԸ-ում՝ որպես իրավախորհրդատու։ Լուսանկարը՝ Արշավիր Խաչատրյանի ֆեյսբուքյան էջից Նանե Ավետիսյան
13:01 - 01 դեկտեմբերի, 2021
Նոյեմբերյանի բնակիչներին խրախուսելու ենք, որ անցնենք ժամանակակից գյուղատնտեսությանը․ համայնքի ղեկավարի թեկնածու Մհեր Աղամյան

Նոյեմբերյանի բնակիչներին խրախուսելու ենք, որ անցնենք ժամանակակից գյուղատնտեսությանը․ համայնքի ղեկավարի թեկնածու Մհեր Աղամյան

2021 թվականի դեկտեմբերի 5-ին Տավուշի մարզի Նոյեմբերյան համայնքում տեղի կունենան համամասնական ընտրակարգով ընտրություններ։ Նոյեմբերյանում ընտրություններին երեք քաղաքական ուժ է մասնակցում․ «Ապրելու երկիր» կուսակցությունը, որի ցուցակը գլխավորում է անկուսակցական Արսեն Աղաբաբյանը, «Հանուն Հանրապետության ժողովրդավարության պաշտպանների դաշինք» կուսակցությունը, որի ցուցակը գլխավորում է անկուսակցական Մհեր Աղամյանը, եւ «Քաղաքացիական պայմանագիր» կուսակցությունը, որի ցուցակի առաջին համարը ՔՊ-ական Կարեն Աբազյանն է։ «Հանուն Հանրապետության ժողովրդավարության պաշտպանների դաշինք» կուսակցությունը 18 հոգանոց ցուցակ է ներկայացրել։ Մհեր Աղամյանը, որ կուսակցության համայնքապետի թեկնածուն է, անհատ ձեռնարկատեր է։ Նա Պտղավան գյուղից է, 40 տարեկան։  Աղամյանը, ինչպես եւ թեկնածուներից Աբազյանը, քարոզարշավն իրականացնում է բնակիչների հետ հանդիպումներով։ Մեր զրույցում նա պատմեց, որ բնակիչները տրամադրության անկում ունեն՝ պայմանավորված պատերազմով ու սահմանային վերջին զարգացումներով, բայց իրենք փորձում են մարդկանց բացատրել, որ հուսահատվել պետք չէ։ Աղամյանը Նոյեմբերյանի խնդիրների շարքում առանձնացրեց ներհամայնքային ճանապարհների եւ խմելու ու ոռոգման ջրի հարցը՝ կարծիք հայտնելով, որ դրանք հնարավոր է լուծել համայնքային բյուջեի միջոցով։ Ինչ վերաբերում է ոռոգման ջրի խնդրին՝ մեր զրուցակիցը նկատեց՝ թեեւ դա իրենց կոմպետենտության շրջանակում չէ, բայց կկարողանան Ջրօգտագործողների միության հետ համագործակցելով լուծել նաեւ այդ խնդիրը։ Աղամյանի կարծիքով՝ առաջնային լուծման հարցերից հետո նոր հնարավոր կլինի զբաղվել համայնքային զարգացման հարցերով։ Մեր հարցին՝ արդյոք համայնքային զարգացումն ու խնդիրների լուծումը միաժամանակ չե՞ն կարող լինել, համայնքապետի թեկնածուն պատասխանեց՝ կարող են, միայն թե շատ աշխատանք է պահանջվում․  «Ինչքան հնարավոր է՝ զուգահեռ կանենք, գործարարների հետ հանդիպումներով, Սփյուռքի հայրենակիցներին հանդիպելով, նրանց հետ նոր ծրագրեր իրականացնելով։ Մնացած թե մարզային, թե հանրապետության մակարդակի հարցերում էլ կողքները կկանգնենք, կվազենք էդ մարդկանց հետ, ինչ պետք է աջակցենք, որ մի բան կարողանանք ստեղծել, թե չէ էս վիճակը լավ տեղ չի տանում»,- ասաց Աղամյանը՝ վստահեցնելով, որ այցելած բոլոր գյուղերի խնդիրները գույքագրել են, փորձելու են հնարավորինս արագ լուծումներ գտնել։ «Դիցուք, երեկ Բարեկամավանում ենք եղել, այս գյուղն իր աշխարհագրական դիրքով վերջին գյուղն է։ Այստեղ միջհամայնքային տրանսպորտի հարցը մինչեւ հիմա լուծված չէ։ Մենք մտածում ենք, որ հաստատ դրա համար միջոցներ գտնենք, հիմա թե մասնավորի հետ կպայմանավորենք, թե ոնց, բայց էդ հարցը պետք է լուծենք»,- ասաց Աղամյանը, եւ մեր ճշտող հարցին՝ փաստորեն, համայնքային բյուջեն չի՞ բավարարի խնդրի ամբողջական լուծման համար, պատասխանեց․ «Դե ես պիտի մտնեմ էդ ոլորտի մեջ, որ մանրամասն հասկանամ, հիմա եթե համայնքները միանում են, նմանատիպ համայնքներին տվել են մեքենաներ, մասնավորներ կան, որ ունեն մեքենաներ, հիմա թե կպայմանավորվենք, մի մասը համայնքային բյուջեից կսուբսիդավորվի, թե  ինչ, այդ խնդիրը միանշանակ պիտի լուծենք»։ Աղամյանի խոսքով՝ համայնքն աղբատար մեքենաներ ունի, բայց աղբահանությունը պատշաճ մակարդակով չի իրականացնում․ վստահեցրեց՝ իրենք զբաղվելու են նաեւ այս հարցով։ Համայնքի ներքին տնտեսական զարգացման վերաբերյալ մեր զրուցակիցն ասաց, որ Նոյեմբերյանում գյուղատնտեսության զարգացման մեծ պոտենցիալ կա․ «Մեր համայնքը երկու ռեգիոնից է բաղկացած․ ներքին զոնան՝ Դեբեդի հովիտը՝ գյուղատնտեսական, այգեգործական, վերին զոնան՝ անասնապահական ռեգիոն է։ ՀՀ-ում նման բնակլիմայական պայմաններ, ինչպիսին գյուղատնտեսական զոնայում է, այլ տեղ երեւի չկան, շատ նպաստավոր պայմաններ ունենք այգեգործությունը շատ արագ զարգացնելու համար, բայց հիմա ով ոնց պատահի, ինչ պատահի՝ մշակում է։ Ասենք՝ ես դեղձենի եմ գցում, էն մեկը՝ տանձենի է գցում, այսինքն՝ էդ հախուռնությունը խանգարում է, որ կարողանանք զբաղվել դեղձի արտադրությամբ եւ տալ, օրինակ, 1000 տոննա դեղձ։ Հիմա արտադրական ծավալները չենք կարողանում մի տեսակով ապահովել, որ դրանով զբաղվելն էլ արդարացված լինի, բիզնեսի տեսանկյունից էլ՝ շահեկան։ Հիմա գյուղացիներին պետք է օգնենք, կողմնորոշենք, նույնիսկ գյուղերը կարող ենք կողմնորոշել։ Տեխնիկական միջոցներն էլ կան, կարող ենք արդյունավետ բաշխել, համակարգային լուծումներ առաջարկելով առաջ գնալ։ Խրախուսելու ենք, որ անցնենք ժամանակակից գյուղատնտեսությանը»,- ասաց Աղամյանը։ Նա հավելեց նաեւ, որ Նոյեմբերյանում լայն են էքստրեմալ ու գյուղական տուրիզմը զարգացնելու հնարավորությունները, ուղղակի, մեր զրուցակցի կարծիքով, մնում է միայն աշխատել այդ ուղղությամբ, փառատոնների մասնակցել, ներկայացնել համայնքի տեսարժան վայրերը, եւ այլն։ Լուսանկարը՝ Աղամյանի ֆեյսբուքյան էջից Հայարփի Բաղդասարյան
16:56 - 30 նոյեմբերի, 2021
Վանաձորում որևէ լարվածություն չկա․ օրենքի շրջանակներում օգտագործում ենք քարոզարշավի բոլոր ուղղությունները․ Արամ Խաչատրյան

Վանաձորում որևէ լարվածություն չկա․ օրենքի շրջանակներում օգտագործում ենք քարոզարշավի բոլոր ուղղությունները․ Արամ Խաչատրյան

