Ինֆոքոմ

Կրեմլը հետևում է ՌԴ դեմ ԵՄ պատժամիջոցների վեցերորդ փաթեթի նախապատրաստմանը․ Պեսկով

Կրեմլը հետևում է Ռուսաստանի դեմ ԵՄ պատժամիջոցների վեցերորդ փաթեթի նախապատրաստման գործընթացին՝ հաշվարկելով իրադարձությունների զարգացման հնարավոր տարբերակները, ՏԱՍՍ-ի փոխանցմամբ՝ լրագրողներին ասել է Ռուսաստանի նախագահի մամուլի խոսնակ Դմիտրի Պեսկովը։ «Սրանք դեռ պլաններ են, այնտեղ քննարկումը շարունակվում է»,- ասել է նա։ Այսպես է Կրեմլի ներկայացուցիչը մեկնաբանել եվրադիվանագիտության ղեկավար Ժոզեպ Բորելի խոսքերն այն մասին, որ Եվրամիությունը նախապատրաստում է Ռուսաստանի դեմ պատժամիջոցների վեցերորդ փաթեթը, որի շրջանակում ռուսական որոշ բանկեր կանջատվեն SWIFT-ից, ապատեղեկատվության համար պատասխանատուների նկատմամբ միջոցներ կձեռնարկվեն և ռուսական նավթի ներկրման դեմ պայքարը կշարունակվի։ Պեսկովի խոսքով՝ այն երկրները, որոնք փորձում են վնաս հասցնել Ռուսաստանին՝ պատժամիջոցներ կիրառելով, ստիպված են լինելու նույնպես մեծ գին վճարել։ «Դա երկսայր զենք է։ Փորձելով վնաս հասցնել մեզ՝ նրանք նույնպես ստիպված կլինեն մեծ գին վճարել, և արդեն անում են դա։ Եվ այդ պատժամիջոցների գինը Եվրոպայի քաղաքացիների համար ավելանալու է ամեն օր»,- ասել է Կրեմլի ներկայացուցիչը։ Նորա Վանյան

19:21 - 04 մայիսի, 2022

ԵՄ-ն հայտարարել է Ռուսաստանի դեմ պատժամիջոցների վեցերորդ փաթեթում ռուսական նավթի ներառման մասին

Եվրամիությունն այսօր հայտարարել է Ռուսաստանի դեմ ամենախիստ պատժամիջոցների սահմանման մասին, որոնք վերաբերում են նաև նավթի նկատմամբ փուլային էմբարգոյի կիրառմանը։ Սա տեղի է ունեցել Կիևի այն հայտարարության ֆոնին, որ Մոսկվան ուժեղացնում է գրոհն Ուկրաինայի արևելքում, և որ Ռուսաստանի դաշնակից Բելառուսը լայնամասշտաբ զորավարժություններ է հայտարարել, գրում է Reuters-ը։ Եվրահանձնաժողովն առաջարկել է վեց ամսվա ընթացքում փուլ առ փուլ հրաժարվել ռուսական անմշակ նավթի և նավթամթերքի մատակարարումներից մինչև 2022 թ-ի ավարտը։ Այս հայտարարության պատճառով «Բրենտ» տեսակի նավթի գներն աճել են 4%-ով՝ հասնելով մեկ բարելի դիմաց ավելի քան 109 դոլարի։ «[Նախագահ Վլադիմիր] Պուտինը պետք է բարձր գին վճարի իր դաժան ագրեսիայի համար»,- ասել է Եվրահանձնաժողովի նախագահ Ուրսուլա ֆոն դեր Լյայենը։ Հունգարիան և Սլովակիան ցանկանում են դեռևս չմասնակցել նավթի էմբարգոյին, հայտնել են Reuters-ի աղբյուրները։ Ֆոն դեր Լյայենը հայտարարել է նաև ռուսական «Սբերբանկի» և ևս երկու բանկերի, պետական երեք հեռուստաընկերությունների դեմ սահմանափակումների, ինչպես նաև անհատական պատժամիջոցների մասին։ Նորա Վանյան

18:33 - 04 մայիսի, 2022

Ընդդիմությունը Փաշինյանին հրաժարականի պահանջ ներկայացրեց և լքեց դահլիճը, վերջինս էլ արձագանքեց՝ «ոնց միշտ փախել եք, տենց միշտ փախնելու եք»

17:32 - 04 մայիսի, 2022

Վանեցյանը հանրահավաքի ժամանակ Քոչարյանի ունեցվածքի մասին չի խոսել․ FreeNews-ը կեղծում է

