Երևանի քաղաքապետարան

Երևանի քաղաքապետարանը համայնքային ծառայություններ իրականացնող պետական մարմին, որի նպատակն ու խնդիրն ավագանու և քաղաքապետի լիազորությունների լիարժեք և արդյունավետ իրականացման, ինչպես նաև քաղաքացիական իրավահարաբերություններին ավագանու և քաղաքապետի մասնակցության ապահովումն է։ Երևանի քաղաքապետը և ավագանին քաղաքապետարանի միջոցով համակարգում Երևանի ենթակայության հիմնարկների, առևտրային և ոչ առևտրային կազմակերպությունների գործունեությունը, կազմակերպում հանրապետական գործադիր մարմինների և դրանց՝ Երևանի տարածքային ծառայությունների հետ հարաբերությունները։

Քաղաքապետարանը ստեղծվում, վերակազմակերպվում և նրա գործունեությունը դադարեցվում է ավագանու որոշմամբ։

Երևանի քաղաքապետրանի մամուլի խոսնակն անդրադարձել է հեղեղատար համակարգի խնդիրներին

Երևանի քաղաքապետարանի մամուլի խոսնակ Հակոբ Կարապետյանը ֆեյսբուքյան իր էջում գրել է, որ երեկվա անձրևառատ եղանակը մեմաշատ երեկո է ապահովել սոցցանցերում. «Քաղաքի հեղեղատար համակարգի խնդիրը բացվեց հերթական անգամ: Հեղեղատար համակարգերի գլոբալ խնդրի մասին կխոսեմ վերջում, բայց նախ ասեմ, որ Երևան քաղաքի հեղեղատար համակարգերի շահագործումը, պահպանումը և սպասարկումը, դեռ 2006-ից, պայմանագրով իրագործում է «Վեոլիա գրուպ» ընկերությունը: Երևանի քաղաքապետարանը պայմանագրի կողմ չէ. պայմանագրի կատարման վերահսկողությունն իրականացնում է ՀՀ ՏԿԵՆ Ջրային կոմիտեն: Այնուհանդերձ, քանի որ սա քաղաքային ենթակառույց է և սրա անխափանության հարցը անմիջականորեն վերաբերում է քաղաքի բնակիչներին, Երևանի քաղաքապետարանը որոշակի գործառույթ իրականացնում է. մասնավորապես, կոմունալ ծառայության աշխատակիցները պարբերաբար իրենց ուսումնասիրությունների արդյունքում առաջարկներ են ներկայացնում Վեոլիային, խնդիրների դեպքում օգնում են դրանց հետևանքների վերացման գործում: Ինչպես, օրինակ, երեկ, երբ մեր կոմունալի աշխատակիցների օգնությամբ խցանումից մաքրվել են նախագահական նստավայրի տարածքի անձրևատար ուղիները: Քաղաքապետարանի առաջարկությամբ նաև նոր հեղեղատարներ են կառուցվում, և եթե նկատել եք, մի քանի թունելներում, որտեղ տարիներ առաջ պարբերաբար ջուր էր կուտակվում, երեկվա անձրևը խնդիր չի առաջացրել: Ինչ վերաբերում է հեղեղատար համակարգի անկատարության խնդրին ընդհանրապես, պետք է նշել, որ անցած տասնամյակների ինտենսիվ ու հաճախ չնորմավորված կառուցապատումը ևս իր զգալի ազդեցությունը թողել է: Օրինակ, Պռոշյան փողոցի անձրևային հոսքերը, որոնք ժամանակին լցվում էին Հրազդանի ձորն ու խառնվում գետի ջրերին, այժմ «բախվում են» ձորի երկայնքով կառուցված օբյեկտների պարիսպներին ու շարունակում են իրենց ճանապարհը Պռոշյանն ի վար՝ դեպի Լուսավորիչ ու Արշակունյաց պողոտա: Կամ, հենց երեկվա ամենադիտարժան դեպքը՝ Բաղրամյան 26-ի գարաժների հեղեղը, թերևս չէր լինի, եթե վերևում գտնվող Անտառային փողոցի կառուցապատման ընթացքում մանրամասն հաշվի առնվեին կառուցապատման ազդեցությունները, նախագծվեին անհրաժեշտ ենթակառույցները և այլն: Ամեն դեպքում, կրկնեմ, թեև խնդիրը քաղաքապետարանի ուղիղ լիազորությունների շրջանակում չէ, հեղեղատար համակարգերի հարցով մեր մասնագետները պարբերաբար զբաղվում են», – ասված է գրառման մեջ:

