Իրան

Իրանի Իսլամական Հանրապետությունն ինքնիշխան պետություն է Արևմտյան Ասիայում: Ավելի քան 83 միլիոն բնակչությամբ։ Իրանը աշխարհում բնակչության թվով 18-րդն է: 1.648.195 կմ քառակուսի տարածքով այն երկրորդ ամենախոշոր երկիրն է Մերձավոր Արևելքում և 17-րդը` աշխարհում: Իրանը հյուսիս արևմուտքում սահմանակից է Հայաստանին, Արցախին, Ադրբեջանին և Ադրբեջանի մաս կազմող Նախիջևանին, հյուսիսում Կասպից ծովին, հյուսիս արևելքում Թուրքմենստանին, արևելքում Աֆղանստանին և Պակիստանին, հարավում Պարսից ծոցին և Օմանի ծոցին, արևմուտքում Թուրքիային և Իրաքին :

Երկրի մայրաքաղաքը և խոշորագույն քաղաքը Թեհրանն է, որը համարվում է նաև երկրի մշակութային և տնտեսական կենտրոնը: Երկրի նախագահը Հասան Ռոհանին է, հոգևոր առաջնորդը Այաթոլլա Ալի Խամենեին է։

Փոխվարչապետ Մհեր Գրիգորյանն ընդունել է Իրանի դեսպանին

Փոխվարչապետ Մհեր Գրիգորյանն ընդունել է Հայաստանում Իրանի Իսլամական Հանրապետության դեսպան Մեհդի Սոբհանիին: Կառավարության հաղորդագրության համաձայն՝ հանդիպման ընթացքում քննարկվել են հայ-իրանական երկկողմ հարաբերությունների օրակարգի առանցքային հարցերը, անդրադարձ է կատարվել նաև ԵԱՏՄ շրջանակներում համագործակցության խորացման հեռանկարներին: Զրուցակիցներն անդրադարձել են նաև տարածաշրջանային զարգացումներին:

12:30 - 16 օգոստոսի, 2024

«Միր» վճարային համակարգը Իրանում կսկսի գործել 6 ամսվա ընթացքում․ ՌԴ-ում ԻԻՀ դեսպան |arm.sputniknews.ru|

arm.sputniknews.ru: Ռուսաստանում Իրանի դեսպանը հայտնել է, որ Իրանի Իսլամական Հանրապետության տարածքում «Միր» վճարային համակարգը կսկսի գործել կես տարվա ընթացքում։ Տեղեկությունը դեսպան Քազեմ Ջալալին հայտնել է ՏԱՍՍ գործակալության հետ զրույցում։ Դիվանագիտական ներկայացուցչության ղեկավարը հավելել է, որ իրանական Shetab համակարգն էլ կաշխատի ՌԴ-ի տարածքում։ «Վեց ամսվա ընթացքում էլ ռուսական «Միր» համակարգը կաշխատի Իրանի տարածքում»,- ասել է նա։ Ջալալին գործակալությանը հայտնել է նաև, որ ռուս-իրանական համապարփակ ռազմավարական գործընկերության մասին պայմանագրի նախագիծը նախագահների քննարկման փուլում է և կստորագրվի մոտ ապագայում: Ավելի վաղ՝ հուլիսի 6-ին, Իրանի կենտրոնական բանկի ղեկավար Մոհամմադ Ռեզա Ֆարզինը հայտնել էր, որ Ռուսաստանն ու Իրանն ավարտել են «Միր» և «Shetab» համակարգերի ինտեգրումը: Բացի այդ, երկու երկրների ԿԲ ղեկավարները համաձայնագիր են ստորագրել ազգային արժույթների իրացվելիության մասին՝ երկկողմ առևտուրը հեշտացնելու համար։ Ապրիլի վերջին Իրանի ԱԳՆ պաշտոնական ներկայացուցիչ Նասեր Քանանին հայտնել էր, որ Իրանում ռուսական «Միր» քարտերի ընդունման նախագիծը մտել է իրականացման փուլ: Միևնույն ժամանակ, Ռուսաստանում Իրանի դեսպանատան առևտրային կցորդ Ռահիմի Մոհսենը «Իզվեստիային» ասել էր, որ Իրանի իշխանությունները պատրաստվում են «Միր» քարտերի գործարկման փորձնական նախագծի մեկնարկին:

