Ռուբեն Ռուբինյան

8-րդ գումարման Ազգային ժողովի «Քաղաքացիական պայմանագիր» խմբակցության պատգամավոր, ԱԺ փոխնախագահ։

Ծնվել է 1990թ. մարտի 8-ին Երեւանում:

2012-2014թթ. ծառայել է ՀՀ զինված ուժերում:

2010թ. ավարտել է Երեւանի պետական համալսարանի միջազգային հարաբերությունների ֆակուլտետը: 2011թ.՝ Լոնդոնի համալսարանական քոլեջը (UCL): «Քաղաքականություն եւ անվտանգություն» մասնագիտացման մագիստրոս է: 2012թ.՝ Լեհաստանի Յագելոնյան համալսարանը: Եվրոպագիտության մագիստրոս:

2017-2018թթ. զբաղվել է գիտական գործունեությամբ: 2018թ. մայիս-2019թ. հունվար եղել է ՀՀ ԱԳ նախարարի տեղակալ:

«Քաղաքացիական պայմանագիր» կուսակցության հիմնադիր անդամ է, 2015-2017թթ.՝ վարչության անդամ:

2019-2021թթ.՝ ԱԺ պատգամավոր («Իմ քայլը» կուսակցությունների դաշինք, համապետական ընտրական ցուցակ): ԱԺ արտաքին հարաբերությունների մշտական հանձնաժողովի նախագահ: «Իմ քայլը» խմբակցության անդամ:

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

2021թ. օգոստոսի 3-ին ընտրվել է Հայաստանի Հանրապետության Ազգային ժողովի նախագահի տեղակալ:

Ռուբինյանը ԵԽ գլխավոր քարտուղարի և ԵԽԽՎ նախագահի հետ քննարկել է Ադրբեջանում հայ ռազմագերիների հարցը

Եվրոպայի խորհրդի խորհրդարանական վեհաժողովում Հայաստանի պատվիրակության ղեկավար Ռուբեն Ռուբինյանը Եվրոպայի խորհրդի գլխավոր քարտուղար Մարիա Պեյչինովիչ-Բուրիչի և Եվրոպայի խորհրդի խորհրդարանական վեհաժողովի նախագահ Ռիկ Դայմսի հետ քննարկել է Ադրբեջանում պահվող հայ ռազմագերիների հարցը: Այս մասին Ռուբինյանը հայտնել է «Ֆեյսբուք»-ի իր էջում: «Այսօր Ստրասբուրգում հանդիպումներ եմ ունեցել ԵԽ գլխավոր քարտուղար Մարիա Պեյչինովիչ-Բուրիչի և ԵԽԽՎ նախագահ Ռիկ Դայմսի հետ։ Երկու պաշտոնյաներն էլ հավաստիացրել են, որ Ադրբեջանում հայ ռազմագերիների և այլ պահվող անձանց ճակատագրի հարցը, ինչպես նաև Ադրբեջանում հայատյացության դրսևորումները պահելու են իրենց ուշադրության կենտրոնում»,- գրել է Ռուբինյանը: Ռուբեն Ռուբինյանը նշել է, որ հանդիպումների ընթացքում խոսել են նաև ԵԽ և ԵԽԽՎ ներկայացուցիչների՝ Արցախ այցելության մասին։

16:20 - 26 հունվարի, 2021

ԵԽԽՎ Հայաստանի պատվիրակության ղեկավարը կոչ է արել դիրքորոշում ունենալ ոչ թե հանուն ՀՀ-ի կամ ԼՂ-ի, այլ հանուն մարդկության ու հումանիզմի |1lurer.am|

1lurer.am: ԵԽԽՎ Հայաստանի պատվիրակության ղեկավար Ռուբեն Ռուբինյանը, ելույթ ունենալով Ստրասբուրգում մեկնարկած ԵԽԽՎ ձմեռային նստաշրջանում, խոսել է այն մասին, որ ադրբեջանցի գործընկերը՝ Ադրբեջանի պատվիրակության ղեկավար Սեիդովը, փորձում էր իր ելույթը կառուցել այնպես, կարծես այլևս որևէ խնդիր չկա Հայաստանի ու Ադրբեջանի միջև, ինչպես նաև խոսում էր խաղաղությունից:Ռուբինյանն ի պատասխան նշել է, որ խաղաղությունից խոսելուց առաջ Սեիդովը թող հիշի, թե ինչ դրոշմանիշներ են հրապարակվում Ադրբեջանում, որոնք ամբողջությամբ կրկնօրինակում են այն երևույթը, ինչը կար նացիստական Գերմանիայում և ցույց են տալիս, թե ինչպես են էթնիկ զտման ենթարկում Արցախի բնակչությանը:Այնուհետև Ռուբինյանն անդրադարձել է ռազմագերիների թեմային: Նա նշել է, որ այդ հարցում Ադրբեջանն ապակառուցողական է, արհեստականորեն ձգձգում է խնդրի լուծումը:Ռուբինյանը հավելել է, որ ԵԽԽՎ-ում բոլոր պատվիրակները տարիներ շարունակ լսել են հայերից ու ադրբեջանցիներից իրար դեմ ուղղված ելույթներ և կարծես ինչ-որ առումով հոգնել են դրանք լսելուց, բայց իրենք պետք է հասկանան, թե ինչ կարևորություն ունի այս խնդիրը:Հայաստանի պատվիրակության ղեկավարը կոչ է արել դիրքորոշում ունենալ ոչ թե հանուն ՀՀ-ի կամ ԼՂ-ի, այլ հանուն մարդկության ու հումանիզմի, քանի որ մարդկային կյանքերի մասին է խոսքը:

22:13 - 25 հունվարի, 2021

Ռուսական կողմը պաշտպանում է Հայաստանի դիրքորոշումը գերիների հարցում. Ռուբեն Ռուբինյան

