Իրան

Իրանի Իսլամական Հանրապետությունն ինքնիշխան պետություն է Արևմտյան Ասիայում: Ավելի քան 83 միլիոն բնակչությամբ։ Իրանը աշխարհում բնակչության թվով 18-րդն է: 1.648.195 կմ քառակուսի տարածքով այն երկրորդ ամենախոշոր երկիրն է Մերձավոր Արևելքում և 17-րդը` աշխարհում: Իրանը հյուսիս արևմուտքում սահմանակից է Հայաստանին, Արցախին, Ադրբեջանին և Ադրբեջանի մաս կազմող Նախիջևանին, հյուսիսում Կասպից ծովին, հյուսիս արևելքում Թուրքմենստանին, արևելքում Աֆղանստանին և Պակիստանին, հարավում Պարսից ծոցին և Օմանի ծոցին, արևմուտքում Թուրքիային և Իրաքին :

Երկրի մայրաքաղաքը և խոշորագույն քաղաքը Թեհրանն է, որը համարվում է նաև երկրի մշակութային և տնտեսական կենտրոնը: Երկրի նախագահը Հասան Ռոհանին է, հոգևոր առաջնորդը Այաթոլլա Ալի Խամենեին է։

Ի պատասխան Դամասկոսում Իրանի հյուպատոսության վրա հարձակման՝ Իրանի ԻՀՊԿ-ը անօդաչուներով ու հրթիռներով հարվածել է Իսրայելի կոնկրետ թիրախների․ ԻՀՊԿ

Ի պատասխան սիոնիստական ռեժիմի հանցագործության, այն է՝ Դամասկոսում իրանական դեսպանական հյուպատոսական բաժնի վրա հարձակումը, ԻՀՊԿ-ի (Իսլամական հեղափոխության պահապանների կորպուս) ռազմաօդային ուժերը տասնյակ անօդաչուների եւ հրթիռների օգնությամբ հարված են հասցրել սիոնիստական ռեժիմի տարածքում գտնվող կոնկրետ թիրախների։ Այս մասին հայտնում է Իրանի «Իսլամական հեղափոխության պահապանների կորպուս»-ը։Հիշեցնենք, որ ՑԱԽԱԼ-ը (Իսրայելի պաշտպանության բանակը) հաստատել էր ավելի վաղ լրատվամիջոցներով տարածվող տեղեկությունները, որ Իրանից արձակված տասնյակ անօդաչու թռչող սարքեր ուղղվում են դեպի Իսրայել:

01:27 - 14 ապրիլի, 2024

Հորդանանի ՀՕՊ-ը պատրաստ է որսալ իրանական ցանկացած անօդաչու թռչող սարք կամ ինքնաթիռ, որը կխախտի նրա օդային տարածքը

Հորդանանի հակաօդային պաշտպանությունը պատրաստ է որսալ և խոցել իրանական ցանկացած անօդաչու թռչող սարք կամ ինքնաթիռ, որը կխախտի նրա օդային տարածքը, հայտնում են տարածաշրջանային անվտանգության ոլորտի երկու աղբյուրներ: Այս մասին հայտնում է «The times of Israel»-ը։ Նրանք նշել են, որ բանակը նաև բարձր պատրաստվածության վիճակում է, իսկ ռադարները հետևում են անօդաչու թռչող սարքերի տեղաշարժին: Հիշեցնենք, որ ՑԱԽԱԼ-ը (Իսրայելի պաշտպանության բանակը) հաստատել էր ավելի վաղ լրատվամիջոցներով տարածվող տեղեկությունները, որ Իրանից արձակված տասնյակ անօդաչու թռչող սարքեր ուղղվում են դեպի Իսրայել:

01:11 - 14 ապրիլի, 2024

ԱՄՆ նախագահի թիմը մշտական կապի մեջ է իսրայելցի պաշտոնյաների, ինչպես նաև այլ գործընկերների և դաշնակիցների հետ․ Սպիտակ տուն

