Նիկոլայ Բաղդասարյան

Նիկոլայ Յուրիի Բաղդասարյանը (հոկտեմբերի 4, 1975, Երեւան) ՀՀ ԱԺ 7-րդ գումարման «Իմ քայլը»  խմբակցության պատգամավոր է, ԱԺ Պետական-իրավական հարցերի մշտական հանձնաժողովի անդամ։ «Քաղաքացիական պայմանագիր» կուսակցության անդամ է։

1995-1997թթ. ծառայել է ՀՀ զինված ուժերում: 1998թ․ ավարտել է «Հայկական բաց համալսարանը», իրավագիտության մագիստրոս է։

1994-1996թթ. եղել «Սելենա» գործարանի իրավախորհրդատու: 1998թ.՝ Հայկական բաց համալսարանի մեթոդաբանական կաբինետի վարիչ: 1998-ից զբաղվել է փաստաբանական գործունեությամբ: 2006թ.՝ ՀՀ փաստաբանների պալատի դրամաշնորհային ծրագրի համակարգող, 2007թ.՝ ՀՀ փաստաբանների պալատի «Արդարադատության մատչելիությունը ՀՀ սոցիալապես անապահով բոլոր խավերի համար» դրամաշնորհային ծրագրի ղեկավար, «ՀՀ փաստաբանների պալատի» դրամաշնորհային ծրագրի դասախոս, ՀՀ փաստաբանների պալատի «Գրադարանի վերանորոգում» դրամաշնորհային ծրագրի համակարգող: 2008-2009թթ.՝ ՀՀ փաստաբանների պալատի նախագահի տեղակալ ծրագրերի իրականացման եւ աշխատանքների կառավարման հարցերով, 2009-2011թթ.՝ գործադիր տնօրեն: 2012-2014թթ.՝ «ՀՀ փաստաբանական դպրոց» հիմնադրամի տնօրեն: 2003-2019թթ. «Արնի Լեգալ Էյդ» ՍՊԸ տնօրեն:

2018թ. դեկտեմբերի 9-ին ԱԺ պատգամավոր է ընտրվել «Իմ քայլը»  կուսակցությունների դաշինքի թիվ 2 ընտրատարածքի տարածքային ընտրական ցուցակով:

Գարեգին Խումարյան. «Ես կատարել եմ մասնագիտական պարտքս»
 |azatutyun.am|

Գարեգին Խումարյան. «Ես կատարել եմ մասնագիտական պարտքս» |azatutyun.am|

azatutyun.am: Հայաստանի Հանրային ռադիոընկերության տնօրեն Գարեգին Խումարյանը համաձայն չէ Հանրային հեռարձակողի պնդման հետ, թե Նիկոլ Փաշինյանի արտահայտած տեսակետները վիճարկող իր հոդվածով՝ չարաշահել է լիազորությունները և պաշտոնը: Խումարյանն այդ մասին ասաց «Ազատությանը» տված հարցազրույցում՝ Խորհրդի հայտարարությունից անմիջապես հետո: Գարեգին Խումարյանի հետ հարցազրույցի տեքստը՝ ստորև. «Ազատություն». - Պարոն Խումարյան, ինչպե՞ս եք նախ գնահատում Հանրային հեռարձակողի խորհրդի այսօրվա հայտարարությունը, Դուք համաձա՞յն եք, որ չարաշահել եք Ձեր լիազորությունները և պաշտոնը: Գարեգին Խումարյան. - Ներկայում ես միջանկյալ տեսակետ եմ հայտնում, զուտ ինտուիտիվ, որովհետև խորհրդի մեր հարգելի գործընկերների հրապարակած փաստաթուղթը այս պահին ուսումնասիրում են Հանրային ռադիոընկերության իրավաբանները: Զուտ ինտուիտիվ, զուտ մասնավոր՝ ես դրա հետ համաձայն չեմ, սպասում եմ՝ ինչ կասեն մեր ընկերության իրավաբանները: Ինչ վերաբերում է Հանրային ռադիոընկերության կայքը օգտագործելուն, ապա ես մեծ լրագրողական կոլեկտիվի մաս եմ, ես էլ այստեղ աշխատող լրագրողներից մեկն եմ, պարբերաբար գրում եմ ինչ-որ թեմաներով: Ես քիչ առաջ նայեցի՝ ես մոտ 10 հրապարակում ունեմ իմ սյունակի տակ, համենայնդեպս, մինչ այս որևէ խնդիր երբեք չի եղել: «Ազատություն». - Խորհուրդը նշում է, որ «առաջիկայում քննության կառնի Հանրային ռադիոընկերության տնօրենի գործողությունների համապատասխանելիությունը էթիկական և իրավական նորմերին», այսինքն՝ դա դեռ որոշված չէ: Կա՞ն որոշակի էթիկական և իրավական նորմեր, որոնք Ձեզ արգելում են Հանրային ռադիոյի կայքում արտահայտել Ձեր մտքերը: Խումարյան. - Կրկին՝ միջանկյալ և շատ ինտուիտիվ: Ես ևս մեկ անգամ անցել եմ Հանրային ռադիոընկերության կողմից որդեգրված էթիկական կանոնագրքով և որևէ խնդիր այդտեղ չեմ տեսել: Բայց սպասենք խորհրդի եզրակացությանը, որով զբաղվելու են ընկերության իրավաբանները: «Ազատություն». - Դուք այստեղ տեսնո՞ւմ եք ճնշում այս հայտարարությամբ Ձեր նկատմամբ՝ հաշվի առնելով, որ Դուք քննադատության էիք ենթարկել Փաշինյանի հայտարարությունները: Խումարյան. - Ես չգիտեմ՝ քննադատության ենթարկել եմ, թե՝ ոչ, ես կատարել եմ մասնագիտական պարտքս: Մենք ակնհայտորեն թույլ պրոդուկտ ենք հեռարձակել՝ օրինակ, համեմատած ձեր հարգելի ընկերության վերջին հարցազրույցի հետ՝ վարչապետի հետ, ու ես արել եմ այն, ինչ որ պետք է անեմ՝ ես, այո, ներողություն եմ խնդրել խնդրահարույց հաղորդման համար, որը ակնհայտորեն ավելի թույլ էր, քան կարող էր լինել: Ավելի մանրամասն՝ azatutyun.am-ում։   
00:04 - 07 փետրվարի, 2024
Նաիրա Զոհրաբյանն այս փուլում պատգամավորին լրավճար տալը համարում է անբարոյականություն |hetq.am|

Նաիրա Զոհրաբյանն այս փուլում պատգամավորին լրավճար տալը համարում է անբարոյականություն |hetq.am|

