Ուկրաինա

Ուկրաինան գտնվում է Արևելյան Եվրոպայում։ Այն հյուսիսից և հյուսիս-արևելքից սահմանակից է Ռուսաստանին, հյուսիս արևմուտքից՝ Բելառուսին, արևմուտքից՝ Լեհաստանին, Սլովակիային և Հունգարիային, հարավ արևմուտքից՝ Մոլդովային, հարավից և հարավ-արևելքից համապատասխանաբար Սև ծովին և Ազովի ծովին։

Այն 603,628 կմ² ցուցանիշով Եվրոպային հարակից երկրների մեջ Ռուսաստանի Դաշնությունից հետո երկրորդն է իր տարածքով։ Գործող նախագահը Վլադիմիր Զելենսկին է։

Միջազգային քրեական դատարանը պատրաստվում է հետաքննել Ուկրաինայում «ռազմական գործողությունների ընթացքում մարդկության դեմ հանցագործությունների» հարցը |tert.am|

tert.am: Միջազգային քրեական դատարանը (ՄՔԴ) պատրաստ է հետաքննել Ուկրաինայում և Ղրիմում տիրող իրավիճակը: Այս մասին գրում է «ՌԻԱ Նովոստի»-ն` վկայակոչելով դատարանի գլխավոր դատախազ Ֆաթու Բենսուդայի խոսքերը:Նշվում է` ՄՔԴ-ն քննարկում է Ուկրաինայում «ռազմական գործողությունների ընթացքում իրականացված հանցագործությունների և մարդկության դեմ հանցագործությունների» հարցը, ինչպես նաև Ղրիմում տիրող իրավիճակը: Այս իրադարձությունների նախնական ուսումնասիրությունը սկսվել էր 2014 թվականի ապրիլի 24-ին ՝ Ուկրաինայի կառավարության հատուկ հայտարարությունից հետո:Մոսկվան հերքում է Կիևի մեղադրանքները՝ շեշտելով, որ Ռուսաստանն ուկրաինական ներքաղաքական հակամարտության կողմ չէ, և շահագրգռված է, որ Կիևը հաղթահարի քաղաքական և տնտեսական ճգնաժամը:

12:08 - 12 դեկտեմբերի, 2020

Հայաստանը կրկին հայտնվել է Ուկրաինայի «կանաչ» ցանկում |armenpress.am|

armenpress.am: : Հայաստանի Հանրապետությունը կրկին հայտնվել է Ուկրաինայի «կանաչ» ցանկում։ Այս մասին հայտնում է Ուկրաինայում ՀՀ դեսպանությունը: «Ըստ այդմ, առնվազն մինչև դեկտեմբերի 18-ը, Հայաստանից Ուկրաինա ժամանող ուղևորներից, եթե նրանք վերջին 14 օրվա ընթացքում չեն եղել այլ՝ «կարմիր» ցանկի պետությունում, COVID-19-ի թեստավորում կամ ինքնամեկուսացում չի պահանջվելու։ Միաժամանակ, COVID-19 ծածկող ապահովագրության առկայության պահանջը մնում է ուժի մեջ (բացի Ուկրաինայի քաղաքացիներից և Ուկրաինայում մշտական բնակչի կարգավիճակ ունեցող օտարերկրացիներից)»,- նշված է հաղորդագրության մեջ:

22:01 - 11 դեկտեմբերի, 2020

Ուկրաինայում անցկացվել են Սպիտակի երկրաշարժի զոհերի հիշատակին նվիրված միջոցառումներ |armenpress.am|