Այս տարվա դեկտեմբերի 5-ին Լոռու մարզի Վանաձոր համայնքում կանցկացվեն ՏԻՄ ընտրություններ՝ համամասնական ընտրակարգով։  «Քաղաքացիական պայմանագիր» կուսակցության նախընտրական ցուցակը գլխավորում է Լոռու ներկայիս մարզպետ, 7-րդ գումարման Ազգային ժողովի  «Իմ քայլը» խմբակցության պատգամավոր  Արամ Խաչատրյանը։ Վերջինս Infocom-ի հետ զրույցում ասաց, որ քարոզարշավը ընթանում է բնականոն հունով. «Մենք օրենքի շրջանակներում օգտագործում ենք քարոզարշավի բոլոր ուղղությունները, Վանաձորում որևէ լարվածություն չկա,  քաղաքացիները ակտիվ մասնակցում են։ Համենայն դեպս, մեր բակային հանդիպումների ժամանակ հարցեր են բարձրացնում, նորմալ ընթանում է»։ Արամ Խաչատրյանը հերքեց լուրերը, ըստ որոնց՝ քարոզարշավի ընթացքում «Քաղաքացիական պայմանագիր» կուսակցությունը վարչական ռեսուրս է կիրառում․ «Եթե ուշադիր լինեք մեր բակային հանդիպումներին, կտեսնեք, որ այնտեղ հարկադրաբար որևէ պաշտոնյա կամ ուսուցիչ կամ պետական աշխատող ներկայացված չէ։ Յուրաքանչյուր բակում 50-60-ից ավելի մարդիկ են ներկա, որևիցե աշխատակից` կլինի մարզպետարանից, կլինի այլ պետական հիմնարկներից, որևիցե ներկայացուցիչ չկա։ Կարող է 1-2 հոգի լինեն, բայց մարդիկ իրենց կամքով են գալիս և շատ ոգևորված են»։ Նա նաև նշեց, որ նախընտրական ծրագրում անդրադարձ կատարել են Վանաձորի՝ առաջնահերթ լուծում պահանջող բոլոր խնդիրներին․ «Նախընտրական ծրագրում բոլոր ոլորտներից ներկայացրել ենք և՛ ճանապարհաշինություն, և՛ տնակային ավաններ, և՛ բազմաբնակարան շենքեր, աղբահանություն, բոլոր ոլորտներից էլ ընդգրկված են»։ Խաչատրյանն ընդգծեց, որ տնակային ավանների խնդիրը լուծելու գործընթացն արդեն մեկնարկել է, Վանաձորի Տարոն 4 թաղամասում շենքեր են կառուցվելու, որպեսզի տնակներում ապրող մարդիկ տեղափոխվեն այնտեղ․ «Արդեն 16 ընտանիք Սանկտ Պետերբուրգ կոչվող թաղամասից պետք է տեղափոխվեն, և սա շարունակական բնույթ է կրելու։ Ինչ վերաբերում է երկրաշարժից տուժած քաղաքացիներին, բոլորը բնակարան ստացել են, միայն 1 ընտանիք կա, որ հիմա դատական վեճի մեջ է, մնացած բոլորը իրենց բնակարանները ստացել են, բայց Վանաձորում կան տնակային ավաններում ապրող ընտանիքներ, այդ հարցը մեր համար առաջնային է, ուշադրության կենտրոնում է»,- նշեց Խաչատրյանը՝ հավելելով, որ, ըստ իրենց նախագծի, առաջիկա 5 տարիների ընթացքում ամբողջությամբ կլուծվի տնակների հարցը։ Վանաձորը ներառվել է համայնքների խոշորացման նախագծում և գտնվում է խոշորացման փուլում․ ըստ կառավարության ներկայացրած և ԱԺ-ում ընդունված այդ նախագծի՝ Վանաձոր քաղաքին են միանում նաև Գուգարք, Դարպաս, Շահումյան գյուղերը։ Մարզպետը վստահեցրեց, որ նախընտրական ծրագրում հաշվի են առել Վանաձորին միացող 3 գյուղերի խնդիրները․ «Մեծ հաշվով տարբերություն գրեթե չկա այդ գյուղերի կամ մարզի մյուս գյուղերի կամ Վանաձորի միջև, գրեթե նույն խնդիրներն են։ Կա  աշխատատեղերի խնդիր։ Համայնքապետը ոչ թե աշխատատեղ ստեղծող է, այլ միջավայր պետք է ստեղծի, վստահություն ներշնչի ներդրողների մոտ, որպեսզի հետաքրքրություն առաջանա, գան, այստեղ ներդրումներ իրականացնեն»։ Իսկ թե ինչու է Խաչատրյանը, լինելով Լոռու մարզպետ, առաջադրվել Վանաձորի համայնքապետի պաշտոնում, մեր զրուցակիցն ասաց, որ դա քաղաքական որոշում է․ «Պաշտոնն իմ համար կարևոր չէ։ Ես գտնում եմ, որ մենք բոլորս պիտի կարողանանք հանրօգուտ աշխատանք իրականացնել, ամենքս մեր տեղում։ Ինչ վերաբերում է, թե ինչու Վանաձորի համայնքապետի թեկնածու, դա մեր քաղաքական թիմի որոշումն է, և ես անվերապահորեն պետք է կատարեմ այդ պարտականությունը։ Կուսակցությունը այդպես է որոշել, առաջարկել են և ես համաձայնել եմ»։ Խաչատրյանի խոսքով՝ իրենց քաղաքական թիմը 2018 թ․-ին հեղափոխությամբ բազմաթիվ արժեքներ են վերականգնել, որոնք, ըստ նրա, բացարձակ արժեքներ են․ «Խոսքի ազատությունն ենք վերականգնել, առհասարակ ազատությունը, մեր քաղաքացիների ընտրելու իրավունքն ենք վերականգնել, ազատ տեղաշարժվելու իրավունքն ենք վերականգնել, արդարությունն ենք վերականգնել մասամբ, որովհետև նաև այս ուղղությամբ էլ աշխատանքներ ունենք, չենք թալանել, ընտրություններ չենք կեղծել։ Այն արժեքները, որոնց մասին խոսեցի, բացարձակ արժեքներ են, որոնք պետք է պահել և պահպանել։ Բազմաթիվ ծրագրեր ենք իրականացրել Վանաձորում, 2018-ից մինչև 2021 թ․-ը՝ շուրջ 2.5 միլիարդի։ Մենք կաշառքով տնօրեններ կամ այլ պաշտոններ չենք նշանակում, սա բոլորը գիտեն, տեսնում են, նույնիսկ սիրողական մակարդակով փողոցում սրճարանում, երբ խոսում են այդ հարցերի մասին, նորություն չէ, ահա թե ինչու պետք է ընտրեն «Քաղաքացիական պայմանագիր» կուսակցությանը»։ Հավելենք, որ Վանաձորի ՏԻՄ ընտրություններում ՔՊ-ն 45 հոգուց բաղկացած նախընտրական ցուցակ է ներկայացրել․ 2-րդ համարը Վանաձորի համայնքապետի ներկայիս պաշտոնակատար Վանիկ Օհանյանն է։ Վանաձորի ՏԻՄ ընտրություններին 10 քաղաքական ուժ է մասնակցելու՝  9 կուսակցություն և 1 դաշինք։ Հայաստանի աշխատավորական սոցիալիստական կուսակցությունը ընտրություններին մասնակցելու է Վանաձոր համայնքի ղեկավարի առաջին տեղակալ, Վանաձորի ավագանու անդամ Արկադի Փելեշյանի գլխավորությամբ, «Այլանս» առաջադիմական ցենտրիստական կուսակցությունը՝ ՀՀ էլեկտրական ցանցերի Դեբեդ մասնաճյուղի իրացման պետ Կարեն Էդարյանի գլխավորությամբ։ «Քաղաքացիական պայմանագիր» կուսակցության համայնքապետի թեկնածուն Լոռու ներկայիս մարզպետ Արամ Խաչատրյանն է։ «Հանրապետություն» կուսակցությունը մասնակցելու է Վազգեն Թորոսյանի գլխավորությամբ․ վերջինս չի աշխատում։ «Ապրելու երկիր» կուսակցության ցուցակն էլ գլխավորելու է Արտավազդ Ալավերդյանը, որը Վանաձորի «Դիետ» ՍՊԸ-ի գործադիր տնօրենն է։ «Լուսավոր Հայաստան» կուսակցության համայնքապետի թեկնածուն Հրանտ Այվազյանն է, ով 7-րդ գումարման Ազգային ժողովի «Լուսավոր Հայաստան» խմբակցության անդամ է եղել, հիմա դասախոսում է  Հայաստանի ազգային պոլիտեխնիկական համալսարանի Վանաձորի մասնաճյուղում։ «Հայրենիք» կուսակցությունը Վանաձորի ՏԻՄ ընտրություններին մասնակցելու է Վահե Դոխոյանի գլխավորությամբ, որը «Հայրենիք» զարգացման հիմնադրամի Լոռու մարզային  գրասենյակի ղեկավարն է։ «Բարգավաճ Հայաստանի» ցուցակը գլխավորելու է Էդգար Բոջուկյանը, ով չի աշխատում։  Վանաձորի նախկին քաղաքապետ Մամիկոն Ասլանյանը ընտրություններին մասնակցելու է  «Մամիկոն Ասլանյան» դաշինքով․ նա այժմ չի աշխատում։  Հայաստանի կոմունիստական կուսակցությունն էլ ընտրություններին մասնակցելու է ՀԿԿ կենտկոմի առաջին քարտուղար, Վանաձորի քաղաքային կազմակերպության առաջին քարտուղար Արկադի Ղուկասյանի գլխավորությամբ։ Լուսանկարը՝ Արամ Խաչատրյանի ֆեյսբուքյան էջից Նանե Ավետիսյան
17:45 - 29 նոյեմբերի, 2021
Նոյեմբերյանում ՔՊ-ի համայնքապետի թեկնածուն վստահեցնում է՝ չկա խնդիր, որի լուծման ուղղություններն իրենց համար անհասկանալի լինեն

Նոյեմբերյանում ՔՊ-ի համայնքապետի թեկնածուն վստահեցնում է՝ չկա խնդիր, որի լուծման ուղղություններն իրենց համար անհասկանալի լինեն

