ԵԽԽՎ

Եվրոպայի խորհրդի խորհրդարանական վեհաժողովը Եվրոպայի խորհրդի խորհրդարանական ձեւաչափն է, Նստավայրը Ստրասբուրգում է: Վեհաժողովը ձեւավորվել է 1949 թվականի մայիսի 5-ին Լոնդոնում ստորագրված Եվրոպայի խորհրդի կանոնադրությամբ:

ԵԽԽՎ-ն է սահմանում իր օրակարգը: Քննարկում է եւրոպական ու միջազգային իրադարձությունները եւ հրատապ թեմաներ ու խնդիրներ, որոնք մտահոգում են եվրոպական երկրներին: Հիմնական կարեւոր թեմաներն են՝ մարդու իրավունքները, ժողովրդավարությունը, փոքրամասնությունների ու իրավական պետության պաշտպանությունը: ԵԽԽՎ-ի նիստերը գումարվում են տարին չորս անգամ՝ Ստրասբուրգում, Եվրոպայի պալատում, մեկշաբաթյա տեւողությամբ: Հայաստանը Եվրոպայի խորհրդին անցամակցում է 2001թ. հունվարի 25-ից։

Աշխատանքային միգրանտները մեծածավալ տրանսֆերներ են ապահովում սեփական երկրների համար. Մելքումյանը՝ ԵԽԽՎ-ում |news.am|

Աշխատանքային միգրանտները մեծածավալ տրանսֆերներ են ապահովում սեփական երկրների համար. Մելքումյանը՝ ԵԽԽՎ-ում |news.am|

news.am: Շատ կարեւոր է, որպեսզի աշխատանքային միգրանտներն այլ երկրներում իրենց աշխատանքային գործունեությունը ծավալելու ընթացքում օրենսդրորեն եւ իրավական առումով պաշտպանված լինեն: Այս մասին ԵԽԽՎ աշնանային նստաշրջանում՝ աշխատանքային միգրացիայի թեմայով քննարկման ժամանակ իր ելույթում նշել է հայկական պատվիրակության անդամ Միքայել Մելքումյանը: Նա, մասնավորապես, նշել է. «Քննարկվող թեման բավական արդիական է շատ երկրների համար նաեւ այն պարզ պատճառով, որ տարբեր պետություններում մարդկանց կենսամակարդակը կարող է էապես տարբերվել, որովհետեւ նույն որակի եւ քանակի աշխատանքի դիմաց վարձատրության չափն էապես տարբեր է: Աշխատանքային միգրանտներն ունեն ԵԽԽՎ համապատասխան որոշումների եւ պաշտպանության կարիքը։ Նշանակում է այստեղ մենք պետք է ընդունենք կիրառական որոշումներ։ Բնականաբար, առավել զարգացած երկրներում նվազագույն եւ միջին աշխատավարձի մակարդակն առավել բարձր է: Սակայն միայն այդ հիմնական պատճառով չէ, որ տարբեր երկրներից դեպի առավել զարգացած տնտեսություն ունեցող երկրներ աշխատելու են մեկնում քաղաքացիներ՝ ապահովելու իրենց նվազագույն կենսապայմանները: Աշխատանքային միգրացիան առաջացնում է լուրջ ժողովրդագրական խնդիրներ մայր երկրներում, որտեղից տեղափոխվում են աշխատանքի համար։ Դա պետք է հաղթահարել։ Այդ առումով Արեւելյան Եվրոպայի եւ ԱՊՀ բոլոր երկրներում էլ այս խնդիրները խիստ արդիական են եւ լուծման կարիք ունեն։ Մասնավորապես գաղտնիք չէ, որ մեր հանրապետությունից հիմնականում սեզոնային աշխատանքի համար ՌԴ են մեկնում տարեկան մի քանի հարյուր հազար աշխատանքային միգրանտներ: Այստեղ խնդիրներ կան նաեւ կապված աշխատանքի կատարյալ ազատ տեղաշարժի հետ, սակայն համոզված եմ, որ դրանք առաջիկայում իրենց լուծումները կստանան: Որպես ՀՀ ԱԺ պրոֆիլային հանձնաժողովի նախագահ՝ լավատեղյակ եմ այդպիսի խնդիրներին եւ դրանց լուծման ընթացքին: Շատ կարեւոր է նաեւ, որպեսզի աշխատանքային միգրանտներն այլ երկրներում իրենց աշխատանքային գործունեությունը ծավալելու ընթացքում օրենսդրորեն եւ իրավական առումով պաշտպանված լինեն: Դա կապված է ընդունող երկրներում ժամանակավոր կացության, աշխատանքային իրավունքների պաշտպանության ինստիտուտների ինչպես օրենսդրական, այնպես էլ վարչարարական կարգավորումների արդյունավետության բարձրացման հետ: Իհարկե, այս զեկույցը եւ դրա հիման վրա ընդունվող որոշումը կնպաստեն այդ խնդրի լուծմանը, սակայն դա ամբողջական եւ իրական լուծում չի լինի։ Միաժամանակ պետք է նշել, որ աշխատանքային միգրանտները մեծածավալ ֆինանսական տրանսֆերներ են ապահովում նաեւ սեփական երկրների համար: Սակայն ակնհայտ է, որ բոլոր երկրներն էլ ձգտում են զարգացնել իրենց տնտեսությունները, ապահովել առավել բարձր նվազագույն եւ միջին աշխատավարձի մակարդակ: Մեր վեհաժողովն իր որոշումներով միայն ու միայն պետք է նպաստի այդ գործընթացներին:  
10:37 - 04 հոկտեմբերի, 2019
Լեհաստանը միացել է ԵԽԽՎ աշնանային նստաշրջանի մասնակի բոյկոտին՝ ի նշան Ուկրաինայի հետ համերաշխության |tert.am|