armenpress.am: Ուկրաինայի բոլոր հայկական եկեղեցիներում և մատուռներում Սպիտակի երկրաշարժի զոհերի հիշատակին պատարագ է մատուցվել: Ինչպես հաղորդում է «AnalitikaUA.net»-ը, Կիևում Սրբոց Նահատակաց մատուռում աղոթքը հնչել է Հայ Առաքելական եկեղեցու Ուկրաինայի թեմի առաջնորդ Մարկոս եպիսկոպոս Հովհաննիսյանի գլխավորությամբ: Հոգեհանգստյան արարողությանը ներկա են եղել Ուկրաինայում Հայաստանի արտակարգ և լիազոր դեսպան Տիգրան Սեյրանյանը, Ուկրաինայում Հայերի միության, ինչպես նաև Կիևի հայ համայնքի ներկայացուցիչները: Պարբերականը նշում է, որ երկրի շատ շրջաններում հայկական համայնքներն ամեն տարի տարբեր միջոցառումներ են կազմակերպում՝ նվիրված Սպիտակի երկրաշարժի զոհերի հիշատակին:

22:01 - 07 դեկտեմբերի, 2020

Ուկրաինան մտադիր է Թուրքիայի հետ ազատ առևտրի գոտի ստեղծել |ermenihaber.am|

ermenihaber.am: Ուկրաինայի վարչապետ Դենիս Շմիգալը Թուրքիայի նախագահ Ռեջեփ Թայիփ Էրդողանի հետ քննարկել է երկու երկրների միջև առևտրատնտեսական և էներգետիկ համագործակցությունը, ինչպես նաև ազատ առևտրի գոտու մասին համաձայնագրի ստորագրման հեռանկարները: Այս մասին հայտնել է Ուկրաինայի նախարարների կաբինետի մամուլի ծառայությունը։ Նշվում է, որ Շմիգալ-Էրդողան հանդիպումը կայացել է, Ուկրաինայի վարչապետի Թուրքիա կատարած այցի շրջանակում։ «Կողմերը քննարկել են առևտրատնտեսական և էներգետիկ, ինչպես նաև տրանսպորտի և պաշտպանական-արդյունաբերական ոլորտներում համագործակցությունը։ Վարչապետն ընդգծել է ռազմավարական համագործակցության ուղղություններով երկկողմ երկխոսության ակտիվացման ուղղությամբ Ուկրաինայի և Թուրքիայի նախագահների միջև ձեռք բերված պայմանավորվածությունների կարևորությունը»,-ասված է հաղորդագրության մեջ: Ուկրաինայի կառավարության ղեկավարը նաև հայտարարել է, որ «ազատ առևտրի գոտու մասին համաձայնագրի կնքման շուրջ բանակցությունների ավարտն Ուկրաինայի և Թուրքիայի երկկողմ հարաբերությունների օրակարգի կարևորագույն հարցերից մեկն է»։ «Կարծում եմ՝ մեր երկրները բավարար ներուժ ունեն, որպեսզի ընդհանուր առևտրի ծավալը կրկնապատկվի՝ հասնելով տարեկան 10 մլրդ դոլարի»,- ասել է Շմիգալը: Ավելի վաղ Ուկրաինայի նախագահ Վլադիմիր Զելենսկին Թուրքիա կատարած այցի ընթացում հանդիպում էր ունեցել Թուրքիայի նախագահ Ռեջեփ Թայիփ Էրդողանի հետ։ Հանդիպմանը կողմերը համաձայնության էին եկել երկու երկրների միջև ազատ առևտևտրի գոտու ստեղծման մասին համաձայնագրի կնքման շուրջ։

16:29 - 02 դեկտեմբերի, 2020

Ուկրաինան Թուրքիայի հետ համատեղ ռազմական անօդաչու թռչող սարքերի արտադրություն է սկսում |azatutyun.am|

azatutyun.am: Ուկրաինան Թուրքիայի հետ համատեղ ռազմական անօդաչու թռչող սարքերի արտադրություն է սկսում։ Այս մասին հայտարարել է Ուկրաինայի արտգործնախարար Դմիտրի Կուլեբան։ Պաշտոնական Կիևն իր գոհունակությունն է հայտնել Անկարայի հետ համագործակցության արդյունավետության և բարձր մակարդակի կապակցությամբ։ «Եթե մենք հաջողենք, իսկ ամեն ինչ հենց այդ մասին է խոսում, ապա կկարողանանք իրականացնել տարբեր ավելի մեծ և հավակնոտ նախագծեր՝ համաշխարհային մակարդակի», - հայտարարել է ուկրաինական դիվանագիտության ղեկավարը: Ուկրաինացի նախարարը նաև նշել է, որ Լեռնային Ղարաբաղում տեղի ունեցած պատերազմում դրսևորվել են ռազմական գործողությունների վարման նոր տեսակներ, և ուկրաինացի գեներալները որպես օրինակ ուսումնասիրում են Ղարաբաղյան պատերազմի փորձը։

