Պաղեստին

Դե յուրե ինքնիշխան պետություն Միջին Արեւելքում՝ Հորդանան գետի արեւմտյան ափին (սահմանակցում է Իսրայելին եւ Հորդանանին) եւ Գազայի հատվածին (սահմանակցում է Իսրայելին եւ Եգիպտոսին), որի մայրաքաղաքն է համարվում Արեւելյան Երուսաղեմը՝ չնայած վարչական կենտրոնը Ռամալլահում է: Պաղեստին պետության մեծ հատվածն, ըստ համացանցի աղբյուրների, օկուպացված է Իսրայելի կողմից՝ 1967 թվականի Վեցօրյա պատերազմից հետո:

Երկրորդ համաշխարհային պատերազմից հետո, 1947 թվականին ՄԱԿ-ը հաստատեց Բաժանման նախագիծը Պաղեստինի համար, որը հորդորում էր ստեղծել անկախ արաբական եւ հրեական պետություններ` առանձնացնելով Երուսաղեմը, որը պետք է ղեկավարվեր ՄԱԿ-ի հատուկ միջազգային կառավարման ռեժիմով: Հրեական պետության հիմնադրումից հետո, որը 1948 թվականի մայիսի 14-ին ստացավ Իսրայել անվանում, ներքաշվեց պատերազմների մեջ արաբական բանակների հետ: Ավելի ուշ Արաբական լիգայի կողմից ստեղծվեց Համապաղեստինյան կառավարությունը, որը կառավարեց Եգիպտոսի կողմից վերահսկվող Գազայի հատվածը: Այն շուտով ճանաչվեց Արաբական լիգայի անդամ բոլոր պետությունների կողմից՝ բացառությամբ Հորդանանի: Չնայած Համապաղեստինյան կառավարությունը իրեն հռչակեց ոչ միայն Գազայի հատվածի, այլ ամբողջ նախկին Բրիտանական Պաղեստինի կառավարիչ, այն միայն սահմանափակվում էր Գազայի հատվածով: Իսրայելը ավելի ուշ նվաճեց Գազայի հատվածը եւ Սինայի թերակղզին Եգիպտոսից, Հորդանանի գետի արեւմտյան ափը Հորդանանից եւ Գոլանի բարձունքները՝ Սիրայից՝ Վեցօրյա պատերազմի ընթացքում:

Նեթանյահու. «Իսրայելի բանակը պետք է մշտական վերահսկողություն պահպանի Գազայի հատվածի վրա» |azatutyun.am|

azatutyun.am: Իսրայելական բանակը պետք է մշտական վերահսկողություն պահպանի Գազայի հատվածի վրա և չհանձնի այն արտաքին ուժերին։ Այդ մասին Իսրայելի վարչապետ Բենյամին Նեթանյահուն հայտարարել է Գազայի հատվածին մոտ գտնվող մունիցիպալիտետների ղեկավարների հետ հանդիպմանը: Նրա խոսքով՝ սահմանամերձ շրջանների տեղական իշխանությունները վարչապետից պարզություն են պահանջել, թե ինչ է լինելու Գազայի հատվածի հետ իսրայելական ուժերի ներկայիս ռազմական գործողության ավարտից հետո։ «Իսրայելի պաշտպանական ուժերը կպահպանեն վերահսկողությունը հատվածի վրա, մենք այն չենք հանձնի արտաքին ուժերին»,- պատասխանել է Նեթանյահուն: Վարչապետը տեղական խորհուրդների ղեկավարներին ասել է, որ «Իսրայելն անվտանգության հսկողություն է իրականացնելու Գազայի հատվածում՝ ներառյալ ամբողջական ապառազմականացումը, որպեսզի համոզվի, որ Գազայից այլևս չի լինի սպառնալիք Իսրայելի քաղաքացիներին»:

21:59 - 10 նոյեմբերի, 2023

Փարիզում մեկնարկել է Գազային հումանիտար օգնության թեմայով համաժողովը |armenpress.am|

armenpress.am: Ֆրանսիայի նախագահ Էմանուել Մակրոնը Փարիզում համաժողով է անցկացնում Գազային հումանիտար օգնության թեմայով։ Համաժողովին մասնակցում են ավելի քան 50 երկրների, ինչպես նաև ՄԱԿ-ի գործակալությունների և հասարակական կազմակերպությունների տարբեր պաշտոնյաներ։ Այս մասին հաղորդում է France 24 պարբերականը։ Իր ելույթում Մակրոնը նշել է, որ հարկավոր է Գազայի հատվածում մարտերի հումանիտար դադար տալ, և որ երկրները պետք է աշխատեն Իսրայելի և պաղեստինյան ՀԱՄԱՍ արմատական շարժման միջև ընթացող պատերազմում հրադադարի հասնելու շուրջ։ Մակրոնի խոսքով՝ Իսրայել-ՀԱՄԱՍ պատերազմում Գազայի խաղաղ բնակիչներն են «գին վճարում»։ «Ահաբեկչության դեմ պայքարը երբեք չպետք է տարվի՝ առանց կանոնների։ Իսրայելը դա գիտի։ Ահաբեկչության թակարդը բոլորիս համար նույնն է՝ տրվել բռնությանը և հրաժարվել մեր արժեքներից», - ասել է Ֆրանսիայի նախագահը։ ՄԱԿ-ի Մերձավոր Արևելքում Պաղեստինի փախստականների օգնության և աշխատանքների գործակալության ղեկավար Ֆիլիպ Լազարինին հայտարարել է, որ Գազայում շարունակական հումանիտար օգնության, այդ թվում՝ վառելիքի կարիք կա։ Նրա պնդմամբ՝ «Ռաֆահ» անցակետով Եգիպտոսից մտնող օգնությունը բավարար չէ, և պետք է բացվեն Գազա տանող բոլոր անցակետերը։ Իսրայելի իշխանությունները Փարիզում ընթացող համաժողովին չեն մասնակցում, սակայն, ըստ հրապարակման, Ֆրանսիայի նախագահը համաժողովի ավարտից հետո պետք է հեռախոսազրույց ունենա Իսրայելի վարչապետ Բենյամին Նեթանյահուի հետ։ Ինչպես ավելի վաղ հայտնել էր «Արմենպրես»-ը, վկայակոչելով The New York Times-ը, Կատարի միջնորդությամբ բանակցություններ են ընթանում, որպեսզի ՀԱՄԱՍ-ն ազատ արձակի մինչև 15 պատանդների՝ հումանիտար հրադադարի դիմաց, որը թույլ կտա Գազայի հատված մարդասիրական օգնություն մատակարարել։ Հոկտեմբերի 7-ին պաղեստինյան ՀԱՄԱՍ արմատական շարժման հարձակման հետևանքով Իսրայելում 1400 մարդ սպանվել է, շուրջ 240 մարդ՝ գերեվարվել։ Գազայի հատվածում Իսրայելի հարվածներից զոհերի թիվը գերազանցել է 10 500-ը․ նրանց 40 %-ը երեխաներ են։

16:26 - 09 նոյեմբերի, 2023

Բլինքեն․ «Ոչ «Համասը» և ոչ էլ Իսրայելը չեն կարող կառավարել Գազան» |azatutyun.am|

azatutyun.am: «Իսրայելը չի կարող կառավարել Գազան, սակայն չի բացառվում, որ այժմ ընթացող հակամարտության ավարտին այստեղ անցումային շրջան սահմանվի», - Ճապոնիա կատարած այցի ընթացքում այսօր հայտարարել է Միացյալ Նահանգների պետքարտուղար Էնթոնի Բլինքենը։ «Համաս»-ը չի կարող շարունակել Գազայի կառավարումը, քանի որ դա կհանգեցնի հոկտեմբերի 7-ի իրադարձությունների կրկնությանը։ Հստակ է նաև, որ Իսրայելը չի կարող կրկին օկուպացնել Գազան։ Այն, ինչ մեզ ասում են Իսրայելի ղեկավարները, վկայում է, որ նրանք նման մտադրություն չունեն», - նշել է ամերիկյան դիվանագիտության ղեկավարը։