Լեհաստանը միացել է ԵԽԽՎ աշնանային նստաշրջանի մասնակի բոյկոտին՝ ի նշան Ուկրաինայի հետ համերաշխության |tert.am|

tert.am։ Լեհաստանը միացել է Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի մասնակի բոյկոտին՝ ի նշան Ուկրաինայի հետ համերաշխության։ Այս մասին հոկտեմբերի 1-ին Ստրասբուրգում հայտնել է լեհական պատվիրակության նախագահ Ալեքսանդր Պոցեյը, գրում է ukrinform.ru-ն: Ինչպես հայտնի է, այսօր Ստրասբուրգում բացվում է ԵԽԽՎ աշնանային նստաշրջանը, որը կտևի մինչև հոկտեմբերի 4-ը: Ուկրաինական պատվիրակությունը չի մասնակցի նստաշրջանի որոշ միջոցառումների՝ ի նշան ՌԴ-ի՝ ԵԽԽՎ վերադարձի դեմ բողոքի։ Ուկրաինայի հետ ԵԽԽՎ-ին բոյկոտել են նաև Լիտվան, Լատվիան, Էստոնիան և Վրաստանը։Իր հերթին, ԵԽԽՎ նախագահ Լիլիան Մորիս Պասկյեն ափսոսանք է հայտնել ստեղծված իրավիճակի կապակցությամբ և հավաստիացրել, որ ուկրաինական պատվիրակության հետ համագործակցությունը շատ կարևոր է:
12:22 - 01 հոկտեմբերի, 2019
ՀՀ իշխանությունները ձախողում են ԼԳԲՏ անձանց պաշտպանության հարցում. ԵԽԽՎ 29 պատգամավոր հայտարարություն է արել

ՀՀ իշխանությունները ձախողում են ԼԳԲՏ անձանց պաշտպանության հարցում. ԵԽԽՎ 29 պատգամավոր հայտարարություն է արել

Եվրոպայի խորհրդի խորհրդարանական վեհաժողովի 29 պատվիրակ հայտարարություն են տարածել, որում նշվում է՝ ՀՀ Իշխանությունները պետք է քայլեր ձեռնարկեն LGBTI անձանց բռնությունից և խտրականությունից պաշտպանելու համար: Այս հայտարարությամբ ԵԽԽՎ պատվիրակներն անդրադարձել են ՀՀ-ում LGBTI անձանց իրավունքների պաշտպանության իրավիճակին ու ձեռնարկվելիք քայլերի անհրաժեշտությանը։ Նշվում է, որ հայտարարության տեքստը հեղինակել է վերջերս ռուսական պատվիրակությանը ԵԽԽՎ վերադարձրած մեծ աղմուկ բարձրացրած բանաձևի հեղինակ, բելգիացի պատգամավոր Պետրա դը Սութերը։ «LGBTI անձանց իրավիճակը ՀՀ-ում Եվրոպայի շրջանում ամենավատն է»,- նշվում է հայտարարությունում, որը ստորագրողները հիշեցնում են Եվրոպայի խորհրդի Մարդու իրավունքների հանձնակատարի՝ Հայաստանի վերաբերյալ վերջին զեկույցը: Հայտարարությանը միացած պատվիրակները որպես իրավիճակի ցուցիչ հիշեցնում են ՀՀ-ում 2018 թվականի նոյեմբերին Արևելյան եվրոպական և Կենտրոնական ասիական LGBTI անձանց և քրիստոնյաներին նվիրված ֆորում-կոնֆերանսի մահվան սպառնալիքների տակ: «Այս ամենն իրականցվում է ամեն տարի LGBTI անձանց իրավունքների տասնյակ խախտումների մասին հ/կ-ների զեկույցների ֆոնին»,- ասված է հայտարարության տեքստում։ ԵԽԽՎ պատվիրակներն արձանագրում են, որ ՀՀ իշխանությունները ձախողում են այս մտահոգություններին արձագանքելու հարցում, չնայած միջազգային իրավապաշտպան մարմինների առաջարկություններին։ Ըստ հայտարարության, ոչ խտրականության դեմ օրենսդրություն է պատրաստվում, ոչ էլ գործող ատելության խոսքի/հանցագործության օրենքում է հատուկ կերպով նշվում սեռական կողմնորոշման կամ սեռական ինքնության մասին։ Նրանք կոչ են անում ՀՀ իշխանություններին՝ ձեռնարկել բոլոր անհրաժեշտ քայլերը՝ ապահովելու համար անվտանգություն և ազատություն LGBTI անձանց խտրականությունից։ «Սա պետք է ներառի LGBTI անձանց ուղղված ատելության խոսքի և բռնության հրապարակային քննադատություն, ատելության խոսքի, ատելության վրա հիմնված հանցագործությունների և հակախտրականության օրենսդրության մշակում սեռական կողմնորոշման և սեռական ինքնության հարցի հատուկ ներառմամբ, ինչպես նաև թրեյնինգներ իրավապահ մարմինների պաշտոնյաների և դատավորների համար»,- ասված է հայտարարության տեքստում։
13:58 - 04 հուլիսի, 2019
Երեխաները երբեք չպետք է դառնան հակամարտությունների թիրախ. Սոս Ավետիսյանի ելույթը ԵԽԽՎ-ում