14:37 - 07 մայիսի, 2020

Երևանի քաղաքապետարանը ստացել է 2020 թվականի արտադրության երկու քաղաքային կոմունալ վակումային մեքենա

«Կապիտալ Բիլդ» ՍՊԸ-ի և Երևանի քաղաքապետարանի միջև 01.04.2020թ-ին կնքված նվիրաբերության պայմանագրով՝ Երևանի քաղաքապետարանը ի աջակցություն Երևան քաղաքի ճանապարհների մաքրման գործընթացի, ստացել է երկու, 2020 թվականի արտադրության քաղաքային կոմունալ վակումային մեքենա (փոշեկուլ): Նվիրաբերված մեքենաների ընդհանուր արժեքը կազմում է 100 մլն դրամ: Այս մեքենաները, միանալով արդեն իսկ համայնքային բյուջեի միջոցներով ձեռք բերված փոշեկուլներին, կծառայեն քաղաքում ճանապարհների մաքրման գործին:

18:35 - 06 մայիսի, 2020

Կներդրվի Երեւանի սոցիալական պաշտպանության նոր համակարգ. Երեւանի քաղաքապետարան

19:47 - 05 մայիսի, 2020

Երևանի ևս 4 փողոցներում գործարկվել են «հետիոտնային կանչ»-ի ռեժիմով լուսացույցներ

Մայրաքաղաքում անվտանգ երթևեկության ապահովումը քաղաքային իշխանության առաջնահերթություններից է: Երևանի քաղաքապետարանի աշխատակազմի տեղեկատվության և հասարակայնության հետ կապերի վարչությունից հայտնում են, որ խնդրին լուծում տալու նպատակով 2019թ. Երևանի քաղաքապետարանը մի շարք ծրագրեր իրականացրեց: Դրանցից մեկն էլ «հետիոտնային կանչ»-ի ռեժիմով աշխատող լուսացույցներով անցումների կահավորումն էր: «Կարևորելով երթևեկության անվտանգության կազմակերպումը Երևան քաղաքում՝ քաղաքապետի հանձնարարությամբ անցած տարեվերջին տեղադրվեց 5 «հետիոտնային կանչ»-ի ռեժիմով աշխատող լուսացուցային օբյեկտ, աշխատանքները շարունակվեցին նաև այս տարի, և մենք հիմա ականատես ենք 4 նոր լուսացուցային օբյեկտների գործարկմանը»,- նշում է Երևանի քաղաքապետարանի տրանսպորտի վարչության պետի ժ/պ Էդգար Գալստյանը: Ծրագրի ծավալները 2020թ. զգալիորեն աճել են: Ընթացիկ տարում հետիոտնի միջամտությամբ լուսացույցի ազդանշաններով կկարգավորվի 37 հետիոտնային անցում:«Առաջիկա օրերին կգործարկվեն ևս 5-ը, 2-ն էլ գտնվում են ընթացքում: Այսինքն՝ կունենանք ընդհանուր առմամբ 11 նոր լուսացուցային օբյեկտ, որոնք անվտանգ կդարձնեն հետիոտնի շարժը նշված ճանապարհահատվածներում: Իսկ ընդհանուր առմամբ 26 լուսացույցի նախագծերը գտնվում են ավարտական փուլում, որը ևս նախատեսում ենք մինչև տարեվերջ տեղակայել»,- նշում է Էդգար Գալստյանը: Արդեն իսկ ընթացքի մեջ են նաև 2021-ի համար նախատեսված նմանատիպ լուսացույցների տեղադրման նախագծային աշխատանքները: Հաջորդ տարի կտեղադրվի «հետիոտնային կանչ»-ի ռեժիմով ևս 37 լուսացույց: Ծրագիրն իրականացնելու համար ՃՈ-ի հետ համատեղ գույքագրվել են մայրաքաղաքի խնդրահարույց կետերը. ցանկում ներառվել են նաև դպրոցներին, մանկապարտեզներին, ուսումնական այլ հաստատություններին ու մշակութային օջախներին հարակից տարածքները: Անվտանգ երթևեկության ապահովմանն ուղղված հաջորդ քայլը կամուրջներն ու էստակադաները գիշերային լուսավորությամբ կահավորելն է: Նշված հատվածներում, ի դեպ, տեղադրվում են էներգախնայող LED լուսատուներ, որոնք նաև ավելի պայծառ լուսավորություն են ապահովում: «Տեսնում եք՝ ինչ տեսարան ենք ստացել: Ընդհանուր առմամբ, այս ամեն ինչն արվում է, որ մեր վարորդներն ավելի ապահով երթևեկեն, վթարներն ավելի կպակասեն: Հետագա պլաններում նախատեսում ենք Երևանի բոլոր թունելներն արդիականացնել LED լուսատուներով»,- ասում է «Երքաղլույս» ՓԲԸ տնօրեն Գալուստ Վարդանյանը:Երևանում, ՏԻ մասին օրենքի համաձայն, ճանապարհային երթևեկության կարգավորումը, այդ թվում՝ լուսացույցների տեղադրումն ու գծանշումները, քաղաքապետի պատվիրակված լիազորություններից է, սակայն 2009-ից կառավարության որոշմամբ այդ գործառույթները պատվիրակվել են Ճանապարհային ոստիկանության ծառայությանը: Համապատասխանաբար, բյուջեն ևս հատկացվում է ՃՈ-ին: Սակայն հաշվի առնելով մայրաքաղաքում անվտանգ երևեկության ապահովման կարևորությունը՝ Երևանի քաղաքապետի հանձնարարությամբ փոխօգնության կարգով համայնքը ՃՈ-ի հետ համատեղ իրականացնում է տարբեր ծրագրեր:

16:15 - 04 մայիսի, 2020

Երևանում հետիոտնային կանչի ռեժիմով նոր լուսացույցեր կան

Երթևեկության անվտանգության ապահովման և կազմակերպման նկատառումով Երևանում հետիոտնային կանչիռեժիմով նոր լուսացույցեր կգործարկվեն։ 2020-ի ապրիլի 30-ից Երևանի ևս 4 փողոցի չկարգավորվող հետիոտնային անցումներում կկատարվի երթևեկության կազմակերպման փոփոխություն․ Մոլդովական փողոց՝ հ. 27/7, Նորագավիթ 1-ին փողոց 6-րդ փողոցների հատման մասում, Գլինկայի փողոց՝ հ.19, Մ. Բաբաջանյան փողոց՝ հհ.46, 146։ Նշված հետիոտնային անցումներում, ինչպես նաև՝ Արշակունյաց պողոտա հհ.12, 15, Աճառյան փողոց քարի մոտ, Լենինգրադյան փողոց հ.10, Թբիլիսյան խճուղի հ.73/2, Քանաքեռցու փողոց հ.117 հասցեներում տեղակայվել են «հետիոտնային կանչի» ռեժիմով աշխատող լուսացույցեր, որոնք կգործարկվեն առաջիկայում։ Այդ ճանապարհահատվածներով տրանսպորտային միջոցների երթևեկության ու հետիոտնային անցումներով հետիոտների տեղաշարժի հերթականությունը հետիոտների միջամտությամբ կկարգավորվի լուսացույցի ազդանշաններով։ Միաժամանակ աշխատանքներ են տարվում՝ Բաղրամյան պողոտա - Երզնկյան փողոց խաչմերուկում և Զ. Քանաքեռցու փողոց հհ.63, 65 հասցեներում առկա հետիոտնային անցումներում հետիոտնային կանչի ռեժիմով աշխատող լուսացուցային օբյեկտների տեղակայման ուղղությամբ։

14:59 - 30 ապրիլի, 2020

Քաղաքապետ Մարությանն ավագանու նիստում հնչած խնդիրների հարցով խորհրդակցություն է հրավիրել

