Իրան

Իրանի Իսլամական Հանրապետությունն ինքնիշխան պետություն է Արևմտյան Ասիայում: Ավելի քան 83 միլիոն բնակչությամբ։ Իրանը աշխարհում բնակչության թվով 18-րդն է: 1.648.195 կմ քառակուսի տարածքով այն երկրորդ ամենախոշոր երկիրն է Մերձավոր Արևելքում և 17-րդը` աշխարհում: Իրանը հյուսիս արևմուտքում սահմանակից է Հայաստանին, Արցախին, Ադրբեջանին և Ադրբեջանի մաս կազմող Նախիջևանին, հյուսիսում Կասպից ծովին, հյուսիս արևելքում Թուրքմենստանին, արևելքում Աֆղանստանին և Պակիստանին, հարավում Պարսից ծոցին և Օմանի ծոցին, արևմուտքում Թուրքիային և Իրաքին :

Երկրի մայրաքաղաքը և խոշորագույն քաղաքը Թեհրանն է, որը համարվում է նաև երկրի մշակութային և տնտեսական կենտրոնը: Երկրի նախագահը Հասան Ռոհանին է, հոգևոր առաջնորդը Այաթոլլա Ալի Խամենեին է։

Հարգում եմ բոլոր երկրների տարածքային ամբողջականությունն ու ինքնիշխանությունը և կարևորում հարցերը երկխոսության միջոցով լուծելը. Ռայիսին՝ Բայրամովին |tert.am|

tert.am: Իրանի նախագահ Էբրահիմ Ռայիսին ընդունել է Ադրբեջանի արտգործնախարար Ջեյհուն Բայրամովին, հայտնում է Իրանի նախագահի մամուլի ծառայությունը։ Իրանի նախագահը հույս է հայտնել, որ «3+3» ձևաչափով քննարկումները կդառնան տարածաշրջանային կառուցողական համագործակցության ամրապնդման աղբյուր։ «Բարեկամ և եղբայրական Ադրբեջանի հետ հարաբերությունների մակարդակի բարձրացումը Իրանի արտաքին քաղաքականության առաջնահերթություններից է։ Իրանը, որպես տարածաշրջանի երկրներից մեկը, հարգում է բոլոր երկրների տարածքային ամբողջականությունն ու ինքնիշխանությունը և կարևորում հարցերը երկխոսության միջոցով լուծելը»,- ասել է Ռայիսին։ Հանդիպմանը Ադրբեջանի արտգործնախարար Ջեյհուն Բայրամովը նշել է, որ Ադրբեջանը հատուկ նշանակություն է տալիս Իրանի հետ հարաբերություններին։ «Ադրբեջանը պաշտպանում է Իրանի դիրքորոշումը տարածաշրջանից դուրս գտնվող երկրների միջամտությունը տարածաշրջանում թույլ չտալու վերաբերյալ: Այս առումով Թեհրանում «3+3» ձևաչափով հանդիպման անցկացումը գնահատվում է օգտակար, դրական և կառուցողական։ Վերջին ամիսներին զգալի առաջընթաց է գրանցվել երկու երկրների հարաբերությունների մակարդակի բարելավման ուղղությամբ»,- ասել է նախարարը։

19:24 - 23 հոկտեմբերի, 2023

Արարատ Միրզոյանը և Էբրահիմ Ռայիսին քննարկել են տարածաշրջանային և միջազգային անվտանգությանը վերաբերող հարցեր

Հոկտեմբերի 23-ին Թեհրանում Իրանի Իսլամական Հանրապետության նախագահ Էբրահիմ Ռայիսին ընդունել է Հայաստանի ԱԳ նախարար Արարատ Միրզոյանին: Այս մասին տեղեկացրին ՀՀ ԱԳՆ-ից: Զրուցակիցները գոհունակությամբ արձանագրել են, որ երկու հարևան և բարեկամ երկրների միջև ձևավորվել է բարձր մակարդակի քաղաքական երկխոսություն՝ հիմնված փոխադարձ հարգանքի և երկու ժողովուրդների հազարամյա եղբայրության վրա: ՀՀ ԱԳ նախարարը և ԻԻՀ նախագահը կարևորել են տարբեր ոլորտներում ՀՀ-ԻԻՀ փոխգործակցության խորացումը և այդ ուղղությամբ պայմանավորվածությունների իրականացման ուղղությամբ գործուն քայլերի իրականացումը: Արարատ Միրզոյանը և Էբրահիմ Ռայիսին քննարկել են նաև տարածաշրջանային և միջազգային անվտանգությանը վերաբերող հարցեր:

18:21 - 23 հոկտեմբերի, 2023

Հայաստանն ու Իրանը ստորագրեցին «Հյուսիս-հարավի» Ագարակ-Քաջարան ճանապարհի շինարարության պայմանագիրը

Հայաստանն իրանական ընկերությունների հետ ստորագրվեց «Հյուսիս-հարավի» Ագարակ-Քաջարան 32 կմ երկարությամբ ճանապարհահատվածի շինարարության պայմանագիրը, հայտնում է ՀՀ տարածքային կառավարման և ենթակառուցվածքների նախարարությունը։ «Քիչ առաջ «Ճանապարհային դեպարտամենտ» հիմնադրամի գործադիր տնօրեն Գոռ Ավետիսյանը և «Աբադ Ռահան Պարս» Ինթերնեյշնլ Գրուպ և «Թունել Սադ Արիանա» համատեղ ձեռնարկության ներկայացուցիչներ՝ Ալի Մուսավին և Ալեն Յուսեֆյանը ստորագրեցին Հյուսիս-հարավ ճանապարհային միջանցքի ներդրումային ծրագրի-Տրանշ 4 շրջանակներում Ագարակից-Վարդանիձոր (մոտ 21կմ) ճանապարհի հիմնանորոգման, Վարդանիձորից մինչև թունելի ելք (մոտ 11կմ) ճանապարհի կառուցման պայմանագիրը։ Կողմերը կարևորեցին պայմանագրի կնքման փաստը, որը նպաստելու է Հյուսիս-հարավ ծրագրի կյանքի կոչմանը»,- ասված է հաղորդագրությունում։ Տրանշ 4-ի՝ Քաջարան-Ագարակ վերակառուցման գործող ծրագրի շրջանակներում նախատեսվում է վերակառուցել շուրջ 32 կմ ընդհանուր երկարությամբ՝ Ագարակ (Իրանի սահման)-Վարդանիձոր-նախատեսվող Քաջարանի թունելի ելք հատվածը։ «Վերակառուցումից հետո նշված ճանապարհահատվածը կհամապատասխանի միջազգային առաջադեմ չափանիշներին ինչպես ճանապարհային անվտանգության, այնպես էլ հարմարավետության և ճանապարհորդության ժամանակի կրճատման առումներով»,- նշված է հաղորդագրությունում։ Նախարարությունից տեղեկացնում են, որ նախատեսվում է կառուցել թվով 5 նոր փոխհատում, 6 նոր Էստակադա, 920 մետր ընդհանուր երկարությամբ 2 նոր թունել և 17 նոր կամուրջ։ Ծրագիրը ֆինանսավորվում է Եվրասիական զարգացման բանկի վարկային և ՀՀ համաֆինանսավորման միջոցների հաշվին։ Շինարարական աշխատանքները նախատեսվում է մեկնարկել 2023 թվականի վերջին և ավարտել երեք տարվա ընթացքում։

14:06 - 23 հոկտեմբերի, 2023

Վրաստանը չի մասնակցում և երբեք չի մասնակցել «3+3» ձևաչափով հանդիպմանը․ Վրաստանի ԱԳՆ |news.am|

news.am: Վրաստանի ԱԳՆ-ի տեղեկացմամբ, Վրաստանը չի մասնակցի վաղը Իրանի մայրաքաղաքում կայանալիք «3+3» ձևաչափով հանդիպմանը։ Այս մասին Վրաստանի Առաջին ալիքին հայտնել են արտաքին գործերի նախարարությունից։ «Վրաստանը չի մասնակցում նշված հանդիպմանը և երբեք չի մասնակցել»,- նշել են արտաքին քաղաքականության գերատեսչությունում։ Վրաստանն ի սկզբանե հայտարարել էր, որ չի միանա ձևաչափին։ Երկիրը նշել էր, որ դեմ է նախաձեռնությանը՝ դրանում Ռուսաստանի ներկայության պատճառով։

