Անդրանիկ Քոչարյան

8-րդ գումարման Ազգային ժողովի «Քաղաքացիական պայմանագիր» խմբակցության պատգամավոր, ԱԺ պաշտպանության և անվտանգության հարցերի մշտական հանձնաժողովի նախագահ։

Ծնվել է 1961թ. մայիսի 3-ին։ 1983թ. ավարտել է Երեւանի պետական պոլիտեխնիկական ինստիտուտի կիբեռնետիկայի ֆակուլտետի ավտոմատ կառավարման համակարգեր բաժինը, 2000թ.՝ Երեւանի պետական համալսարանի իրավաբանական ֆակուլտետը:

1983-1990թթ. աշխատել է Երեւանի մաթեմատիկական մեքենաների գիտահետազոտական ինստիտուտում՝ որպես ճարտարագետ: 1990-1991թթ. եղել է ՀՀ ներքին գործերի նախարարի առաջին տեղակալ, 1991-1995թթ.՝ ՀՀ պաշտպանության նախարարի առաջին տեղակալ: 1994-1996թթ. եղել է Աղետի գոտում կառավարության արտակարգ լիազոր ներկայացուցիչ: 1999-2000թթ. աշխատել է ՀՀ վարչապետի խորհրդական՝ պաշտպանության, ազգային անվտանգության, ներքին գործերի եւ կադրային քաղաքականության հարցերով:

2000-2005թթ. եղել է «Հասարակությունն ընդդեմ ահաբեկչության» ՀԿ-ի ազգային անվտանգության եւ պաշտպանության գծով անկախ փորձագետ, 2008-2009թթ., 2008թ.՝ մարտի 1-ի իրադարձությունները քննող փաստահավաք խմբի անդամ, փորձագետ: 2012 թ․-ից «Ժողովրդավարության, անվտանգության եւ զարգացման հայկական կենտրոն» ՀԿ-ի նախագահն է:

1995-1999թթ. եղել է ԱԺ պատգամավոր: ԱԺ «Հանրապետություն» խմբակցության անդամ: Անկուսակցական:

2019-2021թթ. եղել է ԱԺ պատգամավոր («Իմ քայլը» կուսակցությունների դաշինք, համապետական ընտրական ցուցակ):

Լևոն Տեր-Պետրոսյանի հայտարարության մեջ ես տեսնում եմ, որ նախագահը միացավ ընդդիմադիր 17 ուժերին․ Անդրանիկ Քոչարյան |tert.am|

tert.am: Լևոն Տեր-Պետրոսյանը առաջնորդվում է իր հետ եղած դեպքերով և իրավիճակի ելք է համարում վարչապետ Նիկոլ Փաշինյանի հրաժարականը, իսկ իր այդ հայտարարությամբ նա միացավ ընդդիմադիր 17 ուժերին: Այս մասին լրագրողների հետ զրույցում ասաց ՀՀ ԱԺ Պաշտպանության և անվտանգության հարցերի մշտական հանձնաժողովի նախագահ, «Իմ քայլը» խմբակցության պատգամավոր Անդրանիկ Քոչարյանը։ «Առաջին նախագահը երևի շարժվում է այն դրդապատճառով, որ հայտնի ուժերի պահանջով ինքը հրաժարական տվեց, իսկ այսօր հայտնի ուժերի դերում և հանրային ընկալման մեջ Նիկոլ Փաշինյանը ունի առաջնային մանդատ և դրանից ելնելով՝ առաջարկում է արտահերթ ընտրությունների միջոցով լուծել իշխանությունների խնդիրը, Լևոն Տեր-Պետրոսյանի հայտարարության մեջ ես տեսնում եմ, որ նախագահը միացավ ընդդիմադիր 17 ուժերին»,- ասաց Անդրանիկ Քոչարյանը: Նա նաև նշեց՝ տվյալ ժամանակահատվածում ընդդիմությունը հույսը դրել էր Զինված ուժերի վրա և սպասում էր, որ նրանք հանրային պահանջով հանդես կգան, բայց դա չի եղել: «1998 թվականին ուժային կառույցները պահանջ ներկայացրեցին, որ ըստ էության հենց նախագահի հայտնի ձևակերպումն է՝ հայտնի ուժերի պահանջով է հրաժարական տվել 1-ին նախագահը, իսկ այսօր ԶՈՒ-ի փեշերից կախվել էին բոլորը և ուզում էին հայտնի ուժերի դերում տեսնել ԶՈՒ-ի վերին սպայակազմին, բայց դա չի եղել»,- ասաց նա: ՀՀ ԱԺ պաշտպանության և անվտանգության հարցերի մշտական հանձնաժողովի նախագահը նշեց՝ Տեր-Պետրոսյանը որևէ մեկի հետ չի համագործակցում, բայց արել է քայլ, որը պետք էր ընդդիմությանը: «Լևոն Տեր-Պետրոսյանը միշտ եղել է ինքնուրույն գործող անձ և իր տեսակետները որևէ մեկի հետ կիսելու կամ համագործակցելու գիծ չեմ տեսնում, բայց նա արել է հայտարարություն, որը ցանկալի էր ընդդիմադիր ուժերին»,- նշեց նա: Անդրանիկ Քոչարյանի հավաստմամբ՝ արտահերթ ընտրությունների դեպքում պետք է որևէ կերպ բացառել կեղծիքը, քանի որ գործող իշխանությունը Հայաստանում վերականգնեց լեգիտիմությունը և որևէ փաստ չկա, որ 2018 թվականի ընտրությունները կեղծվել են:

14:53 - 16 մարտի, 2021

Մենք ապրում ենք իրականության և ֆեյքի միջև. դա վերածվել է ազգային անվտանգության խնդրի. Քոչարյան |1lurer.am|