17:53 - 28 նոյեմբերի, 2020

Մոլդովայի նորընտիր նախագահը հայտարարել է, որ Ղրիմը համարում է Ուկրաինայի տարածք |tert.am|

tert.am: Մոլդովայի նորընտիր նախագահ Մայա Սանդուն ուկրաինական Европейская Правда-ին տված հարցազրույցում հայտարարել է, որ Ղրիմը համարում է Ուկրաինայի տարածքը։ՌԻԱ Նովոստի-ի փոխանցմամբ՝ Սանդուն նշել է, որ թերթին տված իր նախորդ հարցազրույցից (2016 թվական) ի վեր այդ հարցում դիրքորոշումը չի փոխվել։«Ես այդ մասին ասել եմ, երբ վարչապետ էի, և վստահեցնում եմ, որ կխոսեմ ճիշտ նույն կերպ, երբ նախագահ դառնամ»,-հայտարարել է Սանդուն:Ընդ որում, նա խոստովանել է, որ Մոլդովայի քաղաքացիներն այդ հարցի վերաբերյալ տարբեր դիրքորոշումներ ունեն, և կան մարդիկ, ովքեր համաձայն չեն իր հայացքների հետ։Սանդուն նաև հայտարարել է, որ իր կարծիքով՝ Մերձդնեստրում հակամարտության լուծումը պետք է տեղի ունենա ռուս խաղաղապահների ամբողջական դուրսբերման միջոցով։

13:33 - 21 նոյեմբերի, 2020

Ուկրաինական SkyUp Airlines ավիաընկերությունը վերսկսում է չվերթները դեպի Հայաստան |armenpress.am|

armenpress.am: Ուկրաինական SkyUp Airlines բեռնափոխադրող ավիաընկերությունը վերսկսում է չվերթները դեպի Հայաստան: Ինչպես տեղեկացնում է AnalitikaUA.net-ը, ավիաընկերության կայքում հրապարակվել է նոյեմբերի 23-ից Երևան ժամանող տոմսերի վաճառքը: Ուկրաինական МАУ ավիաընկերությունը 2020 թվականի դեկտեմբերի 4-ից վերսկսում է դեպի Երևան չվերթները ՝ կապված տարածաշրջանում իրավիճակի կայունացման հետ:

00:06 - 21 նոյեմբերի, 2020

«Ուկրաինայի միջազգային ավիաուղիներ»-ը վերսկսում է թռիչքները դեպի Հայաստան |armenpress.am|

armenpress.am: «Ուկրաինայի միջազգային ավիաուղիներ» ընկերությունը 2020 թվականի դեկտեմբերի 4-ից վերսկսում է թռիչքները դեպի Հայաստան՝ կապված տարածաշրջանում կայուն իրավիճակի հետ: Թռիչքներն իրականացվելու են դեպի Երևան՝ «Զվարթնոց» օդանավակայան շաբաթական երկու անգամ: Ավելի վաղ ընկերությունը հետաձգել էր դեպի Երևան թռիչքները՝ կապված կոնֆլիկտի շրջանում անվտանգության բարձր ռիսկի հետ:

10:14 - 20 նոյեմբերի, 2020

Ուկրաինան կալանք է դրել 44 ռուսաստանյան ինքնաթիռների վրա Ղրիմ ավիափոխադրումների պատճառով |armenpress.am|

armenpress.am: Ըստ Ուկրաինայի հատուկ ծառայությունների հետաքննիչների նյութերի, կալանք Է դրվել ռուսաստանյան ավիափոխադրողներից մեկի 44 մարդատար ինքնաթիռների վրա, որոնք խախտել են Ղրիմի տարածք մուտքի ու ելքի կարգը: «Մինչդատական հետաքննությամբ պարզվել Է, որ ներկայում ՌԴ-ի 37 ավիաընկերություններ կանոնավոր ավիափոխադրումներ են իրականացնում բռնակցված թերակղզի՝ խախտելով ուկրաինական օրենսդրության նորմերը»,-ասվում Է հաղորդագրության մեջ: Նրանում նշվում Է, որ կալանք դնելը եւ հետագա հետաքննչական գործողությունների անցկացումը հնարավորություն կտա սահմանափակել այդ ավիափոխադրողների ինքնաթիռների թռիչքները, այդ թվում՝ եվրոպական երկրներ, հաղորդել Է «Ինտերֆաքս»-ը:

13:20 - 18 նոյեմբերի, 2020

Կորոնավիրուսով վարակված Ուկրաինայի նախագահը հոսպիտալացվել է․ DW |factor.am|

factor.am: Աշխարհի երկրները պայքարում են SARS-CoV-2 կորոնավիրուսի տարածման երկրորդ ալիքի դեմ: Համաճարակի սկզբից ի վեր վարակը հայտնաբերվել է մոլորակի ավելի քան 52 միլիոն բնակչի մոտ: Ըստ Worldometer պորտալի, ավելի քան 1,2 միլիոն մարդ է մահացել վիրուսի հարուցած COVID-19 թոքային հիվանդության հետևանքով, ապաքինվել է գրեթե 36 միլիոն մարդ։ Գրում է DW-ի ռուսական ծառայությունը։ Ուկրաինայի նախագահ Վլադիմիր Զելենսկին և նախագահի աշխատակազմի ղեկավար Անդրեյ Երմակը, որոնք վարակվել են կորոնավիրուսային հիվանդությամբ, հոսպիտալացվել են և այժմ բուժում են ստանում Պետական կառավարման վարչության «Ֆեոֆանիա» կլինիկական հիվանդանոցում: «Այնտեղ կա հատուկ գրասենյակ, որտեղ նախագահը կարող է խորհրդակցություններ անցկացնել: Միակ սահմանափակումը մեկուսացումն է», – «Ուկրաինսկայա պրավդային» ասել է «Երմակի» խորհրդական Միխայիլ Պոդոլյակը: Նրա խոսքով ՝ Զելենսկին չի շփվում նաև իր ընտանիքի անդամների հետ, չնայած կինն արդեն հիվանդացել է COVID-19- ով:

13:03 - 12 նոյեմբերի, 2020

Անհրաժեշտ է համահայկական միասնականություն. Ուկրաինայի հայերի միությունը հայտարարություն է տարածել |armenpress.am|