Կառավարող ուժի քարոզչամեքենայի մաս կազմող FreeNews.am լրատվականը, որն ունի վերգետնյա հեռարձակման իրավունք, այսօր հրապարակել է «Վանեցյանը հանրահավաքին՝ Քոչարյանի միլիոնների մասին» վերտառությամբ մի տեսանյութ, որում երեւում են ընդդիմադիրների վերջին հանրահավաքներից տարբեր կադրեր, ֆոնին էլ հնչում է ԱԺ «Պատիվ ունեմ» խմբակցության ղեկավար Արթուր Վանեցյանի խոսքը։ Տեսանյութում, մասնավորապես, ցուցադրվում է ընդդիմադիրների հանրահավաքներից մեկին «Հայաստան» դաշինքի առաջնորդ Ռոբերտ Քոչարյանի, ապա Արթուր Վանեցյանի մասնակցության դրվագը, իսկ կադրում զուգահեռաբար վերջինիս հայտարարությունն է լսվում Ռոբերտ Քոչարյանի ունեցվածքի մասին․ «Ունենք ցուցմունք, Ռոբերտ Քոչարյանի ընտանիքի ունեցվածքի մասին, որ ինքը հեռուստատեսությամբ հանդես է գալիս եւ ասում՝ մենք ոչ մի բան չունենք, փաստերով, փաստերով կխոսենք եւ կհրապարակեմ՝ ով ինչ ունի եւ ոնց ա ձեռք բերել, ոնց ա ձեռք բերել «Կոնգրես» հյուրանոցը 6 մլն դոլար կաշառք վերցնելու արդյունքում, եւ մնացած այլ-այլ ունեցվածքները։ Մի խոսքով՝ ունենք՝ սխեման ոնց ա գալիս եւ հասնում, Ռոբերտ Քոչարյանի ընտանիքը վերջում դառնում սեփականատեր, եւ ունենք էդ գումարը ոնց փոխանցվեց Քոչարյանի ընտանիքին, խոսքը գնում ա հարյուրմիլիոնավոր դոլարների մասին, մի մասը՝ դրսի բանկերում, մի մասը՝ ստեղի բանկերում»։ Վանեցյանը, սակայն, այս հայտարարությունը չի արել ընդդիմադիրների հանրահավաքի ժամանակ, ինչպես փորձ է արել ներկայացնել լրատվականը։ Այն, իրականում, գրեթե չորս տարվա վաղեմություն ունի․ 2018 թվականի սեպտեմբերի 11-ին, երբ Վանեցյանը դեռ Ազգային անվտանգության ծառայության տնօրենն էր, Քոչարյանի ունեցվածքին վերաբերող այդ տեղեկությունները հրապարակեց իր ու այդ ժամանակ Հատուկ քննչական ծառայության, այժմ Հակակոռուպցիոն կոմիտեի պետ Սասուն Խաչատրյանի գաղտնալսված հայտնի հեռախոսազրույցի հրապարակումից (որի ժամանակ վերջիններս «Մարտի 1»-ի գործն էին քննարկում) հետո հրավիրված ասուլիսի ընթացքում։ FreeNews-ը Վանեցյանի այդ հայտարարությունից վերցրել է ձայնն ու փորձել սինխրոնացնել հանրահավքներից մեկի ժամանակ ելույթ ունեցող Վանեցյանի շուրթերի շարժումներին, սակայ տեսանյութը փոքր-ինչ ուշադիր նայելիս ակնհայտ է դառնում, որ նրա արտաբերած բառերն ու հնչող ձայնը համապատասխան չեն։ Կադրը, որտեղ Վանեցյանն, իբր, Քոչարյանի ունեցվածքի մասին է խոսել, մայիսի 2-ին Ֆրանսիայի հրապարակում ունեցած ելույթից է, որտեղ Վանեցյանը լրիվ այլ բանի մասին է խոսում, իսկ ավելի կոնկրետ՝ օրվա կառավարող ուժին կոչ է անում հեռանալ՝ պնդելով, որ վերջինս ձախողել է բոլոր ուղղություններով։ Իսկ մյուս կադրը, որտեղ Քոչարյանն է երեւում՝ հայացքը ուղղված Ֆրանսիայի հրապարակում տեղադրված բեմահարթակին, դարձյալ նույն օրվա հանրահավաքից է, սակայն այդ դրվագի ժամանակ ելույթ էր ունենում ոչ թե Վանեցյանը, այլ ընդդիմության առաջնորդներից Իշխան Սաղաթելյանը, եւ Քոչարյանի հայացքը ուղղված էր նրան։ Այսպիսով, FreeNews լրատվական կայքը, որի գլխավոր խմբագիրը եւ տնօրենը Ազգային ժողովի նախագահ Ալեն Սիմոնյանի կինն է, հրապարակել է տեսանյութ, որտեղ հնչող հայտարարությունը, թեեւ իրականությանը համապատասխանում է, սակայն այն ժամանակագրական կեղծիք է պարունակում․ Արթուր Վանեցյանն ընդդիմության հանրահավաքի ժամանակ իր ելույթում Քոչարյանի ունեցվածքի մասին չի խոսել։ Այդ հայտարարությունն արվել է, երբ Վանեցյանը ԱԱԾ տնօրենն էր, իսկ Ռոբերտ Քոչարյանը՝ Մարտի 1-ի գործով մեղադրյալ։ Հայարփի Բաղդասարյան

16:04 - 04 մայիսի, 2022

Անչափահասներ են բերման ենթարկվել, և մեր միջամտությամբ անմիջապես ազատ են արձակվել․ Գրիգորյանը անդրադարձավ ՄԻՊ արագ արձագանքման խմբերի աշխատանքին