1lurer.am: Կայքերում, տելեգրամյան ալիքներում պարբերաբար տարածվում են տեղեկություններ, որոնք առնչվում են պետական ինստիտուտներին, պաշտպանական ոլորտին, պաշտոնատար անձանց: Երբ վերջիններս պատասխան չեն տալիս, ստացվում է, թե իբր ասվածը ճիշտ է: Այս մասին ԱԺ պաշտպանության և անվտանգության հարցերի մշտական հանձնաժողովի նիստում ասաց հանձնաժողովի նախագահ Անդրանիկ Քոչարյանը: «Վերջերս նաև հրապարակում եղավ, որում խոսք էր գնում ռազմական գնումների մասին, որին առնչվում էին տարբեր մարդիկ, հիմնադրամի հետ կապված ինչ-որ պատմություններ: Ես երեկ ԱԱԾ տնօրենին խնդրել եմ, որ անմիջապես քրեական գործեր հարուցվեն՝ անկախ նրանից իշխանության մեջ ես, թե ոչ: Նաև ինձ առնչվող բաներ են եղել, պաշտպանության նախարարի, այլ պաշտոնատար անձանց: Վերջերս անընդհատ գրում եք, որ «Իմ քայլը» դաշինքի պատգամավորները աստղաբաշխական գներով տներ են առել, այսինքն՝ գնում է վարկաբեկման մի տոտալ գործընթաց, որը բավականին լավ վճարվում է: Դա հատուկ է արվում, և, բնականաբար, պետք է որ լավ վարձատրվի. սուտն է վարձատրվում: Մենք ապրում ենք իրականության և ֆեյքի միջև, դա արդեն վերածվել է ազգային անվտանգության խնդրի»,- ասաց Քոչարյանը: ԱԱԾ տնօրենի տեղակալ Տիգրան Հարությունյանն անդրադառնալով հարցին, թե արդյոք ունե՞ն նման երևույթների դեմ պայքարի ծրագիր, ասաց, որ եթե խնդիրը բացահայտմանն է առնչվում, թե կոնկրետ մեդիառեսուրսն ում է պատկանում, ինչ դաշտում է աշխատում, ԱԱԾ-ն ունի հնարավորութուն պարզելու, թե ով է կանգնած տվյալ ռեսուրսի հետևում: «Խնդիրն ավելի շատ քրեական դաշտին է վերաբերում. արդյոք այդ մեդիառեսուրսը երբ հրապարակում է կատարում, անցնո՞ւմ է կարմիր գիծը, թե՞ ոչ: Շատ հաճախ իրենք քողարկում են հրապարակումները՝ «ենթադրում ենք», «հավանական է» բառերով, և հետագայում եթե մենք պատասխանատվության կանչենք կոնկրետ անձանց, կասեն՝ ես ենթադրում էի: Կարծում եմ՝ մենք այդպիսի ռեսուրսներ ունենք, որ կարողանանք դրանց դեմ պայքարել»,- ասաց Հարությունյանը: «Իմ քայլը» խմբակցության պատգամավոր Արեն Մկրտչյանն էլ ասաց, որ օրեր առաջ լրատվական կայքերից մեկում սպառազինության տեղաշարժի մասին տեսանյութ է հրապարակվել ռազմական դրության պայմաններում: Պատգամավորն առաջարկեց ԱԱԾ-ին, եթե չկան կարգավորումներ այդ մասով՝ ավելի խիստ լուծումների գնալու, համատեղ ջանքերով օրենսդրական այդ կարգավորումները մշակեն ու ստեղծեն: Անդրանիկ Քոչարյանը հիշեցրեց, որ երեկ էլ Սողոմոն Թեհլերյանի գործողության 100-ամյակն էր, բայց, ըստ նրա, Թեհլերյանն իր գործողությունն արել էր ազգային վրեժի լուծման տեսանկյունից, բայց, պատգամավորի խոսքով, երեկ նույնիսկ Զարուհի Փոստանջյանը ձեռքի ատրճանակային շարժումով պատկերացնում էր ինչ-որ պետական գլուխներ պաշտոնյաների, որ բոլորին պետք է հարվածել: «Նեմեսիսը» պետք է որ լուծարված լիներ, բայց կարծում եմ, որ գուցե ոչ Նեմեսիս անունով, բայց կան որոշ կուսակցություններ, որոնք ունեն գաղտնի նման պահպանված կառույցներ: Վերջին տասնամյակների ընթացքում մենք առնչվել ենք «Դրո» կառույցի հետ: Պարզվեց, որ Նեմեսիսը լուրջ նորից պահանջարկ է կառուցում, իսկ այդ պահանջարկը նշանակում է՝ կան ուժեր, որ մեր երկիրը փորձելու են մտցնել ներքին քաոսի մեջ. ընդ որում հոկտեմբերի 27-ը ոչ պակաս «Նեմեսիսի» գործողությանը նման էր»,- ասաց Քոչարյանը:

12:30 - 16 մարտի, 2021

Վանեցյանի հետ մեր ընկերությունը սկսվել է 90-ականներին և պահպանվում է մինչ այսօր․ ԲԴԽ նախագահ