13:14 - 15 օգոստոսի, 2024

Իրանի ծովուժն Ադրբեջանի հետ սահմանին զորավարժություն է անցկացրել |hy.armradio.am|

hy.armradio.am: Իրանական «Mehr» գործակալությունը, վկայակոչելով Աստարայի քաղաքական, սոցիալական և անվտանգության հարցերով փոխնահանգապետ Սեյեդ Համիդ Մուսավիին, հայտնում է, որ ծովուժը ռազմածովային պաշտպանության զորավարժություններ է անցկացրել։ Նշելով, որ զորավարժությունն անցկացվել է ԻԻՀ ռազմավարական նավատորմի պատրաստվածության մակարդակի բարձրացման նպատակով, նա հավելել է. «Զորավարժությունների ընթացքում իրականացվել են հիպոթետիկ թիրախների վրա հարձակման և պաշտպանական գործողություններ»։ Փոխնահանգապետը նշել է, որ զորավարժություններն անցկացվել են երեքշաբթի օրը՝ 19:30-ից 20:30-ն ընկած ժամանակահատվածում, Աստարայի ռազմածովային գոտու մի հատվածում։ Զորավարժությունները տեղի են ունենում տարածաշրջանում լարվածության ֆոնին:Թեհրանում ՀԱՄԱՍ-ի առաջնորդ Իսմայիլ Հանիեի սպանությանից հետո Արևմուտքի կոչերը ետ չեն պահում Իրանին Իսրայելից վրեժ լուծելու ծրագրից։

12:32 - 14 օգոստոսի, 2024

Իրանն առաջիկա ժամերին կարող է Իսրայելին պատասխան տալու որոշում կայացնել․Պաղեստինի նախագահ Մահմուդ Աբաս |tert.am|

tert.am: Իրանն առաջիկա ժամերին կարող է պատասխան տալ Իսրայելին պաղեստինյան արմատական ՀԱՄԱՍ շարժման քաղբյուրոյի ղեկավար Իսմայիլ Հանիյեի սպանության վերաբերյալ։ Այս մասին հայտարարել է Պաղեստինի նախագահ Մահմուդ Աբբասը ՏԱՍՍ-ի գլխավոր տնօրենի առաջին տեղակալ Միխայիլ Գուսմանին տված հարցազրույցում։ «Որոշումը կարող է կայացվել առաջիկա մի քանի օրվա ընթացքում կամ նույնիսկ հաջորդ մի քանի ժամվա ընթացքում»,-ասել է Աբասը: «Նախ՝ մենք՝ որպես պաղեստինցիներ, դեմ ենք պատերազմին։ 2023 թվականի հոկտեմբերի 7-ին մենք պաշտոնապես հայտարարեցինք, որ դեմ ենք պատերազմին և դեմ ենք խաղաղ բնակիչների, կանանց և երեխաների սպանությանը։ Մենք դեռ չենք կարող կանխատեսել, թե ինչ կլինի, բայց կարող ենք հուսալ, որ սրացում չի լինի, պատերազմ չի լինի, որի հետևանքները դժվար է գնահատել»,-ասել է Աբասը։

20:47 - 13 օգոստոսի, 2024

Ըստ ԱՄՆ-ի՝ Իրանի հարձակումն Իսրայելի վրա կարող է տեղի ունենալ «այս շաբաթ» |azatutyun.am|