«Քաղաքացիական պայմանագիր խմբակցության պատգամավոր Լիլիթ Ստեփանյանը այսօր՝ ՄԻՊ տարեկան զեկույցի ներկայացման ընթացքում Քրիստինե Գրիգորյանին ոստիկանության բաժանմունքներում ՄԻՊ գրասենյակի արագ արձագանքման խմբերի հավաքած փաստերի մասին․ «Երեկ ՄԻՊ գրասենյակը հաղորդագրություն տարածեց, ըստ որի ՄԻՊ արագ արձագանքման խմբերը այցելել են ՀՀ-ի, մասնավորապես Երևան քաղաքի 8 ոստիկանության բաժանմունք, և արձանագրել են որոշ դեպքեր։ Նույն իրականությունը մենք տեսնում ենք ԶԼՄ-ներով պարբերաբար լուսաբանվող կադրերում մի քիչ այլ տեսանկյունից, մասնավորապես այն, որ իբր, որոշ դեպքերում խաղաղ ակցիա իրականացնողները ինչպես են ցանկանում սադրել ուժայինների աշխատակիցներին, ամեն գնով տանել բախման, որպեսզի կարողանան իրենց քաղաքական ցանկություններին հագուրդ տալ։Արցախը Երևանում փրկողների քաղաքական իրական ցանկությունների մասին ՀՀ յուրաքանչյուր քաղաքացու է հայտնի, ես կցանկանամ, որպեսզի դուք առավել մանրամասն խոսեք ոստիկանության բաժանմունքներում ձեր կողմից արձանագրված փաստերի մասին, որոնք գուցե տեղ չեն գտել կամ ևս մեկ անգամ հարկ եք համարում նշել ԱԺ ամբիոնից»,- հետաքրքվեց պատգամավորը։ Քրիստինե Գրիգորյանն էլ նշեց, որ 3 օրից ավելի է, ինչ ՄԻՊ խմբերը ոստիկանության բաժանմունքներում աշխատում են․ «Երեկ մենք նաև այցելել ենք Գեղարքունիքի մարզի Սևան քաղաքի ոստիկանության բաժին։ Հիմնական խնդիրները, որ արձանագրել ենք, վերաբերում են բերման ենթարկված անձանց իրավունքների չպարզաբանման խնդիրներին, որոշ դեպքերում արձանագրել ենք 3 ժամից ավելի երկար պահման դեպքեր, ընդ որում՝ դրանք արձանագրումներն են են, որոնք կրել են շարունակական բնույթ, արձանագրել ենք դեպքեր, երբ անչափահասներ են բերման ենթարկվել, և մեր միջամտությամբ անմիջապես ազատ են արձակվել»։ Պաշտպանը նշեց՝ հիմնականում արձանագրել են խնդիրներ, որոնք վերաբերելի են անձի՝ լռության իրավունքից օգտվելու խոչընդոտմանը կամ որոշակիորեն կամ ստիպողաբար անձանց նույնականացմանը ոստիկանության կողմից։ «Սա անընդունելի պրակտիկա է։ Հիմնական խումբ խնդիրների մեջ է բերման ենթարկելիս ոստիկանության ծառայողների կողմից անհամաչափ ուժի կիրառումը, որոշ դեպքերում մենք փաստեր ունենք։ Բնականաբար յուրաքանչյուր առանձին դեպքում մենք վերլուծում ենք, թե տվյալ իրավիճակում բերման ենթարկող անձի գործողությունները որքանով են հիմքեր ստեղծում այդ ինտենսիվության, ուժի կիրառման համար։ Ցավալիորեն նաև ունեցանք դեպք, որ ոստիկանի ծառայողի կողմից բերման ենթարկման ընթացքում, երբ արդեն որևէ խոչընդոտ անձը չէր կարող ներկայացնել, ունեինք նաև գլխի շրջանում հատուկ հարվածների դեպքեր»։ Երեկ մարդու իրավունքների պաշտպանը հայտարարություն էր տարածել այն մասին, որ որոշ փաստաբաններ բերման ենթարկված անձանց ուղղորդել են առանձնազրույցներ չունենալ ՄԻՊ աշխատակիցների հետ և որևէ տեղեկություն նրանց չհայտնել։ Անդրադառնալով այս հայտարարությանը՝ Գրիգորյանն պնդեց՝ խոսքը քչաթիվ փաստաբանների մասին է։ «Վստահաբար կարող եմ պնդել, որ սրանք եղել են անհատական նախաձեռնություններ, որովհետև պիտի ասեմ, որ Փաստաբանների պալատի հետ պաշտպանի հաստատությունը ավանդաբար լավ համագործակցային հարաբերություններ ունի, և սա մի ուղղություն է, որ ես նույնպես շատ մեծ ակտիվությամբ շարունակելու եմ։ Պիտի նշեմ, որ այդ փաստաբանները անուն հռչակած կամ հանրության շրջանում հայտնի փաստաբաններ չէին, ի պատիվ շատ փաստաբանների, ում հետ մեր արագ արձագանքման խմբերը հանդիպել են բաժիններում, փաստաբանները ցույց են տվել շատ համագործակցային վարքագիծ և բարձր են գնահատել պաշտպանի աշխատակազմի արագ արձագանքման խմբերի արձագանքը»։

13:41 - 04 մայիսի, 2022

Քողարկված հեղափոխականություն է ասպարեզ եկել․ Վիգեն Խաչատրյանը անդրադարձավ ընդդիմության ակցիաներին

Ազգային ժողովի «Քաղաքացիական պայմանագիր» խմբակցության պատգամավոր Վիգեն Խաչատրյանը այսօր՝ ԱԺ նիստի ընթացքում անդրադարձավ ընդդիմության ակցիաներին։«Նրանց անցյալում սպասարկող որոշ ուժային կառույցներ շարունակում են իրենց գործունեությունը, անօրինական ձևով հարստություն ձեռք բերված որոշ ճարպիկներ փորձում են էլ ավելի հարստություն ունենալ։ Գործարար աշխարհին պատկանող մեքենաներ են դուրս գալիս ու փողոց են փակում, փոխարենը մարդկանց սպասարկեն ու ճանապարհները սարքեն»,- ասաց պատգամավորը։ Խաչատրյանի խոսքով՝ այս իրավիճակում օրենսդրական փոփոխություններ են անհրաժեշտ․ «Մի բան է, երբ իշխանությունը բռնազավթված է, հասարակությունը՝ համոզված է, որ կաշառքով, չգիտեմ ինչով ձևավորվել է և ընդվզում է, մի բան է, որ ինչ-որ հրոսակախմբեր օրինական իշխանությունը փորձում են ու տապալել ու զավթել իշխանություն։ Այդ ժամանակ անհնազանդություն չի սա, և այդ ժամանակ օրենք է պետք։ Ինչքա՞ն կարելի է փողոցը փակած պահել, ովքե՞ր կարող են փողոցը փակել, իսկ ինչ իրավունքներ ունեն քաղաքացիները, որոնք այդ ընթացքում տուժում են»։ Նա ասաց, որ քողարկված հեղափոխություն է ասպարեզ եկել․ «Քողարկված հեղափոխականություն է ասպարեզ եկել, պատահական չէ, որ այդ բառը կրող կուսակցություն է այս ամենը ղեկավարում, հեղափոխականությունը իր հետ բերում է տգիտություն, ցինիզմ, լկտիություն, ոչ մի լավ բան չի բերում էդ քողարկված հեղափոխականությունը։ Իրական հեղափոխությունը այլ բան է, որ ցանկալի չէ, բայց տեղի է ունենում»։ Խաչատրյանի խոսքերին արձագանքեց Ազգային ժողովի նախագահ Ալեն Սիմոնյանը․ «Մենք ենք «մեղավոր», որ էդ ընկերություններում փայ չենք մտել, էդ ընկերությունները մերը չեն, էդ ընկերությունները չեն վախենում իրենց քաղաքական դիրքորոշումը արտահայտեն, ժամանակին թե ընկերությունները, թե էն հայտնի շոու բիզնեսի աստղերը, որոնք վախում էին մի հատ ծպտուն հանեին, թե որոշ եկեղեցականներ, որոնք վախում էին քիթը Մարտի 1-ից սկսած իրանց էդ սև քողերի տակից հանեին, մենք ենք «մեղավոր»։ Ոչինչ, ես վստահ եմ, որ հետևություններ կարվի և վստահ եմ, որ այդ բոլոր խավերը նույնպես այդ հետևություններին շատ մոտիկից կծանոթանան»,-նշեց նա։