ԱԺ «Իմ քայլը» խմբակցության պատգամավոր Անդրանիկ Քոչարյանը, դիմելով խորհրդարան եկած ԲԴԽ նախագահ Ռուբեն Վարդազարյանին, ասաց, թե շատ հեշտ է ասել՝ «եթե մեղավոր եմ, ապա կպատժվեմ»։ Քոչարյանը նշեց, որ նոյեմբերի 15-ի իր կոչով Վարդազարյանը վնասել է ՀՀ ներքին անվտանգությունն ու կայունությունը, և որ դա սովորական հայտարարություն չի եղել: «Եթե փաստերը համադրենք իրար հետևից՝ պատերազմական գործողություններ էին, պատերազմի ընթացքում կոչեր՝ իշխանությունը գրավելու, հետո նոյեմբերի 9-10, հետո ձեր հայտարարությունը, հիմա էլ ԳՇ որոշ հրամանատարների հայտարարությունը։ Հիմա ամեն մեկը ասի դա իմ սրտից բխող հայտարարությո՞ւն է, այդպես չի լինի։ Ես համոզված եմ, որ եթե ձեզ մնար, դուք այդ հայտարարությունը չէիք անի կամ գոնե կբաշխեիք այդ ռիսկերը ԲԴԽ մյուս անդամների հետ»,- հավելեց պատգամավորը։ «Կարծում եմ, որ ձեր պաշտոնավարման հետագա ընթացքում դուք պետք է հեռու պահեք դատական համակարգը նման ցնցումներից, ավելին՝ ոչ ոք չի կասկածում, որ դատական համակարգում կան շատ արժանավոր, պրոֆեսիոնալ դատավորներ, սակայն քաղաքական նման իրողությունների մեջ ներքաշվող համակարգին հասարակությունը անվստահություն է հայտնում, քանի որ սպանության, բռնության կոչեր անող մարդիկ շարունակում են մնալ ազատության մեջ»,- հավելեց Քոչարյանը: Վերջինս ԲԴԽ նախագահին հարցրեց, թե արդյոք պահպանվե՞լ են ԱԱԾ նախկին տնօրեն Արթուր Վանեցյանի հետ ընկերական հարաբերությունները, այդ հարաբերությունները ազդո՞ւմ են Վարդազարյանի պրոֆեսիոնալ գործունեության վրա, թե՞ ոչ, որովհետև, Քոչարյանի խոսքով, նման հայտարարություններից հետո արտախորհրդարանական ուժերը ոգևորվում են։ Վարդազարյանը պատասխանեց, որ համաձայն չէ Քոչարյանի այն դիտարկման հետ, թե իր կոչով վնասել է երկրի ներքին կայունությանը և անվտանգությանը։ «Իմ կոչով ես նպաստել եմ և՛ ներքին կայունությանը, և՛ անվտանգությանը, և՛ դատական իշխանությանը զերծ եմ պահել քաղաքական ազդեցություններից: Ինչ վերաբերում է Վանեցյանի հետ մեր ընկերությանը՝ այն սկսվել է 90-ականներին, երբ ես աշխատում էի Կառավարությունում, իսկ Վանեցյանը ուսանող էր, և այդ հարաբերությունները շարունակվել են մինչ օրս: Ընկերական հարաբերությունները պահպանվել են: Այդ ընկերությունը մնացել է և հուսով եմ՝ կայուն մնալու է»,- նշեց ԲԴԽ նախագահը: Վարդազարյանը ասաց, որ իր գործունեության տարբեր փուլերում գործնական տարբեր առիթներով հանդիպումներ է ունեցել Վանեցյանի հետ։ Վարդազարյանի խոսքով ընկերական հարաբերությունները օգնել են, որ գործը առաջ գնա, այդ հարաբերություններն ունեցել են իրենց ազդեցությունը։ «Ամենայն պատասխանատվությամբ հայտարարում եմ, որ Արթուր Վանեցյանը չի ունեցել, չունի և չի էլ կարող ունենալ ազդեցություն ինձ վրա։ Եթե ես զգամ, որ ինձ վրա կա ճնշում որևէ ուժի կողմից, ապա ես խոստանում եմ՝ և՛ օրենքի պահանջը կկատարեմ, և՛ համապատասխան հաղորդում կտամ գլխավոր դատախազին, և՛ կդիմեմ ԲԴԽ-ին։ Տեղյակ կպահեմ, որ ինձ վրա կա ճնշում կամ փորձում են ազեցություն կիրառել»,- հավելեց ԲԴԽ նախագահը։ Արձագանքելով պատասխանին՝ Անդրանիկ Քոչարյանը ԲԴԽ նախագահին կոչ արեց հեռու պահել դատական համակարգից բոլոր ազդեցությունները, որոնք կվնասեն մեր երկրի կայունությանը։ Վարդազարյանը հավելեց, որ կհետևի պատգամավորի կոչին և ամեն ինչ կանի, որպեսզի դատական համակարգը հեռու պահի քաղաքական որևէ ազդեցությունից։

17:05 - 03 մարտի, 2021

Ակնհայտ է, որ բանակին քաղաքական գործընթացներում ներքաշելը դիտավորյալ է արվում․ Անդրանիկ Քոչարյան

16:59 - 02 մարտի, 2021

Կա՛մ կառուցում ենք մոտակա 5 տարվա համար մեր ԶՈՒ հեռանկարը, կա՛մ մեզ շատ վատ օրեր կարող են սպասվել․ Անդրանիկ Քոչարյան