Երեխաները երբեք չպետք է դառնան հակամարտությունների թիրախ. Սոս Ավետիսյանի ելույթը ԵԽԽՎ-ում

Հայաստանի պատվիրակության անդամ Սոս Ավետիսյանը ԵԽԽՎ-ում ելույթ է ունեցել երեխաների պաշտպանության թեմայով: Ավետիսյանն իր ելույթը հրապարակել է Ֆեյսբուքի իր էջում։  Հրապարակման տեքստում ասված է․ «Երեխաներին պետք է սիրել և երբեք թույլ չտալ, որպեսզի նրանք դառնան էժանագին քարոզչության զոհ, հատկապես այն դեպքում, երբ այդ քարոզչությունը ուղեկցվում է զենքի կիրառմամբ:  Երբ 2016թ-ին Ադրբեջանը հարձակվեց Արցախի վրա, առաջին զոհը եղավ մի 9-ամյա երեխա՝ Վաղինակ Գրիգորյանը: Խաղաղ բնակչության վրա այդ հարձակումով Ադրբեջանը ևս մեկ անգամ ցուցադրեց իր ռազմատենչ քաղաքականությունը:  Համացանցում փնտրելով՝ կգտնենք տեսահոլովակներ, որտեղ կտեսնենք թե ինչպես են Ադրբեջանում մարդիկ իրենց երեխաներին, աշակերտներին սովորեցնում ատել հայերին: Հայաստանն ընդունել է ավելի քան 20000 սիրիացի փախստականների, և մեր կառավարությունը ամեն ինչ արել և անում է նրանց՝ հասարակությանը լիարժեք ինտեգրելու համար: Եվ դա այն պատճառով է, որ մենք մի երկիր ու ազգ ենք, ով վերապրել է ցեղասպանությունը: Երեխաներին պետք է էլ ավելի շատ սիրել թե՛ Հայաստանում, թե Ադրբեջանում, թե՛ Վրաստանում, թե՛ Ուկրաինայում և թե՛ ամենուր. երեխաները երբեք չպետք է դառնան հակամարտությունների թիրախ»:  
15:01 - 27 հունիսի, 2019
ԵԽԽՎ-ն վերադարձրել է ռուսաստանյան պատվիրակության լիազորությունները |armenpress.am|

ԵԽԽՎ-ն վերադարձրել է ռուսաստանյան պատվիրակության լիազորությունները |armenpress.am|

armenpress.am: Եվրոպայի խորհրդի խորհրդարանական վեհաժողովը ընդունել է բանաձև, որով հաստատել է ռուսաստանյան պատվիրակության լիազորությունները: Ինչպես տեղեկացնում է «ՌԻԱ Նովոստի»-ն, ընդունված փաստաթղթում ԵԽԽՎ-ն կոչ է արել Մոսկվային իրականացնել 2014 և 2015 թվականների բանաձևներում ներառված բոլոր առաջարկությունները: Բանաձևում նաեւ նշված է, որ ռուսական պատվիրակությունը առանց հետագա ուշացումների պետք է վերադառնա Մոնիտորինգի կոմիտեի և Վեհաժողովի մյուս բոլոր կոմիտեների հետ համագործակցությանն, ինչպես նաև պետք է վարի կառուցողական երկխոսություն՝ իր պարտավորությունների կատարման վերաբերյալ: Բացի այդ, Վեհաժողովը կոչ է արել ռուսաստանյան իշխանություններին ազատել 24 ուկրաինական նավաստիներին, որոնք անցած տարվա նոյեմբերին սահմանը խախտելուց հետո ձերբակալվել էին:
17:05 - 26 հունիսի, 2019
Ուկրաինայի պատվիրակությունը լքեց ԵԽԽՎ նիստերի դահլիճը |aysor.am|

