«Լուսավոր Հայաստան» խմբակցություն

ՀՀ 7-րդ գումարման Ազգային ժողովի «Լուսավոր Հայաստան» խմբակցությունը ստեղծվել է 2019-ի հունվարի 14-ին։ Խմբակցությունում ընդգրկված է 17 պատգամավոր։

Խմբակցության ղեկավարն է Էդմոն Մարուքյանը, քարտուղարը՝ Գեւորգ Գորգիսյանը։ Մյուս պատգամավորներն են՝ Ալեքսանյան Սարգիս Ռոբերտի, Այվազյան Հրանտ Գնունու, Անդրեասյան Էդվարդ Հրաչի, Բաբայան Հարություն Վիլիկի, Բաղդասարյան Գուրգեն Նիկոլի, Գրիգորյան Սրբուհի Էդիկի, Եղիազարյան Արմեն Էդիկի, Թանդիլյան Մանե Վանյայի, Խաչատրյան Արկադի Սանասարի, Կոստանյան Աննա Մայիսի, Մինասյան Սարիկ Սամվելի, Սամսոնյան Անի Տաճատի, Սիմոնյան Կարեն Մանվելի, Սիմոնյան Տարոն Վարդանի, Ստեփանյան Ռուբիկ Շահումի։

Գնահատականակենտրոն կրթական համակարգի չեղարկում․ մանկավարժները պատրաստ չեն

Օրեր առաջ ԿԳՄՍ նախարար Արայիկ Հարությունյանը հայտնեց, որ նախարարության որոշման համաձայն՝ առնվազն 1-4-րդ դասարաններում աշակերտները չեն գնահատվի։ «Մենք այս որոշումը կայացրել ենք դեռ մինչ հեռավար կրթության անցնելը։ Լինելու են խրախուսման նոր մեթոդներ, որոնք մենք կներկայացնենք մեր ուսուցիչներին, վերապատրաստումներ կիրականացվեն։ Այս համակարգով մենք երեխային չենք կապում գնահատականին, այլ կապում ենք գիտելիքի և կրթության հետ»,- իր խոսքում ասել է նախարարը։ Վերջինս տեղեկացրել էր նաև, որ նախագիծը շուտով կդրվի շրջանառության մեջ։ Ներկայացված նախագծի առավելությունների և թերությունների վերաբերյալ infocom.am-ը զրուցել է «Կրթական քաղաքացիական նախաձեռնության» անդամ Վահրամ Սողոմոնյանի, «Լուսավոր Հայաստան» խմբակցության պատգամավոր Աննա Կոստանյանի և «Իմ քայլը» խմբակցության պատգամավոր Լիլիթ Ստեփանյանի հետ։ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի անդամ Աննա Կոստանյանը, անդրադառնալով առաջարկվող գաղափարին, ասաց․ «Սա կարծես դեռևս նախարարության կողմից բանավոր շրջանառվող միտք է, որքանով որ տեղյակ եմ՝ դեռևս նախագիծ չկա։ Կան դպրոցներ, որտեղ տարրական դասարաններում թվանշային գնահատումը փոխարինված է գունավոր աստղիկներով, և ուսուցչի հայեցողությամբ են երեխաները թվանշային գնահատում ստանում կամ ոչ։ Կարծում եմ՝ եթե հարցը դիտարկենք կրթական ռեֆորմների տեսանկյունից և գիտելիքին գերակայություն տալու համատեքստում, այո, գուցե կարելի է փորձարկել այս նոր՝ առանց գնահատման ուսուցման մեթոդը։ Սակայն, եթե դիտարկենք նաև վերջին շրջանում, հեռավար ուսուցմամբ պայմանավորված, դպրոցականների ոչ լիարժեք ներգրավվածության և դրանով պայմանավորված՝ մարտի 13-ից հետո գրանցած գնահատականների չեղարկման տեսանկյունից, կարծում եմ՝ վատագույն լուծումն է նախարարության կողմից»։ Վահրամ Սողոմոնյանը, անդրադառնալով հարցին, ասաց, որ այն դիմադրությունը, որին արժանանում է գնահատականների հետ կապված որոշումը, կապված են այն բանի հետ, որ ուսուցիչների և ծնողների կողմից մեծ ուշադրություն է հատկացվում գնահատականին։ «Բացի այդ կան որոշակի շահեր՝ ինչպես փակել կիսամյակը, ինչպես