ՀՀ կառավարություն

Կառավարությունը գործադիր իշխանության բարձրագույն մարմինն է: Կառավարությունն իր ծրագրի հիման վրա մշակում եւ իրականացնում է պետության ներքին եւ արտաքին քաղաքականությունը, իրականացնում է պետական կառավարման համակարգի մարմինների ընդհանուր ղեկավարումը: Կառավարության լիազորությունները սահմանվում են Սահմանադրությամբ եւ օրենքներով: Կառավարության իրավասությանն են ենթակա գործադիր իշխանությանը վերաբերող բոլոր այն հարցերը, որոնք վերապահված չեն պետական կառավարման կամ տեղական ինքնակառավարման այլ մարմինների: Կառավարությունը կազմված է վարչապետից, փոխվարչապետներից եւ նախարարներից:

Հանրապետության նախագահը վարչապետ է նշանակում խորհրդարանական մեծամասնության ընտրած թեկնածուին, իսկ փոխվարչապետները եւ նախարարները նշանակվում են Հանրապետության նախագահի կողմից՝ վարչապետի առաջարկությամբ: Այժմ գործում է Նիկոլ Փաշինյանի գլխավորած կառավարությունը։

Ջանք չենք խնայելու Արցախի բնակավայրերը վերականգնելու և կյանքն աշխուժացնելու ուղղությամբ. Պապիկյան |armenpress.am|

Ջանք չենք խնայելու Արցախի բնակավայրերը վերականգնելու և կյանքն աշխուժացնելու ուղղությամբ. Պապիկյան |armenpress.am|

armenpress.am: ՀՀ Տարածքային կառավարման և ենթակառուցվածքների նախարարությունն Արցախի գործընկերներին աջակցելու է Ադրբեջանի սանձազերծած պատերազմի հետևանքով ավերված բնակավայրերը վերականգնելու և այդ տեղերում կյանքը կրկին աշխուժացնելու ուղղությամբ: Այս մասին Ազգային ժողովում կառավարության հետ հարցուպատասխանի ընթացքում ասաց նախարար Սուրեն Պապիկյանը, պատասխանելով «Իմ քայլը» խմբակցության անդամ Վիկտոր Ենգիբարյանի հարցին: «Հայաստանի Հանրապետությունը կանգնած է Արցախի Հանրապետության գործընկերների թիկունքին ու ջանք ու եռանդ չենք խնայելու մեր բնակավայրերը վերականգնելու և այնտեղ կրկին կյանքն աշխուժացնելու ուղղությամբ»,- ասաց Պապիկյանը: Նախարարը նաև նշեց, որ պատերազմի առաջին տասնօրյակում Հայաստանում կապիտալ շինարարության տեմպերը որոշակիորեն ընկել էին, սակայն հետագայում հնարավոր է եղել վերականգնել դրանք, ինչի հետևանքով կապիտալ շինարարության ոլորտում լուրջ խնդիրներ չեն առաջացել:
17:38 - 18 նոյեմբերի, 2020
Թորոսյանը ներկայացրեց մարտական գործողությունների հետևանքով վիրավորների վերականգնման ուղղությամբ կատարվող քայլերը |1lurer.am|

Թորոսյանը ներկայացրեց մարտական գործողությունների հետևանքով վիրավորների վերականգնման ուղղությամբ կատարվող քայլերը |1lurer.am|

1lurer.am: Ի՞նչ քայլեր են արվում մարտական գործողությունների հետևանքով վիրավորների վերականգնման ուղղությամբ: ԱԺ «Իմ քայլը» խմբակցության պատգամավոր Համազասպ Դանիելյանի հարցին ի պատասխան՝ առողջապահության նախարար Արսեն Թորոսյանը նշեց, որ վերականգնողական բուժման ոլորտում անելիքները շատ են: «Երեք հիմնական ուղղությամբ պետք է աշխատանք կատարենք՝ զինվորներին վերադարձնելու լիարժեք կյանքի. առաջին՝ եղած հզորությունների վերականգնում՝ մասնագետների վերապատրաստումից մինչև շենքային պայմաններ, երկրորդ՝ նոր հզորությունների ստեղծում. մինչև 250 մահճակալանոց վերականգնողական մեծ կենտրոնի կառուցում, երրորդ՝ այդ հզորություններին մշտական աջակցություն՝ պետական պատվերով ծառայություններ գնելու տեսքով: Դա պետբյուջեի վրա կնստի 2-2.5 մլրդ դրամ: Դրանք վերջնական հաշվարկներ չեն և դեռ ներառված չեն բյուջեի նախագծում: Այդ հարցում մեզ պետք է աջակցի նաև սփյուռքը»,- ասաց նախարարը: 
17:36 - 18 նոյեմբերի, 2020
ՀՀ-ում ոչ մի կառավարություն չի կարող գոյություն ունենալ՝ առանց ժողովրդի թույլտվության․ Նիկոլ Փաշինյան

ՀՀ-ում ոչ մի կառավարություն չի կարող գոյություն ունենալ՝ առանց ժողովրդի թույլտվության․ Նիկոլ Փաշինյան

Հայաստանի խորհրդարանում սկսվել է ԱԺ-կառավարության անդամներ հարց ու պատասխանը։ Նիստին ներկա է նաեւ ՀՀ վարչապետ Նիկոլ Փաշինյանը։ Կառավարության ներկայացուցիչներին հարց տալու համար հերթագրվել է 7 պատգամավոր։ ԱԺ անկախ պատգամավոր Արման Բաբաջանյանը խորհրդարանում Նիկոլ Փաշինյանից հետաքրքրվեց՝ արդյոք վերջինս իր նշած ճանապարհային քարտեզի աշխատանքները կատարելուց հետո արտահերթ ընտրությունների պատրաստվո՞ւմ է, կառավարության կազմի փոփոխություններ լինելո՞ւ են, արդյոք իրենց քաղաքական թիմն ունի՞ անհրաժեշտ վստահության պաշար՝ իրականացնելու Փաշինյանի ներկայացրած ճանապարհային քարտեզում նշված փոփոխությունները։ Փաշինյանը, պատասխանելով Բաբաջանյանի հարցին, նշեց, որ հրապարակած ճանապարհային քարտեզում այս պահին ավելացնելու ոչինչ չունի։ Նա շեշտեց, որ, ինչպես գրել է, իրենց համար կարեւոր առաջնահերթություն է ժողովրդավարական կայունությունն ու անվտանգությունը, երաշխավորությունը, որ իշխանություն ձեւավորելու՝ ժողովրդի հնարավորությանը եւ իրավունքին ոչինչ չի սպառնում։Երկրորդ ուղղությունը, ինչպես ասաց վարչապետը, պատերազմի հետեւանքների վերացումն է, եւ վեց ամիս անց՝ 2021-ի հունիսին, կամփոփեն կատարված աշխատանքներն ու ըստ այդմ կորոշեն հետագա անելիքները․«Ինչպես նախկինում եմ ասել՝ առնվազն ՀՀ-ում ոչ մի կառավարություն չի կարող գոյություն ունենալ՝ առանց ժողովրդի թույլտվության։ Մենք այսօր կենտրոնացած ենք այդ աշխատանքի վրա։ Ինչ վերաբերում է կառավարության կազմի փոփոխություններին՝ հիմա քննարկումների շրջան է, այդ որոշումները կհրապարակվեն, երբ կայացվեն»,- ասաց Փաշինյանը՝ հավելելով, որ այս պահին կառավարության կառուցվածքի փոփոխություն չի քննարկվում։Բաբաջանյանը հարցրեց նաեւ՝ արդյոք պատկերացնո՞ւմ են ազգային համաձայնության կառավարության ստեղծում, որը, ըստ նրա, եւս կարող է երկրում ստեղծված իրավիճակին հանգուցալուծում գտնելու ճանապարհներից մեկը լինել։«Ընդհանուր առմամբ շատ ավելի կարեւոր է ազգային համաձայնության մթնոլորտը, որովհետեւ միշտ չէ, որ կառավարությունների ձեւավորմամբ համաձայնության վերնագրի ներքո ձեւավորվում է համաձայնության մթնոլորտ։ Մեր խնդիրն է հիմա՝ ձեւավորել համաձայնության մթնոլորտ, եւ, կարծում եմ, այդ մթնոլորտի պահանջը կա երկու կետերի շուրջ՝ կայունություն եւ անվտանգություն»,- պատասխանեց վարչապետը՝ շեշտելով, որ իրենք վերջիններն ապահովելու համար ունեն բավարար ներուժ։
17:13 - 18 նոյեմբերի, 2020
Զորահավաքային ռեսուրսի, ժամկետային պարտադիր ծառայողների արձակումների եւ ազատումների վերաբերյալ տեղեկությունը կտրամադրվի դեկտեմբերի 1-ից հետո․ Տոնոյան

