Մևլութ Չավուշօղլու

Լավրովն ու Չավուշօղլուն քննարկել են ԼՂ-ում հրադադարի ռեժիմի ամրապնդման քայլերը |shantnews.am|

shantnews.am: Ռուսաստանի արտգործնախարար Սերգեյ Լավրովը հեռախոսազրույց է ունեցել Թուրքիայի իր պաշտոնակից Մևլութ Չավուշօղլուի հետ, որի ընթացքում Անկարան աջակցել է Լեռնային Ղարաբաղի վերաբերյալ ընդունված եռակողմ հայտարարությանը, հայտնում է ՌԴ ԱԳՆ-ի ներկայացուցիչ Մարիա Զախարովան։ «Կարող եմ ասել, որ այժմ ինտենսիվ հաղորդակցություն կա Ռուսաստանի արտգործնախարար Սերգեյ Լավրովի և նրա գործընկերների միջև: Մենք պարզապես հեռախոսազրույց ենք ունեցել Թուրքիայի ԱԳՆ ղեկավարի հետ, թուրքական կողմը սատարել է երեք երկրների կողմից երեկ ընդունված հայտարարությանը։ Ռուսաստանի և Թուրքիայի արտաքին գործերի նախարարները նաև մտքեր են փոխանակել ձեռնարկվելիք հետագա անհրաժեշտ քայլերի վերաբերյալ», – ասել է նա «Эхо Москвы» ռադիոկայանի եթերում:

13:52 - 10 նոյեմբերի, 2020

Թուրքիայի պաշտպանության նախարարը կմեկնի Բաքու |civilnet.am|

civilnet.am: Թուրքիայի պաշտպանության նախարար Հուլուսի Աքարը կժամանի Բաքու․ այս մասին նոյեմբերի 1-ին Ադրբեջանի նախագահ Իլհամ Ալիևի հետ Բաքվում կայացած հանդիպման ժամանակ հայտնել է Թուրքիայի արտաքին գործերի նախարար Մևլութ Չավուշօղլուն, հաղորդում է «ՌԻԱ Նովոստի»-ն։ Չավուշօղլուն նաև ասել է, որ իրենք Բաքվում են Էրդողանի հանձնարարությամբ: «Մենք նախագահի հանձնարարություն ունենք՝ Ադրբեջանին միայնակ չթողնել այս գործընթացում, պարբերաբար այցելել Բաքու և համատեղ գործել։ Այստեղ են ժամանելու նաև մեր պաշտպանության նախարարն ու այլ գործընկերներ: Այստեղ է նաև մեր խորհրդարանի նախագահը»:

16:50 - 01 նոյեմբերի, 2020

«Ադրբեջանը կգնա մինչև վերջ, եթե ղարաբաղյան հարցը արագորեն չլուծվի բանակցային սեղանի շուրջ», հայտարարում է Ալիևը |azatutyun.am|

azatutyun.am: «Ադրբեջանը կգնա մինչև վերջ, եթե ղարաբաղյան հարցը արագորեն չլուծվի բանակցային սեղանի շուրջ»,- այսօր հայտարարել է Ադրբեջանի նախագահը՝ Թուրքիայի արտգործնախարարի հետ հանդիպումից հետո։ Չավուշօղլուն Բաքու է ժամանել այսօր առավոտյան՝ ղարաբաղյան հարցը քննարկելու: «Մենք կրկին Բաքվում ենք՝ Ադրբեջանին մեր ամուր աջակցությունը վերահաստատելու և Լեռնային Ղարաբաղում վերջին զարգացումների շուրջ մտքեր փոխանակելու համար»,- գրել էր նա Թվիթերում: Չավուշօղլուի այցից առաջ` շաբաթվա սկզբին, Ալիևն ասել էր, թե Բաքվի համար ընդունելի է խնդրի կարգավորումը 2+2 ձևաչափով՝ կողմերի, ինչպես նաև Թուրքիայի և Ռուսաստանի մասնակցությամբ։ «Սա ընդունելի տարբերակ է մեզ համար, քանի որ և՛ Թուրքիան, և՛ Ռուսաստանը մեր հարևան երկրներն են, որոնք սերտ փոխհարաբերություններ ունեն, և երկրներ, որոնք նաև իրար միջև համագործակցության մեծ ներուժ ունեն»,- ասել էր Ալիևը։