Հայաստանի, Ռուսաստանի և Ադրբեջանի ղեկավարների Մոսկվայում հունվարի 11-ին կայացած եռակողմ հանդիպման ժամանակ հայկական կողմը բարձրացրել է ռազմագերիների շուտափույթ փոխանակման հարցը։ Թեև կոնկրետ արդյունքի այս առումով հնարավոր չի եղել հասնել, հարցը շարունակում է մնալ հայկական կողմի կարևորագույն օրակարգային խնդիրը։ Ռուսական կողմը պաշտպանում է Հայաստանի դիրքորոշումն այս հարցում։ «Ֆեյսբուք»-ի իր էջում այս մասին գրառում է կատարել ՀՀ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը։ «Մոսկվայում այսօր ստորագրվեց հայտարարություն, համաձայն որի տարածաշրջանում բոլոր տնտեսական և տրանսպորտային կապերի ապաշրջափակման իրականացման նպատակով ստեղծվում է Հայաստանի, Ռուսաստանի և Ադրբեջանի փոխվարչապետների համատեղ նախագահությամբ եռակողմ աշխատանքային խումբ։ Ապաշրջափակումը բխում է Հայաստանի շահերից, քանի որ դրա իրականացման դեպքում կվերականգնվի նաև մեր երկաթուղային կապը Իրանի և Ռուսաստանի հետ, ինչը նոր տնտեսական հնարավորություններ կարող է ստեղծել մեզ համար։ Անհրաժեշտ է նաև ուշադրություն դարձնել այն հանգամանքին, որ այս հայտարարության մեջ Ադրբեջանի և Նախիջևանի միջև տրանսպորտային կապը որևէ կերպ առանձնացված չէ։ Այսինքն՝ այս հայտարարությամբ տարածաշրջանային բոլոր կոմունիկացիաների ապաշրջափակման օրակարգը հստակ ֆիքսվում է որպես մեկ ամբողջություն՝ մեկ համատեքստում։ Սա կարևոր դիվանագիտական հաջողություն է»,- ասվում է գրառման մեջ։ Հուսով եմ՝ սա նաև վերջ կդնի մեր քաղաքական դաշտում Սյունիքի կամ Մեղրիի վերաբերյալ տարածվող մանիպուլյացիաներին։ Եռակողմ հանդիպման ժամանակ հայկական կողմը բարձրացրել է ռազմագերիների շուտափույթ փոխանակման հարցը։ Թեև կոնկրետ արդյունքի այս առումով այսօր հնարավոր չի եղել հասնել, հարցը շարունակում է մնալ հայկական կողմի կարևորագույն օրակարգային խնդիրը։ Ռուսական կողմը պաշտպանում է Հայաստանի դիրքորոշումն այս հարցում։

22:17 - 11 հունվարի, 2021

Ռ․ Ռուբինյանին հրավիրում եմ իմ ընտրողների հետ հանդիպման, բայց մինչ այդ պետք է բացատրի պատգամավորների՝ իմ տուն ներխուժելն ու Արցախի հրապարակում հայտարարի՝ Արցախը Հայաստան է․ «Իմ քայլը» լքած պատգամավոր |tert.am|

tert.am: Եթե Ռուբեն Ռուբինյանին կհետաքրքրի ու ժամանակ կգտնի, կհրավիրեմ Էրեբունիում՝ Ազատամարտիկների այգում գտնվող Սուրբ Մեսրոպ Մաշտոց եկեղեցի՝ իմ ընտրողների հետ հանդիպելու, իրեն կբացատրեն՝ ինչու են ինձ ընտրել և ինչու են ողջունել իմ արած քայլը։ Այս մասին ասաց ԱԺ «Իմ քայլը» խմբակցությունը լքած պատգամավոր Վարդան Աթաբեկյանը՝ անդրադառնալով իշխանական պատգամավոր Ռուբեն Ռուբինյանի գրառմանը, որով վերջինս «Իմ քայլը» լքած, սակայն մանդատից չհրաժարված պատգամավորներին հորդորում էր բացատրել, թե նրանք ում և ինչ մանդատով են շարունակում լինել պատգամավոր՝ ոչ թե փաստաթղթային, այլ քաղաքական համատեքստում։ Սակայն, Աթաբեկյանի խոսքով, մինչև այդ պատվին արժանանալը՝ Ռուբինյանը երկու հարցի պետք է պատասխանի։ «Առաջին՝ «Իմ քայլը» խմբակցության 5 պատգամավորների ու մոտ 15 անձանց շատ վատ վարքը իմ տան հանդեպ, որոնք անթույլատրելի կերպով ներխուժել են իմ տուն։ Իրեն որպես լավ պատգամավոր հռչակած Ռուբեն Ռուբինյանը թող բարի լինի դրա բացատրությունը տա, թե ինչ վարքագիծ էր, ու դրան ինքն ինչ գնահատական է տալիս։ Եվ երկրորդ՝ թող իր հանձնաժողովի բոլոր անդամներին վերցնի, ես բոլոր ծախսերը կանեմ, կգնանք, կկանգնենք Արցախի հրապարակում, թող ինքը բարձր գոռա, որ Արցախը Հայաստան է, տեսնենք՝ մեր սկզբունքները փոխվե՞լ են, թե՞ ոչ։ Եթե ինքն այդ հարցերին կպատասխանի, այդ քայլերը կանի, դրանից հետո ես իրեն կհրավիրեմ իմ ընտրողների հետ հանդիպման, իրեն կբացատրեն, թե ես ինչ հիմքով եմ շարունակում պատգամավոր մնալ ու թե ում ձայների շնորհիվ եմ դարձել պատգամավոր»,-ասաց Աթաբեկյանը։ Դիտարկմանը, որ իրեն ու իշխանական խմբակցությունը լքած մյուս պատգամավորներին մեղադրանքներ են ուղղում առ այն, որ իրենք պատգամավոր են դարձել Նիկոլ Փաշինյանի անվան շնորհիվ, պատգամավորն արձագանքեց․ «Այո, Նիկոլ Փաշինյանի անունը կար, բայց ես, լինելով «Քաղաքացիական պայմանագիր» կուսակցության անդամ, իմ ներդրումն եմ ունեցել։ 2015-ից ես ՔՊ-ի հետ պայքարել եմ ու իմ արած ներդրման հիման վրա ձայն եմ ստացել ռեյտինգային ցուցակում, ոչ անցողիկ։ Պայքար է եղել թիմակիցների ներսում մեր և անծանոթ շատ մարդկանց միջև, որոնք հայտնվել են մեր ցուցակում, և իմ ընտրողների շնորհիվ ես դարձել եմ պատգամավոր։ Ես ՔՊ անդամ եմ, այդ պայքարին ես էլ եմ մասնակից եղել, այսինքն՝ իմ մասնաբաժինն էլ կար։ Թե այդ մասնաբաժինն ով ինչպես կկիսի, մի քիչ դժվար է ասել, ցանկությունների դաշտում չէ։ Այդպիսի հարցեր կարող են ուղղել այն պատգամավորներին, որոնք ՔՊ-ի հետ այդ դժվար փուլերը չեն անցել, որոնց չէինք ճանաչում, բայց հայտնվեցին անցողիկ ցուցակում։ Գոնե իմ հարցով պետք է մի քիչ զուսպ լինեն, որովհետև կարող է՝ ես էլ շատ բան ասեմ, իրենք մի քիչ նեղվեն»-ասաց նա։ Պատգամավորը վերահաստատեց՝ չի հրաժարվելու մանդատից և շարունակելու է իր գործունեությունը՝ որպես անկախ պատգամավոր։ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը գրառում էր կատարել Ֆեյսբուքի իր էջում, որում ասվում էր․ «Կարևորելով պատգամավորի՝ ընտրողների հանդեպ հաշվետու լինելու անհրաժեշտությունը, կարծում եմ՝ տվյալ անձինք, որոնք պատգամավորական մանդատ են ստացել «Իմ քայլը» դաշինքին քվեարկած քաղաքացիների քվեի հիմքով, պիտի առնվազն բացատրեն, թե ում և ինչ մանդատով են շարունակում լինել պատգամավոր՝ ոչ թե փաստաթղթային, այլ քաղաքական համատեքստում։ Ինքս զերծ եմ մնում նշյալ պատգամավորների քայլերի որակումներից՝ գնահատումը թողնելով «Իմ քայլը» դաշինքին քվե տված քաղաքացիներին։ Հ.Գ. Որպես գերակշիռ քաղաքական մեծամասնություն՝ «Իմ քայլը» խմբակցությունը շարունակելու է իրականացնել իրեն տրված մեկ միասնական մանդատը՝ որպես ժողովրդի իշխանության իրացման գործիք և պատվեր»։