azatutyun.am: Իրանը և/կամ Մերձավոր Արևելքում նրա դաշնակիցները կարող են «հարձակվել Իսրայելի վրա արդեն այս շաբաթ», երեկ հայտարարել է Միացյալ Նահանգները՝ վկայակոչելով հետախուզական տվյալները։ Վաշինգտոնը կոչ է արել Թեհրանին հետ կանգնել իր կողմից շարունակական սպառնալիքներից։ Սպիտակ տան ռազմավարական հաղորդակցությունների հարցով համակարգող Ջոն Քիրբին լրագրողներին տեղեկացրել է, որ նախագահ Ջո Բայդենը խոսել է արևմտյան առանցքային դաշնակիցների առաջնորդների հետ, քննարկել իրավիճակը՝ նշելով, որ Վաշինգտոնը լրջորեն է վերաբերվում տեղեկություններին, որ Իրանը շուտով կարող է հարձակվել Իսրայելի վրա՝ ի պատասխան Թեհրանում հուլիսի 31-ին ԱՄՆ-ի և ԵՄ կողմից ահաբեկչական խմբավորում ճանաչված «Համաս»-ի քաղաքական առաջնորդ Իսմայիլ Հանիեի սպանության։ Իրանը Հանիեի սպանության համար մեղադրել է Իսրայելին և խոստացել վրեժ լուծել, որը խորացնում է մտահոգությունները տարածաշրջանում ավելի լայն պատերազմի հավանականության կապակցությամբ։ «Մենք պետք է պատրաստ լինենք հնարավոր լուրջ հարձակումների, այդ իսկ պատճառով վերջին մի քանի օրվա ընթացքում մենք մեծացրել ենք մեր անվտանգության ուժերի հնարավորությունները տարածաշրջանում», - ասել է Քիրբին՝ շարունակելով․ - «Տարածաշրջանում մենք զգալի ուժային կարողություններ ունենք: Եվ այդ փոփոխությունները մենք արել են վերջին մի քանի օրվա ընթացքում: Նախագահը վստահ է, որ մենք ունենք հնարավորություն՝ օգնելու Իսրայելի պաշտպանությանը»։

09:20 - 13 օգոստոսի, 2024

Իրանի պատվիրակությունը ժամանել է ՌԴ՝ մասնակցելու ռազմատեխնիկական համաժողովի |armenpress.am|

armenpress.am: Իրանական բարձրաստիճան պատվիրակությունը ժամանել է Ռուսաստան՝ մասնակցելու «Բանակ-2024» 10-րդ միջազգային ռազմատեխնիկական համաժողովին։ Այս մասին հայտնում է IRNA-ն՝ մանրամասնելով, որ այս միջազգային ռազմատեխնիկական համաժողովն անցկացվելու է օգոստոսի 12-14-ը։ Իրանի Իսլամական Հանրապետության պաշտպանական և ռազմական արդյունաբերությունը երրորդ տարին անընդմեջ ակտիվ մասնակցություն է ունենալում ցուցահանդեսին։ Ցուցահանդեսին կներկայացվեն Իրանի ռազմական և պաշտպանական նորագույն արտադրանքները: Իրանական պատվիրակությունը գլխավորում է «Խաթամ ալ Անբիա» բազայի համակարգողի տեղակալ, բրիգադի գեներալ Ալի Շադմանին։ Համաժողովը համարվում է ընկերությունների և ձեռնարկությունների արտադրանքի ցուցադրման և ռազմարդյունաբերական համալիրում համագործակցության հետագա ինտեգրման հարթակ:

18:22 - 11 օգոստոսի, 2024

Իրանի նախագահն Աբբաս Արաղչիին է առաջադրել արտգործնախարարի պաշտոնում |azatutyun.am|

azatutyun.am: Իրանի նախագահն Աբբաս Արաղչիին առաջադրել է արտաքին գործերի նախարարի պաշտոնում, հայտարարել է խորհրդարանի խոսնակը։ Աբբաս Արաղչին 2013-ից 2021 թվականներին եղել է Թեհրանի և համաշխարհային տերությունների միջև միջուկային բանակցություններում գլխավոր բանակցող: Նա եղել է նաև Իրանի դեսպանը Թուրքիայում և Ճապոնիայում։

12:51 - 11 օգոստոսի, 2024

Իրանը կողմ է ապաշրջափակմանը, բայց Հայաստանի ինքնիշխանության ներքո․ Սոբհանի |civilnet.am|