Զորահավաքային ռեսուրսի, ժամկետային պարտադիր ծառայողների արձակումների եւ ազատումների վերաբերյալ տեղեկությունը կտրամադրվի դեկտեմբերի 1-ից հետո․ Տոնոյան

Հայաստանի խորհրդարանում սկսվել է ԱԺ-կառավարության անդամներ հարց ու պատասխանը։ Նիստին ներկա է նաեւ ՀՀ վարչապետ Նիկոլ Փաշինյանը։ Կառավարության ներկայացուցիչներին հարց տալու համար հերթագրվել է 7 պատգամավոր։ «Իմ քայլը» խմբակցության պատգամավոր Արմեն Խաչատրյանը հարց բարձրացրեց՝ մոբիլիզիացիայով Արցախ մեկնած ծառայողներ կան, որոնք սեպտեմբերի 27-ից մինչ օրս ծառայության մեջ են, արդյոք չի՞ նախատեսվում նրանց հետ ուղարկել կամ կարճատեւ արձակուրդ տալ։ՀՀ պաշտպանության նախարար Դավիթ Տոնոյանն ի պատասխան ասաց, որ, հաշվի առնելով այն, որ հիմա իրականացվում են վերաբաշխումներ, ԶՈւ-երի վերատեղակայումներ, զորահավաքային ռեսուրսի, ժամկետային պարտադիր ծառայողների արձակումների եւ ազատումների վերաբերյալ տեղեկությունն ավելի ուշ կտրամադրվի՝ դեկտեմբերի 1-ից հետո, երբ արդեն վերջնական կառուցվածք եւ պատկերացում կունենան ԶՈւ-ի տեղակայման վերաբերյալ։
16:44 - 18 նոյեմբերի, 2020
Ռայնիսի փողոցի փլուզված շենքի 12 բնակիչներ բնակարանի գնման վկայագրեր են ստացել

Ռայնիսի փողոցի փլուզված շենքի 12 բնակիչներ բնակարանի գնման վկայագրեր են ստացել

ՀՀ աշխատանքի և սոցիալական հարցերի նախարարությունը տեղեկացնում է, որ բնակարանի գնման վկայագրեր է տրամադրել 2020 թ.-ի օգոստոսի 26-ին Երևան քաղաքի Քանաքեռ-Զեյթուն վարչական շրջանի Յան Ռայնիսի փողոցի N1 շենքի 12 փլուզված բնակարանների սեփականատերերին: Աջակցության չափը հաշվարկվել է՝ հիմքում ընդունելով փլուզված բնակարանի մակերեսները և ՀՀ կադաստրի կոմիտեի կողմից տրամադրված՝ 1 քառ. մետրի համար ձևավորված շուկայական միջինացված գնի տվյալները՝ 333 հազ. դրամ՝ 1քմ-ի համար: Կառավարության որոշման համաձայն՝ եթե նոր ձեռք բերվող բնակարանի արժեքն ավելի ցածր է, խնայված գումարը մնում է շահառուին: Եթե գնվող բնակարանի արժեքը գերազանցում է վկայագրով տրամադրվող աջակցությանը, ապա շահառուն կարող է նաև հավելյալ գումար ավելացնել կամ ձեռք բերել այն հիպոթեկային վարկավորման միջոցով: Հիշեցնենք, որ բնակարանների գնման վկայագրերի համար անհրաժեշտ գումարը հատկացվել էր ՀՀ կառավարության պահուստային ֆոնդից՝ ՀՀ աշխատանքի և սոցիալական հարցերի նախարարությանը՝ վկայագրերի տրամադրման գործընթացի իրականացումը ևս վերապահելով նախարարությանը: Հիշեցնենք՝ օգոստոսին Երևանի Ռայնիսի փողոցի թիվ 3 հասցեում գազի արտահոսքից տեղի էր ունեցել պայթյուն, որից շենքը մասնակի փլուզվել էր։
11:55 - 18 նոյեմբերի, 2020
Մի շարք զինծառայողներ և կամավորներ մտադիր են հանրահավաք իրականացնել՝ հաջակցություն կառավարության և վարչապետի․ հորդորում ենք զերծ մնալ ցանկացած հանրահավաք կազմակերպելուց․ Է․ Աղաջանյան

Մի շարք զինծառայողներ և կամավորներ մտադիր են հանրահավաք իրականացնել՝ հաջակցություն կառավարության և վարչապետի․ հորդորում ենք զերծ մնալ ցանկացած հանրահավաք կազմակերպելուց․ Է․ Աղաջանյան

ՀՀ վարչապետի աշխատակազմի ղեկավար Էդուարդ Աղաջանյանն իր ֆեյսբուքյան էջում գրում է․ «Տեղյակ ենք, որ Արցախից Հայաստան վերադարձած մի շարք զինծառայողներ և որպես կամավոր առաջնագիծ մեկնած քաղաքացիներ այսօր մտադիր են հանրահավաք իրականացնել Երևանում՝ հաջակցություն Հայաստանի Հանրապետության կառավարության և վարչապետի։ Շնորհակալ ենք յուրաքանչյուրիդ ցուցաբերած աջակցության համար, և վստահեցնում ենք, որ մեր աշխատանքով կարդարացնենք այն։ Միաժամանակ, հորդորում ենք զերծ մնալ ցանկացած հանրահավաք կազմակերպելուց, քանի որ ռազմական դրության իրավական ռեժիմի պայմաններում արգելված է հավաքների կազմակերպումն ու դրանց մասնակցելը։ Բացի այդ՝ այս օրերին մեզ առավել քան երբևէ համախմբվել է պետք ու մեր ամբողջ ներուժն ուղղել հայրենիքի վերակառուցմանը»։
11:41 - 18 նոյեմբերի, 2020
ԱԱԾ-ն կանխել է պետական գործչի սպանության, ՀՀ կառավարության լիազորություններին տիրանալու դեպքեր