Ուկրաինայի պատվիրակությունը լքեց ԵԽԽՎ նիստերի դահլիճը |aysor.am|

aysor.am: Ուկրաինայի պատվիրակությունը լքել է Եվրախորհրդի խորհրդարանական վեհաժողովի նիստերի դահլիճը: Այդ մասին «Պրյամոյ» հեռուստաալիքի ուղիղ եթերում հայտնել է խորհրդարանական Ալեքսեյ Գոնչարենկոն: «Մեր ամբողջ պատվիրակությունը լքել է դահլիճը։ Մենք այս նստաշրջանի համար ընդունել ենք որոշում, որ Ուկրաինայի պատվիրակությունը մասնակցելու է օրակարգի միայն այն կետերի քննարկմանը, որոնք վերաբերում են ՌԴ-ի դեմ պատժամիջոցներ կիրառելուն»: Գոնչարենկոյի խոսքով՝ Ուկրաինայի պատվիրակությունը դեռ կվերադառնա նիստերի դահլիճ՝ խանգարելու ՌԴ Պետդումայի միջազգային գործերի կոմիտեի նախագահ Լեոնիդ Սլուցկու՝ ԵԽԽՎ-ի փոխխոսնակ ընտրվելուն: Ուկրաինայի նախագահ Վլադիմիր Զելենսկին երեքշաբթի հիասթափություն է հայտնել ԵԽԽՎ-ի որոշման կապակցությամբ, որն անցած գիշեր հաստատել Է ՌԴ պատվիրակության լիազորություններն ամառային նստաշրջանում: «Հիասթափված եմ Ռուսաստանի Դաշնության պատվիրակության լիազորություններն առանց սահմանափակումների հաստատելու ԵԽԽՎ-ի որոշումից։ Անցած շաբաթ ես անձամբ այդ հարցը քննարկել եմ Ֆրանսիայի նախագահի և Գերմանիայի կանցլերի հետ: Փորձել եմ համոզել պարոն Մակրոնին և տիկին Մերկելին, որ ԵԽԽՎ ռուսական պատվիրակության վերադարձը հնարավոր է միայն այն բանից հետո, երբ Ռուսաստանը կկատարի վեհաժողովի սկզբունքային պահանջները», - գրել է քաղաքական գործիչը Facebook-ում:
11:37 - 25 հունիսի, 2019
ԵԽԽՎ-ի Հայաստանի մշադիտարկման խմբի համազեկուցողներն մեկնաբանել են Նիկոլ Փաշինյանի հայտարարությունը |tert.am|

ԵԽԽՎ-ի Հայաստանի մշադիտարկման խմբի համազեկուցողներն մեկնաբանել են Նիկոլ Փաշինյանի հայտարարությունը |tert.am|

tert.am։ Եվրոպայի խորհրդի խորհրդարանական վեհաժողովն անդրադարձել է Հայաստանի ներքաղաքական դաշտում տեղի ունեցած վերջին զարգացումներին, մասնավորապես՝ ՀՀ վարչապետ Նիկոլ Փաշինյանի՝ դատարանների մուտքերն արգելափակելու վերաբերյալ կոչին: ԵԽԽՎ-ի Հայաստանի մշադիտարկման խմբի համազեկուցողներ Յուլյա Լովոչկինան և Անդրեյ Սիրսելջը, մեկնաբանելով Փաշինյանի՝ մայիսին 19-ին իր աջակիցներին ուղղված կոչը, նշել են, որ իշխանությունները պետք է զերծ մնան այնպիսի գործողություններից և հայտարարություններից, որոնք կարող են դատական համակարգի նկատմամբ որպես ճնշման գործադրում ընկալվել: «Մենք ցանկանում ենք ընդգծել, որ դատական համակարգի անկախությունն օրենքի գերակայության նախապայման է և որ հետևաբար՝ օրենքի գերակայությունը լավագույնս գործում է քաղաքական խաղացողների կողմից որևէ միջամտության բացակայության դեպքում»,-ասել են համազեկուցողները՝ նկատելով, որ վիճելի թվացող դատական վճիռները վիճարկելու համար կան հստակ իրավական գործընթացներ: Համազեկուցողներն ընդգծել են, որ օրենքի գերակայության նկատմամբ հարգանքը ենթադրում է նաև հարգանք այն գործընթացների նկատմամբ, որոնք գոյություն ունեն բոլոր քաղաքացիներին պաշտպանելու համար՝ անկախ նրանից, թե ով են նրանք: «Այնուամենայնիվ, մենք ընդունում ենք, որ տվյալ դատական վճռի վերաբերյալ հանրության արձագանքը ընդգծում է դատական համակարգի նկատմամբ հանրության շրջանում վստահության դեռևս ցածր մակարդակը»,-նշել են համազեկուցողները: Միևնույն ժամանակ նրանք շեշտել են, որ դատական համակարգի բարեփոխումները շարունակում են առաջնահերթություն լինել, ուստի՝ իրենք ողջունում են վարչապետ Նիկոլ Փաշինյանի՝ այդպիսի բարեփոխումներ անելու, կոռուպցիայի դեմ պայքարելու վերաբերյալ հայտարարությունը, ինչպես նաև այդ ամենը Եվրոպայի խորհրդի օգնությամբ իրականացնելու ցանկությունը:
10:31 - 21 մայիսի, 2019
ԵԽԽՎ բանաձևի մեջ թեև ընդգծվում է Տրոյկա լվացքատուն արտահայտությունը, բայց որևիցե անուն չի հիշատակվում․ Վլադիմիր Վարդանյան |hetq.am|

ԵԽԽՎ բանաձևի մեջ թեև ընդգծվում է Տրոյկա լվացքատուն արտահայտությունը, բայց որևիցե անուն չի հիշատակվում․ Վլադիմիր Վարդանյան |hetq.am|