գոհացնել ծնողներին և այլն։ Սա ընդհանուր կրթության փիլիսոփայության հարցն է, որը պետք է փոխել, կենտրոնանալ ավելի շատ ինքնուրույն աշխատանքի, երեխաների գիտելիքների և հմտությունների վրա։ Գնահատականը չի կարող կատարել այն դերը, որը կատարում է հիմա»։ Աժ պատգամավոր Լիլիթ Ստեփանյանը մեզ հետ զրույցում ընդգծեց, որ վաղուց ժամանակը հասունացել էր, և սա ինչ-որ չափով դարձել էր խնդիր, որը պարտադիր լուծում էր պահանջում։ Վերջինիս խոսքով՝ նախարարության այս որոշմամաբ պետական հանրակրթական չափորոշիչների փոփոխություններով այս խնդիրը լուծվում է, որովհետև ամբողջ աշխարհում գնահատվում է գիտելիքը, թիմային աշխատանքը, երեխաների կարողությունները, հմտությունները և ոչ թե նյութի պարզ վերարտադրումը։ «Երբ անցնում ենք համընդհանուր ներառման, խոսել համընդհանուր ներառման կարևորությունից, փիլիսոփայությունից և խոսել միավորային գնահատման մասին, այն էլ տարական հատվածում, իմ կարծիքով՝ բոլորովին ճիշտ չի լինի, որովհետև համընդհանուր ներառման գաղափարը իր էությամբ հակադրվում է միավորային գնահատմանը։ Մոտ 15-20 տարվա ուսումնասիրությունները ցույց են տվել, որ հանրակրթական դպրոցներում գնահատման համակարգը այնուամենայնիվ չի աշխատում։ Սա կարելի է նկատել նաև հանրային դիսկուրսի շրջանակներում՝ այս որոշման դեպքում հասարակությունը դրական արձագանք տվեց»,- ասաց Ստեփանյանը։ Այն հարցին, թե ինչ մեթոդներով պետք է ընթանա աշակերտների գնահատման գործընթացը և արդյո՞ք աստղիկներով գնահատման նախկին կարգը արդյունավետ էր, Աննա Կոստանյանը պատասխանեց․ «Գնահատման արդյունավետության գնահատականը կարելի է տալ բացառապես նոր համակարգի ներդրման արդյունքում, երբ այն սկսի կիրառվել և ուսուցիչների կողմից վեր հանվեն բոլոր առաջացած և հնարավոր խնդիրները։ Այս մասին դատողություններ կարող են և պետք է անեն միմիայն կրթական ոլորտի փորձառու և առաջատար մասնագետները»։ Վերջինս իր խոսքում նշեց, որ իր որդու ուսուցչուհին առաջին դասարանում կիրառել է աստղիկային գնահատման մեթոդը, որը, այնուամենայնիվ, կրկին գնահատում է, բայց այն բավականին դրական է ազդել երեխաների հոգեբանության, մոտիվացիայի և ուսումնական առաջադիմության վրա, մի առավելությամբ, որ երեխաներն այդ ժամանակ այնքան էլ չէին կենտրոնանում աստղիկների վրա։ Անդրադառնալով արդեն գործող մեթոդներին՝ Սողոմոնյանն ասաց․ «Այդ մեթոդները որոշակի նշանակություն ունեն, կարող են երեխաներին ոգևորել, բայց նորից եմ ասում, որ ուսուցիչները գնահատականից անցնեն մոտիվացնելուն, անցնեն մանկավարժական այլ միջոցների, որոնք խորքային են և ավելի մեծ նշանակություն ունեն աշակերտի համար, քան ուղղակի թիվ նշանակելը, վարքի վրա ազդելու տարբեր ձևերը։ Գնահատականը չպետք է պատժի միջոց լինի երեխայի համար։ Դա դեմոտիվացնում է։ Ես գիտեմ, որ տարրական դասարանների շատ ուսուցիչներ մեծ դժգոհություն ունեն, թե ինչու են հանում գնահատականները տարրական դասարաններում, որովհետև դա որոշակիորեն արհեստական լծակների, քողարկված