ԱԱԾ-ն կանխել է պետական գործչի սպանության, ՀՀ կառավարության լիազորություններին տիրանալու դեպքեր

ԱԱԾ-ն հայտարարություն է տարածել, որը ներկայացնում ենք ստորև․ «Հայաստանի Հանրապետության ազգային անվտանգության ծառայությունը, հավատարիմ լինելով հասարակության և պետության անվտանգությունը, սահմանադրական կարգը, պետության ներքին և արտաքին անվտանգությունն ապահովելու կարևորագույն գործելաոճին, ձեռնարկված օպերատիվ-հետախուզական համալիր միցոցառումների արդյունքում հանցագործության նախապատրաստության փուլում կանխել է մի խումբ անձանց կողմից նախնական համաձայնությամբ պետական գործչի սպանության, բռնություն գործադրելու միջոցով ՀՀ կառավարության լիազորություններին տիրանալու, ինչպես նաև բացահայտել է մի խումբ անձանց կողմից այդ նպատակով ապօրինի կերպով զենք, ռազմամթերք, պայթուցիկ նյութեր ձեռք բերելու, պահելու դեպքեր: Մասնավորապես՝ Սյունիքի մարզի բնակիչ Ա. Մ.-ն, ունենալով հակաիշխանական հայացքներ և համաձայն չլինելով Հայաստանի Հանրապետության կառավարության, ՀՀ վարչապետի կողմից վարած արտաքին և ներքին քաղաքականության հետ,  օգտվելով 2020 թվականի սեպտեմբերի 27-ին Արցախի Հանրապետության դեմ սանձազերծված ռազմական գործողությունների ընթացքում հակամարտ գոտում առկա զենք-զինամթերքի առկայության հանգամանքից, մի խումբ անձանց հետ նախնական համաձայնությամբ ապօրինի կերպով փոխադրել և իրեն փաստացի պատկանող Սյունիքի մարզի Սիսիան քաղաքում գտնվող շինություններից մեկում ապօրինի պահել է մեծաքանակ զենք, ռազմամթերք, պայթուցիկ նյութեր, պայթուցիկ սարքեր: Ընդ որում, հիշատակված անձը, 2020 թվականի սեպտեմբերի 27-ին սկսված ռազմական գործողությունների ընթացքում և դրա ավարտից անմիջապես հետո, Հայաստանի և Արցախի Հանրապետություններում գործունեություն ծավալած կուսակցությունների ղեկավարների, հակաիշխանական հայացքներ ունեցող քաղաքական գործիչների և նրանց համախոհների հետ պայմանավորվածություններ է ձեռք բերել ապօրինի պահած զենք-զինամթերքը որպես հանցագործության գործիք օգտագործելու միջոցով կյանքի կամ առողջության համար վտանգավոր բռնություն գործադրելու եղանակով զավթելու իշխանությունը, մասնավորապես՝ պետական գործչի՝ Հայաստանի Հանրապետության վարչապետի գործունեությունը դադարեցնելու նպատակով ապօրինաբար վերջինին դիտավորությամբ կյանքից զրկել և ինչպես այդ կերպ, այնպես էլ Սահմանադրությամբ  չնախատեսված այլ եղանակով տիրանալ  Հայաստանի Հանրապետության կառավարության լիազորություններին՝ քննարկելով նույնիսկ ՀՀ վարչապետին փոխարինող հավանական թեկնածուի վերաբերյալ հարցեր: Արդյունքում, Ա. Մ.-ն և Հայաստանի ու Արցախի Հանրապետություններում գործունեություն ծավալած կուսակցությունների ղեկավար, հակաիշխանական հայացքներ ունեցող մի շարք քաղաքական գործիչներ և նրանց համախոհներ, նախկին բարձրաստիճան պաշտոնատար անձինք ուղղակի դիտավորությամբ հանցանք կատարելու համար ձեռք են բերել միջոցներ և գործիքներ, ինչպես նաև դիտավորությամբ ստեղծել այլ պայմաններ՝ այդ կերպ նախապատրաստելով կատարելու պետական գործչի սպանություն և իշխանության յուրացում, սակայն  իրենց գործողություններն ավարտին չի հասցվել նրանց կամքից անկախ հանգամանքներով, այն է՝ նախապատրաստվող առանձնապես ծանր հանցագործությունները բացահայտվել և խափանվել են Հայաստանի Հանրապետության ազգային անվտանգության ծառայության կողմից: Հիշատակված հանցավոր արարքները կատարելու մեջ անմիջականորեն ծագած կասկածանքի հիման վրա ձերբակալվել են մի շարք անձինք, այդ թվում՝ «Հայրենիք» կուսակցության ղեկավար Ա. Վ.-ն, ՀՀ ԱԺ նախկին պատգամավոր, Հայաստանի Հանրապետական կուսակցության խմբակցության ղեկավար Վ. Բ.-ն, Հայ հեղափոխական դաշնակցության անդամ Ա. Ա.-ն, ինչպես նաև Սիսիանի կամավորականների ջոկատի հրամանատար Ա. Մ.-ն, ձեռնարկվում են օպերատիվ-հետախուզական և համապատասխան քննչական ու այլ դատավարական գործողություններ խմբի մյուս անդամներին հայտնաբերելու և նրանց հանցավոր գործունեությունը կանխելու, խափանելու և չեզոքացնելու ուղղությամբ: Հարկ է նշել, որ քրեական գործի նախաքննության ընթացքում ձեռնարկված անհետաձգելի քննչական գործողությունների, այդ թվում՝ շուրջ մեկ տասնյակից ավելի խուզարկությունների արդյունքում կասկածյալներին պատկանող բնակարաններում կամ շինություններում հայտնաբերվել և առգրավվել են 3 հատ 7,62 մմ տրամաչափի «ПК» տեսակի /7,62X54/ գնդացիրներ, մեկ հատ «РПК-74» տեսակի 5,45 մմ տրամաչափի  ձեռքի գնդացիր, 2 հատ օպտիկական սարքով հակատանկային նռնականետ, 3 հատ ինքնաձիգ, 14 հատ օպտիկական սարքով հրացան, 9 արկղ 5.45 մմ տրամաչափի փամփուշտներ՝ յուրաքանչյուրում 2160 հատ փամփուշտ, 5 արկղ 7.62 մմ տրամաչափի փամփուշտներ, 233 հատ 7.62 տրամաչափի փամփուշտներ, 11 հատ պայթուցիչ/կապսուլ/, 8 հատ էլեկտրական պայթուցիչ/զապալ/, 1 հատ նռնակի պայթուցիչ, 13 հատ մեխանիկական պայթուցիչ, 1 կծիկ վառոդաթել /ֆիթիլ/, 2 հատ ՌԳԴ տեսակի նռնակ, 3 հատ ձեռքի նռնակի պայթուցիչ, 1 հատ «Ֆ-1» տեսակի նռնակ, 1 հատ հակատանկային նռնակի իրան, 1 հատ տրոտիլային խորանարդիկ՝ ինքնաշեն մետաղական շրջանակով, 1 հատ էլեկտրական դետոնացում իրականացնող սարք, ինչպես նաև մեծաքանակ այլ զենք ու զինամթերք, որոնց օգտագործման և նպատակի մասին սույն գործով ներգրավված անձինք մանրակրկիտ քննարկումներ են ունեցել: Ազգային անվտանգության ծառայությունը հորդորում է զերծ մնալ պետության ներքին վիճակն ապակայունացնող, ներքաղաքական իրավիճակն արհեստականորեն սրող անթույլատրելի գործելաոճից, ցուցաբերել քաղաքացիական բարձր պատասխանատվություն և իրավահպատակ վարքագիծ,  չտրվել սադրանքներին և ըստ այդմ վտանգի տակ չդնել երկրի ներքին ու արտաքին անվտանգությունը և զգուշացնում է, որ վճռականորեն չեզոքացնելու է պետականության և սահմանադրական կարգի դեմ ուղղված ցանկացած տեսակի ոտնձգություն: Միաժամանակ, ազգային անվտանգության ծառայությունը ակնկալում է նաև այս գործընթացում հասարակության լայն շերտերի ներգրավվածությունը՝ իշխանության մարմիններին հայտնելու պետականության և սահմանադրական կարգի դեմ ուղղված հանցավոր դրսոևորումների վերաբերյալ իրենց հայտնի դարձած տեղեկությունները՝ ի նպաստ Հայաստանի Հանրապետության ինքնիշխանության, ներքին և արտաքին անվտանգության և հիշեցնում է, որ անկախ քաղաքական հայացքներից դրանք բարձրագույն արժեքներ են: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով»։
21:51 - 14 նոյեմբերի, 2020
Ստորագրված փաստաթղթով 50 մլրդ դոլարի պարտավորություն չի դրվել Հայաստանի վրա, ՀՀ-ն հայցի մասին ծանուցում դեռևս չի ստացել

