ՊՆ

Հայաստանի Հանրապետության պաշտպանության նախարարությունը գործադիր իշխանության հանրապետական մարմին է, որն իրականացնում է պաշտպանության բնագավառում Հայաստանի Հանրապետության կառավարության քաղաքականությունը: Պաշտոնապես հիմնադրվել է 1992թ. հունվարի 28-ին։

ՀՀ պաշտպանության նախարարը Սուրեն Պապիկյանն է։ Տեղակալներն են Արման Սարգսյանը և Կարեն Բրուտյանը։

Զինվորական հանցագործություններն ու զինված ուժերի մահվան դեպքերը. Դատախազության 2019-ի զեկույցը |hetq.am|

Զինվորական հանցագործություններն ու զինված ուժերի մահվան դեպքերը. Դատախազության 2019-ի զեկույցը |hetq.am|

hetq.am: 2019 թվականին զինվորական հանցագործությունները 2018-ի համեմատ նվազել են 171-ով կամ 23.5%-ով: Այս մասին տեղեկանում ենք Գլխավոր դատախազության գործունեության 2019 թվականի զեկույցից: Հայաստանի և Արցախի զինված ուժերում 2019-ի ընթացքում արձանագրվել է 49 զինծառայողի մահվան դեպք:     49 զինծառայողից 20-ի մահվան դեպքերը կապված են եղել զինվորական ծառայության հետ:    29 դեպք տեղի է ունեցել զինվորական ծառայության հետ չկապված հանգամանքներում:   Նախորդ տարի հայկական երկու պետությունների զինված ուժերում արձանագրվել էր 63 զինծառայողի մահվան դեպք: Ըստ դատախազության զեկույցի` 2019-ին արձանագրված 31 առանձնապես ծանր հանցագործություններ են որակվել հակառակորդի կողմից կատարված սպանությունները (4 դեպք), համածառայակցի կողմից կատարված սպանությունները (3 դեպք), անհայտ անձի կողմից կատարված սպանությունը (1 դեպք), հակառակորդի կողմից կատարված սպանության փորձը (18 դեպք), համածառայակցի կողմից կատարված սպանության փորձերը (4 դեպք),  ոստիկանի կողմից պայմանագրային զինծառայողի նկատմամբ խոշտանգումը (1 դեպք): 2019-ին ևս, ինչպես նախորդ տարիներին, զինվորական հանցագործությունների մեջ առավել տարածված են զինվորական ենթակայության կարգի և զինծառայողների կանոնագրքային փոխհարաբերությունների դեմ ուղղված (Քրեական օրենգսրքի 356-360-րդ հոդվածներ) հանցագործությունները, ինչպես նաև զինվորական ծառայություն կրելու կարգի դեմ ուղղված հանցագործությունները (361-364-րդ հոդվածներ): Այսպես՝ եթե 2018թ. ընթացքում արձանագրվել է Քրեական օրենսգրքի 356-360-րդ հոդվածներով նախատեսված հանցագործությունների 395 դեպք, իսկ 361-364-րդ հոդվածներով նախատեսված հանցագործությունների 194 դեպք, ապա 2019թ. դրանց թիվը համապատասխանաբար կազմել է 309 և 145: Շարունակությունը՝ hetq.am-ում
11:03 - 13 ապրիլի, 2020
ՀՀ պաշտպանության նախարարը և ՌԴ դեսպանը ծանոթացել են կորոնավիրուսի հետազոտման շարժական լաբորատորիայի աշխատանքներին

ՀՀ պաշտպանության նախարարը և ՌԴ դեսպանը ծանոթացել են կորոնավիրուսի հետազոտման շարժական լաբորատորիայի աշխատանքներին