11:33 - 04 մայիսի, 2022

Կառավարությունը ՀՀ քաղաքացիություն ստանալու, դադարեցնելու համար դիմումները քննարկելու կարգն ու ժամկետները հաստատելու լիազորություն կունենա. նախագիծն առաջին ընթերցմամբ ընդունվեց

Ազգային ժողովը առաջին ընթերցմամբ ընդունեց կառավարության ներկայացրած նախագիծը, որով կառավարությունը ՀՀ քաղաքացիություն ստանալու, դադարեցնելու համար դիմումների կարգն ու ժամկետները հաստատելու հնարավորություն կունենա։ Կառավարությունը հնարավորություն կունենա նաև հաստատել եկեղեցական այն կառույցների ցանկը, որոնց կողմից տրված մկրտության մասին փաստաթուղթը համարվում է ազգությամբ հայ լինելը հաստատող փաստաթուղթ։ Նախագիծը ընդունվեց 69 կողմ ձայներով։ Օրինագիծը երեկ քննարկվել էր Ազգային ժողովի նիստում, այն ներկայացրել էր ՀՀ փոխոստիկանապետ Արա Ֆիդանյանը։

10:10 - 04 մայիսի, 2022

Այն, ինչ մենք տեսնում ենք, միանշանակ աթոռակռիվ հիշեցնող և որևէ նոր բովանդակություն չառաջարկող գործընթաց է․ Էդուարդ Աղաջանյանը՝ ընդդիմության բողոքի ակցիաների մասին

Այն, ինչ այսօր տեսնում ենք, միանշանակ աթոռակռիվ հիշեցնող և որևէ նոր բովանդակություն չառաջարկող գործընթաց է, որում նաև ներգրավված են անձինք, ում հետագիծն այլ բան ենթադրելու տեղիք չի տալիս։ ՍիվիլՆեթի տաղավարում հայտարարեց Ազգային ժողովի արտաքին հարաբերությունների մշտական հանձնաժողովի նախագահ Էդուարդ Աղաջանյանը։ «Այսօրվա, այսպես կոչված, անհնազանդության ակցիաները ոչ այլ ինչ են, քան կրկնօրինակում 2018-ի իրապես համաժողովրդական շարժման տակտիկական լուծումներով համեմված կամ ամբողջությամբ դրանցով պայմանավորված գործողություններ, որոնք ամբողջությամբ բովանդակազուրկ են։ 2018 թ․ կար օբյեկտիվ հանրային դժգոհություն, որը պայմանավորված էր օբյեկտիվ խնդիրներով, որոնք կուտակված էին 20 և ավելի տարիների ընթացքում, իսկ այն, ինչ մենք այսօր տեսնում ենք, միանշանակ աթոռակռիվ հիշեցնող և որևէ նոր բովանդակություն չառաջարկող գործընթաց է, որում նաև ներգրավված են անձինք, ում հետագիծն այլ բան ենթադրելու տեղիք չի տալիս»,- ասաց Աղաջանյանը։ Էդուարդ Աղաջանյանի խոսքով՝ մինչ օրս որևէ ընդդիմադիր քաղաքական գործիչ չի պատասխանել հետևյալ հարցին՝․ «Եթե դուք լինեիք իշխանություն թե՛ նախքան պատերազմը, թե՛ պատերազմից հետո, որո՞նք կլինեին ձեր քայլերը։ Ես ընդամենը մեկ անգամ ԳԵղամ Մանուկյանի կողմից լսել եմ մոտավորապե հետևյալ պատասխանը, որ մենք չեն անի սա, չենք անի երկրորդը, չենք անի երրորդը։ Հաջորդ հարցը վերաբերում է հետևյալին՝ իսկ ի՞նչ կանեք դուք՝ գալով իշխանությանը։ Հարցի պատասխանը անփոփոխ է՝ մենք չեն անի սա, չենք անի երկրորդը, չենք անի երրորդը»։ Էդուարդ Աղաջանյանը նշեց․ «Հետևելով վերջին օրերին ընդդիմադիր շարժման հարթակից հնչող ելույթներին՝ ես կարող եմ մի քանի արձանագրում անել․ Առաջինը և կարևորագույնը ընդդիմադիրների մոտ որևէ նոր բովանդակության իսպառ բացակայությունն է։ Որևէ նոր օրակարգ, որևէ նոր առաջարկություն, որևէ նոր պատճառ, որի համար ժողովուրդը պետք է ատքի կանգնի՝ ընդդեմ մեր իշխանության, ոտքի կանգնի որպես ընդդիմադիրների կողմնակից և ընդհանրապես նոր քաղաքական պրոցեսների մեջ ներգրավվի, ուղղակի գործնականում չկա»։ Անդրադառնալով ակցիաների ընթացքում ոստիկանության կողմից բռնության դեպքերին՝ Էդուարդ Աղաջանյանը նշեց․ «Ես կարծում եմ և վստահ եմ, որ բոլոր նման դեպքերը օբյեկտիվ քննության կարժանանան։ Ինչ վերաբերում է Ոստիկանության գործունեության ընդհանուր գնահատականին, ես կիսում եմ իմ գործընկերների գնահատականը, որ ընդհանուր առմամբ, Ոստիկանությունը պրոֆեսիոնալ կերպով կարողացել է իր առաջ դրված խնդիրը լուծել՝ մասնավորապես ապահովելով ակցիայի մասնակիցների անվտանգությունը մի կողմից, զուգահեռաբար նաև այլ քաղաքացիների իրավունքների պաշտպանությունը բավականին բարձր մակարդակով իրականացվել է Ոստիկանության կողմից։ Էդուարդ Աղաջանյանը անդրադարձավ նաև հարցին, թե արդյո՞ք Ադրբեջանի տարածքային ամբողջականությունը ճանաչել նշանակում է ճանաչել Արցախն էլ Ադրբեջանի կազմում․ «Մենք ևս Արցախի հարցը տարանջատում ենք և մշտապես տարանջատել ենք ձեր կողմից նշված հարցից։ Հայաստանը մշտապես հանդես է եկել հետևյալ դիրքորոշումից, որ Ղարաբաղյան հիմնախնդիրը երբևէ տարածքային վեճ չի եղել Հայաստանի համար։ Հայաստանը իր դիրքոշումն այս հարցում չի փոխել։ Հետևաբար, Ղարաբաղյան հիմնախնդիրը շարունակում է լինել ՀՀ համար արցախցիների ինքնորոշման, ժողովուրդների ինքնորոշման իրավունքի հարց և ոչ երբեք տարածքային վեճ Ադրբեջանի հետ»,- ասաց Աղաջանյանը։ Անդրադառնալով Մարիա Զախարովայի հայտարարությանը, թե Բրյուսելը յուրացնում է Հայաստան-Ռուսաստան- Ադբեջան համաձայնությունները, Աղաջանյանը նշեց․ «Ես չեմ կարծում, որ Ռուսաստանն անհանգստացած է այդ գործընթացով։ Ես տեղյակ եմ, որ վարչապետը բավականին հաճախ հեռախոսազանգեր է ունենում Ռուսաստանի նախագահի հետ, ԵԽ նախագահն է նաև շփվել Ռուսաստանի նախագահի հետ հենց նույն թեմայի վերաբերյալ։ Եվ հետևաբար, որակել այդ հայտարարությունը որպես անհանգստություն կամ անհանգստության արտահայտում, կարծում եմ՝ այդքան էլ տեղին չէ։ Կարծում եմ՝ Ռուսաստանը ևս պետք է շահագրգռված լինի, որ այն հարցերը, որոնք ինչ-ինչ օբյեկտիվ պատճառներով վերջիններիս միջնոդությամբ չի ստացվում լուծել, կամ դրանց լուծումը դանդաղում է, եթե որևէ երրորդ կաղմի միջնորդությունն աջակցում է այդ խնդիրների լուծմանը, դա ձեռնտու է առաջին հերթին նաև Ռուսաստանին»։ Աղաջանյանը անդրադարձավ նաև Ադրբեջանում պահվող գերիների հարցին․ «Մենք չենք մոռացել գերիներին․ թե՛ ԱԺ-ում՝ բոլոր հանդիպումների ժամանակ, թե՛ միջազգային կառույցներում՝ բոլոր հանդիպումների ժամանակ, գերիների հարցն առաջնային կարևորության հարց է, որը մշտապես դրվում է մեր գործընկերների սեղանին»։