Ստորագրված փաստաթղթով 50 մլրդ դոլարի պարտավորություն չի դրվել Հայաստանի վրա, ՀՀ-ն հայցի մասին ծանուցում դեռևս չի ստացել

Հայկական որոշ լրատվականներ տարածում են ՀՀ նախկին գլխավոր դատախազ, ՄԻԵԴ-ում ՀՀ նախկին ներկայացուցիչ Գեւորգ Կոստանյանի հայտարարությունը, որում, մասնավորապես, ասված է, թե նոյեմբերի 10-ին ստորագրված փաստաթղթով ոչ միայն տարածքներ կորցրինք, այլեւ ավելի քան 50 մլրդ ԱՄՆ դոլարի պարտավորություն դրվեց Հայաստանի վրա: Սակայն նոյեմբերի 10-ին ՀՀ վարչապետի, Արդրբեջանի եւ Ռուսաստանի նախագահների ստորագրած հայտարարության մեջ նման պարտավորության մասին խոսք չկա: Կոստանյանն առաջին անգամը չէ, որ խոսել է Ադրբեջանի` Հայաստանի դեմ հայց նախապատրաստելու մասին: Ինչպես նշել է իր հայտարարության մեջ՝ հայցը վերաբերում է Արցախում եւ 7 շրջաններում Ադրբեջանի կողմից իբր թե կրած նյութական վնասի փոխհատուցմանը: Ըստ նրա՝ Ադրբեջանը դեռ երկու տարի առաջ չէր կարողանում հայց ներկայացնել, քանի որ չուներ բավարար ապացույցներ առ այն, որ Հայաստանն է պատասխանատու սուբյեկտը․ «Նրանք վարձել էին վնասների հաշվարկման միջազզգային կազմակերպություն, որն Ադրբեջանին հասցված վնասները գնահատել էր ավելի քան 50 մլրդ ԱՄՆ դոլար»,- շեշտել է Կոստանյանը։  Եւ, չնայած Կոստանյանն իր հայտարարության սկզբում ասում է, որ 50 մլրդի պարտավորությունը դրվել է Հայաստանի վրա, այնուհանդերձ հայտարարության մեջ միայն վստահություն է հայտնում, թե նախապատրաստական աշխատանքներն ակտիվացել են. «Վստահ եմ՝ նման հայցի ուղղությամբ աշխատանքներն ակտիվացել են, քանի որ Հայաստանի վարչապետը, նոյեմբերի 10-ին ստորագրելով հայտնի փաստաթուղթը, ըստ էության հաստատել է, որ Հայաստանի Հանրապետությունն է հանդիսանում պարտավորության սուբյեկտ, եւ դրանով իսկ ուղղակիորեն ստանձնել է պարտավորություն ցանկացած պատճառված վնասի համար»: Սակայն լրատվամիջոցների վերնագրերից տպավորություն է ստեղծվում, թե Հայաստանը հենց փաստաթղթով է ստանձնել այդ պարտավորությունը։ ՌԻԱ Նովոստին էլ նախօրեին փոխանցել էր, որ Իլհամ Ալիեւը հայտարարել է, թե Բաքուն կգնահատի Լեռնային Ղարաբաղի կրած վնասը եւ փոխհատուցում կպահանջի Հայաստանից։ Անդրադառնալով այս հայտարարությանը եւ դրա հնարավորություններին` Միջազգային իրավունքի մասնագետ, փաստաբան Արա Ղազարյանը, «Առաջին լրատվական»-ի հետ զրույցում ասել է, որ այդ խոսակցությունները հստակ չեն, եւ Ալիեւը չի նշում, թե մասնավորապես միջազգային որ դատարան է դիմելու, որ քաղաքական մարմնին եւ ինչ ընթացակարգով: Արա Ղազարյանի խոսքով՝ չկա նման ընփացակարգ եւ դժվար էլ լինի: Իսկ եթե նույնիսկ լինի, միջազգային իրավունքի մասնագետի կարծիքով, Հայաստանն էլ կներկայացնի հենց միայն Ապրիլյան պատերազմի վերաբերյալ։ Infocom-ը կապ հաստատեց նաեւ ՄԻԵԴ-ում ՀՀ ներկայացուցչի գրասենյակի ղեկավար Լիպարիտ Դմեյանի հետ, որը հայտնեց՝ այս պահին մենք միջազգային դատական որեւէ ատյանից նման ծանուցում չենք ստացել․ «Նման հայցի մասին միայն կարող ենք խոսել, երբ Հայաստանի Հանրապետության կառավարությունը պաշտոնապես ծանուցվի դրա ներկայացված լինելու վերաբերյալ: Քանի դեռ չկա, չենք կարող ասել` նախապատրասվո՞ւմ է հայցը, թե՞ ոչ, կներկայացվի՞, թե՞ ոչ: Դրանք ընդամենը ենթադրություններ են»,- ասաց Դրմեյանը` հավելելով, որ հայց ներկայացնելու հավանականություն միշտ կարող է լինել, քանի որ ե՛ւ ՀՀ-ն, ե՛ւ Ադրբեջանը անդամակցում են Մարդու իրավունքների եվրոպական դատարանին:  Այսպիսով՝ ոչ միայն նոյեմբերի 10-ին ստորագրված փաստաթղթով 50 մլրդ ԱՄՆ դոլարի պարտավորություն չի դրվել Հայաստանի վրա, այլեւ Հայաստանի Հանրապետությունը նման որեւէ հայցի մասին պաշտական ծանուցում դեռևս չի ստացել։ Զարա Խաչատրյան
15:21 - 14 նոյեմբերի, 2020
Մենք չենք կարող ասել, որ այս փաստաթղթով Լեռնային Ղարաբաղի խնդիրը լուծվել է․ Էդգար Վարդանյան

