Ինֆոքոմ

Խափանվել է Ուկրաինայի արևմուտքում նոր «ժողովրդական հանրապետությունների» ստեղծման փորձը․ Ուկրաինայի անվտանգության ծառայություն

Ուկրաինայի անվտանգության ծառայությունը հայտնում է, որ խափանել է Կրեմլի պլանները Ուկրաինայի արևմուտքում նոր «ժողովրդական հանրապետությունների» ձևավորման մասով»։ «Ուկրաինայի Դաշնային Հանրապետությունը» պետք է ներառեր հետևյալ մարզերը. ▪️ Իվանո-Ֆրանկովսկի մարզը,▪️ Անդրկարպատյան մարզը,▪️ Լվովի մարզը▪️ Տերնոպոլի մարզը▪️ Չեռնովցիի մարզը Ըստ հաղորդագրության՝ Ուկրաինայի Անվտանգության ծառայությունը Իվանո-Ֆրանկովսկի մարզում ձերբակալել է ցանցի կազմակերպչին և առանցքային դեմքերին։ «Զինված անջատողականները պետք է ոչնչացնեին հիմնական ուժայիններին և իշխանության ներկայացուցիչներին։ Դրանից հետո նախատեսվում էր գրավել վարչական շենքերը և այսպես կոչված «ԼԺՀ/ԴԺՀ»-ի մոդելով «ժողովրդական հանրապետություններ» հռչակել, ապա միավորվել Ռուսաստանի կողմից վերահսկվող նոր պետության մեջ»,- ասված է հաղորդագրության մեջ։

10:13 - 06 մարտի, 2022

Որեւէ երկրի կողմից Ուկրաինայի երկինքը ոչ թռիչքային գոտի սահմանելը ՌԴ-ն կդիտարկի որպես մասնակցություն ռազմական հակամարտությանը․ Պուտին

ՌԴ նախագահ Վլադիմիր Պուտինն այսօր ասուլիսի ժամանակ ասել է, որ ՌԴ-ում չի պլանավորվում արտակարգ կամ ռազմական դրություն մտցնել։ Նա հայտարարել է, որ ոչ ժամկետային զինծառայողները, ոչ էլ նրանք, որոնք կանչվում են հավաքների, չեն ներգրավվելու Ուկրաինայում Ռուսստանի գործողություններին։ Նա անդրադարձել է իր ավելի վաղ հնչեցրած հայտարարությանը, ըստ որի՝ Ուկրաինայում ՌԴ-ի գործողությունները այդ երկրի դենացիֆիկացիայի համար են․ «Ինչ է նշանակում դենացիֆիկացիան։ Ահա, ես զրուցել եմ արեւմտյան գործընկերների հետ․ իսկ ի՞նչ կա, ձեզ մոտ նույնպես կան կան արմատականներ։ Այո՛, մեզ մոտ կան։ Բայց մեր կառավարությունում արմատականներ չկան։ Եւ բոլորը խոստովանում են, որ այնտեղ կան»։ Ինչ վերաբերում է Ուկրաինայի երկինքը փակելու վերաբերյալ քննարկումներին՝ ՌԴ նախագահը հայտարարել է, որեւէ երկրի կողմից Ուկրաինայի երկինքը ոչ թռիչքային գոտի սահմանելը ՌԴ-ն կդիտարկի որպես մասնակցություն ռազմական հակամարտությանը, եւ մեկ է, թե այդ երկրներն ինչ կառույցի անդամ կլինեն։ Պուտինի խոսքով՝ ուկրաինական գրեթե բոլոր ռազմական ենթակառուցվածքները ոչնչացվել են, այդ թվում ավիացիոն եւ հակաօդային պաշտպանության միջոցները։ Ըստ ՌԴ նախագահի՝ «նրանք [ուկրաինական կողմը,-խմբ․] պետք է հասկանան, որ եթե շարունակեն անել այն, ինչ անում են, հարցականի տակ են դնելու ուկրաինական պետության ապագան։ Եւ եթե դա տեղի ունենա, դա ամբողջությամբ նրանց խղճին կլինի»։

