Հայաստան

Ռուսական կողմի հետ քննարկվում են դեկտեմբերին հետաձգված հանդիպման անցկացման հստակ ժամկետները եւ մանրամասները. ՀՀ ԱԳՆ |news.am|

news.am: Ռուսական կողմի հետ քննարկվում են դեկտեմբերին հետաձգված Հայաստանի, Ռուսաստանի եւ Ադրբեջանի արտաքին գործերի նախարարների հանդիպման անցկացման հստակ ժամկետները եւ հանդիպման մանրամասները: Այս մասին NEWS.am-ի գրավոր հարցմանն ի պատասխան հայտնել են ՀՀ ԱԳՆ-ից: Նշենք, որ մենք հետաքրքրվել էինք՝ արդյո՞ք ՀՀ արտաքին գործերի նախարար Արարատ Միրզոյանի եւ Ադրբեջանի արտաքին գործերի նախարար Ջեյհուն Բայրամովի միջեւ հանդիպում սպասվում է: «Խնդրի շուրջ հստակության պարագայում հանրությունը, ինչպես եւ նախկինում, պատշաճ կերպով կտեղեկացվի»,- նշել են ԱԳՆ-ից: Հիշեցնենք, որ հայկական կողմը առաջարկել էր հետաձգել Մոսկվայում դեկտեմբերի 23-ին նախատեսված Հայաստանի, Ռուսաստանի եւ Ադրբեջանի արտաքին գործերի նախարարների հանդիպումը: Ըստ գերատեսչության՝ այդ շրջանում ՀՀ ԱԳ նախարարի առաջնահերթությունը փակ պահվող Լաչինի միջանցքի անխոչընդոտ վերագործարկման եւ Լեռնային Ղարաբաղում հումանիտար ճգնաժամի արդյունքում ստեղծված խնդիրների հասցեագրումն էր:

17:37 - 26 ապրիլի, 2023

Համաճարակի ժամանակ երկրների միջև փոխօգնություն կլինի. ՀՀ-ն ԱՊՀ համաձայնագրին միացել է հատուկ կարծիքով

ՀՀ ԱԺ առողջապահության հարցերի մշտական հանձնաժողովի հերթական նիստին քննարկման է ներկայացվել «Հանրային առողջապահության ոլորտում սանիտարահամաճարակաբանական բնույթի արտակարգ իրավիճակների կանխարգելման և արձագանքման նպատակով Անկախ Պետությունների Համագործակցությանը մասնակից պետությունների համագործակցության մասին» համաձայնագիրը: Ըստ ԱՆ փոխնախարար Լենա Նանուշյանի՝ համաձայնագիրն ուղղված է ԱՊՀ մասնակից երկրների միջև համագործակցության ուժեղացմանն այն դեպքերում, երբ պետություններն առանձին-առանձին չեն կարողանում կանխարգելել հիվանդությունների հետագա տարածումը: Համաձայնագրով առաջարկվող փոխօգնությունը կկազմակերպվի համաճարակաբանական մասնագիտացված խմբերի միջոցով: «Համաձայնագիրը Հայաստանի Հանրապետության կողմից ստորագրվել է հատուկ կարծիքով, իսկ Ադրբեջանի Հանրապետության կողմից՝ վերապահումով: Միաժամանակ կարծում ենք, որ այս փաստաթուղթը կտա հնարավորություն՝ մասնակից պետությունների հետ ավելի ընդլայնելու և խորացնելու համագործակցությունը հետագա արտակարգ իրավիճակների դեպքում»,- նշեց Նանուշյանը՝ հավելելով, որ համաձայնագիրն անցած տարի է ստորագրվել Աստանայում: Պաշտոնյան նաև պարզաբանեց, որ Ադրբեջանի վերապահման մեջ նշվում է, թե սույն համաձայնագրի դրույթներն Ադրբեջանի Հանրապետության կողմից չեն կիրառվելու ՀՀ-ի նկատմամբ մինչև հակամարտության հետևանքների ամբողջական վերացումը: Իսկ հայկական կողմի հատուկ կարծիքում նշվում է, որ վերոնշյալ դրույթները չեն կիրառվելու Ադրբեջանի նկատմամբ, քանի դեռ չեն իրականացվել 2020-ի նոյեմբերի 9-ի համաձայնագրի պահանջները՝ ըստ ՄԱԿ-ի կանոնների: ԱԺ «Քաղաքացիական պայմանագիր» խմբակցության պատգամավոր Լուսինե Բադալյանը նկատեց, որ թեև կորոնավիրուսի ընթացքում տարբեր երկրների միջև փոխօգնություն եղել է, սակայն այս համաձայնագրով հնարավորություն կտրվի երկրների միջև փոխգործակցության շրջանակն ընդլայնել, գործընթացը կլինի առավել կանոնակարգված, և բոլորը կիմանան իրենց պարտականություններն և իրավունքները:

13:35 - 26 ապրիլի, 2023

Հայաստանը ֆանտաստիկ աշխատանք է տարել․ Եվրոպայի ծանրամարտի ֆեդերացիայի նախագահը՝ երևանյան առաջնության մասին |armenpress.am|

armenpress.am: Եվրոպայի ծանրամարտի ֆեդերացիայի (EWF) նախագահ Անտոնիո Կոնֆլիտին վստահ է` Հայաստանը կարող է նորից ընդունել Եվրոպայի առաջնությունը:«Մրցաշարի 9 օրերը և հատկապես վերջին օրը, հիանալի էին: Կազմակերպվածությունն, անշուշտ, հրաշալի էր: Դուք տեսակ, որ մրցումային վերջին օրը մարզադահլիճը լեփ-լեցուն էր: Այդպես էլ դատարկ նստատեղեր չգտա տրիբունաներում: Այս ամենը ծանրամարտի համար շատ կարևոր ուղերձ է, քանի որ նախորդ տարին հեշտերից չէր մեզ համար: Եվ հիմա հանրության այս աջակցությունն իսկապես շատ լավ է»,-«Արմենպրես»-ի հետ զրույցում ասել է ֆեդերացիայի նախագահը: Ըստ Կոնֆլիտիի՝ կազմակերպչական առումով հայկական կողմը ֆանտաստիկ աշխատանք է տարել: «Հպարտորեն կարող եմ ասել, որ մենք Եվրոպայում կարող ենք անել այնպես, որ ցույց տանք ամբողջ աշխարհին, որ ունակ ենք կազմակերպել աշխարհի առաջնության, Օլիմպիական խաղերի մակարդակի մրցաշար: Այո, Երևանը կարող է նորից կազմակերպել Եվրոպայի առաջնություն: Շարունակում ենք աշխատել միասին, նրանք էլ պետք է շարունակական աշխատանք տանեն: Եթե անկեղծ, մրցաշարից առաջ սպասում էի, որ այն հաջողված կլինի, սակայն չէի սպասում, որ կլինի այնքան հաջողված, որքան հիմա տեսնում եմ»,-ասել է նա:Ծանրամարտի Եվրոպայի առաջնությունն անցկացվեց Երևանում։ Առաջնությունը մեկնարկեց ապրիլի 15-ին և եզրափակվեց ապրիլի 23-ին։ Հայաստանի հավաքականը առաջնության մեդալային հաշվարկում առաջինն էր՝ նվաճած 13 մեդալով։ Հայաստանի հավաքականը նվաճեց 4 ոսկե, 4 արծաթե և 5 բրոնզե մեդալ։

12:34 - 25 ապրիլի, 2023

Ֆրանսիայի արտգործնախարարը կայցելի Հայաստան, Ադրբեջան ու Վրաստան

Ֆրանսիայի արտաքին գործերի նախարար Կատրին Կոլոննան ապրիլի 26-ից 29-ը կայցելի Հայաստան, Ադրբեջան և Վրաստան: Այս մասին հայտնում են Ֆրանսիայի արտաքին քաղաքական գերատեսչությունից։ Այցի մասին այլ մանրամասներ չեն նշվում։ Հիշեցնենք, որ Ֆրանսիան դատապարտել է Ադրբեջանի կողմից Լաչինի միջանցքի նոր ճանապարհի սկզբնամասում անցակետի տեղադրումը՝ նշելով, որ այն հակասում է հրադադարի համաձայնագրերով ստանձնած պարտավորություններին և վնաս է հասցնում բանակցային գործընթացին։ Իսկ ադրբեջանական կողմը անհիմն է որակել Ֆրանսիայի դիվանագիտական գերատեսչության պաշտոնական ներկայացուցիչ Աննա-Կլեր Լեժանդրի պնդումները։

10:15 - 25 ապրիլի, 2023

Պետք է դյուրացվի միջազգային կազմակերպությունների մուտքը Լեռնային Ղարաբաղի տարածք. Ջուլիո Սենտեմերո