Եվրոպայի խորհրդի խորհրդարանական վեհաժողովի գարնանային նստաշրջանում ընդունած փողերի լվացքատունը դատապարտող բանաձևի զգալի մասը վերաբերում է ադրբեջանական լվացքատանը։ Այս մասին խորհրդարանում լրագրողների հետ զրուցում ասաց ԵԽԽՎ հայկական պատվիրակության անդամ Վլադիմիր Վարդանյանը՝ ամփոփելով այցի արդյունքները։«Հետաքրիր քննարկում էր ծավալվել գլոբալ և ադրբեջանական լվացքատան հետ կապված, փողերի լվացման համակարգի վերաբերյալ, որում ներգրավված են եղել մի շարք ադրբեջանցի պաշտոնյաներ, ԵԽԽՎ նախկին պատգամավորներ: Բանաձևը մեծ սատարում ստացավ ԵԽԽՎ-ի կողմից, մեծ հատված վերաբերում էր ադրբեջանական լվացքատանը»,- ասաց Վարդանյանը։ Պատվիրակության ղեկավար Ռուբեն Ռուբինյանն ասաց, որ ադրբեջանցի պատվիրակները ապակառուցողական ելույթներով են հանդես եկել նստաշրջանի ընթացքում, որոնց հայկական պատվիրակության անդամները համարժեք պատասխաններ են տվել։ Ռուբինյանը հիշեցրեց, որ նստաշրջանի ընթացքում Ստրասբուրգ է մեկնել վարչապետ Փաշինյանը, ելույթով է հանդես եկել, ապա հարցեր են հնչել։ «Վարչապետի ելույթը երկու մասից էր բաղկացած՝ Հայաստանում տեղի ունեցող քաղաքական փոփոխությունների, և երկրորդ մասը վերաբերում էր ԼՂ հակամարտությանը: Շատ կարևոր է, որ այդ հարթակից ևս ներկայացրեց մեր դիրքորոշումներն ու առաջնահերթությունները, ներառյալ Արցախին բանակցությունների սեղանին ներգրավելու հարցը»,- ասաց Ռուբինյանը։ ԵԽ 22 պատգամավորներ նամակ են հղել եվրոպական հանձնաժողովի նախագահին՝ հորդորելով պատժամիջոցներ կիրառել «Տրոյկա լվաքատան» մեջ ներգրավված երկու անձանց՝ Ռուբեն Վարդանյանի և Վլադիմիր Ռոմանովի նկատմամբ: Մեր հարցին, թե այս մասին ինչ քննարկումներ են եղել, և որն է հայկական պատվիրակության դիրքորոշումը, Վարդանյանը պատասխանեց. «Տրոյկա լվացքատան հետ կապված այդ փոքրիկ փոփոխությունն ամբողջ զեկույցում իրականացվել է մարտ ամսին՝ Փարիզում տեղի ունեցած իրավական հարցերով կոմիտեի նիստից հետո: Կոմիտեի քննարկումները ծավալվում էին այն ըմբռմամբ, որ ԵԽԽՎ-ն պետք է դատապարտի ընդհանրապես լվացքատունը՝ որպես երևույթ, և այս տեսանկյունից լվացքատան որևէ հարց չպետք է դուրս մնա զեկույցից։ Այնտեղ մի փոքր հատված է ավելացվել, որում հիշատակվում է Ռուբեն Վարդանյանի անվանումը՝ որպես սեփականատերերից մեկը: Բանաձևի մեջ թեև ընդգծվում է Տրոյկա լվացքատուն արտահայտությունը, բայց որևիցե անուն չի հիշատակվում»,- ասաց նա։Վարդանյանի խոսքով՝ չնայած զեկույցը վերաբերում է փողերի լվացքատանն առհասարակ, սակայն զեկույցի գերակշիռ մասը վերաբերում է ադրբեջանական լվացքատանը։ Հայկական պատվիրակության անդամ Տաթևիկ Հայրապետյանն էլ ասաց, որ բանաձևի մի ամբողջական հատված քննադատվում է միայն նրա համար, որ լվացքատունը հայտնվել է ԵԽԽՎ-ում։ «ԵԽԽՎ-ի  քայլերից մեկն էլ այն է, որ իր հեղինակությունը մաքրի»,- ասաց նա։
12:41 - 16 ապրիլի, 2019
Հայ պատվիրակը ԵԽԽՎ-ում բարձրացրել է Հայոց ցեղասպանության ճանաչման անհրաժեշտության հարցը |armenpress.am|