Երևանի ավագանու ապրիլի 28-ի նիստում բարձրացված խնդիրներին լուծումներ տալու նպատակով Երևանի քաղաքապետ Հայկ Մարությանն աշխատանքային խորհրդակցություն է անցկացրել մի շարք ոլորտների պատասխանատուների հետ: «Կարծում եմ՝ այս պրակտիկան շատ ճիշտ է, որ հենց ավագանու նիստից հետո այն հարցերը, որոնք բարձրացվում են մեր գործընկերների՝ ավագանու անդամների կողմից, սկսեն միանգամից իրենց լուծումները ստանալ: Իրապես գործադիրը զգում է, որ որոշակի կետեր կան, որոնք ավելի մեծ ուշադրություն են պահանջում»,- ընդգծել է քաղաքապետը: Ինչպես տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, անդրադառնալով հաշմանդամություն ունեցող անձանց համար նախատեսված ավտոկայանատեղիներին՝ քաղաքապետ Մարությանն ընդգծել է, որ պետք է հետևողական աշխատանք տարվի այլ վարորդների կողմից դրանց օգտագործումն արգելելու ուղղությամբ: «Հաշմանդամություն ունեցող անձանց համար նախատեսված կայանատեղիները պետք է ավելի պաշտպանված լինեն և միգուցե, եթե հնարավոր է, ավելի շատանան: Սա ինձ համար շատ կարևոր հարց է, և ես կակնկալեմ նաև մեր գործընկերների՝ ոստիկանության միջամտությունն այդտեղ: Հետագայում, կարծում եմ, օրենքների փոփոխության անհրաժեշտություն կլինի, և ես ակնկալում եմ նաև ԱԺ մեր գործընկերների կողմից աջակցություն»,- նշել է Հայկ Մարությանը: Երևանի քաղաքապետարանի շինբարեկարգման ծրագրերում վերջին տարիներին զգալի տեղ է զբաղեցնում նոր մայթերի կառուցումն ու բարեկարգումը: Քաղաքապետն ընդգծել է, որ մայթերը հետիոտնի համար պետք է լինեն ավելի հասանելի և հարմարավետ: «Բոլորին հայտնի է և իմ, և ձեր դիրքորոշումն այստեղ, որ մենք միշտ մայթերի կողմից ենք, և եթե ընտրություն կա, որը լայնանա, որը նեղանա, մենք կողմնակից ենք մայթերի լայնացմանը, որպեսզի մարդիկ իրենց ավելի հարմարավետ զգան իրենց քաղաքում: Իսկ վարորդները պետք է համակերպվեն այն իրավիճակի հետ, որը կա: Այո՛, մեծ քաղաքներում, բազմամարդ քաղաքներում և տրանսպորտով լի քաղաքներում այնպես է արվում, որ վարորդները պետք է հրաժարվեն կամ նվազագույնի հասցնեն ավտոմեքենայով կենտրոն գալու պրակտիկան: Ուրիշ տարբերակ մենք չունենք կենտրոնը բեռնաթափելու»,- ընդգծել է քաղաքապետը: Խորհրդակցության ընթացքում քաղաքապետն անդրադարձել է նաև Երևանի քաղաքապետարանի գլխավոր մասնաշենքի մուտքը հաշմանդամություն ունեցող անձանց համար մատչելի դարձնելու խնդրին: Հանձնարարվել է կիրառել լուծում՝ մի կողմից մուտքը մատչելի դարձնելու, մյուս կողմից՝ քաղաքապետարանի շենքի ճարտարապետական տեսքը անխաթար պահելու համար: Մատչելիության սկզբունքով լուծումներ կտրվեն նաև վարչական շրջանների շենքերում:

20:45 - 29 ապրիլի, 2020

Հրապարակվել է Երևանի քաղաքապետարանի հայտարարած 100 ավտոբուսների մրցույթը

Եվրոպայի վերակառուցման և զարգացման բանկի պաշտոնական էջում հրապարակվել է Երևանի քաղաքապետարանի հայտարարած 100 ավտոբուսների մրցույթը: Այս մասին հայտնում է Երեւանի քաղաքապետարանի մամուլի ծառայությունը։ Սա նշանակում է, որ տրանսպորտային բարեփոխումների իրացման ընթացքում հասել ենք հերթական հանգրվանին: Կորոնավիրուսային համավարակի հարուցած ժամանակային բարդություններից հետո մենք վերջապես հայտարարում ենք ավտոբուսների մրցույթը: Մրցույթով նախատեսում ենք ձեռք բերել 12-մետր երկարության, ցածր հարթակով, հաշմանդամություն ունեցող անձանց համար հարմարեցված, բնական գազի շարժիչով 100 ավտոբուս, որոնց լավագույն միջազգային չափանիշները մանրամասն մշակված և ներկայացված են մրցութային փաթեթում: Մրցույթը բաց կլինի մինչև ս. թ. հունիսի 12-ը:

22:26 - 28 ապրիլի, 2020

Վլադիլեն Բալյանին կշնորհվի Երևանի պատվավոր քաղաքացու կոչում |news.am|

news.am: ՀՀ ժողովրդական արտիստ, կոմպոզիտոր Վլադիլեն Բալյանին 96-րդ տարեդարձի առթիվ, երաժշտարվեստի բնագավառում ունեցած վաստակի, երկարամյա անբասիր աշխատանքով Երևանի մշակութային զարգացման գործում ունեցած նշանակալի ավանդի և հայկական մշակույթի զարգացմանն ուղղված բեղմնավոր գործունեության համար կշնորհվի «Երևանի պատվավոր քաղաքացի» կոչում։ Միաձայն որոշումը կայացվեց Երևանի ավագանու 4-րդ նստաշրջանի 3-րդ նիստի ընթացքում։ Երևանի ավագանու Մշակույթի, կրթության, սոցիալական հարցերի մշտական հանձնաժողովը նախագծին տվել է դրական եզրակացություն։ «Իմ քայլը» խմբակցության ավագանու անդամ Լուսինե Գևորգյանը նշեց, որ Երևանի ավագանու անդամները սեփական նախաձեռնությամբ համավարակի օրերին այցելել են տարեց արվեստագետներին։ «Ավագանու անդամներն այցելել են մեր արվեստագետներին, տարել էին պարենային արկղեր, որպեսզի նրանք մնան տանը և չվտանգեն իրենց առողջությունն ու չհիվանդանան»,- նշեց Գևորգյանը։

18:44 - 28 ապրիլի, 2020

Երեւանի ավագանին որոշում կայացրեց «Թումո» հիմնադրամին հողի հարկի արտոնություն տրամադրել |news.am|

news.am: Երեւանի ավագանին իր այսօրվա՝ ապրիլի 28-ի նիստում որոշում կայացրեց «Թումո» հիմնադրամին հողի հարկի արտոնություն տրամադրել: Որոշման մեջ ասվում է. «Հաշվի առնելով Երևանի քաղաքապետի առաջարկությունը, ղեկավարվելով ‹‹Հողի հարկի մասին›› օրենքի 10-րդ հոդվածի 4-րդ մասով և Հայաստանի Հանրապետության կառավարության 2012 թվականի հունիսի 22-ի թիվ 822-Ն որոշմամբ հաստատված կարգի 4-րդ կետով` Երևան քաղաքի ավագանին որոշում է. 1. Երևանի Հալաբյան փողոցի հ. 2 հասցեում` Թումանյանի անվան զբոսայգում գտնվող, Սիմոնյան կրթական հիմնադրամին (ՀՎՀՀ 01245672) անհատույց օգտագործման իրավունքով պատկանող հողամասի համար սահմանել հողի հարկի արտոնություն` ազատելով 2497149 /երկու միլիոն չորս հարյուր իննսունյոթ հազար հարյուր քառասունինը/ դրամի չափով հողի հարկի վճարումից /ապառք՝ 2244691 դրամ, տույժ՝ 252458 դրամ/»: Որոշման հիմնավորման մեջ ասվում է. «Երևանի Թումանյանի անվան զբոսայգու զբաղեցրած հողամասն անհատույց օգտագործման իրավունքով պատկանում է Սիմոնյան կրթական հիմնադրամին /վկայական` 20.09.2017թ. հ.20092017-01-0206/: Հաշվի առնելով Սիմոնյան կրթական հիմնադրամի կողմից այգին բարեկարգելու ու պահպանելու նպատակով իրականացված մեծածավալ աշխատանքը, ներդրված ֆինանսական միջոցները, ինչպես նաև այն հանգամանքը, որ տարածքի բնակիչները անարգել մուտք են գործում և կազմակերպում են իրենց հանգիստը այգու տարածքում, Երևան քաղաքի ավագանու որոշումներով նշված կազմակերպությանը 2014, 2015, 2016, 2017 և 2018 թվականների համար տրամադրվել էր հողի հարկի արտոնություն: Հալաբյան փողոցի հ.2 հասցեում հիմնադրամին անհատույց օգտագործման իրավունքով պատկանող` հողի հարկով հարկվող օբյեկտ համարվող հողամասի 2019 թվականի հողի հարկի գումարը 19.03.2020 թվականի դրությամբ կազմում է 2497149 դրամ: Սիմոնյան կրթական հիմնադրամը իրականացնում է բարեգործական կրթական ծրագրեր, միևնույն ժամանակ հիմնադրամի կողմից պարբերաբար կատարվում են այգու պահպանման և բարեկարգման աշխատանքներ: Հաշվի առնելով հանրության համար Սիմոնյան կրթական հիմնադրամի կողմից Երևանի Հալաբյան փողոցի հ.2 հասցեում գտնվող զբոսայգու բարեկարգման, այգու պահպանման ուղղությամբ կատարված աշխատանքների ծավալը, այդ տարածքում իրականացվող կրթական ծրագրերի դերն ու նշանակությունը, ինչպես նաև կարևորելով Թումանյանի անվան զբոսայգին մշտապես ըստ նշանակությամբ օգտագործվելու և բարեկարգված պահելու անհրաժեշտությունը, առաջարկվում է Սիմոնյան կրթական հիմնադրամին տրամադրել հողի հարկի արտոնություն:

17:15 - 28 ապրիլի, 2020

Երեւանի ավագանու որոշմամբ՝ Հայաստանի կույրերի միավորումն ազատվեց 3 միլիոն 244 հազար դրամի գույքահարկից |armtimes.com|

armtimes.com: Երեւանի ավագանու որոշմամբ՝ «Հայաստանի կույրերի միավորում» հաշմանդամների հասարակական կազմակերպությունն ազատվեց 3 միլիոն 244 հազար 259 դրամից: Հիմնավորման մեջ նշվում է, որ կազմակերպությունը չունի ֆինանսական միջոցներ եւ գտնվում է ֆինանսական ծանր կացության մեջ, որի հետեւանքով չի կարողանում կատարել գույքահարկի հարկային պարտավորությունները: Ելնելով վերոգրյալից՝ Երեւան քաղաքի ավագանին որոշել է սեփականության իրավունքով միավորմանը պատկանող Ավ. Իսահակյան փողոցի 18/3, 16 hամար 3/3, 16 hամար 3/2, 16ա, 16ա hամար 28 եւ 18, ինչպես նաեւ Վարդանանց փողոցի 109 հ. 37 եւ Քաջազնունու փողոցի թիվ 1 հասցեներում գտնվող շինությունների նկատմամբ սահմանել գույքահարկի արտոնություն՝ ազատելով գույքահարկի վճարումից:

17:04 - 28 ապրիլի, 2020

Երևանում կտեղադրվի Մահաթմա Գանդիի արձանը

Երևանի ավագանին այսօր կայացած նիստում հավանություն տվեց Հալաբյան և Մարգարյան փողոցների միջանկյալ զբոսայգու տարածքում տեղադրել համաշխարհային պատմության ականավոր քաղաքական գործիչ, Հնդկաստանի ազգային առաջնորդ, փիլիսոփա Մահաթմա Գանդիի արձանը: Նախաձեռնությունն ուղղված է Հայաստանի և Հնդկաստանի միջև բարեկամական կապերի ամրապնդմանն ու ընդլայնմանը: Արձանը կտրամադրի հնդկական կողմը, ինչպես նաև կհոգա այն Երևան տեղափոխելու, պատվանդանի կառուցման ու տեղադրման հետ կապված բոլոր ծախսերը:

16:59 - 28 ապրիլի, 2020

Երեւանի ավագանին ՀՀ նկարիչների միավորմանն ազատեց 3 տարվա չվճարված գույքահարկից. գումարը 9 միլիոն 381 հազար դրամ է |armtimes.com|

armtimes.com: Երեւանի ավագանին այսօր որոշեց «Հայաստանի նկարիչների միավորում» հասարակական կազմակերպությանն ազատել 9 միլիոն 384 հազար դրամ գույքահարկի վճարումից: Հայաստանի նկարիչների միավորմանը սեփականության իրավունքով պատկանող Կենտրոն վարչական շրջանի Աբովյան փողոցի 16, 16/3 համար 40 եւ Աբովյան 16/3 համար 38 հասցեներում գտնվող շինությունների 2017, 2018 եւ 2019 թվականների գույքահարկի գումարը 2020 թվականի մարտի 19-ի դրությամբ կազմում է 9 միլիոն 381 հազար 284 դրամ: Կազմակերպությունը չունի ֆինանսական միջոցներ եւ գտնվում է ֆինանսական ծանր կացության մեջ, որի հետեւանքով չի կարողանում կատարել գույքահարկի հարկային պարտավորությունները:

16:47 - 28 ապրիլի, 2020

Հայաստանի ժուռնալիստների միությանը տրամադրվեց գույքահարկի արտոնություն |armenpress.am|

armenpress.am: Երևան քաղաքի ավագանու 4-րդ նստաշրջանի 3-րդ նիստին ավագանու անդամները որոշում կայացրին՝ «Հայաստանի ժուռնալիստների միություն» ՀԿ-ին սեփականության իրավունքով պատկանող, Պուշկինի փողոց 3/1 հասցեում գտնվող շինության նկատմամբ սահմանել գույքահարկի արտոնություն։ Որոշման համաձայն ՀԿ-ն ազատվում է 2017, 2018, 2019 թվականների 6 մլն 540 հազար 987 դրամի չափով գույքահարկի վճարումից։ Երևանի ավագանու ֆինանսավարկային և տնտեսական հարցերի մշտական հանձնաժողովը նախագծին տվել է բացասական եզրակացություն։ «Իմ քայլը» խմբակցության ավագանու անդամ Իզաբելլա Աբգարյանը ելույթի ժամանակ, նշեց, որ ինքը ձեռնպահ կմնա և չի մասնակցի տվյալ նախագծի քվեարկությանը։ «Այս հարցը սուբյեկտիվ է, իսկ ինձ համար կարող է կրկնակի սուբյեկտիվ լինել, քանի որ հանդիսանում եմ նույն դաշտում գործող մեկ այլ ՀԿ-ի՝ Ֆրանկոֆոն լրագրողների միության գլխավոր քարտուղար։ Ես ինձ իրավունք չեմ վերապահում մասնակցել այս քվեարկությանը, որպեսզի շահերի բախում չլինի»,- ասաց Աբգարյանը։ Որոշումն ընդունվեց 19 կողմ, 7 դեմ և 11 ձեռնպահ ձայներով։

16:35 - 28 ապրիլի, 2020

Երևանի կրկեսին հարակից պուրակը կանվանակոչվի Լեոնիդ Ենգիբարյանի անվամբ

Երևանի ավագանին այսօր կայացած նիստում հավանություն տվեց Սուրբ Գրիգոր Լուսավորչի և Ագաթանգեղոսի փողոցների խաչմերուկի անկյունային հատվածի՝ Երևանի կրկեսին հարակից պուրակն անվանակոչել ՀԽՍՀ ժողովրդական արտիստ, կրկեսի հայ դերասան, մնջկատակ, ծաղրածու, գրող և թատերական ռեժիսոր Լեոնիդ Ենգիբարյանի անվամբ՝ «Լեոնիդ Ենգիբարյանի անվան պուրակ»:

16:13 - 28 ապրիլի, 2020

Կորոնավիրուսի պատճառով մայրաքաղաքի կանաչապատումն իրականացրել են նորաստեղծ ՀՈԱԿ-ի 400 աշխատակիցներից ընդամենը 120-ը |armtimes.com|

14:37 - 28 ապրիլի, 2020

Հայկ Մարությանը ոսկե մեդալով է պարգևատրել Ցեղասպանության 105-րդ տարելիցին նվիրված միջոցառումների լուսային նկարիչ Վահագն Միքայելյանին և ձայնային ռեժիսոր Նարեկ Չախոյանին

Հայոց ցեղասպանության 105-րդ տարելիցին նվիրված միջոցառումները բարձր մակարդակով կազմակերպելու համար Երևանի քաղաքապետ Հայկ Մարությանը ոսկե մեդալով է պարգևատրել լուսային նկարիչ Վահագն Միքայելյանին և ձայնային ռեժիսոր Նարեկ Չախոյանին:

14:14 - 28 ապրիլի, 2020