20:30 - 03 մայիսի, 2022

Եվրամիությունն այս տարի ռուսական գազի երկու երրորդի փոխարինման պլան կներկայացնի

Եվրահանձնաժողովը մինչև մայիսի վերջ պլան կներկայացնի այն մասին, թե ինչպես կարող է Եվրամիությունը փոխարինել ռուսական գազի երկու երրորդը մինչև 2022 թ-ի ավարտը, հայտարարել է Եվրահանձնաժողովի էներգետիկայի հարցերով հանձնակատար Քադրի Սիմսոնը, գրում է Reuters-ը։ Եվրահանձնաժողովում ունեցած իր ելույթի ընթացքում Սիմսոնն ասել է, որ ԵՄ-ն դիմել է գազի բոլոր հիմնական մատակարարներին, որպեսզի նրանք օգնեն փոխարինել ռուսական գազն այլընտրանքով։ Այդ պլանի համաձայն՝ նախատեսվում է նաև կրճատել գազի օգտագործումը վերականգնվող էներգիայի օգտագործման կամ էներգախնայողության հաշվին։ Նորա Վանյան

18:57 - 03 մայիսի, 2022

Քաղաքացին ուզում է իմանալ՝ դեռ ինչքա՞ն պետք է վճարի պարբերաբար բացակայող պատգամավորներին․ Լիլիթ Կիրակոսյանը դիմում-պահանջագիր հրապարակեց