armenpress.am: Կիևում նոյեմբերի 10-ին կայացել է Ուկրաինայի Հայերի միության Կիևի և Երևանի օպերատիվ շտաբների համատեղ նիստը՝ Հայաստան օգնության տրամադրման և կազմակերպման հարցով: AnalitikaUA.net-ը տեղեկացնում է, որ հայրենակիցներին օգնություն տրամադրելու ուղղությամբ աշխատանքներրի համակարգմանն ուղղված քննարկումներից բացի նիստի մասնակիցները՝ Արցախում և Հայաստանում վերջին իրադարձությունների վերաբերյալ հայտարարությամբ հանդես եկան: «Ուկրաինայի Հայերի Միությունը կոչ է անում Հայաստանի քաղաքական ուժերին պահպանել կայունություն, իսկ բոլոր անհրաժեշտ քայլերն իրականացնել երկրի Սահմանադրությանը համապատասխան: Մեզ բոլորիս պետք է համահայկական միասնականություն՝ հաղթանակին հասնելու համար: Արցախում ռազմական գործողություններ սկսելու առաջին իսկ օրվանից ու մինչ օրս՝ Ուկրաինայի հայերի միության կողմից հսկայական աշխատանք է տարվել համապատասխան օժանդակություն ցուցաբերելու ուղղությամբ: Մենք շարունակելու ենք աջակցություն ցուցաբերել այն մարդկանց, որոնք տուժել են պատերազմի հետևանքով: Մեր խորին երախտագիտությունն ենք հայտնում սրտացավ այն բոլոր քաղաքացիներին, ովքեր անտարբեր չմնացին մեր պատմական հայրենիքի համար դժվար օրերին և իրենց օգնությունը ցուցաբերեցին: Մեր միասնական աշխատանքի շնորհիվ մենք կարողացանք օգնել պատերազմի հետևանքով իրենց տները կորցրած մարդկանց: Մեր բոլոր հայրենակիցներին կոչ ենք անում պահպանել հանգստություն և չկորցնել ոգու արիությունը: Խնդրում ենք լինել ուշադիր և չտրվել սադրանքների»,-ասված է հայտարարությունում: Նիստը, որ անցկացվեց կազմակերպության ղեկավար Վիլեն Շատվորյանի գլխավորությամբ, հատուկ ուշադրություն հատկացվեց Ուկրաինայում բնակվող հայրենակիցների անվտանգության խնդրին: Առանձնահատուկ շեշտվեց օրենքներին հետևելն ու պրովոկացիաներին ոչ մի կերպ չենթարկվելու անհրաժետությունը: Միջոցառմանը ներկա էին Ուկրաինայում Հայաստանի արտակարգ և լիազոր դեսպան Տիգրան Սեյրանյանը և Հայ Առաքելական եկեղեցու Ուկրաինայի թեմի առաջնորդ Մարկոս Հովհաննիսյանը:

09:57 - 11 նոյեմբերի, 2020

Ուկրաինայում ՀՀ դեսպան Տիգրան Սեյրանյան արձագանքել է Խարկիվում տեղի ունեցած «հրաձգությանը»

Ուկրաինայում ՀՀ դեսպան Տիգրան Սեյրանյանի հարցազրույցը «Ուկրաինա-24» հեռուստաընկերությանը` Խարկիվի «հրաձգության» վերաբերյալ․ «Ես չգիտեմ, Խարկիվում հրաձգություն եղել է, թե ո՜չ: Մամուլից եմ իմացել: Սա շատ նման է սադրանքի: Եթե նույնիսկ կրակել են, մենք չգիտենք, թե ով է դա արել: Համոզված եմ, որ հայկական համայնքային կազմակերպությունները ոչ մի կապ չունեն դրա հետ: Եվ ընդհանրապես, որտեղի՞ց այդպիսի վստահություն, որ հայերն անպայման կապ ունեն դրա հետ: Պատվավոր հյուպատոսները, որպես կանոն, ներգրավված են ինչ-որ առևտրային, տնտեսական գործունեության մեջ: Միգուցե սա հենց դրանով է պայմանավորվա՞ծ: Միգուցե հենց իրե՞նք են ինչ-որ բան արել սադրանքի նպատակով: Ես չգիտեմ։ Դա պետք է պարզեն իրավապահ մարմինները, և, եթե կան հանցագործներ, ապա կան համապատասխան օրենք և համապատասխան պատժամիջոցներ: Պետք չէ միանգամից եզրակացություններ անել: Ես կցանկանայի նշել հայ համայնքի, Ուկրաինայի հայերի միության դիրքորոշման մասին, որին ես լիովին սատարում եմ: Այն կայանում է նրանում, որ Ուկրաինան մարտի դաշտ չվերածել: Խոշոր համայնքներն այստեղ են ապրում, և հետևանքները կարող են անկանխատեսելի լինել: Եվ դա նրան {հայ համայնքին} հաջողվում է, ի տարբերություն ադրբեջանական կողմի, որը որոշ ժամանակ առաջ բուռն, կրակոցներով ուղեկցվող, ավտոերթ էր կազմակերպել Կիևի կենտրոնում: Կցանկանայի նշել, որ ադրբեջանական քարոզչության ոգով նման սադրանքները կարող են մաս կազմել բախումներ հրահրելու կամ բնակության երկրներում հասարակական կարծիքը հայերի, Հայաստանի դեմ ուղղորդելու մի ընդհանուր արշավի։ Ցավոք, նման դեպքեր եղել են նաև այլ երկրներում: Նմանատիպ մի բան վերջերս անհաջող կերպով փորձում էին հայկական կողմի վրա բարդել Բալթյան երկրներից մեկում, ավելին՝ նրանք փորձեցին կրոնական երանգ հաղորդել: Այսպիսով, պետք է հանգստանալ և թույլ տալ, որպեսզի իրավապահներն աշխատեն: Տվյալ պահին այսքանը կարող եմ ասել այս հարցով»:

01:04 - 08 նոյեմբերի, 2020

Ուկրաինայի հայ համայնքի մարդասիրական օգնության հերթական խմբաքանակը հասավ Երևան |1lurer.am|

1lurer.am: Ուկրաինայի հայերը շարունակում են մարդասիրական օգնություն տրամադրել իրենց հայրենիքին: Ինչպես հայտնում է AnalitikaUA.net-ը՝ Ուկրաինայի հայերի միության գործադիր տնօրեն Հովակիմ Հարությունյանի տեղեկացրել է, որ երեկ Երևանում դիմավորել են Ուկրաինայից ժամանած 5 բեռնատար (100 տոննա) մարդասիրական օգնությամբ: Եվս 40 տոննա բեռ պատրաստվում է առաքման դեպի Հայաստան: Հայրենիքին տրամադրած օգնության թվում են շտապօգնության մեքենաներ, ամենագնաց-ռեանիմամոբիլներ, գեներատորներ, բժշկական սարքավորումներ, սնունդ, առաջին օգնության պարագաներ, հագուստ, անվասայլակներ և շինանյութեր: «Ուկրաինայի հայերի միության կողմից ավելի քան 2500 կարիքավորներին ամենօրյա սնունդ և անհրաժեշտ օգնություն է տրամադրվում: 100-ից ավելի ընտանիքի օգնություն է ցուցաբերվել ժամանակավոր կացարանի հարցում»,- ասաց Հարությունյանը: Նշենք, որ պատերազմի առաջին իսկ օրերից Կիևում և Երևանում գործում էին Ուկրաինայի հայերի միության օպերատիվ շտաբներ, որոնք օգնություն են տրամադրում Հայաստանի հայրենակիցներին: Աշխատանքային խմբում ընդգրկված էին Ուկրաինայի հայերի միության նախագահ Վիլեն Շատվորյանը, Հայ առաքելական եկեղեցու Ուկրաինայի թեմի առաջնորդ Մարկոս Հովհաննիսյանը, տարածաշրջանային հայկական համայնքների ղեկավարներ, ինչպես նաև կամավորներ Հայաստանից: Այս պահին ընդհանուր առմամբ մի քանի հարյուր տոննա բեռ է բերվել Հայաստան:

11:48 - 06 նոյեմբերի, 2020

Ուկրաինան մոտ է կորոնավիրուսային աղետի․ Առողջապահության նախարար Մաքսիմ Ստեպանով |azatutyun.am|

azatutyun.am: Ուկրաինայում կորոնավիրուսի իրավիճակը մոտ է աղետալի դառնալուն, և երկիրը պետք է պատրաստ լինի վատթարագույնին, այսօր ասել է առողջապահության նախարար Մաքսիմ Ստեպանովը: Անցած 24 ժամվա ընթացքում Ուկրաինայում արձանագրվել է ավելի քան 8 հազար 800 նոր դեպք, վարակվածների ընդհանուր թիվը 400 հազարից ավելին է, հիվանդությունից մահացել է 7 հազար 532 մարդ։ «Բարդ իրավիճակը արագորեն փոխվում է աղետալիի, մենք պետք է պատրաստ լինենք անխուսափելիին՝ երկրորդ ալիքը հնարավոր չէ հեշտ հաղթահարել։ Եթե ուկրաինացիները շարունակեն անտեսել անվտանգության կանոնները, ապա մենք չենք խուսափի աղետից։ Առջևում ամենադժվարն է», - Գերագույն ռադայում այսօր ասել է Ուկրաինայի առողջապահության նախարարը։

