Ուկրաինա

Ուկրաինան գտնվում է Արևելյան Եվրոպայում։ Այն հյուսիսից և հյուսիս-արևելքից սահմանակից է Ռուսաստանին, հյուսիս արևմուտքից՝ Բելառուսին, արևմուտքից՝ Լեհաստանին, Սլովակիային և Հունգարիային, հարավ արևմուտքից՝ Մոլդովային, հարավից և հարավ-արևելքից համապատասխանաբար Սև ծովին և Ազովի ծովին։

Այն 603,628 կմ² ցուցանիշով Եվրոպային հարակից երկրների մեջ Ռուսաստանի Դաշնությունից հետո երկրորդն է իր տարածքով։ Գործող նախագահը Վլադիմիր Զելենսկին է։

Չերնիգովի քաղաքապետը բնակիչներին հորդորել է պատրաստվել փողոցային մարտերի

Ուկրաինայի Չերնիգով քաղաքի քաղաքապետ Վլադիսլավ Ատրոշենկոն հորդորել է քաղաքի բնակիչներին պատրաստվել փողոցային մարտերի։ Ինչպես հայտնում է Unian-ը, այդ մասին քաղաքապետը հայտնել է տեսաուղերձի միջոցով։ «Բոլորս պետք է պատրաստվենք փողոցային մարտերի, նրանք, ովքեր գիտեն և հասկանում են, թե ինչի մասին է խոսքը՝ պատրաստեն հրկիզող խառնուրդներ», - ասել է Ատրոշենկոն։

14:15 - 26 փետրվարի, 2022

Միկրոնեզիան դիվանագիտական հարաբերությունները խզելու նոտա է հղել Ռուսաստանին |armenpress.am|

armenpress.am: Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտնել է, որ Միկրոնեզիան նոտա է ուղարկել Ռուսաստանի հետ դիվանագիտական հարաբերությունները խզելու վերաբերյալ: Այս մասին Զախարովան գրառում է կատարել «Տելեգրամ»-ի իր ալիքում: «Արևմուտքն արձագանքել է իրական աջակցություն ցուցաբերելու մասին Զելենսկիի կոչին. Միկրոնեզիայի Դաշնային Նահանգները նոտա են ուղարկել Ռուսաստանի հետ դիվանագիտական հարաբերությունները խզելու մասին»,- գրել է նա:

14:11 - 26 փետրվարի, 2022

Դոնեցկից ու Լուգանսկից Ռուսաստան է տարհանվել շուրջ 118 հազար մարդ |armenpress.am|

armenpress.am: Դոնեցկից ու Լուգանսկից փետրվարի 18-ից մինչ օրս Ռուսաստան տարհանված բնակիչների թիվը հասել է մոտ 118 հազարի: Այս մասին ՏԱՍՍ-ին հայտնել են ուժային կառույցներից: Լրատվական գործակալության զրուցակիցը հայտնել է, որ մոտ 118 հազարից ավելի քան 74 հազարն ունեն Ուկրաինայի, իսկ 43 հազարը՝ Ռուսաստանի քաղաքացիություն: Նրանց մեծ մասը հաստատվել է բարեկամների կամ ծանոթների մոտ, իսկ մյուսների համար ժամանակավոր կեցության վայրեր են ստեղծվել:

12:24 - 26 փետրվարի, 2022

Եկել է վճռական պահը՝ մեկընդմիշտ փակելու քննարկումը և որոշել ԵՄ-ին Ուկրաինայի անդամակցության հարցը․ Զելենսկի

Զելենսկին ասել է, որ Եվրախորհրդի ղեկավար Շառլ Միշելի հետ քննարկել է երկրին հետագա օգնությունը և հայտարարել, որ անհրաժեշտ է որոշում կայացնել ԵՄ-ին Ուկրաինայի անդամակցության վերաբերյալ։ «Եկել է վճռական պահը՝ մեկընդմիշտ փակելու երկարաժամկետ քննարկումը և որոշել ԵՄ-ին Ուկրաինայի անդամակցության հարցը: Ես ուկրաինացիներին հետագա արդյունավետ օգնությունը քննարկել եմ Եվրոպական խորհրդի ղեկավար Շառլ Միշելի հետ»,- գրել է Ուկրաինայի նախագահը Twitter-ում։