2021 թվականի դեկտեմբերի 5-ին Տավուշի մարզի Նոյեմբերյան համայնքում տեղի կունենան համամասնական ընտրակարգով ընտրություններ։ Նոյեմբերյանում ընտրություններին երեք քաղաքական ուժ է մասնակցում․ «Ապրելու երկիր» կուսակցությունը, որի ցուցակը գլխավորում է անկուսակցական Արսեն Աղաբաբյանը, «Հանուն Հանրապետության ժողովրդավարության պաշտպանների դաշինք» կուսակցությունը, որի ցուցակը գլխավորում է անկուսակցական Մհեր Աղամյանը, եւ «Քաղաքացիական պայմանագիր» կուսակցությունը, որի ցուցակի առաջին համարը ՔՊ-ական Կարեն Աբազյանն է։ «Քաղաքացիական պայմանագիր» կուսակցությունը 33 հոգանոց ցուցակ է ներկայացրել։ Կարեն Աբազյանը, որ համայնքապետի թեկնածուն է, 2016 թվականի սեպտեմբերի 18-ին կայացած Տեղական ինքնակառավարման մարմինների ընտրությունների արդյունքում ընտրվել է Նոյեմբերյան համայնքի ղեկավար, իսկ այս տարվա հոկտեմբերի 1-ից Նոյեմբերյան համայնքի ղեկավարի պաշտոնակատարն է։ Նա ՔՊ կուսակցության անդամ է, 45 տարեկան։  Նոյեմբերյանը խոշորացված համայնք է․ դրանում ընդգրկված են Նոյեմբերյան քաղաքային, Բերդավան, Կողբ, Ջուջեւան եւ այլ գյուղական բնակավայրերը։  Կարեն Աբազյանն Infocom-ի հետ զրույցում վստահեցրեց՝ ծանոթ է խոշորացված համայնքի բոլոր խնդիրներին․ «Արդեն հինգ տարի է՝ աշխատում եմ, Նոյեմբերյան համայնքի խնդիրներին քաջատեղյակ եմ։ Էդ խնդիրներն ինձ համար նորություն չեն, դրանց որոշ մասը լուծվել է, որոշ մասը լուծման ընթացքում է, որոշ մասի լուծումն էլ կախված է ֆինանսական հնարավորություններից, դեռ նոր պետք է լուծումներ տրվեն»,- ասաց նա՝ պնդելով, որ չկա մի այնպիսի խնդիր, որի լուծման ուղղություններն իրենց համար անհասկանալի լինեն։  Առհասարակ խոշորացման գործընթացին մեր զրուցակիցը դրական վերաբերմունք ունի․ «Երբ առաջին անգամ ընտրվում էի, ճիշտն ասած, չէի էլ պատկերացնում՝ խոշորացման դեպքում ինչ կստացվի, ինչպես կարելի է կառավարել, բայց կառավարման ընթացքում ծանոթացա գյուղերի, քաղաքների կատարած աշխատանքներին, օպտիմալությանը, աշխատանքի ընթացքում եկա այն համոզմանը, որ իրականում խոշորացված համայնքում աշխատելը, խնդիրները վեր հանելը, լուծելը, բյուջեի կառավարումը շատ ավելի հեշտ է եւ արդյունավետ։ Մանավանդ, կարող եմ ասել, փոքր գյուղեր կային, որտեղ բյուջեն նույնիսկ աշխատավարձի համար չէր հերիքում։ Իսկ հիմա նմանատիպ հարցեր չկան։ Կային գյուղեր, որտեղ գիշերային լուսավորություն ընդհանրապես չկար, իսկ հիմա լուսավորված են»,-ասաց Աբազյանը՝ որպես օրինակ նշելով Բարեկամավանը, Դովեղը եւ այն։ Նա առանձնացրեց խնդիրներ, որոնք հնարավոր է լուծել միայն համայնքային բյուջեով։ Օրինակ՝ տեղային խնդիրները, փոքր գյուղերի լուսավորության, աղբահանության պատշաճ իրականացման հարցը պատրաստվում են լուծել համայնքի բյուջեով, սակայն, ինչպես մեր զրույցում կարծիք հայտնեց Աբազյանը, առավել մեծ հարցերը՝ այդ թվում՝ ճանապարհաշինության, միայն համայնքային հոգածության ներքո չեն կարող լինել․ «Կան խնդիրներ, որոնց լուծման համար համայնքային բյուջեն բավարար չի լինի։ Հիմնականում ծախսատար են ոռոգման ու խմելու ջրի խնդիրները։ Դրանց մասնակի լուծումներ համայնքը կարող է տալ, սակայն գլոբալ լուծման համար այլ միջոցներ են պետք։ Օրինակ, Արճիս-Լճկաձոր հատվածում այս խնդրի լուծումն առանց պետական աջակցության չէր լինի։ Խոշորացված համայնքը կարող է տեղային խնդիրներ լուծել, բայց գլոբալ խնդիրները շատ ծախսատար են, ինչպես, օրինակ, նաեւ ճանապարհաշինությունը»։ Համայնքապետի թեկնածուն նշեց, որ կան աշխատանքներ, որոնք հիմնականում անում են սուբվենցիոն ծրագրերի միջոցով՝ պետության հետ համագործակցությամբ․ «Բացի դրանից՝ մենք մանկապարտեզների վերանորոգման, կառուցման աշխատանքներ ենք ունեցել, որոնք կատարվել են դոնորների ու բարեգործական կազմակերպությունների աջակցությամբ»։ Թե տնտեսական առումով զարգացման ինչ հեռանկար է տեսնում ՔՊ-ի թիմը Նոյեմբերյանում, Աբազյանն ասաց, որ Նոյեմբերյանի տարածաշրջանը երկու մասի կարելի է բաժանել․ ներքեւում՝ Այրումի տարածաշրջանը, որտեղ ավելի զարգացած է հողագործությունը, եւ վերեւում՝ Նոյեմբերյանի տարածաշրջանը, որտեղ ավելի շատ անասնապահությամբ են զբաղվում․  «Յուրաքանչյուրի դեպքում մոտեցումը պետք է անհատական լինի։ Նոյեմբերյան խոշորացված համայնքում անասնաբուժական կետեր կան, հեռագնա արոտավայրերում խմոցներ ենք տեղադրել, ճանապարհներ ենք նորոգել, անասնաբուժական դեղատներ ենք բացել գյուղական չորս համայնքներում, որոնք աշխատեցնում են տվյալ բնակավայրերի անասնաբույժները»,- ասաց մեր զրուցակիցը՝ չմոռանալով հեռագնա արոտների խնդրի մասին։ Նրա խոսքով՝ մի քանի սերունդ է փոխվել, խնդիրները շատացել են․ «Բնակիչների մի մասն արտերկրում է բնակվում, իրենց անունով հողեր կան, որ չեն մշակվում, դառնում են մացառուտներ։ Իսկ կան նոր կազմավորված ընտանիքներ, իրենց էլ հող է պետք, արդեն հողը չի հերիքում, դու չես կարող մեկ ուրիշի սեփականությունը տալ ուրիշին»։ Համայնքապետի թեկնածուի կարծիքով՝ այս խնդրի լուծումը համայնքը չի կարող տալ, հարցին պետական մակարդակով մոտեցում է պետք։  Կարեն Աբազյանի վստահեցմամբ՝ այն աշխատանքները, որ արել են այս ընթացքում, շարունակական են լինելու։ Օրինակ՝ Հայաստանի տարածքային զարգացման հիմնադրամի (ՀՏԶՀ) եւ USAID-ի հետ համագործակցության շրջանակներում 2017 թվականին Նոյեմբերյան քաղաքում հիմնվել է ավտոպարկ, որի տեխնիկայի համալրումը շարունակելու են նաեւ ապագայում։  Համայնքապետի թեկնածուն առաջիկա ընտրություններում ակնկալում է ընտրողների ակտիվ մասնակցություն․ «Ակտիվ, ազնիվ ու արդար ընտրություններ եմ ակնակլում, ուզում եմ՝ ժողովրդի մասնակցությունը բարձր լինի, քանի որ ՏԻՄ ընտրությունն անմիջապես բնակչության հետ շփումն է։ Իրենց խնդիրները, անկախ նրանից՝ դրանք վերաբերում են ՏԻՄ-երին, թե ոչ, բնակիչները արտահայտում են, համայնքապետարանը փորձում է լուծում գտնել։ Որպեսզի յուրաքանչյուր համայնքի ղեկավար պատասխանատու լինի, ես մեր բնակիչներին կհորդորեմ ակտիվ մասնակցեն եւ պահանջատեր լինեն»,- եզրափակեց Տավուշի մարզի Նոյեմբերյան համայնքում «Քաղաքացիական պայմանագիր» կուսակցության ցուցակը գլխավորող Կարեն Աբազյանը։ Լուսանկարը՝ Կարեն Աբազյանի ֆեյսբուքյան էջից Հայարփի Բաղդասարյան
16:10 - 29 նոյեմբերի, 2021
Ի տարբերություն մյուսների՝ մենք 5 տարվա քրտնաջան աշխատանքի արդյունքներով ենք ներկայանում հասարակությանը․ Մամիկոն Ասլանյան

Ի տարբերություն մյուսների՝ մենք 5 տարվա քրտնաջան աշխատանքի արդյունքներով ենք ներկայանում հասարակությանը․ Մամիկոն Ասլանյան