ՀՀ պաշտպանության նախարար Դավիթ Տոնոյանը և ՀՀ-ում ՌԴ արտակարգ և լիազոր դեսպան Սերգեյ Կոպիրկինը ապրիլի 11-ին ծանոթացել են Երևանում բացազատված Covid-19 վարակի հետազոտման շարժական լաբորատորիայի աշխատանքներին: Այս մասին տեղեկացնում է ՊՆ տեղեկատվության և հասարակայնության հետ կապերի վարչությունը։Պաշտպանական գերատեսչության ղեկավարը զրուցել է շարժական լաբորատորիան սպասարկող անձնակազմի հետ, ծանոթացել առաջին նմուշառումների արդյունքներին, նախապես վարակազերծված լաբորատորիայում հետաքրքրվել դրա հնարավորություններով։Շարժական լաբորատորիան ՌԴ-ից Հայաստան է տեղափոխվել երկու պետությունների պաշտպանության նախարարների միջև ձեռք բերված պայմանավորվածության արդյունքում:Նոր կորոնավիրուսային վարակի տարածման կանխարգելման և հակահամաճարակային միջոցառումների կազմակերպմանն աջակցելու, ինչպես նաև հայ գործընկերներին այդ ոլորտում իրենց փորձն ու գիտելիքները փոխանցելու նպատակով Հայաստանում են նաև ՌԴ զինված ուժերի մասնագետները: ՀՀ ԶՈՒ ռազմաբժշկական վարչության սպաները ռուս գործընկերների հետ արդեն իրականացնում են լաբորատոր հետազոտություններ, անցկացնում վերապատրաստման պարապմունքներ, քննարկումներ ընթացիկ աշխատանքների կազմակերպման վերաբերյալ։Հայաստան տեղափոխված Covid-19 վարակի հետազոտման շարժական լաբորատորիան կարող է հետազոտություններ իրականացնել ցանկացած տեղանքում և եղանակային բարդ պայմաններում՝ ապահովելով իրականացվող ստուգումների 99% ճշգրտություն:
15:21 - 11 ապրիլի, 2020
Զինծառայողների եւ նրանց ընտանիքների անդամների համար ստեղծվեց «Լեռնային Հայաստան» հանգստայն տուն հիմնարկը |armtimes.com|

Զինծառայողների եւ նրանց ընտանիքների անդամների համար ստեղծվեց «Լեռնային Հայաստան» հանգստայն տուն հիմնարկը |armtimes.com|

armtimes.com: ՀՀ կառավարությունն այսօրվա նիստում որոշեց ստեղծել Պաշտպանության նախարարության «Լեռնային Հայաստան» հանգստյան տուն պետական հիմնարկը, որը գտնվում է Դիլիջան քաղաքում: Սահմանվեց, որ հանգստյան տան գործունեության նպատակն օրենքով սահմանված կարգով զինծառայողների եւ նրանց ընտանիքների անդամների, ինչպես նաեւ օրենքով սահմանված կարգով զինվորական կենսաթոշակի իրավունք ունեցող անձանց հանգստի, ֆիզիոթերապեւտիկ եւ վերականգնողական առողջարանային բուժման գործընթացի կազմակերպումն ապահովելն է. Այս որոշման ընդունման արդյունքում ՀՀ պետական բյուջեում ծախսերի եւ եկամուտների ավելացման կամ նվազեցման անհրաժեշտություն չի առաջանում, քանի որ նոր հաստիքներ չեն ստեղծվում, եւ հանգստյան տունը ձեւավորվում է ՀՀ ՊՆ գործող առողջարանի (զորամասի) բազայի վրա՝ զորամասի պահպանման ծախսերի ուղղությամբ ՀՀ պետական բյուջեով ՀՀ պաշտպանության նախարարությանը հատկացված միջոցների հաշվին:
13:43 - 09 ապրիլի, 2020
ՀՀ է ժամանել ՌԴ ԶՈՒ մասնագետների թիմը՝ COVID-19-ի հետազոտություններ կատարող շարժական լաբորատորիայով․ ՊՆ խոսնակ

ՀՀ է ժամանել ՌԴ ԶՈՒ մասնագետների թիմը՝ COVID-19-ի հետազոտություններ կատարող շարժական լաբորատորիայով․ ՊՆ խոսնակ

Հենց նոր ՀՀ է ժամանել ՌԴ զինված ուժերի մասնագետների թիմը: Այն համալրված է COVID-19 վարակի հետազոտություններ կատարելու հնարավորությամբ շարժական լաբորատորիայով և նմուշառման համակարգով։ Այս մասին ֆեյսբուքի իր էջում գրել է ՀՀ ՊՆ խոսնակ Շուշան Ստեփանյանը։ Նրա գրառումը ներկայացնում ենք ստորև․ «Հայաստանի Հանրապետության և Ռուսաստանի Դաշնության զինված ուժերի երկկողմ փոխհամագործակցության շրջանակներում, ՀՀ և ՌԴ պաշտպանության նախարարներ Դավիթ Տոնոյանի և Սերգեյ Շոյգուի միջև ձեռքբերված պայմանավորվածության համաձայն՝ նոր կորոնավիրուսային վարակի տարածման կանխարգելման և հակահամաճարակային միջոցառումների կազմակերպմանն աջակցման, ինչպես նաև փորձն ու պրակտիկ գիտելիքները փոխանցելու նպատակով հենց նոր Հայաստանի Հանրապետություն է ժամանել ՌԴ զինված ուժերի մասնագետների թիմը: Այն համալրված է COVID-19 վարակի հետազոտություններ կատարելու հնարավորությամբ շարժական լաբորատորիայով և նմուշառման համակարգով։ Պաշտպանության նախարարության տրամադրության տակ այդ համակարգերը հնարավորություն կընձեռեն իրականացնել ՀՀ զինված ուժերի և ՀՀ-ում տեղակայված ՌԴ 102-րդ ռազմաբազայի անձնակազմի հետազոտությունները: Թիրախային խմբերում իրականացվող հետազոտությունները մեծապես կնպաստեն կանխարգելիչ միջոցառումների կազմակերպմանն ու զգալիորեն կբարձրացնեն հակահամաճարակային միջոցառումների արդյունավետությունը: Մանրամասները տեսանյութով կներկայացնենք առաջիկա ժամերի ընթացքում»։
21:26 - 07 ապրիլի, 2020
Ժամկետային զինծառայողին մեղադրանք է առաջադրվել` մարտական հերթապահություն կրելու կանոնները խախտելու և նշված հանցանքը քողարկելու նպատակով ապօրինաբար ծառայակցին դիտավորությամբ կյանքից զրկելու համար