Սպիտակ տունը հայտարարում է՝ նախագահ Ջո Բայդենը իրավիճակի մասին պարբերաբար տեղեկություններ է ստանում իր ազգային անվտանգության թիմից և նրանց հետ այսօր կեսօրին կհանդիպի Սպիտակ տանը: Հայտարարության մեջ նշվում է, որ նախագահի թիմը մշտական կապի մեջ է իսրայելցի պաշտոնյաների, ինչպես նաև այլ գործընկերների և դաշնակիցների հետ:

01:02 - 14 ապրիլի, 2024

Իսրայելը հաստատում է՝ Իրանից արձակված տասնյակ անօդաչու թռչող սարքեր ուղղվում են դեպի Իսրայել

ՑԱԽԱԼ-ի (Իսրայելի պաշտպանության բանակի) խոսնակ Դանիել Հագարին հաստատում է, որ Իրանից արձակված տասնյակ անօդաչու թռչող սարքեր ուղղվում են դեպի Իսրայել: Այս մասին հայտնում է «The times of Israel»-ը։ Նա նշել է, որ իսրայելական օդուժը հետևում է անօդաչու թռչող սարքերին՝ միաժամանակ հավելելով, որ մի քանի ժամ կպահանջվի մինչև դրանք հասնեն երկրի տարածք: Ավելի վաղ, լրատվամիջոցները, հղվելով իսրայելական և ամերիկյան հետախուզական ծառայություններին, հայտնել էին, որ Իրանը տասնյակ անօդաչուներ է արձակել Իսրայելի ուղղությամբ։

00:53 - 14 ապրիլի, 2024

Լավրովն ու Աբդոլլահիանը հաստատել են միջազգային և տարածաշրջանային հարցերի շուրջ համակարգման տրամադրվածությունը

Հեռախոսազրույց են ունեցել ՌԴ ԱԳ նախարար Սերգեյ Լավրովն ու Իրանի Իսլամական Հանրապետության արտաքին գործերի նախարար Հոսեյն Ամիր Ամիրաբդոլլահյանի միջև։ Այս մասին հայտնում են ՌԴ ԱԳՆ-ից։ Գերատեսչության հաղորդմամբ՝ հիմնական ուշադրությունը դարձվել է Մերձավոր Արևելքում տիրող իրավիճակին։ Ռուսական կողմը կրկին ընդգծել է իր խստիվ դատապարտումը Դամասկոսում Իրանի հյուպատոսության գրասենյակի վրա ապրիլի 1-ին Իսրայելի ավիահարվածի կապակցությամբ։ «Հաստատվել է միջազգային և տարածաշրջանային օրակարգի արդիական հարցերի շուրջ համակարգման բարձր մակարդակի պահպանման փոխադարձ տրամադրվածությունը։ Ընդգծվել է երկու կողմերի շահագրգռվածությունը քաղաքական և դիվանագիտական համագործակցության, ինչպես նաև առևտրատնտեսական փոխգործակցության հետևողական աճի հարցում, այդ թվում՝ տրանսպորտի և նյութատեխնիկական ապահովման, այդ թվում՝ տարանցիկ փոխադրումների ոլորտում»,- ասված է ՌԴ ԱԳՆ հաղորդագրության մեջ։

21:04 - 13 ապրիլի, 2024

Բլինքենը Մերձավոր Արևելքում առկա իրավիճակը քննարկել է Չինաստանի, Սաուդյան Արաբիայի և Թուրքիայի ԱԳ նախարարների հետ |hetq.am|