Դեկտեմբերի 5-ին Լոռու մարզի Վանաձոր համայնքում կանցկացվեն ՏԻՄ ընտրություններ՝ համամասնական ընտրակարգով։ Այս ընտրություններին Վանաձորի նախկին քաղաքապետ Մամիկոն Ասլանյանը գլխավորում է նորաստեղծ «Մամիկոն Ասլանյան» դաշինքի նախընտրական ցուցակը։ Դաշինքը կազմված է «Ազատ դեմոկրատներ» և «Իմ հզոր հայրենիք» կուսակցություններից։ Թեեւ Մամիկոն Ասլանյանը 2016 թ․-ի Վանաձորի ՏԻՄ ընտրություններին առաջադրվել էր Հայաստանի Հանրապետական կուսակցության ցուցակով, նա այժմ անկուսակցական է։ Այս տարվա հոկտեմբերի 12-ին համայնքապետի պաշտոնում Մամիկոն Ասլանյանի լիազորությունները դադարեցվել էին․ վարչապետի որոշմամբ Վանաձոր համայնքի ղեկավարի պաշտոնակատար էր նշանակվել Վանիկ Օհանյանը (Օհանյանը Վանաձորի այս ընտրություններում «Քաղաքացիական պայմանագրի» ցուցակի երկրորդ համարն է)։ Ասլանյանը Infocom-ի հետ զրույցում ասաց, որ քարոզարշավը իրենց համար բնականոն հունով է ընթանում․ «Կան քաղաքական ուժեր, որ իրենց կոռեկտ չեն պահում վանաձորցիների նկատմամբ, բայց աշխատում ենք հարթել, աշխատում ենք առաջ շարժվել։ Ակնկալիքն, ինչպես բոլորի մոտ, հաջողության հասնելն է։ Ի տարբերություն մյուսների՝ մենք 5 տարվա քրտնաջան աշխատանքի արդյունքներով ենք ներկայանում հասարակությանը և հասարակությունից ակնկալում ենք մեր գնահատականը»։ Հարցին, թե ըստ Մամիկոն Ասլանյանի՝ ո՞ր քաղաքական ուժերը իրենց կոռեկտ չեն պահում, վերջինս պատասխանեց, որ իշխող ուժի մասին է խոսում․ «Ֆեյսբուքյան տիրույթում, լրատվամիջոցներում տեսած կլինեք, մարդկանց են գործից ազատում լայքերի համար, մարդկանց հետ շփումների համար, այլ թիմերի հետ համագործակցելու համար»։ Ասլանյանը նշեց նաև, որ քաղաքացիների հետ աշխատանքի միջոցով են փորձում նման երևույթների դեմ պայքարել․ «Մենք հակադարձում ենք, քաղաքացիներին հորդորում ենք չտրվել սադրանքների, որովհետև ամեն դեպքում վանաձորցին պետք է ընտրի համայնքի ապագա ղեկավարին, և նաև այն մարդկանց, աշխատանքային խմբին, ում ինքը վստահում է։ Ավելի շատ քաղաքացիների հետ աշխատանքով ենք անում, քան այլ դեբատների մեջ մտնելով»։ Համայնքապետի թեկնածուի դիտարկմամբ՝ Վանաձորում գլոբալ խնդիրներ կան, որոնք կարող են լուծվել մեծ ներդրումների միջոցով, կառավարության աջակցությամբ, որովհետև համայնքային բյուջեով հնարավոր չէ այդ հարցերը լուծել․ «Մասնավորապես տնակային ավան ունենք Վանաձորում, 84 բազմաբնակարան շենքեր ունենք, որոնք կամ պիտի ամրացվեն, կամ պետք է որոշվի դրանց հետագա ճակատագիրը։ Մնացած հարցերը, որոնք ավելի համայնքային լուծելիության տիրույթում են, դրանք հերթով լուծվում են, հերթականությամբ գնում ենք, առաջիկայում կլինի տրանսպորտային ցանցի վերազինում»։ Նա նաև ասաց, որ ներդրումների միջոցով են պատկերացնում տնակային ավանների խնդրի լուծումը։ Ասլանյանի համոզմամբ՝ իրենց առաջարկած լուծմամբ խնդիրը դանդաղ, բայց հաստատուն կերպով կլուծվի․ «Մենք ունենք տարածքներ, որտեղ գտնվում են այդ տնակային ավանները, ներդրումային մի ծրագրի միջոցով այդ տարածքը կտրամադրվի այլ ներդրումային ծրագրի, որի փոխարեն կկարողանանք լուծել տնակային ավանի խնդիրները»։ Վանաձորը ներառվել է համայնքների խոշորացման նախագծում և գտնվում է խոշորացման փուլում․ ըստ կառավարության ներկայացրած և ԱԺ-ում ընդունված այդ նախագծի՝ Վանաձոր քաղաքին են միանում նաև Գուգարք, Դարպաս, Շահումյան գյուղերը։ Ասլանյանը վստահեցրեց՝ լավատեղյակ է Վանաձորին միացող գյուղերի խնդիրներին․ «Դրանք մեզ կպած գյուղական համայնքներ են, բոլորի խնդիրներին գրեթե ամբողջությամբ ծանոթ եմ։ Այս պարագայում անհրաժեշտ է մուլտիմշակութային նոր տիրույթ ստեղծել, քանի որ Վանաձորը երբեք գյուղական բաղադրիչ չի ունեցել, պետք է աշխատենք, որ ոչ քաղաքը գյուղին կլանի, ոչ էլ գյուղը քաղաքին կլանի, որպեսզի մենք բազմաշերտ մշակույթ ստեղծենք, որ մեկը մյուսին լրացնեն, և երկուսն էլ համաչափորեն զարգանան»։ Իսկ թե ինչու Մամիկոն Ասլանյանը այս անգամ ընտրություններին չի մասնակցում ՀՀԿ ցուցակով, վերջինս այսպես պատասխանեց․ «Ինչով որ հարմար եմ գտել, դրանով էլ մասնակցում եմ»։ Նա վստահ է՝ վանաձորցիները ՏԻՄ ընտրություններն որոշում կկայացնեն՝ համեմատություն կատարելով և մի շարք հանգամանքներ հաշվի առնելով։ Վանաձորի ՏԻՄ ընտրություններին 10 քաղաքական ուժ է մասնակցելու՝  9 կուսակցություն և 1 դաշինք։ Հայաստանի աշխատավորական սոցիալիստական կուսակցությունը ընտրություններին մասնակցելու է Վանաձոր համայնքի ղեկավարի առաջին տեղակալ, Վանաձորի ավագանու անդամ Արկադի Փելեշյանի գլխավորությամբ, «Այլանս» առաջադիմական ցենտրիստական կուսակցությունը՝ ՀՀ էլեկտրական ցանցերի Դեբեդ մասնաճյուղի իրացման պետ Կարեն Էդարյանի գլխավորությամբ։ «Քաղաքացիական պայմանագիր» կուսակցության համայնքապետի թեկնածուն Լոռու ներկայիս մարզպետ Արամ Խաչատրյանն է։ «Հանրապետություն» կուսակցությունը մասնակցելու է Վազգեն Թորոսյանի գլխավորությամբ․ վերջինս չի աշխատում։ «Ապրելու երկիր» կուսակցության ցուցակն էլ գլխավորելու է Արտավազդ Ալավերդյանը, որը Վանաձորի «Դիետ» ՍՊԸ-ի գործադիր տնօրենն է։ «Լուսավոր Հայաստան» կուսակցության համայնքապետի թեկնածուն Հրանտ Այվազյանն է, ով 7-րդ գումարման Ազգային ժողովի «Լուսավոր Հայաստան» խմբակցության անդամ է եղել, հիմա դասախոսում է  Հայաստանի ազգային պոլիտեխնիկական համալսարանի Վանաձորի մասնաճյուղում։ «Հայրենիք» կուսակցությունը Վանաձորի ՏԻՄ ընտրություններին մասնակցելու է Վահե Դոխոյանի գլխավորությամբ, որը «Հայրենիք» զարգացման հիմնադրամի Լոռու մարզային  գրասենյակի ղեկավարն է։ «Բարգավաճ Հայաստանի» ցուցակը գլխավորելու է Էդգար Բոջուկյանը, ով չի աշխատում։  Վանաձորի նախկին քաղաքապետ Մամիկոն Ասլանյանը ընտրություններին մասնակցելու է  «Մամիկոն Ասլանյան» դաշինքով․ նա այժմ չի աշխատում։  Հայաստանի կոմունիստական կուսակցությունն էլ ընտրություններին մասնակցելու է ՀԿԿ կենտկոմի առաջին քարտուղար, Վանաձորի քաղաքային կազմակերպության առաջին քարտուղար Արկադի Ղուկասյանի գլխավորությամբ։ Լուսանկարը՝ Մամիկոն Ասլանյանի ֆեյսբուքյան էջից Նանե Ավետիսյան
11:05 - 29 նոյեմբերի, 2021
Ի շահ Վանաձորի և վանաձորցու՝ պատրաստ ենք համագործակցել յուրաքանչյուր պետական կառույցի հետ․ Վահե Դոխոյան

Ի շահ Վանաձորի և վանաձորցու՝ պատրաստ ենք համագործակցել յուրաքանչյուր պետական կառույցի հետ․ Վահե Դոխոյան