Ժամկետային զինծառայողին մեղադրանք է առաջադրվել` մարտական հերթապահություն կրելու կանոնները խախտելու և նշված հանցանքը քողարկելու նպատակով ապօրինաբար ծառայակցին դիտավորությամբ կյանքից զրկելու համար

Ժամկետային զինծառայող Գարեգին Բաբակեխյանի մահվան դեպքի առթիվ երկրորդ կայազորային քննչական բաժնում ՀՀ քրեական օրենսգրքի 360.1 հոդվածի 2-րդ մասի 3-րդ կետով հարուցված քրեական գործով՝ ժամկետային զինծառայող, շարքային Ա.Պ.-ին մեղադրանք է առաջադրվել` ՀՀ քրեական օրենսգրքի 365-րդ հոդվածի 1-ին մասով և 104-րդ հոդվածի 2-րդ մասի 11-րդ կետով նախատեսված հանցանքներ կատարելու համար: Վերջինիս նկատմամբ որպես խափանման միջոց է ընտրվել կալանավորումը: Քրեական գործով նախաքննությունը շարունակվում է: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
16:38 - 07 ապրիլի, 2020
Գաղտնիք եմ բացում. տեսել եմ ռազմարդյունաբերական համակարգի նմուշ, որը զրոյից հավաքվել է Հայաստանում․ վարչապետ |1lurer.am|

Գաղտնիք եմ բացում. տեսել եմ ռազմարդյունաբերական համակարգի նմուշ, որը զրոյից հավաքվել է Հայաստանում․ վարչապետ |1lurer.am|

1lurer.am: «Ես ուզում եմ ակնարկել ձեզ մի նորության մասին, որը գաղտնիք է։ Մի քանի օր առաջ ինձ ցուցադրվել է Հայաստանի ռազմարդյունաբերական համալիրի արտադրանքի մի նմուշ։ Այդ նմուշի գոյությունը Հայաստանի Հանրապետությունում վկայում է, որ Հայաստանում ռազմարդյունաբերական համալիրը նոր համակարգ է դուրս գալիս»,- ասաց վարչապետ Նիկոլ Փաշինյանը։ Նա քաղաքացիների հետ հարցուպատասխանի ժամանակ անդրադարձավ նաև այն հարցին, թե որ փուլում է գտնվում ռազմարդյունաբերական համալիրի կառուցումը, քանի որ նախընտրական շրջանում ասել էր, որ ստեղծվելու են ռազմարդյունաբերական գործարաններ, որտեղ արտադրվելու են զենքեր, բացվելու են աշխատատեղեր։ Փաշինյանն ընդգծեց, որ այդ նմուշը, ոչ միայն գերժամանակակից արտադրանք է, այլև կա առանձնահատկություն, զրոյից հավաքվել է Հայաստանում։ Փաշինյանը նաև նշեց, որ միայն այդ արտադրանքի գոյությունը վկայում է, որ Հայաստանում կան պրոֆեսիոնալներ, մասնագետներ, որոնք կարող են զրոյից ռազմական նշանակության արտադրանք թողարկել։  «Այդ տեսնելով՝ պայմանավորվածություն ձեռք բերեցինք, որ մենք պետական պատվեր կիջեցնենք այդ արտադրանքի համար, որպեսզի արտադրությունը նորմալ ընթացքով շարունակվի։ Պայմանավորվեցինք, որ ջանքեր կգործադրենք այդ արտադրանքով կամ մոդիֆիկացված տարբերակով միջազգային շուկա դուրս գալու ուղղությամբ»,- ասաց վարչապետը։
23:18 - 06 ապրիլի, 2020
Պաշտպանության բանակում շարունակվում են կորոնավիրուսի կանխարգելիչ միջոցառումները