hetq.am: «Իմ քայլը» խմբակցության պատգամավորներ Վիկտոր Ենգիբարյանի և Նիկոլայ Բաղդասարյանի հեղինակած նախագիծը, որով պատգամավորական ծախսերի համար հատկացվող ամսական 50 հազար դրամը hնգապատկվում է, անկախ պատգամավոր Նաիրա Զոհրաբյանն այս փուլում անբարոյականություն է համարում: Նման տեսակետ հայտնեց պատգամավորը` լրագրողների հետ զրույցում: «Եթե համեմատում ենք տարածաշրջանի եվրոպական երկրների պատգամավորական աշխատավարձի հետ, ասել որ մեր աշխատավարձերը բարձր են, էդպես չէ: Ես գտնում եմ, որ պատգամավորները, նաև նրանք, ում վրա դրված է պետության կառավարման բեռը, պետք է ստանան արժանապատիվ աշխատավարձ, բայց հիմա էդ փուլը չէ, հիմա ավելի կենսական խնդիրներ ունենք»,-ասաց նա: Զոհրաբյանի համար ամենազավեշտալին հիմնավորումն էր. 50 հազար դրամը դարձնել 250 հազար դրամ, որ պատգամավորը գնա հանդիպման ընտրողի հետ: Նա խորհուրդ տվեց ԱԺ կադրերի բաժնից տեղեկություն ստանալ, թե ամենաշատը որ պատգամավորների հետ են քաղաքացիները հանդիպում խնդրել` վստսահեցնելով, որ նման պատգամավորների եռյակում է: «Դրա համար ինձ որևէ լրավճար պետք չի եղել»,-ասաց նա: Հիշեցնենք, որ նախագիծն առաջին ընթերցմամբ ընդունվել է: Զոհրաբյանի կարծիքով` խորհրդարանը պիտի մերժի այս նախագիծը, որովհետև պատգամավորների պարտականությունն է հանդիպել քաղաքացիների հետ, դրա համար վերջիններս ստանում են աշխատավարձ: Նաիրա Զոհրաբյանը խորհուրդ տվեց այդ գումարներն ուղղել վիրավորում ստացած զինծառայողների արտերկրում բուժմանը: «Բզկտված Հայաստանով ու Արցախով այնքան առաջնահերթ խնդիրներ ունենք, որ պատգամավորին լրավճար տալը ես համարում եմ անբարոյականություն: Ինչ-որ պահի, երբ տնտեսությունը կայուն կլինի, առաջնային խնդիրները լուծված կլինեն, կարիք կլինի անդրադառնալ պաշտոնյաների աշխատավարձին, բայց այսօր մեր 100-րդ խնդիրը պետք է լինի, ոչ թե առաջնային»,-նշեց Զոհրաբյանը:
14:51 - 15 հուլիսի, 2021
Այս օրենսդրական փոփոխությունը միտված է ուժեղացնելու պատգամավորի ինստիտուտը. Վիկտոր Ենգիբարյան |1lurer.am|

Այս օրենսդրական փոփոխությունը միտված է ուժեղացնելու պատգամավորի ինստիտուտը. Վիկտոր Ենգիբարյան |1lurer.am|

1lurer.am: Ազգային ժողովն առաջին ընթերցմամբ ընդունել է Կառավարության ներկայացրած օրենքի նախագիծը, որով առաջարկում է արտահանման լիցենզիոն տուրք կիրառել պղնձի և մոլիբդենի խտանյութերի և որոշ հարակից ապրանքների նկատմամբ: Մեկ այլ նախագծով՝ առաջարկվում է հնգապատկել պատգամավորական ծախսերի համար հատկացվող ամսական գումարը՝ 50 հազար դրամից դարձնելով 250 հազար դրամ: Օրենսդրական նախաձեռնությունը հեղինակել են «Իմ քայլից» Վիկտոր Ենգիբարյանն ու Նիկոլայ Բաղդասարյանը: Օրակարգում ներառված բոլոր նախագծերի քվեարկությունը եղել է առանց ընդդիմության մասնակցության: Նախագծին դեմ է արտահայտվել իշխող խմբակցությունից դուրս եկած պատգամավոր Սոֆիա Հովսեփյանը, նշել՝ գործող խորհրդարանը չպետք է ավելացնի նոր գումարման ԱԺ-ի պատգամավորների համար նախատեսված գումարը: Նախագծերի երկրորդ ընթերցումը նախատեսված է երեք ժամից: «Նույն օրենսդրական փոփոխությունը բխում է հանրային լավագույն շահից: ՀՀ-ն 2013-ից հետո մեծ փոփոխությունների է ենթարկվել: Հատկանշական է, որ 2015 թ. Սահմանադրությամբ ՀՀ-ն արդեն խորհրդարանական պետություն է, և 2.5 տարիների ընթացքի մեր պատգամավորական փորձը ցույց է տվել, որ պատգամավորի` նյութատեխնիկական ապահովման տարբեր ծառայություններից օգտվելու, հիմնականում սպասարկման կամ վառելիքի ծախսերից օգտվելու համար 50 հազար դրամը բավարար չէ, և այս օրենսդրական փոփոխությունը միտված է ուժեղացնելու պատգամավորի ինստիտուտը: Ես կուզենայի ուղիղ համեմատություն անցկացնել պատգամավորական անձեռնմխելիության ինստիտուտի հետ: Առաջին տպավորությամբ և շատ լայն տարածում ունեցող կարծրատիպ կա, որ պատգամավորական անձեռնմխելիությունը արտոնություն է կամ հավելյալ առավելություն է, որով սահմանադիրն օժտել է պատգամավորին, մինչդեռ խոր ուսումնասիրությունները ցույց են տալիս, որ անձեռնմխելիության ինստիտուտը ևս բխում է հանրային լավագույն շահից՝ ապահովելով պատգամավորին իրացնել անկաշկանդ մանդատ և իրականացնել ժողովրդի կողմից իրեն վստահված մանդատը՝ օգտվելով չեզոքության և անկախության բոլոր  հնարավորություններից»,- ասել է Վիկտոր Ենգիբարյանը: «Ժամանակին խմբակցության ներսում ես այս հարցը բարձրաձայնել եմ: Այո՛, բարձրաձայնել եմ, որ մեկ պատգամավորը կարող է մարզերով պտտվել՝ այդ 50 հազար դրամը և իր աշխատավարձը ծախսելով, իսկ մյուս պատգամավորներն առհասարակ չգնան՝ նույն աշխատավարձը և գումարը ստանալով: Եվ ավելին, ասել եմ՝ եթե բոլոր պատգամավորները գնան, մյուսների վրայից բեռը կթեթևանա: Դա եղել է ընդամենը քննարկում, և որևէ կերպ հարցին լուծում չէ»,- ասել է Սոֆիա Հովսեփյանը: 
13:40 - 15 հուլիսի, 2021
Գյուղատնտեսական այն հողերը, որոնք չեն մշակվում, պետք է հարկվեն կրկնակի կամ քառակի, իսկ մասնատված հողամասերը անհրաժեշտ է միավորել․ Արթուր Ամիրաղյան

Գյուղատնտեսական այն հողերը, որոնք չեն մշակվում, պետք է հարկվեն կրկնակի կամ քառակի, իսկ մասնատված հողամասերը անհրաժեշտ է միավորել․ Արթուր Ամիրաղյան