Մենք չենք կարող ասել, որ այս փաստաթղթով Լեռնային Ղարաբաղի խնդիրը լուծվել է․ Էդգար Վարդանյան

Նոյեմբերի տասին կրակը դադարեցնելու վերաբերյալ Հայաստանի վարչապետի, Ադրբեջանի ու Ռուսաստանի նախագահների ստորագրած համաձայնագիրը հանրային քննարկման տիրույթում է։ Այս օրերին այն բնորշվեց որպես կապիտուլյացիայի մասին խայտառակ մի փաստաթուղթ, որով հանձնվեցին ոչ միայն Արցախի տարածքները, այլեւ նվազեց Հայաստանի ինքնիշխանությունը։ 17 ընդդիմադիր կուսակցությունները եւ Ազգային-ժողովրդավարական բեւեռը ակցիաներ են իրականացնում՝ պահանջելով Նիկոլ Փաշինյանի հրաժարականը։ Փաստաթղթի էության, Արցախում եւ Հայաստանում տեղի ունեցող իրադարձությունների մասին Infocom-ը զրուցել է քաղաքագետ Էդգար Վարդանյանի հետ։ - Պարո՛ն Վարդանյան, կրակը դադարեցնելու հայտնի համաձայնագիրը տարբեր անուններով բնորոշվեց, այդ թվում՝ կապիտուլյացիա։ Ի՞նչ է իրենից ներկայացնում այս փաստաթուղթը, ի՞նչ է նշանակում եւ ինչո՞ւ է ստորագրվել խիստ նեղ շրջանակի հետ քննարկմամբ։ - Ըստ էության՝ փաստաթուղթը ռազմական գործողությունների դադարեցման վերաբերյալ համաձայնություն է, որը ենթադրում է տարածքային կորուստներ։ Եւ ակնհայտ է, որ այդ համաձայնությունը ձեռք է բերվել որպես վերջին միջոց` փրկելու, պահելու այն, ինչ հնարավոր է պահել այդ պահի դրությամբ։ Ակնհայտ է նաեւ, որ եռակողմ այդ համաձայնությունը ձեռք է բերվել Մինսկի խմբի շրջանակից դուրս, մինչդեռ, որպես միջնորդ Մինսկի խումբն էր զբաղվում ղարաբաղյան հարցի կարգավորմամբ: - Կարո՞ղ ենք ասել, որ այդպիսով Մինսկի խմբի ձեւաչափը քանդվել է։  - Չենք կարող ասել, որ քանդվել է, բայց այստեղ ակնհայտ է, որ Մինսկի խմբի անդամներից մեկը գործել է սեպարատ (անջատ), այսինքն` առանձին ձեւաչափով։ Ֆրանսիան եւ ԱՄՆ-ն, կարծես, դժգոհություն ունեն, թե ինչու իրենց հետ համատեղ չի ընդունվել այդ որոշումը, ինչն, ըստ էության, ընդունեց նաեւ ՌԴ ԱԳ նախարար Լավրովը՝ Ռուսաստանի շահերի տեսակետից որոշակի բացատրություն տալով։ Բայց ակնհայտ է, որ այդ բացատրությունը սպառիչ չէ, եւ Մինսկի խմբի համանախագահ այլ երկրների, փորձագիտական շրջանակների համար այն չի կարող համոզիչ լինել։ Լավրովի ասածն ընդամենն այն էր, որ զուտ տեխնիկական խնդիր կա, բայց իրենք անընդհատ շփումների ու խոսակցությունների մեջ են, եւ այլն։ Իհարկե՛, մենք տեսնում էինք, որ ամբողջ պատերազմի ժամանակ Միսնկի խմբի համանախագահ երկրները տարբեր ձեւաչափերով աշխատում էին կողմերի հետ, չնայած՝ միշտ չէ, որ երեքն էլ միաժամանակ ինչ-որ հայտարարություն էին անում, նույնիսկ հակառակը` շատ հազվադեպ էր այդպես։  Ինչպես ասում են՝ այս խմորը շատ ջուր է քաշելու, այս համաձայնագիրը խնդրի լուծում չի պարունակում, մենք չենք կարող ասել, որ սրանով Լեռնային Ղարաբաղի խնդիրը լուծվել է։ - Նիկոլ Փաշինյանն էլ երեկ իր ելույթում սա շեշտեց՝ ԼՂ հարցն ինչպես լուծված չէր, այնպես էլ հիմա լուծված չէ։ Դուք նշեցիք՝ փաստաթուղթը ռազմական գործողությունները դադարեցնելու մասին է․ չի՞ բացառվում նոր պատերազմը։ - Ի՞նչ է փաստացի կատարվել․ կողմերը պատերազմի ընթացքում մի քանի անգամ համաձայնության են եկել կրակի դադարեցման վերաբերյալ, բայց այդ համաձայնությունն Ադրբեջանը միշտ չի հարգել, միշտ, բոլոր դեպքերում, բոլոր համաձայնություններից հետո։ Եւ այն, որ հենց Ադրբեջանը չի հարգել, դա ֆիքսել են Մինսկի խմբի համանախագահ երկրների տարբեր պաշտոնյաներ։ Հիմա, փաստացի, այս համաձայնությունը ուժային կոմպոնենտով է ձեռք բերվել, այսինքն՝ կոնկրետ Ռուսաստանը որպես միջնորդ հանդես է եկել եւ ստացել է կողմերի համաձայնությունը՝ խաղաղապահ զորք մտցնելու վերաբերյալ։ Հրադադարի համաձայնագիրը, ըստ հայկական կողմերի ներկայացրածի, եղել է որպես մնացածը փրկելու միակ տարբերակը, այսինքն՝ Հայաստանն այլընտրանք չի տեսել, եւ մյուս կողմից էլ՝ Ադրբեջանը, հասկանալով, որ շատ լուրջ ձեռքբերումների է հասել, գտել է, որ այստեղ կարելի է կանգնել եւ համաձայնել, որպեսզի ռուս խաղաղապահները մտնեն։ Միայն այս դեպքում են բոլորը հասկացել, որ հնարավոր է հրադադարը։ Այսինքն՝ պատերազմը հանգել էր մի իրավիճակի, որ եթե չկան խաղաղապահներ, չի կարող լինել հրադադար։ Բացի այն, որ խաղաղապահներն արդեն տեղակայվել են՝ համաձայն փաստաթղթի, իմպլեմենտացվել (կիրարկվել) է նաեւ կրակի դադարեցումը, իսկ համաձայնագրի մնացյալ կետերն իրենց բնույթով կրակի դադարեցման հետ անմիջական կապ չունեն, դրանք արդեն բանակցային գործընթացի տարրեր են պարունակում, խաղաղության հասնելու տարրեր, ԼՂ կոնֆլիկտի կարգավորման կետեր։ Խնդիրը հենց այն է, որ այդ համաձայնագիրը Լեռնային Ղարաբաղի կարգավորման շրջանակային համաձայնագրի տարրեր է պարունակում, սակայն այդպիսի համաձայանգիր նախատեսված էր ձեռքբերել Մինսկի խմբի մանդատի շրջանակներում։  - Այժմ բանակցություններն ի՞նչ շրջանակներում են լինելու, ի՞նչ պիտի բանակցենք մենք։ Օդում կախված է նաեւ Արցախի կարգավիճակի հարցը: - Այս փաստաթղթի իմպլեմենտացիայի հարցերը համաձայնեցված չեն դեռ, դրանում պիտի լինեին դրույթներ, որոնք միտված կլինեին խնդրի կարգավորմանը։ Եւ եթե այդ հարցով մանդատը Մինսկի խմբին էր տրված, ուրեմն պիտի Մինսկի խումբը անի այդ եւ այլ, համաձայնագրով չնախատեսված կետերի վերաբերյալ բանակցությունները։ Հիմա հասկանալի չէ, թե ինչ ձեւաչափով պետք է այդ կետերի իմպլիմենտացիայի վերաբերյալ բանակցություններ լինեն։ Ու մենք պետք է ակնկալենք, որ մոտ ապագայում այդ հարցերը պիտի քննարկվեն ամենաբարձր մակարդակում՝ ե՛ւ համանախագահ երկրների միջեւ, ե՛ւ տարբեր ֆորմատներով։  Իսկ ինչ էին ենթադրում Մինսկի խմբի առաջ քաշած սկզբունքները․ այն, որ նախկին ԼՂԻՄ-ը պետք է առանձին դիտարկվի, 7 շրջաններրը, որոնք շրջապատում են նախկին ԼՂԻՄ-Ը՝ առանձին։ Հիմա ստացվել է, որ Ադրբեջանը, ուժային գործողությունների արդյունքում խախտելով Միսնկի խմբի շրջանակներում ընթացող բանակցությունների հիմնարար սկզբունքներից մեկը՝ ուժի չկիրառումը, կոնֆլիկտը փորձել է լուծել ուժային ճանապարհով։ Արդյունքում՝ ոչ միայն շրջաններն է իր վերահսկողության տակ առել, այլ նաեւ նախկին ԼՂԻՄ-ի որոշակի հատվածներ, այդ թվում՝ Շուշին, Հադրութը։  Կարծում եմ, որ Հայաստանն այս հարցը պետք է բարձրացնի հենց Մինսկի խմբի շրջանակներում։ Նաեւ կարգավիճակի հարցը, որովհետեւ 3 սկզբունքներ կային` տարածքային ամբողջականությունը, ազգերի ինքնորոշման իրավունքը եւ ուժի չկիրառումը։ Հիմա, փաստորեն, ազգի ինքնորոշման հարցն էլ այստեղ լուծված չէ, եւ այն տարածքը, որը նախատեսվում էր, որ պետք է ֆիքսվեր որպես Արցախի ժողովրդի ինքնորոշման տարածք՝ նախկին ԼՂԻՄ-ը, առնավազն մասնակիորեն օկուպացված է՝ լինելով Ադրբեջանի վերահսկողության տակ։  - Պարոն Վարդանյան, հիմա շատերը փորձում են հասկանալ՝ հնարավո՞ր է չեղյալ համարել