civilnet.am: Իրանը կողմ է տարածաշրջանի հաղորդակցության ուղիների ապաշրջափակմանը, սակայն դա պետք է տեղի ունենա Հայաստանի ինքնիշխանության ներքո։ Այդ մասին օգոստոսի 9-ին լրագրողների հետ զրույցում ասել է ՀՀ-ում Իրանի դեսպանի Մեհդի Սոբհանին։ «Ապաշրջափակման մասին մեր դիրքորոշումը շատ հստակ է` մենք կողմ ենք ապաշրջափակմանը, սակայն դա պետք է տեղի ունենա Հայաստանի ինքնիշխանության ներքո։ Բնական է, եթե տեղի է ունենում ապաշրջափակում, դրա արդյունքում երթևեկությունը մեծանում, բայց պետք է փոխադարձ համաձայնություն լինի այդ մասով։ Եթե փոխադարձ համաձայնություն կա, նշանակում է ավելի ենք մոտենում խաղաղությանը։ Սա տարածաշրջանի երկրների օգտին է»,- ասել է Սոբհանին։ Հայաստանն ու Ադրբեջանը օրերս հայտարարել են, որ փոխադարձ համաձայնությամբ խաղաղության համաձայնագրի նախագծից հանվել է տարածաշրջանային հաղորդակցություններին վերաբերող հոդվածը։ Նախ դրա մասին խոսեց Ադրբեջանի նախագահի հատուկ ներկայացուցիչ Էլչին Ամիրբեգովը՝ հավելելով, որ ««Զանգեզուրի միջանցքի» մասին կետի քննարկումը տեղափոխվել է ավելի ուշ փուլ»։ ՀՀ ԱԳՆ խոսնակ Անի Բադալյանը հաստատեց խաղաղության համաձայնագրից ապաշրջափակման հոդվածը հանելու տեղեկությունը՝ ընդգծելով, որ «արդյունավետ ապաշրջափակումը շարունակում է մնալ տարածաշրջանում խաղաղության և տնտեսական զարգացման՝ ՀՀ տեսլականի և առաջմղվող օրակարգի կարևոր մաս, որը լավագույնս արտացոլվել է «Խաղաղության խաչմերուկ» ծրագրում»։

16:48 - 09 օգոստոսի, 2024

Թեհրանը վերանայել է իր որոշումը․ ԱՄՆ-ը չի կանխատեսում, որ Իրանն առաջիկայում կհարձակվի Իսրայելի վրա․ Politico

factor.am: Իրանը, հնարավոր է, վերանայել է Իսրայելի վրա հարձակում սկսելու իր որոշումը։ Այս մասին հայտարարել են ԱՄՆ պաշտոնյաները, գրում է Politico-ն։ Երկու բարձրաստիճան պաշտոնյաներ ասել են, որ նախագահ Ջո Բայդենի վարչակազմը վերջին օրերին աշխատել է դիվանագիտական ուղիներով՝ ներգրավելով իր դաշնակիցներին Մերձավոր Արևելքում՝ համոզելու Թեհրանին վերանայել իր ռազմական հարձակումն Իսրայելի վրա: Նրանք զգուշացրել են Իրանին, որ զանգվածային հարվածը միայն կբորբոքի լարվածությունը և կարող է հանգեցնել երկու երկրների միջև ուղիղ առճակատման։ ԱՄՆ վարչակազմը նաև կոչ է արել Իրանին վերանայել ՀԱՄԱՍ-ի առաջնորդ Իսմայիլ Հանիեի սպանությանն արձագանքը, քանի որ նրա մահը հետևանք է Թեհրանում հյուրատանը տեղադրված հեռակառավարվող ռումբի, որը տեղադրվել էր գաղտնի գործողության արդյունքում և ոչ թե մեծ հարձակման մաս է։ Ըստ պաշտոնյաների՝ հիմա Թեհրանն ավելի ու ավելի է կիսում Վաշինգտոնի տեսակետները, թեև ի սկզբանե հերքում էր։ Ամերիկացի պաշտոնյաները տարբեր միջնորդների միջոցով Թեհրանին մեսիջներ են ուղարկել, որ եթե Հանիեի սպանության պայթյունը տեղի է ունեցել Իսրայելի գաղտնի գործողության արդյունքում և չի սպանել Իրանի ոչ մի քաղաքացու, ապա Իրանը պետք է վերագնահատի Իսրայելի վրա ռազմական հարձակման իր ծրագիրը: Պաշտոնյաներն ասել են, որ իրենք ակնկալում են Իրանի ինչ-որ արձագանք Հանիեի սպանությանը, սակայն Թեհրանը, ըստ երևույթին, վերանայել է իր դիրքորոշումը, և ԱՄՆ-ն առաջիկայում չի կանխատեսում հարձակում Իսրայելի վրա: Շարունակությունը՝ սկզբնաղբյուր կայքում