11:55 - 26 փետրվարի, 2022

«Ռոսկոսմոսը» դադարեցնում է համագործակցությունը ԵՄ գործընկերների հետ՝ ֆրանսիական Գվիանայի Կուրու տիեզերակայանից թռիչքներ կազմակերպելու հարցում

11:31 - 26 փետրվարի, 2022

Մեր գործընկերների զենքերն ու տեխնիկան Ուկրաինա ճանապարհին են․ Զելենսկին հեռախոսազրույց է ունեցել Մակրոնի հետ

Ուկրաինայի նախագահ Վլադիմիր Զելենսկին թվիթերյան իր միկրոբլոգում գրում է. «Դիվանագիտական առաջնագծում նոր օրը սկսվեց Էմանուել Մակրոնի հետ զրույցով։ Մեր գործընկերների զենքերն ու տեխնիկան Ուկրաինա ճանապարհին են։ «Հակապատերազմական կոալիցիան» աշխատում է»։ Ավելի վաղ Զելենսկին նաեւ շնորհակալություն էր հայտնել Շվեդիային տրամադրված ռազմական եւ մարդասիրական օգնության համար, ինչպես նաեւ նշել էր, որ հեռախոսազրույց է ունեցել Ֆրանսիայի նախագահ Էմանուել Մակրոնի հետ։ Վերջինս հաստատել է իր համաձայնությունը ՌԴ-ին SWIFT համամարգից անջատելու հարցում։

11:04 - 26 փետրվարի, 2022

ԱՄՆ-ն պատժամիջոցներ է կիրառել Պուտինի, Լավրովի և ՌԴ Անվտանգության խորհրդի այլ անդամների դեմ |armenpress.am|

armenpress.am: Միացյալ Նահանգները փետրվարի 25-ին պատժամիջոցներ է մտցրել Ռուսաստանի նախագահ Վլադիմիր Պուտինի, արտաքին գործերի նախարար Սերգեյ Լավրովի, պաշտպանության նախարար Սերգեյ Շոյգուի և ՌԴ Անվտանգության խորհրդի այլ անդամների դեմ: Այս մասին հայտնում է ԱՄՆ ֆինանսների նախարարության հայտարարության մեջ: «Խիստ հազվադեպ է լինում, որ ֆինանսների նախարարությունը պատժամիջոցների ցուցակ է մտցնում պետության ղեկավարին: Նախագահ Պուտինը միանում է այն փոքր խմբին, որում այնպիսի բռնապետեր են, ինչպես Կիմ Չեն Ինը, Ալեքսանդր Լուկաշենկոն և Բաշար Ասադը»,- ասվում է ֆինանսների նախարարության հայտարարության մեջ: ԱՄՆ-ից հայտնել են, Վաշինգտոնն ու նրա դաշնակիցները մտադիր են շարունակել թիրախի տակ պահել ռուսական էլիտայի ներկայացուցիչներին: «Նրանք, ովքեր պատասխանատու պաշտոններ են զբաղեցնում Ռուսաստանի կառավարությունում, կառնվեն թիրախի տակ, եթե Ռուսաստանի հետագա ագրեսիան ընդդեմ Ուկրաինայի չդադարի»,- հայտնել են նախարարությունից: Ավելի վաղ ԱՄՆ-ն պատժամիջոցներ էր կիրառել Վալենտինա Մատվիենկոյի, Սերգեյ Նարիշկինի, Վյաչեսլավ Վոլոդինի, Սերգեյ Իվանովի, Նիկոլայ Պատրուշևի, Վլադիմիր Կոլկոլցևի, Ալեքսանդր Բորտնիկովի, Իգոր Կրասնովի, Իգոր Շեգոլևի, Վլադիմիր Ուստինովի և Վիկտոր Զոլոտովի դեմ։

10:50 - 26 փետրվարի, 2022

Ռուսաստանն արգելափակել է ՄԱԿ-ի ԱԽ-ի ՌԴ գործողություններն Ուկրաինայում դատապարտող բանաձեւը