12:38 - 09 հունվարի, 2021

Լավ կլիներ՝ Մնացականյանը հրաժարական տար, ոչ թե բուն փաստաթղթի բովանդակության, այլ այսպիսի բովանդակությամբ փաստաթղթի հնարավորությունը առհասարակ հնարավոր դարձնելու համար․ Արման Բաբաջանյան

ՀՀ ԱԺ պատգամավոր Արման Բաբաջանյանը ֆեյսբուքյան իր էջում գրում է․ «Անկախ նրանից, թե ինչպես եմ վերաբերվում նոյեմբերի 10-ին Հայաստանի, Ադրբեջանի և Ռուսաստանի առաջնորդների կողմից ստորագրված հայտարարությանը, այսօր մամուլից իմացա, որ կրակի դադարեցման վերաբերյալ ստորագրված փաստաթղթի բովանդակության մասին Հայաստանի ԱԳ նախարարը անտեղյակ է եղել։ Հույս ունեի, որ նախարարը օրվա մեջ կհերքի լուրը։ Առհասարակ կարծում եմ, որ անկախ նախարարի տեղյակ լինել չլինելուց լավ կլիներ, որ փաստաթղթի հանրայնացումից անմիջապես հետո վերջին երկուսուկես տարիներին Հայաստանի արտաքին քաղաքականության համար պատասխանատու Մնացականյանը հրաժարական տար, ոչ թե բուն փաստաթղթի բովանդակության, այլ պատերազմը առհասարակ որպես արցախյան կարգավորման հնարավորություն թույլ տալու, այդ ուղղությամբ բավարար կամ առհասարակ դիվանագիտական ջանք չգործադրելու, կատարած աշխատանքի կամ տոտալ անգործության պատճառով այսպիսի բովանդակությամբ փաստաթղթի հնարավորությունը առհասարակ հնարավոր դարձնելու համար։ Հրաժարական չի եղել, ինչը ենթադրել է տալիս, որ Մնացականյանը, թեև անտեղյակ է եղել ստորագրված հայտարարության բովանդակությանը, այնուամենայնիվ մասնակի կամ ամբողջությամբ համաձայն է դրա բովանդակության հետ։ Այսպիսով, Մնացականյանի հետ երկար խոսելու նյութ է կուտակվել։ Հայաստանի անմիջական հարևանների, աշխարհի շատ երկրների հետ հարաբերությունները, իրավիճակը, որում հայտնվեց Հայաստանը անմիջապես պատերազմի ժամանակ, վկայում է, որ ՀՀ արտաքին գործերի նախարարության ապարատի զգալի հատվածը, դիվանագիտական կորպուսի մեծ մասը՝ ի մասնավորի կարևորագույն երկրներում ամբողջ դեսպանատները, երկար ժամանակ՝ 2018-ից շատ առաջ և հետո, մատնված են եղել հանցավոր անգործության։Այս և շատ ուրիշ խնդիրների վերաբերյալ առաջացած հարցերի շուրջ խոսելու, քննարկելու կարիք կա։ Առաջարկում եմ, որպեսզի ԱԺ արտաքին հարաբերությունների հանձնաժողովի նախագահ Ռուբեն Ռուբինյանը հրավիրի հանձնաժողովի նիստ, հրավիրի նախարար Մնացականյանին՝ կուտակված բազմաթիվ հարցերի վերաբերյալ բացատրություն տալու․․․»։

17:47 - 14 նոյեմբերի, 2020

ԱԺ պատգամավորները ԵԽ գործընկերներին են ներկայացրել ԼՂ հակամարտության գոտում ստեղծված իրադրությունը

