Ռոբերտ Քոչարյան

Եղել է Հայաստանի Հանրապետության 2-րդ եւ Արցախի Հանրապետության 1-ին նախագահը։

1992-1994 թվականներին եղել է Արցախի վարչապետ

1994-1997 թվականներին եղել է Արցախի նախագահ

1997-1998 թվականներին եղել է Հայաստանի վարչապետ

1998-2008 թվականներին եղել է Հայաստանի նախագահ։

Գլխավորում է 2021 թ․ հունիսի 20-ի խորհրդարանական արտահերթ ընտրություններին մասնակցող «Հայաստան» դաշինքի նախընտրական ցուցակը։

«Քոչարյանին պատկանող գույքն ամբողջությամբ իրենն է և օրինական»․ փաստաբան |hetq.am|

hetq.am: Հակակոռուպցիոն դատարանում նոյեմբերի 28-ին տեղի ունեցավ ՀՀ երկրորդ նախագահ Ռոբերտ Քոչարյանին և նրա ընտանիքի անդամներին պատկանող ենթադրյալ ապօրինի ծագում ունեցող գույքի բռնագանձման գործով առաջին դատական նիստը։ Գլխավոր դատախազության ապօրինի ծագում ունեցող գույքի բռնագանձման գործերով վարչությունը հայցադիմում է ներկայացրել Ռոբորտ Քոչարյանի և նրա կնոջ՝ Բելլա Քոչարյանի, դստեր՝ Գայանե Քոչարյանի, վերջինիս ամուսնու՝ Վիգեն Չատինյանի, երկու որդիների՝ Լևոն ու Սեդրակ Քոչարյանների, նրանց կանանց՝ երգչուհի Սիրուշոյի (Սիրանուշ Քոչարյան) և Զարուհի Բադալյանի դեմ։ Պատասխանողների ներկայացուցիչներ փաստաբաններ Արամ Օրբելյանը, Արթուր Հովհաննիսյանը և Հարություն Հարությունյանն առարկեցին դատական նիստի տեսանկարահանման և լուսանկարահանման դեմ։ Ավելին, Արամ Օրբելյանը միջնորդեց դատական նիստը շարունակել դռնփակ ռեժիմով։ Դռնփակության հարցը շուրջ 10 րոպե քննելուց հետո դատարանը որոշեց նիստը շարունակել դռնբաց ռեժիմով։ Սակայն, ինչպես լրագրողների հետ զրույցում հայտնեց Արամ Օրբելյանը, դատարանը որոշել է գործի քննությունն իրականացնել մասնակի դռնփակ և մասնակի դռնբաց։ «Էնտեղ, որտեղ բանկային գաղտնիքի հարցեր կլինեն, կանենք դռնփակ, մնացած հարցերում՝ դռնբաց»,- դատարանի որոշումը մեզ փոխանցեց Օրբելյանը։ Դատական նիստին Օրբելյանը ներկայացրեց միջնորդություն՝ հայցի ապահովման միջոց կիրառելու վերաբերյալ։ Ըստ պատասխանողի ներկայացուցչի՝ գոյացել է ավելի քան 20 մլն դրամ պարտավորություն պետության նկատմամբ։ Այն ներառում է վերջին տարվա գույքահարկը և հողի հարկը, ինչպես նաև նախորդ երկու տարիներին հողի հարկի ծավալի վերահաշվարկի հետ կապված առաջացած հավելյալ պարտավորությունը։ Նշենք, որ խոսքը Քոչարյանին պատկանող, Իսակովի պողոտայում գտնվող առանձնատան գույքահարկի և այդ տարածքի հողի հարկի մասին է։ Օրբելյանը հայտնեց, որ այս պահի դրությամբ արգելանք է դրված Քոչարյանին պատկանող մի շարք անշարժ գույքերի և դրամական միջոցների վրա՝ ավելի քան 21․5 մլրդ դրամի չափով։ Միայն արգելանք չի դրվել Քոչարյանի կենսաթոշակային հաշվի վրա, քանի որ այդ գումարը նախատեսված է կենսական կարիքները հոգալու համար, և օրենքը թույլ չի տալիս։ Քոչարյանի ներկայացուցիչը խնդրեց թույլատրել արգելադրված հաշիվներից 20 մլն դրամի չափով արգելանքը հանել, որ կարողանան պետության նկատմամբ պարտավորություններն մարել։ Դատախազության ապօրինի ծագում ունեցող գույքի բռնագանձման գործերով վարչության ավագ դատախազ Գևորգ Քոչարյանը չառարկեց միջնորդության դեմ։ Օրբելյանը գրավոր տարբերակով բանկային հաշվի համարը կփոխանցի դատախազին, դատախազն էլ իր գրավոր համաձայնությունը կտա։ Այն փուլում, երբ դատախազը պատրաստվում էր ներկայացնել հայցադիմումը, թե ինչ գույքեր են ցանկանում բռնագանձել Քոչարյանից և նրա ընտանիքից, փաստաբաններ Հարություն Հարությունյանը և Արամ Օրբելյանը հայտնեցին, որ իրենք լիարժեք չեն հասցրել ծանոթանալ գործի նյութերին և խնդրեցին դատական նիստը հետաձգել՝ իրենց ժամանակ տալու համար։ Դատախազ Գևորգ Քոչարյանն առաջարկեց սկսել ներկայացնել հայցադիմումը և քանի որ աշխատանքային օրվա ավարտը մոտ էր, նա առաջարկեց՝ հաջորդ նիստին էլ ներկայացուցիչներն իրեն հարցեր ուղղեն։ Դատարանն ասաց, որ ամբողջությամբ պետք չէ հրապարակել հայցադիմումը, քանի որ և դատարանն է դրան ծանոթ, և կողմերը։ Ըստ Նարինե Ավագյանի՝ հայցի առարկայի հիմքը պարզելու են հարցերի միջոցով։ Որոշվեց նիստը հետաձգել։ Գործով հաջորդ նիստը տեղի կունենա դեկտեմբերի 20-ին՝ 14։00-ին։ Արամ Օրբելյանը դատական նիստից հետո լրագրողներին հայտնեց, որ նախնական դատական նիստերի ընթացքում նպատակահարմար չեն գտել, որ նիստերը տեսագրվեն և լուսանկարահանվեն, որ անխոչընդոտ կարողանան աշխատել։ Լրագրողների հարցին, թե ինչով են խոչընդոտում լուսանկարահանումը և տեսանկարահանումը իրենց աշխատանքին, Օրբելյանն ասաց․ «Խոչընդոտում է, երբ կողմերը փորձում են ոչ թե դատավարական գործընթաց իրականացնել, այլ փորձում են այդ գործընթացը վերածել պայմանականորեն հանրության համար ինչ-որ գործընթացի»։ Անդրադառնալով Դատախազության հայցադիմումին՝ Օրբելյանն ասաց․ «Մենք գտնում ենք, որ պարոն Քոչարյանին պատկանող գույքն ամբողջությամբ իրենն է և օրինական է»։ Ավելի մանրամասն՝ hetq.am-ում։