18:02 - 05 մարտի, 2022

Համաձայնության ենք եկել ֆինանսական ամենամեծ կառույցների հետ Ուկրաինային աջակցելու հարցում․ Զելենսկի

Վլադիմիր Զելենսկին իր հերթական ուղերձի ընթացքում հայտնել է, որ իրենք արդեն մտածում են ուկրաինական քաղաքները, տնտեսությունը վերականգնելու մասին։ «Ես զրուցել եմ Համաշխարհային բանկի տնօրեն Դաիդ Մալպասի հետ, Արժույթի միջազգային հիմնադրամի համակարգող տնօրեն Կրիստալինա Ջորջիևայի հետ։ Մենք համաձայնության ենք եկել ֆինանսական ամենամեծ կառույցների հետ Ուկրաինային աջակցելու հարցում։ Արդեն կա արտակարգ օգնության և պատերազմից հետո Ուկրաինայի վերականգնման համար միլիարդավոր դոլարների որոշում»,- ասել է Զելենսկին Զելենսկին հայտնել է, որ հեռախոսազրույց է ունեցել Թուրքիայի նախագահ Էրդողանի, Սաուդյան Արաբիայի և Արաբական Միացյալ Էմիրությունների ղեկավարների հետ։ «Ես զրուցել եմ Եվրախորհրդի նախագահ Շառլ Միշելի և Եվրահանձնաժողովի նախագահ Ուրսուլա ֆոն դեր Լեյենի հետ։ Հիմնական թեման ԵՄ-ին Ուկրաինայի անդամակցությունն էր»,- ասել է Ուկրաինայի նախագահը։

17:40 - 05 մարտի, 2022

Ուկրաինայի վրայով ոչ թռիչքային գոտի ստեղծելը կարող է նաև խանգարել Ուկրաինայի ինքնապաշտպանվելու կարողությանը. Բրիտանիայի պաշտպանության նախարար

Միացյալ Թագավորության պաշտպանության նախարարն ասում է, որ Ուկրաինայի վրայով ոչ թռիչքային գոտի ստեղծելը ոչ միայն կմեծացնի ՆԱՏՕ-ի դաշնակիցների համար վտանգը, քանի որ նրանք կարող են ուղիղ առճակատման մեջ մտնել ռուսական ինքնաթիռների հետ, այլ նաև կարող է խանգարել Ուկրաինայի ինքնապաշտպանվելու կարողությանը: Այս մասին փոխանցում է բրիտանական BBC-ն։ Լրատվամիջոցը հայտնում է, որ այս շաբաթ՝ Էստոնիա և Դանիա կատարած այցի ժամանակ, նախարար Բեն Ուոլեսը BBC-ին ասել է, որ Ռուսաստանը մինչ այժմ հաջողության չի հասել Ուկրաինայի հակաօդային պաշտպանության և օդուժի ոչնչացման հարցում: Նա ասաց, որ ոչ թռիչքային գոտին կարող է «առավելություն տալ ռուսներին», որոնք դեռ հնարավորություն կունենան թիրախավորելու քաղաքները իրենց հեռահար հրետանու և ցամաքային հրթիռների միջոցով:

17:32 - 05 մարտի, 2022

Բելգրադում ակցիա է տեղի ունեցել՝ ի պաշտպանություն Ուկրաինայում ռուսական հատուկ գործողության