12:09 - 08 օգոստոսի, 2024

Փեզեշքիանն ԱՄՆ-ին և արևմտյան այլ երկրներին կոչ է անում դադարեցնել աջակցությունն Իսրայելին |azatutyun.am|

azatutyun.am: «Համաս»-ի առաջնորդի սպանության պատճառով Մերձավոր Արևելքում աճող լարվածության ֆոնին Իրանի նախագահ Մահսուդ Փեզեշքիանն ԱՄՆ-ին և արևմտյան այլ երկրներին կոչ է անում դադարեցնել աջակցությունն Իսրայելին։ «Եթե Միացյալ Նահանգները և արևմտյան երկրները ցանկանում են կանխել պատերազմն ու անկայունությունը տարածաշրջանում, ապա պետք է անհապաղ դադարեցնեն զենք վաճառել և աջակցել Սիոնիստական ռեժիմին», - ասել է Փեզեշքիանը ֆրանսիացի պաշտոնակից Էմանյուել Մակրոնի հետ հեռախոսազրույցում։ «Միացյալ Նահանգները և արևմտյան երկրներն աջակցում են մի ռեժիմի, որը չի ենթարկվում միջազգային օրենքներից և կանոնակարգերից որևէ մեկին», - Իրանի նախագահի մամլո ծառայության փոխանցմամբ՝ պնդել է Փեզեշքիանը: Իրանի և Իսրայելի միջև ուղիղ հակամարտության մտավախությունները սրվել են անցած շաբաթ Թեհրանում «Համաս» խմբավորման քաղաքական առաջնորդ Իսմայիլ Հանիյեի սպանությունից հետո: ԱՄՆ-ի և ԵՄ-ի կողմից ահաբեկչական կառույց ճանաչված պաղեստինյան խմբավորման առաջնորդը Իրանի մայրաքաղաքում մասնակցում էր նախագահ Փեզեշքիանի երդմնակալության արարողությանը։ Իրանը և «Համաս»-ը Հանիեյի մահվան համար մեղադրել են Իսրայելին սպառնալով պատասխան քայլեր ձեռնարկել։

20:01 - 07 օգոստոսի, 2024

Հեռախոսազրույց են ունեցել Մեծ Բրիտանիայի և Իրանի ԱԳ նախարարները |azatutyun.am|

azatutyun.am: Մերձավոր Արևելքում հակամարտության սրման մտահոգությունների ֆոնին՝ հեռախոսազրույց է կայացել Մեծ Բրիտանիայի և Իրանի արտգործնախարարների միջև։ Իրանական կողմի հաղորդագրության համաձայն՝ կողմերը քննարկել են տարածաշրջանում տիրող իրավիճակը, Թագավորության դիվանագիտության ղեկավար Դեյվիդ Լամին Թեհրանին զսպվածության կոչ է արել միաժամանակ շեշտել, որ «Իսմայիլ Հանիեի դեմ գործողությունը հետընթաց է Գազայում հրադադարի ճանապարհին»։ Իրանի արտգործնախարարի պաշտոնակատար Ալի Բաղերին իր հերթին Իսրայելին է մեղադրել տարածաշրջանն ապակայունացնելու համար:

16:52 - 07 օգոստոսի, 2024

Հանիեի սպանությունը լինելու է ԻՀԿ երկրների արտգործնախարարների հանդիպման գլխավոր թեման |shantnews.am|

shantnews.am: Իրանի ԱԳ նախարարի պաշտոնակատար Ալի Բաղերի Կանին մեկնել է Ջիդդա՝ մասնակցելու Իսլամական համագործակցության կազմակերպությանը (ԻՀԿ) մասնակից երկրների արտգործնախարարների խորհրդի արտահերթ նիստին, որը հանրապետությունն առաջարկել է գումարել Թեհրանում տեղի ունեցած պաղեստինյան արմատական ՀԱՄԱՍ շարժման քաղբյուրոյի նախագահ Իսմայիլ Հանիեի սպանությունից հետո։ Ինչպես ասվում է ԱԳՆ հայտարարության մեջ, «հրատապ հանդիպման օրակարգում ներառված են Պաղեստինի ժողովրդի դեմ սիոնիստների հանցագործությունների շարունակականությունը և ագրեսիայի մասշտաբները, որի արդյունքում սպանվել է Իսմայիլ Հանիեն և խախտվել է Իրանի Իսլամական Հանրապետության ինքնիշխանությունն ու ազգային անվտանգությունը»։ Բաղերի Կանին ծրագրում է հանդիպել ԻՀԿ գլխավոր քարտուղար Հիսեյն Բրահիմ Թահայի հետ։ Մերձավոր Արևելքում իրավիճակճ լարվեց անցյալ շաբաթ՝ Լիբանանում «Հեզբոլա»-ի բարձրաստիճան հրամանատարի և Թեհրանում ծայրահեղական «Համաս»-ի բարձրաստիճան քաղաքական առաջնորդի սպանությունից հետո։ Թեհրանը և իր դաշնակիցները վերջիններիս սպանության համար մեղադրում են Իսրայելին և խոստացել անպատասխան չթողնել։