Ազգային ժողովի Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովը հանդես է եկել «Հողային օրենսգրքում փոփոխություն կատարելու մասին» նախագծով, որի արդյունքում պետք է կրճատվի գյուղատնտեսական նշանակության չօգտագործվող հողերի քանակը։ Infocom.am-ի հետ զրույցում Նոյեմբերյանի բնակիչ, գործարար Արթուր Ամիրաղյանը պատմեց, որ խնդիրը ոչ միայն մեկ համայնքում է, այլ՝ ամբողջ հանրապետությունում՝ որոշակի տարբերություններով։ «Ես 2012 թվականից գեոդեզիայի չափագրման կազմակերպություն ունեմ, որը զբաղվում է հողերի չափագրումով և համապատասխան ծառայություններ է մատուցում։ Առաջին իսկ օրից այս հարցը ինձ սկսել է հուզել և գնալով դարձել է ավելի ակնառու։ Ցանկացած զարգացում սկսում է հողից։ Ինչ-որ պլատֆորմ է պետք մարդուն, որպեսզի նա ներդրում անի․ այս հողային խնդիրը սկսել է բոլորին խանգարել։ Քանի որ համայնքներից օտարվող հողամասերը գնալով վերջանում են, եթե նախկինում մեկը մի բան էր ուզում անել՝ դիմում էր համայնքին և համայնքը հող էր վաճառում իրենց։ Հիմա համայնքային և պետական սեփականության հողամասերն էլ են բավականին սակավ դարձել․ որոնք էլ դեռ կան, անբարենպաստ դիրքում են և հետաքրքիր չեն բիզնեսմեններին»,- ասաց Ամիրաղյանը։ Վերջինս հավելեց, որ, օրինակ, Նոյեմբերյանի տարածաշրջանում խնդիր է անգամ մանկապարտեզի համար տարածք գտնելը։ Այս հարցը սկսել է դառնալ խոչընդոտ ու խանգարող ոչ միայն բիզնեսին, այլ անգամ երկրին։ «Ես սկսեցի ավելի խորը ուսումնասիրել այս խնդիրը։ Այս խնդրի հիմնական արմատները սեփականաշնորհման սխալ մոտեցումից է, քանի որ սեփականաշնորհումը բավականին մասնատված ձևով են արել․ ենթադրենք 10 հա բերրի հողակտոր է եղել, որոշել են փոքր կտորներով սեփականաշնորհել և ստացվում է, որ այդ հողակտորը, օրինակ, 200 սեփականատեր ունի։ Բնական է, որ յուրաքանչյուր 800 քառակուսի մետր հողակտորի սեփականատիրոջ հետաքրքիր չէ այդ հողամասի վրա որևէ գործունեություն ծավալելը, որովհետև այն շատ փոքր է․ ինչ էլ անում է, եկամուտ չի ստանում, և այդ հողամասերը շարունակում են մնալ չօգտագործվող։ Երկրորդ կոմպոնենտը, որը խանգարում է, ՀՀ-ից ՌԴ կամ այլ երկրներ գնացած մարդիկ են, որոնք ֆիզիկապես այստեղ չեն և չեն կարողանում իրենց հողը մշակել։ Իրենց ինչ-որ առումով նույնիսկ հետաքրքիր չէ։ Այդ մարդկանց 50%-ը նույնիսկ չգիտեն, թե իրենց հողամասը ֆիզիկապես որ հատվածում է, ուղղակի գիտեն, որ իրենք ունեն, օրինակ, 800 քառակուսի մետր հողամաս, բայց եթե ասես՝ այս տարածքում գնա ցույց տուր, թե որն է քո 800 քառակուսի մետրը, մեղմ ասած, չի իմանա»,- նշեց Ամիրաղյանը, հավելելով, որ 1991 թ․-ին այդ հողամասերը սեփականաշնորհվել են, ունեն սեփականության իրավունքի հիմքեր։ Ամիրաղյանը ասաց, որ որոշակիորեն ուսումնասիրել է ոլորտն ու դրանում առկա խնդիրները։ Գյուղատնտեսական նշանակության հողերի սեփականատերերի մի մասն անգամ 1991 թ․-ից հետո չի եկել Հայաստան և անգամ չունի սեփականության վկայականը, բայց առկա հիմքերով, փաստաթղթերով ինքը սեփականատեր է, և մենք պետք է դրա հետ հաշվի նստենք։ Մենք չենք կարող ասել՝ վերջ, դու էլ սեփականատեր չես։ Մեր զրուցակիցը պատմեց․ «Երրորդ կոմպոնենտը այն է, որ ոռոգման ջրի կամ այլ առկա խնդիրների պատճառով չեն մշակվում։ Մենք փորձեցինք մի փոքր հատվածում միավորել այդ հողերը, բախվեցինք իմ ասած երկու կոմպոնենտներին։ Օրինակ, եթե ուզում ես մեկ հա հողատարածք միավորել, պետք է շփվես 10 հոգու հետ, եթե դրանցից մեկն էլ չի լինի, ստացվում է՝ դու ունենում ես մասնատված հողամաս։ Երկրոդն էլ՝ նրանց մի մասը ՌԴ-ում էին, փորձեցինք բանակցել նրանց հետ․ մարդիկ կան՝ ասում են՝ ոչ վաճառում եմ, ոչ մեկ այլ բան։ Ասում են՝ կարող է մեզ 20 տարի հետո պետք է գալիս, դե, սեփականություն ունի, չես կարող ասել՝ որ այդ ժամանակ պետք գա՝ կառնես էլի։ Դու 30 տարի չես օգտագործել, դրանից հետո անհրաժեշտություն առաջացավ ուսումնասիրել նաև օրենսդրական բացերը, հասկացա, որ բոլոր տեղերում նույն վիճակն է։ Մեկ այլ հարց է և ֆինանսական կոմպոնենտը, երբ հողի սեփականատերը տեսնում է, որ դու մյուսների հետ ընդհանուր հայտարարի ես եկել, գնել և միավորել հողերը, ինքն իր հողի գինը կարող է շուկայականից 5 անգամ ավել թանկ ասել։ Սկսեցինք ուսումնասիրել օրենսդրական դաշտը, այն հնարավորություններ է տալիս այդ ամեն ինչը կարգավորել։ Եթե գյուղատնտեսական նշանակության հողը 3 և ավելի տարի չի օգտագործվում, պետությունը իրավունք ունի վերցնել։ Իհարկե, կան գործընթացներ, բայց տեսականորեն դա հնարավոր է, որովհետև այդ հողերը չմշակելու դեպքում դրանք ենթարկվում են կորոզիայի, և եթե նույնսիկ հետ չեն վերցնում, կարող են նաև վարչական պատասխանատվություն սահմանել»։  Գործարարի խոսքով՝ երբևէ ականատես չի եղել նման պրակտիկայի, երբ գյուղատնտեսական հողը չօգտագործման դեպքում վերցնեն սեփականատիրոջից։ Իրավական տեսանկյունից այս գործընթացը բարդ է, որովհետև կարող են լինել օրենքներին, Սահմանադրությանը հակասող իրավիճակներ։ «Իմ առաջարկը, որն ավելի պրակտիկ է և ավելի մոտ է բիզնեսին, այն է, որ գյուղատնտեսական այն հողերը, որոնք չեն մշակվում, պետք է հարկվեն կրկնակի կամ քառակի, այսինքն՝ հարկերը ավելանան։ Պրակտիկ խնդիր է․ եթե մարդը չի օգտագործում այդ հողատարածքը, պետությանը զրկում է հավելյալ արժեք ստեղծելու հնարավորությունից, ինքը թող հարկվի մի քանի անգամ ավել։ Դրա արդյունքում կամ նա կսկսի մշակել իր հողը, կամ վարձակալության կտա մեկ այլ մարդու, կամ կվաճառի։ Կարծում եմ, որ մինչև օրենսդրական դաշտում փոփոխություններն արվեն և դրանից հետո դրանք սկսեն կիրարկվել