Գլխավոր լուսանկարը՝ Stefan Stojanovic/Reuters Մարտի 4-ի երեկոյան Սերբիայի մայրաքաղաք Բելգրադում ակցիա է տեղի ունեցել՝ ի պաշտպանություն Ուկրաինայում ռուսական հատուկ գործողության։ Այս մասին գրում է bbc.com-ը Gazeta.ru-ն գրում է, որ մասնակիցներն իրենց աջակցությունն են հայտնել Դոնբասի ժողովրդին, ինչպես նաև Ուկրաինան ապառազմականացնելու Մոսկվայի ջանքերին։ Հանրահավաքի ժամանակ մարդիկ ցուցադրել են Սերբիայի, Ռուսաստանի, Բելառուսի, Դոնեցկի և Լուգանսկի Ինքնահռչակ Հանրապետությունների դրոշները։ Լուսանկարները՝ Stefan Stojanovic/Reuters

17:14 - 05 մարտի, 2022

Росавиация-ն ռուսական ավիաընկերություններին խորհուրդ է տալիս մարտի 6-ից դադարեցնել բոլոր միջազգային թռիչքները

16:28 - 05 մարտի, 2022

Կիևը ցանկանում է հակամարտություն հրահրել ՆԱՏՕ-ի և Ռուսաստանի միջև․ Լավրով

Ռուսաստանի արտգործնախարար Սերգեյ Լավրովը հայտարարել է, որ ռուսական կողմն Ուկրանիայից դեռ չի ստացել բանակցությունների երրորդ փուլի անցկացման ժամկետների մասին տեղեկություններ։ Այս մասին հայտնում է «ТАСС»-ը։ «Առայժմ [բանակցությունների] նոր ժամկետների մասին տեղեկություն չենք ստացել (Ուկրաինայից- խմբ․)։ Մեր ուկրաինացի գործընկերները լավ գիտեին, որ մենք պատրաստ էինք դեռ երեկ երեկոյան անցնել երրորդ փուլին»,- ասել է ՌԴ արգորնախարարը։ Նրա պնդմամբ Ուկրաինան անընդհատ պատրվակներ է առաջ քաշում՝ բանակցությունների հաջորդ փուլի մեկնարկը հետաձգելու համար։ «Այն, թե որ պայմաններեն ենք մենք բացարձակապես անփոխարինելի համարում այս ճգնաժամը կարգավորելու համար՝ վերացնել Ուկրաինայի տարածքում Հյուսիսատլանտյան դաշինքի անդամների կողմից տարիներ շարունակ ստեղծված վտանգը Ռուսաստանի Դաշնության դեմ, մենք ուրվագծել ենք ինչպես նախագահի ելույթներում, այնպես էլ բանակցությունների ժամանակ մեր պատվիրակության ելույթներում»,- ասել է Լավրովը։ ԱԳՆ ղեկավարը նաև նշել է, որ Զելենսկու դառնացած հայտարարությունները լավատեսություն չեն ներշնչում․ «Կիևը ցանկանում է հակամարտություն հրահրել ՆԱՏՕ-ի և Ռուսաստանի միջև։ Զելենսկու ռազմատենչ կատաղությունը հուշում է, որ նրան պետք չեն բանակցություններ Ռուսաստանի Դաշնության հետ»։ Հիշեցնենք, որ երեկ Ուկրաինայի նախագահը հայտարարել է, թե ՆԱՏՕ-ի երկրներն իրենք են ստեղծել այն գաղափարը, թե Ուկրաինայի երկնքի փակումը կհրահրի Ռուսաստանին ուղիղ ագրեսիա սկսել դաշինքի դեմ․ «Սա թույլ ու ներքին վստահություն չունեցողների ինքնահիպնոզն է... Ի՞նչ էիք մտածում այդ հանդիպման ժամանակ։ Այսօրվանից սկսած՝ բոլոր մարդիկ, որոնք կզոհվեն, կզոհվեն նաև ձեր պատճառով, ձեր թուլության պատճառով»։