«Քաղաքացիական պայմանագիր» խմբակցության պատգամավոր Լիլիթ Կիրակոսյանը Ազգային ժողովում հայտարարեց, որ այսօր բազմաթիվ քաղաքացիներ իրենց են փոխանցել դիմում-պահանջագիր, որը խնդրել են նաեւ հրապարակել։ Կիրակոսյանի խոսքով, այդ դիմումի առաջին կետն այն է, որ ՀՀ քաղաքացին ցանկանում է իմանալ, թե դեռ ինչքա՞ն պետք է վճարի այն պատգամավորներին եւ խմբակցություններին, ովքեր կոչված են իրենց գործունեությունով ծառայել ժողովրդին եւ պետությանը, սակայն պարբերաբար բացակայում են, անգամ խուսափում են Կառավարության հետ հարց ու պատասխանից, որը առաջին հերթին հանրության տեղեկացված լինելու համար։ Ընթերցելով դիմումի երկրորդ կետը՝ պատգամավորն ասաց․ «Մեր երկրում տեղի է ունեցել «Հոկտեմբերի 27» ՝ մինչեւ վերջ չբացահայտված ահաբեկչություն, եւ այս պահին ԱԺ երկու ընդդիմադիր խմբակցությունների ղեկավարները այդ ժամանակ եղել են ղեկավար պաշտոնում, հիմա նրանց ղեկավարած ուժի ներկայացուցիչներ Հայկ Մամիջանյանը եւ Տիգրան Աբրահամյանը խոսում են, որ ունեն մեկ կրակոցի հնարավորություն կոնկրետ ուղղությամբ, եւ այն ուղղած է Նիկոլ Փաշինյանին։ Այս ամենը հաշվի առնելով՝ քաղաքացիները ունեն խիստ անհանգստություն՝ նոր «Հոկտեմբերի 27»-ի կրկնության հրահրման հետ կապված»,- հայտարարեց պատգամավորը։ Նրա խոսքով՝ քաղաքացիների հաջորդ պահանջը այն է, որ «Հայաստան» խմբակցության պատգամավոր Իշխան Սաղաթելյանը պարզ մեկնաբանի, թե ինչ է նշանակում հետեւյալ արտահայտությունը․ «Հայաստանում շարունակվում է Արցախի դրոշի հաղթարշավը»․ «Ցանկանում ենք իմանալ՝ հայերենում ընդունված հաղթարշավ բառը նա ճի՞շտ է ընկալում, որովհետեւ ըստ մեզ՝ Հայաստանն ու Արցախը կարող են համատեղ իրականացնել հաղթարշավ, սակայն բոլորովին այլ ուղղությամբ, եւ երկրորդ, Հայաստանը Արցախն օկուպացնողը չէ, որ նման հաղթարշավեր իրականացնի»,- ընթեթրցեց Կիրակոսյանը։ Չորրորդ կետի համաձայն՝ քաղաքացիները նշել են, որ 2020 թ նոյեմբերի 9-ից հետո հայտնի պատճառներով սրվեց հայաստանյան ներքաղաքական իրավիճակը, որը ծանր անդրադարձ ունեցավ ՀՀ քաղաքացիների հարաբերությունների վրա․ «Այս երկու խմբակցությունների որոշ ներկայացուցիչների կողմից եւ ներկայությամբ հնչել են հայ հանրությանը վիրավորող արտահայտություններ՝ թուրք, ժեխ ինչպես նաեւ սեռական բնույթի հայհոյանքներ եւ կրքերը վերջնական հանդարտեցնելու համար առ այսօր հավաքույթների լիդերների կողմից որեւէ կոչ, հայտարարություն եւ ներողության հայցման խոսք չի հնչել, ինչն էլ իր հերթին ստեղծում է արհեստական բաժանարար գծեր, որը նույնպես սպառնալիք է հասարակության անվտանգությանը եւ որակվում է որպես պառակտիչ գործունեության»։ Վերջին կետով էլ, ըստ պատգամավորի, քաղաքացիները պահանջել են, որ ընդդիմադիր «Հայաստան» խմբակցությունը հստակ պատասխանի՝ շարունակո՞ւմ է արդյոք 2021 թ նախընտրական քարոզարշավի ժամանակ իր քաղաքական ղեկավար Ռոբերտ Քոչարյանի հնչեցրած «մաշեցնելու ենք մինչեւ քոքը» արտահայտության օրակարգը, որը բնութագրվում է որպես քայքայիչ գործունեություն, որն էլ իր հերթին ԱԱԾ տիրույթում պետք է որ լիներ։ Ամփոփելով Լիլիթ Կիրակոսյանը հայտնեց, որ քաղաքացիները խնդրել են իրենց գնահատականը ստեղծած իրավիճակի շուրջ․ «Ձեր բարձրացրած պահանջները լավագույնն են բնութագրում եւ ամբողջացնում եւ նաեւ կիսում մեր գնահատականը ձեր բոլորի կողմից հնչեցված եւ այս թղթում խմբագրված բոլոր կարծիքների հետ»,- ասաց նա։ Միլենա Խաչիկյան

18:00 - 03 մայիսի, 2022

Արցախի կարգավորման հարցում դուք չունեք տեսլական, ունեք բաժակաճառ․ Հ․ Գրիգորյանը՝ ընդդիմադիրներին