այս փաստաթուղթը, եւ եթե այո, ապա ինչո՞ւ, ինչպե՞ս, եւ ի՞նչ զարգացումներ կարող են լինել այդ պարագայում։ - Շատերն ասում են, որ այս համաձայնագիրը իրավական ուժ չունի եւ այլն, եւ քանի որ իրավական ուժ չունի, ուրեմն կարելի է չեղյալ համարել կամ չկատարել։ Բայց մենք պետք է հասկանանք, որ այս համաձայնագիրը կրակի դադարեցման եւ կրակի դադարեցման մեխանիզմների վերաբերյալ է։ Կողմերը համաձայնության են եկել, եւ Հայաստանը համաձայնել է դրան ստիպված, որովհետեւ այլ տարբերակ, ինչպես նշում են հայկական կողմերը, չկար։ Այլապես կորցնելու էինք ամեն ինչ։ Խաղաղապահների տեղակայումն իրականացված է, ինչպե՞ս ենք մենք պատկերացնում դրա չեղարկումը։ Որեւէ մեկը, որը խոսել է չեղարկելու մասին, չի ասել, թե ինչպես է դա հնարավոր։ Ենթադրենք՝ Հայաստանն ասում է` ես փոշմանել եմ, չեմ ուզում խաղաղապահներ լինեն, բայց վերջիններս արդեն այնտեղ են, ի՞նչ պետք է անես։ Ի՞նչ են առաջարկում․ պատերազմել Ռուսաստանի հե՞տ, ասել՝ դուք գնացե՞ք այդտեղից, մենք շարունակում ենք Ադրբեջանի հետ պատերա՞զմը։ Ի՞նչ են առաջարկում այդ մարդիկ։ Հասկանալի չէ` ինչ են առաջարկում։  Ադրբեջանը Թուրքիայի աջակցությամբ կարողացել է հասնել նրան, որ ինքը որոշակի պայմաններով է կանգնել, որոշկի պայմաններով է դադարեցրել պատերազմը, որը կործանարար էր ամբողջ Արցախի համար։ Հիմա երբ ասում ես, որ այդ պայմանները չես ընդունում, ուրեմն ի՞նչ ես ստանում արդյունքում, նորի՞ց պատերազմ, պատերազմ ո՞ւմ հետ, երբ ռուս խաղաղապահներն արդեն տեղակայված են։  - Հայտարարություններ են հնչում, թե հարցի լուծման կամ գոնե իրավիճակի մեղմացման առաջին քայլը Փաշինյանի հրաժարականն է: - Միգուցե մեղմացնելու համար իրենք ունեն ինչ-որ պլան, մեխանիզմ, թող հրապապարկեն դա, եւ ով իշխանության է այսօր, այդ մեխանիզմը, եթե լավն է, կիրառի։ Ո՞րն է խնիդրը, ի՞նչ է տալիս փոփոխությունը, ի՞նչ կարող են անել իրենք, որ չի կարող անել Նիկոլ Փաշինյանն այսօր: Բացի այս՝ հետեւյալ խնդիրը կա. երեկ եւ ասյօր ովքե՞ր էին ասում, որ պետք է հրաժարական տա, որ դեռ հնարավորություն կա եւ այլն, ասում էին հիմնականում նրանք, որոնք 2018 թվականին հանրության բացարձակ մեծամասնության կողմից դիտարկվելով որպես հակաժողովրդավարական, հակասահամանադրական, հանցագործ խմբավորումներ, քաղաքացիական դիմադրության լայնամասշտաբ արշավի միջոցով հեռացվել են իշխանությունից։ Ինչո՞ւ պետք է ներկայիս իշխանությունը ընդունի նրանց պահանջը, ի՞նչ սկզբունքով։ Նրանք չունեն լեգիտիմություն, նրանք ներկայացնում են հասարակության բացարձակ փորքրամասնությունը, եթե ինչ-որ մեկին ներկայացնում են… Ովքե՞ր կարող են ներկայացնել որոշակի պահանջներ իշխանությունների նկատմամբ. նրանք, որոնք ընտրել են իշխանություններին, եւ դա բացարձակ մեծամասնությունն է, եւ նրանք, որոնք ընդունում են ժողովրդավարական սկզբունքները, կրողն են այդ սկզբունքների, այս կամ այն ձեւով իրենց ներդրումն են ունեցել ժողովրդավարական Հայաստանի կայացման գործընթացում։ - Վարչապետի հրաժարականի դեպքում ժողովրդավարությունը չի՞ պահպանվի։ - Կայացած ժողովրդավարական երկրներում, որպես կանոն, որեւէ մեծ ձախողում ունենալուց հետո երկրի ղեկավարները հրաժարական են տալիս՝ անկախ նրանից, թե որքան է մեղքը: Դա շատ առողջ պրակտիկա է, դա նպաստում է նրան, որ երկրի ղեկավարներն ավելի արդյունավետ աշխատեն: Սակայն Հայաստանը դեռեւս լիարժեք կայացած ժողովրդավարություն չէ, իսկ դա ենթադրում է, որ հնարավոր է՝ կտրուկ իշխանափոխության արդյունքում Հայաստանում հաստատվի բռնապետություն։ Նման բան կայացած ժողովրդավար պետություններում հնարավոր չէ։ Եթե լինում են ընտրություններ, դրա արդյունքում եկած իշխանությունը, նույնիսկ եթե վատ իշխանություն լինի, միեւնույն է՝ չի կարող ամբողջ ժողովրդավարությունը վերացնել ու բռնապետություն հաստատել։ Կարող է վատ կառավարում իրականացնել, կարող է սահմանափակել ժողովրդավարական որոշակի մեխանիզմներ, բայց ամբողջությամբ վերացնել չի կարող՝ ժողովրդավարական ինստիտուտները թույլ չեն տա։ Հիմա Հայաստանի նման երկրներում իրավիճակը մի փոքր այլ է՝ չկան կայուն ժողովրդավարական ինստիտուտներ։ Այդ պատճառով կա վտանգ, որ այսօր կտրուկ իշխանափոխությունը՝ առանց ժողովրդավարական ընտրությունների համար համապատասխան մթնոլորտ ձեւավորելու, առանց ժողովրդավարական ընտրական ինստիտուտների ամբողջական ձեւավորման, առանց կուսակցությունների մասին նոր օրենքի, առանց ԶԼՄ դաշտի կարգավորման եւ այլնի՝ կարող է հանգեցնել բռնապետության հաստատման՝ հաշվի առնելով այն հանգամանքը, թե ովքեր են այսօր ակտիվություն ցուցաբերում փողոցում եւ ինչպես են շահարկում մարդկանց էմոցիաները։ Հիմա, արագ իշխանափոխության արդյունքում կարող են հակաժողովրդավարական, բռնապետական, ծայրահեղ աջ-պոպուլիստական օրակարգ առաջ տանող որոշակի շրջանակներ գալ իշխանության։ Հանրությունը կուզենա երաշխիքներ ունենալ, որ, որ Փաշինյանի հրաժարականի դեպքում Հայաստանում բռնապետություն կամ օլիգախիկ համակարգ չի հաստատվի: - Այս պահից ի՞նչ առաջնահերթ անելիքներ ունեն Կառավարությունն ու հանրությունը, ի՞նչ պիտի արվի։ - Նախ պետք է ամեն ինչ անել, որպեսզի երկրում կայունություն լինի, ապահովվի քաղաքացիների անվտանգությունը, ինստիտուտների անվտանգությունը եւ արդյունավետ գործունեությունը։ 2-րդ կարեւոր բանը` ապահովել, որպեսզի ժողովրդավարական մեխանիզմները անհապաղ աշխատեն եւ չլինի կառավարման, քաղաքական ճգնաժամ ու, բնականաբար, այդ ամենին զուգահեռ արդեն քաղաքական-դիվանագիտական լուրջ գործունեության կարիք կա, որ համաձայնագրի տարբեր անհասկանալի հարցերի ճշգրտում ու հայանպա՛ստ ճշգրտում իրականացվի։  Վերջինը ենթադրում է լուրջ աշխատանք գործընկերների հետ, Մինսկի խմբի համանախագահների հետ, միջազգային տարբեր կառույցների հետ, ամեն հնարավորը պետք է արվի, որ դեռեւս ամբողջությամբ չհստակեցված կետերը մեր օգտին լինեն։ Այդ հնարավորությունները, կարծում եմ, այսօր կան, մանավանդ, հաշվի առնելով Մինսկի խմբի համանախագահների պատրաստակամությունը, մասնավորապես՝ Ֆրանսիայի։ Նրանք նույնիսկ ուղղակիորեն են ասում, որ ջանքեր կգործադրեն՝ Հայաստանի շահերը հնարավորինս պահելու համար։  Բնականաբար, այս ամենը ենթադրում է, որ հեղաշրջման որեւէ փորձ պետք է չեզոքացվի, չեզոքացվի սահմանադրական ճանապարհով, առանց բախումների։ Հիմա նաեւ անկախ Հայաստանի գոյության, սուվերենության հարցն է լուծվում, ու եթե հանկարծ լինեն բախումներ, որոնք վերածվեն քաղաքացիական պատերազմի, այս դեպքում Հայաստանը կարող է իր անկախությունը ուղղակի կորցնել։ Հայարփի Բաղդասարյան
21:08 - 13 նոյեմբերի, 2020
Հայհոյանքներով ու սպառնալիքներով լի տեսանյութն ինչպես է հայտնվել Հրապարակի լեդ էկրանին․ Քաղաքապետարանի պարզաբանումը |armtimes.com|