ապա մեկ-երկու տարուց ավելի կանցնի, ու դրա համար այս տարբերակն ավելի արագ կգործի և չի էլ խոչնդոտի այլ հողաշինարարակն մեխանիզմների կիրառմանը։ Հողաշինարարական մի քանի մեխանիզմներ կարող են լինել, բայց արդեն խորը քննարկումներ և վերլուծություններ են անհրաժեշտ, քանի որ կապ ունի սեփականության սահմանադրական իրավունքի հետ»,- ընդգծեց գործարարն ու նշեց, որ որոշ դեպքերում գյուղատնտեսական հողերի չմշակումը արդարացված է, քանի որ դրանք կամ մոտ են սահմանին։ Ամիրաղյանը, սակայն, շեշտեց, որ դրանք շատ քիչ են դեպքեր են՝ ամբողջի մեջ մի կաթիլ։ «Չեմ կարծում, որ հողամասերի նման կտրտվածության պարագայում մոտ ապագայում հնարավոր, ինչ որ պարագայում նաև արդյունավետ է, որ պետութունը բոլորին ջուր հասցնի։ Հատկապես 800-1000 քառակուսի մետր հողատարածքի դեպքում դա անարդյունավետ է։ Ես համոզված եմ, որ, եթե, օրինակ, մի բիզնեսմենի հատկացվի 5 հեկտարից ավելի հողամաս, ապա նա կլուծի ջրի հարցը․ կա՛մ ներդրում կանի, կա՛մ պետության կողմից կսուբսիդավորվի։ Հողերի սեփականատերերի մեծ մասը այսօր ունի իր մասնագիտությունը և աշխատանքը․ պետությունը ինչ էլ անի, այդ մարդկանց մեծամասնությունը հողագործությամբ չեն զբաղվելու։ Այսօր գյուղատնտեսության զարգացման ամենամենամեծ խնդիրը հողերի միավորումն է, որովհետև 800 քառակուսի մետրի մշակումը տնտեսապես որևէ մեկին շահավետ չէ»,-եզրափակեց Ամիրաղյանը։»,-եզրափակեց Ամիրաղյանը։ Infocom․am-ը թեմայի վերաբերյալ զրուցեց նաև 7-րդ գումարման ԱԺ պատգամավոր, հողային օրենսգրքում փոփոխություն կատարելու մասին նախագծի համահեղինակ Նիկոլայ Բաղդասարյանի հետ, ով ընդգծեց, որ նախագիծը բացարձակապես վերաբերում է համայնքի կողմից վարձակալությամբ տրված հողերին, որոնք չեն օգտագործվում իրենց նպատակային նշանակությամբ։ «Ընդունենք իրավիճակ, երբ վարձակալությամբ տվել են հողը, որպեսզի տվյալ դեպքում կոնկրետ իրավաբանական կամ ֆիզիկական անձը կազմակերպի երեխաների համար նախատեսված զվարճանքի հատված, բայց դրա փոխարեն պայմանական ասած այլ գործունեություն է ծավալել, որը չի համապատասխանում վարձակալության պայմանագրում նշված նպատակային նշանակությանը։ Այս դեպքում գործող կանոնակարգերով համայնքը պետք է դիմի դատարան, դատական կարգով շատ երկար ընթացակարգ անցնի և դրանից հետո լուծարի պայմանագիրը։ Մենք առաջարկում ենք, որ նմանատիպ պայմանագրերը լուծարվեն արտադատարանական կարգով։ Ներդրել ենք ծանուցման համակարգ, որ ինքը կարող է ծանուցվել, ներկայացվեն բոլոր հիմքերը և եթե կողմը չի առարկում, պայմանագիրը լուծվում է։ Եթե կողմը ունի առարկություն, ապա կարող է դատական կարգով վիճարկել այդ համայնքի ղեկավարի որոշումը և այդ ժամանակ որոշման գործունությունը կասեցվում է։ Նույն ռեժիմը գործում է նաև գյուղատնտեսական հողերի վրա, որտեղ նույն նախագծով առաջարկվում է, որ հողերը վարձակալության տան ոչ թե 25 տարով, այլ՝ 49։ Այսինքն՝ հնարավորություն է տրվում, որ համայնքը ավելի երկար ժամանակով կարողանա վարձակալության տալ․ տվյալ դեպքում գործում է այն կանոնակարգումը, որ պետությունը հնարավորինս քիչ միջամտի տնտեսվարող-համայնք հարաբերություններին և պայմանագրերի հետ կապված ազատ թողնի։ Նախագիծը սա է»,- մանրամասնեց Բաղդասարյանը։  Խոսելով հնարավոր ռիսկերի մասին՝ պատգամավորը շեշտեց, որ վարձակալության պայմանագրերի առումով որևէ ռիսկ չկա, այսինքն՝ վարձակալության իրավունքը սահմանադրական իրավունքի տեսակետից ամրագրված իրավունք չէ, որպես իրավունք օրենքով է նախատեված։ Մեր զրուցակցի խոսքով՝ օրենքով թույլատրվում է այդ պայմանագրերի լուծումը նախատեսել նաև արտադատարանական կարգով։ Բաղդասարյանի կարծիքով՝ այս նախագծի ընդունումից հետո հնարավոր է մասամբ լուծել նաև արդեն սեփականությամբ տրված հողատարածքների խնդիրները։ «1990-ականներից մասնավորեցրել են հողակտորները, որպեսզի մարդիկ զբաղվեն գյուղատնտեսությամբ, բայց այդ հողերը այնքան փոքր ծավալ ունեն, որ մշակումը ձեռնտու չէ, որովհետև իրենք ո՛չ կարողանում են այդ հողերը իրացնել և եկամուտ ստանալ, ո՛չ էլ կարողանում են այդ հողերը մշակել, քանի որ այդ հողերի ծավալը փոքր է։ Տարբեր խնդիրներ են ի հայտ գալիս, այդ թվում՝ ոռոգման ջրի բացակայության հետ կապված, և այդտեղ ներդրում անելը ձեռնտու չէ, բայց այդ խնդիրը կարելի է լուծել միայն այլ, փոխկապակցված ինստիտուտների հետ միասին։ Այդ ինստիտուտներից մեկն այն է, որ պետությունը մոնիտորինգ է անում, որպեսզի ասի, թե երեք տարի հետո կոնկրետ հողակտորը մշակվում է, թե ոչ, և թե ինչ է նշանակում հողի մշակումը»,- հավելեց Բաղդասարյանը։ Վերջինիս կարծիքով՝ հարկերի ավելացումը ճիշտ ճանապարհ չէ։ Կոնցեպտը կայանում է նրանում, որ, կա՛մ տվյալ անձանց համայնքը տա փոխհատուցում շուկայական արժեքի չափով, կա՛մ տվյալ անձինք հնարավորություն ունենան կոնսեսիոն պայմանագրով կառավարման հանձնել իրենց հողերը որևէ մարմնի, որպեսզի այդ հողերի շահագործման արդյունքում իրենք ունենան իրենց եկամուտը։ «Ես հարկերի ավելացման տարբերակին հակված չեմ։ Ընտրություններից հետո անպայման կանդրադառնանք նաև այն հողամասերին, որոնք սեփականություն են, բայց չեն մշակվում։ Կա նաև նման նախագիծ մշակելու տեսլական, որի արդյունքում մշակվող հողերի քանակը կմեծանա»,- եզրափակեց Բաղդասարյանը։ ԱԺ Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովի նիստում որոշվել է հարցի քվերակությունը հետաձգել։ Ասպրամ Փարսադանյան
15:51 - 24 մայիսի, 2021
Պատմամշակութային հուշարձանների պահպանությանն առնչվող նախագծում գործադիրը բացեր է տեսնում. ԿԳՄՍ փոխնախարարը հորդորեց չշտապել |1lurer.am|