Վանաձորում դեկտեմբերի 5-ին կանցկացվեն ՏԻՄ ընտրություններ՝ համամասնական ընտրակարգով։ «Հայրենիք» կուսակցության նախընտրական ցուցակը գլխավորում է «Հայրենիք» զարգացման հիմադրամի Լոռու մարզային գրասենյակի ղեկավար Վահե Դոխոյանը։ Վերջինս Infocom-ի հետ զրույցում ասաց, որ քարոզարշավն ընթանում է հանդարտ և հավասարակշռված․ «Ինչպես և մնացած բոլորը, մենք ակնկալում ենք, որ քաղաքապետը լինելու է մեր թիմից»։ Անդրադառնալով Վանաձորի՝ առաջնահերթ լուծում պահանջող խնդիրներին՝ Դոխոյանը նշեց՝ հաշվարկել են, որ համայնքի բյուջեն տարեկան կազմում է 2.5 միլիոն դոլար, իսկ այդ բյուջեով, նրա խոսքով, դժվար կլինի շոշափելի արդյունքների հասնել։ Այդ իսկ պատճառով փորձելու են ներդրումների միջոցով տարբեր ծրագրեր իրականացնել։ Այս պահին, ըստ Դոխոյանի, 4 այսպիսի ծրագիր ունեն, ներդրողների հետ արդեն պայմանավորվածություններ են ձեռք բերել․ «Մենք Թթուջուր տարածքից մինչև Մայմեխ սարի ստորոտ կառուցելու ենք ճոպանուղի, որը մոտ 2.5 միլիոն դոլարանոց ծրագիր է։ Տնակային ավանի հետ կապված ունենք մեր լուծման տարբերակը․ բանակցել ենք մեկ ներդրողի հետ, որը կառուցելու է 2 բազմաբնակարան շենք, տեղափոխելու ենք 330 ընտանիքների այդ շենք, իսկ այդ տնակային ավանը, որը տեղակայված է վանաձորցիներին հայտնի «Նաբերեժնի» հատվածում, այդտեղ ներդրողը կառուցելու է ատրակցիոններ, տուրիստական տարբեր ինֆրաստրուկտուրաներ։ Մենք ոչ թե ուղիղ բարտեր ենք անում մեր առաջարկը, այսինքն՝ տալիս ենք իրենց տարածք, որպեսզի բիզնես դնեն, դրա փոխարեն երկու շենք կառուցեն այդտեղ, այլ  կարևորն այն է, որ այդ մարդը մեզ է վստահում ու Վանաձորում այդ ծրագիրն իրականացնում է»։ Հաջորդ ծրագրով, համայնքապետի թեկնածուի խոսքով, նախատեսվում է Լոռու մարզում առողջության վերականգնման կենտրոն կառուցել․ «Օգտագործելու ենք մանկատան նախկին շենքը։ Մենք ֆրանսիական երկու ընկերության հետ ունենք պայմանավորվածություն, որ տրամադրելու են սարքավորումներ, բուժսարքավորումներ, մահճակալներ, և անհրաժեշտ մյուս սարքավորումները, որպեսզի կառուցենք առողջության վերականգնողական կենտրոն։ Ունենք «Ոչ մի բակ՝ առանց խաղահրապարակի» ծրագիր, սա էլ մի քանի փուլով ենք անելու։ Նախ անելու ենք խոշոր թաղամասերում, այնուհետև գուցե յուրաքանչյուր թաղամասում էլ կկառուցենք։ Մենք փորձ ունենք, արդեն 2 խաղահրապարակ կառուցել ենք Վանաձորում։ Նույն ներդրողը շատ ոգևորվել է, և պայմանավորվածություն ենք ձեռք բերել շարունակել այս ծրագիրը»։ Նա նաև վստահեցրեց, որ մանրամասնորեն ուսումնասիրել են Վանաձորի բոլոր խնդիրները՝ ըստ թաղամասերի․ «Անգիր գիտենք՝ որ շենքում կա վերելակի խնդիր, որ շենքում կա կոյուղու խնդիր, տանիքների խնդիր, այսինքն՝ բնակֆոնդի պահպանման խնդիր ունենք լուծելու։ Սա էլ, կարծում եմ, հետագայի հարց է, որ աստիճանաբար պետք է լուծենք։ Չենք ուզում փուչ խոստումներ տալ, որ գալու ենք առաջիկա մեկ տարում ամեն ինչ անենք,  բայց գիտենք խնդիրների մասին և կարծում եմ՝ երբ մարդիկ կտեսնեն, որ այս 4 ծրագրերը, որոնց մասին խոսեցի, ստացվում են, կհայտնվեն նաև նոր ներդրողներ, նաև պետական միջոցներով կլուծենք քաղաքի խնդիրները»։ Հարցին՝ արդյոք կիրակակացնե՞ն ներդրումային 4 ծրագրերը, եթե ավագանիում մեծամասնություն չունենան, Դոխոյանն ասաց, որ որոշ ծրագրեր իրականացնելու համար  իրենց պետք է ունենալ քաղաքային իշխանություն, սակայն որոշ ծրագրեր էլ իրականացնելու են՝ անկախ ընտրությունների արդյունքներից։ Համայնքապետի թեկնածուն նաև ասաց, որ պատրաստ են ի շահ Վանաձորի համագործակցել յուրաքանչյուր իշխանության հետ․ «Մենք պատրաստվում ենք ՏԻՄ ընտրություններին, ավագանին գործելու է 5 տարի, 5 տարվա ընթացքում Հայաստանում կարող է փոխվել իշխանություն, կարող է փոխվել մի քանի անգամ։ Իմ համար ու իմ թիմի համար ամենակարևորը Վանաձորի ու վանաձորցու շահն է, և այս իմաստով մենք, իհարկե, պատրաստ ենք համագործակցել ցանկացած պետական կառույցի հետ, որը կծառայի ի շահ Վանաձորի և վանաձորցու»։ Վանաձորը ներառվել է համայնքների խոշորացման նախագծում և այժմ խոշորացման փուլում է․ ըստ կառավարության ներկայացրած և ԱԺ-ում ընդունված այդ նախագծի՝ Վանաձոր քաղաքին են միանում Գուգարք, Դարպաս, Շահումյան գյուղերը։ Դոխոյանը վստահեցրեց՝ ծանոթ են Վանաձորին միացող 3 գյուղերի խնդրիներին, և նպատակ ունեն այդ գյուղերում զարկ տալ գյուղատնտեսությանը․ «Այս 3 համայնքները Վանաձորի հետ միշտ սերտ կապվածություն են ունեցել, կարելի է ասել, որ համարվել են Վանաձորին կից շատ մեծ թաղամասեր։ Այստեղ համադրումը պետք է շատ նուրբ տանենք ու զարկ տանք գյուղատնտեսությանը, բայց գյուղատնտեսության այն պահանջները բավարարենք, որոնք ունի այսօրվա զարգացող աշխարհը, և նաև կարողանանք ինտեգրել քաղաքային համայնքին»։ Դոխոյանի համոզմամբ՝ անհրաժեշտ է զարգացնել նաև ագրոտուրիզմը․  «Այսօր զբոսաշրջիկներին չեն հետաքրրքում ճոխ հյուրանոցները, այլ ավելի շատ հետաքրքրում է, որ մոտ լինեն բնությանը, բնական արտադրանքին։ Մենք ունենք փայլուն հնարավորություն՝ հաշվի առնելով նաև Լոռու մարզի հարուստ բնությունը, կարծում եմ՝ մեր մոտ դա ևս կստացվի»։ Նրա խոսքով՝ իրենց թիմը երիտասարդ է, նեղ քաղաքականացված չէ, թիմում կան ոլորտային մասնագետներ՝ բժիշկներ, երիտադարության, սպորտի, մշակույթի, բիզնեսի ներկայացուցիչներ, որոնք կարող են օգնել՝ ծրագրերը իրականացնելու հարցում։  Վանաձորի ՏԻՄ ընտրություններին 10 քաղաքական ուժ է մասնակցելու՝  9 կուսակցություն և 1 դաշինք։ Հայաստանի աշխատավորական սոցիալիստական կուսակցությունը ընտրություններին մասնակցում է Վանաձոր համայնքի ղեկավարի առաջին տեղակալ, Վանաձորի ավագանու անդամ Արկադի Փելեշյանի գլխավորությամբ, «Այլանս» առաջադիմական ցենտրիստական կուսակցությունը մասնակցում է ՀՀ էլեկտրական ցանցերի Դեբեդ մասնաճյուղի իրացման պետ Կարեն Էդարյանի գլխավորությամբ։ «Քաղաքացիական պայմանագիր» կուսակցության համայնքապետի թեկնածուն Լոռու ներկայիս մարզպետ Արամ Խաչատրյանն է։ «Հանրապետություն» կուսակցությունը մասնակցելու է Վազգեն Թորոսյանի գլխավորությամբ․ վերջինս չի աշխատում, «Ապրելու երկիր» կուսակցության ցուցակն էլ գլխավորում է Արտավազդ Ալավերդյանը, որը Վանաձորի «Դիետ» ՍՊԸ-ի գործադիր տնօրենն է։ «Լուսավոր Հայաստան» կուսակցության ցուցակը գլխավորելու է Հրանտ Այվազյանը, որը 7-րդ գումարման Ազգային ժողովի «Լուսավոր Հայաստան» խմբակցության անդամ է եղել, հիմա դասախոսում է  Հայաստանի ազգային պոլիտեխնիկական համալսարանի Վանաձորի մասնաճյուղում։ «Հայրենիք» կուսակցությունը Վանաձորի ՏԻՄ ընտրություններին մասնակցելու է Վահե Դոխոյանի գլխավորությամբ, որը «Հայրենիք» զարգացման հիմնադրամի Լոռու մարզային  գրասենյակի ղեկավարն է։ «Բարգավաճ Հայաստանի» ցուցակը գլխավորելու է  Էդգար Բոջուկյանը, ով չի աշխատում։  Վանաձորի նախկին քաղաքապետ Մամիկոն Ասլանյանը ընտրություններին մասնակցելու է  «Մամիկոն Ասլանյան» դաշինքով․ նա այժմ չի աշխատում։  Հայաստանի կոմունիստական կուսակցությունն էլ ընտրություններին մասնակցելու է ՀԿԿ կենտկոմի առաջին քարտուղար, Վանաձորի քաղաքային կազմակերպության առաջին քարտուղար Արկադի Ղուկասյանի գլխավորությամբ։   Լուսանկարը՝ Վահե Դոխոյանի ֆեյսբուքյան էջից    Նանե Ավետիսյան
15:23 - 25 նոյեմբերի, 2021
Վանաձորում առաջնային լուծում են պահանջում տարրական կենցաղային խնդիրները, որոնք կապված են քաղաքի առօրյայի հետ․ Արտավազդ Ալավերդյան

Վանաձորում առաջնային լուծում են պահանջում տարրական կենցաղային խնդիրները, որոնք կապված են քաղաքի առօրյայի հետ․ Արտավազդ Ալավերդյան