Պետք է դյուրացվի միջազգային կազմակերպությունների մուտքը Լեռնային Ղարաբաղի տարածք՝ անհրաժեշտ մարդասիրական օգնության համար: Այս մասին հայտարարել է Իտալիա-Հայաստան բարեկամության խորհրդարանական խմբի նախագահ Ջուլիո Սենտեմերոն: Հայտարարությունն ամբողջությամբ հրապարակվել է Իտալիայում Հայաստանի դեսպանության «Ֆեյսբուք»-ի էջում: Հայտարարության մեջ նշվում է, որ 1915 թվականին Օսմանյան կայսրության տարածքում տեղի ունեցած Հայոց Ցեղասպանությունը ճանաչվել է Իտալիայի խորհրդարանի կողմից: Նա ցավով նկատել է, որ նույնիսկ այսօր նույն ժողովուրդը դեռևս հումանիտար ճգնաժամի մեջ է՝ ինքնակոչ բնապահպանների ցույցերի հետեւանքով Լաչինի միջանցքի փակման պատճառով։ «Այս առնչությամբ Արդարադատության միջազգային դատարանը փետրվարի 22-ին հայտնել է իր կարծիքը՝ կարգադրելով, որ Ադրբեջանը համաձայնագրով ստանձնած պարտավորություններին համապատասխան՝ օգտագործի իր տրամադրության տակ գտնվող բոլոր միջոցները՝ երաշխավորելու մարդկանց, տրանսպորտային միջոցների և ապրանքների տեղաշարժը Լաչինի միջանցքի երկայնքով երկու ուղղություններով՝ առանց խոչընդոտների։ Մինչ օրս դեռ ոչինչ չի արվել»,- նշել է Ջուլիո Սենտեմերոն: Նա հույս է հայտնել, որ խաղաղ բանակցությունները կվերսկսվեն՝ ապահովելով այս «բազմաչարչար բնակչության իրավունքներն ու անվտանգությունը վերջնական եւ մշտական ձևով»։ «Պետք է դյուրացվի միջազգային կազմակերպությունների մուտքը Լեռնային Ղարաբաղի տարածք՝ անհրաժեշտ մարդասիրական օգնության համար»,- եզրափակել է Իտալիա-Հայաստան բարեկամության խորհրդարանական խմբի նախագահը:

17:27 - 24 ապրիլի, 2023

Արարատ Միրզոյանի և Ֆրանսիայի Սենատի պատվիրակության հանդիպմանն անընդունելի են համարվել Լաչինի միջանցքում Ադրբեջանի կողմից անցակետի տեղադրմանն ուղղված քայլերը

Ապրիլի 24-ին ՀՀ արտաքին գործերի նախարար Արարատ Միրզոյանն ընդունել է Ֆրանսիայի Սենատի անդամ, Լեռնային Ղարաբաղի հարցով խմբի հիմնադիր և նախագահ Բրունո Ռըտայոյի գլխավորած պատվիրակությանը, որի կազմում էր նաև Ֆրանսիա-Հայաստան բարեկամական խմբի նախագահ Ժիլբեր-Լյուկ Դըվինազը: Զրուցակիցները քննարկել են տարածաշրջանային անվտանգությանը և կայունությանը վերաբերող հարցեր: Արարատ Միրզոյանը երախտագիտություն է հայտնել ՀՀ համար կարևորություն ունեցող հարցերում հատկապես 2020 թ. 44-օրյա պատերազմից ի վեր Ֆրանսիայի, այդ թվում՝ Սենատի կողմից արտահայտվող համերաշխության ու սկզբունքային դիրքորոշումների համար: Նախարարը կարևորել է Ֆրանսիայի շարունակական ներգրավվածության ու ջանքերի անհրաժեշտությունը՝ ընդգծելով Հարավային Կովկասում երկարատև խաղաղության և կայունության հասնելու համար բոլոր առկա խնդիրները առանց ուժի կամ ուժի սպառնալիքի կիրառման լուծելու հրամայականը: Բրունո Ռըտայոն ներկայացրել է նախօրեին Լաչինի միջանցք իր այցելությունն ու արված եզրահանգումները: Երկուստեք անդրադարձ է կատարվել Լաչինի միջանցքի ապօրինի արգելափակման հետևանքով ստեղծված իրավիճակին: Անընդունելի են համարվել Լաչինի միջանցքում Ադրբեջանի կողմից անցակետի ապօրինի տեղադրմանն ուղղված քայլերը, որոնք միտված են Լեռնային Ղարաբաղի ժողովրդին էթնիկ զտման ենթարկելուն: Նախարար Միրզոյանը նշել է, որ դրա բացահայտ դրսևորումն են նաև Ադրբեջանում ամենաբարձր մակարդակով հնչող՝ հայերի նկատմամբ ատելության խոսքը, ինչպես նաև հայկական պատմամշակութային ու կրոնական ժառանգության ոչնչացումը: Հայոց ցեղասպանության 108-րդ տարելիցի կապակցությամբ ընդգծվել է ցեղասպանության ու մարդկության դեմ ուղղված նոր հանցագործությունների կանխարգելման հրամայականը: Հանդիպմանը քննարկվել են նաև Հայաստանի և Ֆրանսիայի միջև՝ երկու ժողովուրդների ընդհանուր արժեքների ու պատմական բարեկամության վրա հիմնված երկկողմ համագործակցությանը, ինչպես նաև ՀՀ-ԵՄ գործընկերության օրակարգին վերաբերող հարցեր:

16:25 - 24 ապրիլի, 2023