21:24 - 28 նոյեմբերի, 2023

Գործ ունենք ոչ թե քրեական վարույթի, այլ բացառիկ զավեշտի հետ. Լևոն Քոչարյանի պաշտպան |panorama.am|

panorama.am: «Մենք գործ ունենք բացառիկ զավեշտի հետ, ոչ թե քրեական վարույթի»,- ասուլիսում ասաց ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի պաշտպան Էրիկ Ալեքսանյանը։ Նա որոշ մանրամասներ ներկայացրեց գործից՝ նշելով. «Զավեշտալի իրավիճակ ունենք. Լևոն Քոչարյանը համ ծեծի է ենթարկվել, համ էլ հենց ինքը կալանավորվել է, որևէ կարմիր բերետավոր մինչ այսօր թե Լևոն Քոչարյանի դեպքով, թե առհասարակ, որևէ պատասխանատվության չի ենթարկվել։ Որոշ դեպքերով, նաև Լևոն Քոչարյանի խոշտանգելու փաստի առիթով, նախաձեռնվել է քրեական վարույթ, բայց որևէ կարմիր բերետավոր մինչ այս պահը պատասխանատվության չի ենթարկվել, գոնե նվազագույնի տիրույթով որևէ մեկին մեղադրանք չի առաջադրվել»։ Է.Ալեքսանյանը հիշեցրեց, որ Լ. Քոչարյանին մեղադրանք է առաջադրվել այն բանի համար, որ իբրև նա 2023 թ. սեպտեմբերի 22-ին մասնակցելով խաղաղ ցույցին, հակադրվել և չի կատարել ոստիկանների օրինական պահանջը, այն է բացել ճանապարհի երթևեկելի հատվածը, ոստիկանության աշխատակիցների նկատմամբ գործադրել է բռնություն. «Դրանով պայմանավորված, իբրև Լևոն Քոչարյանը, մինչև մենքենա նստեցնելը, երկու անգամ ոտքերով հարվածել է ոստիկանության մեկ աշխատակցի, արդեն մեքենայում, Քոչարյանը չենթարկվելով նրանց օրինական պահանջներին և նպատակ ունենալով խաթարել նրանց ծառայողական գործունեությունը, հարվածել է ոստիկանության երկու աշխատակցի։ Սա է մեղադրանքի բնորոշումը։ Այս մեղադրանքը բնորոշ է քրեական օրենսգրքի 452 հոդվածին»։ Գործով կա երկու վկա և երկու տուժող։ «Տուժողներից մեկը Հրաչիկ Խաչատրյանն է։ Այն անձն է, որը, ըստ մեղադրանքի, մինչև Քոչարյանին մեքենա նստեցնելը, իբրև ստացել է ոտքերով հարված իր ոտքին։ Տեսանյութ կա, որտեղ երևում, է թե որ հատվածում է գտնվում Հրաչիկ Խաչատրյանը և արդյո՞ք նա կարող էր ստանալ հարված այդ դիրքում, կամ ստանալ այն եղանակով, ինչպես ներկայացված է մեղադրանքով»,- ասաց նա։ Է. Ալեքսանյանը նշեց, որ կաշկանդված է նախաքննության գաղտնիքով, բնականաբար, չի կարող ասել, թե ոստիկանության աշխատակիցները ինչ բնույթի ցուցմունքներ են տվել, ասաց՝ բոլոր 4 ոստիկանների ցուցմունքներն արժանահավատ չեն։ Նա նաև նշեց, որ մոտավորապես 10 կարմիր բերետավոր փորձում էին բերման ենթարկել Լևոն Քոչարյանին և ոստիկանների բոլոր գործողություններն ուղղված էին դեպի Լևոն Քոչարյանը։ «Մենք նպատակային չենք ասում այս կամ այն ապացույցն արժանահավատ է, արժանահավատ չէ, որևէ կերպ խեղաթյուրելու միտում չունենք։ Մեր ողջ նպատակն է այս քրեական վարույթի շրջանակներում պահպանվի ողջմտությունը, օբյեկտիվությունը։ Բայց, ի սկզբանե, ոչ այս ողջամտությունն է պահպանվել, ոչ էլ օբյեկտիվությունը։ Միգուցե իրավապաները մտածում էին, որ պաշտպանության կողմը չունի կամ չի կարող ձեռք բերել այնպիսի անժխտելի փաստական տվյալներ, նաև տեսանյութերի տեսքով, որոնք միգուցե հետագայում մեղադրանքի համար կդառնան որոշակի խնդիր։ Բայց մենք ունենք այդ փաստական տվյալները, ունենք իրավիճակ, որ այս շինծու մեղադրանքը կառուցված է բացառապես ոչ միայն շահագրգիռ ոստիկանության աշխատակիցների ցուցմունքների, այլ պարզապես ոչ միայն անարժանահավատ, այլ սուտ հայտնած տեղեկությունների հիման վրա»,- ասաց Լ.Քոչարյանի պաշտպան Էրիկ Ալեքսանյանը։ Նա նշեց, որ ունեն բացառապես սուտ տեղեկատվության հետ խնդիր և տվյալ պարագայում քրեական հետապնդման մարմինները շարունակում են ապօրինի քրեական հետապնդումը ու ապօրինի քրեական հետապնդման պայմաններում Քոչարյանը գտնվում է անազատության մեջ։ Փաստաբանն ասաց, որ քրեական վարույթի շրջանակներում իր կողմից հրապարակված տեսանյութը օբյեկտիվորեն զննության չի ենթարկվել։ «Տվյալ պարագայում ենք ունենք հետևյալ իրավիճակը՝ կարմիր բերետավորների ցուցմունքները հերքում են տեսանյութում արտացոլված իրողությունը։ Սա նոնսենս է։ Սովորաբար տեսանյութը, որպես փաստական տվյալ քրեական վարույթի շրջանակներում, համարվում է օբյեկտիվ փաստական տվյալ, օբյեկտիվ իրականությունը պարզ բացահայտող տվյալ, եթե, իհարկե, տեսանյութը մոնտաժված չէ։ Եթե մենք ունենք օբյեկտիվ ապացույց՝ տեսանյութ, ինչո՞ւ է Լևոն Քոչարյանը կալանավոված, ինչո՞ւ է նրա նկատմամբ հարուցվել այս շինծու քրեական հետապնդումը։ Բնականաբար, մենք կարող ենք ենթադրություններ, դատոություններ անել, բայց այս հարցի պատասխանը պետք է տա մեղադրանքի կողմը։ Հանրությունը պետք է տեսնի՝ այն ինչ ներկայացնում է պետությունը, ի դեմս քրեական հետապնդման մարմինների, իրականությանը չի համապատասխանում»,- ասաց Ալեքսանյանը։ Հիշեցնենք, որ Լևոն Քոչարյանը ձերբակալվել է սեպտեմբերի 22-ին, կալանավորվել է երկու ամսով սեպտեմբերի 25-ին։ Սեպտեմբերի 22-ին բողոքի ակցիաների ժամանակ ոստիկանության ծառայողները Լևոն Քոչարյանին ծեծի ենթարկելով բերման էին ենթարկել, այնուհետև նրան փակ գանգուղեղային վնասվածքով տեղափոխել են «Նաիրի» ԲԿ։ Դեռ հիվանդանոցում, Քոչարյանին է հանձնվել ձերբակալման որոշումը, որից պարզ է դարձել, որ ոստիկանները հաղորդում են ներկայացրել, որ Լ. Քոչարյանը 4 կարմիր բերետավորի է ծեծել։

12:53 - 12 հոկտեմբերի, 2023