15:05 - 08 նոյեմբերի, 2023

Գազայի հատվածում զոհերի թվը գերազանցել է 10,4 հազարը, վիրավորներինը՝ 27 հազարը |tert.am|

tert.am: Հոկտեմբերի 7-ից առ այսօր Գազայի հատվածում Իսրայելի գործողությունների հետևանքով զոհված պաղեստինցիների թիվը գերազանցել է 10,4 հազարը։ Այս մասին հաղորդում է Al-Qahera Al-Ekhbariya հեռուստաալիքը՝ հղում անելով Պաղեստինի առողջապահության նախարարությանը։ Ըստ գերատեսչության տվյալների՝ հակամարտության սրման սկզբից ի վեր սպանվել է 10,468 մարդ, վիրավորում է ստացել ավելի քան 27 հազարը։

20:00 - 07 նոյեմբերի, 2023

Նեթանյահուն հայտարարել է, որ պատրաստ է մարտերում փոքր դադարների, բայց ոչ հրադադարի |armenpress.am|

armenpress.am: Իսրայելի վարչապետ Բենյամին Նեթանյահուն հայտարարել է, որ իր երկիրը կարող է դիմել մարտերում «փոքրիկ մարտավարական դադարների», որպեսզի թույլ տա Գազայի հատված հումանիտար օգնության մատակարարում կամ այնտեղից գերիների դուրսբերում։ Այնուամենայնիվ, նա մերժել է հրադադարի կոչերը՝ չնայած միջազգային ճնշմանը։ Այս մասին Նեթանյահուն հայտնել է ABC News պարբերականին տված հարցազրույցում։ «Գազայում համընդհանուր հրադադար տեղի չի ունենա՝ առանց մեր գերիների ազատ արձակման։ Ինչ վերաբերում է փոքր մարտավարական դադարներին՝ մեկ ժամ այստեղ, մեկ ժամ այնտեղ, ապա մենք նախկինում էլ նման բան արել ենք։ Կարծում եմ՝ հաշվի կառնենք հանգամանքները, որպեսզի թույլ տանք, որ ապրանքները, հումանիտար ապրանքները ներս մտնեն կամ մեր գերիները, առանձին գերիներ, դուրս բերվեն։ Բայց չեմ կարծում, թե համընդհանուր հրադադար կլինի», - հայտնել է Նեթանյահուն։ Իսրայելի վարչապետը հավելել է, որ հրադադարը կխոչընդոտեր պատերազմ վարելու իր երկրի ջանքերին, ինչպես նաև գերիներին ազատ արձակելու գործընթացին, քանի որ պաղեստսինյան ՀԱՄԱՍ արմատական շարժման վրա, Նեթանյահուի համոզմամբ, միայն ազդում է «մեր գործադրած ռազմական ճնշումը»։ ԱՄՆ նախագահ Ջո Բայդենը նոյեմբերի 6-ին Բենյամին Նեթանյահուի հետ հեռախոսազրույցում վերահաստատել է իր աջակցությունն Իսրայելին և շեշտել խաղաղ բնակիչներին պաշտպանելու անհրաժեշտությունը։ Գազա քաղաքը շրջափակման մեջ վերցնելուց հետո Իսրայելը հայտարարել է ՀԱՄԱՍ-ի ռազմական օբյեկտներից մեկը գրավելու և ստորգետնյա թունելներում թաքնվող զինյալների վրա հարձակում սկսելու մասին։ Հոկտեմբերի 7-ին Իսրայելի վրա ՀԱՄԱՍ-ի անակնկալ հարձակումից հետո, երբ Իսրայելում սպանվեց 1400 մարդ, իսկ 240 մարդ գերեվարվեց, Իսրայելը շարունակում է հարվածներ հասցնել Գազայի հատվածին։ Այդ հարվածների հետևանքով պաղեստինցիների շրջանում զոհերի թիվը գերազանցել է 10 000-ը, նրանց թվում կա 4100 երեխա։ Թե՛ Իսրայելը, թե՛ ՀԱՄԱՍ-ը անտեսել են ռազմական գործողությունները դադարեցնելու կոչերը։ Իսրայելը պնդում է, որ նախ ազատ արձակվեն գերիները, իսկ ՀԱՄԱՍ-ը հայտարարում է, որ նրանք ազատ չեն արձակվի, քանի դեռ Գազան հարվածների է ենթարկվում։