հարաբերությունների առարկա է եղել։ Եկեք ազնիվ լինենք ու խոստովանենք, որ գնահատականը չի ծառայելու կրթությանը, եթե ծնողը գոհ է, որովհետև երեխան բարձր գնահատական է ստացել, ուսուցիչն էլ իրեն լավ է զգում, բայց դրանից աշակերտի գիտելիքները չեն փոխվում»։ Լիլիթ Ստեփանյանը հավելեց, որ, իր կարծիքով, աստղիկներով, ժպիտներով կամ այլ մեթոդների կիրառումը նույնպես գնահատում էր, բայց այն չուներ իր մեջ այն թաքնված անորոշությունը, որը կարող էր թաքնվել միավորային գնահատման դեպքում։ Պատգամավորի խոսքով՝ շատ դեպքերում երեխայի ստացած միավորային գնահատումը չի արտացոլում երեխաների իրական գիտելիքների մակարդակը և այն մնացորդային գիտելիքը, որը ձևավորվում կամ արտահայտվում է միավորային գնահատման մեջ։ «Սա որոշ առումով խրախուսման ձև էր, բայց սա նաև գնահատման ձև էր։ Մենք դեռևս չունենք նախադպրոցական պարտադիր կրթություն, և երեխաները դպրոց են գնում մի մասը մանկապարտեզից, մյուս մասը՝ տնից, ընտանիքից, ՌԴ-ից, այսինքն՝ նրանք չեն անցել նախնական օղակը, նրանց ինչ-որ չափով մոտիվացիա էր պետք։ Ես կարծում եմ, որ այս մեթոդը սկզբնական շրջանում կօգնի ուսուցիչներին, քանի որ նրանք միանգամից պատրաստ չեն հրաժարվել գնահատման մեթոդից»,- ընդգծեց Ստեփանյանը։ Այն հարցին, թե ինչ ձևաչափ պետք է սահմանել, որպեսզի մոտիվացիայի գոծընթացը չտուժի, իսկ երեխանները անտարբերության չմատնեն դասերը, պատգամավոր Աննա Կոստանյանը պատասխանեց․ «Գնահատման սիստեմի չեղարկումը կամ փոփոխությունը չէ, որ պետք է մոտիվացնեն կամ դեմոտիվացնեն աշակերտին, այլ ուսումնական ծրագրերի տոտալ փոփոխությունները, իրական ռեֆորմները, այն նյութը, որը կստիպի այս տեխնոլոգիական և տեղեկատվական զարգացած աշխարհում երեխային հետաքրքրվել դասերի թեմաներով, ձգտում և մղում կառաջացնի դեպի ուսումնասիրվող առարկան և դրա նյութը»։ Հնչեցված հարցի շուրջ, մեր զրուցակից Լիլիթ Ստեփանյանի կարծիքով, ամենատարածված սխալն է, երբ երեխայի վարքի համար միավորային գնահատում է անցնում մատյան, որովհետև մատյանում դրված միավորային գնահատականը երեխայի գիտելիքների համար է։ Պատգամավորի խոսքով՝ երեխային ոգևորող կարող է լինել նաև ուսուցչի կողմից հնչեցված գովասանքի խոսքը, ժպիտը, որոնք նույնպես գնահատականման միջոց են։ Ստեփանյանը չհամաձայնեց այն կարծիքի հետ, թե ուսուցիչները որպես պատիժ օգտագործում են ցածր գնահատականներ դնելու մեթոդը։ Նա շեշտեց, որ նման դեպքերի քանակը փոքր է։ «Նորից շեշտենք, որ միավորային գնահատման կարգը հանվում է 1-4-րդ դասարաններում և 5-րդ դասարանի առաջին կիսամյակում։ 5-րդ դասարանի երկրորդ կիսամյակում երեխաները քիչ-քիչ կսկսեն միավորային գնահատական ստանալ։ Երբ երեխան առաջին անգամ դպրոց է գնում, նա ընդհանրապե ծանոթ չի լինում գնահատականին, գնահատման համակարգին, և այն, ինչ ուսուցիչը մատուցի աշակերտին, կդառնա նրա համար բնականոն և սովորական կրթական մաս»,- հավելեց պատգամավորը։ Մեր երեք զրուցակիցների կարծիքով էլ մանկավարժների մեծ մասը պատրաստ չէ այս