Պատմամշակութային հուշարձանների պահպանությանն առնչվող նախագծում գործադիրը բացեր է տեսնում. ԿԳՄՍ փոխնախարարը հորդորեց չշտապել |1lurer.am|

1lurer.am: ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովում քննարկվեց «Իմ քայլը» խմբակցության պատգամավորներ Նիկոլայ Բաղդասարյանի, Վիկտոր Ենգիբարյանի և Լիլիթ Ստեփանյանի ներկայացրած՝ «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքում փոփոխությունների նախագիծը:  Նիկոլայ Բաղդասարյանը նշեց, որ նախագծի նպատակն է ապահովել պատմամշակութային հուշարձանների պահպանությունը, ինչպես նաև բացառել պատմամշակութային հուշարձանների օտարումն օրենքն ուժի մեջ մտնելուց հետո: Պատգամավորը նշեց, որ առաջարկվում է շինարարական, գյուղատնտեսական կամ այլ աշխատանքներ իրականացնելիս, եթե վտանգ է սպառնում այդ վայրում գտնվող հուշարձանների պահպանությանն ու անվթարությանը, և եթե տվյալ անշարժ գույքի նկատմամբ իրավունքների պետական գրանցման վկայականում բացակայում է տեղեկություն հուշարձանների պահպանման գոտու տարածքի կամ պետական գրանցման օբյեկտ հուշարձան լինելու վերաբերյալ, ապա լիազոր մարմինը պարտավոր է համաձայնություն ձեռք բերել աշխատանքներ իրականացնող անձի հետ հետևյալ հարցերի շուրջ՝ 1. տեղափոխել հուշարձանը, եթե հնարավոր է. 2. ձեռք բերել վերջինիս պատկանող հողը, ինչպես նաև փոխհատուցել պատճառված վնասը. 3. իրականացնել հետախուզություն, պեղումներ, վերականգնման կամ այլ աշխատանքներ. 4. ապահովել հուշարձանների պահպանությունն ու անվթարությունը: Ընդ որում, ըստ պատգամավորի, մինչև լիազոր մարմնի կողմից ներկայացված առաջարկության վերաբերյալ համաձայնություն տալը, աշխատանքներն իրականացնող անձը պարտավոր է կասեցնել աշխատանքները: Նախագծով առաջարկվում է նաև պետական գրանցման օբյեկտը հուշարձան լինելու կամ հուշարձանների պահպանման գոտու տարածքում գտնվելու տեղեկությունը ներառել անշարժ գուքի նկատմամբ իրավունքների պետական գրանցման վկայականում: ԿԳՄՍ նախարարի տեղակալ Արա Խզմալյանը նշեց, որ այս նախագծի ընդունմամբ բազմաթիվ բացերի առջև են կանգնելու՝ սկսած լրացուցիչ ֆինանսական միջոցների ներգրավումից մինչև մասնագիտական ռեսուրսների անհրաժեշտություն: «Խնդիր կա համալրելու հուշարձանների վերաբերյալ տեղեկատվական բազան, այն դեպքում, երբ Կադաստրի կոմիտեն նշել է, որ այդ տվյալները բացակայում են: 25 հազար հուշարձանից ունենք 200 միավորի տվյալներ: Սա մեզ կանգնեցնելու է անլուծելի խնդիրների առջև,- ընդգծեց նա՝ հավելելով. - այս օրենքը, կարծես, դառնում է համաներման փաստաթուղթ նախկինում կատարված բոլոր շեղումների համար: Այդ խախտումները իրավական ճանապարհով լուծելու փոխարեն փաստորեն նախագծով պետությունն իր վրա է վերցնում հուշարձանը աղճատումից փրկելու պարտավորություն»:   Խզմալյանը հորդորեց նախագծի հեղինակներին չշտապել, հարցը պարզաբանել մինչև վերջ, հստակեցնել բոլոր կողմերի իրավունքները և միայն հետո ընդունել այն:   Նախագծի համահեղինակն առաջարկեց հետաձգել քվեարկությունը՝ քննարկելու Կառավարության մոտեցումները: 
16:23 - 19 մայիսի, 2021
Առաջարկվում է սահմանել ընտանեկան գերեզմանում հուղարկավորվելու իրավունք ունեցող անձանց շրջանակը |armenpress.am|

Առաջարկվում է սահմանել ընտանեկան գերեզմանում հուղարկավորվելու իրավունք ունեցող անձանց շրջանակը |armenpress.am|

armenpress.am: ՀՀ ազգային ժողովն առաջին ընթերցմամբ ընդունելու համար քննարկեց «Հուղարկավորությունների կազմակերպման և գերեզմանատների ու դիակիզարանների շահագործման մասին» օրենքում փոփոխություններ և լրացումներ կատարելու մասին և կից ներկայացված օրենքներում փոփոխություններ և լրացումներ կատարելու մասին օրինագծերի փաթեթը: Նախագծով առաջարկվում է սահմանել այն անձանց շրջանակը, որոնք իրավունք ունեն հուղարկավորվել ընտանեկան գերեզմանում: «Նախագծով նախատեսում ենք որոշակիացնել, թե ովքեր իրավունք ունեն հուղարկավորվել ընտանեկան գերեզմանում, նախագծով մենք սահմանել ենք «ընտանիքի անդամ» հասկացությունը: Սահմանել ենք, որ ընտանիքի անդամ են հանդիսանում ծնողները, զավակները, որդեգրողները, որդեգրվածները, հարազատ կամ ոչ հարազատ համահայր կամ համամայր եղբայրները/քույրերը, պապը, տատը, թոռները, ամուսինը, ամուսնու ծնողները, վերջինիս համար փեսան և հարսը»,- ասաց նախագծի համահեղինակ, «Իմ քայլը» խմբակցության պատգամավոր Նիկոլայ Բաղդասարյանը: «Հուղարկավորությունների կազմակերպման և գերեզմանատների ու դիակիզարանների շահագործման մասին» օրենքում փոփոխություններ և լրացումներ կատարելու մասին և Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ և լրացումներ կատարելու մասին օրենքների նախագծերի փաթեթը հեղինակել են «Իմ քայլը» խմբակցության պատգամավորներ Նիկոլայ Բաղդասարյանը, Սերգեյ Մովսիսյանը և Վիկտոր Ենգիբարյանը:
15:25 - 16 ապրիլի, 2021
Տրանսպորտային միջոցի սեփականատերը կտուգանվի վաճառքի և վարձույթի նպատակով մայթեզրին կայանելու համար |armenpress.am|

Տրանսպորտային միջոցի սեփականատերը կտուգանվի վաճառքի և վարձույթի նպատակով մայթեզրին կայանելու համար |armenpress.am|

armenpress.am: ՀՀ Ազգային ժողովն առաջին ընթերցմամբ ընդունեց «Տեղական ինքնակառավարման մասին» օրենքում լրացում կատարելու մասին և Վարչական իրավախախտումների վերաբերյալ Հայաստանի Հանրապետության օրենսգրքում լրացում կատարելու մասին օրենքների նախագծերի փաթեթը: Պատգամավորներ Մխիթար Հայրապետյանի, Նիկոլայ Բաղդասարյանի և Նարեկ Զեյնալյանի հեղինակած փաթեթով առաջարկվում է լուծել մայթեզրերին տրանսպորտային միջոցների վաճառքի ու վարձույթի խնդիրը: Նիկոլայ Բաղդասարյանը նշեց, որ շատ են դեպքերը, երբ մայթեզրերի վրա կազմակերպվում է տրանսպորտային միջոցների վաճառքը կամ վարձույթը և կան վայրեր, որտեղ մայթեզրերը վերածվել են ավտոմեքենաների վաճառքի «շուկայի»: Օրինագծով առաջարկում է այդ «շուկաները» տեղափոխել մեկ այլ վայր, որը նախատեսված կլինի համայնքի կամ տնտեսվարող սուբյեկտների կողմից, կլինի օրինագծի չափանիշներին համապատասխան, որտեղ անհատները կամ սուբյեկտներն առավել բարենպաստ պայմաններում կկարողանան կազմակերպել իրենց մեքենաների վաճառքը կամ վարձույթը: «Լուսավոր Հայաստան» խմբակցությունը հայտնեց, որ իրենք այս փուլում «ձեռնպահ» կքվեարկեն օրինագծին, հետագայում առաջինից երկրորդ ընթերցման ընթացքում իրենց առաջարկները կներկայացնեն նախագծի վերաբերյալ: Օրենքի նախագիծն առաջին ընթերցմամբ ընդունվեց 61 «կողմ», 1 «դեմ» և 20 «ձեռնպահ» ձայներով:
18:05 - 08 հուլիսի, 2020
Վենետիկի հանձնաժողովի նախագահ Ջիանի Բուքիքիոյի՝ Հրայր Թովմասյանին ուղղված նամակը սխալ էր թարգմանվել․ Նիկոլայ Բաղդասարյան

Վենետիկի հանձնաժողովի նախագահ Ջիանի Բուքիքիոյի՝ Հրայր Թովմասյանին ուղղված նամակը սխալ էր թարգմանվել․ Նիկոլայ Բաղդասարյան