09:41 - 07 նոյեմբերի, 2023

ԱՄՆ-ն շարունակում է մերժել պաղեստինա-իսրայելական հակամարտության գոտում հրադադարի հաստատման կոչերը, դա համարում ենք պարտվողական լուծում․ Սպիտակ տուն |tert.am|

tert.am: Միացյալ Նահանգները շարունակում է նախկինի պես մերժել պաղեստինա-իսրայելական հակամարտության շրջանակներում «ընդհանուր հրադադարի հաստատման» կոչերը։ Այս մասին, ինչպես հայտնում է ՏԱՍՍ գործակալությունը, հայտարարել է Սպիտակ տան Ազգային անվտանգության խորհրդի խոսնակ Ջոն Քիրբին։ «Մենք դեռ չենք կարծում, որ համընդհանուր հրադադարն այս պահին տեղին է։ Երբ խոսում ենք հրադադարի մասին, նկատի ունենք ռազմական գործողությունների ամբողջական դադարեցումն ամբողջ տարածաշրջանում, ինչն այս պահին համարում ենք պարտվողական լուծում և, հետևաբար, չենք աջակցում դրան» - ասել է Քիրբին։

09:25 - 07 նոյեմբերի, 2023

Գազայի հատվածում զոհերի թիվը գերազանցել է 10 հազարը. Պաղեստինի ԱՆ |armenpress.am|

armenpress.am: Հակամարտության սրվելուց ի վեր Գազայի հատվածում ավելի քան տասը հազար մարդ է զոհվել։ Ինչպես հայտնում է «Ռիա Նովոստի»-ն, այս մասին նշվել է Պաղեստինի առողջապահության նախարարության տարածած հաղորդագրության մեջ։ Աղբյուրի տեղեկությամբ՝ Գազայի հատվածում ավիահարվածների հետևանքով զոհվածների թիվը հասել է 10 հազար 22-ի, այդ թվում՝ 4104-ը՝ երեխա։

20:56 - 06 նոյեմբերի, 2023

Նեթանյահուն կառավարության նիստերից հեռացրել է նախարարներից մեկին՝ միջուկային զենքի հնարավոր կիրառման մասին հայտարարության համար |1lurer.am|

1lurer.am: Իսրայելի վարչապետ Բենիամին Նեթանյահուն Երուսաղեմի և հրեական պետության ժառանգության հարցերով նախարար Ամիհայ Էլիյահուին հեռացրել է կառավարության նիստերին մասնակցելուց՝ Գազայի հատվածին միջուկային հարված հասցնելու հնարավորության մասին նրա հայտարարությունից հետո։ «Ամիհայ Էլիյահուի բառերը չեն համապատասխանում իրականությանը։ Իսրայելը և ՑԱԽԱԼ-ը գործում են միջազգային իրավունքի բարձրագույն չափանիշներին համապատասխան»,- ասել է Նեթանյահուն: Ընդդիմության առաջնորդ Յաիր Լապիդը միջուկային հարվածի մասին բառերն անվանել է «սարսափելի և խելագար» և Նեթանյահուին կոչ է արել պաշտոնանկ անել Էլիյահուին: «Լավ է, որ Իսրայելի անվտանգության համար պատասխանատու չեն այդ մարդիկ»,- ասել է պաշտպանության նախարար Յոավ Գալանտը: Ավելի վաղ, Kol Berama ռադիոկայանի եթերում Էլիյահուն հայտարարել էր, որ Գազայի հատվածի վրա միջուկային ռումբ նետելը դիտարկվող տարբերակներից մեկն է։ Ժամեր անց նախարարը նշել է, որ ատոմային ռումբի մասին պնդումը փոխաբերական է։