Հայ պատվիրակը ԵԽԽՎ-ում բարձրացրել է Հայոց ցեղասպանության ճանաչման անհրաժեշտության հարցը |armenpress.am|

armenpress.am: Եվրոպայի խորհրդի խորհրդարանական վեհաժողովի գարնանային նստաշրջանի նիստում հայկական պատվիրակության անդամ, «Իմ քայլը» խմբակցության պատգամավոր Վլադիմիր Վարդանյանն օգտագործել է այդ հարթակը` բարձրացնելով Հայոց ցեղասպանության ճանաչման և դատապարտման հետ կապված համապատասխան գործելակերպ որդեգրելու հարցը: ԱԺ-ում պատվիրակության անդամների հրավիրած ասուլիսում այս մասին խոսեց Վարդանյանը: «Օրակարգում ընդգրկված էր ատելության խոսքի հետ կապված բավականին լուրջ հատված: Եվ դրա շրջանակում ես իմ ելույթում անդրադարձ եմ կատարել ատելության խոսքին: Ոչ մի ցեղասպանություն հնարավոր չէ իրագործել առանց ատելության խոսքի: Ընդ որում՝ հարց բարձրացվեց առ այն, որ թե 100 տարի է անցել Հայոց ցեղասպանությունից, այդուհանդերձ մենք Եվրոպայի խորհրդի անդամ երկրներում բախվում ենք հայատյացության տարբեր դեպքերին: Եվ այս տեսանկյունից մենք օգտագործելու ենք այս հարթակը` պահանջելով Հայոց ցեղասպանության ճանաչման և դատապարտման հետ կապված համապատասխան գործելակերպ որդեգրել, և փորձելու ենք մեր ելույթների ու գործունեության միջոցով հնարավորինս նվազեցնել հետագայում որևէ ցեղասպանության իրագործման հնարավորությունը»,-ասաց Վարդանյանը:
11:01 - 16 ապրիլի, 2019
ԵԽԽՎ-ն Ադրբեջանում և եվրոպական երկրներում կոռուպցիայի և փողերի լվացման մասին բանաձև է ընդունել |azatutyun.am|

ԵԽԽՎ-ն Ադրբեջանում և եվրոպական երկրներում կոռուպցիայի և փողերի լվացման մասին բանաձև է ընդունել |azatutyun.am|

azatutyun.am։ Եվրոպայի խորհրդի Խորհրդարանական վեհաժողովը (ԵԽԽՎ) Ադրբեջանում և եվրոպական երկրներում կոռուպցիայի և փողերի լվացման մասին բանաձև է ընդունել:«Կոռուպցիոն լվացքատուն՝ արձագանքում նոր մարտահրավերներին փողերի լվացման, կոռուպցիայի և կազմակերպված հանցավորության դեմ պայքարում» վերտառությամբ զեկույցը հեղինակել է հոլանդացի պատգամավոր Մարտ վան դե Վենը: Փաստաթղթում նշվում է, որ Եվրոպայի խորհուրդը անհանգստացած էր «ադրբեջանական լվացքատան» զեկույցով, որտեղ խոսվում է խոշոր գումարների լվացման, Ադրբեջանի ներկայացուցիչների կողմից եվրոպացի գործիչներին և պատգամավորներին կաշառելու մասին: «Դա արվել է Ադրբեջանի իշխանությունների շահերը Եվրոպայի խորհրդում առաջ մղելու նպատակով», - նաև ասվում է ԵԽԽՎ-ի կողմից նախօրեին ընդունված բանաձևում:Զեկույցում նշվում է, որ ԵԽԽՎ-ը խորապես մտահոգված է այդ նպատակների համար Ադրբեջանից դուրս բերված շուրջ 3 միլիարդ դոլարի կապակցությամբ: Փաստաթղթի հեղինակի համոզմամբ՝ Ադրբեջանում կոռուպցիայի պատճառներից մեկը անկախ քաղաքացիական հասարակության, լրատվամիջոցների գործունեությունը կասեցնելն է, որոնք վերահսկիչ դեր կարող են ունենալ հանցավոր գործարքների դեմ:
10:56 - 12 ապրիլի, 2019
Սոս Ավետիսյանը ԵԽԽՎ-ում կոչ է արել, որ անդամ երկրները խավիարային կոռուպցիոն սկանդալում հայտնված անձանց նկատմամբ գործեր հարուցեն |armenpress.am|

Սոս Ավետիսյանը ԵԽԽՎ-ում կոչ է արել, որ անդամ երկրները խավիարային կոռուպցիոն սկանդալում հայտնված անձանց նկատմամբ գործեր հարուցեն |armenpress.am|