Ծանոթացա ԳՇ պետի կողմից ներկայացված հայտարարությանը, նրանք կապում են Տիրան Խաչատրյանի հեռացման հետ։ Աշխարհում ոչ մի երկրում նման բան չեք տեսնի, որ զինվորականին գործից հանում են, և բանակը քաղաքական հայտարարություն է անում։ Այս մասին ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր Անդրանիկ Քոչարյանը։ «Սա եփած թեմա է, որը վտանգներ պարունակում է։ Չեմ կարծում՝ իսկանդերի հետ կապ ունի, սա կապ ունի բանակում սպասվող ռեֆորմների հետ»,- հավելեց նա։ Նրա խոսքով՝ չի կարող մեր երկրի ճակատագիրը կապվել Տիրան Խաչատրյանին աշխատանքից հանելու հետ։ «Ես կուզեի, որ բանակը հանդարտության կողմը կանգներ և կենտրոնանար պատերազմի հետևանքների վերացման վրա։ Մեր երկիրը պետք է զերծ մնա ներքին ցնցումներից։ Հիմա մեր պարտությունների պատճառներն ավելի տեսանելի են դառնում։ Մենք կա՛մ կարգավորում ենք, կառուցում ենք մոտակա 5 տարվա համար մեր ԶՈՒ հեռանկարը, կա՛մ մեզ շատ վատ օրեր կարող են սպասվել։ Լիահույս եմ, որ վատ օրերը մեզ չեն առաջնորդելու, գտնելու ենք սողոմոնյան լուծում»,- ասաց Քոչարյանը։ Տիրան Խաչատրյանի ազատման մասին նա կոչ արեց գնալ քարտեզը նայել, հարավի մասին պատերազմի ընթացքում որոշ գործողությունների մեջ․․․, սակայն չշարունակեց իր միտքը։ «Բաներ կան, որ իմ համար հասկանալի են, բայց որ ձեզ համար էլ հասկանալի լինի, ինձ էլ է ժամանակ պետք։ Հայտարարությունը կապել զինվորականի պաշտոնից ազատման հետ, մեր բանակը տանել ցնցումների, կներեք․․․»,- ասաց Քոչարյանը։ Նա նշեց, որ հայտարարվեց, որ բանակը գնում է ռեֆորմների, կադրային փոփոխութոյւնների ևս, բնականաբար դա պետք է առաջացներ անհանգստություններ։ «Ես հիմա տեսնում եմ անհանգստությունները կադրային կոնկրետ փոփոխության հետ։ Իսկ բանակին թույլ տալ մտնել քաղաքականության մեջ, մեր երկրի շահերից չի բխում»,- հավելեց Քոչարյանը։ Անդրանիկ Քոչարյանի խոսքով՝ բախում չի կարող լինել։ «Մեր երկրում ներքին բախում չի կարող լինել, ով գնում է բախումների, մեր պետականության գերեզմանաքարն է դնում»,- ասաց նա՝ հավելելով՝ պարոն Օնիկ Գասպարյանն էս ի՞նչ արեց։ Նա նշեց, որ Գասպարյանին նման հայտարարություն չէր սպասում։

13:29 - 25 փետրվարի, 2021

Իսկանդերի մասին վարչապետի հնչեցրած տեսակետն ուսումնասիրման կարիք ունի. Անդրանիկ Քոչարյան |hetq.am|

hetq.am: Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը կարծում է, որ երրորդ նախագահ Սերժ Սարգսյանի կողմից «Իսկանդեր» հրթիռային համակարգերի թեման արծարծելը անթույլատրելի էր: Վարչապետ Նիկոլ Փաշինյանը, 1in.am-ի հետ զրույցում արձագանքելով Սերժ Սարգսյանի մեղադրանքին, թե ինչու պատերազմի երրորդ օրը «Իսկանդերը» չի կիրառվել, հարց է հնչեցնում, թե ինչու հրթիռը չի պայթել կամ պայթել է 10%-ով: Անդրանիկ Քոչարյանը պնդեց` այս դիսկուրսի մեջ չի ներքաշվի, «Իսկանդերի» կրակոցը ոչ կհաստատի, ոչ էլ կհերքի, սակայն հավելեց` պաշտոնաթող նախագահի հարցազրույցներն ազգային անվտանգության տեսանկյունից մեծ վտանգներ են պարունակում Հայաստանի համար, հնչեցված մտքերն ապագայում օգտագործվելու են Հայաստանի դեմ: ««Իսկանդերը» աշխատող է եղել, թե չէ, վարչապետի հնչեցրած տեսակետն ուսումնասիրման կարիք ունի: Ինձ էլ է հետաքրքրում մեր վերջին 15 տարիների սպառազինության ձեռքբերումները ճի՞շտ են եղել, թե՞ չէ, աշխատո՞ղ են եղել, թե՞ չէ: Պատկերացնու՞մ եք՝ եթե պարոն Փաշինյանի ասածները ճիշտ դուրս գան»,- ասաց նա: Անդրանիկ Քոչարյանի համոզմամբ` այդ դեպքում պետք է վերանայվի ապագա սպառազինության ամբողջ ձեռքբերումը: Քոչարյանը, սակայն, ընդգծեց` զորքի պատասխանատուների համար պետք է հայտնի լիներ «Իսկանդերի» մանրամասները, որովհետև սպառազինությունը ձեռք բերելիս ստուգման մեխանիզմներ կան: Հարցին` նոր իշխանությունը «Իսկանդերը» չի ստուգել, Քոչարյանը պատասխանեց` որևէ մեկի մտքով չէր կարող անցնել, որ ձեռք բերված սպառազինությունը կարող է խնդիրներ ունենալ: Հիշեցնենք, որ «Իսկանդերը» կիրառության մասին խոսել էր նաև Պաշտպանության նախարարության ռազմական վերահսկողական ծառայության նախկին պետ Մովսես Հակոբյանը` առանց հստակեցնելու դրա կիրառման ուղղությունը:

12:47 - 24 փետրվարի, 2021

Իմ խոսքը մանիպուլացրել են. Անդրանիկ Քոչարյանը մեկնաբանեց իր հարցազրույցի որոշ դրվագներ |1lurer.am|