Եկեք ընդունենք, որ ԶԼՄ-ները սխալ էին թարգմանել Վենետիկի հանձնաժողովի նախագահ Ջիանի Բուքիքիոյի՝ Հրայր Թովմասյանին ուղղված նամակը, որտեղ նա նշել էր, որ իրենց առաջարկություններն ամբողջությամբ չեն ընդունել, սակայն մամուլում հրապարակվել էր, որ հանձնարարություններն ամբողջությամբ չեն ընդունվել: Այս մասին լրագրողների հետ ճեպազրույցում ասաց ԱԺ «Իմ քայլը» խմբակցության պատգամավոր Նիկոլայ Բաղդասարյանը: Պատգամավորն իր խոսքում նշեց․ «Այն խորհրդատվական բնույթ կրող կառույց է, որտեղ փորձագետները խորհուրդ են տալիս, թե ինչպիսի իրավական ակտ պետք է տվյալ պետությունն ընդունի: Տարբեր պետություններ, որպես կանոն, միշտ չէ, որ ամբողջությամբ այդ փաստաթուղթն ընդունում են: Բազմաթիվ պետություններ ամբողջությամբ չեն ընդունել Վենետիկի հանձնաժողովի եզրակացությունները»: Անդրադառնալով լրագրողների  դիտարկմանը, որ ՍԴ դատավորի թեկնածուների շարքում շրջանառվում է Գագիկ Ջհանգիրյանի եւ նախկին  ՄԻՊ Կարեն Անդրեասյանի անունները: Բաղդասարյանը նշեց․ «ՍԴ դատավոր թեկնածու լինելու համար մի քանի պահանջներ կան, օրինակ տարիքային ցենզ կա. կարծում եմ՝ Գագիկ Ջհանգիրյանը 40-ն անց է, ունի բարձրագույն կրթություն, բնականաբար ինքը համապատասխանում է այդ պահանջներին, այլ խնդիր է, որ կառավարությունը կամ ՀՀ նախագահը կամ Դատավորների ընդհանուր ժողովը կառաջադրեն նրան, թե ոչ:  Ես կարծում եմ, որ ՀՀ-ում կան հնարավոր թեկնածուներ, որոնք ունեն այդ գիտելիքները, որոնց կարող են առաջադրել որպես ՍԴ դատավորի թեկնածու: Դա նորմալ է, որ որոշ դատավորների լիազորությունները դադարում են, նորերը նշանակվում են: Կարեն Անդրեասյանն էլ կարող է թեկնածու լինել, որովհետեւ ներկայացված պահանջներին բավարարում է՝ տարիքային ցենզ, աշխատանքային փորձ, իրավաբանական կրթություն և  այլ չափորոշիչներ կան»: Դիտարկմանը, որ  «Իմ քայլը » խմբակցության մի քանի պատգամավորներ վարակվել են կորոնավիրուսով, իսկ մնացած պատգամավորներից շատերը կոնտակտավոր են, բայց գալիս են նիստերին, Բաղդասարյանն ասաց. «Անկեղծ կլինեմ՝ խնդիր տեսնում եմ, ցանկալի կլիներ,որ ոչ ոք չհիվանդանար, որ  իրար կողք չնստեինք, դահլիճը ավելի մեծ լիներ, բայց, երբ  հասկանում ես, որ պետության կառավարման  հետ կապված խնդիրներ կան, և դրանց մեջ դու՝ որպես պատգամավոր, դերակատարում ունես, կամովին ես ստանձնել այս պաշտոնը և պարտավոր ես գալ նիստի և քո պարտքը պետությանը, ժողովրդին կատարես: Եթե չլիներ այդ պարտքը, հաճելի կլիներ գնալ մի վայր, որտեղ վարակվելու հնարավորությունը շատ ավելի քիչ է, բայց ստիպված պետք է գալ»։Անդրադառնալով լրագրողի դիտարկմանը, թե ըստ խոսակցութունների՝  «Իմ քայլը»-ի պատգամավորները, իմանալով, որ վարակակիր են, մասնակցել են սահմանադրական փոփոխությունների նիստին, Բաղդասարյանը նշեց, որ այդ պատգամավորները հերքել են, թե իմացել են վարակակիր լինելու մասին:  Բաղդասարյանը նշեց, որ եթե հաստատվի, որ պատգամավորները գիտակցել են, որ վարակակիր են, բայց եկել են նիստի, իհարկե, պետք է քրեական պատասխանատվության ենթարկվեն: «Իմ քայլը» խմբակցության  անդամները, ի տարբերություն մնացած պատգամավորների, իրենց առողջության, իրենց կյանքի հաշվին փորձում են գալ աշխատանքի և փորձում են կատարել քայլեր, որ ապահովեն պետության բնականոն գործընթացը»,- ասաց պատգամավորը։
17:10 - 30 հունիսի, 2020
Վկային և տուժողին տեսակապի միջոցով հարցաքննելու հնարավորություն կստեղծվի |armenpress.am|

Վկային և տուժողին տեսակապի միջոցով հարցաքննելու հնարավորություն կստեղծվի |armenpress.am|

armenpress.am: ՀՀ ազգային ժողովը երկրորդ ընթերցմամբ և ամբողջությամբ ընդունեց «ՀՀ քրեական դատավարության օրենսգրքում» լրացում կատարելու մասին» օրենքի նախագիծը, որով առաջարկվում է հնարավորություն տալ հեռավար կարգով՝ տեսակապի միջոցով հարցաքննել քրեական գործով վկաներին և տուժողներին: Նախագիծը հեղինակել են «Իմ քայլը» խմբակցության պատգամավորներ Նիկոլայ Բաղդասարյանն ու Արյուսակ Ջուլհակյանը: Նիկոլայ Բաղդասարյանը նշեց, որ նախագծի նպատակն է իրավունք վերապահել վարույթ իրականացնող մարմնին հեռավար կարգով՝ տեսակապի միջոցով հարցաքննել քրեական գործով վկաներին և տուժողներին՝ նույն նախագծով սահմանված դեպքերում: Այդ այն դեպքերն են, երբ վկան կամ տուժողը առողջական վիճակի կամ տարիքի պատճառով չի կարող ներկայանալ քրեական վարույթ իրականացնող մարմին, անհրաժեշտ է ապահովել վկայի կամ տուժողի անվտանգությունը, հարցաքննության կատարումն անհնար է կամ անհրաժեշտ է ապահովել նախաքննության արդյունավետությունը:
11:21 - 03 հունիսի, 2020
Պատգամավորներն առաջարկում են վկային և տուժողին տեսակապի միջոցով հարցաքննելու հնարավորություն տալ |armenpress.am|

Պատգամավորներն առաջարկում են վկային և տուժողին տեսակապի միջոցով հարցաքննելու հնարավորություն տալ |armenpress.am|

armenpress.am: ՀՀ Ազգային ժողովը երկրորդ ընթերցմամբ և ամբողջությամբ ընդունելու համար քննարկեց «ՀՀ քրեական դատավարության օրենսգրքում» լրացում կատարելու մասին» օրենքի նախագիծը, որով առաջարկվում է հնարավորություն տալ հեռավար կարգով՝ տեսակապի միջոցով հարցաքննել քրեական գործով վկաներին և տուժողներին: Նախագիծը հեղինակել են «Իմ քայլը» խմբակցության պատգամավորներ Նիկոլայ Բաղդասարյանն ու Արյուսակ Ջուլհակյանը: Նիկոլայ Բաղդասարյանը նշեց, որ նախագծի նպատակն է իրավունք վերապահել վարույթ իրականացնող մարմնին հեռավար կարգով՝ տեսակապի միջոցով հարցաքննել քրեական գործով վկաներին և տուժողներին՝ նույն նախագծով սահմանված դեպքերում: Այդ այն դեպքերն են, երբ վկան կամ տուժողը առողջական վիճակի կամ տարիքի պատճառով չի կարող ներկայանալ քրեական վարույթ իրականացնող մարմին, անհրաժեշտ է ապահովել վկայի կամ տուժողի անվտանգությունը, հարցաքննության կատարումն անհնար է կամ անհրաժեշտ է ապահովել նախաքննության արդյունավետությունը:
16:58 - 02 հունիսի, 2020
Պատգամավորներն առաջարկում են էլեկտրոնային դարձնել դատական միջնորդությունների փոխանցման գործընթացը |armenpress.am|