armenpress.am: Տխրահռչակ խավիարային դիվանագիտությունը ներխուժել էր Եվրոպայի խորհրդի խորհրդարանական վեհաժողովի (ԵԽԽՎ) պատերից ներս, որպեսզի կապի միջազգային հանրության աչքերն Ադրբեջանում քաղբանտարկյալների առկայության, պետության զավթման իրողության, ավտորիտար համակարգի և քաղհասարակության նկատմամբ հալածանքների վերաբերյալ։ Այս մասին ՀՀ ԱԺ պատգամավոր, արտաքին հարաբերությունների մշտական հանձնաժողովի և ԵԽԽՎ-ում Հայաստանի պատվիրակության անդամ Սոս Ավետիսյանը հայտարարել է ՝ ելույթ ունենալով «Կազմակերպված հանցավորության և փողերի լվացման դեմ պայքարի նոր մարտահրավերների մասին» զեկույցի քննարկման շրջանակում, և կոչ է արել, որ ԵԽԽՎ անդամ երկրները խավիարային կոռուպցիոն սկանդալում հայտնված անձանց նկատմամբ գործեր հարուցեն։ Նա իր ելույթում նշել է. «Այսօր մենք քննարկում ենք ծավալում ժողովրդավարական հասարակություններին սպառնացող ամենամեծ վտանգներից մեկի մասին: Ես ցանկանում եմ իմ շնորհակալությունը հայտնել զեկուցող պարոն Մարթ դե Վենին իր ազնիվ և մանրամասն զեկույցի համար, որտեղ փողերի լվացման խրթին ճանապարհները հայտնաբերված են և կազմակերպված հանցավորության իրական սպառնալիքը միանշանակ գնահատականի է արժանանում: Միաժամանակ, ես ցանկանում եմ շնորհակալություն հայտնել այն քաջ հետաքննող լրագրողներին, որոնք, ցավոք սրտի, կյանքի գնով բացահայտում են այս հանցավոր կապերը, որոնք ամենօրյա ռեժիմով սպառնում են ժողովրդական հասարակություններին: Կոռուպցիան՝ որպես այդպիսին, նոր երևույթ չէ: Նորությունն այս դեպքում միայն այն արագությունն է, որի պարագայում կոռուպցիան մի երկրում կարող է ազդել ընդհանուր համակարգի վրա: Չնայած այն հանգամանքին, որ փողը չի գնում սեր, բայց դրանով հնարավոր է ձեռք բերել ազդեցություն: Գողացված գույքը և գումարները շատ արագ հայտնվում են օֆշորում, որտեղից տարբեր կեղծ կազմակերպությունների միջոցով այն օգտագործվում է քաղաքական դաշնակիցներ ձեռք բերելու, ճշմարտությանը լռեցնելու և բարեվարքության աղճատման համար: Ցավոք սրտի, նույնիսկ ԵԽԽՎ-ն զուրկ չէր այս ազդեցությունից: Տխրահռչակ խավիարային դիվանագիտությունը ներխուժել էր այս պատերից ներս, որպեսզի կապի միջազգային հանրության աչքերը Ադրբեջանում քաղբանտարկյալների առկայության, պետության զավթման իրողության, ավտորիտար համակարգի և քաղհասարակության նկատմամբ հալածանքների վերաբերյալ: Սրա հետ մեկտեղ ես պետք է գնահատեմ մեր ջանքերը, որ այս ազդեցությունը մերժել ենք, որի մասին մանրամասն նշվում է 2185 որոշման մեջ: Թերևս փողի լվացման մեխանիզմ կառուցելու համար հարկավոր է մի շարք անձանց համագործակցություն, սակայն ուրախալին այն է, որ մեկ անձը կարող է այս շղթան բացահայտել: Ես երկրորդում եմ զեկուցողի կոչն առ այն, որ անդամ պետություններն իրենց երկրներում հետամուտ լինեն վերը նշված կոռուպցիոն սկանդալում հայտնված անձանց նկատմամբ համապատասխան գործեր հարուցելուն, որոնք փաստագրվել են Անկախ Հակակոռուպցիոն Մարմնի կողմից: Կոռուպցիայի դեմ պայքարը պետք է սկսի անդամ երկրներում, այլապես մենք շարունակաբար կպայքարենք հետևանքների և ոչ թե իրական պատճառների դեմ: Իհարկե այն պարագայում, որ որոշ անդամ երկրներում կոռուպցիան հանդիսանում է իշխանության հիմնասյուներից մեկը, այս հույսերը արդարացված չեն, սակայն արդ այդ երկրները պետք է մշտապես լինեն միջազգային հանրության ուշադրության ներքո: Հետևաբար, անդամ երկրներում աշխատանքին զուգահեռ մենք պետք է ուժեղացնենք համաեվրոպական մեխանիզմները, որպեսզի կանխենք փողերի լվացումը և կազմակերպված հանցավորության ազդեցությունը: Ի հավելումն մեր գործիքակազմի, օրինակ՝ Փողերի լվացման և ահաբեկչության ֆինանսավորման դեմ պայքարի փորձագիտական խորհուրդը (Moneyval), Կոռուպցիայի դեմ պետությունների խումբը (GRECO), ՄԱԿ-ի հակակոռուպցիան, մենք պետք է աշխատենք քաղաքացիական հասարակության հետ, օրինակ Թրանսփարենսի Ինթերնեյշնալի և անկախ հետաքննող լրագողների խմբի հետ»:  
17:51 - 11 ապրիլի, 2019
Մի՞թե Եվրոպայի խորհրդի համար առաջնայինը փաստաթուղթն է և ոչ թե իրական մարդը․ Նիկոլ Փաշինյան

Մի՞թե Եվրոպայի խորհրդի համար առաջնայինը փաստաթուղթն է և ոչ թե իրական մարդը․ Նիկոլ Փաշինյան