21:51 - 22 հոկտեմբերի, 2023

ՀՀ ԱԳ նախարար Միրզոյանը Թեհրանում կմասնակցի «3+3» ձևաչափով տարածաշրջանային խորհրդակցական հարթակի հանդիպմանը

ՀՀ արտաքին գործերի նախարար Արարատ Միրզոյանն իրանական կողմի հրավերով հոկտեմբերի 23-ին Թեհրանում կմասնակցի տարածաշրջանային խորհրդակցական հարթակի («3+3») հանդիպմանը: Այս մասին «Ֆեյսբուք»-ի իր էջում տեղեկացրել է ՀՀ ԱԳՆ Անի Բադալյանը։ Ըստ նրա՝ այցի ընթացքում նախատեսված են նաև երկկկողմ հանդիպումներ: Տարածաշրջանային խորհրդակցական հարթակում են Հայաստանը, Ադրբեջանը, Վրաստանը, ինչպես նաև Իրանը, Ռուսաստանը և Թուրքիան։

16:27 - 22 հոկտեմբերի, 2023

Մոսկվան հաստատել է մասնակցությունը վաղը Թեհրանում կայանալիք բանակցություններին |factor.am|

factor.am: ՌԴ ԱԳՆ պաշտոնական ներկայացուցիչ Մարիա Զախարովան հաստատել է ՌԴ ԱԳՆ ղեկավար Սերգեյ Լավրովի մասնակցությունը երկուշաբթի օրը Իրանում նախատեսված բանակցություններին։ Հայտնում է ՌԻԱ Նովոստիին։ «Մենք հաստատում ենք Լավրովի մասնակցությունը Թեհրանում կայանալիք բանակցությունները, որոնք նախատեսված են երկուշաբթի օրը»,- ասել է Զախարովան Հիշեցնենք, որ վաղը Թեհրանում կկայանա։ Ադրբեջանի, Հայաստանի, Ռուսաստանի, Թուրքիայի և Իրանի ԱԳ նախարարների «3+3» ձևաչափով հանդիպումը։

14:59 - 22 հոկտեմբերի, 2023

Թեհրանում հոկտեմբերի 23-ին կկայանա Անդրկովկասի հարցով «3+3» ձևաչափով նախարարական հանդիպումը |armenpress.am|

armenpress.am: Թեհրանում հոկտեմբերի 23-ին տեղի կունենա Անդրկովկասի հարցով Ռուսաստանի, Թուրքիայի, Ադրբեջանի և Հայաստանի ԱԳ նախարարների երկրորդ հանդիպումը՝ «3+3» ձևաչափով: Այս մասին, հայտնում է IRNA-ն: Իրանի լրատվական գործակալության տվյալներով՝ «3+3» ձևաչափով երկրորդ հանդիպման մասնակիցները կքննարկեն իրավիճակը Հարավային Կովկասում և տարածաշրջանային համագործակցության ընդլայնման ջանքերը քաղաքականության, տնտեսության, անվտանգության, տարանցման և էներգետիկայի ոլորտներում: «Տարածաշրջանի երկրների մասնակցությամբ տարածաշրջանային խնդիրների լուծումն առանց արևմտյան պետությունների միջամտության համարվում է այդ խմբի ձևավորման գլխավոր նպատակներից մեկը»,- հայտնում է գործակալությունը: Ավելի վաղ ՀՀ վարչապետ Նիկոլ Փաշինյանը համաձայնել էր Ադրբեջանի նախագահ Իլհամ Ալիևի առաջարկած «3+3» (Ադրբեջան, Հայաստան, Վրաստան, Իրան, Թուրքիա, Ռուսաստան) ձևաչափով հանդիպման անցկացմանը: «Ժամանակին պայմանավորվածություն է ձեռք բերվել, որ «3+3» ձևաչափով հաջորդ հանդիպումը տեղի կունենա Թեհրանում (Իրան), մենք պատրաստ ենք շարունակել այդ ձևաչափով»,- IRNA-ի փոխանցմամբ՝ ասել էր նա:

14:54 - 22 հոկտեմբերի, 2023

Իրանի ԱԳ փոխնախարարն օտարերկրյա դիվանագետներին ներկայացրել է Միջին Արևելքում տիրող իրադրությանն երկրի դիրքորոշումները

Իրանի Իսլամական Հանրապետությամ ԱԳ նախարարի քաղաքական հարցերով փոխնախարարը հանդիպել է ԻԻՀ-ում հավատարմագրված դիվանագիտական ներկայացուցչությունների ղեկավարների հետ Հոկտեմբերի 17-ին Իրանի ԱԳՆ-ում տեղի է ունեցել քաղաքական հարցերով փոխնախարար Ալի Բաղերիի հանդիպումը ԻԻՀ-ում հավատարմագրված դիվանագիտական ներկայացուցչությունների ղեկավարների հետ, որի ընթացքում ԱԳ փոխնարարարը անդրադարձ է կատարել Միջին Արևելքում տիրող իրադրությանը և տեղի ունեցող գործընթացներին, ներկայացրել դրանց վերաբերյալ Իրանի դիրքորոշումները։ Հանդիպմանը ներկա է եղել Իրանում ՀՀ արտակարգ և լիազոր դեսպան Արսեն Ավագյանը։

12:30 - 21 հոկտեմբերի, 2023

Հայաստանը Իրանից «3+3» ձևաչափով ԱԳ նախարարների մակարդակով հանդիպման հրավեր է ստացել․ Վահան Կոստանյան

Հայաստանը Իրանից «3+3» ձևաչափով ԱԳ նախարարների մակարդակով հանդիպման հրավեր է ստացել։ Այս մասին լրագրողների հետ զրույցում ասաց փոխարտգործնախարար Վահան Կոստանյանը։ Նրա խոսքով՝ իրանական կողմի գործընկերների հետ քննարկումներ են տեղի ունենում, երբ վերջնական որոշում լինի, դրա մասին կտեղեկացվի։ «Հանդիպման հրավերն ուղղվել է Հարավային Կովկասի 3 պետությունների՝ Հայաստանի, Վրաստանի ու Ադրբեջանի ԱԳ նախարարներին։ Ֆորմատը ենթադրում է նաև Ռուսաստանի, Թուրքիայի ու Իրանի ներկայացուցիչների մասնակցություն»,- նշել է Կոստանյանը։

16:26 - 20 հոկտեմբերի, 2023

Իրանի և Թուրքիայի ԱԳ նախարարները քննարկել են տարածաշրջանային հարցեր |1lurer.am|

1lurer.am: Իրանի արտգործնախարար Հոսեյն Ամիր Աբդոլլահիանը Ջեդդայում Իսլամական համագործակցության կազմակերպության գործադիր կոմիտեի արտահերթ նիստի շրջանակներում հանդիպել է Թուրքիայի արտգործնախարար Հաքան Ֆիդանի հետ։ Իրանական կողմի տվյալով՝ հանդիպմանը քննարկվել են Պաղեստինի ներկայիս զարգացումները, Գազայի հատվածում տիրող իրավիճակը և Իսրայելի գործողություններին հակազդելու ուղիները։ Կողմերը մտքեր են փոխանակել նաև տարածաշրջանային և երկկողմ հետաքրքրություն ներկայացնող մի շարք հարցերի շուրջ:

11:49 - 19 հոկտեմբերի, 2023

Տարածաշրջանում տիրող իրավիճակը քննարկել են Իրանի և Ադրբեջանի ԱԳ նախարարները |azatutyun.am|

azatutyun.am: Ադրբեջանի և Իրանի արտգործնախարարներ Ջեյհուն Բայրամովը և Հոսեյն Ամիր Աբդոլլահիանը հանդիպել և քննարկել են բազմակողմ ձևաչափով համագործակցության հարցեր։ Ըստ ադրբեջանական կողմի պաշտոնական հաղորդագրության՝ Ջիդդայում կայացած հանդիպմանը նրանք խոսել են երկու երկրների միջև առկա համագործակցության, տարածաշրջանային օրակարգային հարցերի, ինչպես նաև տարածաշրջանում տիրող իրավիճակի մասին։ Ըստ նույն աղբյուրի՝ Բայրամովը մանրամասն տեղեկություններ է ներկայացրել «Ադրբեջանի և Հայաստանի միջև խաղաղության գործընթացի օրակարգի հեռանկարների, ինչպես նաև Լեռնային Ղարաբաղի տարածաշրջանում գործողությունների մասին»։ Իրանական կողմը դեռ մանրամասներ չի հաղորդել հանդիպման մասին։