Պատգամավորներն առաջարկում են էլեկտրոնային դարձնել դատական միջնորդությունների փոխանցման գործընթացը |armenpress.am|

armenpress.am: ՀՀ Ազգային ժողովն առաջին ընթերցմամբ ընդունելու համար քննարկեց «ՀՀ քրեական դատավարության օրենսգրքում լրացումներ կատարելու մասին» օրենքի նախագիծը: Օրինագիծը հեղինակել են «Իմ քայլը» խմբակցության պատգամավորներ Սոնա Ղազարյանն ու Սերգեյ Ատոմյանը: Նախագծով նախատեսվում է, որ վարույթն իրականացնող մարմինները քննչական գործողություններ կատարելու մասին իրենց միջնորդությունները եւս կարողանան էլեկտրոնային եղանակով ներկայացնել դատարան, այնուհետեւ այդ նույն եղանակով դատարանից ստանան փաստաթղթերը եւ ներկայացնեն դատախազին: Հարակից զեկուցող ԱԺ պատգամավոր Նիկոլայ Բաղդասարյանն առաջարկեց նախագծին տալ դրական եզրակացություն՝ նշելով, որ մի շարք երկրներում փաստաթղթաշրջանառությունն էլեկտրոնային տարբերակով փոխանցելու համակարգն արդյունավետ գործում է: ՀՀ Ազգային ժողովի պետական-իրավական հարցերի մշտական հանձնաժողովը դրական եզրակացություն է տվել նախագծին:
16:38 - 02 հունիսի, 2020
Պատգամավորին կարելի է դիտարկել որպես պետական ծառայող․ վերջինիս լիազորություններում կարգադրիչի որոշակի էլեմենտներ կան․ Էդգար Շաթիրյան

Պատգամավորին կարելի է դիտարկել որպես պետական ծառայող․ վերջինիս լիազորություններում կարգադրիչի որոշակի էլեմենտներ կան․ Էդգար Շաթիրյան

Մայիսի 11-ին մամուլում տեղեկություն տարածվեց, որ նույն օրը անհայտ անձը հեծանվով մեծ արագությամբ ընթացել է «Իմ քայլը» խմբակցության պատգամավոր Նիկոլայ Բաղդասարյանի ուղղությամբ, փորձել վրաերթի ենթարկել նրան, ապա հնչեցրել է սպառնալիքներ և սեռական բնույթի հայհոյանքներ։ Բաղդասարյանը ոստիկաններին հայտնել է, որ տեղի ունեցածը կապված է իր աշխատանքային գործունեության հետ: 2020թ. մայիսի 13-ին ՀՀ ոստիկանությունում դեպքի առթիվ քրեական գործ է հարուցվել՝ ՀՀ քրեական օրենսգրքի 316-րդ հոդվածի (իշխանության ներկայացուցչի նկատմամբ բռնություն գործադրելը) 1-ին մասով, նախաքննությունը կատարում է ՀՀ քննչական կոմիտեն։ Ենթադրյալ հանցագործություն կատարած անձը՝ Էջմիածին քաղաքի բնակիչ Արթուր Ալեքսանյանը, ձերբակալվել, ապա կալանավորվել է։  Արցախի նախկին ՄԻՊ, «Իրավական ուղի» ՀԿ համահիմնադիր Ռուբեն Մելիքյանը Ալեքսանյանի ձերբակալման օրը հանդես եկավ ֆեյսբուքյան գրառմամբ՝ հայտնելով, որ անձը չի ընդունել իրեն մեղսագրվող արարքը։ Ապա, նշելով, որ վերջինիս մեղադրանք է առաջադրվել ՔՕ 316-րդ հոդվածով՝ «Իշխանության ներկայացուցչի նկատմամբ բռնություն գործադրելը», Մելիքյանը մեջբերել է նույն հոդվածի 3-րդ մասը, որը սահմանում է «իշխանության ներկայացուցիչ» հասկացությունը.  «Պետական և տեղական ինքնակառավարման մարմիններում ծառայող այն անձը, ով ծառայության ենթակայության տակ գտնվող  անձանց նկատմամբ սահմանված կարգով օժտված է կարգադրիչ լիազորություններով»։ Մելիքյանի պնդմամբ՝ 316-րդ հոդվածը վերաբերելի է միայն այն ծառայողներին, որոնք իրավասու են ցանկացած մարդու կարգադրել։ Ըստ նրա՝ այդ անձինք հիմնականում ոստիկանության ծառայողներն են․ «Հիմա՝ ԱԺ պատգամավորը երբվանի՞ց դարձավ ոստիկան, որ նրա նկատմամբ իբրև թե բռնությունը որակել եք 316-րդ հոդվածով։ Երբվանի՞ց եք պատգամավորներին օժտել մարդկանց կարգադրելու լիազորությամբ»,- հարց է հնչեցրել Ռուբեն Մելիքյանը։ Infocom-ը փորձեց պարզել՝ Քրեական օրենսգրքի վերոգրյալ հոդվածի կոնտեքստում ո՞ր սուբյեկտը կարող է դիտարկվել որպես իշխանության ներկայացուցիչ։ Իրավաբան Էդգար Շաթիրյանի խոսքով՝ պնդումը, թե պատգամավորն իշխանության ներկայացուցիչ չէ, միանշանակ չէ, քանի որ 316-րդ հոդվածի 3-րդ մասի համաձայն՝ իշխանության ներկայացուցչի համար պարտադիր պայման է հանդիսանում պետական եւ տեղական ինքնակառավարման մարմիններում ծառայող լինելը։  Այս դեպքում, ինչպես մեր զրույցում նշեց Շաթիրյանը, պետական մարմնում ծառայող հասկացությունը կարող ենք մեկնաբանել լայն առումով։ Մասնավորապես, ելնելով Հանրային ծառայության մասին օրենքի տրամաբանությունից՝ հանրային ծառայությունն ընդգրկում է պետական ծառայությունը, համայնքային ծառայությունը եւ հանրային պաշտոնները։ Այս օրենքի 4-րդ հոդվածի 3-րդ մասում նշված է, որ պետական պաշտոնները դասակարգվում են տեսակների՝ քաղաքական, վարչական, ինքնավար և հայեցողական: Պետական պաշտոնների շարքում իրենց հերթին առանձնացվում են նաեւ պետական քաղաքական պաշտոնները, որոնց թվում է նաեւ պատգամավորի պաշտոնը։ Եւ, ըստ Շաթիրյանի, եթե այս առումով մեկնաբանենք ծառայող եզրույթը, պատգամավորին կարելի է դիտարկել որպես պետական ծառայող։ Միաժամանակ ՔՕ 316-ի երրորդ մասում նշված է, որ իշխանության ներկայացուցիչ համարվում է այն անձը, որը ծառայողական ենթակայության տակ չգտնվող անձանց նկատմամբ օժտված է կարգադրիչ լիազորություններով․ Հետեւաբար, ըստ Էդգար Շաթիրյանի, վերջական եզրահանգման գալու համար՝ ՔՕ 316-րդ հոդվածի իմաստով պատգամավորը հանդիսանո՞ւմ է իշխանության ներկայացուցիչ, թե՞ ոչ, անհրաժետ է պատասխան տալ հետեւյալ հարցին․ արդյոք պատգամավորն օժտվա՞ծ է կարգադրիչ լիազորություններով՝ իր ծառայողական ենթակայության ներքո չգտնվող անձանց նկատմամբ։ «ԱԺ կանոնակարգ» օրենքը եւ «Պատգամավորի գործունեության երաշխիքների մասին» օրենքը պատգամավորին վերապահել են մի շարք իրավունքներ․ պատգամավորը կարող է հարցումներով եւ առաջարկություններով դիմել պետական և տեղական ինքնակառավարման մարմիններին ու պաշտոնատար անձանց, վերջիններս պարտավոր են քննարկել դրանք ու սահմանված ժամկետներում պատասխան տալ։ Պատգամավորի լիազորություններւում կարգադրիչի որոշակի էլեմենտներ կան, բայց եթե դասական առումով մեկնաբանենք (եթե այդպիսի համընդհանուր սահմանում կա, ինչի առնչությամբ ողջամիտ կասկածներ ունեմ), կարծես թե կարգադրիչ եզրույթի հետ կապված խնդիր ենք ունենում»,- ասաց Շաթիրյանը։ Իսկ ինչ վերաբերում է մեկնաբանությանը, թե օրենքը իշխանության ներկայացուցիչ է դիտարկում հիմնականում ոստիկանության ծառայողին, ապա, իրավաբանի համոզմամբ, եթե ՔՕ հիշատակված հոդվածի իմաստով որպես տուժող միայն ոստիկանն է դիտարկված, ապա հոդվածի վերտառության եւ տեքստի «իշխանության ներկայացուցիչ» ձևակերպման գործածությունն է իմաստազրկվում է․ պատգամավորին որպես իշխանության ներկայացուցիչ դիտարկելու հարցի համատեքստում պետք է նկատի ունենալ, որ նա պետաիշխանական լիազորություններով օժտված սուբյեկտ է, ինչը չի բացառում նաև կարգադրիչ տարրը (լայն առումով)՝ պատգամավորի կողմից ի պաշտոնե հանդես գալիս կամ գործելիս։ Infocom-ը մեկնաբանություն խնդրեց նաեւ ՀՀ քննչական կոմիտեից, սակայն մեզ պատասխանեցին, որ ՀՀ քննչական կոմիտեն նման ընթացակարգով չի մեկնաբանում, չի հիմնավորում կոմիտեի քննիչների կայացրած որևէ որոշում, այդ թվում՝ 316-րդ հոդվածով քրեական գործ հարուցելու որոշումը: «Քննիչը, ՀՀ օրենսդրությամբ սահմանված կարգով, կայացրել է Ձեր նշած որոշումը: ՀՀ քրեական դատավարության համապատասխան սուբյեկտները որոշման հետ համաձայն չլինելու դեպքում ՀՀ քրեական դատավարության օրենսգրքով սահմանված կարգով, քննիչի որոշումը կամ գործողությունները կարող են բողոքարկել դատախազություն կամ դատարան»,- հավելեցին ՔԿ մամուլի ծառայությունից: Այսպիսով, հիմնվերով Հանրային ծառայության մասին, Պատգամավորի գործունեության մասին եւ ԱԺ կանոնակարգ օրենքների՝ նշված մի շարք հոդվածների վրա՝ կարող ենք ասել, որ պատգամավորը կարող է համարվել իշխանության ներկայացուցիչ, քանի որ ունի կարգադրիչ համարվող որոշակի լիազորություններ։ Ռուբեն Մելիքյանի պնդումը, թե ՔՕ 316-րդ հոդվածը վերաբերում է հիմնականում ոստիկանության ծառայողներին, խնդրահարույց է, իսկ այն, որ պատգամավորը իշխանության ներկայացուցիչ չէ, միանշանակ չէ։ Հայարփի Բաղդասարյան
14:28 - 21 մայիսի, 2020
Պատգամավոր Նիկոլայ Բաղդասարյանի նկատմամբ բռնություն գործադրելու սպառնալիքի դեպքի առթիվ հարուցված քրեական գործով մեկ անձ կալանավորվել է

