Ադրբեջանում արձագանքել են ՀՀ-ում ԵՄ առաքելության ղեկավարի հայտարարությանը, որ հայերը կարծում են՝ Ադրբեջանը գարնանը հարձակում է սկսելու
Հայաստանում ԵՄ առաքելության ղեկավար Մարկուս Ռիթերը dw.com-ի հետ զրույցում նշել է, որ շատ հայեր գոհ են Հայաստանում ԵՄ ներկայությունից։ Սակայն, ըստ նրա, սպասելիքները շատ մեծ չպետք է լինեն, քանի որ դիտորդները Ադրբեջանի տարածք մտնելու հնարավորություն չունեն, հետևաբար չեն կարող հայտնաբերել, օրինակ, զորքերի տեղաշարժը նախապատրաստվող որևէ հարձակման ժամանակ։
«Շատ հայեր կարծում են, որ Ադրբեջանը գարնանը հարձակում է սկսելու։ Եթե սա տեղի չունենա, կնշանակի՝ մեր առաքելությունը արդեն հաջողված է»,- ասել է Ռիթերը։
Նա նաև նշել է, որ «իրենք չեն կարող միջամտել․ «Մենք միայն հեռադիտակներ և տեսախցիկներ ունենք մեր տրամադրության տակ»։
Ադրբեջանի ԱԳՆ մամուլի ծառայության ղեկավար Այհան Հաջիզադեն խստորեն դատապարտել է այս հայտարարությունը։
«Մենք խստորեն դատապարտում ենք այն փաստը, որ ԵՄ քաղաքացիական առաքելության ղեկավարը, հիմնվելով հայկական կողմի կեղծ և զրպարտչական հայտարարությունների վրա, կարծիք է հայտնել, որ Ադրբեջանն իբր պատրաստվում է հարձակման, և ԵՄ առաքելության հիմնական խնդիրը ներկայացրել է «Հայաստանը Ադրբեջանից պաշտպանելը»։ Մենք բազմիցս ընդգծել ենք այս առաքելության չարաշահումները կանխելու անհրաժեշտությունը՝ ուղղված Ադրբեջանի և Հայաստանի միջև հարաբերությունների կարգավորման գործընթացը խաթարելուն», - ասել է Հաջիզադեն իր մեկնաբանության մեջ։
Նրա խոսքով «ԵՄ առաքելությունը չպետք է տրվի կեղծ ու զրպարտչական հայտարարություններին և պետք է գործի իր մանդատի համաձայն»։
10:11 - 29 մարտի, 2023