hetq.am: ԱՄՆ պետքարտուղար Էնթոնի Բլինքենը հեռախոսազրույցներ է ունեցել Թուրքիայի, Չինաստանի և Սաուդյան Արաբիայի արտաքին գործերի նախարարների հետ։ Զրույցի թեման եղել է Մերձավոր Արևելքում իրավիճակի սրումը և Իրանի հնարավոր գործողությունների կանխարգելումը: Այդ մասին ամենօրյա ճեպազրույցի ժամանակ հայտարարել է ԱՄՆ պետքարտուղարության մամուլի ծառայության ղեկավար Մեթյու Միլերը։ «Վերջին 24 ժամվա ընթացքում պետքարտուղար Բլինքենն ակտիվ դիվանագիտական ջանքեր է գործադրել, այդ թվում՝ Թուրքիայի ԱԳ նախարար Հաքան Ֆիդանի, Չինաստանի ԱԳ նախարար Վան Իի, ինչպես նաև Սաուդյան Արաբիայի ԱԳ նախարար Ֆեյսալ բեն Ֆարհան ալ Սաուդի հետ բանակցությունների միջոցով, որպեսզի հստակ հասկացնի, որ Մերձավոր Արևելքում էսկալացիան չի բխում ոչ մեկի շահերից, և որ այդ երկրները պետք է Իրանին կոչ անեն չտանել տարածաշրջանում իրավիճակի էսկալացիայի»,- ասել է նա։ Հիշեցնենք, որ լիբանանյան «Հեզբոլլահը» երեկ երեկոյան հարվածներ է հասցրել երկրի հետ սահմանին գտնվող իսրայելական դիրքերին։ Իսրայել ՊԲ-ն հաստատել է տեղեկությունը՝ նաև նշելով, որ խոցել են պայթուցիկներով լիցքավորված երկու անօդաչու թռչող սարք, որոնք արձակվել են «Հեզբոլլահ»-ի կողմից Իսրայելի հյուսիսում: ԱՄՆ նախագահ Ջո Բայդենն էլ Իրանին հորդորել է չհարձակվել Իսրայելի վրա․ «Մենք կաջակցենք Իսրայելին, կօգնենք, որ Իսրայելը պաշտպանվի։ Իսկ Իրանը հաջողության չի հասնի»։

17:22 - 13 ապրիլի, 2024

ԻՀՊԿ-ն Հորմուզի նեղուցի մոտ գրավել է Իսրայելի հետ առնչություն ունեցող նավը. իրանական ԶԼՄ-ներ |azatutyun.am|

azatutyun.am: Իրանի պետական լրատվամիջոցները հաղորդում են, որ Իսլամական հեղափոխության պահապանների կորպուսի (ԻՀՊԿ) ուժերը Հորմուզի նեղուցի մոտ բեռնանավ են գրավել՝ պնդելով, որ նավը «կապված է Իսրայելի հետ»: IRNA պետական լրատվական գործակալությունը գրում է, որ Պորտուգալիայի դրոշով «MSC Aries» նավը, որը, ըստ իր տեղեկությունների, շահագործվում է մասամբ իսրայելցի միլիարդատիրոջը պատկանող նավային ընկերության կողմից, առգրավվել է ապրիլի 13-ին և տեղափոխվել Իրանի տարածքային ջրեր։ Միջադեպը տեղի է ունեցել Գազայի հատվածում շարունակվող պատերազմի պատճառով Իրանի և Արևմուտքի միջև լարվածության ֆոնին և այս ամիս Սիրիայում Իրանի հյուպատոսության վրա Իսրայելին վերագրվող հարվածից հետո: Իրանը խոստացել է պատասխան հարված հասցնել ապրիլի 1-ին իրանցի յոթ զինվորականների, այդ թվում՝ ԻՀՊԿ-ի բարձրագույն հրամանատարի սպանության համար: Միջադեպից հետո Իսրայելի բանակի խոսնակն ասել է, որ «եթե Իրանն ընտրի իրավիճակն ավելի սրելու տարբերակը, կկրի դրա հետևանքները. «Մենք բարձրացրել ենք Իսրայելը Իրանի հետագա ագրեսիայից պաշտպանելու մեր պատրաստակամությունը: Մենք պատրաստ ենք նաև պատասխանել»: Իսրայելի արտգործնախարար Իսրայել Կացն էլ ավելի ուշ ասել է, որ Իրանը ղեկավարվում է «հանցավոր ռեժիմով, որն աջակցում է «Համաս»-ի հանցագործություններին և այժմ ծովահենական գործողություն է իրականացնում՝ խախտելով միջազգային իրավունքը»։ Ավելի վաղ Մեծ Բրիտանիայի ռազմածովային ուժերին կից ծովային առևտրային փոխադրումների համակարգման կենտրոնը տեղեկացրել էր ԱՄԷ-ի Ֆուջեյրա քաղաքից 50 ծովային մղոն դեպի հյուսիս-արևելք տեղի ունեցած միջադեպի մասին: Associated Press գործակալության տվյալներով Պորտուգալիայի դրոշի ներքո նավարկող MSC Aries կոնտեյներային նավը կապված է լոնդոնյան Zodiac Maritime ընկերության հետ, որը իսրայելցի գործարար Էյալ Օֆերի Zodiac Group-ի մաս է կազմում:

16:48 - 13 ապրիլի, 2024

Մի շարք պետություններ կոչ են արեն սահմանափակել այցելությունները մերձավորարևելյան տարածաշրջան

Վաշինգտոնը Իսրայելում ԱՄՆ դեսպանատան աշխատակիցներին և նրանց ընտանիքների անդամներին կարգադրել է սահմանափակել տեղաշարժը և չճանապարհորդել Թել Ավիվի և Երուսաղեմի սահմաններից դուրս։ Մեծ Բրիտանիան ևս նախազգուշացրել է «Իսրայելի վրա Իրանի հարձակման հնարավորության մասին» և իր քաղաքացիներին զգուշացրել Իսրայել մեկնելու վտանգների մասին: Իրան, Իսրայել և ընդհանուր առմամբ մերձավորարևելյան տարածաշրջան այցելությունները սահմանափակելու կոչերով են հանդես եկել նաև Գերմանիան, Ֆրանսիան, Հնդկաստանը, Ռուսաստանը, Կանադան և այլ երկրներ:

13:41 - 13 ապրիլի, 2024

Բայդենը Իրանին հորդորել է չհարձակվել Իսրայելի վրա |news.am|

news.am: Թեհրանը հաջողության չի հասնի, եթե մտադրվի ռազմական ուժ կիրառել՝ ի պատասխան Իսրայելի կողմից Սիրիայում Իրանի դեսպանատան հյուպատոսական բաժնին հասցված վերջին հարվածին։ Այս մասին հայտարարել է ԱՄՆ նախագահ Ջո Բայդենը։ «Մենք կաջակցենք Իսրայելին, կօգնենք, որ Իսրայելը պաշտպանվի։ Իսկ Իրանը հաջողության չի հասնի»,- ասել է Բայդենը՝ Սպիտակ տանը լրագրողների հարցերին ի պատասխան։ Միևնույն ժամանակ, ԱՄՆ նախագահը Թեհրանին հորդորել է ստեղծված իրավիճակում ուժ չկիրառել։ Հարցին, թե հիմա ինչ ուղերձ կցանկանա հղել Իրանին, Բայդենը պատասխանել է. «Մի արեք դա»: Հիշեցնենք, որ երեկ երեկոյան «Հեզբոլլահը» հարվածներ է հասցրել Լիբանանի հետ սահմանին գտնվող իսրայելական դիրքերին։

11:21 - 13 ապրիլի, 2024

Ռայիսին ու Էրդողանը քննարկել են տարածաշրջանային և գլոբալ խնդիրները |azatutyun.am|

azatutyun.am: Թուրքիայի և Իրանի նախագահներն այսօր հեռախոսազրույց են ունեցել, քննարկել երկկողմ հարաբերությունները, տարածաշրջանային և գլոբալ խնդիրները։ Իրանի նախագահի մամլո ծառայության փոխանցմամբ՝ Էբրահիմ Ռայիսին շնորհակալություն է հայտնել Ռեջեփ Էրդողանին Թուրքիայի դիրքորոշման համար՝ Սիրիայում Իրանի հյուպատոսության վրա հարձակումը դատապարտելու հարցում և ընդգծել, որ «այդ հանցագործությունն անպատասխան չի մնա»։ Հարավկովկասյան տարածաշրջանի մասին հաղորդագրությունում որևէ հիշատակում չկա։