ՀՀ Ազգային Ժողովի ՀՀ-ԵՄ խորհրդարանական գործընկերության կոմիտեի նախագահ Արման Եղոյանը, կոմիտեի անդամներ Ռուբեն Ռուբինյանը, Արկադի Խաչատրյանը և Իվետա Տոնոյանը հոկտեմբերի 21-ին տեսակապով զրուցել են Եվրոպական խորհրդարանի՝ Հարավային Կովկասի հետ հարաբերությունների պատվիրակության ղեկավար Մարինա Կալյուրանդի և փոխնախագահներ Կոսմա Զլոտովսկիի և Ռասա Յուկնեվիչիենեի հետ։ Այս մասին տեղեկացրին ՀՀ ԱԺ եվրոպական ինտեգրման հարցերի մշտական հանձնաժողովից։ «Հայկական կողմի ներկայացուցիչներն իրենց եվրոպական գործընկերներին ներկայացրին Արցախի դեմ Ադրբեջանի և Թուրքիայի կողմից սանձազերծած լայնամասշտաբ պատերազմի հետևանքով ստեղծված իրադրությունն ու դրանից դուրս գալու ելքերը, մասնավորապես, որպես այդպիսին նշելով Արցախի սուբյեկտայնության ճանաչումը։ Պատգամավորներն անընդունելի և վտանգավոր համարեցին այս պատերազմի կողմերի միջև հավասարության նշան դնելն ու երկու կողմերին ուղղված նույնական կոչեր անելը»,- նշված է հաղորդագրության մեջ։

17:24 - 21 հոկտեմբերի, 2020

ԼՂ հակամարտության էության ընկալումները միջազգային գործընկերների մոտ փոխվել են. Ռուբեն Ռուբինյան

ՀՀ Ազգային ժողովի Արտաքին հարաբերությունների մշտական հանձնաժողովի նախագահ Ռուբեն Ռուբինյանը հեռախոսազրույց է ունեցել Եվրախորհրդարանի արտաքին հարաբերությունների հանձնաժողովի նախագահ Դեյվիդ ՄքԱլիսթերի և Լեհաստանի Սենատի համապատասխան հանձնաժողովի նախագահ, նախկին ՊՆ նախարար Բոգդան Կլիխի հետ։ Այս մասին Ռուբինյանը գրել է «Ֆեյսբուք»-ի իր էջում: «Վերահաստատում եմ զգացումս առ այն, որ ղարաբաղյան հակամարտության էության վերաբերյալ ընկալումները մեր միջազգային գործընկերների շրջանում փոխվել են, և դա լավ է։ Շարունակում եմ շփումները միջազգային գործընկերների հետ»,- գրել է Ռուբինյանը:

19:17 - 07 հոկտեմբերի, 2020

Մեր գոյության թիվ մեկ երաշխավորը կա եւ կմնա մեր կամքը, մեր բանակը․ Ռուբինյանը՝ ՀԱՊԿ-ին դիմելու մասին |armtimes.com|

armtimes.com: Այս պատերազմի 2-րդ, 3-րդ օրերից սկսած՝ միջազգային խաղացողների շրջանում Ղարաբաղի հակամարտության ընկալման վերաբերյալ մեզ ձեռնտու փոփոխություն եղավ։ Աշխարհն ընդունեց այն փաստը, որ Թուրքիան ներգրավված է հակամարտության, պատերազմի մեջ, ընդհուպ՝ ֆիզիկապես։ Այս մասին քիչ առաջ Ազգային ժողովում լրագրողների հետ զրույցում ասաց «Իմ քայլը» խմբակցության պատգամավոր Ռուբեն Ռուբինյանը։ Իր խոսքում նա նաեւ ընդգծեց տեռորսիտների ներգրավվածության փաստը, որի ընդունումը աշխարհի կողմից դիվանագիտական առումով մեզ համար դրական է եւ մեծ հնարավորությունների տեղ է բացում։ «Բայց ուզում եմ շեշտել, որ հիմա, անկախ դիվանագիտական հաջողություններից, ամենակարեւորը ռազմաճակատում եւ թիկունքում պինդ կանգնելն է, որովհետեւ մեր դիվանագիտությունը կարող է հաջողել միայն այն դեպքում, երբ մենք եւ մեր ԶՈՒ-ն պինդ կանգնած լինենք»,- ասաց պատգամավորը։ Խոսելով նաեւ դաշնակից պետությունների մասին, պատգամավորը վստահեցրեց, որ ԵԱՀԿ Մինսկի խմբի համանախագահները, առաջին հերթին՝ Ռուսաստանը, կկատարեն իրենց կարեւոր դերը այս տարածաշրջանում խաղաղություն ապահովելու համար։ Հարցին, թե այսօրվա անդորրը կարո՞ղ է կապված լինել այդ հայտարարությունների հետ, Ռուբինյանը պատասխանեց, որ դեռ շատ վաղ է հաստատել՝ անդո՞րր է, թե՝ ոչ։ «Պատերազմ է, թեժ է, այո, այս պահին հարաբերական անդորր է, բայց պետք է հասկանանք, որ սա պատերազմ է, հայրենական թեժ պատերազմ, որում մենք պիտի կանգնենք մինչեւ վերջ»,- հավելեց պատգամավորը։ Խոսելով ՀԱՊԿ-ին դիմելու մասին, Ռուբինյանը նախ եւ առաջ ընդգծեց, որ մեր շահերի, մեր գոյության թիվ մեկ երաշխավորը կա եւ կմնա մեր կամքը, մեր բանակը։ Իսկ եթե հարկ լինի դիմել ՀԱՊԿ-ին, ապա կդիմեն, առայժմ դրա անհրաժեշտությունը պատգամավորը չի տեսնում։ Կարդալ ավելին՝ armtimes.com-ում։