10:55 - 07 օգոստոսի, 2024

Իրանը տեսանելիորեն պատրաստվում է Իսրայելի վրա հարձակման․ The Wall Street Journal

factor.am: Իրանը նկատելիորեն պատրաստվում է հարվածներ հասցնել Իսրայելին և մոտ օրերս կարող է հարձակում ձեռնարկել։ Այս մասին գրում է The Wall Street Journal-ը՝ վկայակոչելով ԱՄՆ վարչակազմի պաշտոնյաներին։ «ԱՄՆ պաշտոնյաները հայտարարել են, որ շաբաթավերջից դիտարկում են, թե ինչպես է Իրանը զբաղվում հրթիռային կայանների տեղաշարժով և զորավարժություններ է անցկացնում, ինչը կարող է վկայել այն մասին, որ Թեհրանն առաջիկա օրերին պատրաստվում է հարձակման»,- ասվում է հոդվածում։ Ըստ պարբերականի զրուցակիցների՝ ամերիկացի բարձրաստիճան պաշտոնյաները կոչ են անում Թեհրանին չսրել հակամարտությունը և ձգտում են այդ հարցում ստանալ արաբական երկրների աջակցությունը։ Հիշեցնենք, որ Մերձավոր Արևելքում իրավիճակը լարվեց նախորդ շաբաթ՝ Լիբանանում «Հեզբոլա»-ի բարձրաստիճան հրամանատարի և Թեհրանում «Համաս»-ի քաղբյուրոյի ղեկավար Իսմայիլ Հանիեի սպանությունից հետո։ Իրանն ու «Համաս»-ը հայտարարել են, որ Հանիեի սպանությունը անպատասխան չի մնալու։ Իսրայելը պաշտոնապես չի ստանձնել Հանիեի սպանության պատասխանատվությունը։

12:44 - 06 օգոստոսի, 2024

Մոսկվայի հետ կապերի զարգացումը Թեհրանի արտաքին քաղաքականության առաջնահերթություններից է․ Փեզեշքիանը՝ Շոյգուին |azatutyun.am|

azatutyun.am: Ռուսաստանի անվտանգության խորհրդի քարտուղար Սերգեյ Շոյգուն երեկ Թեհրանում հանդիպել է Իրանի նորընտիր նախագահի Մասուդ Փեզեշքիանի հետ։ Ռուսաստանի հետ կապերի զարգացումը Թեհրանի արտաքին քաղաքականության առաջնահերթություններից է, հայտարարել է Փեզեշքիանը՝ շեշտելով՝ Ռուսաստանը եղել է դժվարին պահերին Իրանին աջակցող երկրների թվում։ Անդրադառնալով տարածաշրջանային և միջազգային հարցերում Թեհրան-Մոսկվա համագործակցությանն՝ Իրանի նախագահը նկատել է՝ «բազմաբևեռ աշխարհի ստեղծման շուրջ համագործակցությունը կհանգեցնի խաղաղության և անվտանգության խթանմանը»։ Անդրադառնալով ԱՄՆ-ի և ԵՄ-ի կողմից ծայրահեղական ճանաչված «Համաս»-ի և Իրսրայելի հակամարտությանը, Թեհրանում «Համաս»-ի քաղբյուրոյի ղեկավար Իսմայիլ Հանիեի սպանությանը՝ Իրանի նախագահը Իսրայելի գործողությունները հանցավոր է որակել՝ դրանք համարելով միջազգային իրավունքի խախտման վառ օրինակ։ Ընդգծելով, որ Իրանը երբեք չի ձգտել տարածաշրջանում լարվածության սրման և պատերազմի՝ Փեզեշքիանը միևնույն ժամանակ վերահաստատել է՝ «Իսրայելի ռեժիմն անպայման պատասխան կստանա իր հանցագործությունների համար»։ Շոյգուն, իր հերթին, նշել է, որ Իրանը Ռուսաստանի առանցքային և ռազմավարական դաշնակիցներից է տարածաշրջանում ու հավելել՝ երկու երկրների հարաբերություններն աճում են բոլոր ոլորտներում։ Մերձավոր Արևելքում շուրջ 10 ամիս ընթացող պատերազմն էլ ավելի թեժացավ անցյալ շաբաթ՝ Լիբանանում «Հեզբոլա»-ի բարձրաստիճան հրամանատարի և Թեհրանում «Համաս»-ի բարձրաստիճան քաղաքական առաջնորդի սպանությունից հետո։