Նիկոլ Փաշինյանը՝ Եվրոպայի խորհրդի խորհրդարանական վեհաժողովի նիստին անդրադարձավ նաև ԵԽԽՎ-ի դերին ԼՂ-ում ժողովրդավարական ինստիտուտների ամրապնդման և քաղաքացիական հասարակության զարգացման հարցում․ «ԵԽԽՎ-ն բնավ որևէ միջոց չի ձեռնարկում Լեռնային Ղարաբաղում ժողովրդավարական ինստիտուտների ամրապնդման և քաղաքացիական հասարակության զարգացման համար: Սրա բացատրությունն այն է, որ Լեռնային Ղարաբաղի կարգավիճակի վերաբերյալ հակասություններ, տարընթեր­ցում­ներ կան, որ Լեռնային Ղարաբաղը միջազգայնորեն ճանաչված չէ որպես պետություն: Բայց խոսքը ԵԽԽՎ անելիքի առումով պետական կարգավիճակի մասին չէ: Եթե Լեռնային Ղարաբաղը դեռևս միջազգայ­նորեն ճանաչված չէ որպես անկախ պետություն, մի՞թե Լեռնային Ղարաբաղում ապրող մարդկանց մարդ լինելու վերաբերյալ միջազգային բանավեճ կա: Մի՞թե մարդու իրավունքների պաշտ­պանության համաշխարհային առաջա­մարտիկներից մեկի՝ Եվրոպայի խորհրդի համար առաջնայինը փաստաթուղթն է և ոչ թե իրական մարդը: Եվ այս բարձր ամբիոնից ուզում եմ կոչ հղել Եվրոպայի խորհրդի և ընդհանրապես Եվրոպայի բոլոր այն կազմակերպու­թյուններին, որոնք զբաղվում են մարդու իրավունքների, խոսքի ազատության պաշտպանությամբ, ժողովրդավարական ինստիտուտների զարգացմամբ: Աջակցեք Լեռնային Ղարաբաղի ժողովրդին՝ կատարելագործելու իրենց օրենքներն ու ինստիտուտները, ամրապն­դելու մարդու իրավունքները, օրենքի գերա­կայու­թյունն ու անկախ դատական համակարգը: Դրանից շահելու է Ղարաբաղի քաղաքացին՝ մարդը: Իսկ մարդն ավելին է քան որևէ փաստաթուղթ, քան որևէ քաղաքական կամ խմբային շահ, և ես հավատում եմ, որ Եվրոպայի Խորհուրդը, Եվրոպայի խորհրդի խորհրդարանական վեհաժողովը կառաջնորդվի հենց այս արժեքներով»:  
11:22 - 11 ապրիլի, 2019
ԵԽԽՎ-ն մտահոգված է. Քաղաքական գործիչները պետք է խուսափեն ատելության խոսքից

ԵԽԽՎ-ն մտահոգված է. Քաղաքական գործիչները պետք է խուսափեն ատելության խոսքից

Եվրոպայի խորհրդի խորհրդարանական վեհաժողովը (ԵԽԽՎ) նախօրեին ընդունած բանաձևով մտահոգություն է հայտնել ատելության խոսքի տարածման կապակցությամբ, ինչը խթանում է խտրականություն, ռասայական ատելություն, հակասեմիտիզմ, իսլամաֆոբիա և անհանդուրժողականություն՝ ուղղված մասնավորապես փոքրամասնությունների դեմ՝ ներգաղթյալների, կանանց և ԼԳԲՏԻ անձանց: Այս անհանգստացնող միտումը չի խնայում նաև քաղաքական ասպարեզին, և ատելության խոսքն օգտագործվում է «ոչ միայն պոպուլիստական և ծայրահեղական խմբերի կողմից, այլև քաղաքական ողջ սպեկտրի ներկայացուցիչների կողմից»։ Այս մասին ասվում է Էլվիրա Կովակսի պատրաստած զեկույցում։ «Քաղաքական գործիչներն ունեն և քաղաքական, և բարոյական պատասխանատվություն` «խուսափել ատելության և խեղաթյուրող խոսքից ու անհապաղ դատապարտել ուրիշների կողմից դրա օգտագործումը, քանի որ լռությունը կարող է մեկնաբանվել որպես հավանության արժանացում կամ աջակցություն»,- ընդգծվում է տեքստում: Վեհաժողովը քաղաքական կուսակցություններին ու շարժումներին խրախուսում է՝ ընդունել ինքնակարգավորվող գործիքներ, ինչպիսիք են վարքագծի կանոնները և էթիկայի կանոնները՝ արգելելով ատելության խոսքի օգտագործումն իրենց անդամների կողմից: «Ինտերնետային միջնորդները, մասնավորապես, սոցիալական ցանցերը, պետք է կիրառեն նաև ինքնակարգավորվող գործիքներ, ատելության խոսքի կանխարգելման և պատժամիջոցների կիրառման համար ու պարտավորեվեն հեռացնել վիրավորական բովանդակությունը»,-ասում են խորհրդարանականները: Նրանք կոչ են արել նաև անդամ պետություններին ընդունել վարչական, քաղաքացիական և քրեական իրավունքի դրույթներ ատելության խոսքի դեմ ու նպաստել իրազեկման բարձրացմանը, ներառյալ միջազգային մակարդակներում:Վերջապես, Վեհաժողովը կոչ է արել անդամ պետություններին՝ իրականացնել ռասիզմի և անհանդուրժողականության դեմ պայքարի եվրոպական հանձնաժողովի 15-րդ ընդհանուր քաղաքականության հանձնարարականը, որը պարունակում է մի շարք միջոցներ՝ ատելության խոսքի կանխարգելման ու պայքարի ուղղությամբ։
08:43 - 11 ապրիլի, 2019