Հայհոյանքներով ու սպառնալիքներով լի տեսանյութն ինչպես է հայտնվել Հրապարակի լեդ էկրանին․ Քաղաքապետարանի պարզաբանումը |armtimes.com|

armtimes.com: Երեւանի քաղաքապետարանը նոյեմբերի 9-ից ապամոնտաժել է Հանրապետության հրապարակում իրենց կողմից տեղադրված էկրանը։ Այս մասին հայտնեցին Երեւանի քաղաքապետարանի տեղեկատվության եւ հասարակայնության հետ կապերի վարչությունից։   «Նոր լեդ էկրանը տեղադրվել է ՀՀ կառավարության նախաձեռնությաբ, նպատակը՝ վարչապետ Նիկոլ Փաշինյանի ուղերձը տարածելն է եղել։ Ինչ վերաբերում է վերոնշյալ տեսանյութին, ապա հավելյալ տեղեկացրեցին, որ ուղերձից հետո, իրենց անհայտ պատճառներով, սխալմունքի հետեւանքով էկրանին է հայտնվել զինվորականի այդ տեսանյութը»,- ասացին վարչությունից։ Նշենք, որ տեսանյութին անդրադարձել էր նաև ՀՀ ՄԻՊ Արման Թաթոյանը՝ նշելով, որ դատապարտելի է Հանրապետության հրապարակում տեղադրված մեծ էկրանին տեսանյութի ցուցադրումը, որը պարունակում է հայհոյանք ու ատելություն։ Շարունակությունը՝ armtimes.com-ում։  
16:55 - 13 նոյեմբերի, 2020
Կապամոնտաժվեն Բագրատաշենի նոր կամրջի շինարարության գոտում գտնվող շինություններն ու կառուցվածքները

