Հայկ Մարության

Երևանի նախկին քաղաքապետ, դերասան, ռեժիսոր, հասարակական և քաղաքական գործիչ։

2021 թ․ դեկտեմբերի 15-ին Երևանի ավագանու «Իմ քայլը» խմբակցությունը քաղաքապետ Հայկ Մարությանին անվստահություն հայտնելու գործընթաց սկսեց։ Դեկտեմբերի 22-ին Հայկ Մարությանը հեռացվեց Երևանի քաղաքապետի պաշտոնից․ քաղաքապետարանում տեղի ունեցած փակ քվեարկության արդյունքում Երևանի նոր քաղաքապետ ընտրվեց Հրաչյա Սարգսյանը։

Ծնվել է 1976թ․ դեկտեմբերի 18-ին։

1996 - 2002 թվականներին աշխատել է «Շարմ» ընկերությունում՝ որպես սցենարիստ, ռեժիսոր, դերասան։ 2002 թվականին ընկերների հետ համատեղ հիմնել է «Կարգին ստուդիա» ընկերությունը, որտեղ և աշխատել է որպես դերասան, սցենարիստ, ռեժիսոր և պրոդյուսեր։ 2012 թվականից հանդիսացել է «Շանթ» հեռուստաընկերության «Կանխիկ հումոր» հեռուստանախագծի ժյուրիի անդամ։ 2018 թվականի սեպտեմբերին Քաղաքացիական պայմանագիր կուսակցության կողմից առաջադրվել է որպես Երևանի քաղաքապետի թեկնածու։

Սարալանջի կանաչապատման վերաբերյալ քաղաքապետարանի հակասական հայտարարությունները |fip.am|