Վանաձոր համայնքում այս տարվա դեկտեմբերի 5-ին կանցկացվեն ՏԻՄ ընտրություններ՝ համամասնական ընտրակարգով։ «Ապրելու երկիր» կուսակցության նախընտրական ցուցակը գլխավորում է «Դիետ» ՍՊԸ-ի գործադիր տնօրեն Արտավազդ Ալավերդյանը։ Նրա դիտարկմամբ՝ Վանաձորում առաջնահերթ լուծում պահանջող խնդիրները հիմնականում կենցաղային բնույթի են․ «Տարրական կենցաղային խնդիրները դարձել են առաջնային։ Կցանկանայի, որ մեր խնդիրները լինեին զարգացմանը միտված պրոյեկտներ, որոնք պետք է իրականացնենք, բայց այսօր հրատապ են բոլոր տարրական կենցաղային խնդիրները՝ կապված քաղաքի առօրյայի հետ՝ աղբահանություն, ճանապարհներ, փողոցային առևտուր, տնակային ավաններ։ Չեմ կարող ինչ-որ հերթականություն դնել՝ ասելով, որ այս խնդիրը առաջինն է, մյուսը ընկնում է հետ»։ Համայնքապետի թեկնածուն վստահեցնում է, որ տնակային ավանների խնդրին լավ ծանոթ են, պատկերացնում են խնդրի լուծումը, սակայն այս պահին չեն ցանկանում մանրամասներ հրապարակել իրենց պատկերացրած լուծման վերաբերյալ․ «Ունենք հստակ ծրագիր, որը բացարձակապես չի նմանվում նախկին 30 տարիների ընթացքում տրված խոստումներին կամ մոտեցմանը։ Այն հողը, որի վրա դրված են այդ տնակները, և որոնք քաղաքային ֆոնդին են պատկանում, ոչ մեկը չի կարողանալու օտարել՝ առաջնայնությունը չտալով մարդկանց, որոնք 30 տարի այնտեղ են բնակվում։ Մարդիկ մի օր չեն քնելու, արթնանան ու տեսնեն, որ այդ հողը մի գործարարի են տվել, որն այդտեղ բիզնես կամ ինչ-որ պահեստներ է հիմնում»։ Նրա խոսքով՝ տնակներում ապրում են մարդիկ, որոնք տարբեր հանգամանքների բերումով են հայտնվել այնտեղ, ուստի այս հարցում տարբեր մոտեցումներ են ցուցաբերելու․ «Կան մարդիկ, որոնց դեպքում պետության կողմից օրենքով և բարոյապես կացարանի հարց լուծելը մի քիչ խնդրահարույց է, որովհետև մարդկանց տուն տվել են շատ վաղուց, տասնյակ տարիներ առաջ․ երկրաշարժի պատճառով այդ մարդիկ տնից զրկված են եղել, մարդկանց տունը տվել են, մարդիկ այդ տունը վաճառել են, նորից եկել են տնակում են ապրում, ասում են՝ մի հատ էլ տվեք։ Մենք ունենք տնակներում ապրող մարդկանց սեգմենտներ, դրանք բազմաթիվ են: Մյուս խումբը առհասարակ Վանաձոր եկել է 15-20 տարի առաջ, գնել է այդ տնակը, և այդտեղ է բնակվում։ Նրանք նույնպես մեր համաքաղաքացիներն են, սրան ուրիշ մոտեցում է լինելու։ Մարդիկ տուն ունենալու են, բայց թե ինչպես, ես դա չեմ բարձրաձայնելու, որովհետև երբ որոշակի կետերի լուծումները արտահայտում ենք, մարդկանց ծրագրերում դա կրկնվում է՝ մինչ այդ չլինելով»։ Աղբահանության խնդրի լուծման վերաբերյալ էլ Ալավերդյանն անիրատեսական է համարում քաղաքական մրցակիցների՝ աղբի վերամշակման գործարան կառուցելու վերաբերյալ ծրագրերը․ «Կարծում եմ՝ մարդիկ լավ չեն պատկերացնում, որ այսօր նման բան շրջանառելը մի քիչ իրատեսական չի։ Եթե 5 տարվա ընթացքում թե՛ կառավարություն, թե՛ քաղաքային իշխանությունը՝ մարզպետի գլխավորությամբ, այդ խնդրին առնչվում են ամեն օր ու նույնիսկ մեկ աղբարկղ չեն փոխել, մեկ աղբատար մեքենա ձեռք չեն բերել, ինչպե՞ս են խոսում նույն բյուջեի սահմաններում աղբի վերամշակման գործարան ստեղծելու մասին։ Մենք պատկերացնում ենք հակառակ ձևով․ մեր քաղաքում մի քանի ընկերություններ են իրականացնում աղբահանությունը։ Հսկայական գումարը, որ բյուջեից տրվում է այդ գործառույթը կատարելու համար, փոշիացվում է։ Չեմ ցանկանա բարեխղճության մասով ինչ-որ բաներ խոսել,  դա, իհարկե, քննարկման թեմա է, բայց այդ ամբողջ բյուջեն  բաժանվում է 5 կամ 4 մասի, ամենքի մասնաբաժինը լինում է 25%, որը բավականին քիչ է, որպեսզի մարդը կարողանա ձեռք բերել նոր մեքենա»։ Մեր զրուցակիցը հավելում է, որ իրավիճակն այլ կլինի, եթե մի քանի ընկերության փոխարեն աղբահանությունը կատարի մեկ խոշոր ընկերություն․ «Եթե գործ ունենանք խոշոր և կարող ընկերության հետ, այդ ժամանակ շահույթը ավելի մեծ է լինելու (իհարկե, տույժ տուգանքների մասին չենք մոռանալու, որովհետև եթե 2-րդ, 3-րդ անգամ քաղաքացին բողոք ունեցավ ու այդ հարցը շատ արագ չշտկվեց, այդ մարդը ունենալու է ֆինանսական լուրջ խնդիրներ) և տրամաբանորեն իմաստ է ունենալու ներդրում կատարել աղբահանության հետ կապված տեխնիկական հարցերի մեջ, որը բերելու է նման ընկերության կապիտալի մեծացմանը։ Իսկ հիմա, կոպիտ ասած, իրար մեջ «փայ-փայ» են արել, ո՞ւմ է հետաքրքրում, թե արդյունքում ինչ ենք ստանալու»։   Վանաձորը ներառվել է համայնքների խոշորացման նախագծում և գտնվում է խոշորացման փուլում․ ըստ կառավարության ներկայացրած և ԱԺ-ում ընդունված այդ նախագծի՝ Վանաձոր քաղաքին են միանում նաև Գուգարք, Դարպաս, Շահումյան գյուղերը։ Ալավերդյանը նշում է, որ ուսումնասիրել են Վանաձորին միացող գյուղերի խնդիրները․ «Խնդիրները կապված են թեկուզև տրանսպորտի հետ, որքանով մենք շփվել ենք, մարդիկ դեմ էին խոշորացմանը, իրենց ոչ ոք չի հարցրել։ Գյուղական համայնքի հողերը, ֆոնդերը տարբեր կատեգորիաներ ունեն ու ունեն խոտհարքի կատեգորիա։ Մեկը խոտհարք է, մեկը արոտավայր է, հիմա մտնելու է քաղաքի մեջ, ինչպե՞ս է լինելու, գյուղացիների համար դա մեծ հարց է։ Իրենք գյուղի բնակիչ են ու ուզում են գյուղում բնակվել, մարդիկ իրենց հացը վաստակում են գյուղական աշխատանքի միջոցով ու վատ էլ չեն ապրում»։   Նա ընդգծում է, որ իրենք նոր են դարձել քաղաքական թիմ. թիմի անդամների ճնշող մեծամասնությունը քաղաքականությամբ չի զբաղվել, բայց իրենց ոլորտներում կայացած մարդիկ են․ «Մենք ոչ մի ձևաչափով, ոչ մի տիպի կապերով կաշկանդված չենք, և դա ապացուցում է մեր քարոզարշավը և քարոզարշավի ոճը, և ամենակարևորը՝ մենք անկեղծ ենք»։ Վանաձորի ՏԻՄ ընտրություններին 10 քաղաքական ուժ է մասնակցելու՝  9 կուսակցություն և 1 դաշինք։ Հայաստանի աշխատավորական սոցիալիստական կուսակցությունը ընտրություններին մասնակցելու է Վանաձոր համայնքի ղեկավարի առաջին տեղակալ, Վանաձորի ավագանու անդամ Արկադի Փելեշյանի գլխավորությամբ, «Այլանս» առաջադիմական ցենտրիստական կուսակցությունը՝ ՀՀ էլեկտրական ցանցերի Դեբեդ մասնաճյուղի իրացման պետ Կարեն Էդարյանի գլխավորությամբ։ «Քաղաքացիական պայմանագիր» կուսակցության համայնքապետի թեկնածուն Լոռու ներկայիս մարզպետ Արամ Խաչատրյանն է։ «Հանրապետություն» կուսակցությունը մասնակցելու է Վազգեն Թորոսյանի գլխավորությամբ․ վերջինս չի աշխատում։ «Ապրելու երկիր» կուսակցության ցուցակն էլ գլխավորելու է Արտավազդ Ալավերդյանը, որը Վանաձորի «Դիետ» ՍՊԸ-ի գործադիր տնօրենն է։ «Լուսավոր Հայաստան» կուսակցության համայնքապետի թեկնածուն Հրանտ Այվազյանն է, ով 7-րդ գումարման Ազգային ժողովի «Լուսավոր Հայաստան» խմբակցության անդամ է եղել, հիմա դասախոսում է  Հայաստանի ազգային պոլիտեխնիկական համալսարանի Վանաձորի մասնաճյուղում։ «Հայրենիք» կուսակցությունը Վանաձորի ՏԻՄ ընտրություններին մասնակցելու է Վահե Դոխոյանի գլխավորությամբ, որը «Հայրենիք» զարգացման հիմնադրամի Լոռու մարզային  գրասենյակի ղեկավարն է։ «Բարգավաճ Հայաստանի» ցուցակը գլխավորելու է Էդգար Բոջուկյանը, ով չի աշխատում։  Վանաձորի նախկին քաղաքապետ Մամիկոն Ասլանյանը ընտրություններին մասնակցելու է  «Մամիկոն Ասլանյան» դաշինքով․ նա այժմ չի աշխատում։  Հայաստանի կոմունիստական կուսակցությունն էլ ընտրություններին մասնակցելու է ՀԿԿ կենտկոմի առաջին քարտուղար, Վանաձորի քաղաքային կազմակերպության առաջին քարտուղար Արկադի Ղուկասյանի գլխավորությամբ։   Նանե Ավետիսյան
18:08 - 24 նոյեմբերի, 2021
Վանաձորում առաջնային են սոցիալ-տնտեսական խնդիրները․ դրանք հնարավոր է լուծել աշխատատեղերի միջոցով․ Անդրանիկ Ղուկասյան

Վանաձորում առաջնային են սոցիալ-տնտեսական խնդիրները․ դրանք հնարավոր է լուծել աշխատատեղերի միջոցով․ Անդրանիկ Ղուկասյան