16:22 - 05 մարտի, 2022

Ուկրաինայում դադարեցվել են գազամատակարարման 16 կայանների աշխատանքններ

Մարտի 5-ին, ժամը 12:00-ի դրությամբ Ուկրաինայում ռազմական գործողությունների պատճառով 6 թաղամասերում դադարեցվել է գազամատակարարման 16 կայանի աշխատանք։ Ինչպես փոխանցում է Ուկրինֆորմը՝ այս մասին հաղորդում է Ուկրաինայի գազատրանսպորտային համակարգի մամուլի ծառայությունը։ «Ռազմական գործողությունների պատճառով ընկերությունը դադարեցրել է գազամատակարարման 16 կայանների աշխատանքները Խարկովի, Նիկոլայեւի, Զապորոժի, Կիեւի, Դոնեցկի, Լուգանսկի շրջաններում»,- ասված է հաղորդագրության մեջ։ Նշվում է, որ առանց գազի են մնում հարյուր հազարավոր սպառողներ։ «Հաշվի առնելով տարածքային գազամատակարարման ցանցերին հասցված զգալի վնասն ու ռազմական ակտիվ գործողությունները, այս պահին հնարավոր չէ վերականգնել գազամատակարարումը»։

16:11 - 05 մարտի, 2022

ՌԴ-ն սկսել է ծանր զինատեսակներից հրետակոծել Վոլնովախա քաղաքը․ Իրինա Վերեշուկ

Ուկրաինայի ժամանակավոր օկուպացված տարածքների վերաինտեգրման հարցերով նախարար Իրինա Վերեշուկը հայտնել է, որ ժամը 11։45-ին ՌԴ-ն սկսել է ծանր զինատեսակներից հրետակոծել Վոլնովախա քաղաքը․ «Մենք պայմանավորվածություն ունեինք, որ ժամը 9-ից երկու մարդասիրական միջանցք ենք ստեղծելու։ Ես արձանագրում եմ այն փաստը, որ ՌԴ-ն խախտել է պայմանավորվածությունը, նույնիսկ Կարմիր Խաչի միջնորդությամբ չի պահել իր ստանձնած պարտավորությունները»։ Նշենք, որ ՌԴ ՊՆ-ն այսօր առավոտյան հայտնել է, որ Մոսկվայի ժամանակով առավոտյան ժամը 10-ից ռուսական կողմը հայտարարում է «լռության ռեժիմ», բացվում են մարդասիրական միջանցքներ՝ Մարիուպոլից եւ Վոլնովախից խաղաղ բնակիչների դուրս գալու համար։ Ուկրաինական կողմն էլ հաստատեց տեղեկությունը։ Ավելի ուշ Մարիուպոլի քաղաքային խորհուրդը հայտարարեց որ ռուսական կողմը չի պահպանում «լռության ռեժիմը» և շարունակում է գնդակոծել ինչպես Մարիուպոլը, այնպես էլ նրա շրջակայքը։ ՌԴ ՊՆ-ն քիչ առաջ հաղորդեց, որ «օբյեկտիվ վերահսկողության արդյունքներով (3 անօդաչու թռչող սարք Մարիուպոլի վրա, 2-ը՝ Վոլնովախայի վրա) պարզվել է, որ հումանիտար շարասյուներ չեն ձևավորվել, և հայտարարված «լռության ռեժիմը» ակտիվորեն օգտագործվել է պաշտպանական դիրքերում ուկրաինական զորքերի և ազգային գումարտակների վերախմբավորման համար»։ |ria.ru|

15:48 - 05 մարտի, 2022

ՌԴ ՊՆ-ն պնդում է, որ «լռության ռեժիմը» օգտագործվել է պաշտպանական դիրքերում ուկրաինական զորքերի և ազգային գումարտակների վերախմբավորման համար