Ռուսաստանը գործադրել է իր վետոյի իրավունքը ՄԱԿ-ի Անվտանգության խորհրդում և արգելափակել է մի խումբ արևմտյան երկրների կողմից ներկայացված բանաձևը, որը դատապարտում էր Ռուսաստանի ռազմական գործողությունն Ուկրաինայում, հայտնում է ՏԱՍՍ-ի թղթակիցը։ Բանաձեւի նախագծին կողմ էին քվեարկել մարմնի 11 անդամներ, Չինաստանը, Հնդկաստանը եւ ԱՄԷ-ն ձեռնպահ էին մնացել քվեարկությունից։ Ավելի քան 60 պետությունների կողմից համահեղինակված փաստաթուղթը դատապարտում էր Ռուսաստանի գործողությունները որպես ՄԱԿ-ի կանոնադրության խախտում, նախագծի հեղինակները պահանջում էին Ռուսաստանի Դաշնությունից անհապաղ դադարեցնել ուժի կիրառումը Ուկրաինայի դեմ և դուրս բերել իր բոլոր զորքերը երկրի միջազգայնորեն ճանաչված սահմաններից։ Բացի այդ, հեղինակները դատապարտել են Ռուսաստանի կողմից Դոնեցկի և Լուգանսկի ժողովրդական հանրապետությունների ճանաչումը և պահանջել, որ նա հրաժարվի այս որոշումից։

10:33 - 26 փետրվարի, 2022

Գիշերը հարձակվելու են․ հատուկ ուշադրության տակ է լինելու Կիևը․ Զելենսկի

Գիշերը ավելի դժվար է լինելու, քան ցերեկը: Գիշերը հարձակվելու են։ Հարձակման տակ են բազմաթիվ քաղաքներ, այդ թվում՝ Չերնիգովը, Սումին, Խարկովը, Դոնբասը, հարավային Ուկրաինան և հատուկ ուշադրության տակ է լինելու Կիևը։ Չի կարելի կորցնել մայրաքաղաքը։ Այս մասին իր ուղերձում ասաց Ուկրաինայի նախագահ Վլադիմիր Զելենսկին։ «Չկա և չի կարող լինել այնպիսի ճշմարտություն, որը կարող է բացատրել, թե ինչու են հրթիռակոծվում մանկապարտեզները և բնակարանային ենթակառուցվածքները։ Կիևի շրջանի Վորզելի մոտ նրանք Գրադ համակարգերով խոցել են մանկապարտեզը, Սումիի շրջանում՝ բնակելի թաղամասերին։ Ի՞նչ պատերազմ է է սա ուկրաինական մանկապարտեզում՝ ուկրաինացի երեխաների դեմ: Ովքե՞ր են նրանք, նրանք նույնպես նեոնացիստե՞ր են, թե՞ ՆԱՏՕ-ի զինվորներ, որոնք սպառնում էին Ռուսաստանին», - ասաց նա:

02:23 - 26 փետրվարի, 2022

Վլադիմիր Զելենսկին համաձայնել է Վլադիմիր Պուտինի՝ բանակցությունների անցկացման առաջարկին

Ուկրաինայի նախագահ Վլադիմիր Զելենսկին համաձայնել է Ռուսաստանի նախագահ Վլադիմիր Պուտինի առաջարկին և պատրաստ է խոսել խաղաղության և հրադադարի մասին։ Այս մասին Facebook-ում հայտնել է Ուկրաինայի ղեկավարի խոսնակ Սերգեյ Նիկիֆորովը։ Ուկրաինայի նախագահի մամուլի քարտուղար Սերգեյ Նիկիֆորովի խոսքով՝ «այս ժամերին բանակցությունների ժամանակի և վայրի վերաբերյալ խորհրդակցություններ են ընթանում»։ «Մենք պետք է հերքենք այն պնդումները, թե հրաժարվել ենք բանակցություններից: Ուկրաինան պատրաստ էր և պատրաստ է խոսել հրադադարի և խաղաղության մասին: Սա մեր մշտական դիրքորոշումն է: Մենք համաձայնել ենք Ռուսաստանի Դաշնության նախագահի առաջարկին։ Ուղիղ այս ժամերին կողմերը խորհրդակցում են բանակցային գործընթացի տեղի և ժամանակի շուրջ,- գրել է նա։