1lurer.am: ՀՀ ԱԺ «Իմ քայլը» խմբակցության պատգամավոր, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը խորհրդարանում լրագրողների հետ զրույցում մեկնաբանեց «Ազատություն» ռադիոկայանին տված իր հարցազրույցի որոշ դրվագներ: «Պետական պահպանության ամբողջ իմաստն ինչո՞ւմն է, պետության խնդիրը ո՞րն է: Պաշտպանելու համար պետությունը տվել է այդ բոլոր կառույցներին բոլոր իրավասությունները՝ ընդհուպ մինչև կրակելը: Դրա մասին է խոսքը եղել: Բայց դա մանիպուլացրեցին, դարձրեցին, որ Քոչարյան Անդրանիկն ասել է՝ կրակել ժողովրդի վրա: Քոչարյան Անդրանիկը հո հոգեկան հիվանդ չի՞ որոշ մարդկանց պես, որոնք կայծակնային արագությամբ շենքերի գրավում են նախատեսում: Մոռացե՞լ եք՝ մինչև այդ ինչ է եղել մեր պետության մեջ, հոկտեմբերի 27-ը մոռացա՞նք, «Դրո կառույցը» մոռացա՞նք: Ուզում եմ մեկ այլ կառույցի մասին էլ ասել՝ «Նեմեսիսի»: Այդ քաղաքական ուժերը շատ լավ հասկացան՝ ում մասին է խոսքը: Թող խելքները գլուխները հավաքեն: Պետությունը չի կարող թույլ տալ իր հիմքերի ոչնչացման գործընթացը: Այդքան բան եմ ասել: Ես երեկ էլ եմ ասել, որ Մարտի 1-ին ժողովուրդը որևէ պետական շենքի վրա հարձակում չի գործել: Ժողովուրդը իր խաղաղ հավաքների ժամանակ ենթարկվել է հարձակման, և պարոն Ռոբերտ Քոչարյանը և իր փաստաբանական թիմն ամեն ինչ անում են, որպեսզի դատաքննությունը չսկսվի, և հիմա դա կապել մեկը մյուսի հետ՝ անթույլատրելի է»,- ասաց Քոչարյանը: Հարցին՝ ինչպես է գնահատում լրատվամիջոցների վրա հարձակումը՝ պատասխանեց՝ վատ: «Շատ վատ բան էր, անթույլատրելի է, և ես նկատեցի, որ Գեղամ Մանուկյանն իր Ֆեյսբուքի էջում ևս դատապարտել էր նման դրսևորումները, որովհետև այսպես անհարկի թշնամանք սերմանելով՝ դավաճաններ փնտրելով հասարակությանը լիցքավորում ենք շատ բացասական լիցքերով: Հիմա պետք է մենք շատ հանդարտ, ճիշտ ընթացքի մեջ գտնենք մեր խնդիրները»,- հավելեց պատգամավորը՝ անդրադառնալով «Ազատություն» ռադիոկայանի նկարահանող խմբի վրա երեկ տեղի ունեցած հարձակումը:

12:02 - 24 փետրվարի, 2021

Անդրանիկ Քոչարյանի համոզմամբ, ԱԱԾ-ն պետք է Սերժ Սարգսյանին հրավիրի բացատրություն տալու |azatutyun.am|

azatutyun.am: Պատերազմի օրերին բանակը թալանելու մասին Սերժ Սարգսյանի հայտարարություններից հետո Ազգային անվտանգության ծառայությունը (ԱԱԾ) պետք է Սարգսյանին հրավիրի՝ բացատրություն տալու, ասաց Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։ Քոչարյանն ընդգծեց, եթե Սերժ Սարգսյանն այլ տեղեկություններ ունի, այդտեղ կա հանցակազմ, դրան անմիջապես պետք է քրեական գործերը հետևեն։ -Երրորդ նախագահն ասում է, որ իր դեմ այդ մեղադրանքները թալանի մասին բոլորովին արդարացված չեն, և ասում է, որ ճիշտ հակառակը՝ թալանը եղել է մինչև պատերազմը և պատերազմից հետո։ Նա վկայաբերում է այդ 600 դոլարով զրահաբաճկոնի գնումը։ Այդ զրահաբաճկոններից որևէ տեղեկություններ ունե՞ք Դուք։ Անդրանիկ Քոչարյան․ - Ես կարող եմ ասել հետևյալը՝ Սերժ Սարգսյանը երբ որ խոսում է շ բաճկոններից, լավ կլիներ մանրամասներ, թե ի՞նչ թեմայի մասին է խոսքը գնում։ Ի վերջո, եթե այդ բաճկոններն ինչ-որ մեկը ձեռք է բերել, երևի ինչ-որ մեխանիզմով են ձեռք բերել, ի՞նչ գնումների մասին է խոսքը։ Եթե ասում է՝ «Պաշտպանության նախարարության կողմից չեն իրականացվել գնումները», ապա, բնականաբար, պատասխան ծառայությունները, կառույցները կուսումնասիրեն և դրա պատասխանները կտան։ Եթե գնման մեջ շեղումներ են եղել, կամ չարաշահումներ են եղել, մեղավորները միանշանակ պետք է պատասխան տան, եթե կան այդպիսինները։ Բայց, էլի եմ ասում, հեշտ է ասելը, լավ է, որ ասվում է, և այդպիսի ինֆորմացիա կա, որ բաճկոններ են գնվել, բայց երևի այդ բաճկոնները գնվել են բանակի համար չէ՞ և դրանք պետք է մուտք արվեին բանակի իրային պահեստ, և այնտեղ շատ հստակ կարելիէ նայել՝ ով է գնել, ինչ գնով է գնել, ում փողերով է գնել։ Այնքան մարդիկ կային, որ էս պատերազմի ընթացքում սեփական միջոցներով էին ինչ-որ բաներ առնում։ Մեր ժողովուրդը «Հայաստան» համահայկական հիմնադրամի հաշվին գումարներ էին տալիս որպեսզի հոգային թե՛ զինծառայողների կարիքները, խնդիրները, թե՛ բանակի կարիքների հետ կապված խնդիրներ, թե՛ գնումներ էին անում աշխարհով մեկ․․․ ում մտքով, ինչ անցնի՝ պետք ա, պետք չի, առնում էին և ուղարկում էին։ Դրա մեջ ինչ ասես կար՝ սկսած բանակի առողջապահական համակարգին միտված խնդիրներ, բանակի սպառազինության հետ կապված խնդիրներ․․․ ամեն մարդ ինչ-որ բան ուզեցել ա անի, լավ կլիներ, որ ամբողջացված լիներ հենց բանակի խողովակներով, ոչ թե լավ կլիներ, դա առաջինը պետք ա լիներ բանակի հենց պահանջներին համահունչ։ Եթե պարոն Սարգսյանի մոտ կա այլ տեղեկատվություն, միանգամից պետք է Ազգային անվտանգության ծառայությունը հրավիրի պարոն Սարգսյանին և այդ տեղեկատվությունը ստանա, կամ բացատրություն վերցնի, որովհետև եթե այդտեղ կա հանցակազմ, դրան անմիջապես պետք է քրեական գործերը հետևեն, և ով ուզում է լինի, եթե այդտեղ պատերազմից մարդիկ եղել են, որոնք օգտվել են, նրանք պետք է պատժվեն, բայց եթե հանկարծ դա չհամապատասխանի իրականությանը, էստեղ մենք հայտնվում ենք մեկ այլ իրողության մեջ՝ այն, ինչ-որ առավոտից իրիկուն մենք մեր երկրի ներսում դավաճաններ և խարդավանքներ փնտրելով թուլացնում ենք մեր պետական ինստիտուտներն, առաջին հերթին զինված ուժերի նկատմամբ կասկածը, պետական կառավարման նկատմամբ կասկածը, կասկածի խորացում։ Վերջին հաշվով տեսնում եք, թե այս ֆեյքային պատերազմներն ինչ նպատակ են հետապնդում։ Եվ այսօր ամենապահանջարկ ունեցող և վճարվող ապրանքը, դա սուտ տեղակատվություն տարածելն է։ Հարցազրույցն ամբողջությամբ կարող եք դիտել azatutyun.am-ում։