Վանաձոր համայնքում այս տարվա դեկտեմբերի 5-ին կանցկացվեն ՏԻՄ ընտրություններ՝ համամասնական ընտրակարգով։ Հայաստանի կոմունիստական կուսակցությունը ընտրություններին մասնակցելու է ՀԿԿ Վանաձորի քաղաքային կոմիտեի առաջին քարտուղար Անդրանիկ Ղուկասյանի գլխավորությամբ։ Վերջինս Infocom-ի հետ զրույցում ասաց, որ ակտիվ քարոզարշավ են անցկացնում․ «Բուկլետներ ու թերթ ենք լույս ընծայել, համապատասխան տեղերում անցկացնում ենք  հանդիպումներ։ Մենք մեր քարոզչությունն ենք անում, ու տեսնենք, թե ընտրություններին համապատասխան արդյունքները ինչպիսին կլինեն»։ Համայնքապետի թեկնածուի խոսքով՝ Վանաձորում մի շարք կենցաղային խնդիրներ կան, սակայն հանդիպումների ժամանակ բնակիչները հիմնականում բարձրացնում են սոցիալ-տնտեսական վիճակի հարցը, և համայնքապետի թեկնածուն սոցիալ-տնտեսական խնդիրների լուծումն է համարում իրենց առաջնահերթությունը․ «Որպես գաղափարական կուսակցություն, որը դեմ է այս հասարակարգին, մեր առաջնահերթ խնդիրը նաև ժողովրդի կողմից առաջարկված սոցիալ-տնտեսական վիճակն է՝ ինչպես Հայաստանում, այնպես էլ Կիրովականում։ Ժողովուրդը հիասթափված է․ հիասթափված է նաև իշխանություններից, որովհետև ոչ մի սոցիալ-տնտեսական հարց չի լուծվում այսօր՝ հատկապես թոշակառուների հետ կապված։ Նրանք բողոքում են, որ ցածր է թոշակը ու չի բարձրացվում, որպեսզի թոշակառուները կարողանան իրենց մինիմալ պահանջները հոգալ։ Նաև առաջնահերթ խնդիր է բազմաբնակարան շենքերի տանիքների հարցը, աղբահանության հարցը, տրանսպորտի աշխատանքի հարցը։ Բայց մեր խնդիրը այն է, որ ժողովրդի սոցիալ-տնտեսական վիճակն է շատ ծանր»։ Սոցիալ-տնտեսական խնդիրների լուծումը, Ղուկասյանի պատկերացմամբ, կարող է լուծվել աշխատատեղերի միջոցով․ «Եթե աշխատատեղ է լինում, նշանակում է՝ մարդու սոցիալ-տնտեսական վիճակը լավանում է։ Մենք Կոմունիստական կուսակցության ռուս գործընկերների հետ ծրագիր ունենք։ Եթե հաջողվի, որ մեր քաղաքապետի թեկնածուն ընտրվի, կաշխատենք նաև համապատասխան կոմունիստ նահանգապետերի՝ գուբերնատորների հետ, փորձի փոխանակում լինի։ Միգուցե նրանց հետ ինչ-որ մի ձևով այնպես անենք, որ աշխատատեղեր բացվեն, արդյունաբերական կլինեն, ֆաբրիկաներ կլինեն, բայց համապատասխան ձևով նաև օգտակար կլինենք, թե չէ անընդհատ խոսում են ներդրումների մասին, ու այս ժողովուրդը չտեսավ ոչ մի ներդրում։ Ներդրումը միայն իշխանության համար է, ներդրումները ցանկացած իշխանություն իր համար է ապահովում, որպեսզի պարգևավճարներ տան իրենց, ինչ-ինչ ձևերով իրենց աշխատավարձերը բարձրացնեն, բայց ոչ մեկը չի մտածում, թե հասարակ ժողովուրդը ինչպես է ապրելու իր 30-40 հազար թոշակով»,- ասաց նա՝ հավելելով, որ Կոմունիստական կուսակցության ռուս գործընկերների հետ արդեն ունեն որոշակի պայմանավորվածություններ։  Նա նաև նշեց՝ Հայաստանում և Վանաձորում հասարակարգի փոփոխություն պետք է լինի․ «Կապիտալիստական սիստեմը անընդունելի է և 30 տարի բերել է նրան, որ այսօր այս վիճակն է, սոցիալական վիճակը շատ վատ է նաև Կիրովականում»։ Վանաձորը ներառվել է համայնքների խոշորացման նախագծում և գտնվում է խոշորացման փուլում․ ըստ կառավարության ներկայացրած և ԱԺ-ում ընդունված այդ նախագծի՝ Վանաձոր քաղաքին են միանում նաև Գուգարք, Դարպաս, Շահումյան գյուղերը։ Ղուկասյանը նշեց, որ սխալ է համարում համայնքի խոշորացումը՝ ընդգծելով, որ այդպիսով Վանաձորում առկա խնդիրներին միանալու են Վանաձորին միացող 3 գյուղերի խնդիրները․  «Պետք է խոշորացվի այն ժամանակ, երբ այդ քաղաքի սոցիալական վիճակը նորմալ է, այսօր Կիրովականը բազում խնդիրներ ունի, և դրանց գումարվում են Դարպասի, Շահումյանի, Գուգարքի խնդիրները։ Հարկավոր էր լուծել խնդիրները, նոր հետո միացնել, չնայած՝ ես համոզված եմ, որ միացումը ոչ թե ինչ-որ սոցիալ-տնտեսական հարց է, այլ զուտ քաղաքական, չեմ ուզում փակագծերը բացել, այստեղ կա համապատասխան տոկոսներ ստանալու խնդիր, իրենց թվում է, որ իշխանություններից կարող են համապատասխան տոկոսներ ստանալ, բայց չգիտեն, որ մենք հանդիպումներ ենք ունեցել գյուղերում, այնտեղ ավելի բարդ է իրավիճակը, քան քաղաքում»։ Անդրանիկ Ղուկասյանը վստահեցրեց՝ ընտրվելու պարագայում բարձրաձայնելու են ժողովրդին հուզող բոլոր հարցերը․ «Ովքեր ընտրվում են, պարտավոր են այդ հարցերը բարձրացնել, ուրիշ հարց է, թե իշխանությունները կլսեն, թե չեն լսի։ Եթե հաջողվի առավելագույն տոկոս հավաքել և կուսակցությունը ունենա իր քաղաքապետի թեկնածուն, այդ ժամանակ մեր պահանջները իշխանություններին ավելի մեծ կլինեն և մենք կկարողանանք այդ հարցերը բարձրացնել ամենաբարձր մակարդակներում։ Ժողովրդի շրջանում շատ մեծ ոգևորություն կա Կոմունիստական կուսակցության հանդեպ, որովհետև իրենք էլ են ասում՝ տեսել ենք, որ իշխանությունները փոխվել են, բայց ոչ մի առաջընթաց ժողովրդի սոցիալ-տնտեսական վիճակում չի եղել»։ Վանաձորի ՏԻՄ ընտրություններին 10 քաղաքական ուժ է մասնակցելու՝  9 կուսակցություն և 1 դաշինք։ Հայաստանի աշխատավորական սոցիալիստական կուսակցությունը ընտրություններին մասնակցում է Վանաձոր համայնքի ղեկավարի առաջին տեղակալ, Վանաձորի ավագանու անդամ Արկադի Փելեշյանի գլխավորությամբ, «Այլանս» առաջադիմական ցենտրիստական կուսակցությունը մասնակցում է ՀՀ էլեկտրական ցանցերի Դեբեդ մասնաճյուղի իրացման պետ Կարեն Էդարյանի գլխավորությամբ։ «Քաղաքացիական պայմանագիր» կուսակցության համայնքապետի թեկնածուն Լոռու ներկայիս մարզպետ Արամ Խաչատրյանն է։ «Հանրապետություն» կուսակցությունը մասնակցելու է Վազգեն Թորոսյանի գլխավորությամբ․ վերջինս չի աշխատում, «Ապրելու երկիր» կուսակցության ցուցակն էլ գլխավորում է Արտավազդ Ալավերդյանը, որը Վանաձորի «Դիետ» ՍՊԸ-ի գործադիր տնօրենն է։ «Լուսավոր Հայաստան» կուսակցության ցուցակը գլխավորելու է Հրանտ Այվազյանը, որը 7-րդ գումարման Ազգային ժողովի «Լուսավոր Հայաստան» խմբակցության անդամ է եղել, հիմա դասախոսում է  Հայաստանի ազգային պոլիտեխնիկական համալսարանի Վանաձորի մասնաճյուղում։ «Հայրենիք» կուսակցությունը Վանաձորի ՏԻՄ ընտրություններին մասնակցելու է Վահե Դոխոյանի գլխավորությամբ, որը «Հայրենիք» զարգացման հիմնադրամի Լոռու մարզային  գրասենյակի ղեկավարն է։ «Բարգավաճ Հայաստանի» ցուցակը գլխավորելու է  Էդգար Բոջուկյանը, որը չի աշխատում։  Վանաձորի նախկին քաղաքապետ Մամիկոն Ասլանյանը ընտրություններին մասնակցելու է  «Մամիկոն Ասլանյան» դաշինքով․ նա այժմ չի աշխատում։  Հայաստանի կոմունիստական կուսակցությունն էլ ընտրություններին մասնակցելու է ՀԿԿ Վանաձորի քաղաքային կոմիտեի առաջին քարտուղար Անդրանիկ Ղուկասյանի գլխավորությամբ։   Լուսանկարը՝ Հայաստանի կոմունիստական կուսակցության ֆեյսբուքյան պաշտոնական էջից   Նանե Ավետիսյան  
15:24 - 24 նոյեմբերի, 2021
ԿԸՀ-ն ներկայացրել է Արզնի և Լերմոնտովո համայնքներում կայացած ընտրությունների նախնական արդյունքները

ԿԸՀ-ն ներկայացրել է Արզնի և Լերմոնտովո համայնքներում կայացած ընտրությունների նախնական արդյունքները

Երեկ՝ նոյեմբերի 14-ին, ՀՀ մի շարք համայնքներում կայացել են տեղական ինքնակառավարման մարմինների ընտրություններ։ Ստորև ներկայացնում ենք Կենտրոնական ընտրական հանձնաժողովի նախնական տվյալները Արզնի և Լերմոնտովո համայնքներում կայացած ՏԻՄ ընտրությունների վերաբերյալ․ Արզնի համայնքում կայացած ավագանու անդամի ընտրություններում 116 ձայնով առաջատար է Արտաշես Լալայանը: Համայնքում ընտրելու իրավունք ունեցող 2200 քաղաքացիներից քվեարկությանը մասնակցել է 200-ը։ Այլ թեկնածուների ստացած քվեների վերաբերյալ նախնական տվյալները՝ այստեղ։ Լերմոնտովոյի ավագանու անդամի ընտրություններում 46 ձայն ունի Վասիլի Կորոլյովը։ Նախնական տվյալները՝ այստեղ։ Այս համայնքում կայացել են նաև համայնքի ղեկավարի ընտրություններ․ 167 ձայնով հաղթել է Էդիկ Չախալյանը, մյուս թեկնածուն՝ Ռաֆիկ Խառատյանը, 17 ձայն է հավաքել։ Նշենք, որ Լերմոնտովոյում քվեարկելու իրավունք ունեցող 679 քաղաքացիներից ընտրությանը մասնակցել է 196-ը։
11:20 - 15 նոյեմբերի, 2021
Քվեարկության օրը առերևույթ հանցագործությունների վերաբերյալ հաղորդումներ չեն ստացվել․ դատախազություն

Քվեարկության օրը առերևույթ հանցագործությունների վերաբերյալ հաղորդումներ չեն ստացվել․ դատախազություն