fip.am: Մոտ մեկ տարի առաջ՝ 2019-ի մարտի վերջին, Երևանի քաղաքապետ Հայկ Մարությանը ֆեյսբուքյան իր էջում գրառում էր կատարել՝ հայտարարելով, որ սկսում են կանաչապատել Սարալանջի տարածքը։ Մարությանը, մասնավորապես, գրել էր․ «Այս տարի սկսում ենք Սարալանջի կանաչապատումը: Ընդամենը մեկ-երկու տարուց մեր քաղաքում ավելի քիչ փոշի ու ավելի շատ կանաչ տարածք կլինի»։ Նույնաբովանդակ գրառում էր կատարել նաև քաղաքապետի մամուլի խոսնակ Հակոբ Կարապետյանը՝ նշելով, որ քաղաքապետարանը սկսում է Սարալանջի համայնքապատկան հողերի կանաչապատումը։ Այս տարվա մարտի 21-ին Հակոբ Կարապետյանը ֆեյսբուքյան ուղիղ հեռարձակմամբ ցույց տվեց, որ Սարալանջի տարածքում սկսել են կաթիլային ոռոգման համակարգի անցկացման աշխատանքները։ Վերջին օրերին լրատվականները ևս ակտիվորեն լուսաբանում են ոռոգման ցանցի կառուցման աշխատանքները։ «Փաստերի ստուգման հարթակը» ևս հարցմամբ դիմել էր քաղաքապետարան՝ պարզելու, թե ինչ փուլում են կանաչապատման աշխատանքները, որոնք նախատեսված էին սկսել այս տարվա գարնանը։ Հարցմանն ի պատասխան, սակայն, Երևանի քաղաքապետարանի Տեղեկատվության և հասարակայնության վարչությունից հայտնեցին, որ «Սարալանջի հատվածում գարնանը պետք է իրականացվեին ոչ թե կանաչապատման, այլ տարածքի ոռոգման ցանցի կառուցման աշխատանքներ, որոնք էլ ընթանում են հաստատված ժամանակացույցի համապատասխան»։ Fip.am-ը որոշել է գնալ քաղաքապետարանից ստացած պատասխանի հետքերով և ներկայացնել Սարալանջի տարածքի կանաչապատման վերաբերյալ քաղաքապետարանի՝ մինչ այս արված հայտարարությունները։ Նախորդ տարվա ընթացքում աշխատանքների իրականացումը հետաձգելու մասին Քաղաքապետի տեղակալ Հրաչյա Սարգսյանը նախորդ տարվա հունիսին հայտարարել էր․ «Հիմա նախագծում ենք Սարալանջի հատվածը, մոտակա շաբաթներին մրցույթ կհայտարարվի, որպեսզի այնտեղ ունենանք ոռոգման կաթիլային ցանց, որտեղ ծառատունկ կիրականացնենք աշնանը»: Իսկ քաղաքապետի մամուլի խոսնակ Հակոբ Կարապետյանը թեմայի վերաբերյալ գրառմամբ հանդես էր եկել նաև սեպտեմբերին՝ նշելով, որ Սարալանջի տարածքում կանաչապատում իրականացնելը բարդ և ժամանակատար գործընթաց է։ Եվ մարտին՝ քաղաքապետի արված հայտարարությունից հետո, ըստ խոսնակի, կայացել էր ոռոգման համակարգի նախագծման աշխատանքների համար հայտարարված մրցույթը, իսկ նախագծման աշխատանքները ավարտական փուլում են։ «Այնուհետև մրցույթ կհայտարարվի բուն կաթիլային համակարգն իր կոմպոնենտներով հանդերձ անցկացնելու, կանաչապատումը իրականացնելու համար: Սրանք ևս, հասկանալի է, որոշակի ժամանակ կպահանջեն: Ի սկզբանե մենք նախատեսել էինք, որ բուն կանաչապատումը, ծառատունկը կլինի կա՛մ այս տարվա աշնան վերջին, կա՛մ հաջորդ տարվա գարնանը: Տեղեկացնում եմ, որ այս հարցում ոչինչ չի փոխվել և տարվա վերջին կամ հաջորդ տարվա գարնանը կսկսվի բուն կանաչապատման գործընթացը Սարալանջի հատվածում»,- գրել էր Կարապետյանը: Կանաչապատման աշխատանքների մասին հիշատակումներ՝ պաշտոնական փաստաթղթերում Երևան քաղաքի զարգացման 2019 թվականի ծրագրում Սարալանջի տարածքի կանաչապատման ծրագրի մասին առկա է միայն մեկ նշում՝ «Փարոսի անտառ և Սարալանջ փողոցի հարակից տարածքներում համապատասխան ֆինանսավորման պայմաններում կենթարկվեն վերակառուցման գործող ոռոգման համակարգերը, կիրականացվի դարավանդավորում, կկառուցվեն այլ անհրաժեշտ ենթակառուցվածքներ և կիրականացվի անտառվերականգման մեծ ծրագիր»։ Իսկ զարգացման հնգամյա՝ 2019-2023 թթ․ պլանում ասվում է, որ «ավարտված են Սարալանջի, Նուբարաշենի և Սիլիկյանի անտառպաշտպանիչ տարածքների հիմնման նախագծանախահաշվային աշխատանքները»։ Երևանի զարգացման այս տարվա ծրագրում Սարալանջի կանաչապատման վերաբերյալ առկա են որոշակի մանրամասներ, սակայն աշխատանքների իրականացման ժամկետների վերաբերյալ միակ նշումն այն է, որ աշխատանքները կիրականացվեն 2020 թվականի ընթացքում։ Ինչ աշխատանքներ են իրականացվել Այս օրերին Սարալանջի տարածքում իրականացվում են ոռոգման ցանցի կառուցման աշխատանքներ։ Լրատվականներից մեկը նշում է, որ ծառատունկը կմեկնարկի աշնանը։ Ոռոգման ցանցի նախագծահաշվարկային աշխատանքների իրականացման համար մրցույթ հայտարարվել էր նախորդ տարվա հուլիսին։ Հաղթող մասնակցի՝ «Երևաննախագիծ» ՓԲԸ-ի հետ պայմանագիրը կնքվել է օգոստոսին։ 2019-ի դեկտեմբերին քաղաքապետարանը հայտարարել էր մրցույթ՝ նաև անտառապաշտպանիչ գոտու ստեղծման աշխատանքների որակի տեխնիկական հսկողության ծառայությունների ձեռքբերման համար։ Գնումների համակարգի կայքում, սակայն, մրցույթի վերաբերյալ այլ տեղեկություններ՝ հրավերից բացի, առկա չեն։ Այսպիսով, կարող ենք արձանագրել, որ Երևանի քաղաքապետարանը, թեպետ մեկնարկել է Սարալանջի տարածքի ոռոգման համակարգի աշխատանքները, սակայն խոստումները, թե կանաչապատման աշխատանքները կիրականացվեն մինչև 2020 թ․ գարուն, մնացել են անկատար։ Անի Ավետիսյան