18:11 - 10 ապրիլի, 2024

Իսրայելը կհարվածի Իրանի միջուկային օբյեկտներին, վերջինիս հարձակման դեպքում. Իսրայել Կաց |1lurer.am|

1lurer.am: Իսրայելը կհարվածի Իրանի միջուկային օբյեկտներին, եթե երկիրը որոշի վրեժ լուծել Իրանի հյուպատոսության ռմբակոծման համար, որի արդյունքում սպանվեցին Իսլամական հեղափոխության պահապանների կորպուսի (ԻՀՊԿ) գեներալներ։ Այդ մասին հայտնում է The Sun-ը: Իսրայելի արտաքին գործերի նախարար Իսրայել Կացը Իրանի գերագույն առաջնորդ Ալի Խամենեիին ուղղված պարսկերեն ուղերձում ասել է, որ եթե Թեհրանն իր տարածքից հարձակվի Իսրայելի վրա, Իսրայելը կպատասխանի հարձակումով Իրանի ներսում։ The Times of Israel-ը հայտնել է, որ, ըստ իսրայելցի զինվորական պաշտոնյաների, Իրանը կարող է հարված հասցնել Իսրայելին ապրիլի 12-ից հետո: Իսրայելն ակնկալում է, որ Թեհրանը քայլեր չի ձեռնարկի մինչև մահմեդականների սուրբ Ռամադան ամսվա ավարտը: Այս տարի այն կավարտվի ապրիլի 12-ին։

13:34 - 10 ապրիլի, 2024

Էկոնոմիկայի նախարարը Իրանի դեսպանի հետ քննարկել է Հայաստանում իրանական ապրանքների առևտրի կենտրոնի բացման հարցը

ՀՀ էկոնոմիկայի նախարար Գևորգ Պապոյանն ապրիլի 9-ին ընդունել է Իրանի Իսլամական Հանրապետության արտակարգ և լիազոր դեսպան Մեհդի Սոբհանիին։ Հանդիպմանը ներկա են եղել նախարարի տեղակալներ Նարեկ Տերյանն ու Նարեկ Հովակիմյանը։ Ինչպես տեղեկանում ենք Էկոնոմիկայի նախարարությունից, քննարկվել են երկու երկրների միջև տնտեսական գործակցության ընդլայնմանը, առևտրաշրջանառության ավելացմանը, Հայաստանից Իրան և հակառակ ուղղությամբ ապրանքների արտահանման և ներմուծման հետ կապված մի շարք հարցեր։ Կողմերը մտքեր են փոխանակել գյուղատնտեսության ոլորտում համագործակցության ընդլայնման, տնտեսության տարբեր ճյուղերում համատեղ արտադրությունների կազմակերպման վերաբերյալ։ Անդրադարձ է կատարվել Հայաստանում իրանական ապրանքների առևտրի կենտրոնի բացմանը։ Գևորգ Պապոյանը պատրաստակամություն է հայտնել նախարարության իրավասությունների շրջանակներում աջակցել համատեղ ծրագրերի մշակմանն ու իրականացմանը։

12:50 - 10 ապրիլի, 2024

ՀՀ–ն Արևմուտքի հետ գործակցությունը չի հակադրում Իրանի հետ հարաբերություններին. Փաշինյան |arm.sputniknews.ru|