11:56 - 06 նոյեմբերի, 2023

Իսրայելի զինվորականները մուտք են գործել Գազայի հատվածի տակ գտնվող թունելներ |armeniasputnik.am|

armeniasputnik.am: Իսրայելի զինված ուժերը Գազայի հատվածի հյուսիսում հայտնաբերել են ստորգետնյա թունելների մուտքեր, հայտնում է Իսրայելի պաշտպանության բանակը։ «Իսրայելի պաշտպանության ուժերը Գազայի հյուսիսում օպերատիվ գործողությունների ընթացքում հայտնաբերել են բազմաթիվ մուտքեր (թունելներ - խմբ.), - ասվում է բանակի հայտարարության մեջ, որը հրապարակվել է «X» սոցիալական ցանցում: Նոյեմբերի 4-ին Իսրայելի պաշտպանության բանակը հայտարարեց, որ «սպանել է տասնյակ մարտիկների և ոչնչացրել է պաղեստինյան ՀԱՄԱՍ շարժման ենթակառուցվածքը Գազայի հատվածում»:

10:52 - 05 նոյեմբերի, 2023

Էրդողանը հայտարարել է, որ խզում է կապերը Իսրայելի վարչապետի հետ |azatutyun.am|

azatutyun.am: Թուրքիայի նախագահ Ռեջեփ Էրդողանը այսօր հայտարարել է, որ խզում է կապերը Իսրայելի վարչապետ Բենյամին Նեթանյահուի հետ Գազայի հատվածում Իսրայելի գործողությունների պատճառով։ «Նեթանյահուն այլևս որևէ մեկը չէ, ում հետ մենք կարող ենք խոսել, մենք նրան դուրս ենք գրել», - Աստանայից Թուրքիա վերադառնալու ճանապարհին նախագահական օդանավում ասել Էրդողանը լրագրողներին, հավելելով, թե ջանքեր կգործադրվեն, ամեն ինչ կանի Իսրայելի կողմից մարդու իրավունքների խախտումների և պատերազմական հանցագործությունների գործը Միջազգային քրեական դատարան հասցնելու համար։ «Մեր համապատասխան գերատեսչությունները, մասնավորապես, Արտգործնախարարությունը կանի այդ աշխատանքը», - նշել է Թուրքիայի ղակավար։ Էրդողանը միաժամանակ ասել է, որ կապերը լիովին խզել հնարավոր չէ, հատկապես միջազգային դիվանագիտության մեջ։ Նա հայտնել է, որ Թուրքիայի հետախուզական ծառայության ղեկավար Իբրահիմ Քալընը գլխավորում է Թուրքիայի միջնորդական ջանքերը պատերազմը ավարտելու համար։ Նա բանակցում է իսրայելական կողմի, ինչպես նաև Պաղեստինի ու «Համաս»-ի հետ։ Իսկ Նեթանյահուն, Էրդողանի խոսքերով՝ կրում է բռնության գլխավոր պատասխանատվությունը և կորցրել է իր քաղաքացիների աջակցությունը։ Էրդողանը հայտարարել է, որ բախումներից հետո Թուրքիան պատրաստ է Գազայի համար հանդես գալ որպես երաշխավոր երկիր։ Միեւնույն ժամանակ Թուրքիան հետ է կանչել Թել Ավիվում Անկարայի դեսպան Շաքիր Թորունլարին՝ Գազայի հատվածում տեղի ունեցող իրադարձությունների հետ կապված խորհրդակցությունների համար։

17:04 - 04 նոյեմբերի, 2023

Իսրայելի բանակի և պաղեստինյան դիմադրության ուժերի միջև կատաղի բախումներ են Գազայի հյուսիսում և Հորդանան գետի արևմտյան ափին |1lurer.am|