02:02 - 26 փետրվարի, 2022

Զելենսկին դիմել է Իսրայելին` միջնորդ լինելու Ռուսաստանի հետ բանակցություններում․ NYT

Ուկրաինայի նախագահ Վլադիմիր Զելենսկին Իսրայելի վարչապետ Նաֆթալի Բենեթին խնդրել է միջնորդ լինել Ուկրաինայի և Ռուսաստանի միջև բանակցություններում։ Գրում է The New York Times-ը։ Այդ հարցումն արվել է երկու երկրների ղեկավարների հեռախոսազրույցի ժամանակ ուրբաթ օրը, ըստ Իսրայելում Ուկրաինայի դեսպան Եվգեն Կորնիյչուկի: «Մենք հավատում ենք, որ Իսրայելը միակ ժողովրդավարական պետությունն է աշխարհում, որը լավ հարաբերություններ ունի ինչպես Ուկրաինայի, այնպես էլ Ռուսաստանի հետ», - ասել է Կորնիյչուկը: Բենեթի գրասենյակը հաստատել է, որ հեռախոսազրույց է տեղի ունեցել, սակայն հրաժարվել են մեկնաբանել դրա բովանդակությունը: Կորնիյչուկն ասել է, որ Իսրայելն անմիջապես չի համաձայնել խնդրանքին: ««Ոչ» չեն ասել», - ասաց նա: «Նրանք փորձում են պարզել, թե որտեղ են գտնվում այս շախմատային խաղում»: «Ուկրաինան ավելի հարմարավետ կզգա Իսրայելում բանակցություններ վարելիս, քան Բելառուսում, որը Կրեմլի մերձավոր դաշնակիցն է և նախկին խաղաղության բանակցությունների վայրը, քանի որ Իսրայելն ավելի չեզոք կողմ է ընկալում», - ասել է Կորնիյչուկը:

01:34 - 26 փետրվարի, 2022

Ռուսական զորքերը ծովային դեսանտի իջեցումից հետո մտել են Մելիտոպոլ․ՌԴ ՊՆ

Ռուսական զորքերը ծովային դեսանտի իջեցումից հետո առանց դիմադրության մտել են Մելիտոպոլ։ Այս մասին «Ռիա Նովոստի»-ի հաղորդմամբ՝ հայտնում է ՌԴ ՊՆ-ն։ Նախարարության հաղորդագրության մեջ ասվում է, որ «մելիտոպոլցիները ողջունել են նրանց, իսկ ավագ սերնդի առանձին քաղաքացիներ փողոց են դուրս եկել կարմիր դրոշներով»։

01:22 - 26 փետրվարի, 2022

Բայդենը հաստատել է, որ հրամայել է ԱՄՆ-ի լրացուցիչ ուժեր տեղակայել Եվրոպայում՝ ՆԱՏՕ-ի դաշնակիցներին աջակցելու համար

Բայդենը հաստատել է, որ հրամայել է ԱՄՆ-ի լրացուցիչ ուժեր տեղակայել Եվրոպայում՝ ՆԱՏՕ-ի դաշնակիցներին աջակցելու համար: ՏԱՍՍ-ի փոխանցմամբ՝ հայտնում է Սպիտակ տան մամուլի ծառայությունը։ ՆԱՏՕ-ի դռները կշարունակեն բաց մնալ այն եվրոպական երկրների համար, որոնք կիսում են դաշինքի արժեքները, ասել է Բայդենը։ Բայդենը Զելենսկու հետ խոսել է Միացյալ Նահանգների կողմից տրամադրվող շարունակական տնտեսական, հումանիտար և անվտանգային աջակցության մասին և ԱՄՆ-ի ջանքերի մասին՝ այլ երկրներին Ուկրաինային օգնելու համար ներգրավելու հարցում։

01:00 - 26 փետրվարի, 2022

Չինաստանը աջակցում է բոլոր երկրների, այդ թվում՝ Ուկրաինայի ինքնիշխանությանն ու տարածքային ամբողջականությանը․ԱԳ նախարար Վան Ին