12:07 - 10 ապրիլի, 2024

Իրանը դեմ է Հարավային Կովկասը աշխարհաքաղաքական մրցակցության դաշտ վերածելուն․ Քանանի |azatutyun.am|

azatutyun.am: Իրանը դեմ է Հարավային Կովկասը աշխարհաքաղաքական մրցակցության դաշտ վերածելուն, IRNA-ի փոխանցմամբ, հայտարարել է Իրանի արտաքին գերատեսչության մամուլի խոսնակ Նասեր Քանանին՝ անդրադառնալով ապրիլի 5-ին Բրյուսելում կայացած Փաշինյան-Բլինքեն-Ֆոն դեր Լայեն հանդիպմանը։ Քանանին ընդգծել է տարածաշրջանային համագործակցության կարևորությունը Կովկասում խաղաղության և կայունության հաստատման գործում նաև շեշտելով տարածաշրջանային կարողությունների, այդ թվում՝ «3+3» ձևաչափի օգտագործման անհրաժեշտությունը՝ չլուծված վեճերը լուծելու համար: «3+3»-ը ղարաբաղյան 44-օրյա պատերազմից հետո Թուրքիայի նախաձեռնած և Ռուսաստանի աջակցությունը ստացած տարածաշրջանային համագործակցության նոր ձևաչափ է։ Այն ենթադրում է հարավկովկասյան երեք երկրների՝ Վրաստանի, Հայաստանի և Ադրբեջանի, ինչպես նաև տարածաշրջանի երեք տերությունների՝ Ռուսաստանի, Թուրքիայի և Իրանի մասնակցությունը։

09:28 - 10 ապրիլի, 2024

Իրանի ԱԳ նախարարը Դամասկոսում մասնակցել է հյուպատոսության նոր շենքի բացմանը |shantnews.am|

shantnews.am: v class="news_text"> Պաշտոնական այցով Սիրիայում գտնվող Իրանի արտաքին գործերի նախարար Հոսեյն Ամիր Աբդոլլահիանը մասնակցել է Դամասկոսում Իրանի դեսպանատան հյուպատոսական բաժնի նոր շենքի բացման արարողությանը: Այս մասին հայտնում է իրանական SNN հեռուստաալիքը։ Հոսեյն Ամիր Աբդոլլահիանը հանդիպումներ է ունեցել Սիրիայի իր գործընկերոջ և նախագահ Բաշար ալ-Ասադի հետ: Դամասկոսում շենքը, որտեղ նախկինում տեղակայված էր Իրանի դեսպանատան հյուպատոսական բաժինը, ապրիլի սկզբին ավերվել էր իսրայելական օդուժի հարվածի հետևանքով։

19:49 - 08 ապրիլի, 2024

Իրանում հայտնել են ԻՊ անդամների ձերբակալության մասին, որոնք ահաբեկչություններ էին ծրագրել Ուրազ-բայրամ տոնին |arm.sputniknews.ru|

arm.sputniknews.ru: Իրանում ձերբակալել են «Իսլամական պետություն» ահաբեկչական կազմակերպության երեք անդամի, որոնք ահաբեկչություններ էին ծրագրել ապրիլի 10-ին՝ Ուրազ-բայրամի տոնակատարության ժամանակ։ Տեղեկությունը հայտնում է ISNA գործակալությունը՝ հղում անելով ոստիկանությանը։ Ըստ տեղեկությունների՝ նրանք ծրագրել էին պայթյուններ իրականացնել մահապարտ ահաբեկիչների օգնությամբ, սակայն բռնվել են Թեհրանից ոչ հեռու գտնվող Մահդաշտ քաղաքում: Ինչպես հայտնել է Իրանի ոստիկանության պաշտոնական ներկայացուցիչ Սայիդ Մունթազեր օլ Մահդին, ձերբակալվածների թվում է ԻՊ-ի բարձրաստիճան անդամ Մոհամմադ Զաքերան: Ոստիկանությունը ձերբակալել է նաև 8 հանցակցի։ Ուրազ-բայրամը մուսուլմանների գլխավոր տոներից մեկն է, որը նշանավորում է Պահքի ավարտը։

19:30 - 06 ապրիլի, 2024