13:21 - 06 հոկտեմբերի, 2020

Անհնար է բանակցություններ վարել, երբ կողմերից մեկն անընդհատ սպառնում է ուժի կիրառմամբ. Ռուբինյան |armenpress.am|

armenpress.am: ՀՀ ազգային ժողվի արտաքին հարաբերությունների մշտական հանձնաժողովի նախագահ Ռուբեն Ռուբինյանը կարծում է, որ Արցախի հիմնախնդրի հարցով անհնար է առարկայական բանակցություններ վարել այնպիսի պայմայններում, երբ մի կողմը՝ Ադրբեջանը, անընդհատ սպառնում է ուժի կիրառմամբ և նախապայմաններ է դնում: Ռուբինյանը նման տեսակետ հայտնեց ԱԺ-ում լրագրողների հետ զրույցում՝ անդրադառնալով Ադրբեջանի նախագահի վերջին ապակառուցողական հայտարարության վերաբերյալ հարցին: «Վերջերս Հայաստանի ղեկավարությունը՝ ի դեմս արտգործնախարարի, մեր դիրքորոշումները հստակ ներկայացրել է: Մենք չենք ապակառուցողական կողմը: Մենք մշտապես հանդես ենք եկել կառուցողական դիրքորոշումներով և հայտարարություններով՝ միտված խաղաղ գործընթացի ամրապնդմանը: Եվ, կարծում եմ, առավել քան ակնհայտ է, թե որ կողմն է կիրառում ռազմատենչ լեզու, որ կողմն է հարձակվում մյուս կողմի վրա և որ կողմն է փորձում տապալել բանակցային գործընթացը»,- ասաց Ռուբինյանը: Ռուբինյանի խոսքով՝ ադրբեջանական կողմի ներկայացուցիչներն անում են կատեգորիկ հայտարարություններ խաղաղ գործընթացի վերաբերյալ: «Եվ մեր դիրքորոշումը շատ տրամաբանական է: Անհնար է նստել, առարկայական բանակցություններ վարել այնպիսի պայմաններում, երբ կողմերից մեկը նախ անընդհատ սպառնում է ուժի կիրառմամբ և նախապես պայմաններ է դնում: Օրինակ՝ Ադրբեջանի ղեկավարությունը հայտարարում է, թե հակամարտության հանգուցալուծումը հնարավոր է միայն Ադրբեջանի տարածքային ամբողջականության շրջանակներում»,- ասաց Ռուբինյանն ու հավելեց՝ դա ապակառուցողական, կատեգորիկ հայտարարություն է, որն անհնար է դարձնում առարկայական քննարկումները: Անրադառնալով ՀՀ վարչապետ Նիկոլ Փաշինյանի առաջ քաշած բանաձևին, որ լուծումը պետք է ընդունելի լինի Հայաստան, Արցախի և Ադրբեջանի ժողովուրդների համար՝ Ռուբինյանն ասաց՝ հայտնի է, որ աշխարհում ցանկացած հակամարտություն, որ պետք է լուծվի, պետք է լուծվի բոլոր կողմերի ժողովուրդների համաձայնությամբ: «Եթե ժողովուրդներից մեկը համաձայն չէ, այդ հակամարտությունն առնվազն տևական լուծում չի ունենալու: Կա երկու տարբերակ. կամ այս հակամարտությունը կլուծվի Հայաստանի, Արցախի և Ադրբեջանի ժողովուրդների համար ընդունելի տարբերակով, կամ այս հակամարտությունը չի լուծվի»,- ասաց նա: Ադրբեջանի նախագահ Իլհամ Ալիևը օրերս կրկին իրականությունից կտրված հայտարարություն էր արել՝ նշելով, թե իբր Հայաստանի ղեկավարությունը լուրջ հարված է հասցրել բանակցային գործընթացին, և որ իրենք հրաժարվում են բանակցություններից:

15:32 - 22 սեպտեմբերի, 2020

Չեմ կարծում, որ կհաջողվի հանրային մոբիլիզացիա ապահովել. Ռուբինյանը՝ սպասվող հանրահավաքի մասին |armtimes.com|

armtimes.com: Մեծ հաշվով ոչ մի գնահատական չունեմ: Ուզում են հանրահավաք անել՝ թող անեն: Չեմ կարծում, որ կհաջողվի հանրային մոբիլիզացիա ապահովել: Այսօր լրագրողների հետ ճեպազրույցում նման տեսակետ հայտնեց ԱԺ Արտաքին հարաբերությունների մշտական հանձնաժողովի նախագահ, «Իմ քայլը» խմբակցության պատգամավոր Ռուբեն Ռուբինյանը՝ անդրադառնալով ԲՀԿ, ՀՅԴ և «Հայրենիք» կուսակցությունների՝ հոկտեմբերի 8-ին հանրահավաք կազմակերպելու հայտարարությանը: Ռուբինյանի կարծիքով՝ հանրային մոբիլիզացիա չի ապահովվի 2 պատճառով: «Առաջինը. չեմ կարծում, որ բոլոր խնդիրներով հանդերձ, այդ թվում՝ կորոնավիրուսի համավարակի հետ կապված, հանրության շրջանում մեծ դժգոհություն կա: Երկրորդ. նույնիսկ եթե այդպիսի դժգոհություն լիներ հիպոթետիկ, ձեր նշած ուժե՞րն էին, որ պետք է որևէ մեկին մոբիլիզացնեին: Ընդհանուր առմամբ կարծում եմ՝ այդ երեք ուժերը չեն կարող և երբևիցե չեն կարողանալու Հայաստանում որևէ լայն աջակցություն մոբիլիզացնել, և դրա պատճառները նրանք կարող են փնտրել իրենց անցյալում, ներկայում և այլ տեղերում»: Ռուբինյանն ընդգծեց նաև՝ «Հայրենիք» կուսակցության ամբողջ պատմությունը խարսխված է մի դրվագի վրա: «Կար ԱԱԾ տնօրեն, որը հեռացվեց աշխատանքից և որը հետագայում նեղսրտած ստեղծեց կուսակցություն և հետագայում սկսեց խոսել այս կամ այն ուժերի հետ համագործակցության մասին: Կարդալ ավելին՝ armtimes.com-ում։