21:27 - 11 մայիսի, 2020

Նիկոլ Աղբալյանի անվան համար 19 հիմնական դպրոցը նորից տնօրեն չունի․ քաղաքապետի որոշմամբ մրցույթի արդյունքները չեղյալ են ճանաչվել |iravaban.net|

iravaban.net: 2020 թվականի մարտի 6-ին տեղի է ունեցել «Երևանի Նիկոլ Աղբալյանի անվան համար 19 հիմնական դպրոց» պետական ոչ առևտրային կազմակերպության տնօրենի թափուր տեղի համար հայտարարված մրցույթը: Տնօրեն էր ընտրվել դպրոցի նախկին տնօրեն Լիանա Աշրաֆյանը։ Նշենք, որ դպրոցի տնօրենի թափուր հաստիքի թեկնածուներն էին Լիանա Աշրաֆյանը, Անժելա Կարապետյանը, Տաթևիկ Մարաբյանը, Անուշ Մարտիրոսյանը, Արմինե Մարտիրոսյանը։ Կառավարման խորհուրդի 6 անդամներից 1-ը քվեարկել է Անուշ Մարտիրոսյանի, 5-ը՝ Լիանա Աշրաֆյանի օգտին։ Երևանի քաղաքապետ Հայկ Մարությանի ապրիլի 16-ի որոշմամբ մրցույթի արդյունքները չեղյալ են ճանաչվել։ Որոշման մեջ նշվում է, որ նշված կազմակերպության կառավարման խորհրդի անդամ Վահրամ Սողոմոնյանի կողմից բողոքարկվել են մրցույթի արդյունքները: ՀՀ կրթության, գիտության, մշակույթի և սպորտի նախարարը 02.04.2020թ. հ.01/07.1/7798-20 գրությամբ դիմել է Երևանի քաղաքապետարան՝ ՀՀ կրթության, գիտության, մշակույթի և սպորտի նախարարի 2020 թվականի մարտի 24-ի N 235-Ա հրամանով ձևավորված հանձնաժողովի 27.03.2020թ. եզրակացության հիման վրա «Երևանի Նիկոլ Աղբալյանի անվան համար 19 հիմնական դպրոց» պետական ոչ առևտրային կազմակերպության տնօրենի թափուր տեղի համար 2020 թվականի մարտի 6-ին կայացած մրցույթի արդյունքները չեղյալ ճանաչելու առաջարկությամբ: Եզրակացությամբ նշվել է հետևյալը. «Ուսումնասիրությամբ պարզվեց նաև, որ 2020 թվականի հունվարի 23-ին «Հայաստանի Հանրապետություն» թերթում հրապարակվել է դպրոցի տնօրենի պաշտոնի թափուր տեղի համար մրցույթ հայտարարելու մասին 1-ին հրապարակումը, իսկ 2-րդը նույն թերթում պետք է լիներ հունվարի 28-ին, սակայն ՀՀ կառավարության 2020 թվականի հունվարի 23-ի «Աշխատանքային օրը տեղափոխելու մասին» հ.42-Ն որոշման 1-ին կետի համաձայն՝ 2020 թվականի հունվարի 27-ի աշխատանքային օրը տեղափոխվել է 2020 թվականի փետրվարի 1-ը՝ շաբաթ օրը, ինչի արդյունքում անհնարին է դարձել հունվարի 28-ին 2-րդ հրապարակումն այդ թերթում և այն հրապարակվել է հունվարի 29-ին՝ «Հայկական ժամանակ» օրաթերթում, իսկ «Հայաստանի Հանրապետություն» թերթում՝ հունվարի 30-ին: «Նորմատիվ իրավական ակտերի մասին» օրենքի 31-րդ հոդվածի 8-րդ մասի համաձայն՝ եթե ժամկետի ավարտը պայմանավորված է վրա հասած իրադարձությամբ, ապա այն ավարտված է համարվում վրա հասած իրադարձության օրվան հաջորդող օրվանից, որով որոշված է ժամկետի ավարտը, իսկ 32-րդ հոդվածի 4-րդ մասի համաձայն՝ եթե ժամկետի վերջին օրը ոչ աշխատանքային օր է, ապա ժամկետի ավարտի օր է համարվում դրան հաջորդող աշխատանքային օրը: Սակայն չի պահպանվել Կարգի 7-րդ կետի հետևյալ պահանջը՝ «մրցույթին մասնակցելու մասին հայտերն ընդունվում են հայտարարության երկրորդ հրապարակման օրվանից 30 օրվա ընթացքում»: Այսինքն՝ հիմք ընդունելով, որ «Նորմատիվ իրավական ակտերի մասին» օրենքի 31-րդ հոդվածի 7-րդ մասի համաձայն՝ օրերով հաշվարկվող ժամկետը լրանում է այդ ժամկետի վերջին օրը, ապա հայտարարության երկրորդ հրապարակման օրվանից (29.01.2020թ.) հաշված հայտերի ընդունման 30-րդ օրը փետրվարի 27-ն է և ոչ թե հայտարարության մեջ նշված փետրվարի 26-ը: Հետևաբար՝ պետք է տեղափոխվեր նաև մրցույթի անցկացման օրը և կարգի 7-րդ կետի համաձայն՝ նշանակվեր փաստաթղթերի ընդունման ավարտից հետո յոթերորդ աշխատանքային օրը, որը չի կատարվել և դրանով իսկ վատթարացվել են հավակնորդների իրավունքները:»: Հայաստանի Հանրապետության կառավարության 2010 թվականի N 319-Ն որոշմամբ հաստատված կարգի 7-րդ կետի համաձայն՝ մրցույթին մասնակցելու մասին հայտերն ընդունվում են հայտարարության երկրորդ հրապարակման օրվանից` 30 օրվա ընթացքում: Մրցույթը նշանակվում է փաստաթղթերի ընդունման ավարտից հետո յոթերորդ աշխատանքային օրը: Առաջին անգամ դպրոցի տնօրենի պաշտոնի թափուր տեղի համար մրցույթի հայտարարությունը հրապարակվել է 2020 թվականի հունվարի 23-ին «Հայաստանի Հանրապետություն» թերթում, իսկ երկրորդը՝ հունվարի 29-ին՝ «Հայկական ժամանակ» օրաթերթում: «Հայկական ժամանակ» օրաթերթում 2020թ. հունվարի 29-ին հրապարակված երկրորդ հայտարարության մեջ մրցույթին մասնակցելու մասին հայտերի ընդունման ժամկետը նշված է եղել 2020թ. փետրվարի 26-ը, մինչդեռ պետք է նշված լիներ 2020թ. փետրվարի 27-ը, իսկ մրցույթը պետք է նշանակվեր փաստաթղթերի ընդունման ավարտից հետո յոթերորդ աշխատանքային օրը՝ 2020թ. մարտի 9-ին, այլ ոչ թե 2020թ. մարտի 6-ին: Այսինքն՝ խախտվել են Հայաստանի Հանրապետության կառավարության 2010 թվականի N 319-Ն որոշմամբ հաստատված կարգի 7-րդ կետի պահանջները, որի արդյունքում՝ վատթարացվել են հավակնորդների իրավունքները: ՀՀ կառավարության 2010 թվականի N 319-Ն որոշմամբ հաստատված կարգի 29-րդ կետի 2-րդ ենթակետի համաձայն՝ մրցույթի արդյունքները չեղյալ են ճանաչվում` ներկայացուցչի բացասական եզրակացության կամ լիազորված մարմնի կամ հավակնորդի կամ խորհրդի անդամի կողմից մրցույթի անցկացման ընթացակարգի վերաբերյալ ՀՀ կրթության և գիտության նախարարին ուղղված գրավոր բողոքի ուսումնասիրության համար ՀՀ կրթության և գիտության նախարարի հրամանով ձևավորված հանձնաժողովի եզրակացության հիման վրա` լիազորված մարմնի կողմից: Հավելենք, որ որոշումն ուժի մեջ է մտնում այն ստանալու հաջորդ օրը և կարող է վարչական կարգով բողոքարկվել Երևանի քաղաքապետին կամ դատական կարգով՝ Հայաստանի Հանրապետության վարչական դատարան՝ երկամսյա ժամկետում: Որոշման կատարման կազմակերպումն ու պատասխանատվությունը դրվել է Երևանի քաղաքապետարանի աշխատակազմի հանրակրթության վարչության պետի վրա, իսկ որոշման կատարման ընթացքի նկատմամբ հսկողությունն ապահովում է Երևանի քաղաքապետի տեղակալ Տիգրան Վիրաբյանը։ Հիշեցնենք, որ Infocom-ը անդրադարձել էր Նիկոլ Աղբալյանի դպրոցի տնօրենի ընտրությունից առաջ տեղի ունեցող իրադարձություններին։ Դպրոցի տնօրենի ընտրության օրը՝ մարտի 6-ին ևս ներկայացրել էինք տնօրենի ընտրության գործընթացի մանրամասները։

13:30 - 21 ապրիլի, 2020