Պատգամավոր Նիկոլայ Բաղդասարյանի նկատմամբ բռնություն գործադրելու սպառնալիքի դեպքի առթիվ հարուցված քրեական գործով մեկ անձ կալանավորվել է

2020թ. մայիսի 11-ին ՀՀ Ազգային ժողովի պատգամավոր Նիկոլայ Բաղդասարյանը հաղորդում է ներկայացրել այն մասին, որ իր ծառայողական պարտականությունները կատարելու պատճառով, 2020թ. ապրիլի  11-ին՝ժամը 17:10-ի սահմաններում, անհայտ անձն իր վրա է վարել հեծանիվը, որից հետո իր հասցեին հնչեցրել է բռնություն գործադրելու սպառնալիք:2020թ. մայիսի 13-ին ՀՀ ոստիկանություն Արաբկիրի բաժնում հարուցվել է քրեական գործ՝ ՀՀ քրեական օրենսգրքի 316-րդ հոդվածի (իշխանության ներկայացուցչի նկատմամբ բռնություն գործադրելը) 1-ին մասով, որը նախաքննություն կատարելու համար ուղարկվել է ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին և ընդունվել վարույթ: Քրեական գործով որոշում է կայացվել Նիկոլայ Բաղդասարյանին տուժող ճանաչելու մասին:Ձեռնարկած օպերատիվ-հետախուզական միջոցառումների արդյունքում պարզվել է ենթադրյալ հանցագործություն կատարած անձի ինքնությունը, որը Էջմիածին քաղաքի բնակիչ է՝ ծնված 1980թ.: Վերջինիս մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով և միջնորդություն է ներկայացվել դատարան՝  նրա  նկատմամբ որպես խափանման միջոց կալանավորում ընտրելու  վերաբերյալ,  ինչը բավարարվել է:Կատարվում են քննչական և դատավարական այլ գործողություններ՝ դեպքի լրիվ, օբյեկտիվ և բազմակողմանի քննությունն ապահովելու ուղղությամբ:Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
13:08 - 15 մայիսի, 2020
Ազգային ժողովի պատգամավորին բռնության սպառնալիքներ տված անձը դատախազի ցուցումով ձերբակալվել է

Ազգային ժողովի պատգամավորին բռնության սպառնալիքներ տված անձը դատախազի ցուցումով ձերբակալվել է

ՀՀ ազգային ժողովի պատգամավոր Նիկոլայ Բաղդասարյանի հաղորդման հիման վրա ՀՀ ոստիկանության Երևան քաղաքի վարչությունում նախապատրաստված նյութերով պարզվել է, որ «Հայկական արժեքների պաշտպանության կամք» հասարակական նախաձեռնության անդամ Արթուր Ալեքսանյանը նախաձեռնության այլ անդամների հետ ակցիա է իրականացրել «Սեռական շահագործումից և սեռական բնույթի բռնություններից երեխաների պաշտպանության մասին» ԵԽ կոնվենցիայի վավերացման դեմ, որի ընթացքում, հանդիպելով ՀՀ ազգային ժողովի պատգամավոր Նիկոլայ Բաղդասարյանին նրանից պահանջել է դեմ քվեարկել կոնվենցիայի վավերացմանը: Ազգային ժողովի նիստի ավարտից հետո, Արթուր Ալեքսանյանը Երևան քաղաքի Բաղրամյան պողոտայում հետապնդել է իշխանության ներկայացուցիչ հանդիսացող` ՀՀ ազգային ժողովի պատգամավոր Նիկոլայ Բաղդասարյանին, և պարզելով, որ վերջինս կողմ է քվեարկել կոնվենցիայի վավերացմանը, տվել է սեռական բնույթի հայհոյանքներ և սպառնացել հաշվեհարդար տեսնել նրա հետ: Իշխանության ներկայացուցչի նկատմամբ, կապված նրա կողմից իր ծառայողական պարտականությունները կատարելու հետ, բռնություն գործադրելու սպառնալիք տալու դեպքի առթիվ ՀՀ ոստիկանության Երևան քաղաքի վարչության Արաբկիրի բաժնում հարուցվել է քրեական գործ` ՀՀ քրեական օրենսգրքի 316-րդ հոդվածի 1-ին մասով: Դատախազի ցուցումով Արթուր Ալեքսանյանը ձերբակալվել է: Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
12:22 - 13 մայիսի, 2020