14:26 - 22 սեպտեմբերի, 2020

Երբ հայտարարում էինք, թե չենք ուզում մեր սիրելի դատավորներով ՍԴ, կատակ չէինք անում. Ռուբինյան |armenpress.am|

armenpress.am: Ազգային ժողովի «Իմ քայլը» խմբակցության պատգամավոր Ռուբեն Ռուբինյանը վստահեցնում է՝ իշխանությունը տարեսկզբին կատակ չէր անում, երբ հայտարարում էր, որ չի ուզում իր սիրելի դատավորներով Սահմանադրական դատարան: Ռուբինյանն այս մասին հայտնեց ԱԺ նիստում ՍԴ դատավորի պաշտոնում Երվանդ Խունդկարյանի թեկնածության քննարկմանը՝ մասնավորապես անդրադառնալով անկախ պատգամավոր Արման Բաբաջանյանի ելույթին: Ռուբինյանը նախ նշեց՝ իր տպավորությամբ քննարկում են ոչ թե թեկնածուին, այլ դատական համակարգի փոոփոխությունների փիլիսոփայությունը: Պատգամավորի դիտարկմամբ՝ ԱԺ-ում կա երեք փիլիսոփայություն: Նրա կարծիքով՝ առաջին փիլիսոփայությունը, որը ըստ իրեն, կրում են «Լուսավոր Հայաստան» և «Բարգավաճ Հայաստան» խմբակցությունները, ոչինչ չանելն է: «Երկրորդ փիլիսոփայությունը, որը կրում է Արման Բաբաջանյանը և դահլիճից դուրս այլ գործիչներ, անելն է այնպես, որ նոր ՍԴ-ն կամ նոր դատական համակարգը լինի մեր սիրելին: Ես վստահ եմ, որ եթե այսօրվա թեկնածուների և, մասնավորապես, Երվանդ Խունդկարյանի փոխարեն լիներ մեզ կամ Ձեզ պարոն Բաբաջանյան, հաճելի քաղաքական հայացքներով անձ, դուք ուրախ կլինեիք: Բայց խնդիրը հետևյալն է՝ երբ մենք այս տարվա սկզբին հայտարարում էինք, որ չենք ուզում խամաճիկային Սահմանադրական դատարան, մեր սիրելի դատավորներով ՍԴ, մենք կատակ չէինք անում: Նոր ՍԴ ունենալն արդեն մեզ հաճելի քաղաքականացված անձանցով, նույնն է, ինչ նախկինում էր՝ ուղղակի հակառակ ուղղությամբ»,- ասաց Ռուբինյանը: Նա շեշտեց՝ թավշյա հեղափոխության ամենակարևոր արժեքներից մեկը համերաշխությունն էր և բոլորին հեղափոխության արդյունքում ստեղծված հնարավորություններով նոր Հայաստանի կառուցմանը մասնակցելու հնարավորություն տալը: Անկախ պատգամավոր Արման Բաբաջանյանը կտրականապես դեմ էր արտահայտվել Խունդկարյանի թեկնածությանը: Պատգամավորը, մասնավորապես անդրադառնալով Ա1+ հեռուսատընկերության փակման գործին, կարծիք էր հայտնել, թե Խունդկարյանը, նախորդ իշխանության թելադրանքով, վճիռներ կայացնելով, անձամբ մասնակից ու հանցակից է դարձել պետության բռնազավթման գործին: «Ընտրելով Խունդկարյանին՝ մենք գործնականում ՍԴ ենք վերադարձնում նրանց, ում մերժել ենք առաջին օրից»,- նշել էր նա ու միևնույն ժամանակ վստահություն հայտնել, որ իշխանական խմբակցությունը հեղափոխության հաղթանակն անշրջելի դարձնելու համար է խորհրդարանում, և իրենք այդ գործում դաշնակիցներ են:

14:13 - 14 սեպտեմբերի, 2020

Հուլիսյան դեպքերը ցույց տվեցին, որ մենք ճիշտ ենք գնահատել միջազգային իրադրությունը․ Ռուբեն Ռուբինյան |armenpress.am|

armenpress.am: ՀՀ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանի պնդմամբ 2020 թվականի հուլիսյան մարտերը ցույց են տվել՝ ՀՀ-ի հռչակած արժեքներն անցան թեստը։ Այս մասին Ռուբինյանն ասաց Ազգային անվտանգության ռազմավարության նվիրված հանրային քննարկման ժամանակ։ «Այս ռազմավարությունն իր մեջ պարունակում է այն դիրքորոշումներն ու արժեքները, որոնք մենք արտահայտել ենք առնվազն վերջին 2 տարում։ Ռազնավարության մեջ կա անդրադարձ Թուրքիայի ապակառուցողական դերին և Հայաստանի համար այդ երկրի վտանգին, ինչպես նաև Ադրբեջանի՝ համար 1 սպառնալիքը լինելուն։ Այնտեղ անդրադարձ կա նաև մեր արժեքային կոմպոնենտներին, այսինքն՝ ինքնիշխանությանը, համահայկականությանը»,- նշեց Ռուբինյանը։ Նրա խոսքով՝ 2020 թվականի հուլիսյան մարտերի ժամանակ բոլոր այս վտանգները, շահերը, համատեքստերն արտահայտվեցին։ «Հուլիսյան հաղթական մարտերը ցույց տվեցին, որ մեր հռչակած արժեքները, առաջնահերթությունները անցան այդ թեստը և պարզվեց, որ պրակտիկ առումով սա է ճիշտ ճանապարհը։ Հուլիսյան այս դեպքերը ցույց տվեցին, որ հնարավոր է միաժամանակ կառուցել ժողովրդավարություն, հզորացնել բանակը, գիտակցել սեփական ինքնիշխանությունը։ Վերջինը կարող ենք ներդնել մեր շահերը պաշտպանելու գործում»,- ասաց Ռուբեն Ռուբինյանը։ ԱԺ արտաքին հարաբերությունների մշտական հանձնաժողովի նախագահը նշեց, որ Տավուշի մարզում՝ հայ-ադրբեջանական սահմանին տեղի ունեցած դեպքերը ցույց տվեցին, որ Հայաստանը ճիշտ է գնահատել միջազգային իրադրությունը։ Նրա խոսքով՝ Հայաստանը շանս ունի նոր մակարդակի բարձրանալ տարածաշրջանային քաղաքական առումով և ըստ Ռուբինյանի՝ վերջին օրերին դրա նախադրյալներն առավել քան ակնհայտ էին։

15:17 - 25 հուլիսի, 2020

Ռուբինյանը Բելառուսի իր գործընկերոջը ներկայացրել է Ադրբեջանի իրագործած սադրանքները

ՀՀ Ազգային ժողովի արտաքին հարաբերությունների հանձնաժողովի նախագահ Ռուբեն Ռուբինյանը Բելառուսի ԱԺ ժողովի ներկայացուցիչների պալատի Միջազգային գործերով հանձնաժողովի նախագահ Անդրեյ Սավինիխին ներկայացրել է վերջին օրերի իրադարձությունները՝ կապված ադրբեջանական սադրանքների հետ: Այս մասին Ռուբինյանը գրել է «Ֆեյսբուք»-ի իր էջում: «Տեսակապով զրուցեցի Բելառուսի Հանրապետության Ազգային ժողովի ներկայացուցիչների պալատի Միջազգային գործերով հանձնաժողովի նախագահ Անդրեյ Սավինիխի հետ։ Գործընկերոջս ներկայացրեցի վերջին օրերի իրադարձությունները՝ կապված ադրբեջանական սադրանքների հետ»,- գրել է Ռուբինյանը: ԱԺ Արտաքին հարաբերությունների հանձնաժողովի նախագահը նշել է, որ քննարկել են նաև միջխորհրդարանական համագործակցության խորացման հնարավորությունները:

17:48 - 15 հուլիսի, 2020

Այդ մենք ենք կոչ անում Թուրքիային սթափվել և սթափեցնել իրենց ադրբեջանցի գործընկերներին ․ Ռուբեն Ռուբինյան |tert.am|

tert.am: Աշխարհում շարունակվում է տարածվել կորոնավիրուսի համաճարակը և այս պայմաններում, երբ կարծես ամբողջ աշխարհը և պետությունները պետք է միավորված պայքարեին համաճարակի դեմ, երեկ Ադրբեջանը սարդանքի է դիմել հայասատանաադրբեջանական սահմանին և նրանց ագրեսիվ գործողությունները շարունակվում են նաև այսօր: Այս մասին ԱԺ-ի իր ելույթում հայտարարեց Արտաքին հարաբերությունների մշտական հանձնաժողովի նախագահ Ռուբեն Ռուբինյանը:Նա ընդգծեց, որ սա ևս մեկ անգամ ի ցույց է դնում Ադրբեջանի հետադիմական և ռազմատենչ էությունը: «Ադրբեջանի գործողություններին մեր համապատասխան գերատեսչությունների կողմից պարզ և սպառիչ գնահատական է տրվել: Ես հիմա ուզում եմ խոսել Թուրքիայի արձագանքի մասին։ Թուրքիայի ԱԳՆ-ն հայտարարոթյուն է տարածել, որով իր անվերապահ աջակցությունն է հայտնել Ադրբեջանին և, ըստ էության, պաշտպանել է Ադրբեջանի ագրեսիվ գործողությունները Հայաստանի սահմանին։ Սա նշանակում է, որ Թուրքիան իրեն ներկայացնում է որպես ղարաբաղյան հակամարտության կողմ և ևս մեկ անգամ վերահաստատում է այն հանգամանքը, որ Թուրքիան չի կարող որևիցե միջազգային դերակատարում ունենալ, որը կառնչվի ղարաբաղյան համակարտությանը:Ավելին, ըստ թուքրական մամուլում շրջանառվող հարցազրույցի, թուրքիայի ԱԳ նախարարը Հայաստանին կոչ է արել սթափվել», - ասաց Ռուբինյանը։«Ես ուզում եմ ասել՝ այդ մենք ենք կոչ անում Թուրքիայի իշխանություններին սթափվել, ապա սթափեցնել իրենց ադրբեջանցի գործընկերներին։ Եթե վերջիններս չսթափվեն և չդադարեն սահմանին ապօրինի գործողությունները, նրանց կսթափեցնեն մեր զինված ուժերը, իսկ սթափեցնելը մեր ԶՈւ-երի մոտ, ինչպես ցույց տվեցին երեկվա և այսօրվա գործողությունները, ստացվում են շատ լավ»։

18:01 - 13 հուլիսի, 2020

Եվրոպայի խորհրդի գլխավոր քարտուղարը սահմանադրական ճգնաժամի լուծման հարցում ՀՀ իշխանություններին աջակցող հայտարարություն է տարածել․ Ռուբեն Ռուբինյան

ՀՀ ԱԺ «Իմ քայլը» խմբակցության պատգամավոր Ռուբեն Ռուբինյանը ֆեյսբուքյան իր էջում գրում է․ «Քիչ առաջ Եվրոպայի խորհրդի գլխավոր քարտուղար տիկին Մարիա Պեյչինովիչ-Բուրիչը սահմանադրական ճգնաժամի լուծման հարցում ՀՀ իշխանություններին աջակցող հայտարարություն է տարածել, որը ներկայացնում եմ ամբողջությամբ։ «Հայաստանում սահմանադրական ճգնաժամը հնարավոր է հաղթահարել Վենետիկի հանձնաժողովի խորհրդատվությամբ» «Հունիսի 19-ին հաստատված և այսօր հրապարակված Վենետիկի հանձնաժողովի կարծիքը հնարավոր է դարձնում լուծել Ազգային ժողովի և Սահմանադրական դատարանի միջև առկա սահմանադրական ճգնաժամի կենտոնական խնդիրները»,- ասել է ԵԽ Գլխավոր քարտուղար տիկին Մարիա Պեյչինովիչ Բուրիչը։ «Այս կարծիքում Վենետիկի հանձնաժողովը հստակեցրել է Սահմանադրության փոփոխությունների գործընթացում Սահմանադրական դատարանի վերանայման շրջանակը, ինչպես նաև ընդունել է իր կողմից հանրաքվե նախաձեռնելու մասին որոշումը չեղարկելու Ազգային ժողովի իրավասությունը։ Ավելին, նկատի ունենալով գործող նորմերի ազդեցությունը Սահմանադրական դատարանի կազմի վրա, Վենետիկի հանձնաժողովն ընդունել է, որ 2015 թվականի Սահմանադրության համապատասխան դրույթների ամբողջական իրագործումը լեգիտիմ նպատակ է հետապնդում։ Եվ որպեսզի այս նպատակը համադրվի դատավորների պաշտոնավարման ժամկետի և անկախության պահպանման անհրաժեշտության հետ, Վենետիկի հանձնաժողովն առաջարկել է, որ այն դատավորները, ում 12-ամյա պաշտոնավարման ժամկետը դեռ չի լրացել, շարունակեն պաշտոնավարել մինչ այդ ժամկետը, իսկ այն դատավորները, ովքեր արդեն իսկ 12 տարի պաշտոնավարել են, մինչև փոխարինվելը, պետք է կարողանան օգտվեն նոր անցումային ժամանակից, որի տևողությունը պետք է որոշեն հայկական իշխանությունները։ Վենետիկի հանձնաժողովը ստիպված է եղել ափսոսանք հայտնելու, որ իր կարծիքի հաստատման օրը պատգամավորների կողմից շրջանառության մեջ դրված նախագիծը չի նախատեսում նման անցումային ժամկետ։ Ես կոչ եմ անում իշխանության բոլոր ճյուղերին սահմանադրական ճգնաժամը հաղթահարելու համար ուղղորդվել Վենետիկի հանձնաժողովի առաջարկություններով՝ եվրոպական ստանդարտներին համապատասխան սահուն կյանքի կոչելով 2015 թվականի Սահմանադրության համապատասխան դրույթները»,- եզրափակել է Գլխավոր քարտուղարը»։