Պաշտպանության բանակում շարունակվում են կորոնավիրուսի կանխարգելիչ միջոցառումները

Պաշտպանության բանակում նոր տիպի կորոնավիրուսի տարածման դեմ իրականացվող կանխարգելիչ հակամաճարակային միջոցառումները շարունակվում են՝ իրենց մեջ ընդգրկելով նաև տարբեր հասարակական կազմակերպությունների աջակցությունը: Այս մասին հայտնում են Պաշտպանության բանակից: Այդ համատեքստում ապրիլի 5-ին «Որոշում քաղաքացիական նախաձեռնություն» հասարակական կազմակերպության կողմից իրականացվող «Առողջ Արցախ» ծրագրի շրջանակում բանակի բուժծառայությանն են փոխանցվել ախտահանիչ մեքենայացված սարքավորումներ: Նույն օրը ՊԲ կենտրոնական զինվորական հոսպիտալում բանակի բուժծառայության և «Որոշում քաղաքացիական նախաձեռնություն» հասարակական կազմակերպության ներկայացուցիչների մասնակցությամբ փորձարկվել է սարքավորումների աշխատանքը, որի ընթացքում իրականացվել են կանխարգելիչ ախտահանիչ միջոցառումներ:
12:14 - 06 ապրիլի, 2020
ՀՀ ՊՆ պարզաբանումը լրատվամիջոցներում հրապարակված բաց նամակի կապակցությամբ

ՀՀ ՊՆ պարզաբանումը լրատվամիջոցներում հրապարակված բաց նամակի կապակցությամբ

Ապրիլի 3-ին մի շարք կայքեր հրապարակել են ՀՀ ԱՆ «Երևան-Կենտրոն» ՔԿՀ-ում կալանավորված, պահեստազորի գնդապետ Վահան Ավետիսյանի՝ զորատեսակների կիրառման առումով սահմանափակ կոմպետենտությամբ խիստ սուբյեկտիվ շեշտադրումներով բաց նամակը ՀՀ վարչապետ Նիկոլ Փաշինյանին։ ՀՀ պաշտպանության նախարարությունը, ելնելով ընթացող նախաքննությանը չվնասելու հանգամանքից, ինչպես նաև հաշվի առնելով նամակի կասկածելի ծագումը, նպատակահարմար չի համարում մեկնաբանել վերոնշյալը։ Բացի այդ, առկա են Վ․ Ավետիսյանի առողջական խնդիրները մատնանշող փաստաթղթային անհերքելի հիմնավորումներ, որոնք ՀՀ պաշտպանության նախարարությունը պատրաստ է հրապարկել նրա գրավոր համաձայնության դեպքում։ Համոզված ենք, որ կիրականացվի գործի բոլոր հանգամանքների համակողմանի, լրիվ և օբյեկտիվ քննություն։
16:29 - 04 ապրիլի, 2020
Զինծառայող Գ.Բաբակեխյանին դիտավորությամբ կյանքից զրկելու կասկածանքով ձերբակալվել է համածառայակիցը

Զինծառայող Գ.Բաբակեխյանին դիտավորությամբ կյանքից զրկելու կասկածանքով ձերբակալվել է համածառայակիցը

Զինծառայող Գ.Բաբակեխյանին դիտավորությամբ կյանքից զրկելու կասկածանքով ձերբակալվել է համածառայակիցը։ Ժամկետային զինծառայող Գարեգին Կամոյի Բաբակեխյանի մահվան դեպքի առթիվ երկրորդ կայազորային քննչական բաժնում ՀՀ քրեական օրենսգրքի 360.1 հոդվածի 2-րդ մասի 3-րդ կետով ՝ զինծառայողին անզգուշությամբ ինքնասպանության հասցնելու հանցագործության հատկանիշներով հարուցված քրեական գործով, ՀՀ ՊՆ ՌՈ աշխատակիցների հետ համատեղ ձեռնարկված քննչական և օպերատիվ- հետախուզական միջոցառումների արդյունքում 03.04.2020թ.՝ ժամը 22:25-ին, ՀՀ քրեական օրենսգրքի 365-րդ հոդվածի 1-ին մասով և ՀՀ քրեական օրենսգրքի 104-րդ հոդվածի 2-րդ մասի 11-րդ կետով հանցանքներ կատարելու՝ մարտական հերթապահություն կրելու կանոնները խախտելու և նշված հանցանքը քողարկելու նպատակով ապօրինաբար Գ.Բաբակեխյանին դիտավորությամբ կյանքից զրկելու կասկածանքով, ձերբակալվել է վերջինիս համածառայակիցը: Քրեական գործով նախաքննությունը շարունակվում է: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
14:19 - 04 ապրիլի, 2020