17:08 - 22 փետրվարի, 2021

Եթե մտածում են շենքեր գրավելու մասին, թող մտածեն, որ պետությունն իրավունք ունի կրակելու․ Անդրանիկ Քոչարյան |civilnet.am|

civilnet.am: Եթե մտածում են շենքեր գրավելու մասին, թող մտածեն, որ պետությունն իրավունք ունի կրակելու։ Այս մասին «Ազատության» «Կիրակնօրյա վերլուծական Հրայր Թամրազյանի հետ» հաղորդման ժամանակ ասել է Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով Վազգեն Մանուկյանի հայտարարությանը։ «Բոլորը պետք է գիտակցեն, որ անվտանգության համակարգի հետ կատակներ չեն անում։ Մեր երկիրն այն վիճակում չէ, որ չկարողանա պաշտպանել իր քաղաքացուն և մեր պետականությունը։ Եթե մտածում են շենքեր գրավելու մասին, թող մտածեն, որ շենքերը գտնվում են պետական պահպանության տակ, իսկ դա նշանակում է, որ պետությունը պահում է ոչ թե շենքերը, այլ պետականությունը և նա մոնոպոլ իրավունք ունի կրակելու»,- նշել է Քոչարյանը։ «Հայրենիքի փրկության շարժման» վարչապետի թեկնածու Վազգեն Մանուկյանը փետրվարի 20-ի հանրահավաքին Նիկոլ Փաշինյանին հեռացնելու նպատակով առաջարկել էր ապստամբությամբ վերցնել իշխանությունը․ «Ցանկացած պահ` դա կլինի այսօր, դա կարող է լինել մեկ շաբաթ հետո, կարող է լինել 10 օր հետո, պետք է պատրաստ լինել կայծակնային արագությամբ ապստամբելով վերցնել իշխանությունը»,- ասել էր Մանուկյանը: Նշենք, որ այս հայտարարության առնչությամբ Ոստիկանությունում հարուցվել է քրեական գործ։ Անդրանիկ Քոչարյանը կարծիքով՝ Վազգեն Մանուկյանի ելույթը նույնությամբ կրկնում էր նոյեմբերի 10-ի գործողությունների քաղաքական առաջադրանքը։ «Նոյեմբերի 10-ին կայծակնային արագությամբ Ազգային ժողովի և Կառավարության շենքերը գրավեցին, հետո՞, մյուս օրը ի՞նչ արեցին։ Պարզապես հարվածի տակ ընկան այն մարդիկ, որոնք չգիտես ինչի, ում հրամանով դուրս էին եկել, գրավում էին շենքերը։ Հիշա շատ կարևոր է ճշտել, թե այդ հրահանգը որտեղից եկավ, ոնց էդ հրոսակախմբերը մի վայրկյանում, դեռ չհրապարակված հրադադարի փաստաթուղթը, նրանք արդեն պատրաստ գիտեին՝ ուր պետք էր գնալ և ում ման գալ։ Վազգեն Մանուկյանի ելույթը նույնությամբ կրկնում էր այդ գործողությունների քաղաքական առաջադրանքը։ Դա պետք է մերժել»,- ասել է «Իմ քայլը» խմբակցության պատգամավորը։

16:46 - 22 փետրվարի, 2021

Անդրանիկ Քոչարյանը ԵԱՀԿ ներկայացուցիչների հետ քննարկել է 2021թ․ անելիքները

Այսօր ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը տեսահանդիպում է ունեցել ԵԱՀԿ ներկայացուցիչների հետ։ Այս մասին հայտնում են ԱԺ պաշտպանության և անվտանգության հարցերի մշտական հանձնաժողովից: Հանդիպման ընթացքում քննարկվել են 2020թ․ ընթացքում կիսատ թողնված ծրագրերը, ինչպես նաև ուրվագծվել 2021թ․ անելիքները։ Հաղորդվում է, որ 2021թ․ ընթացքում ԵԱՀԿ-ի փորձագիտական աջակցությամբ կավելացվեն խորհրդարանի վերահսկողական մեխանիզմները և կառուցվածքային բարեփոխումներ կիրականացվեն ուժային գերատեսչություններում։