14:38 - 03 նոյեմբերի, 2020

Ուկրաինան զենք է մատակարարում Ադրբեջանին․ Ուկրաինայի Գերագույն ռադայի պատգամավոր Իլյա Կիվա

Ուկրաինայի Գերագույն ռադայի «Ընդդիմադիր պլատֆորմից` Կյանքի համար» կուսակցության պատգամավոր Իլյա Կիվան ասել է, որ ինքը տեղեկություններ ունի Կիևից Ադրբեջան զենք մատակարարելու մասին։ Այս մասին գրում է ria.ru-ն։ «Ինձ հայտնի է դարձել, որ Ուկրաինան ակտիվորեն ներգրավված է Հայաստանի դեմ ուղղված Ադրբեջանի և Թուրքիայի ռազմական հակամարտությանը։ Ուկրաինան զենք է մատակարարում Ադրբեջանին։ Հաջորդ բեռը «Укрспецэкспорт» -ից հասցվել է Ստամբուլ, իսկ այնտեղից` Բաքու, որտեղ ստացողը Ադրբեջանի ՊՆ-ն է , - ուրբաթ օրը ասել է Կիվանն իր տելեգրամյան ալիքում: Թարգմանությունը ՝Վաղինակ Ասատրյանի

21:44 - 30 հոկտեմբերի, 2020

Ֆելիքս Ցոլակյանի մոտ քննարկվել են ազդարարման և իրազեկման միջոցների արդիականացման հնարավորությունները

Այսօր ԱԻ նախարար Ֆելիքս Ցոլակյանը հանդիպում է ունեցել Հայաստանի հեռահաղորդակցության ոլորտի ընկերությունների գլխավոր տնօրենների հետ: Հանդիպմանը մասնակցել են ԱԻ նախարարի տեղակալ Ա. Հարությունյանը, «ՄՏՍ ՀԱՅԱՍՏԱՆ» ՓԲԸ գլխավոր տնօրեն Ռ. Յիրիկյանը, «ՅՈՒՔՈՄ» հեռահաղորդակցության ընկերություն ՓԲԸ գլխավոր տնօրեն Ա. Խաչատրյանը, «ՎԵՈՆ ԱՐՄԵՆԻԱ» ՓԲԸ գլխավոր տնօրեն Ա. Պյատախինը և «ՎԵՈՆ ԱՐՄԵՆԻԱ» ՓԲԸ իրավաբանական բաժնի պետ Մ. Կալեջյանը: Նախարար Ցոլակյանը կարևորելով համագործակցությունը այս ոլորտի ընկերությունների հետ, ընդգծել է քաղաքացիական պաշտպանության ոլորտում կոնկրետ ուղղություններով համագործակցության ընդլայնման անհրաժեշտությունը: ԱԻ նախարարի տեղակալ Ա. Հարությունյանը մասնավորեցրել է 911 ծառայության թվայնացման, ազդարարման համակարգերի արդիականացման, ինչպես նաև բնակչության իրազեկման գործընթացում նորագույն լուծումներ կիրառելու խնդիրները: Ընկերությունների ղեկավարները պատրաստակամություն են հայտնել տեղերում քննարկել նորագույն լուծումների տեխնիկական հնարավորությունները և առաջարկել հստակ տարբերակներ: Այս ուղղությամբ կապի օպերատորների մասնագետների հետ կաշխատի նաև նախարարության համապատասխան ներկայացուցիչը:

15:52 - 23 հոկտեմբերի, 2020