ՀՀ Գլխավոր դատախազի խորհրդական Գոռ Աբրահամյանը ֆեյսբուքյան իր էջում գրում է. «Հարկ եմ համարում տեղեկացնել, որ 2021թ. նոյեմբերի 14-ին ՀՀ Լոռու մարզի Ստեփանավան և Լերմոնտովո համայնքներում, Սյունիքի մարզի Կապան համայնքում, Լոռու մարզի Արզնի համայնքում կայացած տեղական ինքակառավարման մարմինների ընտրություններում քվեարկության ամբողջ օրը ընտրական կամ ընտրություններին առնչվող այլ բնույթի առերևույթ հանցագործությունների վերաբերյալ հաղորդումներ, ահազանգեր իրավապահ մարմինները չեն ստացել, իրականացվող մշտադիտարկման ընթացքում չեն արձանագրվել նաև քրեական վարույթի շրջանակներում քննության առնելու ենթակա ԶԼՄ հրապարակումներ:  Տավուշի մարզի Իջևան համայնքում կայացած ՏԻՄ ընտրությունների առնչությամբ ստացվել է ընդամենը մեկ ահազանգ՝ առերևույթ կրկնակի քվեարկություն կատարելու փորձի վերաբերյալ, որի կապակցությամբ դատախազության հանձնարարությամբ քրեադատավարական կարգով նախապատրաստվում են նյութեր: Բացի նշվածը, այլ հանցավոր ընտրախախտումների վերաբերյալ ահազանգեր, հաղորդումներ չեն ստացվել:  Մինչև քվեարկության մեկնարկը, այսինքն ընտրարշավի ընթացքում Կապան համայնքի ՏԻՄ ընտրությունների հետ կապված ստացված է եղել առերևույթ ընտրական հանցագործության վերաբերյալ ընդամենը երկու ահազանգ, որոնք ՀՀ գլխավոր դատախազության և Սյունիքի մարզի դատախազության նախաձեռնությամբ դարձվել են ստուգման առարկա: Սակայն ստուգողական գործողությունների արդյունքում դրանք չեն հաստատվել և թողնվել են անհետևանք: Մյուս համայնքների կտրվածքով մինչև քվեարկությունն ընկած ժամանակահատվածում հանցավոր ընտրախախտումների վերաբերյալ ևս որևէ ահազանգ չի արձանագրվել»։
10:14 - 15 նոյեմբերի, 2021
Լուրջ խնդիր է 6 գյուղի համար, 7-8 կմ ճանապարհը դառնում է մոտ 150 կմ․ Գևորգ Փարսյանը՝ Կապան-Ճակատեն ճանապարհին ադրբեջանական անցակետեր տեղակայելու մասին |tert.am|

Լուրջ խնդիր է 6 գյուղի համար, 7-8 կմ ճանապարհը դառնում է մոտ 150 կմ․ Գևորգ Փարսյանը՝ Կապան-Ճակատեն ճանապարհին ադրբեջանական անցակետեր տեղակայելու մասին |tert.am|

tert.am: Դա շատ լուրջ խնդիր է մեզ համար, այլընտրանքային ճանապարհ չունենք, այլընտրանքային տարբերակը միայն Մեղրիով է ստացվում։ Այս մասին լրագրողների հետ զրույցում ասաց «Շանթ» դաշինքի Կապանի քաղաքապետի թեկնածու, գործող քաղաքապետ Գևորգ Փարսյանը՝ անդրադառնալով ԱԱԾ հաղորդագրությանը, ըստ որի ՝այս գիշեր Կապան-Ճակատեն ավտոճանապարհին Ադրբեջանը և Հայաստանը կտեղակայեն անցակետեր։ «Փաստորեն 7-8 կմ ճանապարհը դառնում է մոտ 150 կմ։ Մեր գյուղացիները այդքան ճանապարհ պիտի անցնեն, որ հասնեն Կապան։ Միակ այլընտրանքային ճանապարհը, որը կառուցված է 90-ականներին դա անտառամիջյան ծանր, դժվարանցանելի ճանապարհն է, որի վրա պետք է մեծ աշխատանք տարվի։ Մեծ խնդիր է, վաղվանից պետք է մտածենք 6 գյուղական բնակավայրերի բնակիչների մասին»,-ասաց նա։ Ինչ վերաբերում է հարցին, թե արդյոք նպատակահարմար կլինի, որ բնակիչները նույն ճանապարհով երթևեկեն և անցնեն ադրբեջանական մաքսակետով, ապա Փարսյանն ասաց, որ դրա մասին պետք է լրացուցիչ խոսել, անվտանգության հետ կապված հարցերից կախված կլինի։ Գևորգ Փարսյան նաև նշեց, որ այդ գյուղերի պարենային խնդիրը կլուծվի, քանի որ նշված երկար ճանապարհը կա, իսկ կարճ ճանապարհը Գեղանուշ համայնքով ճանապարհն է, որը շատ վատ վիճակում է, այնտեղ շինարարական աշխատանքները մեկնարկել են, միայն այն բանից հետո, երբ Որոտանի հատվածում ադրբեջանական մաքսակետ դրվեց։
09:56 - 15 նոյեմբերի, 2021
Ստեփանավանում հաղթանակ է տարել ՔՊ-ն․ ԿԸՀ-ն նախնական տվյալներ է ներկայացրել

Ստեփանավանում հաղթանակ է տարել ՔՊ-ն․ ԿԸՀ-ն նախնական տվյալներ է ներկայացրել

Երեկ՝ նոյեմբերի 14-ին, համամասնական ընտրակարգող ՏԻՄ ընտրություններ են տեղի ունեցել Կապան, Իջևան և Ստեփանավան համանքներում։ Կենտրոնական ընտրական հանձնաժողովի նախնական տվյալները՝ ստորև․ «Բարգավաճ Հայաստան» կուսակցություն - 705 ձայն կամ 13․8%«Հայ ազգային կոնգրես» կուսակցություն - 218 ձայն կամ 4․26%«Քաղաքացիական պայմանագիր» կուսակցություն - 4 004 ձայն կամ 78.4% Նշենք, որ Լոռու մարզի Ստեփանավան համայնքում ընտրելու իրավունք ուներ 13 343 քաղաքացի, քվեարկությանը մասնակցել է 5107-ը։ Ստեփանավանում ՀԱԿ նախընտրական ցուցակը գլխավորում էր Վանո Հակոբյանը, ՔՊ-ի ցուցակը՝ համայնքի ղեկավարի ժամանակավոր պաշտոնակատար Արմեն Գրիգորյանը, իսկ ԲՀԿ-ի ցուցակը՝ Հարություն Ղարագոզյանը։ Հիշեցնենք, որ երեկ ՏԻՄ համամասնական ընտրակարգով ընտրություններ են անցկացվել Ստեփանավան, Կապան և Իջևան համայնքներում, իսկ Արզնի և Լերմոնտովո համայնքներում՝ մեծամասնական ընտրակարգով հերթական ընտրություններ: Արզնի համայնքում ընթանում է ավագանու անդամի ընտրություն, Լերմոնտովոյում՝ համայնքի ղեկավարի և ավագանու անդամի ընտրություններ:  
09:55 - 15 նոյեմբերի, 2021
ՔՊ-ն Իջևանում առաջատար է․ ԿԸՀ նախնական տվյալներ

ՔՊ-ն Իջևանում առաջատար է․ ԿԸՀ նախնական տվյալներ

Տավուշի մարզի Իջևան համայնքում երեկ՝ նոյեմբերի 14-ին անցկացվել են ՏԻՄ ընտրություններ՝ համամասնական ընտրակարգով։ Ընտրությանը մասնակցում էր երկու ուժ՝ ՀՅԴ-ն և «Քաղաքացիական պայմանագիր» կուսակցությունը։ Ըստ Կենտրոնական ընտրական հանձնաժողովի նախնական տվյալների՝ ՀՅԴ-ն ստացել է 1964 ձայն կամ 15․86%, իսկ ՔՊ-ն՝ 10 003 ձայն կամ 80․78%։ ՔՊ-ի ավագանու ցուցակը գլխավորում է համայնքապետի պաշտոնակատար Արթուր Ճաղարյանը, իսկ ՀՅԴ-ի ավագանու ցուցակը՝ Վահան Ղազումյանը։ Նշենք, որ Իջևանում ընտրողների ընդհանուր թիվը  33 090 է, քվեարկությանը մասնակցել է 12 383-ը կամ 37․42%-ը։ Անվավեր քվեաթերթիկների քանակը 414 է։ Հիշեցնենք, որ երեկ ՏԻՄ համամասնական ընտրակարգով ընտրություններ են անցկացվել Ստեփանավան, Կապան և Իջևան համայնքներում, իսկ Արզնի և Լերմոնտովո համայնքներում՝ մեծամասնական ընտրակարգով հերթական ընտրություններ: Արզնի համայնքում ընթանում է ավագանու անդամի ընտրություն, Լերմոնտովոյում՝ համայնքի ղեկավարի և ավագանու անդամի ընտրություններ:
09:41 - 15 նոյեմբերի, 2021
«Շանթ դաշինքը» հաղթել է Կապանում․ԿԸՀ-ն նախնական տվյալներ է հրապարակել

«Շանթ դաշինքը» հաղթել է Կապանում․ԿԸՀ-ն նախնական տվյալներ է հրապարակել

ՀՀ կենտրոնական ընտրական հանձնաժողովը նախնական տվյալներ է հրապարակել՝ Սյունիքի մարզի Կապան համայնքում երեկ՝ նոյեմբերի 14-ին տեղի ունեցած ՏԻՄ ընտրությունների արդյունքների վերաբերյալ։ Նշենք, որ այստեղ ընտրություններն անցկացվել են համամասնալան ընտրակարգով։ Ըստ նախնական տվյալների՝ առաջատար է «Շանթ Դաշինք» ազգայնական կուսակցությունը, որին քվեարկել է 13 962 ընտրող կամ քվեարկությանը մասնակցած քաղաքացիների 69․5%-ը, երկրորդ ուժը՝ «Քաղաքացիական պայմանագիր» կուսակցությունը հավաքել է 5791 ձայն կամ 28․82%, անվավեր քվեաթերթիկները 331-ն են։ Կապանում ընտրելու իրավունք ուներ 31 673 քաղաքացի․ նրանցից քվեարկությանը մասնակցել է 20 087-ը կամ 63․41%-ը։ Նշենք, որ Կապանում «Շանթ Դաշինք»-ի համայնքապետի թեկնածուն գործող համայնքապետ Գևորգ Փարսյանն է, իսկ ՔՊ-ի թեկնածուն՝ ԱԺ ՔՊ խմբակցության պատգամավոր Դավիթ Դանիելյանը։ Հիշեցնենք, որ երեկ ՏԻՄ համամասնական ընտրակարգով ընտրություններ են անցկացվել Ստեփանավան, Կապան և Իջևան համայնքներում, իսկ Արզնի և Լերմոնտովո համայնքներում անցկացվում են մեծամասնական ընտրակարգով  հերթական ընտրություններ: Արզնի համայնքում ընթանում է ավագանու անդամի ընտրություն, Լերմոնտովոյում՝ համայնքի ղեկավարի և ավագանու անդամի ընտրություններ:
09:28 - 15 նոյեմբերի, 2021