16:18 - 01 նոյեմբերի, 2020

Չավուշօղլուն մեկնել է Ադրբեջան՝ քննարկելու իրադրությունը Լեռնային Ղարաբաղում

Թուրքիայի արտաքին գործերի նախարար Մևլյութ Չավուշօղլուն մեկնել է Ադրբեջան՝ քննարկելու իրադրությունը Լեռնային Ղարաբաղում: Այս մասին Թվիթերում գրել է թուրք նախարարը, հայտնում է ՏԱՍՍ-ը: «Մենք կրկին Բաքվում ենք ՝ քննարկելու Լեռնային Ղարաբաղում վերջին զարգացումները և վերահաստատելու մեր աջակցությունը Ադրբեջանին», - գրել է Չավուշօղլուն։

12:18 - 01 նոյեմբերի, 2020

Չավուշօղլուն հեռախոսազրույց է ունեցել Բայրամովի հետ |ermenihaber.am|

ermenihaber.am: Թուրքիայի արտգործնախարար Մևլութ Չավուշօղլուն հեռախոսազրույց է ունեցել ադրբեջանցի պաշտոնակից Ջեյհուն Բայրամովի հետ: Հաղորդվում է, որ հեռախոսազրույցի ընթացքում քննարկվել են Լեռնային Ղարաբաղում տեղի ունեցող վերջին զարգացումները: Հեռախոսազրույցից այլ մանրամասներ առայժմ չեն հաղորդվում։

11:49 - 28 հոկտեմբերի, 2020

ՌԴ և Թուրքիայի արտգործնախարարները քննարկել են իրավիճակը Ղարաբաղում

Ռուսաստանի Դաշնության արտգործնախարար Սերգեյ Լավրովը և Թուրքիայի գործընկեր Մևլութ Չավուշօղլուն երեքշաբթի օրը հեռախոսազրույց են ունեցել, որի ժամանակ քննարկել են իրավիճակը Լեռնային Ղարաբաղում։ Այս մասին ասվում է ՌԴ ԱԳՆ-ի հաղորդագրության մեջ։ Գրում է tass.ru-ն։ Նրանք հայտարարել են հակամարտության կողմերի միջև հրադադարի ռեժիմի շուտափույթ ապահովման անհրաժեշտության մասին: «Քննարկվել է իրավիճակը Լեռնային Ղարաբաղում։ Ընդգծվել է Հայաստանի և Ադրբեջանի միջև կայուն հրադադարի ապահովման անհրաժեշտությունը»,- նշված է ՌԴ ԱԳՆ հայտարարության մեջ։Թարգմանությունը՝ Վաղինակ Ասատրյանի

19:51 - 27 հոկտեմբերի, 2020

Ադրբեջանի եւ Թուրքիայի արտգործնախարարները հեռախոսազրույց են ունեցել |lragir.am|

lragir.am: Ադրբեջանի եւ Թուրքիայի արտգործնախարարներ Ջեյհուն Բայրամովը եւ Մեւլութ Չավուշօղլուն շաբաթ օրը հեռախոսով քննարկել են իրավիճակը Լեռնային Ղարաբաղի հակամարտության գոտում, հայտնում է Ադրբեջանի ԱԳՆ մամուլի ծառայությունը: Նշվում է, որ Բայրամովը շնորհակալություն է հայտնել Թուրքիային «Ադրբեջանի դիրքորոշումը սատարելու համար»:

01:19 - 18 հոկտեմբերի, 2020

Լավրովն ու Չավուշօղլուն ընդգծել են ԼՂ հիմնախնդրի խաղաղ կարգավորմանն այլընտրանքի բացակայությունը |armenpress.am|

armenpress.am: Ռուսաստանի Դաշնության Արտաքին գործերի նախարար Սերգեյ Լավրովը և Թուրքիայի ԱԳ նախարար Մևլութ Չավուշօղլուն հոկտեմբերի 15-ին կայացած հեռախոսազրույցի ընթացքում ընդգծել են, որ Լեռնային Ղարաբաղի հիմնախնդրի խաղաղ կարգավորումը չունի այլընտրանք: Այս մասին ասված է ՌԴ Արտաքին գործերի նախարարության պաշտոնական կայքում: Նշվում է, որ հեռախոսազրույցի ընթացքում առարկայական քննարկվել է Լեռնային Ղարաբաղի շուրջ ստեղծված իրավիճակը։ Նախարարներն ընդգծել են հիմնախնդրի խաղաղ կարգավորման այլընտրանքի բացակայությունը։ Վերահաստատվել է Ռուսաստանի Դաշնության, Ադրբեջանի Հանրապետության և Հայաստանի Հանրապետության արտաքին գործերի նախարարների հոկտեմբերի 10-ի մոսկովյան հայտարարության դրույթների անվերապահ կատարման անհրաժեշտությունը: Գործնական առումով նշվել է կրակի դադարեցման ռեժիմի անհապաղ հաստատման անհրաժեշտությունը և դրա պահպանման վերահսկողության մեխանիզմների համաձայնեցումը: Ընդգծվել է նաև ԵԱՀԿ Մինսկի խմբի մեխանիզմների շրջանակներում բանակցային գործընթացի վերսկսման ուղղությամբ քայլերի օպերատիվ համաձայնեցման կարևորությունը՝ իրական արդյունքների հասնելու նպատակով:

20:14 - 15 հոկտեմբերի, 2020

Թուրքիան թյուրքախոս երկրներին կոչ է անում աջակցել Ադրբեջանին |mediamax.am|

mediamax.am: Թուրքիան թյուրքալեզու երկրներին կոչ է անում համերաշխություն ցուցաբերել Ադրբեջանի հետ: Ինչպես հաղորդում է Anadolu-ն, ելույթ ունենալով Ղազախ-թուրքական միջազգային համալսարանում, Թուրքիայի արտգործնախարար Մեվլութ Չավուշօղլուն ասել է. «Թյուրքալեզու երկրները պետք է համերաշխություն ցուցաբերեն Ադրբեջանի հետ: Անկարան միշտ եղել եւ մնում է Բաքվի կողմը՝ պատմական հողերի ազատագրման արդար պայքարում: Երեւանի գործողությունները կարելի է դասել որպես ռազմական հանցագործություններ: Ցավոք, մի շարք երկրներ փորձում են նույն հարթության վրա դնել Ադրբեջանը եւ օկուպանտ-Հայաստանը: Այդ երկրները անտեսում են ՄԱԿ-ի եւ ԵԱՀԿ որոշումները: Այդ պատճառով Ադրբեջանի հետ համերաշխությունն այսօր կարեւոր է, քան երբեւէ», - ասել է Չավուշօղլուն:

16:16 - 15 հոկտեմբերի, 2020

Թուրքական կողմի նախաձեռնությամբ՝ հեռախոսազրույց են ունեցել ՌԴ ԱԳ նախարար Ս․ Լավրովն ու Թուրքիայի ԱԳ նախարար Մ. Չավուշօղլուն |a1plus.am|

a1plus.am: Հոկտեմբերի 11-ին, թուրքական կողմի նախաձեռնությամբ՝ հեռախոսազրույց է տեղի ունեցել Ռուսաստանի Դաշնության արտաքին գործերի նախարար Ս․ Լավրովի և Թուրքիայի արտաքին գործերի նախարար Մ. Չավուշօղլուի միջև: Այս մասին հայտնում է ՌԴ ԱԳՆ-ը։ Ըստ հաղորդագրության՝ մտքերի փոխանակություն է տեղի ունեցել Լեռնային Ղարաբաղի հակամարտության գոտում տիրող իրավիճակի վերաբերյալ, որն ի հայտ է եկել հոկտեմբերի 9-10-ը Մոսկվայում կայացած եռակողմ բանակցությունների արդյունքներից հետո: Նշվել է Ռուսաստանի Դաշնության, Ադրբեջանի Հանրապետության և Հայաստանի Հանրապետության արտաքին գործերի նախարարների համատեղ հայտարարության բոլոր դրույթների խստորեն կատարման անհրաժեշտությունը: Ռուսական կողմը վերահաստատել է պատրաստակամությունը շարունակելու ակտիվ միջնորդական ջանքերը ՝ ԼՂ հակամարտության խաղաղ կարգավորման գործընթացի ուղղությամբ ՝ հաշվի առնելով մոսկովյան հայտարարության դրույթները:

16:47 - 11 հոկտեմբերի, 2020

Չավուշօղլուն աջակցություն է հայտնել Բայրամովին |ermenihaber.am|

ermenihaber.am: Թուրքիայի արտաքին գործերի նախարար Մևլութ Չավուշօղլուն հեռախոսազրույց է ունեցել Ադրբեջանի արտգործնախարար Ջեյհուն Բայրամովի հետ։ Կողմերը քննարկել են Մոսկվայում կայացած հանդիպումը։ Չավուշօղլուն Բայրամովին հայտնել է, որ Թուրքիան միայն աջակցելու է Ադրբեջանի ընդունած որոշումներին։ ՌԴ նախագահ Վլադիմիր Պուտինը Հայաստանի ու Ադրբեջանի արտգործնախարարներին նախօրեին հրավիրել էր Մոսկվա։ ՌԴ արտգործնախարարի միջնորդությամբ ընթացած բանակցություններում հակամարտող կողմերը մարդասիրական նպատակով հրադադար հաստատելու հարցի շուրջ համաձայնության են հասել։