փոփոխություններին, և մինչև դրան անցնելը պետք է վերապատրաստել ուսուցիչներին։ «Բոլոր ժամանակներում էլ մասնագետները սովորաբար ոչ բավարար պատրաստվածություն են ցուցաբերում փոփոխություններին ընդառաջ։ Եվ հենց սրանում էլ կայանում է կառավարության համապատասխան ոլորտը կարգավորող գերատեսչության աշխատանքի գրավչությունը, որպեսզի կարողանա ճիշտ ռազմավարություններ մշակի, իրական ռեֆորմներ նախաձեռնի և, դրանց ընդառաջ, նաև նախապատրաստի ոլորտի մասնագետներին։ Այս պահին կարծում եմ՝ դեռևս մեր մանկավարժներն ամբողջովին պատրաստ չեն սպասվող փոփոխություններին։ Որպես առաջին քայլ՝ պետք էր նախատեսել այդ մասնագետների և մանկավարժների որակավորման ու վերաորակավորման աշխատանքները, նոր միայն սկսել մեթոդական առանցքային փոփոխությունները»,- ասաց «Լուսավոր Հայաստան» խմբակցության պատգամավոր Աննա Կոստանյանը։ Սողոմոնյանը, եզրափակելով իր խոսքը, հավելեց․ «Շատ ճիշտ եք ասում, և պետք է հիմա լայնամասշտաբ վերապատրաստումներ սկսեն։ Դրանք կարելի է անել նաև առցանց եղանակով։ Մենք պետք է փոխենք մեր և մեր մանկավարժների մտածողությունը, մոտեցումներրը»։ Պատգամավոր Լիլիթ Ստեփանյանը նույնպես կարևորեց մանկավարժների վերապատրաստման գործընթացը։ Նա հավելեց, որ երկար տարիներ արմատացած մեթոդներով աշխատող ուսուցիչներին պետք է ասել՝ գնահատումը մնում է կրթական գործընթացի կարևոր մաս, բայց միավորային տեսք չի ունենա։ «Ես գտնում եմ, որ գնահատում չպետք է լինի նաև 10-12-րդ դասարաններում, քանի որ Բոլոնյան գործընթացի հիմնական շեշտադրումներից մեկն էլ այն էր, որ ավագ դպրոցի հոսքային դասարանում սովորած և քննությունները հաջողությամբ ավարտած երեխան կարող է առանց որևէ քննության ընդունվել բուհ։ Աշխարհի ոչ մի կրթական մոդել չունի գնահատականակենտրոն կրթական համակարգ»,- եզրափակեց Ստեփանյանը։ Ասպրամ Փարսադանյան

13:36 - 08 մայիսի, 2020

Հակաճգնաժամային միջոցառումներից օգտվել է 10 հազ. 531 իրավաբանական անձ և 639 հազ. 592 ընտանիք

Վարչապետ Նիկոլ Փաշինյանը կառավարությունում հանդիպում է ունեցել Ազգային ժողովի «Իմ քայլը», «Բարգավաճ Հայաստան» և «Լուսավոր Հայաստան» խմբակցությունների տնտեսական բլոկը ներկայացնող պատգամավորների հետ: Ինչպես տեղեկացրին ՀՀ վարչապետի աշխատակազմի տեղեկատվության և հասարակայնության հետ կապերի վարչությունից, իր խոսքում վարչապետը նախ անդրադարձել է կառավարության հակաճգնաժամային միջոցառումների ընթացքին: «Ինչպես գիտեք, կառավարությունն այս պահի դրությամբ ընդունել է 13 հակաճգնաժամային ծրագիր: Կառավարության վաղվա նիստում մենք ունենք առնվազն ևս մեկ ծրագիր, որը կապված է ուսանողների ուսման վարձերի փոխհատուցման հետ: Պլանավորում ենք նաև որոշ փոփոխություններ իրականացնել միջոցառումների մեջ, որոնցով կկարգավորենք այս ընթացքում ստացած ահազանգերը, ազդակները»,- նշել է Նիկոլ Փաշինյանը: Վարչապետը տեղեկացրել է, որ հակաճգնաժամային 1-ին միջոցառման շրջանակում, որով արտոնյալ պայմաններով վարկեր են տրամադրվում ընկերություններին՝ աշխատավարձ, հարկեր, կոմունալ ծախսեր վճարելու և որոշ դեպքերում սննդի ներկրումներ, սարքավորումկներ ձեռք բերելու համար, արդեն իսկ բավարարվել է 259 հայտ, ֆինանսավորման ծավալը կազմում է 18 մլրդ դրամ: 2-րդ ծրագրով, որը վերաբերվում է գյուղատնտեսությանը՝ բավականին լայն օրակարգով, այս պահի դրությամբ բավարարվել է 3 հազար 419 հայտ, ֆինանսավորման ծավալը կազմում է 4 մլրդ 827 մլն դրամ: «Նաև մենք որոշում կայացրեցինք 4 մլրդ դրամի չափով վերաֆինանսավորում իրականացնել, որից 2 մլրդ դրամը կծախսվի միկրովարկերի, իսկ ևս 2 մլրդը՝ 3-12 մլն դրամի գյուղատնտեսական ծրագրային և ոչ միայն ծրագրային վարկերի վրա: Ընդ որում, այսօրվա քննարկումների արդյունքում մենք որոշեցինք, որ այս խմբի վարկերի սահմանափաչափերը կավելացնենք և կդարձնենք 3-ից 30 մլն դրամ՝ մի շարք ծրագրային ուղղություններով»,- ասել է վարչապետը: 3-րդ ծրագրով, որ վերաբերվում է տուժած փոքր և միջին ձեռնարկատիրական գործունեությանը և այն ընկերություններին, որոնք ունեն բարվոք և բարվոքին մոտ հարկային ու վարկային պատմություն, բավարարվել է 371 հայտ, ֆինանսավորման ծավալը կազմում է 4,1 մլրդ դրամ: 4-րդ միջոցառումը, որը սոցիալական է, վերաբերվում էր այն աշխատողներին, ովքեր որոշակի ժամանակահատվածում կորցրել են աշխատանքը և որոնց ընտանիքներում կա մինչև 14 տարեկան երեխա: Պարզվել է, որ այս ծրագրով շահառուների թիվը 1955 է, ֆինանսավորվել 195 մլն դրամ: Ծրագիրն արդեն ավարտված է: Խոսելով 5-րդ ծրագրի մասին, որը նույնպես տնտեսական բնույթի և դրամաշնորհային, վարչապետն ասել է. «Դրամաշնորհ ենք հատկացնում այն ընկերություններին, որոնք պահպանել են նախաճգնաժամային ժամանակաշրջանի աշխատատեղերը և աշխատավարձի ֆոնդը: Խոսքը 2-50 աշխատող ունեցող ընկերությունների մասին է և յուրաքանչյուր 5-րդ աշխատողի աշխատավարձը դրամաշնորհի կարգով վճարում է կառավարությունը: Այս պահի դրությամբ դրամաշնորհ ենք տրամադրել 9 հազար 901 տնտեսվարողի, դրամաշնորհի ծավալը կազմել է 1 մլրդ 600 մլն դրամ»,- ասել է գործադիրի ղեկավարը: Սոցիալական բնույթի 6-րդ միջոցառումը վերաբերվում էր ճգնաժամի շրջանում՝ մարտի 13-ից 25-ը, աշխատանքը կորցրած քաղաքացիներին: Այս ծրագիրը նույնպես ավարտվել է: Այդ չափանիշին համապատասխանել է 6 հազար 723 շահառու, նրանց վճարվել է ընդհանուր 457 մլն դրամ: 7-րդ միջոցառումն աջակցում էր այն ընտանիքներին, որտեղ կա հղի կին և ամուսինն աշխատանքը կորցրել է ճգնաժամի շրջանում: Այս միջոցառումը նույնպես ավարտված է: Ծրագրից օգտվել է 8 հազար 753 շահառու, վճարվել է ընդհանուր 875 մլն դրամ: 8-րդ միջոցառումը, որը վերաբերվում էր տուժած ոլորտների անհատ ձեռնարկատերերին և ոլորտների աշխատողներին աջակցելուն, այս պահի դրությամբ բավարարվել է 83 հազար 406 հայտ և վճարվել է 5 մլրդ 777 մլն դրամ: «9-րդ միջոցառումը վերաբերվում է այն ընտանիքներին, որտեղ ընդհանրապես չկա աշխատող և որտեղ կան երեխաներ և մենք այս միջոցով փորձել ենք գտնել, այսպես ասած չգրանցված աշխատողներին: 