ՌԴ ՊՆ-ն հայտարարում է, որ այս պահին Մարիուպոլից 200 հազար և Վոլնովախայից 15 հազար հայտարարված փախստականներից մարդասիրական բաց միջանցքներ ոչ մեկը չեն ժամանել։ Ռուսական գերատեսչության պնդմամբ «ազգայնականները չեն ազատում խաղաղ բնակիչներին և օտարերկրացիներին»։ Այս մասին հաորդում է ria.ru-ն։ «Օբյեկտիվ վերահսկողության արդյունքներով (3 անօդաչու թռչող սարք Մարիուպոլի վրա, 2-ը՝ Վոլնովախայի վրա) պարզվել է, որ հումանիտար շարասյուներ չեն ձևավորվել, և հայտարարված «լռության ռեժիմը» ակտիվորեն օգտագործվել է պաշտպանական դիրքերում ուկրաինական զորքերի և ազգային գումարտակների վերախմբավորման համար։ Մենք ստիպված ենք ուղիղ դիմել Ուկրաինայի փոխվարչապետ Վերեշչուկին, որի հետ վերջին մեկ օրվա ընթացքում ինտենսիվ շփվել ենք և կատարել նրա բոլոր ցանկություններն ու խնդրանքները, որ եթե Կիևի ռեժիմը ձեզ ներքաշել է գործողության մեջ՝ պաշտպանվող նացիստների համար առավել բարենպաստ պայմաններ ստեղծելու համար, ապա այդ մասին անձամբ ասեք ուկրաինացի ժողովրդին, և նա կտա իր քաղաքական գնահատականը ձեր գործողություններին»,- ասվում է հայտարարության մեջ։ ՌԴ ՊՆ-ից նշում են նաև, որ չնայած այսօրվա հումանիտար գործողության խափանման հետևանքների ծանրությանը, պատրաստ են շարունակել համբերատար և համառորեն աշխատել Ուկրաինայի և միջազգային կազմակերպությունների ներկայացուցիչների հետ՝ հումանիտար ճգնաժամի անհապաղ կարգավորման համար։ Նշենք, որ ՌԴ ՊՆ-ն այսօր առավոտյան հայտնել է, որ Մոսկվայի ժամանակով առավոտյան ժամը 10-ից ռուսական կողմը հայտարարում է «լռության ռեժիմ», բացվում են մարդասիրական միջանցքներ՝ Մարիուպոլից եւ Վոլնովախից խաղաղ բնակիչների դուրս գալու համար։ Ուկրաինական կողմն էլ հաստատեց տեղեկությունը։ Ավելի ուշ Մարիուպոլի քաղաքային խորհուրդը հայտարարեց որ ռուսական կողմը չի պահպանում «լռության ռեժիմը» և շարունակում է գնդակոծել ինչպես Մարիուպոլը, այնպես էլ նրա շրջակայքը։ Ուկրաինայի ժամանակավոր օկուպացված տարածքների վերաինտեգրման հարցերով նախարար Իրինա Վերեշուկն էլ քիչ առաջ հայտնել է, որ ժամը 11։45-ին ՌԴ-ն սկսել է ծանր զինատեսակներից հրետակոծել Վոլնովախա քաղաքը։

15:48 - 05 մարտի, 2022

Ռուսական կողմը չի պահպանում լռության ռեժիմը եւ շարունակում է գնդակոծել Մարիուպոլը

Քանի որ ռուսական կողմը չի պահպանում լռության ռեժիմը եւ շարունակում է գնդակոծել ինչպես հենց Մարիուպոլը, այնպես էլ շրջակայքը, անվտանգությունից ելնելով՝ բնակչության տարհանման ժամը տեղափոխվում է։ Այս մասին հայտնում է Մարիուպոլի քաղաքային խորհուրդը։ Մարիուպոլի բոլոր բնակիչներին խնդրում են ցրվել եւ ուղեւորվել ապաստարաններ։ Տարհանման մասին հավելյալ տեղեկություն կտարածվի առաջիկայում։ Այս պահին բանակցություններ են ընթանում ռուսական կողմի հետ՝ լռության ռեժիմի սահմանման եւ անվտանգ մարդասիրական միջանցք ապահովելու համար։ Լուսանկարի աղբյուրը՝ bbc.com