19:10 - 19 փետրվարի, 2021

Պաշտպանության նախարար Վաղարշակ Հարությունյանը եկել էր խորհրդարան |hetq.am|

hetq.am: Պաշտպանության նախարար Վաղարշակ Հարությունյանը եկել էր Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի աշխատասենյակ: Մեկ ժամից ավելի տևած հանդիպումից հետո նախարարը հրաժարվեց պատասխանել լրագրողների հարցերին: Անդրանիկ Քոչարյանի խոսքով՝ նախարարի հետ հաճախակի հանդիպումները պայմանավորված են հետպատերազմական խնդիրների լուծմամբ, անհրաժեշտ օրենսդրական նախագծերի քննարկմամբ, այդ թվում՝ բանակի նոր կառուցվածքի և համալրման հարցերի առնչությամբ:

19:52 - 11 փետրվարի, 2021

Պաշտպանության նախարար Վաղարշակ Հարությունյանը Ազգային ժողովում է |armtimes.com|

armtimes.com: Պաշտպանության նախարար Վաղարշակ Հարությունյանը այս պահին Ազգային ժողովում է: Նրան ուղեկցում էր ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը: Պաշտպանության նախարարը հրաժարվեց պատասխանել լրագրողների հարցերին: «Եթե հարցեր ունեք, դիմեք Ալթունյանին: Ես բոլոր հարցերին կպատասխանեմ»,-ասաց նա լրագրողներին:

12:30 - 05 փետրվարի, 2021

Պատերազմին մասնակցած անձանց հոգեբանական ծառայություններ կտրամադրվեն. գործադիրը հաստատեց նախագիծը |1lurer.am|

13:18 - 04 փետրվարի, 2021

Պատերազմի ընթացքում բոլորս կենտրոնացել էինք «Բայրաքթարի» վրա, առավոտից իրիկուն պատգամավորներով ֆեյսբուքից դուրս չէինք գալիս, նայում էինք՝ ինչ կարելի է բերել. Անդրանիկ Քոչարյան |tert.am|

tert.am։ Ես անձամբ ուզում եմ հրաշքների սպասել, ոչ թե այնպիսի հրաշքների, որոնք անիրականանալի են, այլ այնպիսի հրաշքների, որոնց չսպասելով՝ բաց ենք թողել մեր ձեռքից հնարավորությունը: Այս մասին խորհրդարանական լսումներին ասաց Պաշպանության և անվտանգության հարցրեի մշտական հանձնաժողովի նախագահ Անդրանիկ Քոչարյանը: «Պատերազմի ընթացքում մեր ազգը կենտրոնացել էր «Բայրաքթարի» վրա, բոլորը խոսում էին օդի բաց լինելու մասին, ԱԺ պատգամավորերով առավոտից իրիկուն ֆեյսբուքից դուրս չէինք գալիս և նայում էինք՝ ինչ հնարավորություններ կան, ինչ կարելի է բերել, բայց դրա մասին պետք էր տարիներ շարունակ մտածել՝ հենց առաջնահերթ գիտությունը բերելով դեպի բանակ»,- հայտարարեց նա: Ըստ Քոչարյանի՝ այսօր պատերազմը մեզ ստիպեց հասկանալ՝ ժամանակակից պատերազմները՝ առանց գիտության ներգրավման, դեպի անվտանգության համակարգ չի լինում: Նա ընդգծեց՝ այսօր էլ քրեական գործեր են հարուցվել այն մարդկանց նկատմամբ, որոնք իրենց անտարբերությամբ և կոռուպցիայի բարձր մակարդակի պատճառով մեր անվտանգության կարողությունները տկարացրել էին: «Գիտությունը միշտ պետք է լինի մեր բանակի, մեր անվտանգության համակարգի հետ, լոկոմոտիվը անվտանգության համակարգը պետք է լինի: Կարևոր է՝ այս լսումներից հետո մենք կունենա՞նք ծրագիր՝ բանակի հետ ոնց ենք աշխատում: ՊՆ-ի համապատասխան ստորաբաժանումները պետք է առաջնահերթությունը դնեն ինտելեկտի՝ դեպի բանակ բերելու խնդրի լուծումների վրա: Կարծում եմ՝ այս հավաքի վերջում ինչ-որ հայտարարությամբ հանդես կգանք, որտեղ մեր ռազմաարդյունաբերական համակարգի ամբողջ կարողությունները պետք է վերանայենք, ոչ թե պետք է նայենք, որ ռադիոէլեկտրոնային պայքարի մեր տկար կարողություններով կարողացանք 2 «Բայրաքթար» իջեցնել»,- նշեց նա:

13:53 - 01 փետրվարի, 2021

Անդրանիկ Քոչարյանն ընդունել է ՀՀ-ում ԱՄՆ դեսպանին

Հայաստանի Հանրապետության ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը հանդիպել է ՀՀ-ում ԱՄՆ արտակարգ և լիազոր դեսպան Լին Թրեյսիի գլխավորած պատվիրակության հետ, որի կազմում էին նաև դեսպանության ռազմական կցորդ Սքոթ Մաքսվելը և քաղաքատնտեսական հարցերով պատասխանատու Քիմ Զափֆելը: Այս մասին տեղեկանում ենք խորհրդարանի պաշտոնական կայքին։ «Անդրադառնալով պատերազմի հետեւանքով առկա առաջնային խնդիրներին՝ Անդրանիկ Քոչարյանն ընդգծել է, որ անհրաժեշտ է ներդնել հնարավոր բոլոր ջանքեը գերիների փոխանակումն իրականացնելու համար: «Ռազմագերիների հարցը կարևոր հումանիտար խնդիր է, որն օր առաջ պետք է լուծվի հնարավոր բոլոր խողովակների կիրառմամբ»,- շեշտել է նա: Զրուցակիցները խոսել են նաև պատերազմում Ադրբեջանի կողմից Մերձավոր Արևելքից ահաբեկիչների և վարձկանների ներգրավման մասին: «Սիրիայից և Մերձավոր Արևելքի այլ երկրներից վարձկանների մասնակցությունը պատերազմին անհերքելի է, և այդ փաստը հաստատվել է աշխարհի առաջատար երկրների՝ ինչպես Ֆրանսիայի, այնպես էլ Ռուսաստանի Դաշնության հատուկ ծառայությունների կողմից: Փաստորեն, այս պատերազմում Պաշտպանության բանակը կռվել է Ադրբեջանի, Թուրքիայի, ահաբեկիչների և իսրայելական նորագույն սպառազինության դեմ»,- նշել է Անդրանիկ Քոչարյանը: «Որպես ԵԱՀԿ Մինսկի խմբի համանախագահ՝ Ամերիկայի Միացյալ Նահանգները կաշխատեն ԼՂ հարցում երկարատև քաղաքական լուծում գտնելու ուղղությամբ: Այս ճանապարհին պետք է փորձել տարբեր մակարդակներում երկխոսության հասնել»,- նշել է Լին Թրեյսին: Հանձնաժողովի նախագահը նշել է, որ տարածաշրջանում անվտանգության ապահովման երաշխիքը կարող է լինել ԼՂ կարգավիճակի հստակեցումը, և այս պահին այդ ուղղությամբ արդեն պետք է տարվեն աշխատանքներ: Հանդիպման ավարտին քննարկվել են տնտեսական հարաբերությունների անվտանգության ապահովմանը, ՀՀ զինված ուժերի բարեփոխումներին միտված օրենսդրական նախաձեռնություններին, ինչպես նաև դեսպանության աջակցությամբ սերժանտական կազմի ինստիտուցիոնալ կրթական հնարավորություններին վերաբերող հարցեր»,- նշված է հաղորդագրության մեջ։

09:25 - 21 հունվարի, 2021

Որպես ԵԱՀԿ Մինսկի խմբի համանախագահ ԱՄՆ-ն կաշխատի ԼՂ հարցում երկարատև քաղաքական լուծում գտնելու ուղղությամբ. Լին Թրեյսի

Հայաստանի Հանրապետության ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը հունվարի 20-ին հանդիպել է ՀՀում ԱՄՆ արտակարգ եւ լիազոր դեսպան Լին Թրեյսիի գլխավորած պատվիրակության հետ, որի կազմում էին նաեւ դեսպանության ռազմական կցորդ Սքոթ Մաքսվելը եւ քաղաքատնտեսական հարցերով պատասխանատու Քիմ Զափֆելը: Այս մասին տեղեկացնում է ՀՀ ԱԺ-ն: Անդրադառնալով պատերազմի հետեւանքով առկա առաջնային խնդիրներին՝ Անդրանիկ Քոչարյանն ընդգծել է, որ անհրաժեշտ է ներդնել հնարավոր բոլոր ջանքեը գերիների փոխանակումն իրականացնելու համար: «Ռազմագերիների հարցը կարեւոր հումանիտար խնդիր է, որն օր առաջ պետք է լուծվի հնարավոր բոլոր խողովակների կիրառմամբ»,- շեշտել է նա: Զրուցակիցները խոսել են նաեւ պատերազմում Ադրբեջանի կողմից Մերձավոր Արեւելքից ահաբեկիչների եւ վարձկանների ներգրավման մասին: «Սիրիայից եւ Մերձավոր Արեւելքի այլ երկրներից վարձկանների մասնակցությունը պատերազմին անհերքելի է, եւ այդ փաստը հաստատվել է աշխարհի առաջատար երկրների՝ ինչպես Ֆրանսիայի, այնպես էլ Ռուսաստանի Դաշնության հատուկ ծառայությունների կողմից: Փաստորեն այս պատերազմում Պաշտպանության բանակը կռվել է Ադրբեջանի, Թուրքիայի, ահաբեկիչների եւ իսրայելական նորագույն սպառազինության դեմ»,- նշել է Անդրանիկ Քոչարյանը: «Որպես ԵԱՀԿ Մինսկի խմբի համանախագահ՝ Ամերիկայի Միացյալ Նահանգները կաշխատեն ԼՂ հարցում երկարատեւ քաղաքական լուծում գտնելու ուղղությամբ: Այս ճանապարհին պետք է փորձել տարբեր մակարդակներում երկխոսության հասնել»,- նշել է Լին Թրեյսին: Հանձնաժողովի նախագահը նշել է, որ տարածաշրջանում անվտանգության ապահովման երաշխիքը կարող է լինել ԼՂ կարգավիճակի հստակեցումը, եւ այս պահին այդ ուղղությամբ արդեն պետք է տարվեն աշխատանքներ: Հանդիպման ավարտին քննարկվել են տնտեսական հարաբերությունների անվտանգության ապահովմանը, ՀՀ զինված ուժերի բարեփոխումներին միտված օրենսդրական նախաձեռնություններին, ինչպես նաեւ դեսպանության աջակցությամբ սերժանտական կազմի ինստիտուցիոնալ կրթական հնարավորություններին վերաբերող հարցեր:

22:55 - 20 հունվարի, 2021