Կապամոնտաժվեն Բագրատաշենի նոր կամրջի շինարարության գոտում գտնվող շինություններն ու կառուցվածքները

ՀՀ կառավարության 31.10.2020թ. թիվ 1746-Ա որոշմամբ թույլատրվել է Հայաստանի և Վրաստանի պետական սահմանի Սադախլո-Բագրատաշեն անցման կետի տարածքում նոր կամրջի շինարարության նպատակով օտարման գոտու սահմաններում տեղակայված‚ ՀՀ սեփականություն հանդիսացող և Տավուշի մարզի Այրում համայնքի Բագրատաշեն գյուղում տեղակայված և ՀՀ ԱԱԾ-ին  ամրացված 357.58 քմ ծածկարանի‚ 6 տաղավարների ապամոնտաժման‚ 26 մ երկարությամբ պատի և 43 քմ մակերեսով տանիքավոր մայթի քանդման աշխատանքների իրականացումը։ Կառավարության նույն որոշմամբ թույլատրվել է քանդել նաև կամրջի օտարման գոտում գտնվող և ՀՀ պետական եկամուտների կոմիտեին ամրացված 84 քմ մակերեսով շենքը։ Նշված շինությունների ու ենթակառուցվածքների քանդման աշխատանքները կիրականացվեն կամրջի շինարարությունն իրականացնող կապալառու կազմակերպության՝ իրանական Tunnel Sadd Ariana ընկերության կողմից՝ օրենսդրական և ենթաօրենսդրական նորմատիվ իրավական ակտերով սահմանված կարգով։ Հողերի օտարման գործընթացից ու տարածքում առկա նշված շինության և կառուցվածքների ապամոնտաժումից հետո կմեկնարկի Բագրատաշենի սահմանային անցակետի նոր կամրջի շինարարությունը։ Սադախլո-Բագրատաշեն անցման կետի տարածքում նոր կամրջի կառուցումը հայ-վրացական համատեղ նախագիծ է։ Պահպանվելու և ամրացվելու է նաև հին կամուրջը: Այսպիսով հին կամուրջը կարող է ծառայել որպես այլընտրանքային ճանապարհ սահմանային անցակետում խցանումների ժամանակ՝ ապահովելով արագ երթևեկը:
09:34 - 09 նոյեմբերի, 2020
Փոփոխություններ են կատարվել ՀՀ մուտք գործելիս ինքնամեկուսացման և կորոնավիրուսի թեստը հանձնելու գործընթացներում

Փոփոխություններ են կատարվել ՀՀ մուտք գործելիս ինքնամեկուսացման և կորոնավիրուսի թեստը հանձնելու գործընթացներում

2020 թ․ հոկտեմբերի 31-ին ՀՀ կառավարությունն ընդունել է N 1756-Ն որոշումը, որով փոփոխություն է կատարվել ՀՀ մուտք գործելիս ինքնամեկուսացման և կորոնավիրուսի  թեստը հանձնելու գործընթացում։ Այս մասին տեղեկացնում է Արտաքին գործերի նախարարության պաշտոնական կայքը։ Ըստ վերոնշյալ որոշման` Եթե ՀՀ մուտք գործելիս անձը ներկայացնում է առավելագույնը 72 ժամ վաղեմության Covid-19 բացասական թեստ ու այն հիմնավորող փաստաթղթեր, ազատվում է ինքնամեկուսացումից։  Եթե առկա չէ Covid-19 բացասական թեստ, անձը պետք է պարտադիր թեստ հանձնի օդանավակայանում կամ ցամաքային սահմանի անցման կետում տեղակայված նմուշառման կետերում և պարտադիր ինքնամեկուսանա՝ մինչև ՊՇՌ հետազոտության բացասական արդյունքի ստացումը։  Կառավարության նոր որոշմամբ՝ ՀՀ տարածք մուտք գործելիս ներկայացվում է կորոնավիրուսի (COVID-19) ախտորոշման ՊՇՌ հետազոտության բացասական արդյունքը հավաստող սերտիֆիկատ՝ առավելագույնը 72 ժամ վաղեմության: Սերտիֆիկատը պետք է լինի հայերեն կամ ռուսերեն կամ անգլերեն։ Պետք է կցվի ձևաթուղթ՝ ստորագրված ու կնիքով, որում առկա կլինեն հետազոտությունն իրականացրած կազմակերպության բոլոր կոնտակտային տվյալները, ղեկավարի անունը, հետազոտված անձի անունը և ազգանունը, անձը հաստատող փաստաթղթի համարը, ծննդյան տարեթիվը, հետազոտության արդյունքը:  Առողջապահական և աշխատանքի տեսչական մարմնի կողմից սահմանային անցման կետում անհապաղ կատարվում է զննություն (այդ թվում` հեռահար ջերմաչափում, արտաքին զննություն, վարակին բնորոշ կլինիկական ախտանիշերի դեպքում լրացուցիչ հարցումներ), ստուգվում է սերտիֆիկատի առկայությունը։  Զննության արդյունքներով անձը հոսպիտալացվում է, եթե առկա են համապատասխան ախտանշաններ: Եթե վերը նշված սահմանված ձեւի սերտիֆիկատ առկա չէ և  հոսպիտալացման կարիք չկա, ապա մյուս բոլոր դեպքերում անձը ենթակա է ՊՇՌ հետազոտության համար նմուշառման՝ օդանավակայանում կամ ցամաքային սահմանի անցման կետում տեղակայված նմուշառման կետերում և պարտադիր ինքնամեկուսացման՝ մինչև ՊՇՌ հետազոտության բացասական արդյունքի ստացումը:  Նմուշառման կետերն իրականացնում են նմուշառումը և անձի տվյալները մուտքագրում և ինքնամեկուսացումը գրանցում ԱՐՄԵԴ համակարգում՝ անձը հաստատող փաստաթղթի հիման վրա, ստուգելով կոնտակտային հեռախոսահամարի իսկությունը՝ նշված հեռախոսահամարին զանգ կատարելու միջոցով: Նմուշառումից հետո նմուշառման կետի կողմից ժամանողին տրամադրվում է նմուշառումը և ինքնամեկուսացման գրանցումը հավաստող փաստաթուղթ:  ՊՇՌ հետազոտությունն իրականացվում է ժամանող անձի հաշվին: ՊՇՌ հետազոտության արդյունքները գրանցվում են ԱՐՄԵԴ համակարգում և տրամադրվում են հետազոտված անձին ոչ ուշ, քան 48 ժամվա ընթացքում: ՊՇՌ հետազոտության բացասական արդյունքի դեպքում անձը դուրս է գալիս ինքնամեկուսացումից:
17:35 - 05 նոյեմբերի, 2020