«Քաղաքացիական պայմանագիր» խմբակցության պատգամավոր Հռիփսիմե Գրիգորյանի կարծիքով՝ ընդդիմությունը շարունակ ասում է՝ փրկենք Արցախը, սակայն այդպես էլ չի մանրամասնում, թե ինչպես։ Ազգային ժողովի այսօրվա նիստին պատգամավորը մանրամասն ելույթ ունեցավ՝ անդրադառնալով նաեւ ընդդիմադիրների՝ վերջին օրերին կազմակերպված բողոքի ակցիաներին։ Նա նախ արձանագրեց, որ ընդդիմադիր պատգամավորները, իր խոսքով՝ «Քոչարյան-Սարգսյան զույգի քաղաքական հենարան հանդիսացող խմբակցությունները» դահլիճում չեն, քանի որ բողոքի ցույցեր են անում՝ անունը դրած Արցախի փրկություն, սակայն ըստ պատգամավորի՝ ՀՀ քաղաքացիները հոյակապ տեսնում են, թե ովքեր են նրանք եւ ինչ նպատակով են դա անում․ «Ես հավատում եմ, որ կան մարդիկ, ովքեր մասնակցում են ցույցերին առանց ուղղորդման, իրենք իրենց սահմանադրական իրավունքն են իրացնում, եւ այստեղ խնդիր չկա, խնդիրները սկսվում են այն ժամանակ, երբ բովանդակության բացակայությունը համառորեն քողարկվում է չստացված գրագողությամբ»։ Պատգամավորը պարզաբանեց, թե ինչ նկատի ունի՝ բովանդակության բացակայություն ասելով․ «Ի՞նչ ենք լսում առավոտից իրիկուն․ փրկենք Արցախը, ձեր՝ Արցախը փրկելուն հավատացողներ դժվար լինեն, իսկ այ մարդիկ, ովքեր ապրել են Հայաստանում եւ Արցախում վերջին 20-30 տարիներին, եւ ճաշակել են ձեր կառավարման բարիքները, կազմում են մեր բնակչության մեծամասնությունը, հենց այս մարդիկ են ձեզ ասել՝ հեռացե՛ք, ավելին, մեզ էլ ասել են՝ եկե՛ք, կառավարե՛ք, պատերազմից հետո մենք իշխանությունը հետ ենք վերադարձրել ժողովրին եւ խնդրել, որ ժողովուրդը կրկին որոշի, թե ով պետք է իրեն առաջնորդի եւ դեպի ուր, եւ ժողովուրդը որոշել է, որ մեր քաղաքական թիմը իրեն պետք է առաջնորդի դեպի քաղաքականություն, դեպի զարգացում, եւ աշխարհում որեւէ մեկի մոտ կասկած չհարուցած ընտրությունների արդյունքներում ժողովուրդը ձեզ կրկին ասել է՝ ոչ»,- նշեց Գրիգորյանը՝ հավելելով․ «Ասում եք՝ փրկենք Արցախը, եւ ոչ մի բառ այն մասին, թե ինչպես։ Դուք քանի՞ երես ունենք, երբ պատերազմի ավարտից հետո ուրանում եք ձեր ոչմիթիզականությունը, մեզ՝ դավաճան ասում հողերը վերադարձրած չլինելու, պատերազմը չկանխելու համար»։ Ըստ Գրիգորյանի՝ ընդդիմադիրները հիմա հարթակից նորից դարձել եք ոչ միայն ոչմիթիզական, այլեւ վերբալ սպարապետներ․ «Հետ եք բերել Հադրութը, Շուշին, ծնկի եք բերել Ադրբեջանին, բայց Երեւանի կենտրոնում՝ հարթակից, եւ լավագույն օրինակը, թերեւս, թե ինչպես պետք է փրկեք Արցախը, Գեղամ Մանուկյանի՝ Պետրոս Ղազարյանին տված հարցազրույցում հնչեցրած պատասխանն է, թե հիմա հո ռազմաքաղաքական դասախոսություն չե՞մ կարդալու, իսկ երբ Պետրոս Ղազարյանը պնդեց, Մանուկյանն ասաց՝ դե մի անգամ հետ ենք բերել, էլի կբերենք»,- հիշեցրեց նա՝ հավելելով․ «Արձանագրենք, որ Արցախի կարգավորման հարցում դուք չունեք տեսլական, ունեք բաժակաճառ»։ Անդրադառնալով «չստացված գրագողությանը»՝ պատգամավորն ասաց, որ ընդդիմադիրները որոշել են կրկնել 2018-ի մեծ ու փոքր տեխնոլոգիաները, բայց էլի թարս են հասկացել․ «Ե՞րբ եք տեսել ցույցի կազմակերպիչը ոստիկան հայհոյի, սպառնա կամ համախոհներ ավելացնելու փորձերը ձախողելով՝ ասի՝ ջհանդամ միանաք, այսինքն՝ Լաոն չի զարթնում, ջհանդամ զարթնի՞։ Կամ այսօր Մանուկյան Գեղամ անունով դաշնակ պատգամավորը ուսանողներին ասում էր՝ թե չմիանաք, թքեք ձեր երեսներին, չե՞ք մտածել, որ ձեր ասած գործողությունը մարդիկ վաղուց արել են եւ հասցեագրել են լրիվ ուրիշ ուղղությամբ»։ Հիշեցնելով Արթուր Վանեցյանի՝ մի քանի օր առաջ արած հայտարարությունը, թե «Միացե՛ք, հայե՛ր» կարգախոսը ինքնաբուխ է ծնվել շարժման արդյունքում՝ Հռիփսիմե Գրիգորյանն ասաց․ «Մի կարգախոս էլ կա․ «Հայաստանի փրկությունը կախված է մեկ մարդուց, եւ այդ մեկ մարդը դու ես», բայց քանի դեռ ինքնաբուխ կերպով չեք օգտագործել սա, միշտ հիշեք, որ հենց դուք եք այն մարդը, ումից մարդիկ փրկվել են 4 տարի առաջ, իրենք իրենց փրկել են ձեզնից,որ այլեւս երբեք չթալանեք, չբռնանաք, չկործանեք»,- եզրափակեց պատգամավորը։ Միլենա Խաչիկյան

17:32 - 03 մայիսի, 2022

2021 թ․-ին աճել է ինչպես հանցագործությունների, այնպես էլ դրանց բացահայտման ցուցանիշը․ Արթուր Դավթյան

16:50 - 03 մայիսի, 2022

Մարիուպոլի «Ազովստալ» գործարանի տարածքում մարտերը վերսկսվել են

Ռուսական զորքերը սկսել են ուկրաինական Մարիուպոլ քաղաքում գտնվող «Ազովստալ» գործարանի գրոհը, հայտնում է Liga.net ուկրաինական առցանց պարբերականը՝ վկայակոչելով «Ազով» գնդի հրամանատարի տեղակալ Սվյատոսլավ Պալամարի խոսքերը։ «Մարիուպոլի պաշտպանները գիտեն, որ նախագահին զեկուցում են Մարիուպոլում տիրող իրավիճակի մասին […] Այդ պատճառով էլ նրանից կտրուկ գործողությունների են սպասում, քանի որ իրավիճակը շատ բարդ է», - ասել է Պալամարը։ Ռազմական լրագրող Անդրեյ Ցապլիենկոյի պնդմամբ՝ գրոհից առաջ ռուսական կողմը ժամեր շարունակ ռմբակոծել է «Ազովստալը»․ «Հրդեհ է բռնկվել, ծխի քուլաները երևում են Մարիուպոլի բոլոր թաղամասերից»։ Ռուսաստանի պաշտպանության նախարարության մամուլի ծառայությունը հայտնում է, որ «ռուսաստանցի զինծառայողները ԴԺՀ բանակի հետ միասին սկսել են ոչնչացնել Մարիուպոլի «Ազովստալ» գործարանի տարածքում զինյալների կրակակետերը՝ հրետանու և ավիացիայի կիրառմամբ»։ Նորա Վանյան