7-րդ միջոցառումն էլ այդպիսի նպատակադրում ունի: 9-րդ միջոցառումով այս պահի դրությամբ բացահայտվել է 52 հազար 791 հայտ, վճարված գումարը 1,4 մլրդ դրամ է: Ասեմ, որ 8-րդ և 9-րդ միջոցառումների շրջանակում մենք սպասում ենք, որ կունենանք 100 հազար և ավելի շահառու»,- ասել է Նիկոլ Փաշինյանը: Անդրադառնալով 10-րդ միջոցառմանը՝ վարչապետը նշել է, որ այն վերաբերում է միկրոբիզնեսի սուբյեկտներին: Այս պահի դրությամբ բավարարվել է 1485 հայտ, վճարվել է 83,4 մլն դրամ: «11-12-րդ միջոցառումները վերաբերվում են շահառուների կոմունալ ծախսերին: 11-րդ միջոցառման պարագայում ունենք 450 հազար 827 շահառու, ընդ որում այս թիվը պետք է համարյա կիսով չափ կրճատել, որովհետև հաշվառված են և գազի, և էլեկտրաէներգիայի շահառուները: Իհարկե ոչ ամբողջությամբ, որովհետև կլինեն շահառուներ, որոնք ունեն էլեկտրաէնեգիա, իսկ գազ չունեն: Այստեղ վճարված է 786 մլն դրամ: Այս ծրագրի շրջանակում գումարը փոխանցվում է շահառուների բաժանորդային հաշվիներին: 12-րդ ծրագիրը նույնպես վերաբերվում էր կոմունալ վարձերին: Այստեղ նույնպես թիվը պետք է մոտավորապես 40 տոկոսով կրճատել, շահառուները 486 հազար 434-ն են, վճարվել է 1,8 մլրդ դրամ»,- ասել է կառավարության ղեկավարը: 13-րդ միջոցառումը, որը վերաբերվում է նպաստառու ընտանիքներին նպաստի գծով աջակցություն ցույց տալուն, ունի 85 հազար 906 շահառու ընտանիք, որոնց կվճարվի 1 մլրդ 252 մլն դրամ: Այս վճարումը կիրականացվի ապրիլ ամսվա նպաստների հետ միասին: Ամփոփելով՝ վարչապետը նշել է. «Այս պահի դրությամբ կառավարության ընդունած հակաճգնաժամային միջոցառումներից օգտվել է 10 հազար 531 իրավաբանական անձ և մոտ 639 հազար 592 ընտանիք: Հակաճգնաժամային միջոցառումների շրջանակում տեղաբաշխվել է 29 մլրդ 900 մլն դրամ: Մենք նաև հակաճգնաժամային բնույթ կամ դրա հետ առնչություն ունեցող որոշ որոշումներ ենք կայացնում, որոնք չեն հաշվառվում որպես հակաճգնաժամային միջոցառումներ: Այսօր Ազգային ժողովում Հարկային օրենսգրքի փոփոխությունների առաջարկը քննարկվեց, որն, այսպես ասած, միացյալ նախաձեռնություն էր: Շարունակում ենք ամենօրյա ռեժիմով աշխատանքը և իհարկե նաև ձեր օգնությամբ առավելագույնը կանենք, որպեսզի մեր աջակցության ծրագրերը լինեն արդյունավետ և հասցեական»: Այնուհետև փոխվարչապետ, պարետ Տիգրան Ավինյանը տեղեկատվություն է ներկայացրել կորոնավիրուսի համավարակի հետ կապված իրավիճակի վերաբերյալ: Տիգրան Ավինյանն ընդգծել է, որ իրավիճակը վերահսկելի է և օրական անցկացվող թեստերի քանակը հասցվել է 1000-ի: Պարետը նաև խոսել է թույլատրելի տնտեսական գործունեության ոլորտների ընդլայնման շուրջ հնարավոր որոշումների մասին: Հանդիպման ընթացքում մտքեր են փոխանակվել հակաճգնաժամային միջոցառումների, ինչպես նաև համավարակի կանխարգելման ուղղությամբ իրականացվող քայլերի վերաբերյւալ: Վարչապետը և կառավարության անդամները պատասխանել են պատգամավորներին հուզող հարցերին և ներկայացրել պարզաբանումներ:

21:10 - 22 ապրիլի, 2020