14:57 - 05 մարտի, 2022

Գերմանիան հակաօդային պաշտպանության միջոցներ կտեղակայի Լիտվայում, իսկ ԱՄՆ-ն տանկերով զինված գումարտակ կուղարկի այնտեղ

Գերմանիան հակաօդային պաշտպանության միջոցներ կտեղակայի Լիտվայում, իսկ Միացյալ Նահանգները տանկերով զինված գումարտակ կուղարկի այնտեղ։ Այս մասին, ինչպես փոխանցում է «Reuters» գործակալությունը, հայտնել է Լիտվայի պաշտպանության նախարար Արվիդաս Անուսաուսկասը։ Նախարարը լրագրողներին հայտնել է, որ այս ամենն առանձին է Լիտվայում մարտին անցկացվելիս զորավարժությունների համար եկող զորքերից։ Նա նաև ասել է, որ Լիտվայում ՆԱՏՕ օտարերկրյա զորքերի ընդհանուր թիվը մինչև մարտի վերջ կհասնի 4000-ի՝ այժմյան 3000-ի փոխարեն։ Հիշեցնենք, որ Լիտվան ՌԴ-ի՝ Ուկրաինայում հատուկ օպերացիա սկսելուց հետո դիմել էր ՆԱՏՕ-ին՝ լրացուցիչ զորքեր և սարքավորումներ ուղարկելու համար։

14:56 - 05 մարտի, 2022

«Խերսոնը Ուկրաինա է». զանգվածային խաղաղ ցույց Խերսոնի պետական վարչակազմի շենքի մոտ

Խերսոն քաղաքի կենտրոնում՝ Ազատության հրապարակում, ռուսական կողմի վերահսկողության տակ գտնվող մարզային պետական վարչակազմի շենքի մոտ սկսվել է զանգվածային խաղաղ ցույց։ Այս մասին հաղորդում է Ukrinform-ը։ Ըստ հրապարակված տեսանյութերի՝ քաղաքի հրապարակում հավաքված են շատ խերսոնցիներ, որոնց ձեռքին ուկրաինական դրոշներ են․ նրանք վանկարկում են՝ «Խերսոնը Ուկրաինա է»: Խերսոնցիները երեկ ևս ցույց են անցկացրել՝ ընդդեմ ՌԴ-ի, եւ հրաժարվել են նրա «արյունալի մարդասիրական օգնությունից»։ Հիշեցնենք, որ դեռևս մարտի 2-ին ՌԴ պաշտպանության նախարարությունից հայտնել էին, որ Խերսոն քաղաքն ամբողջությամբ անցել է ՌԴ վերահսկողության տակ։ Նույն օրը Խերսոնի նահանգային վարչության նախագահ Գեննադի Լագուտան հայտնել էր․ «Ռաշիստներն ամբողջությամբ գրավել են Խերսոնի շրջանի նահանգային վարչության շենքը, բայց մենք չենք հրաժարվել մեր պարտականություններից։ Տարածաշրջանային օպերատիվ շտաբը, որը ես ղեկավարում եմ, շարունակում է աշխատել և լուծել տարածքի բնակիչների օգնության հետ կապված հրատապ խնդիրները։ Սպասում ենք մարդասիրական օգնության»:

14:52 - 05 մարտի, 2022

Մենք այլեւս սահման չունենք բարեկամ Լեհաստանի հետ․ Զելենսկի

Լեհաստանի եւ Ուկրաինայի իշխանություններին հաջողվել է կանխել հումանիտար ճգնաժամը սահմանին։ Այս մասին իր ուղերձում հայտարարել է Ուկրաինայի նախագահ Վլադիմիր Զելենսկին։ «Հաջողվեց իրավիճակն այնպես կազմակերպել, որ ուկրաինացի հազարավոր կանայք ու երեխաներ արժանի վերաբերմունք ստանան։ Ոչ ոք չի հարցնում՝ ինչ ազգություն ունեն նրանք, ինչ հավատք, որքան գումար ունեն։ Փաստացի, մենք այլեւս սահման չունենք բարեկամ Լեհաստանի հետ։ Որովհետեւ մենք միասին բարու կողմն ենք։ Մենք սահմաններին չենք հասել։ Ես վստահ եմ, շուտով մենք մերոնց կարող ենք ասել «վերադարձե՛ք, վերադարձե՛ք Լեհաստանից, Ռումինիայից, Սլովակիայից եւ մնացյալ բոլոր բարեկամ երկրներից։ Վերադարձեք, որովհետեւ այլեւս վտանգ չկա»

14:45 - 05 մարտի, 2022

Մինչ այս պահը ավելի քան 40 երկիր մասամբ կամ ամբողջությամբ միացել է մեր պատժամիջոցներին․ Եվրահանձնաժողովի նախագահ

Եվրահանձնաժողովի նախագահ Ուրսուլա ֆոն դեր Լեյենը հայտարարություն է տարածել Միացյալ Նահանգների պետքատուղար Էնթոնի Բլինքենի հետ։ Եվրահանձնաժողովի նախագահը խոսել է Եվրամիության և ԱՄՆ-ի համագործակցության մասին՝ ի պատասխան Ռուսաստանի՝ Ուկրաինա ներխուժման։ «Մինչ այս պահը ավելի քան 40 երկիր մասամբ կամ ամբողջությամբ միացել է մեր պատժամիջոցներին»,- ասել է նա։ Նա հայտնել է, որ ԵՄ-ն և ԱՄՆ-ն շարունակելու են լինել Ուկրաինայի և նրա ժողովրդի կողքին․ «Մենք անհապաղ տրամադրում ենք 500 միլիոն եվրո մարդասիրական օգնություն և կտարամդրենք ավելին։ Մենք աշխատում ենք Լեհաստանում, Սլովակիայում և Ռումինիայում քաղաքացիական պաշտպանության կենտրոններ ստեղծելու ուղղությամբ: Եվ մենք միջազգային կազմակերպությունների ու հասարակական կազմակերպությունների հետ անում ենք ամեն ինչ, որ ստեղծենք մարդասիրական միջանցքներ Ուկրաինայի ներսում»։

14:08 - 05 մարտի, 2022

ԵՄ-ն կասեցրել է Ռուսաստանին և Բելառուսին գործունեությունը Բալթիկ ծովի երկրների խորհրդում

Եվրամիությունը հայտարարել է, որ միացել է Բալթիկ ծովի երկրների խորհրդի անդամներին (CBSS)՝ դադարեցնելով խորհրդում Ռուսաստանի և Բելառուսի գործունեությունը: Այս մասին հաղորդում է Reuters-ը։ «Այս որոշումը Եվրամիության և նրա համախոհ գործընկերների պատասխանի մի մասն է Ռուսաստանի՝ Ուկրաինա ներխուժմանը և Բելառուսի ներգրավմանն այս չհրահրված և չարդարացված ագրեսիային»,- հայտարարել է ԵՄ-ն։ «ԵՄ-ն համաձայն է խորհրդի մյուս անդամների (Դանիա, Էստոնիա, Ֆինլանդիա, Գերմանիա, Իսլանդիա, Լատվիա, Լիտվա, Նորվեգիա, Լեհաստան և Շվեդիա) հետ, որ Ռուսաստանի և Բելառուսի գործունեության կասեցումը կմնա ուժի մեջ այնքան ժամանակ, քանի դեռ հնարավոր չի լինի վերսկսել համագործակցությունը՝ հիմնված միջազգային իրավունքի հիմնարար սկզբունքները հարգելու վրա»,- հավելել է ԵՄ-ն։

13:57 - 05 մարտի, 2022