1lurer.am: Արաբական լրատվամիջոցները գրում են, որ իսրայելական բանակի և պաղեստինյան դիմադրության մարտիկների միջև կատաղի բախումներ են Գազայի հատվածի հյուսիսում՝ Էրեզ անցակետի մոտ և Հորդանան գետի արևմտյան ափին։ Իսրայելի պաշտպանության բանակը հայտնում է Գազայի հատվածում ՀԱՄԱՍ-ի կարևոր հենակետի գրավման մասին։ ՑԱԽԱԼ-ի տվյալով՝ հայտնաբերվել են հետախուզության համար արժեքավոր նյութեր: Ըստ իսրայելական կողմի՝ պատասխան հարվածներ են հասցվել նաև Լիբանանի տարածքին: Al Jazeera-ն տեղեկացրել է, որ Իսրայելը հարվածել է Գազա քաղաքի՝ ՄԱԿ-ին պատկանող կրթական հաստատությանը, որտեղ հազարավոր փախստականներ են եղել, կան տասնյակ զոհեր և վիրավորներ: Պաղեստինյան Կարմիր մահիկն էլ հայտնել է իսրայելական ուժերի կողմից Ալ-Շիֆա հիվանդանոցի շտապօգնության մեքենաների թիրախավորման մասին, նշվում է, որ մեքենաները վիրավորների էին տեղափոխում Եգիպտոսի հետ սահման: Հայտնի է տասնյակ զոհերի և վիրավորների մասին: ՑԱԽԱԼ-ը հայտարարել է՝ հարվածել են շտապօգնության մեքենաներին, քանի որ դրանք տեղափոխել են ոչ թե քաղաքացիական անձանց, այլ ՀԱՄԱՍ-ի զինյալների: Իսրայելի բանակը հիշեցրել է՝ բազմիցս զգուշացրել են խաղաղ բնակիչներին՝ լքել ռազմական գործողությունների գոտին: Իսրայելի նախագահ Իսահակ Հերցոգն էլ հայտարարել է, որ պաղեստինցիների տառապանքը կավարտվի, երբ ՀԱՄԱՍ-ը ոչնչացվի։

14:48 - 04 նոյեմբերի, 2023

Ոմանք կցանկանային, որ «Հըզբոլլահը» ներքաշվեր լայնամասշտաբ պատերազմի մեջ․ Հասան Նասրալլա |factor.am|

factor.am: Լիբանանի «Հըզբոլլահ» արմատական խմբավորման ղեկավար Հասան Նասրալլան Իսրայելի և ՀԱՄԱՍ-ի միջև պատերազմի սկսվելուց ի վեր առաջին անգամ դիմել է Լիբանանում և ամբողջ աշխարհում իր կողմնակիցներին: Նա ՀԱՄԱՍ-ի հարձակումը 100 տոկոսով պաղեստինյան գործողություն է անվանել, սակայն չի բացառել ապագայում «Հըզբոլլահի» զինյալների և Իսրայելի միջև հակամարտության սրման հավանականությունը: BBC-ի ռուսական ծառայության փոխանցմամբ՝ Հասան Նասրալլան գովաբանել է ՀԱՄԱՍ-ին հոկտեմբերի 7-ին Իսրայելի վրա հարձակման համար՝ հայտարարելով, որ զինյալները գործել են «ճիշտ, իմաստուն և արդար»: Նա նաև շնորհակալություն է հայտնել Եմենում և Իրաքում ծայրահեղական խմբավորումներին՝ Իսրայելի դեմ իրենց պայքարին մասնակցելու համար: «Հըզբոլլահը» Լիբանանի ամենամեծ ռազմաքաղաքական ուժն է։ ԱՄՆ-ը և Արևմուտքի այլ երկրներ այն ահաբեկչական կազմակերպություն են ճանաչել ։ Այս պահին «Հըզբոլլահի» զինյալները հարձակումներ են իրականացնում իսրայելցի զինվորականների վրա լիբանանա-իսրայելական սահմանին և գնդակոծում Իսրայելի տարածքը: Բախումները գնահատվում են բավականին ինտենսիվ, ՑԱԽԱԼ-ը լրացուցիչ ուժեր է կենտրոնացրել իր հյուսիսային սահմանների մոտ, սակայն մինչ օրս չի համարվում, որ «Հըզբոլլահ»-ը ՀԱՄԱՍ-ի կողմից պաշտոնապես պատերազմի մեջ է մտել Իսրայելի դեմ: Ա մեն ինչ կարող էր փոխվել Նասրալլայի երկար սպասված ելույթից հետո, բայց կարծես թե լիբանանյան խմբավորումը պատրաստ չէ բարձրացնել հակամարտության խաղադրույքները: Շիա խմբավորման առաջնորդի ելույթը համընկել է ԱՄՆ պետքարտուղար Էնթոնի Բլինքենի Իսրայել այցի հետ։ Շեյխ Հասան Նասրալլայի խոսքերով՝ Իսրայելի կանխարգելիչ հարվածը Լիբանանին կլինի Իսրայելի ամենամեծ սխալը իր գոյության ամբողջ ընթացքում: Նա հավելել է, որ իր գլխավորած «Հըզբոլլահ» շարժման գործողությունները ստիպել են ՑԱԽԱԼ-ին ուժերի մի մասը տեղափոխել Լիբանանի հետ սահման: «Ոմանք ասում են, որ «Հըզբոլլահը» պատրաստվում է պայքարի մեջ մտնել։ Ես ձեզ ասում եմ՝ մենք այդ մարտը վարում ենք հոկտեմբերի 8-ից։ Ոմանք կցանկանային, որ «Հըզբոլլահը» ներքաշվեր լայնամասշտաբ պատերազմի մեջ, բայց ես կարող եմ ձեզ ասել, որ այն, ինչ հիմա տեղի է ունենում իսրայելա-լիբանանյան սահմանի երկայնքով, մեծ նշանակություն ունի, և դա վերջը չէ»,- հայտարարել է Նասրալլան։ Իսրայելի վրա ՀԱՄԱՍ-ի հարձակումից հետո իր առաջին հրապարակային հայտարարության մեջ Նասրալլան նաև հայտարարել է, որ «Հըզբոլլահ» շարժումը, իբր, ոչինչ չի իմացել ՀԱՄԱՍ-ի՝ հոկտեմբերի 7-ի հարձակմանը նախապատրաստվելու մասին:

10:53 - 04 նոյեմբերի, 2023

Պաղեստինի նախագահը հեռախոսազրույց է ունեցել Հռոմի պապի հետ |news.am|

news.am: Պաղեստինի նախագահ Մահմուդ Աբասը հինգշաբթի երեկոյան հեռախոսազրույց է ունեցել Հռոմի պապ Ֆրանցիսկոսի հետ, որի ընթացքում կողմերը քննարկել են Գազայի հատվածում և Հորդանան գետի Արևմտյան ափում իրավիճակի վատթարացումը։ Պոնտիֆիկոսը «խորը տխրություն է հայտնել քաղաքացիական զոհերի համար և վստահեցրել է, որ առաջիկայում կապի մեջ կմնա նախագահ Աբասի հետ՝ հետագա խորհրդակցությունների և օգնության համար», հաղորդում է WAFA պաղեստինյան լրատվական գործակալությունը։ Հռոմի պապն ընդգծել է «խաղաղության հասնելու և պատերազմի ավարտի կարևորությունը [Մերձավոր Արևելքում] և ամբողջ աշխարհում, ինչպես նաև բոլորին ժամանակին մարդասիրական օգնություն տրամադրելու հրատապ անհրաժեշտությունը»: Իր հերթին, Աբասը մատնանշել է Գազայի հատվածում հրադադարի հասնելու Վատիկանի ջանքերի կարևորությունը։ «Նախագահ Աբասը շեշտեց Վատիկանի շարունակական ջանքերի կենսական նշանակությունը՝ զինադադարի հասնելու և Գազայի հատվածում Իսրայելի ագրեսիայի անհապաղ դադարեցման: Նա ընդգծել է խաղաղ բնակիչներին պատերազմի սարսափներից խնայելու անհրաժեշտությունը, հատկապես հաշվի առնելով Իսրայելի դաժան հարձակումները Գազայի հատվածում անմեղ խաղաղ բնակիչների վրա», - հաղորդում է WAFA-ն:

11:32 - 03 նոյեմբերի, 2023

Իսրայելի Պաշտպանության բանակը հայտարարել է Գազա քաղաքի շրջափակման մասին |panorama.am|

panorama.am: Իսրայելի պաշտպանության բանակի (ՑԱԽԱԼ) ուժերն այս պահին գտնվում են Գազայի հատվածի վարչական կենտրոնի տարածքում և շրջապատում են այն մի շարք ուղղություններից: Այս մասին հայտարարել է Իսրայելի բանակի գլխավոր շտաբի պետ Հերցի Հալևին, փոխանցում է «Իզվեստիա»-ն։ «Մեր զինվորներն այժմ արդեն Գազա քաղաքում են՝ շրջապատելով այն մի քանի կողմերից, և ես տեսնում եմ, թե ինչպես ենք մենք առաջընթաց գրանցում: Մենք ստիպված ենք կռվել շատ ծանր իրավիճակում՝ խիտ բնակեցված, կառուցապատված տարածքում»,- ասվում է Իսրայելի պաշտպանության բանակի Telegram-ի ալիքում։ Ավելի վաղ ՑԱԽԱԼ-ը հայտնել էր Գազայի հատվածի հյուսիսում մի քանի ահաբեկչական բջիջների հետ բախման մասին: Նշվում է, որ ռազմական գործողությունների ընթացքում սպանվել են տասնյակ ահաբեկիչներ։ Զինծառայողները նաև հարված են հասցրել ջոկատին, որը նախատեսում էր հակատանկային հրթիռներ արձակել իսրայելցիների ուղղությամբ:

09:32 - 03 նոյեմբերի, 2023

Բահրեյնը խզել է տնտեսական հարաբերություններն Իսրայելի հետ և հետ կանչել իր դեսպանին |factor.am|

factor.am: Բահրեյնը Իսրայելից հետ է կանչել իր դեսպանին և խզել տնտեսական հարաբերությունները հրեական պետության հետ։ Այս մասին հայտնել է երկրի Ներկայացուցիչների խորհուրդը (խորհրդարանի ստորին պալատը), փոխանցում է ՌԻԱ Նովոստին։ «Սա Բահրեյնի ամուր պատմական դիրքորոշման հաստատումն է Պաղեստինի գործին և եղբայրական պաղեստինյան ժողովրդի օրինական իրավունքների պաշտպանությանը, ինչպես Նորին Մեծություն թագավորը հայտարարել է բոլոր համաժողովների և միջոցառումների ժամանակ»,- ասել են օրենսդիրները: Բահրեյնում Իսրայելի դեսպանը նույնպես լքել է թագավորությունը։

22:41 - 02 նոյեմբերի, 2023

Ջաբալիա ճամբարի վրա հարձակումների հետևանքով, ըստ ՀԱՄԱՍ-ի տվյալների, զոհվել է մոտ 200 մարդ |shantnews.am|

shantnews.am: Առնվազն 195 մարդ է զոհվել, ևս 777-ը վիրավորվել է երեքշաբթի և չորեքշաբթի Գազայի հատվածում գտնվող Ջեբալիա ճամբարին իսրայելական բազմակի հարվածների հետևանքով, հայտնում է Reuters-ը՝ հղում անելով ՀԱՄԱՍ շարժմանը։ «Առնվազն 195 պաղեստինցի է զոհվել երեքշաբթի և չորեքշաբթի Գազայի հատվածում գտնվող Ջաբալիա փախստականների ճամբարի վրա Իսրայելի հարձակումների հետևանքով»,- ասվում է գործակալության հաղորդագրության մեջ։ Մոտ 120 մարդ անհետ կորել է, եւս 777-ը վիրավորվել է։ CNN-ը, հղում անելով Գազայի հատվածում գտնվող ինդոնեզական հիվանդանոցի տնօրենին, ավելի վաղ հայտնել էր, որ չորեքշաբթի օրը Գազայի Ջաբալիա ճամբարին իսրայելական նոր հարվածի հետևանքով առնվազն 80 մարդ է զոհվել: ՄԱԿ-ի Մարդու իրավունքների գերագույն հանձնակատարի գրասենյակը չորեքշաբթի նախազգուշացրել է, որ իսրայելական ուժերի կողմից Գազայի հատվածում փախստականների Ջաբալիա ճամբարի գնդակոծումը կարող է համարվել ռազմական հանցագործություն:

10:34 - 02 նոյեմբերի, 2023