13:31 - 10 հոկտեմբերի, 2020

Անկարան պատրաստ է Բաքվին տրամադրել ցանկացած օգնություն․ |hetq.am|

hetq.am: Թուրքիան պատրաստ է Ադրբեջանին ցանկացած ոլորտում տրամադրել աջակցություն, եթե Բաքուն դրա կարիքն ունենա: Այս մասին երեքշաբթի օրը՝ հոկտեմբերի 6-ին, հայտարարել է Թուրքիայի արտաքին գործերի նախարար Մևլութ Չավուշօղլուն ՝ Ադրբեջանի նախագահ Իլհամ Ալիևի հետ Բաքվում կայացած հանդիպման ընթացքում: «Այսօր ադրբեջանական ժողովուրդը պայքարում է իր հողերի ազատագրման համար և ի վիճակի է իրագործել դա: Դրա համար նա ունի ուժ և պոտենցիալ: Իհարկե, Թուրքիան և թուրք ժողովուրդը պատրաստ են Ադրբեջանին աջակցություն տրամադրել ցանկացած ոլորտում, եթե Բաքուն դրա կարիքն ունենա»,- նշել է Թուրքիայի արտգործնախարարը: Չավուշօղլուն շեշտել է, որ եկել է Բաքու, որպեսզի «մեկ անգամ ևս ցույց տա Թուրքիայի և թուրք ժողովրդի կողմից ցուցաբերվող աջակցությունը Ադրբեջանին»: Ավելին՝ hetq.am-ում

19:43 - 06 հոկտեմբերի, 2020

Չավուշօղլուն քննադատել է ԵԱՀԿ Մինսկի խմբի աշխատանքը

Թուրքիայի արտգործնախարար Մևլութ Չավուշօղլուն ասել է, որ Ղարաբաղում հրադադարը արդյունք չի տվել, ԵԱՀԿ Մինսկի խումբը, որը զբաղվում է ղարաբաղյան հակամարտության կարգավորմամբ, չունի հստակ ծրագրեր և մեխանիզմներ խնդրի լուծման համար: Հայտնում է ria.ru-ն։ «Միջազգային հանրությունը հստակ մտադրություն չցուցաբերեց Ղարաբաղի հարցում, և ՄԱԿ-ի անվտանգության խորհրդի չորս բանաձևեր չկատարվեցին: Մեկ միլիոն ադրբեջանցի փախստականներ և ներքին տեղահանվածները սպասում են հայրենի հողեր վերադառնալուն... չպետք է լինեն երկակի ստանդարտներ»,- ասել է Չավուշօղլուն Բաքվում իր ադրբեջանցի գործընկեր Ջեյհուն Բայրամովի հետ ճեպազրույցում: Ըստ նրա՝ «այժմ բոլորը կոչ են անում դադարեցնել կրակը»: «Բազմիցս հանդիպել եմ ԵԱՀԿ Մինսկի խմբի համանախագահների հետ, հանդիպել տարեսկզբին։ Հարցրեցի նրանց ծրագրերի, նախագծի, մեխանիզմի մասին (Ղարաբաղում իրավիճակի լուծում): Ոչ։ «Օկուպանտին» ու «օկուպացիայի տակ» գտնվող կողմերին միշտ հավասար են պահում։ Ամբողջ աշխարհը պետք է հասկանա, որ չի կարող այսպես շարունակվել»,- շեշտեց Թուրքիայի արտգործնախարարը: Թարգմանությունը՝ Վաղինակ Ասատրյանի