Չինաստանը կարեւոր է համարում հարգել աշխարհի բոլոր երկրների, այդ թվում՝ Ուկրաինայի ինքնիշխանությունը։ ՏԱՍՍ-ի փոխանցմամբ՝ այդ մասին ուրբաթ օրը հայտնել է Չինաստանի արտգործնախարար Վան Ին՝ Մեծ Բրիտանիայի արտաքին գործերի նախարար Լիզ Թրուսի, ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելի և Ֆրանսիայի նախագահի խորհրդական Էմանուել Բոնի հետ հեռախոսազրույցի ժամանակ։ «Չինաստանը վճռականորեն հանդես է գալիս բոլոր երկրների ինքնիշխանության և տարածքային ամբողջականության հարգման և պաշտպանության օգտին, ինչպես նաև փաստացիորեն հետևում է ՄԱԿ-ի կանոնադրության նպատակներին և սկզբունքներին: Այս դիրքորոշումը հետևողական է և հստակ, այն հավասարապես վերաբերում է Ուկրաինային», - ասվում է ԱԳՆ-ի տարածած հաղորդագրության մեջ։ ԱԳ նախարարը հավելել է, որ ՆԱՏՕ-ի ընդլայնման համատեքստում անհրաժեշտ է հաշվի առնել անվտանգության ոլորտում Ռուսաստանի օրինական պահանջները։

00:43 - 26 փետրվարի, 2022

Ուկրաինան հրաժարվել է բանակցել ՌԴ-ի հետ և առաջարկել է հետաձգել այս հարցը մինչև վաղը․ Զախարովա

Ուկրաինան հրաժարվել է բանակցել Ռուսաստանի հետ և առաջարկել է հետաձգել այս հարցը մինչև վաղը։ Այս մասին ուրբաթ ՏԱՍՍ-ին հայտնել է ՌԴ ԱԳՆ պաշտոնական ներկայացուցիչ Մարիա Զախարովան։ «Ուկրաինական կողմը հրաժարվել է բանակցություններից: Կիևի վարչակարգի ներկայացուցիչներն առաջարկել են հետաձգել այդ հարցը մինչև վաղը»,- ասել է նա:

00:22 - 26 փետրվարի, 2022

Աբխազիան ճանաչել է Դոնեցկի և Լուգանսկի Ժողովրդական Հանրապետությունների անկախությունը

Աբխազիայի նախագահ Ասլան Բժանիան հրամանագրեր է ստորագրել Դոնեցկի Ժողովրդական Հանրապետության և Լուգանսկի Ժողովրդական Հանրապետության անկախությունը ճանաչելու մասին։ Այդ մասին պետության ղեկավարը հայտարարել է աբխազական հեռուստաընկերության եթերում։ «Հետևելով ԴԺՀ-ի և ԼԺՀ-ի ժողովուրդների հետ մեր բարեկամության ոգուն, անհրաժեշտ համարելով ապագայում ներգրավվել նրանց ճակատագրում, անկեղծորեն մաղթելով մեր եղբայրներին անվտանգ և կայուն զարգացում, այսօր ստորագրեցի Դոնեցկի և Լուգանսկի Ժողովրդական Հանրապետությունների անկախությունը ճանաչող հրամանագրեր: Ես միանգամայն վստահ եմ, որ ողջ աբխազական հասարակությունը սատարում է այս որոշմանը»,- ասել է նախագահը։ Բժանիան ընդգծել է, որ ինչպես Աբխազիայի բոլոր քաղաքացիները, ինքը նույնպես բոլոր տեսակետներից արդարացի է համարում ԴԺՀ-ի և ԼԺՀ-ի անկախությունը ճանաչելու Ռուսաստանի որոշումը, իսկ սկսված հատուկ ռազմական գործողությունը միանգամայն արդարացված է։ «Ռուսաստանի Դաշնության անվտանգությունը մեր անվտանգությունն է ձեզ հետ, հարգելի՛ Աբխազիայի քաղաքացիներ»,- հավելել է նախագահը։

00:15 - 26 փետրվարի, 2022