23:22 - 18 հոկտեմբերի, 2023

Բայրամովն ու Ֆիդանը քննարկել են Ադրբեջանի և Հայաստանի միջև խաղաղության հեռանկարները |azatutyun.am|

azatutyun.am: Ադրբեջանի և Թուրքիայի արտգործնախարարները Ջիդդայում կայացած հանդիպման ընթացքում քննարկել են երկկողմ հարաբերությունների օրակարգը, տարածաշրջանում տեղի ունեցող գործընթացները, ինչպես նաև Ադրբեջանի և Հայաստանի միջև խաղաղության հեռանկարները, հայտնում է Ադրբեջանի ԱԳՆ մամլո ծառայությունը։ Ջեյհուն Բայրամովն ու Հաքան Ֆիդանը Սաուդյան Արաբիայի Թագավորության Ջիդդա քաղաքում մասնակցում են Իսլամական համագործակցության կազմակերպության նիստին։

19:36 - 18 հոկտեմբերի, 2023

Տարբեր երկրներում մարդիկ դուրս են եկել փողոց Գազայի հատվածի հիվանդանոցին հարվածելուց հետո |armeniasputnik.am|

armeniasputnik.am: Հարվածից հետո ի պաշտպանություն Պաղեստինի ցույցեր են սկսվել Թուրքիայում, Թունիսում, Լիբանանում, Իրանում, Գերմանիայում, Հորդանանում, Սիրիայում և այլ երկրներում։ Շատ քաղաքներում դրանք տեղի են ունեցել Իսրայելի և ԱՄՆ դեսպանատների և հյուպատոսությունների մոտ: «Դո՛ւրս եկեք Թուրքիայից, Ամերիկա մարդասպան»- նման կարգախոսով թուրքերը Ստամբուլում բողոքի ակցիա են կազմակերպել ԱՄՆ հյուպատոսարանի մոտ։ Բացի այդ, նրանք հրավառ նյութեր են շպրտել դեսպանատան շենքի ուղղությամբ և փորձել են գրոհել այն։ Ցույցը ցրելու համար ոստիկանությունն արցունքաբեր գազ է կիրառել: Հորդանանում հազարավոր ցուցարարներ փորձել են ներխուժել Իսրայելի դեսպանատուն, նույնիսկ հրկիզել են շենքը։ ՄԱԿ-ի գլխավոր քարտուղարը կոչ է արել անհապաղ հրադադար հայտարարել Մերձավոր Արևելքում։

10:58 - 18 հոկտեմբերի, 2023

Հայաստանի և Իրանի ԱԳ նախարարները մտքեր են փոխանակել Հարավային Կովկասում և Մերձավոր Արևելքում առկա իրավիճակի շուրջ

Հոկտեմբերի 17-ին Հայաստանի Հանրապետության արտաքին գործերի նախարար Արարատ Միրզոյանը հեռախոսազրույց է ունեցել Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիանի հետ` վերջինիս նախաձեռնությամբ: Այս մասին տեղեկացրին ՀՀ ԱԳՆ-ից: Հեռախոսազանգի ընթացքում անդրադարձ է կատարվել երկու երկրների ղեկավարների մակարդակով քննարկված ուղղություններով և ձևաչափերում փոխգործակցությանը, ինչպես նաև հայ-իրանական երկկողմ օրակարգի առաջմղման ուղղությամբ աշխատանքներին: Հեռախոսազրույցի ընթացքում կողմերը մտքեր են փոխանակել Հարավային Կովկասում և Մերձավոր Արևելքում առկա իրավիճակի շուրջ:

19:47 - 17 հոկտեմբերի, 2023

Իրանը չի բացառել առաջիկա ժամերին Դիմադրության առաջնորդների կողմից Իսրայելի դեմ կանխարգելիչ միջոցառումների իրականացումը |news.am|

news.am: Առաջիկա ժամերին դիմադրության ճակատից հնարավոր են կանխարգելիչ միջոցառումներ: Այս մասին երեկ երեկոյան հայտարարել է Իրանի արտգործնախարար Հոսեյն Ամիրաբդոլլահիանը՝ խոսելով Իսրայելի և Գազայի հատվածի միջև պատերազմի մասին, փոխանցում է IRNA-ն։ Նա հիշեցրել է դիմադրության առաջնորդների հետ իր հանդիպումների մասին, այդ թվում՝ լիբանանյան «Հեզբոլլահի» գլխավոր քարտուղար Սայեդ Հասան Նասրալլայի հետ։ «Հեզբոլլահի համար կան բոլոր հնարավոր տարբերակներն ու սցենարները։ Նրանց հաշվարկներում ամեն ինչ ճիշտ է հաշվի առնվել, և դիմադրության առաջնորդները թույլ չեն տա Սիոնիստական ռեժիմին (Իսրայել-խմբ.) որևէ քայլ ձեռնարկել տարածաշրջանում։ Առաջիկա ժամերին հնարավոր է ցանկացած նախաձեռնողական քայլ»,- ասել է Ամիրաբդոլլահյանը։ Նրա խոսքով, դիմադրության բոլոր առաջնորդները այն կարծիքին են, որ իրենք քաղաքական լուծման հնարավորություն կտան, սակայն «ցանկացած գործողություն հնարավոր է», եթե Իսրայելը շարունակի իր ռազմական հանցագործությունները խաղաղ բնակչության դեմ։ Իրանի արտգործնախարարը վստահեցրել է, որ դիմադրության ճակատն ի վիճակի է «երկարատև պատերազմներ վարել թշնամու դեմ», և շարունակվող հակամարտության ընդլայնումը կփոխի Իսրայելի քարտեզը։ Նա նշել է, որ իսլամական երկրների գործընկերների հետ զրույցների ընթացքում նրանք եկել են այն եզրակացության, որ «եթե ՄԱԿ-ի սահմանափակ հնարավորությունները չօգտագործվեն, ռեժիմի դեմ նոր ճակատներ բացելու հնարավորությունն անխուսափելի է»։ Ամիրաբդոլլահյանն ասել է, որ Իրանը չի աջակցում հակամարտության ընդլայնմանը, սակայն հնարավոր է, որ երկիրը մտնի պատերազմի մեջ, քանի որ ոչ մի կողմ չի կարող անտարբեր մնալ ստեղծված իրավիճակի նկատմամբ։ «Եթե մենք այսօր չպաշտպանենք Գազան, վաղը պետք է պաշտպանենք մեր քաղաքները: Նասրալլան նաեւ հայտարարել է, որ եթե իրենք կանխարգելիչ գործողություններ չձեռնարկեն, ապա ստիպված կլինեն Բեյրութում կռվել սիոնիստական ուժերի դեմ»,- ասել է նա։ Ավելի մանրամասն` news.am-ում։

09:13 - 17 հոկտեմբերի, 2023

Պուտինն ու Ռաիսին քննարկել են Կովկասում և Գազայում ծավալվող իրադարձությունները |azatutyun.am|

azatutyun.am: Ռուսաստանի և Իրանի նախագահներ Վլադիմիր Պուտինն ու Էբրահիմ Ռաիսին այսօր կայացած հեռախոսազրույցի ժամանակ քննարկել են մի շարք տարածաշրջանային խնդիրներ՝ մասնավորաբար Մերձավոր Արևելքում և Կովկասում ծավալվող իրադարձությունները։ Այս մասին հաղորդել է Իրանի նախագահի աշխատակազմի ղեկավարի քաղաքական հարցերով տեղակալ Մոհամադ Ջամշեդին։ «Հեռախոսազրույցի ընթացքում Ռաիսին ընդգծել է, որ շարունակվող պաշարումը, կանանց և երեխաների սպանությունները և Գազայի հատվածի և դրա օրինականորեն ընտրված իշխանությունների դեմ ցամաքային հարձակումը կարող են հանգեցնել մի քանի ճակատներով ծավալվող երկարատև պատերազմի», - X (նախկին Тwitter) սոցիալական ցանցում գրել է Ջամշեդին։

17:04 - 16 հոկտեմբերի, 2023