17:51 - 06 հոկտեմբերի, 2020

Ալիևը գնահատել է Ադրբեջանի և Թուրքիայի համագործակցության կարևորությունը

Ադրբեջանի նախագահ Իլհամ Ալիևը հայտարարել է, որ Թուրքիայի քաղաքականությունը նախատեսված է խաղաղության համար և արդյունք է տալիս Մերձավոր Արևելքում և Կովկասում: Հայտնում է ria.ru-ն։ Երեքշաբթի օրը Ալիևը Բաքվում ընդունել է Թուրքիայի արտգործնախարար Մևլութ Չավուշօղլուի գլխավորած պատվիրակությանը: «Թուրքիայի քաղաքականությունը նախատեսված է միայն խաղաղության համար և արդյունքները տալիս է ոչ միայն Մերձավոր Արևելքում, այլ նաև` Կովկասում: Այսօր Հայաստանի կողմից հերթական հարձակման պատճառած իրավիճակը մեկ անգամ ևս ցույց է տալիս, որ Թուրքիան հեղինակություն ունի ինչպես տարածաշրջանում, այնպես էլ` աշխարհում: Իհարկե, դա մեզ ուժեղացնում է, ոգեշնչում: Այսօր մեր ժողովուրդները և ամբողջ աշխարհը տեսնում են, թե ինչ է նշանակում Թուրքիայի և Ադրբեջանի միությունը», - Ալիևի խոսքերը մեջբերում է մամուլի ծառայությունը: Թարգմանությունը՝ Վաղինակ Ասատրյանի

15:36 - 06 հոկտեմբերի, 2020

Չավուշօղլուն մեկնում է Բաքու, կքննարկի Ղարաբաղի հարցը |civilnet.am|

civilnet.am: Թուրքիայի արտաքին գործերի նախարար Մևլութ Չավուշօղլուն այցով մեկնել է Ադրբեջան: Նա Ադրբեջանի նախագահ Իլհամ Ալիևի հետ կքննարկի Լեռնային Ղարաբաղի իրավիճակը: Այս մասին ասվում է Թուրքիայի ԱԳՆ հայտարարության մեջ: «Թուրքիայի արտգործնախարար Մևլութ Չավուշօղլուն աշխատանքային այցով Ադրբեջան է մեկնում հոկտեմբերի 6-ին։ Այցի ընթացքում նրան կընդունի Ադրբեջանի նախագահ Իլհամ Ալիևը։ Նա նաև կարծիքներ կփոխանակի Լեռնային Ղարաբաղում տիրող իրավիճակի և տարածաշրջանային ու միջազգային այլ խնդիրների վերաբերյալ Ադրբեջանի ԱԳՆ ղեկավար Ջեյհուն Բայրամովի հետ», - ասված է հաղորդագրությունում:

11:26 - 06 հոկտեմբերի, 2020

Թուրքիայի ԱԳ նախարարը կրկին վստահեցնում է՝ Ադրբեջանի կողքին են |azatutyun.am|

azatutyun.am: Թուրքիայի արտգործնախարար Մևլյութ Չավուշօղլուն, «Անադոլու» գործակալության մամուլի սրահում խոսելով Արցախում վերսկսված ռազմական գործողությունների մասին, հերթական անգամ ընդգծել է Ադրբեջանին սատարելու Անկարայի պատրաստակամությունը: «Եթե Ադրբեջանը ուզում է մարտի դաշտում հարցը լուծել, մենք կլինենք Ադրբեջանի կողքին: Անհրաժեշտության դեպքում մեր աջակցությունը ցույց կտանք: Սակայն տեսնում ենք, որ Ադրբեջանը բավարար կարողություն ունի», - ասել է Չավուշօղլուն՝ շեշտելով, որ իբրև ռազմավարական դաշնակիցներ՝ Ադրբեջանի և Թուրքիայի ռազմատեխնիկական փոխգործակցությունը բնական երևույթ է: Թուրք նախարարը հիշեցրել է, որ հուլիսին Թուրքիան Հայաստանին նախազգուշացրել էր և սթափվելու լուրջ կոչեր արել: «Չնայած բոլոր զգուշացումներին, որտեղի՞ց Հայաստանին այդ համարձակությունը: Եթե Հայաստանը այսօր այլ երկրներից՝ Արևմուտքից, անգամ Ռուսաստանից աջակցություն չստանար, չէր համարձակվի նման քայլի գնալ», - պնդել է թուրք նախարարը: Նա վստահեցրել է, թե Թուրքիան հարցը դիվանագիտական, խաղաղ ճանապարհով լուծելու կողմնակից է եղել: «30 տարի է այս հարցը լուծում չի գտել: Մինսկի խումբը հստակ քայլեր չի ձեռնարկել: Ինչպես Սիրիայում՝ այստեղ էլ ուզում էինք Ռուսաստանի հետ համագործակցության ճանապարհով երկկողմանի կամ բազմակողմանի լուծման հասնել: Քանի որ հարցը չի լուծվում, Հայաստանը համարձակվում է հարձակման գնալ: Այս հարցը պետք է լուծել», - ասել է Չավուշօղլուն՝ հավելելով, թե Թուրքիան Ադրբեջանի կողքին է՝ որ ոլորտում ինչ օգնության կարիք ունենա:

16:14 - 30 սեպտեմբերի, 2020