13:32 - 22 հունիսի, 2020

Ով առնչվում է այս կամ այն քրեական գործին, հանկարծ արթնանում է և սկսում փրկել ժողովրդին ու Արցախը․ Ռուբինյան |lragir.am|

lragir.am: Հարցազրույց ԱԺ «Իմ քայլը» խմբակցության պատգամավոր, արտաքին հարցերի մշտական հանձնաժողովի նախագահ Ռուբեն Ռուբինյանի հետ։ Պարոն Ռուբինյան, ԱԺ երկրորդ քաղաքական ուժի առաջնորդը պահանջում է կառավարության հրաժարականը 100 տոկոսով: Նրանց պատգամավորները նշում են նաև Նիկոլ Փաշինյանի գլխավորությամբ հրաժարականի մասին: Դուք ինչպես եք գնահատում այս հայտարարությունը: Հայստանում և ամբողջ աշխարհում կորոնավիրուսի ճգնաժամ է, և այդ պայմաններում, երբ կառավարությունը և հանրության գիտակից շատ ներկայացուցիչներ կենտրոնացած են համավարակի դեմ պայքարում, տարբեր ուժեր, և դրանց շարքը համալրեց նաև Ծառուկյանը, կարծել են, որ հարմար ժամանակ է փորձել քաղաքական ինչ-որ գործողություններ ծավալելու: Սա, կարծում եմ, ամոթալի իրողություն է։ Փառք Աստծո, որ վարչապետն առողջացավ, և որոշակի հույս է նշմարվում, որ համաճարակի տարածման տեմպերը փոքրանում են, բայց, միևնույն է, մենք համաճարակի դեմ պատերազմի մեջ ենք, և նրանց արածը այն ամենապետականամետ քայլը չէ, որ կարելի էր անել: Բացի այդ, արդեն ակնհայտ է դառնում, որ նրանց այդ քայլի մոտիվներից մեկն այն է, որ կան մի շարք քրեական գործեր, որոնցով պարոն Ծառուկյանը, ըստ էության, անհանգստացած է: Եթե նկատեցիք, պարոն Ծառուկյանը նաև Արցախի հարցի մասին էր խոսում և իր անհանգստությունը հայտնում, և սա շատ գեղեցիկ կերպով տեղավորվում է ՀՀ քաղաքական դաշտում արդեն ավանդույթ դարձած մի կոնտեքստի հետ, որ ով այս կամ այն կերպ առնչվում է այս կամ այն քրեական գործին, հանկարծ արթնանում է և սկսում է Արցախի հարցի վերաբերյալ գույժեր հայտնել և փորձում է փրկել ժողովրդին ու Արցախը: Սա շատ պարզ իրավիճակ է, բայց միաժամանակ ամոթալի իրավիճակ է: Այս պահի դրությամբ կառավարությունն ու իշխող մեծամասնությունը ունեն մեկ առաջնահերթություն, դա հակահամաճարակային պայքարն է և քարոզելը, համոզելը, խնդրելը, տեղ-տեղ ստիպելը, որ քաղաքացիները պահպանեն երեք պարզագույն կանոնները՝ դիմակ կրել, հաճախակի ախտահանել ձեռքերը, չդիպչել դեմքին և պահպանել սոցիալական հեռավորություն: ԲՀԿ-ականները հայտարարում են, թե ինչո՞ւ են իշխանության ներկայացուցիչներն այսքան ծանր տանում Գագիկ Ծառուկյանի ասածը, երբ ինքը 1,5 տարի առաջ ասում էր 97 տոկոսով կառավարությունը պետք է փոխվի, այդ ժամանակ «Իմ քայլի» ներկայացուցիչները դա ծանր չէին տանում և չէին արձագանքում: Նախ, իշխանության ներկայացուցիչները ծանր չեն տանում, և չեմ կարծում, թե պարոն Ծառուկյանն այնպիսի գործիչ է, ում ասածները պետք է ծանր տանել: Բայց կրկնում եմ, կա մի համատեքստ: Հիշենք, թե այդ հայտարարությունը երբ է արվել, երբ Հայաստանում համաճարակի աճի տեմպերը շատ բարձր էին, երբ շատ կարևոր պահ էր, երբ վարչապետը վարակված էր և մեկուսացած: Եվ այդ պայմաններում, երբ գլխավոր խնդիրը հակահամաճարակային պատերազմն է, հանկարծ մի շարք ուժեր, շատ հայտնի ուժեր սկսում են բարձրացնել կառավարության և վարչապետի հրաժարականի հարց: Չեմ կարծում, որ ՀՀ քաղաքացիները այս պահվածքը կհամարեն պատասխանատու պահվածք, և ես վստահ եմ, որ համաճարակի հաղթահարումից հետո քաղաքական գնահատականներ կհնչեն այս անձանց և շրջանակների գործունեության վերաբերյալ:Ավելին՝ lragir.am-ում։

22:15 - 11 հունիսի, 2020