11:27 - 06 օգոստոսի, 2024

Մերձավոր Արևելքում ճգնաժամային իրավիճակը սրման եզրին է․ Սիյարտոն՝ Իրանի և Իսրայելի գործընկերների հետ խոսելուց հետո |tert.am|

tert.am: Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն հայտնել է, որ հեռախոսազրույց է ունեցել Իսրայելի և Իրանի ԱԳ նախարարների հետ, և արդյունքում հաստատվել է, որ Մերձավոր Արևելքում ճգնաժամային իրավիճակը սրման եզրին է: Այս մասին նա գրել է սոցցանցում։ «Այսօր հեռախոսազրույց եմ ունեցել իսրայելցի գործընկեր Իսրայել Կացի և իրանցի գործընկեր Ալի Բաղերի Քանիի հետ, որոնց հետ խոսակցությունը, ցավոք, ևս մեկ անգամ հաստատել է, որ իրավիճակը ծայրաստիճան սրված է», - գրել է Սիյարտոն: Դիվանագետն ընդգծել է Մերձավոր Արևելքի տարածաշրջանում լայնածավալ պատերազմի կանխման կարևորությունը։ «Եթե մերձավորարևելյան ներկայիս ճգնաժամը տարածվի դեպի ևս մեկ երկիր, այնտեղ կանգ չի առնի, այդ դեպքում հակամարտությունը հեշտությամբ կարող է վերաճել տարածաշրջանային պատերազմի, որը կարող է գլոբալ անվտանգային սպառնալիք դառնալ»–, ընդգծել է Սիյարտոն՝ կոչ անելով միջազգային հանրությանը կենտրոնանալ էսկալացիայի կանխարգելման վրա:

21:57 - 05 օգոստոսի, 2024

Շոյգուն մեկնել է Թեհրան |azatutyun.am|

azatutyun.am: Ռուսաստանի անվտանգության խորհրդի քարտուղար Սերգեյ Շոյգուն աշխատանքային այցով ժամանել է Իրան, հաղորդում է «Ինտերֆաքս» գործակալությունը։ Շոյգուն Թեհրանում բանակցություններ կվարի Իրանի ազգային անվտանգության բարձրագույն խորհրդի քարտուղար Ալի Աքբար Ահմադիանի և Իրանի զինված ուժերի գլխավոր շտաբի պետ Մոհամադ Բաղերիի հետ։ Գործակալությունը նշում է, որ Շոյգուին կընդունի նաև Իրանի նորընտիր նախագահ Մասուդ Փեզեշքիանը։ Շոյգուն Թեհրանում կքննարկի երկկողմ համագործակցության լայն շրջանակի, ինչպես նաև տարածաշրջանային և գլոբալ անվտանգության հարցեր, ասվում է Ռուսաստանի անվտանգության խորհրդի հայտարարությունում։ Մերձավոր Արևելքում շուրջ 10 ամիս ընթացող պատերազմն էլ ավելի թեժացավ անցյալ շաբաթ՝ Լիբանանում «Հեզբոլա»-ի բարձրաստիճան հրամանատարի և Թեհրանում ծայրահեղական «Համաս»-ի բարձրաստիճան քաղաքական առաջնորդի սպանությունից հետո։ Թեհրանը և իր դաշնակիցները մեղադրանքի սլաքներն ուղղել են դեպի Իսրայելը և սպառնացել պատասխան գործողություններով: Վաշինգտոնը վերահաստատել է «ԱՄՆ-ի երկաթյա աջակցությունը» Իրանի կողմից պատասխան հարձակման դեպքում։

15:59 - 05 օգոստոսի, 2024