16:44 - 03 մայիսի, 2022

Հակակոռուպցիոն կոմիտեն հետաձգել է Նիկոլ Փաշինյանին որպես մեղադրյալ ներգրավելու միջնորդության լուծումը

ՀՀ հակակոռուպցիոն կոմիտեն հետաձգել է վարչապետ Նիկոլ Փաշինյանին պատերազմին առնչվող քրեական գործով որպես մեղադրյալ ներգրավելու միջնորդության լուծումը, մինչեւ միջնորդության վերաբերյալ որոշում ընդունելու համար էական հանգամանքների պարզումը։ Infocom-ի հարցին ի պատասխան՝ այս մասին տեղեկացրեց Հակակոռուպցիոն կոմիտեի մամուլի խոսնակ Մարինա Օհանջանյանը։ Նման հիմքով միջնորդության հետաձգումը նախատեսված է Քրեական դատավարության օրենսգրքի 102-րդ հոդվածի 2-րդ մասով։ Հիշեցնենք՝ օրեր առաջ Գլխավոր դատախազությունը հայտնել էր, որ ապրիլի 26-ին ստացել են պահանջ՝ 2020թ. արցախյան պատերազմի աղետալի հետևանքներին հանգեցրած պատճառների հանգամանքների վերաբերյալ ՀՀ հակակոռուպցիոն կոմիտեում քննվող քրեական գործով Փաշինյանին պետական դավաճանության, պաշտոնեական լիազորությունները չարաշահելու եւ պաշտոնեական լիազորությունները անցնելու հոդվածներով որպես մեղադրյալ ներգրավվելու մասին (ՀՀ քրեական օրենսգրքի 299-րդ հոդվածի 1-ին մաս, 308-րդ հոդվածի 2-րդ մաս եւ 309-րդ հոդվածի 3-րդ մաս): Հսկող դատախազի կողմից միջնորդությունն ուղարկվել էր վարույթն իրականացնող քննիչին՝ ՀՀ քրեական դատավարության օրենսգրքի 102-րդ և 199-րդ հոդվածներով սահմանված կարգով քննարկելու նպատակով:

15:43 - 03 մայիսի, 2022

Ռուսաստանի ԱԳՆ-ն Իսրայելին մեղադրել է «Կիևի նեոնացիստական ռեժիմը» սատարելու համար

Ռուսաստանի ԱԳՆ-ն «հակապատմական» է անվանել Իսրայելի արտգործնախարար Յայիր Լապիդի հայտարարությունները։ Նախօրեին նախարարը Ռուսաստանից պահանջել էր ներողություն խնդրել ՌԴ արտգործնախարար Սերգեյ Լավրովի այն հայտարարության մասին, որ, հավանաբար, «Ադոլֆ Հիտլերը նույնպես հրեական արյուն է ունեցել», գրում է «Կոմերսանտը»։ «Ուշադրություն ենք դարձրել Իսրայելի ԱԳ նախարարի հակապատմական հայտարարություններին, որոնք մեծ մասամբ բացատրում են Կիևի նեոնացիստական ռեժիմը սատարելու Իսրայելի ներկայիս կառավարության քաղաքականությունը»,- ասված է Թվիթերում ՌԴ ԱԳՆ հրապարակած հաղորդագրությունում։ Գերատեսչությունը պնդում է, որ «պատմությունը, ցավոք, գիտի հրեաների և նացիստների համագործակցության ողբերգական օրինակներ»։ ՌԴ ԱԳՆ կարծիքով՝ Ուկրաինայի նախագահ Վլադիմիր Զելենսկին «շահարկում է իր արմատները» և «թաքնվում ծագման հետևում և ծածկում իսկական նեոնացիստներին»։ «Նախագահի հրեական ծագումը երկրում նեոնացիզմի տարածումից պաշտպանվելու երաշխիք չէ։ Ի դեպ, Ուկրաինան այս առումով միակը չէ։ Լատվիայի նախագահ Է․ Լևիտսը նույնպես հրեական արմատներ ունի։ Եվ նույնպես «հաջողությամբ» քողարկում է «Վաֆեն ՍՍ»-ի վերականգնումը», - նշել է ԱԳՆ-ն՝ մեկնաբանելով Լատվիայի պաշտպանության նախարար Արտիս Պաբրիկսի կոչը՝ հարգելու լատվիական Waffen SS լեգիոնի՝ մարտի դաշտում ընկած մասնակիցների հիշատակը։ Նշենք, որ Սերգեյ Լավրովն իտալական Mediaset հեռուստաընկերությանը տված հարցազրույցում հայտարարել էր, որ Ուկրաինայի նախագահ Վլադիմիր Զելենսկու հրեական ծագումը չի նշանակում, որ երկրում նացիստներ չկան։ Դրանից հետո՝ մայիսի 2-ին, ՌԴ դեսպանը կանչվել էր Իսրայելի ԱԳՆ՝ բացատրություններ տալու։ Իսրայելի արտգործնախարարը Լավրովի հայտարարությունն անվանել էր «աններելի», ինչպես նաև «սարսափելի պատմական սխալ»։ ԱՄՆ Պետդեպն ու Իտալիայի վարչապետ Մարիո Դրագին նույնպես քննադատել էին Լավրովին։ Նորա Վանյան

15:27 - 03 մայիսի, 2022

Ի՞նչ խնդիրների են բախվում հաշմանդամություն ունեցող անձինք բուհերում [Ուսանողական 4]

ՀՊՄՀ և ԵՊՀ ուսանողներ Գոռ Ասատրյանը ու Վահան Դիշլանյանը պատմում են, թե որքանով են Հայաստանի բուհերը հարմարեցված հաշմանդամություն ունեցող անձանց համար, և ինչ խնդիրների են իրենք բախվում համալսարաններում:

15:07 - 03 մայիսի, 2022